1. Ami kitem kelʼlem Jehovak zai?

 EK BHURGEM zolmota tednam avoi-bapui khub khuxal astat. Tim aplea ballkacho khub mog kortat. Punn tanchem bhurgem lhanuch urlolem tankam naka. Khorem mhunnttlear, tanchem bhurgem vaddona zalear tankam usko zaunk lagta. Teach bhaxen, Jezucho pattlav korunk ami survatechim panvlam ghetat tednam Jehova khub khuxal zata. Punn ami titlench kelʼlem taka naka. (1 Kor. 3:1) Tachea bodlek, to amkam “vhoddleam sarke zaiat” mhunn sangta.—1 Kor. 14:20.

2. Hea lekhant ami kitem polloitolim?

² Bhavarthant ghott zavop mhunnttlear kitem? Ami bhavarthant ghott koxim zaunk xoktat? Nibor jevonn jevlear amkam bhavarthant ghott zaunk koxi modot zaunk xokta? Ami bhavarthant ghott ravonk kiteak vavr korit ravonk zai? Hea lekhant amkam hea prosnanche zobab mellttole.

BHAVARTHANT GHOTT ZAVOP MHUNNTTLEAR KITEM?

3. Bhavarthant ghott zavop mhunnttlear kitem?

³ Bible-ant, ‘vhoddleam sarke zavop’ mhunn bhaxantor kelʼlea Grik utracho orth, ‘bhavarthant ghott zavop,’ “poripurnn zavop” ani “sompurnn zavop” oso-i zaun asa. a (1 Kor. 2:6) Tor ek ballok vaddon vhoddlo zata tea bhaxen, ami pasun Jehova sangata amchi ixttagot ghott korun bhavarthant vaddonk xoktat. Ani oxem kelea uprant pasun, ami vaddavoll korunk vavr korit ravonk zai. (1 Tim. 4:15) Ami soglim, mhunnche tornnattim pasun bhavarthant ghott aslolim Kristanvam zaunk xoktat. Punn ek  Kristanv bhavarthant ghott asa mhunn koxem kolltta?

4. Ek Kristanv bhavarthant ghott asa mhunn koxem kolltta?

⁴ Bhavarthant ghott aslolo ek Kristanv apleak zai teoch nhoi, punn Jehovacheo sogleo adnea palltta. Punn hacho orth to kednanch chuki korchona oxem nhoi. Karonn to-ui opurnn zaun asa. Tori astana, dor disa Devak zai tea pormonnem chintunk ani vagonk to apleachean zata tem soglem korta. Novi vagnnuk apnnaunk ani aplem chintop Jehovachea chintpa pormonnem korunk to vavr korit ravta. (Ef. 4:22-24) Toxench, kosle-i nirnnoi ghetana taka kaideanchi ek lamb list-achi goroz poddona. Karonn Jehovachea kaideam ani totvam pormonnem nirnnoi gheunk to xikla. Ani ek umkoch nirnnoi ghetlea uprant, poristhiti kitli-i kotthin zalear pasun, to aplea nirnnoi-a pormonnem kam korunk vavurta.—1 Kor. 9:26, 27.

5. Ek Kristanv bhavarthant ghott na zalear kitem zaunk xokta? (Efezkarank 4:14, 15)

⁵ Punn bhavarthant ghott naslolo Kristanv oslea munxachem sangnnem manun gheunk xokta, jim “fottingponnan” ani “naddbudʼdhen” taka fosoitat. Media-cher dakhoitat tem to sompeponnim manun gheunk xokta vo dhorm-broxtt korpeanchem aikon to fosonk xokta. b (Efezkarank 4:14, 15 vachat.) Ani to dusreanchi nattkai korunk xokta, zhogddim korunk xokta ani taka konnem-i kitem mhunnttlear taka rokddench vaitt disonk xokta. Tea bhair to sompeponnim tallnnent poddonk xokta.—1 Kor. 3:3.

6. Bhavarthant ghott zavop, ek bhurgem vaddtta taka kiteak sor korunk zata? (Chitr pasun polloiat.)

⁶ Ami survatek polloilem toxem Bible-ant, bhavarthant ghott zavop, ek bhurgem vaddtta taka sor kelam. Eka bhurgeak zannvai asona. Tor taka margdorxon diunk ani tachi rakhonn korunk taka eka vaddlolea munxachi goroz poddtta. Udharonnak, rosto cross kortana, ek avoi aple lhan dhuvek aplea hatak dhorunk lait. Punn tem bhurgem vaddot voita toxem, ti taka svota zaun rosto cross korunk dita, punn donui vatten polloun cross korunk taka ugddas korta. Ani tem bhurgem vhoddlem zalea uprant, tem apunn zaun rosto cross korta. Tor bhurgeank dhokeam thaun pois ravonk vaddlolea munxanchi goroz asa. Teach bhaxen bhavarthant ghott naslolea Kristanvank, Jehova sangata tanchi ixttagot piddʼddear korunk xokta toslea vostum thaun  pois ravonk ani xanneponnan nirnnoi gheunk, bhavarthant ghott aslolea Kristanvanchi goroz poddtta. Punn bhavarthant ghott aslolim Kristanvam koslo-i nirnnoi gheunchea poilim, Jehovachem chintop zannam zaunk Bible-antlea totvancher bariksannen niall kortat ani tea pormonnem nirnnoi ghetat.

