1. Ka Jéova ka atann dè-nou ?

 YONN adan sé pibèl moman-la on misyé é madanm a-y ka viv, sé lèwvwè tibébé a yo ka fèt. Men, menmsi sé paran-la enmé timoun a yo onlo, yo pa vlé i rété on tibébé tout vi a-y. An réyalité, si timoun-la pa té ka grandi, yo té’é enkyèt toubònman. Menmjan-la, Jéova ka kontan lè i ka vwè-nou ka koumansé aprann dé biten asi-y, men i vé pa kè nou rété a nivo-lasa (1 Kor. 3:1). Jéova vé pa nou rété dé timoun adan lavérité. Okontrè, i vé nou vin dé « granmoun » (1 Kor. 14:20).

2. A ki kèsyon nou ké réponn adan awtik-lasa ?

² Kijan on krétyen ki mati ka rézonné é kijan i ka aji ? Ka pou nou fè pou nou vin dé moun ki byen doubout adan lavérité ? Kijan « manjé solid » la pé édé-nou vin mati ? É poukwa fò pa nou two sèten dè nou ? Awtik-lasa ké édé-nou réponn a sé kèsyon-lasa.

KIJAN ON MOUN KI MATI KA RÉZONNÉ É KA AJI ?

3. Lè Labib ka di kè fò-nou vin dé « granmoun », ka i vé di ojis ?

³ Adan Labib, mo grèk la yo tradui la é ki bay « granmoun » pé vé di « mati », « pawfè » oben « antyè » a (1 Kor. 2:6). Pi tan ka pasé é pi on tibébé ka grandi pou vin on granmoun. Menmjan-la osi, pi nou ka aprann konnèt Jéova é pi nou ka vin bon zanmi èvè-y. Kifè nou ka vin dé krétyen dè plizanpli mati. Nou ka tou konprann kè menmsi nou ja vin mati, fò pa nou jen arété pwogrésé (1 Tim. 4:15). Noutout pé vin dé moun ki byen doubout adan lavérité, menm sé jenn-la osi pé fè sa. Men ka ki ka montré kè on moun byen doubout adan lavérité ?

4. Si fò ou té palé dè on krétyen ki byen doubout adan lavérité, ka ou té’é di ?

 ⁴ On krétyen ki byen doubout adan lavérité pa ka suiv enki komandman a Bondyé ki agou a-y men i ka suiv-yotout. Nou ka tou konprann kè konm i enpawfè, i ké fè érè. Men chakjou, i ka fè tousa i pé pou rézonné é pou aji kon Jéova vlé. I mèt nouvo pèwsonalité-la anlè a-y é pi tan ka pasé é pi i ka fè éfò pou vwè léchòz kon Jéova (Éféz. 4:22-24). Lè i ni on désizyon a pran, i toujou ka bazé-y asi lwa a Jéova é asi prensip a-y, kifè i pa bizwen onpakèt règ pou sav ka pou i fè. É lè i pran désizyon a-y, i ka travay rèd pou fè sa i désidé (1 Kor. 9:26, 27).

5. Ka ki pé rivé on krétyen ki pa mati ? (Éfézyen 4:14, 15).

⁵ Lèwvwè on krétyen pa mati, i pé tonbé adan zatrap a « moun ki madragè » fasilman. Pa ègzanp, i pé mété-y ka kwè kankan, enfòwmasyon oben istwa ki pa vré kè moun ka rakonté. Oben i pé lésé sé apòsta-la kouyonné-y b (li Éfézyen 4:14, 15). Pétèt i ka jalou lézòt fasilman, i ka égri vit é i ka trapé bab èvè moun pou on ti ayen. Oben pétèt osi lèwvwè i ka jwenn on tantasyon, i pa’a rivé tchenbé é i ka pri adan sa (1 Kor. 3:3).

6. Bay on ègzanp ki ka montré kijan on krétyen ka vin mati (gadé imaj-la osi).

⁶ Kon nou vwè-y pli ho adan awtik-lasa, Labib ka konparé jan on krétyen ka vin mati èvè jan on timoun ka vin on granmoun. Sé timoun-la pa konnèt granzafè, kifè yo bizwen kè on granmoun pwotéjé-yo é kè i jété on zyé asi yo. An-nou pran on ègzanp pou nou konprann sa. On manman ké ba timoun a-y lanmen pou travèsé lari-la. Men lèwvwè timoun-lasa ké grandi, pétèt i ké lésé-y travèsé tousèl a-y men i ké fè-y sonjé kè fò i gadé adwat é agòch avan i travèsé. Aprésa lè timoun-lasa ka vin granmoun, sé-y menm ki ka fè atansyon pou ayen pa rivé-y. Menmjan sé timoun-la bizwen on granmoun jété on zyé asi yo pou ayen pa rivé-yo, sé menmjan-la osi on moun ki pa mati bizwen kè on moun ki byen doubout adan lavérité édé-y pran dé bon désizyon pou i pa pèd lanmityé a-y èvè Jéova. Pawkont lè on krétyen ki mati ni on désizyon a pran, i ka bazé-y asi sé prensip-la ki an Bib-la pou chèché a konprann  ka Jéova ka pansé asi sa é i ka tchenn kont dè sé prensip-lasa.

