1. ¿Kunsa Jehová Diosajj jiwasat suyi?

 MÄ CHACHA warmin wawapajj nasi ukhajj walpun jupanakajj kusisipjje. Jichhak nasit wawaparojj wal munasipjje, ukampis janiw wiñayatak asu wawäskakiñap munapkiti. Janitï wawapajj jiltjjaspa ukhajj wal llakisipjjaspa. Jehová Diosampejj ukhamarakiwa, jupar serviñ qalltktan ukhajj walpun kusisi, ukampis janiw wiñay ‘jiskʼa wawäskakiñas’ munkiti (1 Cor. 3:1). Jan ukasti taqe cristianonakan ‘jilïr jaqer’ tukupjjañapwa muni (1 Cor. 14:20).

2. ¿Kuna jisktʼanakarus aka yatichäwin qhanañchaskañäni?

² Aka yatichäwin aka jisktʼanakaruw qhanañchaskañäni: ¿Jilïr cristianöñajj kamsañs muni? ¿Kunsa Diosar serviñan suma saytʼatäñatakejj lurañasa? ¿Kunjamsa Biblian cheqa yatichäwinakap sum yatjjatañajj Diosamp sum apasiñatak yanaptʼistu? ¿Kunatsa jiwas pachpar jan confiyasiñasäki?

¿JILÏR CRISTIANÖÑAJJ KAMSAÑS MUNI?

3. Jilïr cristianöñajj ¿kamsañs muni?

³ Biblian mä jilïr cristianot parlki ukhajja, janiw jupajj qhawqha maranisa uka toqet parlkiti. Griego arut ‘jilïr jaqe’ sasin traducitäki ukajja, ‘Diosar serviñan suma saytʼata’, “perfecto”, “phoqata” sañwa munaspa (1 Cor. 2:6). a Ukhamajj kunapachatï Diosar serviñan jiltktan, jan wawanakjamäjjtan ukhaw jilïr cristianöjjtanjja jan ukajj Diosar serviñan suma saytʼatäjjtanjja. Maynejj Diosar serviñan suma saytʼatäjje ukhajj ¿janis kunamp lurañapäjjaspa ukham sañti muni? Janiwa. Diosar serviñan jiltaskakiñapawa  (1 Tim. 4:15). Ukampis mä cristianojj waynäkchis jan ukajj jilïrïkchis ¿kunjamsa Diosar serviñan suma saytʼatätap yatsna?

4. ¿Kunjamäpjjes Diosar serviñan suma saytʼat cristianonakajja?

⁴ Diosar serviñan suma saytʼat cristianonakajj Diosan taqpach leyinakaparuw istʼapjje, janiw munapki ukak istʼapkiti. Pantjasir jaqenakjamajj pantjasipkchinisa, kuntï Jehová Diosajj servirinakapat suyki ukham amuyañataki ukat lurañatakiw chʼamachasipjje, jakäwinakapan ukwa uñachtʼayapjjaraki. Jupanakajj machaq jaqëñamp isthapitäpjjewa, kunjamtï Diosajj amuyki ukham amuyañatakiw sapürus chʼamachasipjje (Efes. 4:22-24). Diosan leyinakaparjama ukat wiñay yatichäwinakaparjam suma amtanakar puriñwa yateqawayapjje, ukhamajj kun lurañatakis janiw walja leyinakan mä lista necesitapkiti. Ukhamarus mä amtar purisajja, uk phoqañatakiw wal chʼamachasipjje (1 Cor. 9:26, 27).

5. Diosar serviñan jan suma saytʼatäpki uka cristianonakarojj ¿kunas pasaspa? (Efesios 4:14, 15).

⁵ Diosar serviñan jan suma saytʼatäpki uka cristianonakajja, facilakwa ‘kʼari yatichäwinakampisa jan wali amtanakampis engañjayasipjjaspa’. Khitinakatï radiona, televisionana, redes sociales ukanakan engañjir yatiyäwinaksa kʼari cuentonaks parlapki ukanakarus creyjjapjjakispawa. Kuntï apostatanakajj sapki ukampis engañjayasipjjakispawa (Efesios 4:14, 15 liytʼäta). b Envidiasiri jan ukajj chʼajjwiri, ratuk colerasiri ukhamäpjjaspawa, jan ukajj facilakiw kuna yantʼarus jaltʼapjjaspa (1 Cor. 3:3).

