1. ¿Kasa nüchekaka Jehová wapüleerua?

 TALATÜSHI wanee wayuu niʼrapa jemeyuluin nuʼwayuuse otta aishi nia napüla. Neʼreein suluʼu miyoʼuinjachin nia. Shapaajeerü naaʼin neʼrüle nnojolin nimiyoʼulaain shiʼipaʼaya, ayatachonle nia neʼrüin. Müsia neʼe nukuwaʼipa Jehová, talatüshi nia niʼrapa woushikajaain süchiirua nukuwaʼipa Jesús, niyoutapejeʼe achiki joʼuweein waaʼin sünain anoujaa (1 Cor. 3:1). Shia nüchekaka wapüleerua laülaainjatüin waaʼin sünain anoujaa (1 Cor. 14:20).

2. ¿Kasa wekirajaainjatka anain sünain ekirajaayakat tüü?

² ¿Kasa jülüjaka naaʼin wanee wawala laülaakai aaʼin sünain anoujaa otta kasa naaʼinraka? ¿Kasa waaʼinrajatka süpüla laülaainjatüin waaʼin sünain anoujaa? ¿Jamüshii aleeweenaka waya nümaa Jehová wekirajaale sünain tü pütchi suluʼukat tü Bibliakat, tü makalü aka saaʼin eküülü kaʼüsü? «Laülaaitpa taaʼin sünain anoujaa», ¿jamüshii nnojoliinjanaka wamüin? Sünain ekirajaayakat tüü, wasouteerü eʼipajee tia pütchikalüirua.

TÜ NAAʼINRAKAT OTTA TÜ JÜLÜJAKAT NAAʼIN CHI WAWALA LAÜLAAKAI AAʼIN SÜNAIN ANOUJAA

3. ¿Kasa naaʼinrajatka wanee wayuu süpüla laülaainjatüin naaʼin sünain anoujaa?

³ Tü pütchi «wayuu miyoʼu» makat suluʼu griego, ashajünüsü suluʼu tü Bibliakat sükajee tü pütchikat «na wayuu kooʼomüinkana anoula» otta «na wayuu laülaakana aaʼin sünain anoujaa» (1 Cor. 2:6). Na tepichikana emiyoʼulaashii shiʼipaʼaya. Akaʼaya joo tü waaʼinrajatkat süpüla laülaainjatüin waaʼin sünain anoujaa, wakooʼomüinrüinjatü waneepia tü wanoulakat (1 Tim. 4:15). Wapüshuaʼa wayakana jaʼitainna tepichin, jimaʼaliin otta majayünnüüin waya, eesü süpüla laülaain waaʼin sünain anoujaa. ¿Kasa waaʼinrajatka süpüla wayaawatüin saaʼu laülaale waaʼin sünain anoujaa?

4. ¿Kasa wayaawataka akajee laülaale naaʼin wanee wawala sünain anoujaa?

⁴ Wanee wawala laülaakai aaʼin sünain anoujaa naaʼinrüin tü nüchekakat  Maleiwa. Nnojotsü nüneeküin saʼakajee tü nuluwataakalü anain Maleiwa jaralüin tü anakat süpüla noonooin amaa. Eejeerü tü kasa mojeetkat nutuma, jama nnojoluin lotuin maʼin nukuwaʼipa. Nüchajaajeetpejeʼe sukuwaʼipa waneepia wanaawain tü jülüjakat naaʼin sümaa tü jülüjakat naaʼin Jehová otta niiʼirateerü nukuwaʼipa wanaapünaa sümaa tü nüchekakat Maleiwa (Éf. 4:22-24). Nüchajaain sukuwaʼipa süpüla anain tü nüneekakat wanaapünaa sümaa tü nüchekakat Jehová. Nnojotsü choʼujaain süküjünüin nümüin waneʼewai sukua tü kasa naaʼinrajatkat. Nüneekapa wanee kasa nüchajaain sukuwaʼipa süpüla naaʼinrüinjatüin shia (1 Cor. 9:26, 27).

5. ¿Kaseerü alataka nümüin wanee wawala joʼuweekai aaʼin sünain anoujaa? (Éfeso 4:14, 15).

⁵ Joʼuweere naaʼin wanee wawala sünain anoujaa emeejüneechi sutuma «wayuu eekai kemeejaralüin», oʼuneechi süchiirua tü pütchi nnojotkat pansaain sutuma wayuu otta oonoojeechi nia namaa na wayuu ooʼulaakana suulia aʼyatawaa nümüin Jehová süpüla nekirajüin alawaa (paashajeʼera Éfeso 4:14, 15). a Eeshijaʼa süpüla kachumüralin nia, mojujiraain nia namaa na waneinnua, kaashichijaaralin otta joojeechi nia süpüla kaainjalaa (1 Cor. 3:3).

