1. ¿Jeowabara kʼãrẽta omarẽã kãgabʉ dayirãba?

 YIBARIRÃRA mejãchade sobiabʉ ãyi wũãwũã zake kʼarea, mamina ãya kãga ẽ ãyi wũãwũãrãra ewari jõmaʉ̃nẽ wũãwũã zakede bamarẽã akʉza iyita wari ẽ bʉrʉ yibarirãra krĩcha odogo. Maʉ̃ kĩrãkʼa Jeowara sobiabʉ dayirã iyi ode jʉ̃drʉbʉrʉde, mamina Jeowabara kãga ẽ dayirãba kʼawuadabitapei ariwia beira (1 Cor. 3:1). Awuarabʉrʉ kãgabʉ Daizeze Bedʼeadebema sãwũã oita audre biʼia kʼawua wãmarẽã (1 Cor. 14:20).

2. ¿Kʼãrẽta akʉdayi naʉ̃ artikulode?

² Daizeze Bedʼeadebema sãwũã oita biʼia kʼawuabʉbara, ¿sãwũã krĩchabʉ akʉza sãwũã obʉ? ¿Kʼãrẽta oibara biʼia kʼawuaita Daizeze Bedʼeadebema sãwũã oita? ¿Daizeze Bedʼeaba kʼãrẽ jarabʉ biʼia kʼawuaiba sãwũã kʼarebabʉ Jeowa neũdukʼawua bia bʼaita? ¿Kʼãrẽa krĩchada ẽ baibara Daizeze Bedʼeadebema sãwũã oita biʼia kʼawuabʉbʉrʉ wua maʉ̃ ʉ̃rʉ kʼawuaita nesida ẽãta? Naʉ̃ artikulode panʉnañi maʉ̃ra bedʼearata.

¿SÃWŨÃ KRĨCHABɄ AKɄZA SÃWŨÃ OBɄ DAIZEZE BEDʼEADEBEMA BIʼIA KʼAWUABɄBARA?

3. ¿Kʼãrẽta oibara bia kʼawua bʼaita Daizeze Bedʼeadebema sãwũã oita?

³ Daizeze Bedʼeade zokʼabʉ bedʼea, zõrãrã bia krĩcha kʼawuabʉ kĩrãkʼabʉ, naʉ̃ bedʼeara griego bedʼeadera edaʉde jarakĩrãbʉ biʼia kʼawuabʉta ne bia Daizeze Bedʼeadebema sãwũã oita a (1 Cor. 2:6). Wũãwũã zakerãra wari wã zõnabayeda abarika dayirãbida audre kʼawua wãibara Daizeze ʉ̃rʉ, mawũã ũdubiyi biʼia kʼawuabʉta Daizeze Bedʼeadebema sãwũã oita, mamina mawũã kʼawuabʉta iduaribi ẽ baibara awuarabʉrʉ ewariza audre kʼawua wãibara (1 Tim. 4:15). Dayirã jõmaʉ̃ta warrarabʉsida ũdubiseabʉ biʼia kʼawuabʉta Daizeze Bedʼeadebema sãwũã oita mamina, ¿sãwũã  kʼawuabʉ dayirãba biʼia kʼawuabʉta Daizeze Bedʼeadebema sãwũã oita?

4. ¿Sãwũãbʉ Daizeze Bedʼeadebema sãwũã oita biʼia kʼawuabʉra?

⁴ Ẽbẽra abaʉba Daizeze Bedʼeadebema sãwũã oita biʼia kʼawuabʉbʉrʉ, oyi jõma Jeowaba kãgabʉtrʉ mawũã oẽ bayi iya kãgabʉtrʉ. Iyira kayirua omia baera edaʉde kayirua oseabʉ, mamina iya Daizeze Bedʼeadebema sãwũã oita biʼia kʼawuabʉbʉrʉ, maʉ̃ta ewariza oũdubiyi akʉza iyara zarea obʉ krĩcha yiwidi erbaita adewara ewariza jʉrʉbʉ sãwũã Jeowa kĩrãkʼa krĩcha bʼaita (Efes. 4:​22-24). Akʉza iya nekʼãrẽ oita jidai nãã biʼia krĩchabʉ Jeowaba ley zokʼabʉ ʉ̃rʉ akʉza nekʼãrẽ Daizeze Bedʼearadebemaba jarabʉ ʉ̃rʉ, maʉ̃ kʼarea iya nekʼãrẽ oita jidabʉrʉdera nesida ẽ awuru ẽbẽraba iyaʼa jaramarẽã kʼãrẽta oibarata akʉza kʼãrẽta oẽ baibarata adewara zarea obʉ iya oita krĩchabada kĩrãkʼa aripe oita (1 Cor. 9:​26, 27).

