1. Kisa Jéova ka doumandé nou fè ?

 LÒ ROUN papa ké roun manman ka gen roun ti bébé byenpòrtan, sa ka fè yé tchò kontan toubonnman. Mé menm si yé kontan l’ bokou, yé pa lé i rété roun ti bébé pannan tout so lavi. Yé té ké menm enkyèt si i pa té ka grandi. Menm fason-an, Jéova tou kontan lò i ka wè nou divini roun disip Jézi. Mé i pa lé nou rété roun timoun annan domenn èspirityèl-a (1 Cor. 3:1). I pito ka doumandé nou « divini dé granmoun » (1 Cor. 14:20).

2. Ki késyon nou ké réponn annan sa artik-a ?

² Kisa sa lé di divini roun krétyen ki djòk ? Kisa nou divèt fè pou nou divini roun krétyen konsa ? Kouman « gro manjé-a » pouvé idé nou ? É poukisa nou pa janmen divèt krè ki nou pa bézwen fè pyès éfòr ankò ? Nou ké réponn sa késyon-yan annan sa artik-a.

KISA SA LÉ DI DIVINI ROUN KRÉTYEN KI DJÒK ?

3. Kisa sa lé di divini roun krétyen ki djòk ?

³ Annan Labib, mo grèk-a yé ka sèrvi pou di « vin gran » pouvé lé di osi « djòk », « parfè » ouben « antchè » (Éph. 4:13, nòt). Donk, kou roun ti bébé ki ka kontinyé grandi jiktan i divini gran, nou menm osi nou divèt kontinyé fè nou lanmityé ké Jéova vin pi fò. A konsa nou ka divini dé krétyen ki djòk. Mé menm lò nou divini gran, nou pa janmen divèt arété fè progrè (1 Tim. 4:15). Tout moun, menm sa ki jenn, pouvé divini djòk annan domenn èspirityèl-a. Mé kisa ki ka montré ki roun krétyen djòk ?

4. Kisa ki ka montré ki roun krétyen djòk ?

⁴ Roun krétyen ki djòk ka obéyi tout koumannman Bondjé. A pa sa-ya i kontan rounso i ka obéyi. Kou i pa  parfè, i ka fè fot. Mé annan so lavi di touléjou, i ka montré ki i ka réfléchi kou Jéova, é i ka fè so volonté. I mété nouvo pèrsonalité-a, é i ka fè tousa i pouvé pou i toujou réfléchi ankò plis kou so Bondjé (Éph. 4:22-24). I pran labitid itilizé lalwa ké prensip Jéova-ya pou pran bon désizyon. Donk, i pa bézwen roun patché règ pou savé kisa i divèt fè. Pou fini, lò i ka pran roun désizyon, i ka kontrolé so kò pou i fè sa i désidé fè (1 Cor. 9:26, 27).

5. Kisa ki pouvé rivé roun krétyen ki pa djòk ? (Éphésiens 4:14, 15).

⁵ Parkont, roun moun ki pa djòk pouvé fasilman lésé « moun ki ka tronpé moun é ki fò annan zafè bloublou moun » détenn asou li. Parèkzanp, i pouvé lésé moun ki ka di bagaj yé pa menm vérifyé ouben apòsta-ya bloublou li a (li Éphésiens 4:14, 15). I pouvé gen tandans jalou moun ouben kòlè. É i pouvé fasilman lévé blo ké moun ouben tonbé annan tantasyon (1 Cor. 3:3).

6. Bay roun èkzanp ki ka montré kouman roun krétyen ka vin djòk (gadé zimaj-a osi).

⁶ Kou nou wè l’, Labib ka konparé roun krétyen ka vin djòk ké roun timoun ka vin gran. Timoun-yan pa ka rivé fè diférans ant sa ki bon ké sa ki mové, é yé bézwen granmoun-yan véyé asou yé épi protéjé yé. Annou pran roun èkzanp : roun manman ké doumandé so tifi bay li lanmen pou janbé larout-a. Pi so tifi ké grandi, pi i ké lésé l’ janbé larout-a li rounso, mé i ké toujou fè l’ sonjé ki i divèt byen gadé a drèt ké a goch. Mé lò so tifi ké vin gran, i ké fè atansyon san pyès moun pa di li anyen. I pa ké pran pyès risk. Enben, menm fason timoun bézwen granmoun pou évité danjé-ya, roun krétyen ki pa djòk bézwen roun krétyen ki djòk idé l’ pou i pa tonbé annan pyès bagaj ki pouvé gaté so lanmityé ké Jéova, é pou i pran bon désizyon. Parkont, lò roun krétyen ki djòk gen roun chwa pou fè, i ka pran tan réfléchi asou prensip-ya ki annan Labib pou wè kisa Jéova ka pansé, é i ka tchenbé kont di sa.