6. ¿Kunjamatsa maynejj Diosar serviñan suma saytʼat cristianöspa? Mä uñachtʼäwimp uk qhanañchtʼam (Fotonakampi dibujonakampi uñjjattʼarakïta).

⁶ Bibliarjamajja kunjamtï mä jaqejj jilïr jaqëñkam jiltkejja, ukhamarakiw maynejj Diosar serviñan suma saytʼatäñkam jiltaskakiñapa. Mä wawajj janiw taqe kuns yatkiti, ukatwa mä jilïr jaqen jarkʼaqatäñsa suma uñjatäñs muni. Amuytʼañataki, mä calle paskatañatakejj inas mä taykajj jiskʼa imill wawapar “amparat kattʼita” sischispa. Ukampis jiltaskipanjja, inas mamapajj sapak paskatañap dejchini, ukhamäkchis “janïr paskatkasajj uks aks uñtasipunïtawa” sasaw amtayaskakispa. Imill  wawapajj jilïrëjje ukhajja, uka kasta jan walinakat sum amuyasjje. Diosar serviñan ukhamarakiwa, Diosar serviñan jan suma saytʼat cristianonakajja, jan walinakar jan purtʼasiñatakisa suma amtanakar puriñatakis Diosar serviñan suma saytʼat cristianonakan yanaptʼapwa sapa kutejj munapjje. Ukampis Diosar serviñan suma saytʼat cristianonakajja, kunsa Diosajj mä toqet amuyi uk yatiñatakejj Biblian wiñay yatichäwinakapatwa amuykiptʼapjje, ukhamat suma amtar puriñataki.

7. Diosar serviñan suma saytʼat cristianonakajj ¿yanaptʼa munapjjarakiti?

⁷ Diosar serviñan suma saytʼat cristianonakajj ¿janit yanaptʼa munjjapjjpacha? Awisajj yanaptʼa munapjjarakiwa. Diosar serviñan jan suma saytʼatäki ukajja, inas mayninakan jupa lanti mä amtar puripjjañap suychini jan ukajj kuns lurañapa uk sapjjañap suychini, ukampis Diosar serviñan suma saytʼat cristianojj yatiñani experienciani jilat kullakanakampiw ewjjtʼayasi, ukampis “sapa mayniw lurañanakapampejj phoqañapa” sasin Bibliajj siski uk sum yati (Gál. 6:5).

8. Diosar serviñan suma saytʼat cristianonakajj janiw taqenejj igualäpkiti sasajj ¿kunatsa sistanjja?

⁸ Kunjamtï jilïr jaqenakajj jañchi toqet jan igualäpkejja, ukhamarakiw Diosar serviñan suma saytʼat cristianonakajj jan igualäpkiti. Yaqhepajj yatiñanïpjjewa, yaqhepajj jan ajjsartʼirïpjjewa, yaqhepajj wajjtʼasirïpjjewa, yaqhepasti sinttʼasirïpjjarakiwa. Uka cristianonakajj janiw mä pachpa amtar puripkaspati. Yamas kuntï sapa maynejj concienciaparjam amtañapäki ukan janiw mä pachp amtapkaspati, ukampis Bibliarjamajj panpachanin amtapaw walïskaspa. Ukhamajj kuna amtarutï puripki ukat janiw kʼumisipjjañapäkiti jan ukasti panpachaniw mayachtʼatäskakiñatak chʼamachasipjjañapa (Rom. 14:10; 1 Cor. 1:10).

¿KUNSA DIOSAR SERVIÑAN SUMA SAYTʼATÄÑATAKEJJ LURAÑASA?