5. ¿Kʼãrẽta berabariseabʉ kristiano abaʉba Daizeze Bedʼeadebema sãwũã oita biʼia kʼawua ẽ bʉrʉ? (Efesios 4:​14, 15).

⁵ Mamina kristiano abaʉba Daizeze Bedʼeadebema sãwũã oita biʼia kʼawua ẽ bʉrʉ yi sewabiseabʉ, ĩjãseabʉ awururaba sewanebʉrʉ jarabʉta akʉza yi sewabiseabʉ apostatara b (Akʉra Efesios 4:​14, 15). Adewara naʉ̃ ẽbẽrarã jiwaida, yõmia mawũã ẽ bʉrʉ mesera kĩrʉbʉ akʉza yi kayiruata mesera oseabʉ (1 Cor. 3:3).

6. ¿Kʼãrẽ yizaʉ̃me abarikabʉ dayirãba Daizezedebema sãwũã oita biʼia kʼawuaira? (Akʉra potota).

⁶ Nãã kʼawuada kĩrãkʼa Daizeze Bedʼeadera jara ũrĩbibʉ ẽbẽra abaʉba Daizeze Bedʼeadebema sãwũã oita biʼia kʼawuaira abarikabʉta ẽbẽra aba wari wã kĩrãkʼa. Wũãwũã zakebara wiñayiruedara nekʼãrẽ jõma kʼawua ẽ, maʉ̃ba iya nesida yi zezeba jaradiamarẽã. Bari jaraita, papa abaʉba iyi kau wĩkakiruedara ode wãnera yi kau juwata jidabʉ, mawũã neida berabari ẽ marẽã, mamina yi kau wari wãne iyara jida ẽ iyi kau juwara awuarabʉrʉ kĩrãbebibʉ ode wãnera jura kʼawuabamarẽã akʉza iyi yi zroma chubidadera yi papabara kʼãrẽ jara ẽ yi kauba kʼawuabʉ baera kʼãrẽta oibarata. Wũãwũã zakeba iyi neida berabari ẽ marẽã yi yibarira kʼareba nesidabʉ kĩrãkʼa, abarika Daizeze Bedʼeadebema sãwũã oita biʼia kʼawua ẽ bʉbara, nesidabʉ awuru mebẽrã Daizeze Bedʼeadebema sãwũã oita bia kʼawuabʉraba kʼarebadamarẽã, mawũã oẽ  baita nekʼãrẽ Jeowadeba jĩgababibʉta akʉza nekʼãrẽ oita jidabʉrʉde bia jida kʼawuamarẽã. Mamina kristiano Daizeze Bedʼeadebema sãwũã oita biʼia kʼawuabʉbara iya nekʼãrẽ oita jidai nãã biʼia krĩchabʉ Daizeze Bedʼearadebemaba kʼãrẽta jarabʉta akʉza mama jarabʉ kĩrãkʼa oũdubibʉ.

7. ¿Kristiano Daizeze Bedʼeadebema sãwũã oita biʼia kʼawuabʉbara nesidaka wuabemaraba kʼarebamarẽã?

⁷ Maʉ̃ba jarakĩrãbʉ ẽ kristiano Daizeze Bedʼeadebema sãwũã oita biʼia kʼawuabʉbara nesida ẽãta wuabemaraba kʼarebamarẽã, iya kʼareba widibʉrʉdera jʉ̃ã ẽ awururaba iyi bari jidamarẽã awuarabʉrʉ iya nekʼãrẽ oita jidabʉbʉrʉ kʼawuabʉ maʉ̃ra iyidebʉta (Gál. 6:5). Mamina kristiano Daizeze Bedʼeadebema sãwũã oita biʼia kʼawua ẽ bara kʼareba widibʉrʉdera jʉ̃ãbʉ iyaʼa kʼawua jaradamarẽã iya kʼãrẽta oibarata akʉza iyi bari jidadamarẽã.