7. Ès délè on krétyen ki mati bizwen yo édé-y ?

⁷ Ès sa vé di kè on krétyen ki mati pa jen bizwen yo édé-y ? Awa. Délè fò i mandé moun édé-y osi. Men alò ki diférans ki ni èvè on moun ki po’o mati ? On krétyen ki po’o mati tibwen kon on timoun ki ka atann asi lézòt pou yo di-y ka pou-y fè oben pou yo pran désizyon an plas a-y alòskè sé li a pran désizyon a-y. Pawkont, lè on krétyen ki mati ka mandé dòt krétyen ki ni sajès é ki ni èkspéryans édé-y, i sav kè sé li ki rèsponsab a sé désizyon-la i ka pran la é kè Jéova ka mandé-y « pòté pwòp chaj a-y » (Gal. 6:5).

8. Tout sé krétyen-la ki mati la pa menm biten. Adan ki domenn yonn diféran dè lòt ?

⁸ Lè nou ka gadé tout sé granmoun-la, yonn pa’a sanm lòt. Menmjan-la tout sé krétyen-la ki mati la pa menm biten, pas yo pa ni sé menm kalité-la. Sé konsa sèwten krétyen pé ni onlo sajès, alòskè dòt sé pito kouraj yo ni. Sèwten pé donan toubònman, alòskè dòt sé pito konpasyon yo ni pou lézòt. Anplisdisa, 2 krétyen ki mati pé touvé-yo adan menm sitiyasyon-la men yo pa oblijé pran menm désizyon-la, menmsi yotoulédé ka bazé désizyon a yo asi prensip ki an Bib-la. Sa vré siwtou si désizyon-la yo ni a pran la ka dépann dè konsyans a yo. É konm yo sav sa byen, yonn pa ka jijé lòt davwa yo pa pran menm désizyon-la. Yo pito ka fè ansòt pou yo rété soudé (Wom. 14:10 ; 1 Kor. 1:10).

KA POU NOU FÈ POU NOU VIN ON KRÉTYEN KI MATI ?

9. Ès nou pé enn vin on krétyen ki mati san fòsé ? Bay on ti èsplikasyon.

⁹ On timoun ka grandi san fòsé, sé on biten ki ka fèt natirèlman. Men a pa menm biten pou on krétyen ki bizwen vin mati. Si i pa fè éfò, biten-la pé’é fèt tousèl a-y. Pa ègzanp, sé frè é sè Korent la té aksèpté bon nouvèl-la, yo té pran lèbatèm é Bondyé té voyé lèspri sen a-y asi yo. Yo té aprann onlo biten osi grasa sa Pòl té anségné-yo (Akt 18:8-11). Men déotwa lanné apré yo té pran lèbatèm, ni onlo adan yo ki poto’o vin dé krétyen ki byen doubout adan lavérité (1 Kor. 3:2). Ka nou pé fè pou sa pa rivé-nou ?

10. Ka pou nou fè pou nou vin dé krétyen ki mati ? (Jid 20).

¹⁰ Pou nou vin on krétyen ki mati, dabò pou yonn, fò-nou anvi vin mati. Moun ki « pa konnèt ayen » é ki anvi rété konsa pé ké jen vin dé krétyen ki mati (Pwov. 1:22). Nou pa anvi sanm sèwten granmoun ki ka kontinyé mandé manman-yo oben pap’a yo ka pou yo fè, olyé yo pran pwòp désizyon a yo. Okontrè, nou vé pran rèsponsabilité an nou é nou vé kontinyé vin pibon zanmi èvè Jéova (li Jid 20). Si ou ka chèché a vin on krétyen ki mati, priyé Jéova é mandé-y ba-w « lanvi-la é fòs-la anmenmtan pou [ou] pé aji » (Filip. 2:13).

11. Ka Jéova ka ban-nou pou édé-nou vin on krétyen ki mati ? (Éfézyen 4:11-13).

¹¹ Jéova pa ka mandé-nou vin on krétyen ki mati tousèl an nou. I ka ban-nou sé ansyen-la ki sé dé bèwjé é ki sé dé moun ki ka anségné adan sé lasanblé-la pou yo édé-nou vin on krétyen ki byen doubout adan lavérité é « pou nou rivé menm nivo ki Jézi, pou nou vin konplé kon-y » (li Éfézyen 4:11-13). Jéova ka ban-nou lèspri sen a-y osi pou nou ni « mantalité a Kris » (1 Kor. 2:14-16). Anplisdisa, Bondyé ban-nou sé 4 Évanjil-la pou nou sav kijan Jézi rézonné, sa i di é kijan i aji pannan i té asi latè. Siwvwè ou ka fè éfò pou-w pansé é pou-w aji kon Jézi, ou ké vin on krétyen ki mati.