9. Janiw khitis mä akatjamatak Diosar serviñan suma saytʼatäkaspati sasajj ¿kunatsa sistanjja?

⁹ Mä wawajj tiempompejj jilïr jaqëjjewa, ukampis janiw maynejj walja maranakat mä akatjamat Diosar serviñan suma saytʼat cristianökaspati. Corintonkir cristianonakajja, suma yatiyäwinak katoqasajj bautisasipjjänwa, espíritu santo katoqapjjäna, Pablots waljanak yateqapjjarakïna (Hech. 18:8-11). Ukampis bautisasipjjäna ukhat mä qhawqha maranakatjja, waljaniw Diosar serviñan jan suma saytʼatäsipkakïna (1 Cor. 3:2). Jan ukhaman uñjasiñatakejj ¿kunsa lursna?

10. ¿Kunsa Diosar serviñan suma saytʼat cristianöñatakejj lurañasa? (Judas 20).

¹⁰ Maynejj chuymatpachaw Diosar serviñan suma saytʼat cristianöñ munañapa. ‘Jan experiencian’ wawanakjamäskakiñ munirinakajj janipuniw Diosar serviñan jiltapkaniti (Prov. 1:22). Yaqhep jilïr jaqenakajj janiw privilegionak katoqasiñ munapkiti, tatap mamapajj jupanak lanti mä amtar purisipkakispa ukwa munapjjaraki, janiw jiwasajj jupanakjamäñasäkiti. Jan ukasti jiwas pachpaw Diosar serviñan jiltañatak chʼamachasiñasa (Judas 20 liytʼäta). Jumatï Diosar serviñan jan suma saytʼatäkstajja, ‘munañam lurañ munañatakisa phoqañatakis chʼam churita’ sasin Diosar mayisim (Filip. 2:13).

11. Diosar serviñan suma saytʼat cristianöñatakejj ¿kuna yanaptʼanaksa Diosajj churistu? (Efesios 4:11-13).

¹¹ Jehová Diosajj jupar serviñan jiltañasatakejj janiw sapak jaytkistuti. Congregacionan suma awatirinaka suma yatichirinakwa churistu, jupanakaw ‘jilïr jaqëjjañasataki, qhawqchʼäkitejj Cristojj ukar puriñkam jiltañasatak’ yanaptʼapjjestu (Efesios 4:11-13 liytʼäta). Espíritu santo churarakistu, ukajj kunjamtï “Cristojj amuyki” ukham amuyañatakiw yanaptʼistu  (1 Cor. 2:14-16). Ukat pusi Evangelionakwa qellqayawayi, ukanakajj kunanaksa Jesusajj aka oraqenkkasajj luräna uk sum yatiñatakiw yanaptʼistu. Jiwasatï jupjam amuyaña, parlaña, lurañ yateqañäni ukhajja, Diosar serviñan suma saytʼat cristianöñäniwa.

WAÑA MANQʼAJJ WALI WAKISKIRIWA

12. ¿Kunas ‘Cristjjat qallta yatichäwinakajja’?

¹² Diosar serviñan suma saytʼatäñatakejj janiw ‘Cristjjat qallta yatichäwinakak’ yatiñasäkiti, jan ukasti jukʼamp yatichäwinak yatiñasawa. Uka qallta yatichäwinakat yaqhepajj akanakawa: arrepentisiña, Diosar confiyaña, bautisasiña, jiwatat jaktaña (Heb. 6:1, 2). Taqe cheqpach cristianonakaw uka yatichäwinak yatipjjañapa. Ukatwa apóstol Pedrojj Pentecostés urojj uka toqenakat waljanir predicäna (Hech. 2:32-35, 38). Criston discipulopäñatakejj uka yatichäwinakar creyiñajj wali wakiskiriwa. Jiwatat jaktañar jan creyiñajja, Diosar confiyañar rechazañamp sasiwa sasaw Pablojj qhanañchäna (1 Cor. 15:12-14). Ukhamajj janiw uka qallta yatichäwinakak yatiñasäkiti.