7. Bhavarthant ghott aslolea eka Kristanvak dusreanchea modotichi goroz asta kai?

⁷ Toxem zalear bhavarthant ghott aslolea eka Kristanvak dusreanchea modotichi goroz na kai? Taka pasun thodde pavtti modotichi goroz poddot. Punn hantunt ek ontor asa. Bhavarthant ghott naslolo Kristanv, tannem kitem korchem vo koslo nirnnoi gheuncho tem dusreank vicharta. Punn bhavarthant ghott aslolo Kristanv, tachea poros chodd zannvai ani onnbhov asloleanchi modot gheta khoro. Torui ‘aplem vojem apnnench uklunk zai,’ mhunnche aple nirnnoi apnnem svota gheunk zai mhunn to vollkhon gheta.—Gal. 6:5.

8. Bhavarthant ghott aslolim Kristanvam eka-meka poros vegllim astat oxem ami kiteak mhunnonk zata?

⁸ Ami eka-meka poros vegllim distat tea toren, bhavarthant ghott aslolea munxank pasun veg-veglle gunn asonk xoktat. Zoxem, thoddeank khub zannvai asta, thoddim chodd dhirvont vo udar kallzachim astat ani thoddim dusreanchi poristhiti ekdom bore bhaxen somzon ghetat toslim astat. Toxench, tanchea ontoskornna pormonnem nirnnoi gheunche astat tednam, tim Bible-antlea totvam pormonnem nirnnoi ghetat. Punn tanche nirnnoi ghoddie eka-meka poros veglle asonk xoktat. Oxem zata tednam tim eka-mekachi nit korinastana, ekvott samballop chodd mhotvachem mhunn ugddas dovortat.—Rom. 14:10; 1 Kor. 1:10.

AMI BHAVARTHANT GHOTT KOXIM ZAUNK XOKTAT?

9. Amcho bhavarth apxinch ghott zata kai? Somzaiat.

⁹ Vell soron voita toso, bhurgim apxinch vaddttat. Punn vavr korinastana konnuch bhavarthant apxinch ghott zaina. Hem somzonk ami Korintantlea bhav-bhoinnam vixim polloum-ia. Tannim bori khobor manun ghetloli, bautizm ghetlolo, tankam povitr xokti mellʼlloli ani apostl Paulu thaun tim zaitem xiklolim. (D.I. 18:8-11) Tori astana, bautizm gheun thoddea vorsam uprant pasun, tanchea modlim zaitim zannam bhavarthant ghott naslim. (1 Kor. 3:2) Oxem amkam ghoddona zaunk ami kitem korunk zata?

10. Bhavarthant ghott asonk ami kitem korunk zai? (Judas 20)

¹⁰ Bhavarthant ghott asonk amkam sogleam-von poilim, ti itsa asonk zai. Karonn ‘somjikai nastana vagonk sodhtat’ tim vaddavoll korinastana toxinch urtat. (Mho. 1:22, NW) Ami eka oslea munxa bhaxen zaunk sodhinant, zo vaddla khoro, punn to zobabdari gheunk sodhina vo taka kosle-i nirnnoi gheunche astat tednam to aplea avoi-bapai lagim dhanvta. Punn bhavarthant ghott zavop amchi svotachi zobabdari mhunn ami vollkhon ghetat. (Judas 20 vachat.) Tor tumi oslim munxam zaunk vavr kortat zalear Jehova lagim magnnem korat. Karonn to tumkam “itsa . . . ani ti itsa purnn korunk xokti-i” ditolo.—Filp. 2:13.

