1. Bushe Yehova afwaya twaba shani?

 ABAUPANA balasekelela nga nshi nga ca kuti bakwata umwana. Nomba nangu ca kuti abafyashi balatemwa nga bakwata umwana, tabafwaya atwalilila fye ukuba akanya. Na kuba, kuti basakamana sana nga ca kuti talekula. Ifi fine e fyo caba na kuli Yehova. Nangu ca kuti alatemwa nga ca kuti twatampa ukusambilila pali ena, tafwaya twapelela fye pali filya fine tusambilile. (1 Kor. 3:1) Lelo afwaya twaba Abena Kristu “abakalamba” mu fya kwa Lesa.—1 Kor. 14:20.

2. Mepusho nshi twala-asuka muli cino cipande?

² Bushe calola mwi ukuba Umwina Kristu umukalamba mu fya kwa Lesa? Kuti twacita shani pa kuti tube Abena Kristu abakalamba mu fya kwa Lesa? Bushe ifya kulya ifyakosa filenga shani bucibusa bwesu na Yehova bwakosa? Mulandu nshi tushilingile ukulatontonkanishisha ukuti twalikula kale mu fya kwa Lesa? Twala-asuka ifi fipusho muli cino cipande.

CALOLA MWI UKUBA UMWINA KRISTU UMUKALAMBA MU FYA KWA LESA?

3. Bushe calola mwi ukuba Umwina Kristu umukalamba mu fya kwa Lesa?

³ Ishiwi lya ciGriki ilyo bapilibula mu Baibo ukuti “abakalamba,” kuti lyapilibula no kuti “abakosoka,” “abapwililika.” (1 Kor. 2:6) E ico nga filya fine umwana atwalilila ukukula mpaka aba umukalamba, e fyo bucibusa bwesu na Yehova nabo bufwile ukutwalilila ukuba ubwakosa. Nga tulecita ifi, kuti twaba Abena Kristu abakalamba mu fya kwa Lesa. Kwena nangu ca kuti twakula twaba na bakalamba mu fya kwa Lesa, tufwile ukutwalilila ukukula mu fya kwa Lesa. (1 Tim. 4:15) Bonse fye, ukubikako na baice kuti twaba Abena Kristu abakalamba mu fya kwa Lesa. Nomba kuti twaishiba shani ukuti tuli Bena Kristu abakalamba mu fya kwa Lesa?

4. Bushe Umwina Kristu umukalamba mu fya kwa Lesa aba shani?

⁴ Umwina Kristu umukalamba mu fya kwa Lesa alakonka amafunde  ya kwa Lesa yonse, tasala ayo engakonka na ayo ashifwile ukukonka. Kwena pa mulandu wa kuti tapwililika, akulalufyanya. Na lyo line, ifyo atontonkanya ne fyo acita cila bushiku filalanga ukuti filalingana ne fyo Lesa afwaya. Alifwala ubuntu bupya kabili lyonse alesha na maka pa kuti alemona ifintu nge fyo Lesa afimona. (Efes. 4:​22-24) Ali-isambilisha amafunde ya kwa Lesa na mashinte ya mafunde yakwe ica kuti alasalapo ukucita ifintu ifisuma. E ico takabila amafunde pali fyonse fye pa kuti eshibe ifya kucita. Nga asalapo ifya kucita, alabombesha pa kuti acite ifyo fine.—1 Kor. 9:​26, 27.

5. Finshi fingacitika nga ca kuti Umwina Kristu takula mu fya kwa Lesa? (Abena Efese 4:​14, 15)

⁵ Lelo umuntu uushakula mu fya kwa Lesa, abantu ababa no bucenjeshi, na mapange yalubana kuti bamulufya bwangu. Kuti alasumina amalyashi balanda pa milabasa na pa Intaneti, nelyo abasangu kuti bamulufya. a (Belengeni Abena Efese 4:​14, 15.) Kuti alaumfwila abantu banankwe akalumwa, kuti alapusana nabo nelyo kuti alafulwa bwangu. Kabili nga atunkwa kuti acita ifyabipa.—1 Kor. 3:3.