7. Ès roun krétyen ki djòk bézwen yé idé l’ ?

 ⁷ Ès sa lé di ki roun krétyen ki djòk pa janmen bézwen roun moun idé l’ ? Non. Détan, i bézwen doumandé roun moun idé l’. Roun moun ki kou roun timoun annan domenn èspirityèl-a ka antann ròt-ya di li kisa pou i fè ouben ki yé pran roun désizyon pou li. Parkont, menm si roun krétyen ki djòk ka profité di sajès ké èspéryans ròt-ya gen, i savé ki Jéova lé i « poté sopa charj » (Gal. 6:5).

8. Poukisa nou pouvé di ki krétyen-yan ki djòk diféran ?

⁸ Menm fason tout moun diféran, roun krétyen ki djòk pa oblijé gen menm kalité ké rounòt krétyen ki djòk. I gen sa ki gen bokou sajès épi sa ki gen bokou kouraj. Roun ran pouvé kontan bay bokou, épi rounòt ran pouvé fò annan zafè konprann sa ròt-ya ka rousanti. Anplis di sa, annan menm sitiasyon-an, dé krétyen ki djòk pouvé pran dé désizyon diféran, mé ki ka alé ké prensip-ya ki annan Labib. Èspésyalman lò a chak moun pou désidé sa i ké fè. Kou yé savé sa, yé ka fè atansyon pou yé pa jijé yé konpanyen si yé pa ka pran menm désizyon-an. Yé pito ka chaché rété ansanm ansanm (Rom. 14:10 ; 1 Cor. 1:10).

KISA NOU DIVÈT FÈ POU NOU DIVINI ROUN KRÉTYEN KI DJÒK ?

9. Ès nou ka vin djòk annan domenn èspirityèl-a toubonnman konsa ?

⁹ Piti piti, nou tout ka vin gran san nou pa bézwen fè anyen. Parkont, annan domenn èspirityèl-a, pyès moun pa ka vin gran konsa. Parèkzanp, frè ké sò-ya ki té Korent té asèpté bon nouvèl-a, yé té batizé, yé té rousouvwè lèspri sen-an é yé té anprann roun patché bagaj gras a sa Pòl té anprann yé (Actes 18:8-11). Mé déztrwa lannen apré yé batizé, roun patché annan yé té ka tété toujou (1 Cor. 3:2). Kisa nou pouvé fè pou sa pa rivé nou ?

10. Kisa nou divèt fè pou nou vin dé moun ki djòk ? (Jude 20).

¹⁰ Pou koumansé, a pou nou lé divini roun moun ki djòk. Sa-ya ki simyé rété dé timoun annan domenn èspirityèl-a paské yé « pa konnèt anyen » é ki yé « kontan rété konsa », yé pa ké rivé pyès koté (Prov. 1:22). Nou pa lé sanblé ké roun ran moun ki ka konté asou yé papa ké yé manman pasé yé pran yé pròp désizyon. Nou pito lé pran nou rèsponsabilité épi vin gran annan domenn èspirityèl-a (li Jude 20). Si to lé divini roun moun ki djòk, doumandé Jéova bay to « anvi aji é an menm tan fòrs pou aji » (Phil. 2:13).