13. Hebreos 5:14 texton waña manqʼar uñtat yatichäwinakat parlki ukanakamp yanaptʼayasiñatakejj ¿kunsa lurañasa? (Fotonak uñjjattʼarakïta).

¹³ Janiw qallta yatichäwinakakejj utjkistuti, waña manqʼar uñtat yatichäwinakajj utjarakistuwa. Uka yatichäwinak taypinjja, janiw Jehová Diosan leyinakapakejj utjkiti, jan ukasti Jehová Diosjam amuyañatak yanaptʼkistu uka wiñay yatichäwinakaw utjaraki. Ukanakamp yanaptʼayasiñatakejj Bibliatwa yatjjatañasa, kuntï yatjjatktan uka toqetwa lupʼiñasa, ukat yateqatarjam lurañatakiw chʼamachasiñasa. Cheqas ukaw Jehová Diosar kusisiykir amtanakar puriñatakejj yatichistu (Hebreos 5:14 liytʼäta). c

14. ¿Kunjamsa Pablojj Diosar serviñan suma saytʼatäpjjañapatak corintionakar yanaptʼäna?

¹⁴ Diosar serviñan jan suma saytʼatäpki uka cristianonakajja, kuns lurapjjani uka toqet parlir mä ley Biblian jan jikjjatapki ukhajj suma amtanakar puriñajj jupanakatak chʼamakiwa. Ukhamanakan uñjasisajj inas yaqhepajj “munañajar kuns luraskiristwa” sasin amuyapjjchi. Yaqhepajj janis wakiskchejja  inas mä ley utjañap mayipjjchispa. Amuyatajja, Corintonkir cristianonakajj idolonakar loqtat manqʼanak manqʼañajj walikïspati janicha uka toqet mä ley utjañapwa Pablor mayipjjäna. Kuns lurapjjañapa uk sañat sipansa, “sapa mayniw concienciaparjamajj kun ajlliñatakis ‘derechoni’” sasaw säna. Biblian walja wiñay yatichäwinakapatwa jupajj aytarakïna, ukanakaw chuymas chuyma jikjjatasiykaspa ukat jan khitirus lanktʼasiykaspa uka suma amtanakar puripjjañapatak corintionakar yanaptʼañapäna (1 Cor. 8:4, 7-9). Ukhamatwa Diosar serviñan suma saytʼatäpjjañapatak corintionakar yanaptʼaskäna, ukaw mayninakan yanaptʼap sapa kuti thaqaskañat sipansa, jan ukajj leyinak utjañap mayiñat sipans wali amuyump kun lurapjjañapatakis yanaptʼaskäna.

15. ¿Kunjamsa Pablojj hebreo cristianonakarojj Diosar serviñan jiltasipkakiñapatakejj yanaptʼäna?

¹⁵ Pablojj hebreo cristianonakar qellqkäna uka cartanjja, wali valorani yaqha yatichäwiw utji. Yaqhepanakajj Diosar serviñan janiw jiltapkänti, ukatwa Pablojj jupanakar akham säna: “Jumanakatakejj mayampiw lechejj wakisi, janiw waña manqʼajj wakiskiti” sasa (Heb. 5:12). Jehová Diosajj machaq yatichäwinakwa congregación toqejj jupanakar yatichaskäna, ukampis jupanakajj janiw ukanak yateqapkänti, janirakiw katoqasipkänti (Prov. 4:18). Judío cristianonakat waljanejj Moisesan Leyiparjam sarnaqañ munasipkakïnwa, Jesusajj sacrificiot loqtasitapamp uka Ley chhaqtaykäna ukhat mä 30 maranakas pasjjchïnjja, uka Leyirjam sarnaqañ munasipkakïnwa (Rom. 10:4; Tito 1:10). Cheqas uka maranakan uka cambio utjatap amuyapjjañapänwa. Pablojj Diosan amuytʼayat qellqkäna uka cartapanjja, jan fácil amuykañ yatichäwinak katoqasipjjañapatakiw corintionakar yanaptʼañ munäna. Waña manqʼar uñtat uka yatichäwinakwa jupanakajj necesitapjjäna, ukhamat kunjamas ukat uksarojj Jehová Diosar adorasjjani ukajj jukʼamp sumätap amuyapjjañapataki, ukhamarak jan ajjsarapjjañapataki ukat judionakan jarkʼatpachas predicasipkakiñapataki (Heb. 10:19-23).