6. ¿Kasa wanaawaka aluʼu nukuwaʼipa wanee wawala süpüla laülaainjatüin naaʼin sünain anoujaa sümaa nukuwaʼipa wanee jintüi? (Piirakaa sümüin tü ayaakuaakat).

⁶ Saashin tü Bibliakat tü nukuwaʼipakat wanee wawala süpüla laülaainjatüin naaʼin sünain anoujaa müsü aka saaʼin nukuwaʼipa wanee joʼuu emiyoʼulaakai shiʼipaʼaya. Wanee jintüi nnojotsü niyaawatüin saaʼu nukuwaʼipa, choʼujaashi naaʼinmajünüin jee suʼuninnüin nukuwaʼipa natuma na wayuu miyoʼuyuukana. Jülüja waaʼin sukuwaʼipa wanee wayuu sümaa süchonchon. Süpüla nalatüinjanain wanee kaaye saapaain sajapü tü süchonchonkot. Shiasaʼa jaʼapüchonpa shia eesüjaʼa suuʼulaale sülatüin sümüiwaʼa tü kaayekat sümaa süküjain sümüin shiirakaainjatüin palajana süpüla sülatüin. Miyoʼupa shia shiyaawateerü aaʼulu süka saaʼin sümüiwaʼa tü saaʼinrajatkat suulia jamajüin shia. Na wawalayuu joʼuweekana aaʼin sünain anoujaa choʼujaashii nakaalinjünüin natuma na wawalayuu laülaakana aaʼin sünain anoujaa suulia naaʼinrüin wanee kasa mojeetka atuma nakuwaʼipa nümaa Jehová. Eekajasaʼa na wawalayuu laülaakana aaʼin sünain anoujaa, ekirajaashii palajana  sünain tü sümakat tü Bibliakat süpüla nayaawatüin saaʼu tü nümakat Jehová süchiki wanee kasa. Nayaawatapa saaʼu tia naaʼinramaatüin tü nekirajaakalü anain.

7. ¿Choʼujaashiche nükaalinjünüin wanee wawala laülaakai aaʼin sünain anoujaa natuma na waneinnua?

⁷ ¿Nnojotsüche choʼujaain nükaalinjünüin wanee wawala laülaakai aaʼin sünain anoujaa? Aa, eejeerü kaʼi choʼujaaka oʼu nükaalinjünüin. Eekajasaʼa chi wawala joʼuweeyüikai aaʼin sünain anoujaa eesüjaʼa anale nümüin süküjünüin tü naaʼinrajatkat jee tü nüneeküinjatkat. Nuchuntapa kaalinwaa wanee wawala laülaakai aaʼin sünain anoujaa namüin na kekiikana nuulia jee na atüjakana nuulia, nütüjaa aaʼu niainjachin asoutuin saaʼu tü naaʼinrakat (Gal. 6:5).

8. ¿Jamüsü watüjaaka saaʼu naatayaa müin nakuwaʼipa na wawalayuu laülaakana aaʼin sünain anoujaa?

⁸ Naatayaa müsü nakuwaʼipa na wayuu miyoʼuyuukana. Akaataajaʼa na wawalayuu laülaakana aaʼin sünain anoujaa naatayaa müsü tü nakuwaʼipakat. Eeshii eekai kekii maʼin, eeshii eekai yalayalain naaʼin, eeshii eekai kamaneein maʼin otta eeshii eekai namülialüin saaʼin wayuu. Eesüjaʼa naatale tü jülüjakat naaʼin waneʼewai nakua piamashii wawalayuu laülaakana aaʼin sünain anoujaa süchiki wanee kasa sümaa anain tü naneekakat wanaapünaa sümaa tü sümakat tü Bibliakat. Nnojotkalaka nayoujireʼerüin nakuwaʼipa suulia mojujiraain naya (Roma 14:10; 1 Cor. 1:10).

WAAʼINRAJATKA SÜPÜLA LAÜLAAIN WAAʼIN SÜNAIN ANOUJAA

9. ¿Jamüsü watüjaaka saaʼu nnojoluin laülaain waaʼin sünain anoujaa sünainjee neʼe kakaliain waya sünain anoujaa?