8. ¿Kristianora Daizeze Bedʼeadebema sãwũã oita biʼia kʼawuabʉrãra jõmaʉ̃ta abarikabʉka?

⁸ Zõrãrãra jõma abarika bʉ ẽ, maʉ̃ kĩrãkʼa kristianora Daizeze Bedʼeadebema sãwũã oita biʼia kʼawuabʉrabara iyabaʉ nebiata ũdubibʉ ẽ. Bari jaraita, ʉ̃kʉrʉra buru bia, ʉ̃kʉrʉra zowaĩnĩgʉa erbʉ mawũã ẽ bʉrʉ ʉ̃kʉrʉbara awurura nekʼãrẽ diakĩrã akʉza krĩchabʉ wuabemara sãwũãbʉ ʉ̃rʉ, maʉ̃ kʼarea ãya nekʼãrẽ oita jidabʉrʉdera awuara awuaraka jidabʉ, maʉ̃ba jarakĩrãbʉ ẽ aña jidabʉta awuarabʉrʉ ãyara akʉbʉ jõma Daizeze Bedʼearadebemaba jarabʉ kĩrãkʼa oita. Adewara mebẽã abaʉba nekʼãrẽ oitabʉde ãyide kĩrãkʼa oẽ bʉrʉ aña krĩcha ẽ bayi maʉ̃ mebẽã ʉ̃rʉ awuarabʉrʉ ãba panañi (Rom. 14:10; 1 Cor. 1:10).

¿KʼÃRẼTA OIBARA BIʼIA KʼAWUA BʼAITA DAIZEZEDEBEMA SÃWŨÃ OITA?

9. ¿Daizeze Bedʼeadebema sãwũa oita biʼia kʼawuaira iyi doba zebʉka? Jara ũrĩbira.

⁹ Wũãwũã zakera ewari berabari wãne iyi doba zõnaba zeyi, mamina dayirãba Daizeze Bedʼeadebema sãwũã oita biʼia kʼawuaira maʉ̃ra iyi doba kʼawua ze ẽ, maʉ̃itara zarea oibara. Bari jaraita, mebẽrã Corintodebemarabara ĩjãsida Daizeze Bedʼea ʉ̃rʉ, buru kʼoesida, Daizezeba iyi jaure zareata diasi ãyara akʉza Pablobida ãya nebiata jaradiasi (Hech. 18:​8-11). Mamina ãyi buru kʼoedata poaga bio berabaribʉrʉde mejãcha kristianoraba ũdubisida ãyara Daizeze Bedʼeadebema sãwũã oira biʼia kʼawua ẽãta (1 Cor. 3:2). ¿Kʼãrẽta odaibara dayirãbida mawũã oda ẽ baita?

10. ¿Kʼãrẽta oibara biʼia kʼawua bʼaita Daizeze Bedʼeadebema sãwũã oita? (Judas 20).

¹⁰ Daizeze Bedʼeadebema sãwũã oita biʼia kʼawuaira nãã daya maʉ̃ta okĩrãbaibara. Yi kʼãrẽ kʼawua ẽ kĩrãkʼa bakĩrãpanʉrabara jʉrʉda ẽ sãwũã ũdubita Daizeze Bedʼeadebema sãwũã oita biʼia kʼawuabʉta (Prov. 1:22). Ʉ̃kʉrʉ ẽbẽrarãbara ãyi zõnabasidu kãgabʉ ãyi yi bariraba nekʼãrẽ omarẽã ãyi bari. Dayirãra maʉ̃ra kĩrãkʼa bakĩrãpanʉ ẽ, awuarabʉrʉ nekʼãrẽ obʉrʉdera dayirã dobaʉba krĩchakĩrãpanʉ kʼãrẽta oita akʉza audre Jeowa kʼawa bakĩrãpanʉ (akʉra Judas 20). Bʉta zarea obʉbʉrʉ Daizeze Bedʼeadebema sãwũã oita biʼia kʼawuaita Jeowaʼa yiwidʼira, iya kʼarebayi bʉa maʉ̃ta okĩrãmarẽã akʉza omarẽã (Filip. 2:13).

11. ¿Kʼãrẽneba kʼarebabʉ Jeowaba dayirãba biʼia kʼawuamarẽã Daizeze Bedʼeadebema sãwũã oita? (Efesios 4:​11-13).