11. Bhavarthant ghott zaunk Jehova amkam koso modot korta? (Efezkarank 4:11-13)

¹¹ Bhavarthant ghott zaunk amkam modot zai mhunn Jehova zannam. Tea pasot, tannem amkam sobhent gonvlli ani xikoupi dileat, je amkam amcho bhavarth ghott korunk ani “Krist asa toso purnn toren vaddlolim munxam” zaunk modot kortat. (Efezkarank 4:11-13 vachat.) Toxench, Jehova amkam povitr xokti dita. Hea vorvim “Kristachem mon” apnnaunk amkam modot zata. (1 Kor. 2:14-16) Tea bhair, hea prithumecher porgottnni kortana Jezu koso chintʼtalo, uloitalo ani vagtalo tem dakhoun diunk Jehovan amkam char Xubhvortomanam dileant. Tor Jezuchi dekh gheun, bhavarthant ghott zauncho amcho dhei ami melloun gheunk pavtolim.

 NIBOR JEVONN AMKAM BHAVARTHANT GHOTT ZAUNK MODOT KORTA

12. ‘Krista vixim asloleo mullaveo xikounneoʼ khoincheo?

¹² Bhavarthant ghott aslolim munxam zaunk, ami ‘Krista vixim asloleo mullaveo xikounneo,’ zoxem poschatap korop, bhavarth dovrop, bautizm ghevop ani jivontponn, hea vixim xikonk zai. (Heb. 6:1, 2) Ani heo xikounneo ekdom mhotvacheo asat dekhun, apostl Pedrun Ponʼnasavea Disa ektthaim zalʼlim tankam tea vixim porgottlem. (D.I. 2:32-35, 38) Jezuchim xisam zaunk ami heo xikounneo manun gheunk zai. Kiteak? Ami ugddas korunk zata ki jivontponnachi xikounn manun ghenant tim Jezuchim xisam zaunk xokonant mhunn Paulun xittkaunni dilʼli. (1 Kor. 15:12-14) Punn bhavarthant ghott aslolim munxam zaunk, ami fokot mullaveo xikounneo xiklearuch puro nhoi. Tachea borabor ami anikui kholaiechi xikounn gheunk zai.

13. Hebrevank 5:14-nt sanglolea nibor jevnna thaun purnn faido mellonk ami kitem korunk zai? (Chitr pasun polloiat.)

¹³ Hea kholaieche xikounnek, Hebrevank 5:14-nt nibor jevonn mhunnttlam. Hantunt fokot Jehovache kaide nhoi, punn totvam pasun mellon asat, jim amkam Jehovachem chintop somzonk modot kortat. Hea nibor jevnna thaun amkam purnn faido mellonk ami Bible obheas korunk zai, niall korunk zai ani tem amchea jivitant apnnaunk vavr korunk zai. Oxem kortat tednam ami bore nirnnoi gheunk xiktolim ani Jehovachem kalliz khuxal korunk pavtolim. c—Hebrevank 5:14 vachat.

14. Paulun Korintantlea Kristanvank bhavarthant ghott zaunk koxi modot keli?

¹⁴ Bible-ant, thoddea vixoi-ancher kaide diunk nant. Tor ami Bible-antlea totvam pormonnem nirnnoi gheunk zai. Punn oslea vellar, bhavarthant ghott nant tea Kristanvank sarke nirnnoi gheunk kotthin zata. Thoddeank disot ki tankam jem sarke dista tem tannim korunk zata, ani thoddim tea vixim ek kaido asonk zai oxem chintʼtat. Hea vixim amkam Korintantlea Kristanvanchem udharonn asa. Murteank bhettoilʼlem jevonn jevchem vo nhoi, hea vixim tannim Pauluk ek kaido korunk sanglo. Punn toxem korchea bodlek, amchea modlea dor ekleak amchea ontoskornna pormonnem ‘vinchun kaddcho hokʼk’ asa mhunn Paulun tankam dakhoilem. Toxench, tannem tankam Devachea  Utrantlim thoddim totvam sanglim, jea vorvim tim sarke nirnnoi gheunk pavtolim aslim, tanchem ontoskornn tankam khaunchem naslem ani tanchea nirnnoi-ak lagon dusrea bhav-bhoinnank addkholl zaunchi nasli. (1 Kor. 8:4, 7-9) Tor fokot kaideancher vo dusrim kitem sangtat tacher patieun ravchea bodlek, Devachea Utra pormonnem nirnnoi gheunk Paulun tankam xikoilem. Hea toren tannem tankam bhavarthant ghott zaunk modot keli.