⁹ Jamüsüjaʼa nukuwaʼipa wanee wayuu süpüla laülaainjachin nia, miyoʼu, miyoʼu müshi neʼe nia. Nnojotpejeʼe müin tü wakuwaʼipakat süpüla laülaainjatüin waaʼin sünain anoujaa, ekirajaainjana waya palajana. Na anoujashii chajanakana Corinto naapaa amaalü tü pütchi anakat maʼin nüküjaka Pablo namüin. Woutiisashii naya, naapüin Maleiwa namüin tü nüpülainkat otta wainma kasa natüjaka sükajee nekirajüin naya Pablo (Aluw. 18:8-11). Kakalia mapa süchikijee woutiisain naya, eeshii waneinnua nnojoliikana laülaain aaʼin sünain anoujaa (1 Cor. 3:2). ¿Kasa waaʼinrajatka suulia sülatüin wamüin tia?

10. ¿Kasa waaʼinrajatka süpüla laülaain waaʼin sünain anoujaa? (Judas 20).

¹⁰ Süpüla laülaainjatüin waaʼin sünain anoujaa kachiiruainjatü shia waaʼin. Eekajasaʼa na wayuu mayaawatüinkana saaʼu nakuwaʼipa nacheküin joʼuweein naaʼin. Müle nakuwaʼipa waneepia nnojoleerü laülaain naaʼin sünain anoujaa (Prov. 1:22). Wacheka achikit nnojoluinjatüin müin wakuwaʼipa maʼaka naaʼin na wayuu miyoʼuyuu ayatayüliikana aneekünüin nooʼopünaa tü kasa naaʼinrajatkat. Shia wachekaka achiki wachajaain sukuwaʼipa süpüla laülaainjatüin waaʼin sünain anoujaa (paashajeʼera Judas 20). Isayürüle püpüleerua laülaain paaʼin sünain anoujaa, puchunta nümüin Jehová niʼitaaiwa suluʼu paaʼin kachiiruain paaʼin tia otta nükaalinjaiwa pia süpüla puuntuin shia (Filip. 2:13).

11. ¿Kasa naapaka wamüin Jehová süpüla laülaainjatüin waaʼin sünain anoujaa? (Éfeso 4:11-13).

¹¹ Nükaalinjain waya Jehová süpüla laülaainjatüin waaʼin sünain anoujaa. Naaʼinrüin tia nakajee na laülaashiikana suluʼu tü outkajaaleekat. Nakaalinjain waya «süpüla müinjatüin wakuwaʼipa maʼaka nukuwaʼipa wanee wayuu eekai nütaralaaichin, maʼaka nukuwaʼipa Cristo» (paashajeʼera Éfeso 4:11-13). Nükaalinjain waya Jehová sükajee tü nüpülainkat süpüla wayaawatüin saaʼu tü nikiirujutkat Cristo (1 Cor. 2:14-16). Nüshajirüin Jehová tü pienchisü karaloʼuta Nüchikimaajatkat Jesucristo süpüla watüjaain saaʼu tü jülüjakat naaʼin Jesús, tü naashajaakalü achiki otta tü naaʼinrakat wanaa sümaa yaajachin mmapaʼa. Wanaawale tü jülüjakat waaʼin sümaa tü jülüjakat naaʼin Jesús laülaajeerü waaʼin sünain anoujaa.

 PÜTCHI WEKIRAJAAINJATKA ANAIN SÜPÜLA LAÜLAAIN WAAʼIN SÜNAIN ANOUJAA

12. ¿Kasa nikirajaainjatka anain wanee wayuu palajana süpüla nuushikajaain süchiirua nukuwaʼipa Cristo?

¹² Süpüla laülaainjatüin waaʼin sünain anoujaa nnojotsü anainjatüin neʼe waaʼin sümaa «tü kasa nütüjaainjatkalü aaʼu wanee wayuu palajana nüchiki Cristo» maʼaka saaʼin wayaawajaainjanain suulia waainjala, kanoulainjanain waya, woutiisainjanain waya otta wanoujainjanain sünain nasoʼiraajeenain aaʼin na outushiikana (Heb. 6:1, 2). Tia shia soʼutku tü kasa nanoujakalü anain na anoujashiikana. Naashajaain achiki tia Pedro soʼunnaa Pentecostés (Aluw. 2:32-35, 38). Waapaainjatü amaa tia süpüla woushikajaain süchiirua nukuwaʼipa Cristo. Naashin Pablo nnojoleerü woushikajaain süchiirua nukuwaʼipa Cristo nnojorüle wanoujain sünain nasoʼiraainjanain aaʼin na outushiikana (1 Cor. 15:12-14). Nnojoleetpejeʼe laülaain waaʼin wekirajaale neʼe sünain tia pütchikat.