¹¹ Jeowabara jʉ̃ã e dayirã dobaʉba biʼia kʼawuamarẽã Daizeze Bedʼeadebema sãwũã oira, awuarabʉrʉ iya dayirãʼa diabʉ zõrãrã kongregasionebemarata naʉ̃raba dayirãʼa jaradiamarẽã sãwũã audre Jeowa kʼawa bʼaita akʉza Jesude kĩrãkʼa oũdubidamarẽã (akʉra Efesios 4:​11-13). Jeowaba iyi jaure zareata diabʉ dayirãʼa, mawũã Jesu kĩrãkʼa krĩchadamarẽã (1 Cor. 2:​14-16). Daizezeba naʉ̃ra librota bʉbisi Mateo, Marcos, Lucas akʉza Juan. Mawũã dayirãba kʼawuadamarẽã Jesu sãwũã krĩchabasita, sãwũã bedʼeabasita akʉza kʼãrẽta obasita Daizeze bedʼea jaradia  wãbʉrʉde. Bʉa Jesude kĩrãkʼa ora iyi kĩrãkʼa krĩchayi akʉza biʼia kʼawuayi Daizeze Bedʼeadebema sãwũã oita.

DAIZEZE BEDʼEA Ʉ̃RɄ BIʼIA KʼAWUAIBA SÃWŨÃ KʼAREBABɄ

12. ¿Kʼãrẽta nããra kʼawuapanʉ Jesu ʉ̃rʉ?

¹² Dayirãba biʼia kʼawuaita Daizeze Bedʼeadebema sãwũã oita, Jesu ʉ̃rʉ nãã kʼawuadamaepai ameibara ẽ. Bari jaraita, dayirãba nãã kʼawuadara naʉ̃ra, dayirãba nemitia oda kʼarea jẽda krĩchaita, ĩjãita, buru kʼoeita akʉza beidara jẽda piradrʉi ʉ̃rʉ kʼawuadata (Heb. 6:​1, 2). Kristianorabara nããra maʉ̃ ʉ̃rʉ kʼawuapanʉ, maʉ̃ kʼarea Pedroba pentekoste ewaride ẽbẽrarã maʉ̃ ʉ̃rʉ jaradiasi (Hech. 2:​32-35, 38). Kristiano bʼaira maʉ̃ ʉ̃rʉ ĩjãibara, bari jaraita Pabloba maʉ̃ ʉ̃rʉ jara ũrĩbisi, iya jarasi dayirãba jẽda piradrʉi ʉ̃rʉ ĩjãna ẽ bʉrʉ Jesu kʼaidubema babe ẽãta (1 Cor. 15:​12-14). Mawũẽra dayirãba biʼia kʼawuaita Daizeze Bedʼeadebema sãwũã oita audre kʼawuakĩrãbaibara.

13. ¿Kʼãrẽta odaibara yiko jauredebemaneba nebia ũduita? (Hebreos 5:14 akʉza akʉra potota).

¹³ Dayirãba kʼawuasida bari nãã kʼawuadamaepai ameibara ẽãta awuarabʉrʉ yiko jauredebema ʉ̃rʉ audre kʼawuaibarata, maʉ̃ba jarakĩrãbʉ bari kʼawuaibara ẽãta Jeowaba ley diabʉ ʉ̃rʉ, adewara maʉ̃ awuara kʼawuaibarata Daizeze Bedʼearadebemaba kʼãrẽta jarabʉta, mawũã kʼawuaita Jeowaba sãwũã krĩchabʉta. Maʉ̃ba dayirãba yiko jauredebemaneba nebiata ũdubikĩrãpanʉbʉrʉ nããra biʼia kʼawuaibara maʉ̃ ʉ̃rʉ, krĩchaibara maʉ̃ ʉ̃rʉ akʉza daya kʼawuada kĩrãkʼa oũdubibara. Dayirãba mawũã opanʉbʉrʉ nekʼãrẽ oita jidabʉrʉde jidadayi nekʼãrẽ Jeowaba kãgabʉ oita c (akʉra Hebreos 5:14).

14. ¿Pabloba sãwũã kʼarebasi kristianora Corintodebemaraba biʼia kʼawuamarẽã Daizeze Bedʼeadebema sãwũã oita?