11. Kisa Jéova ka bay nou pou nou rivé divini dé krétyen ki djòk ? (Éphésiens 4:11-13).

¹¹ Jéova pa ka doumandé nou vin djòk ké nou pròp fòrs rounso. Annan asanblé krétyen-an, i gen frè ki bèrjé ké ansényan. Yé rousouvwè roun fòrmasyon pou idé nou « vin gran » annan domenn èspirityèl-a, é pou idé nou rivé « annan menm ran ké Kris, pou nou vin antchè kou li menm » (li Éphésiens 4:11-13). Jéova ka bay nou so lèspri sen osi pou nou gen « mantalité Kris-a » (1 Cor. 2:14-16). Pou fini, i fè moun ékri kat Évanjil pou fè nou savé kouman Jézi réfléchi, sa i ansényé épi sa i fè lò i té asou latè-a. Si to ka fè tousa to pouvé pou to réfléchi é pou to aji  kou Jézi, to ké rivé divini roun krétyen ki djòk.

KOUMAN GRO MANJÉ ÈSPIRITYÈL-A KA IDÉ NOU

12. A kisa ki « ansèyman enpòrtan-yan asou Kris » ?

¹² Pou nou divini dé krétyen ki djòk, nou divèt anprann plis ki « ansèyman enpòrtan-yan asou Kris », sa lé di prémyé bagaj-ya nou ka anprann asou Kris. Parèkzanp, ansèyman-yan asou zafè répanti, gen lafwa, batenm-an ké rézirèksyon-an (Héb. 6:1, 2). A pou sa, lò Pyèr préché pou roun patché moun ki té rasanblé pou Lapannkot, i palé yé di sa bagaj-ya (Actes 2:32-35, 38). Nou menm osi nou divèt asèpté sa ansèyman-yan pou nou divini disip Kris. A sa Pòl èspliké. Parèkzanp, i di ki sa-la ki pa ka asèpté ansèyman-an asou rézirèksyon-an pa pouvé di ki i sa roun vré krétyen (1 Cor. 15:12-14). Mé pou nou divini dé krétyen ki djòk, nou divèt anprann plis ki sa prémyé ansèyman-yan.

13. Kisa nou divèt fè pou nou profité di gro manjé èspirityèl-a yé ka palé annan Hébreux 5:14 ? (gadé zimaj-a osi).

¹³ Gro manjé èspirityèl-a pa kou prémyé bagaj-ya nou ka anprann annan Labib. Annan gro manjé-a, i gen lalwa Jéova mé osi so prensip ki ka pèrmèt nou konprann kouman i ka réfléchi. Pou nou profité di sa manjé-a, a pou nou étidyé, pran tan réfléchi épi apliké so Paròl. Konsa, nou ké antréné nou kò pou nou pran désizyon ki ka fè l’ plézi b (li Hébreux 5:14).

14. Kouman Pòl idé frè ké sò-ya ki té ka rété Korent vin gran ?

¹⁴ Souvan, krétyen-yan ki pa djòk ka djoubaté lò yé divèt réfléchi asou prensip-ya ki annan Labib épi apliké yé. Lò i pa gen pyès lalwa annan Labib, roun ran ka pansé ki yé pouvé fè sa yé lé. Rounòt ran bézwen règ koté i pa gen règ pou mété. Annou palé di krétyen-yan ki té ka rété Korent. Aparaman, yé té doumandé  Pòl bay yé roun règ pou yé té savé si yé té pouvé manjé manjé yé té bay zidòl-ya. Pasé Pòl di yé sa yé té divèt fè, i pito montré yé ki yé chak té gen « drwa […] désidé » sa yé té divèt fè soulon sa yé konsyans té ka pèrmèt yé fè. I bay yé plizyèr prensip annan Labib ki té ké idé yé pran désizyon ki té ké pèrmèt yé gardé roun bon konsyans épi pa fè pyès moun bité (1 Cor. 8:4, 7-9). Konsa, i idé yé grandi èspirityèlman épi byen réfléchi, pasé yé konté asou roun moun ouben asou roun règ.