6. Bushe ukukula mu fya kwa Lesa kuti twakulinganya kuli finshi? (Moneni ne cikope.)

⁶ Nga fintu tulandilepo kale, Amalembo yalinganya ukukula mu fya kwa Lesa ku fyo umuntu akula, aba no mukalamba. Umwaice teshiba ifingi, e ico alafwaikwa abakalamba aba kumucingilila no kumutungulula. Natulangilile: Umufyashi umwanakashi kuti aeba umwana wakwe umukashana ukuti amwikate ku kuboko ilyo baleciluka umusebo. Umwana nga akulako, umufyashi kuti amuleka alaciluka umusebo eka, lelo kuti alamwibukishako ukulalolesha uku no ku pa kuti alemona nga ca kuti kuli imyotoka ishileisa. Umwana nga akula aleshiba ifya kutaluka amasanso ya musango uyu. Nga filya fine abana abanono bakabila ukuti abakalamba balebacingilila ku masanso, e fyo na Bena Kristu abashilakula mu fya kwa Lesa bakabila Abena Kristu abakalamba mu fya kwa Lesa balebacingilila. Nga balebacingilila te kuti bacite nangu cimo icingalenga bucibusa bwabo na Yehova bwapwa kabili kuti balesala bwino ifya kucita. Lelo Abena Kristu abakalamba mu fya kwa Lesa bena, lyonse ilyo balesalapo ifya kucita balakonka amashinte ya mafunde ya mu Baibo, pa kuti beshibe ifyo Yehova amona ifyo balesalapo. Lyena balasalapo ukulingana ne fyo amashinte ya mu Baibo yalanda.

7. Bushe Abena Kristu abakalamba mu fya kwa Lesa nabo balakabila aba kubafwa?

 ⁷ Bushe ici cilolele mu kuti Umwina Kristu umukalamba mu fya kwa Lesa ena takabila aba kumwafwa? Awe. Abena Kristu abakalamba mu fya kwa Lesa nabo inshita shimo balingile ukulomba bamo ukuti babafwe. Lelo Umwina Kristu uulekula mu fya kwa Lesa nalimo kuti alafwaya abantu bambi e bo balemweba ifya kucita, nelyo e bo balemusalila ifya kucita. Nomba umukalamba mu fya kwa Lesa ena nga alomba bamo abaishiba ifingi ukumucila ukuti bamupandeko amano, aleshiba ukuti umwine e ufwile ukuisalilapo ifya kucita, kabili afwile “ukuisendela icipe cakwe umwine.”—Gal. 6:5.

8. Ni muli finshi Abena Kristu abakalamba mu fya kwa Lesa bengapusana?

⁸ Nga filya fine abakalamba bapusana mu fyo bamoneka, na Bena Kristu abakalamba mu fya kwa Lesa nabo balapusana mu mibele iyo Abena Kristu balingile ukukwata pamo nga, amano, ukushipa, bukapekape, na mu fyo balangulukilako abantu banabo. Na kabili ifyo Abena Kristu abakalamba mu fya kwa Lesa bengasalapo ukucita pa cintu cimo cine kuti fyapusana. Lelo fyonse fibili kuti fyalingana na mashinte ya mafunde ya mu Baibo. Ilingi line, ifi ficitika nga ca kuti Abena Kristu balesalapo ukucita ifintu ifikuma kampingu. Apo balishiba ifi, tabapingula abanabo nga ca kuti basalapo ifipusene ne fyo bena bengasalapo. Lelo babika amano ku fingalenga batwalilila ukuba abaikatana.—Rom. 14:10; 1 Kor. 1:10.

FINSHI TWINGACITA PA KUTI TUBE ABENA KRISTU ABAKALAMBA MU FYA KWA LESA?