¹⁴ Kristianora Daizeze Bedʼeadebema sãwũã oita biʼia kʼawua ẽ bʉraitara, zareabʉ ãya nei oitabʉrʉde Daizeze Bedʼearadebemaba jarabʉ kĩrãkʼa oũdubita akʉza Daizeze Bedʼeade Jeowaba kʼãrẽ ley diabʉta neẽbʉrʉ, ãyara krĩchaseabʉ ãya kãgata oseabʉta, adewara ʉ̃kʉrʉbara ãyikʉzaʉba bʉebʉ awuru leyta. Bari jaraita, kristianora Corintodebemaraba Pabloʼa widisida yiko idolora diadara koseabʉ kʼawuaita. Pabloba ãya  jarai kaude kʼãrẽta oibarata, ũdubisi aba abakaʉba jidaibarata ãyi krĩchaba iduaribibʉta akʉza Pablobara jara ũrĩbisi ʉ̃kʉrʉ Daizeze Bedʼearadebemata, mawũã ãya kʼawuadamarẽã ãya kʼãrẽta jidaita adewara maʉ̃ jidabʉrʉde ãyi krĩchasi aduʼa bamarẽã, mawũã wuabemarata baebi ẽ baita (1 Cor. 8:​4, 7-9). Pabloba kristianora Corintodebemara mawũã jaradiadaba kʼarebasi ãyi aba abakaʉba jida kʼawuamarẽã kʼãrẽta okĩrãbʉta adewara biʼia kʼawuadamarẽã Daizeze Bedʼeadebema sãwũã oita.

15. ¿Sãwũã kʼarebasi Pabloba kristianora judioraba biʼia kʼawuamarẽã Daizeze Bedʼeadebema sãwũã bia oita?

¹⁵ Atia akʉdayi kʼãrẽta kʼawuapanʉta Pabloba ebreora karta bʉdadeba. Ãyidebema ʉ̃kʉrʉba Jeowata audre ũdukʼawua wã ẽ basi baera, yikoara diai kaude jẽda lecheta diaibarabasi wũãwũã zake kĩrãkʼa (Heb. 5:12). Jeowaba ãyaʼa kongregasioneba ewariza nekʼãrẽ jaradiabʉta kʼawuakĩrãna ẽ basi akʉza ĩjãkĩrãna ẽ basi (Prov. 4:18). Bari jaraita, Jesu beida tẽãra wua oẽ baibarabasi Moisés leyba jaradiabʉra, mamina maʉ̃neba 30 poaga berabarisidu mejãcha judioraba krĩchapanasi akʉza jarapanasi Moisés Leyba jarabʉ kĩrãkʼa oibarata (Rom. 10:4; Tito 1:10). Jeowaba naʉ̃ra mebẽrã widi ẽ basi mesera awuara krĩchamarẽãra awuarabʉrʉ 30 poaga berabaribisi ãya nãã sãwũã krĩchabadata awuara krĩchamarẽã. Pabloba karta ebreora diabʉesidera kʼarebakĩrãbasi ãya ĩjãmarẽã Jeowaba kʼãrẽ nebia jaradianʉmʉta ãyaʼa, adewara ũdudamarẽã Jeowaba ãyaʼa jaradiabʉra audre yibiata ãya nãã kʼawuabadaira. Maʉ̃ kartaba kʼarebasi mebẽrã judioraba ãya ĩjãbʉta audre zarea erbamarẽã akʉza zowaĩnĩgʉata erpanamarẽã awuru judioraba Daizeze Bedʼea jaradiabʉ kʼarea pẽwãbʉdade (Heb. 10:​19-23).

¿KʼÃRẼA IDUBUDA Ẽ BAIBARA BIʼIA KʼAWUABɄTA DAIZEZE BEDʼEADEBEMA SÃWŨÃ OITA?

16. ¿Kʼãrẽta oibara Daizeze Bedʼeadebema sãwũa oita biʼia kʼawuada awuara?

¹⁶ Dayirãra bari zarea oibara ẽ bia kʼawuaita Daizeze Bedʼeadebema sãwũã oita, awuarabʉrʉ zarea oibara maʉ̃ obʉta idubʉ ẽ baita, maʉ̃ba krĩcha ẽ baibara daya Jeowa ʉ̃rʉ kʼawuasi baera nesida ẽãta wua iyi ʉ̃rʉ kʼawuaira (1 Cor. 10:12). Ewariza dayikʉza akʉibara jʉrʉbʉ kʼawuaita Jeowa ʉ̃rʉ audre kʼawua wãita (2 Cor. 13:5).