¿KUNATSA JIWAS PACHPAR JAN CONFIYASIÑASÄKI?

16. Diosar serviñan suma saytʼatäkasas ¿kunampsa lurañasa?

¹⁶ Diosar serviñan suma saytʼatäskstansa, ukhamäskakiñatakiw chʼamachasiñasa. Ukhamajj janiw jiwas pachpar confiyasiñasäkiti  (1 Cor. 10:12). Diosar serviñan jiltasktanti jan ukajj ukharukich qheparjjtan uk sapa kuti amuykiptʼasiñasajj wali importantewa (2 Cor. 13:5).

17. Colosankir cristianonakar apayaskäna uka cartajj ¿kunsa Diosar serviñan suma saytʼatäñ toqet yatichistu?

¹⁷ Colosankir cristianonakar apaykäna uka cartapanjja, Diosar serviñan suma saytʼatäñasa ukhamäskakiñas kunja wakiskirisa uka toqetwa Pablojj parläna. Uka cristianonakajj Diosar serviñan suma saytʼatäpjjchïnsa, aka mundon amuyunakapamp jan engañjayasipjjañapatakiw ewjjtʼäna (Col. 2:6-10). Epafrasajj jupanakar wali sum uñtʼäna, ukatwa ‘phoqatäpjjañapataki’ jan ukajj ‘Diosar serviñan suma saytʼatäpjjañapatak’ sapa kut jupanakatak oräna (Col. 4:12; nota). ¿Kunsa ukat yateqsna? Diosar serviñan suma saytʼatäskakiñatakejj chʼamachasiñasawa, Jehová Diosampiw yanaptʼayasiñasaraki, Pablompi Epafrasampejj uk sum yatipjjäna. Colosankir cristianonakajj jan walinakansa uñjasipkchïnjja, Diosar serviñan suma saytʼatäsipkakispa ukwa munapjjarakïna.

18. ¿Kunas Diosar serviñan suma saytʼat mä cristianorojj pasaspa? (Foto uñjjattʼarakïta).

¹⁸ Diosar serviñan suma saytʼat mä cristianojj Diosamp sum apasitap wiñayatakiw aptʼasispa sasaw Pablojj hebreo cristianonakar ewjjtʼäna. Chuymapajj qalaraspa ukhajja, Jehová Diosat jitheqtasajj janiw arrepentisiñsa ni perdonayasiñs munjjaspati. Ukampis hebreonakajj janiw ukham sinti jan walir purtʼasipkänti (Heb. 6:4-9). Khitinakatï inactivöjjapjje jan ukajj expulsatäpjje ukampis arrepentisipki ukanakat ¿kamsaraksnasa? Humilde chuymanïpjjatapat arrepentisipjjewa, jupanakajj janiw Pablojj parlkäna uka jaqenakjamäpkiti. Ukampis Jehová Diosan ukar kuttʼanisajj jupajj churki uka yanaptʼwa necesitapjje (Ezeq. 34:15, 16). Ukatwa ancianonakajj Diosar serviñan suma saytʼatäki uka jilatar yanaptʼa mayipjjaspa, ukhamat jupanakar Jehová Diosamp wasitat sum apasjjañapatak yanaptʼañataki.

19. ¿Kunatakis chʼamachasiñasa?

¹⁹ Jumatï Diosar serviñan suma saytʼatäñatak chʼamachasisksta ukhajja, uka amtam phoqañatak chʼamachasiskakim. Waña manqʼar uñtasitäki uka yatichäwinak yateqaskakim, kunjamtï Jehová Diosajj amuyki ukham amuyañatak sapüru yateqaskakim. Ukampis jumatï Diosar serviñan suma saytʼatäjjsta ukhajj uk jan aptʼasiñatak chʼamachasiskakim.