15. Jehova sangata tanchi ixttagot ghott korunk Paulun Hebrev Kristanvank koxi modot keli?

¹⁵ Paulun Hebrev Kristanvank jem kitem boroilʼlem tantuntlean ami ek mhotvachem lisanv xiktat. Thoddea Kristanvamnim Jehova sangata tanchi ixttagot ghott korunk na. Khorem mhunnttlear tim ‘porot ek pavtt, nibor jevonn jevtat toslim nhoi, punn dudhachi goroz asa toslim zalʼlim.’ (Heb. 5:12) Sobhe thaun Jehova tankam jeo noveo vostu xikoitalo, tem tim xikonk ani apnnaunk sodhinaslim. (Mho. 4:18) Udharonnak, Jezun bolidan dilem tednam, Moizesa udexim dilʼle Kaide pallchi goroz nasli. Tori astana sumar 30 vorsam uprant pasun, he Kaide pallunkuch zai oxem zaitim Judev Kristanvam mhunnttalim. (Rom. 10:4; Tit. 1:10) Tankam itlo temp tanchem chintop bodlunk vell aslo. Punn tannim tem bodlunk naslem. Tor apunn tankam xikoitalo tim khol sotam manun gheunk Paulu tankam modot korunk sodhtalo. Hea pasot tannem tankam ek chitt boroili, jea vorvim Jezuchea bolidana udexim Jehovan atam bhokti korchi ek novi manddavoll stapon kelʼli, ani hi manddavoll adlea manddavolli poros vorti asli mhunn somzonk tankam modot zali. Toxench, Judevamnim tancho virodh kelear pasun, tacho fuddo korunk tankam dhir mellʼllo.—Heb. 10:19-23.

AMI BHAVARTHANT GHOTT RAVONK KITEAK VAVR KORIT RAVONK ZAI?

16. Ami kitem korunk vavr korit ravonk zai?

¹⁶ Ami bhavarthant ghott aslearuch puro nhoi. Punn ami sodanch bhavarthant ghott ravonk vavr korit ravonk zai. ‘Jehova sangata mhoji ixttagot ghott asa ani mhaka vavr korchi goroz na,’ oxem ami kednach chintchem nhoi. (1 Kor. 10:12) Tachea bodlek, Jehova lagim amchi ixttagot ghott asa kai na tem ami ‘topaxit ravonk’ zai.—2 Kor. 13:5.

17. Bhavarthant ghott ravonk vavr korit ravonk zai mhunn Paulun Koloskarank boroilʼlea chittintlean koxem kolltta?

¹⁷ Paulun Koloskarank boroilʼlea chittint tannem porot ek pavtti, bhavarthant ghott ravonk  vavr korit ravonk zai mhunn sanglem. Koloskaram bhavarthant ghott aslim. Tori astana, Paulun tankam sonvsarachem chintop apnnaina zaunk chotrai dovrunk sanglem. (Kol. 2:6-10) Toxench Epafras, zo chodd korun tea sobhentlea bhav-bhoinnank bore toren vollkhotalo, to tim “vaddlolea munxam bhaxen ghott ubim ravchim” vo bhavarthant ghott ravchim mhunn purnn kallzan magnnem korit aslo mhunn Paulun tankam sanglem. (Kol. 4:12) Hantuntlean ami kitem xiktat? Bhavarthant ghott ravonk amkam Jehovachi modot zai, toxench ami svota zaun pasun vavr korit ravonk zai, mhunn Paulu ani Epafras zannam asle. Ani oddchonneo aslear pasun, Koloskaram bhavarthant ghott ravlolim tankam zai aslem.

18. Bhavarthant ghott aslolea eka Kristanvak kitem zaunk xokta? (Chitr pasun polloiat.)

¹⁸ Bhavarthant ghott aslolo ek Kristanv pasun sasnak Jehovachi maniotai hogddaunk xokta mhunn Paulun Hebrev Kristanvank xittkailʼlem. Ek Kristanv Jehovachem aikonk nakarta zalear, tachem kalliz itlem ghott zaunk xokta ki to poschatap korunk xokchona ani taka Jehovachem bhogsonnem mellchem na. Punn Hebrev Kristanvanchi poristhiti toxi nasli. (Heb. 6:4-9) Punn seva bond kelolim porgottnnaram vo sobhentlean bhair kaddleant tanche vixim kitem? Tannim khaltikaien poschatap kelo zalear, Paulun boroilʼlea lokam poros tim vegllim asat mhunn tim dakhoun ditat. Punn porot ailea uprant, tankam modotichi goroz asa. (Ez. 34:15, 16) Tea pasot, Jehova sangata tanchi ixttagot porot ghott korunk, vhoddil bhavarthant ghott aslolea eka Kristanvak tankam modot korunk sangot.

19. Ami koslo dhei dovrunk zai?

¹⁹ Bhavarthant ghott ravonk ami vavr korit ravlear, ami amcho dhei melloun gheunk pavtolim. Tor Bible-antlim khol sotam xikot ravom-ia. Toxench, amchem chintop Jehovachea chintpa sarkem korunk vavr korit ravom-ia. Ani sodʼdheak ami bhavarthant ghott asat zalear, atam ani sodankal ghott ravonk amchean zata tem soglem korum-ia.