 KIJAN MANJÉ SOLID LA KA ÉDÉ-NOU ?

12. Lè yo ka palé dè « sé ansègnman dè baz la anrapò èvè Kris », dè ki biten yo ka palé ojis ?

¹² Pou nou pé sa vin on krétyen ki mati, fò pa nou kontanté-nou enki dè « sé ansègnman dè baz la anrapò èvè Kris », kivédi sé 1^é biten-la nou aprann asi Kris lè nou vin krétyen. Pa ègzanp, nou aprann kè sa enpòwtan kè on moun rèpanti-y, nou aprann dé biten anlè lafwa, lèbatèm, é larézirèksyon (Ébr. 6:1, 2). Pyè osi ni lokazyon palé dè sé biten-lasa èvè on foulmoun, ki té sanblé pou Lapannkòt (Akt 2:32-35, 38). Fò nou aksèpté sé biten-lasa si nou vé vin disip a Jézi. Poukwa nou ka di sa ? Lapòt Pòl èspliké pa ègzanp kè si on moun pa ka kwè adan larézirèksyon, i pé pa di kè i sé on vré krétyen (1 Kor. 15:12-14). Men pou nou vin on krétyen ki mati, sé ansègnman-lasa pa ka sifi, fò-nou chèché a konnèt plis biten.

13. Si nou vé bénéfisyé dè manjé solid la yo ka palé an Ébré 5:14, ka pou nou fè ? (gadé imaj-la osi).

¹³ Lè nou ka konparé « sé ansègnman dè baz la anrapò èvè Kris » èvè « manjé solid », nou ka vwè kè non sèlman manjé solid la ni lwa a Bondyé adan men anplisdisa i ni prensip a Bondyé adan osi. Sé sé prensip-lasa ki ka édé-nou konprann kijan Jéova ka pansé. Pou nou bénéfisyé dè nouriti-lasa, fò-nou étidyé Pawòl a Bondyé, pran tan médité anlè-y é apliké sa nou aprann byen konm i fo. Lè nou ka fè sa, nou ka aprann pran dé désizyon ki ka fè Jéova plézi c (li Ébré 5:14).

14. Kijan Pòl édé sé krétyen Korent la vin dé krétyen ki mati ?

¹⁴ Délè, adan sèwten sitiyasyon, pa ni pon lwa adan Labib ki ka di ka pou nou fè. Lè on krétyen ki pa mati ka touvé-y adan on sitiyasyon konsa, i ni dimal a pran on désizyon. Lè sé konsa, ni sa ki ka di kè konm pa ni pon lwa ki ka palé dè sa adan Labib, yo pé fè sa yo vlé. Ni sa osi ki bizwen moun di-yo ka pou yo fè alòskè chakmoun lib dè fè pwòp chwa a-y adan domenn-lasa. An-nou pran ègzanp a sé krétyen Korent la. Yo té bizwen lapòt Pòl di-yo si yo té pé manjé nouriti moun té ba sé idòl-la an sakrifis. Men olyé Pòl di-yo ka pou yo fè, Pòl fè-yo sonjé a ki biten konsyans an nou ka sèvi é i fè-yo sonjé osi kè noutout lib dè chwazi ka pou nou fè. I montré-yo  déotwa prensip pou yo rivé pran on désizyon ki annakò èvè konsyans a yo é ki pa té’é fè ponmoun tribiché (1 Kor. 8:4, 7-9). Lè Pòl fè sa, i aprann-yo sèvi èvè Lézékriti pou pran désizyon a yo olyé yo toujou atann asi on moun pou di-yo ka pou yo fè oben kè yo toujou chèché a ni on lwa pou chak sitiyasyon. I édé-yo vin dé krétyen ki mati.