17. ¿Colosenses kartaba sãwũã ũdubibʉ Daizeze Bedʼeadebema sãwũã oita biʼia kʼawuabʉta idubʉ ẽ baibarata?

 ¹⁷ Pabloba kolosensera karta bʉ diabʉeside akʉza ũdubisi kʼãrẽaba yibiata Daizeze Bedʼeadebema sãwũã oi kʼawuabʉta idubʉ ẽ baita. Kristianora kolosenserabara biʼia kʼawuapanasi Daizeze Bedʼeadebema sãwũã oita, mawũãsidu Pabloba ãyaʼa jarasi maʉ̃ obʉta idubʉda ẽ marẽã mawũã sewanebʉrʉ jarabʉa yi edebi ẽ baita (Col. 2:​6-10). Epafrasbara bia ũdukʼawuabasi mebẽrã kongregasionebemara akʉza ãyi kʼarea yiwidʼibasi mawũã kʼẽrẽpapanamarẽã akʉza Daizeze Bedʼeadebema sãwũã oita biʼia kʼawuapanamarẽã (Col. 4:12). ¿Kʼãrẽta kʼawuapanʉ naʉ̃neba? Pabloba akʉza Epafrasʼʉ̃meba kʼawuasida dayirãba Daizeze Bedʼeadebema sãwũã oita biʼia kʼawuabʉta idubʉamabʉbʉrʉ, Jeowa kʼarebata nesidaita adewara maʉ̃ awuara badua akʉbaibarata Jeowa ʉ̃rʉ kʼawuabʉta ariwia obʉ kʼawuaita. Ãyara kãgapanasi kristianora kolosenseraba bedʼea zroma ũdubʉidu ũdubidamarẽã biʼia kʼawuapanʉta Daizeze Bedʼeadebema sãwũã oita.

18. ¿Kʼãrẽta berabariseabʉ kristiano Daizeze Bedʼeadebema sãwũã oita biʼia kʼawuabʉsida? (Akʉra potota).

¹⁸ Pabloba jarasi ebreora kristiano Daizezedebema sãwũã oita biʼia kʼawuabʉta jʉra kʼawuabʉ ẽ bʉrʉ ewari jõmaʉ̃nẽ aduaseabasita Daizezeba iyi sãwũã bia akʉbʉra. Mawũẽra kristiano abaʉba Daizeze Bedʼeaba zokʼabʉta jipa okĩrã ẽ bʉrʉ naʉ̃ra mejãcha jĩga wãseabʉ Jeowadeba, baribʉrʉ kristianora ebreorãra aukʼara jĩga wã ẽ basi maʉ̃ kĩrãkʼa (Heb. 6:​4-9). ¿Kʼãrẽba sãwũãi Jeowa ode kʉrãzabʉta akʉza Jeowadeba ãĩ wãnata jẽda krĩchara? Ãya edabʉta ũdubida kʼãrãpe soiduba jẽda krĩchara, Pabloba ẽbẽrarã jarada kĩrãkʼa berabari ẽ bayi, ãyara ewari jõmaʉ̃nẽ adua ẽ bayi Jeowaba ãyi sãwũã bia akʉbʉra. Mawũãsidu, ãyi jẽda zebʉrʉdera kʼarebata nesidayi (Ezeq. 34:​15, 16). Maʉ̃ba zõrãrãba mebẽã aba Daizeze Bedʼeadema sãwũã oita biʼia kʼawuabʉta jʉrʉdayi, naʉ̃ mebẽãta kʼarebamarẽã jẽda Jeowa neũdukʼawua bʼaita.

19. ¿Kʼãrẽta oseabʉ bʉara?

¹⁹ Bʉa Daizeze Bedʼeadebema sãwũã oita biʼia kʼawuakĩrãbʉbʉrʉ, bʉa maʉ̃ra ozeseabʉ Daizeze Bedʼea ʉ̃rʉ kʼawuabʉta biʼia kʼawua wãra akʉza zarea ora Jeowa krĩchabʉ kĩrãkʼa krĩchaita. Bʉa biʼia kʼawuabʉbʉrʉ Daizeze Bedʼeadebema sãwũã oita maʉ̃ ʉ̃rʉ kʼawuabʉta idubʉrãra.