13. ¿Kasa waaʼinrajatka süpüla anain wakuwaʼipa sünainjee tü pütchi makalü aka saaʼin eküülü kaʼüsü? (Hebreokana 5:14; piirakaa sümüin tü ayaakuaakat).

¹³ Tü wane kasa wekirajaainjatkalü anain suluʼujee tü Bibliakat shia tü pütchi makalü aka saaʼin eküülü kaʼüsü, tü wayaawateetkalü atuma tü jülüjakat naaʼin Jehová süchiki wanee kasa. Soʼutku tia pütchikat shia tü nuluwataakalü anain Jehová otta tü pütchi wayaawatakalü atuma anale jee mojule wanee kasa. Süpüla anain wakuwaʼipa sünainjee tia pütchikat wekirajaainjatü anain tü Bibliakat, wasakireʼerüinjatü waaʼin sünain otta waaʼinrüinjatü tü wekirajaakalü anain suluʼujee. Waaʼinrüle tia waneekeerü kasa anasü wanaapünaa sümaa tü nüchekakat Jehová (paashajeʼera Hebreokana 5:14). b

14. ¿Kasa naaʼinraka Pablo süpüla nükaalinjain na anoujashii chajanakana Corinto süpüla laülaainjatüin naaʼin sünain anoujaa?

¹⁴ Nüneeküinjatüle wanee wawala wanee kasa nnojotka aküjünüin suluʼu tü Bibliakat, iseerü nüchiki niyaawatüin saaʼu tü naaʼinrajatkat nnojorüle laülaain naaʼin sünain anoujaa. Eesüjaʼa jülüjale naaʼin eein süpüla naaʼinrüin tü keeʼireekat naaʼin süka nnojoluin süküjain tü Bibliakat tü kasa nüneeküinjatkat otta shiale nuchuntuin nümüin wanee wawala anain nüküjale nümüin tü naaʼinrajatkat. Eesüjaʼa shiale tü naaʼinrakat na anoujashii chajanakana Corinto wanaa sümaa  nasakirüin Pablo süchiirua anale süpüla neküin tü mürüt aʼajünakat sümüin shiyaakua maleiwayaasü. Nüküjain Pablo namüin nnojoluinjatüin jaralüin aneeküin nooʼopünaa tü naaʼinrajatkat. Shia nüküjaka Pablo namüin tü sümakat tü Bibliakat süpüla nayaawatüin saaʼu süka naaʼin namüiwaʼa tü naaʼinrajatkat otta süpüla jülüjain naaʼin jameerüin naaʼin na waneinnua sünainjee tü naneeküinjatkat (1 Cor. 8:4, 7-9). Nikirajüin Pablo na anoujashii chajanakana Corinto süpüla naneeküin kasa süka naaʼin namüiwaʼa wanaapünaa sümaa tü sümakat tü Pütchi Ashajuushikat suulia süküjünüin namüin tü naneeküinjatkat. Sutuma naaʼinrüin tia Pablo nükaalinjain naya süpüla laülaainjatüin naaʼin sünain anoujaa.

15. ¿Kasa naaʼinraka Pablo süpüla nükaalinjain na anoujashii hebreokana süpüla laülaainjatüin naaʼin sünain anoujaa?

¹⁵ Eesü tü kasa watüjakat sünainjee tü nüshajakat Pablo namüin na anoujashii hebreokana. Eeshii na nnojoliikana achajaain sukuwaʼipa süpüla laülaainjatüin naaʼin sünain anoujaa. Müshi Pablo namüin: «Müshii neʼe jia maʼaka naaʼin wanee joʼuu choʼujaakai amüin nüsüinjachin leechi, isasü jüchiki ekaa eküülü eekai kaʼüin, tü nikakat wanee wayuu eekai miyoʼuin» (Heb. 5:12). Nnojotsü naapaain amaalü tü pütchi jeketü nüikaleʼerakat Jehová nakajee na aluwataaushikana (Prov. 4:18). Eejana na anoujashii judío ichekana süchiirua naaʼinrüin tü Pütchi Aapünakat nümüin Moisés, 30 juya süpülapünaa tia nüshaʼwaleʼerüin akuwaʼipa Cristo tia pütchikat (Roma 10:4; Tito 1:10). Kakalia nuuʼulaain naya Jehová süpüla nayaawatüin saaʼu nnojoluin choʼujaain naaʼinrüin tü sümakat tü Pütchi Aapünakat nümüin Moisés. Müshiijeseʼe nekirajüin naya Pablo sükajee tü nüshajakat namüin süpüla nayaawatüin saaʼu tü sukuwaʼipainjatkat natuma süpüla naʼwaajüinjachin Jehová sünainjee naapajiraain nikii Jesús waaʼu otta yalayalasü naaʼin sutuma süpüla ayatüin naküjain pütchi mayaainjeʼe süpüleeruaanüin naaʼin natuma na judíokana (Heb. 10:19-23).