9. Bushe ukuba umukalamba mu fya kwa Lesa kwisa fye nga ameno ya mu kanwa? Londololeni.

⁹ Mu kupita kwa nshita umuntu alakula aba no mukalamba, lelo ukuba umukalamba mu fya kwa Lesa kwena takwisa nga ameno ya mu kanwa. Ku ca kumwenako, aba bwananyina mu Korinti balisumine imbila nsuma, balibatishiwe, balipokelele umupashi wa mushilo, kabili balisambilile ifintu ifingi ku fyo umutumwa Paulo alebasambilisha. (Imil. 18:​8-11) Nomba na lintu papitile imyaka ukutula apo babatishiwilwe, abengi tabakulile mu fya kwa Lesa. (1 Kor. 3:2) Finshi tulingile ukucita pa kuti twingaba abakalamba mu fya kwa Lesa?

10. Finshi tufwile ukucita pa kuti tube abakalamba mu fya kwa Lesa? (Yuda 20)

¹⁰ Pa kuti tube abakalamba mu fya kwa Lesa, tufwile ukuitemenwa ukufwaya ukuba abakalamba mu fya kwa Lesa. ‘Abatemwa ukubulwa amano’ basalapo ukukanaba abakalamba mu fya kwa Lesa kabili tabakatale ababa abakalamba mu fya kwa Lesa. (Amapi. 1:22) Tatulefwaya ukuba ngo muntu umukalamba uwa kuti alolela fye ukuti abafyashi e bo balemusalilapo ifya kucita. Lelo fwe bene ni fwe tulingile ukushininkisha ukuti bucibusa bwesu na Yehova bwatwalilila ukuba ubwakosa. (Belengeni Yuda 20.) Nga ca kuti mucili mulebombesha pa kuti mube abakalamba mu fya kwa Lesa, mulepepa kuli Yehova pa kuti alenge “mulefwaya e lyo no kucitapo cimo.”—Fil. 2:13.

11. Finshi Lesa atupeela ifingalenga twaba abakalamba mu fya kwa Lesa? (Abena Efese 4:​11-13)

¹¹ Yehova tatwenekela ukuba abakalamba mu fya kwa Lesa pa lwesu. Alitupeela bakacema na bakasambilisha abatwafwa pa kuti tube abakalamba mu fya kwa Lesa, e kutila pa kuti tube “nga bakalamba ukufika ku ciimo ca kwa Kristu.” (Belengeni Abena Efese 4:​11-13.) Na kabili Yehova alatupeela umupashi wa mushilo uulenga ‘tuletontonkanya nge fyo Kristu atontonkanya.’ (1 Kor. 2:​14-16) Lesa alilenga na mabuuku 4 aya Mbila Nsuma yalembwa, umo tusambilila ifyo Yesu aletontonkanya, ifyo alelanda ne fyo alecita ilyo alebomba umulimo wakwe pano isonde. Nga muletontonkanya nge fyo Yesu aletontonkanya, nga mulecita ifintu nge fyo alecita, kuti mwaba abakalamba mu fya kwa Lesa.

 IFYO IFYA KULYA IFYAKOSA FILENGA TWABA ABAKALAMBA MU FYA KWA LESA

12. Bushe “amasambililo ya kutendekelako pali Kristu,” masambililo nshi?

¹² Pa kuti tube abakalamba mu fya kwa Lesa, tatufwile ukupelela fye pa kwishiba “amasambililo ya kutendekelako pali Kristu.” Fimo pa fyo twabalilepo ukwishiba pali Kristu, kulapila, icitetekelo, ulubatisho no kubuushiwa kwa bafwa. (Heb. 6:​1, 2) Ifi e fimo pa fyo Abena Kristu bonse basuminamo. E co Petro alandile pali ifi fintu ilyo alelanda na bantu pa Pentekoste. (Imil. 2:​32-35, 38) Pa kuti tube abasambi ba kwa Kristu tufwile ukusumina aya amasambililo. Ku ca kumwenako, Paulo atile nga ca kuti umuntu tasumine mu kubuushiwa kwa bafwa, te kuti abe Umwina Kristu wa cine. (1 Kor. 15:​12-14) Nomba pa kuti tube abakalamba mu fya kwa Lesa, tatulingile ukupelela fye pa kwishiba aya amasambililo.

13. Finshi tulingile ukulacita pa kuti tulenonkelamo mu fya kulya fya ku mupashi ifyakosa ifyo Baibo yalandapo pa AbaHebere 5:14? (Moneni ne cikope.)