15. Kijan Pòl édé sé krétyen ébré la pwogrésé pou yo vin dé krétyen ki pi mati ?

¹⁵ Sa Pòl maké ba sé krétyen ébré la ka montré-nou ondòt biten enpòwtan. Ni sa adan yo ki pa té ka chèché a vin dé krétyen ki pi mati. ‘Fò-yo té woukoumansé ba-yo lèt olyé yo té manjé manjé solid’ ki adan Pawòl a Bondyé (Ébr. 5:12). Piti-a-piti, Bondyé té anségné-yo dé nouvo biten grasa lasanblé-la men yo pa aksèpté sé biten-lasa (Pwov. 4:18). Pa ègzanp, ni onlo krétyen juif ki té ka di kè fò-yo té suiv Lwa a Moyiz toujou, alòskè sa té ja ka fè 30 lanné Jézi té woté-yo anba Lwa-lasa lèwvwè i té bay vi a-y an sakrifis (Wom. 10:4 ; Tit 1:10). Pannan sé 30 lanné-lasa yo té ni tout tan a yo pou yo konprann kè yo pa té bizwen suiv Lwa-lasa ankò. Adan lèt-la Pòl maké la, té ni manjé solid pou on krétyen vin mati é sé ègzaktèman sa yo té bizwen. Adan lèt-lasa, Pòl té ka fè sé krétyen-la vwè kè jan Jézi té aprann-yo adoré Bondyé té lontan méyè ki jan yo té ka adoré Bondyé avan. Sa té ka ba-yo kouraj osi pou yo té kontinyé préché magré sé Juif-la té ka mèt baton an wou a yo (Ébr. 10:19-23).

FÒ PA OU TWO SÈTEN DÈ-W

16. Toupannan nou ka fè éfò pou nou vin pli mati, ki dòt biten pou nou fè ?

¹⁶ Non sèlman fò-nou fè éfò pou nou vin dé krétyen ki mati, men fò-nou fè éfò osi pou nou rété konsa. Pou nou rivé fè sa, fò pa nou two sèten dè nou (1 Kor. 10:12). Okontrè, fò-nou ‘kontinyé vérifyé ki jan dè moun nou yé’ pou vwè si nou ka kontinyé pwogrésé (2 Kor. 13:5).

17. Kijan lèt-la Pòl voyé ba sé Kolosyen-la ka montré kè fò nou fè éfò pou nou rété dé krétyen ki mati ?

¹⁷ Adan lèt-la Pòl voyé ba sé Kolosyen-la, i woudi-yo ankò jan sa enpòwtan kè nou fè éfò pou nou rété dé krétyen ki mati. Sé krétyen Kolòs la té byen doubout adan lavérité, men poutan Pòl avèti-yo pou yo pa lésé mond-la  détenn asi mannyè yo ka pansé (Kol. 2:6-10). I ka sanm sa Épafras té konnèt sé frè é sè Kolòs la byen é i té ka priyé akontinyé ‘pou yo rété byen chouké adan lavérité’, kivédi pou yo rété dé krétyen ki mati (Kol. 4:12). Ka sa ka aprann-nou ? Ki Pòl, ki Épafras té byen konprann kè pou on moun té byen chouké adan lavérité, i té bizwen Bondyé édé-y. Men li dè koté a-y osi, fò i té fè éfò pou i kontinyé vin pibon zanmi èvè Jéova. Yo té vé sé Kolosyen-la kontinyé rété dé granmoun, oben dé krétyen ki mati, kèlkèswa sé éprèv-la yo té’é pé jwenn la.

18. Ka ki pé rivé on krétyen ki mati ? (gadé imaj-la osi).

¹⁸ Pòl avèti sé krétyen ébré la kè on moun ki mati pé rivé a pèd favè a Bondyé pou touttan siwvwè i pa’a fè atansyon. Siwvwè on krétyen ka rèfizé kouté Jéova, i pé fin pa touvé-y tèlman lwen a Bondyé kè i pé pa jen rèpanti-y ankò é i pé pa jen bénéfisyé dè padon a Bondyé ankò. Érèzman, sé Ébré-la pa té adan sitiyasyon-lasa (Ébr. 6:4-9). É sé frè é sè-la ki pa k’ay réinyon jòdijou oben ki pa’a préché ankò oben séla yo èskominyé la men ki rèpanti-yo apré ? Lèfètkè yo rèpanti-yo èvè imilité, sa ka montré kè yo pa ni ayen a vwè èvè sé moun-la Pòl té ka palé la adan lèt a-y. Men nou ka tou konprann kè lèwvwè yo ka viré owa Jéova, yo bizwen kè i édé-yo (Ézék. 34:15, 16). Sé pousa, ki yo té èskominyé ki yo té arété préché, sé ansyen-la pé mandé on Témwen ki ni èkspéryans édé-yo, pou yo wouvin bon zanmi èvè Jéova.

19. Ki òbjèktif nou dwètèt ni ?

¹⁹ Si ou ka fè onlo éfò pou-w vin on krétyen ki mati, ou ké pé atenn òbjèktif-lasa ! Kontinyé pran manjé solid la, é pi tan ka pasé pi fò-w fè ansòt pou vwè léchòz menmjan ki Jéova. É si ou ja on krétyen ki mati, fè tousa ou pé pou rété konsa !