AYATAʼAYA LAÜLAAIN WAAʼIN SÜNAIN ANOUJAA

16. ¿Kasa ayatüinjatka waaʼinrüin?

¹⁶ Wachajaa sukuwaʼipa süpüla laülaain waaʼin sünain anoujaa. Wountapa tia ayataʼaya müin wakuwaʼipa. Nnojo jülüjain waaʼin nnojoluin choʼujaain wanouteʼerüin sooʼomüin wakuwaʼipa (1 Cor. 10:12). Ayataʼaya wasakireʼerüin waaʼin laülaale waaʼin sünain anoujaa (2 Cor. 13:5).

17. ¿Jamüsü wayaawataka saaʼu ayatüinjatüin laülaain waaʼin sünain anoujaa sünainjee tü nümakat Pablo namüin na anoujashii chajanakana Colosas?

 ¹⁷ Suluʼu tü karaloʼuta nüshajakat Pablo namüin na chajanakana Colosas nüküjain ayatüinjatüin laülaain naaʼin sünain anoujaa. Mayaainjeʼe laülaain naaʼin sünain anoujaa nüküjain Pablo namüin eejüinjatüin naaʼin suulia nemeejünüin natuma na kekiikana maʼin naashin (Col. 2:6-10). Niʼraajüin Epafras na anoujashii chajanakana Colosas, müsüjeseʼe nuchuntuin maʼin nümüin Maleiwa nükaalinjainjanain naya süpüla laülaain naaʼin sünain anoujaa (Col. 4:12). Tü watüjakat sünainjee tü naaʼinrakat Pablo otta Epafras shia wachajaainjatüin sukuwaʼipa süpüla laülaain waaʼin sünain anoujaa jee wachuntuinjanain kaalinwaa nümüin Maleiwa süpüla wountuin tia. Pablo nümaa Epafras nacheküin napüleerua na anoujashii chajanakana Colosas ayatüinjatüin laülaain naaʼin sünain anoujaa jaʼitasü kasain alatüin namüin.

18. ¿Kasa eeka süpüla sülatüin nümüin wanee wawala laülaakai aaʼin sünain anoujaa? (Piirakaa sümüin tü ayaakuaakat).

¹⁸ Eesüjaʼa naaʼinreerüle kasa mojusü wanee wayuu laülaakai aaʼin sünain anoujaa mojeetka atuma nukuwaʼipa waneepia nümaa Jehová. Shia nüküjaka achiki Pablo tia namüin na anoujashii hebreokana. Niyoutajaale noonooin sümaa tü nümakat Jehová nnojoleerü nülatirüin sooʼopünaa naaʼin Maleiwa naainjala. Akalajasaʼa nnojoluin sülatüin tia namüin na hebreokana (Heb. 6:4-9). ¿Jamakaʼa nakuwaʼipa na eemiajaakana anoula jee na ojuʼitinnakana paala naʼakajee na wawalayuukana? Süka nayaawajaain suulia naainjala, nnojoishii müin naya maʼaka naaʼin na wayuu mojukana akuwaʼipa waneepia nümaa Maleiwa, na naashajaakana achiki Pablo. Nouyantapa nünainmüin Jehová choʼujaashii nakaalinjünüin (Ezeq. 34:15, 16). Eesüjaʼa nachuntule na laülaashiikana nümüin wanee wawala laülaakai aaʼin sünain anoujaa nakaalinjainjanain naya süpüla katchinjatüin nanoula süchikuaʼa.

19. ¿Kasa wachajaainjatka akuwaʼipa waneepia?

¹⁹ Piʼyataale süchiirua laülaain paaʼin sünain anoujaa eesü süpüla puuntuin tia. Ayataʼaya pikirajaain sünain tü pütchi suluʼukat tü Bibliakat, tü makalü aka saaʼin eküülü kaʼüsü otta püchajaa sukuwaʼipa wanaawain tü jülüjakat paaʼin sümaa tü jülüjakat naaʼin Jehová. Laülaale paaʼin sünain anoujaa maaʼutpünaa ayataʼaya müin pukuwaʼipa.