¹³ Amasambililo ya kutendekelako yalipusana ne fya kulya fya ku mupashi ifyakosa pantu pa fya kulya fya ku mupashi ifyakosa, tapaba fye amafunde ya kwa Yehova yeka, lelo paliba na mashinte ya mafunde yakwe ayalenga tuleishiba ifyo amona ifintu. Pa kuti tulenonkelamo mu fya kulya ifyakosa, tulingile ukulabelenga Icebo ca kwa Lesa, tufwile ukulatontonkanya pa fyo tulebelenga kabili tulingile ukucita ifyo fine tulebelenga. Nga tulecita ifi, ninshi tuleisambilisha ifya kucita pa kuti tulecita ifintu ifingalenga Yehova asekelela. b—Belengeni AbaHebere 5:14.

14. Finshi Paulo acitile pa kusambilisha abena Korinti ifya kuba abakalamba mu fya kwa Lesa?

¹⁴ Abena Kristu abashilakula mu fya kwa Lesa cilabakosela ukusalapo ifya kucita, nga ca kuti mu Baibo tamwaba ifunde ililanda pa fyo balingile ukusalapo. Bamo bamona kwati kuti bacita conse ico balefwaya nangu ca kuti mu Baibo tamwaba ifunde ililanda pa fyo balingile ukusalapo. Bambi nabo kuti balafwaya amafunde ayo bafwile ukukonka na pashilingile ukuba amafunde. Ku ca kumwenako, cimoneka kwati Abena Kristu abali mu Korinti baleipusha Paulo nga ca kuti kwali ifunde ilyalesuminisha ukulya inama isho batuulile ku tulubi. Paulo tabebele  ifya kucita, lelo abebele ukuti cila muntu alikwete “insambu” sha kusalapo ifya kucita ukulingana ne fyo kampingu yakwe yalemweba. Abebele pa mashinte ya mafunde ya mu Baibo aya kuti nga bayakonka kampingu yabo tayali no kulabacusha kabili tabali no kupunwisha umuntu nangu umo. (1 Kor. 8:​4, 7-9) Ifi Paulo acitile, alesambilisha abena Korinti ukuba abakalamba mu fya kwa Lesa pa kuti bengakwata amano ya kulekanya icalungama ne calubana ilyo balesalapo ifya kucita. Na kabili abasambilishe ukuti tabalingile ukulafwaya fye abantu bambi e bo balebeba ifya kucita, nelyo ukulafwaya fye amafunde pali fyonse ifyo balingile ukusalapo.

15. Cinshi Paulo acitile pa kuti Abena Kristu abaHebere batwalilile ukukula mu fya kwa Lesa?

¹⁵ Ku fyo Paulo alembeele abena Korinti tulasambililako isambililo na limbi ilyacindama. Bamo balilekele ukukula mu fya kwa Lesa ica kuti na kabili balekabila “umukaka, te fya kulya ifyakosa iyo.” (Heb. 5:12) Tabalesambilila ifipya ifyo Yehova alebasambilisha ukupitila mu cilonganino cakwe. (Amapi. 4:18) Ku ca kumwenako, Abena Kristu abaYuda abengi balefwaya abantu batwalilile ukukonka Amafunde ya kwa Mose, nangu ca kuti palipitile imyaka nalimo 30 ukutula apo aya Amafunde yalekele ukubomba ilyo Kristu aituulile icilubula. (Rom. 10:4; Tito 1:10) Kwena iyi imyaka 30 iyapitilepo yali iingi sana. Abena Kristu abaYuda balingile ukwishiba ukuti tabalingile ukutwalilila ukukonka Amafunde ya kwa Mose. Onse uwabelengapo ili ibuuku ilyo Lesa alengele ukuti Paulo alembe, kuti amona ukuti muli ili ibuku mwaliba ifya kulya fya ku mupashi ifyakosa. Iyi kalata yalilengele bamona ukuti inshila iipya iya kupepelamo Lesa iyo Yesu abikileko, yaliwemepo. Kabili iyi kalata yalengele baba abashipa pa kuti batwalilile ukubila imbila nsuma nangu ca kuti abaYuda balebacusha.—Heb. 10:​19-23.