15. Kouman Pòl idé krétyen ébré-ya grandi èspirityèlman ?

¹⁵ Sa Pòl ékri pou krétyen ébré-ya pouvé anprann nou roun bagaj enpòrtan osi. Sèrten annan yé té arété grandi annan domenn èspirityèl-a. Yé té ‘bézwen viré bwè dilèt pasé yé manjé gro manjé [èspirityèl]’ ! (Héb. 5:12). Yé pa té asèpté nouvo bagaj Jéova té anprann yé gras a asanblé krétyen-an (Prov. 4:18). Parèkzanp, roun patché krétyen ki té jwif té ka kontinyé di ki yé té divèt swiv Lalwa Moyiz, alòr ki sakrifis Jézi té fin ké sa Lalwa-a i té ja gen 30 lannen (Rom. 10:4 ; Tite 1:10). Donk, Bondjé té bay yé 30 lannen pou chanjé fason yé té ka pansé ! Nòrmalman a té asé ! Nenpòrt kimoun ki ja li lèt Pòl ékri pou Ébré-ya pouvé di ki a yenki gro manjé i gen annan sa lèt-a. A èkzaktéman sa sa krétyen-yan té bézwen pou idé yé konprann ki fason yé té divèt adoré Jéova aprézan té lontan pi bon. É sa lèt-a bay yé kouraj yé té bézwen pou kontinyé préché menm si Jwif-ya té ka baré yé chimen (Héb. 10:19-23).

PA KRÈ KI TO PA BÉZWEN FÈ PROGRÈ ANKÒ

16. Kisa nou divèt fè toupannan nou ka vansé pou nou vin djòk ?

¹⁶ Nou divèt fè bokou éfòr pou nou vin djòk, mé osi pou nou rété djòk. Si nou lé fè l’, a pa pou nou pansé ki, kou nou ja djòk, nou pa gen pyès progrè pou nou fè ankò (1 Cor. 10:12). Pasé sa, a toulong pou nou « pran tan byen gadé » si nou ka kontinyé fè progrè (2 Cor. 13:5).

17. Kouman lèt Pòl ékri pou Kolosyen-yan ka montré ki sa enpòrtan di rété djòk ?

 ¹⁷ Annan lèt i ékri pou krétyen-yan ki té ka rété Kolòs, Pòl roudi ki sa enpòrtan di rété djòk. Krétyen-yan ki té Kolòs té vin gran annan domenn èspirityèl-a. Pourtan, Pòl di yé panga roun bagaj : yé té divèt panga pa lésé fason monn-an ka pansé détenn asou yé (Col. 2:6-10). Épi Épafras, ki té byen konnèt frè ké sò-ya annan sa asanblé-a, pa té ka arété priyè pou yé té pouvé « divini antchè » ouben djòk (Col. 4:12). Kisa sa ka anprann nou ? Ni Pòl ni Épafras té ka konprann ki pou roun moun rété djòk, i divèt fè éfòr épi Bondjé divèt idé li. Yé té lé Kolosyen-yan rété djòk (ki yé té rété gran annan domenn èspirityèl-a) kèlkéswa éprèv yé té ké pouvé jwenn.

18. Kisa ki pouvé rivé roun moun ki djòk ? (gadé zimaj-a osi).

¹⁸ Pòl èspliké krétyen ébré-ya ki roun moun ki pa ka panga pou i rété djòk, pouvé pédi so lanmityé ké Bondjé pou tout-tan. Si roun krétyen pa lé kouté Jéova, so tchò té ké pouvé vin tèlman rèd ki i pa té ké pouvé répanti ankò é Bondjé pa té ké pouvé pardonnen li. Krétyen ébré-ya yé menm pa té annan sa sitiasyon-an (Héb. 6:4-9). A menm bagaj-a pou sa-ya ki arété préché ouben ki èskominyé, mé ki répanti apré. Kou yé répanti ké imilité, sa ka montré ki yé pa kou sa-ya Pòl palé annan so lèt. Mé lò yé ka rouvini òbò Jéova, yé bézwen i idé yé (Ézék. 34:15, 16). A pou sa, ansyen-yan pouvé doumandé roun Témwen ki gen èspéryans idé roun moun ki té arété préché ouben ki té èskominyé pou i viré gen fòrs annan domenn èspirityèl-a.

19. Kisa nou divèt byen désidé fè ?

¹⁹ Ès to byen désidé vansé pou to vin djòk ? Si a sa, a pou to sir ki to pouvé rivé fè l’. Pou fè sa, kontinyé manjé gro manjé èspirityèl-a, é toujou fè sa ki fo pou to wè bagaj-ya kou Jéova ka wè yé. É si to ja vin djòk, a pou to rété konsa ! Fè tousa to pouvé pou to rété djòk !