TWILAMONA KWATI TWALIKULA KALE MU FYA KWA LESA

16. Nga twalunduluka twaba na bakalamba mu fya kwa Lesa, finshi fimbi ifyo tulingile ukulacita?

¹⁶ Tulingile ukulaesha na maka yesu yonse pa kuti tatupelelele fye pa kuba abakalamba mu fya kwa Lesa, lelo twatwalilila ukukula mu fya kwa Lesa. E ico tufwile ukuba abacenjela pa kuti twilamona kwati twalikula kale mu fya kwa Lesa kabili tatulingile ukutwalilila ukukosha bucibusa bwesu na ena. (1 Kor. 10:12) Tufwile ukulayesha pa kuti tulemona nga ca kuti twalitwalilila ukuba abakalamba mu fya kwa Lesa.—2 Kor. 13:5.

17. Bushe ifyo Paulo alembeele abena Kolose filanga shani ico cacindamina ukutwalilila ukuba abakalamba mu fya kwa Lesa?

 ¹⁷ Muli kalata iyo Paulo alembeele abena Kolose na kabili alikomaile pa co cacindamina ukuba abakalamba mu fya kwa Lesa. Nangu ca kuti bali Bena Kristu abakalamba mu fya kwa Lesa, Paulo alibasokele ukuti balingile ukuba abacenjela pa kuti ifyo abantu ba muli cino calo batontonkanya tafibalufishe. (Kol. 2:​6-10) Na Epafra uwaishibe bwino abali muli cilya cilonganino alebapepelako lyonse ukuti batwalilile ukuba “abapwililila” nelyo abakalamba mu fya kwa Lesa. (Kol. 4:12) Cinshi tulesambililako? Ico tulesambililako ca kuti Paulo na Epafra balishibe ukuti fwe bantunse twalinga ukulaibikilishako pa kuti twingatwalilila ukuba abakalamba mu fya kwa Lesa. Na kabili kuti twatwalilila ukuba abakalamba mu fya kwa Lesa nga ca kuti Lesa atwafwa. Paulo na Epafra balefwaya ukuti Abena Kristu abali mu Kolose batwalilile ukuba abakalamba mu fya kwa Lesa nangu ca kuti balekwata amafya.

18. Cinshi cingacitikila Umwina Kristu umukalamba mu fya kwa Lesa nga tacenjele? (Moneni ne cikope.)

¹⁸ Paulo alisokele abaHebere ukuti Umwina Kristu umukalamba mu fya kwa Lesa nga tacenjele, bucibusa bwakwe na Lesa kuti bwapwililila fye. Nga ca kuti Umwina Kristu akaana ukumfwila Yehova kuti alacita sana ifyabipa ica kuti te kuti alapile kabili na Yehova te kuti amubelele uluse. Icawemeko ca kuti ifi te fyo abaHebere baali. (Heb. 6:​4-9) Bushe muno nshiku ciba shani ku Bena Kristu aba kuti banaka, nelyo batamfiwa mu cilonganino, lyena pa numa balapila? Nga baicefya kabili balapila, ninshi balanga ukuti tababa nga balya abo Paulo alembelepo aba kuti bucibusa bwabo na Yehova kuti bwapwililila fye. Kwena nga babwelela kuli Yehova balakabila ukubafwa. (Esek. 34:​15, 16) Nalimo baeluda kuti baeba uwa bwananyina umukalamba mu fya kwa Lesa ukuti abafweko pa kuti bucibusa bwabo na Yehova bwingaba ubwakosa na kabili.

19. Cinshi tulingile ukulafwaya ukucita?

¹⁹ Nga muleibikilishako pa kuti mube Umwina Kristu umukalamba mu fya kwa Lesa, kuti mwaba! Twalilileni ukulya ifya kulya fya ku mupashi ifyakosa kabili mule-esha na maka yenu yonse pa kuti mulemona ifintu nge fyo Yehova afimona. Kabili nga ca kuti muli Bena Kristu abakalamba mu fya kwa Lesa, twalilileni ukuba abakalamba mu fya kwa Lesa.