1. Anni i ikikkiddaw ni Jehova ta nittam?

 TADDAY ta pinakakappagayayya nga aggaw ta magatawa ay i keyana na baby da. Ngem maski nu iddeddu da i baby da, manaki da nga mattalupaddian yayya nga abbing. I kurug, mavurung ira nu ari yayya nga dumakal. Kunnatun gapa si Jehova. Magayayya yayya turi ta abbing ittam pagalaman ta espiritual nu kanni nga kingngua tam i ollu ira nga dakkua bilang tagatuttul ni Jesus. Ngem manaki Na nga mattalupaddian ittam nga abbing ta espiritual. (1 Cor. 3:1) Kayà na nga ‘mammanakam ittam ngana nakuan.’—1 Cor. 14:20.

2. Anni ira nga pakkiavu i tabbagattam taw nga artikulo?

² Kunnasi nga mannono anna magguyu i manakam nga Cristiano? Kunnasi ittam nga mammanakam ta espiritual? Anni i meyuffun na matagga nga espiritual nga kanan ta pammanakam tam? Ngatta ibita tam nakuan i sobra nga pakkomfiansa ta baggi? Tabbagattam danatun taw nga artikulo.

KUNNASI NGA MANNONO ANNA MAGGUYU I MANAKAM NGA CRISTIANO?

3. Anni i kebalinan na pabbalin tu manakam nga Cristiano?

³ Ta Biblia, i Griego nga uvovug nga ne-translate tu “maladda ngana i angngurug” ay kebalinan na gapa, “manakam.” a (1 Cor. 2:6) Mabbalin ittam nga manakam nga Cristiano nu ari ittam ngana nga abbing ta espiritual anna nu tulu-tuloy nga paladdattam i relasiottam kani Jehova. Ngem siempre, sonu manakam ittam ngana ta espiritual, ari ittam nakuan magimmang nga mapprogreso. (1 Tim. 4:15) Mawayya tam ngamin i mabbalin tu manakam ta espiritual, nelagum danuri mabbing paga i edad da. Ngem anni i mangipasingan nga nammanakam ngana i tadday nga Cristiano?

4. Anni i pakasingannan nu manakam i tadday nga Cristiano?

 ⁴ Nu manakam i tadday nga Cristiano, tuppalan na i ngamin nga ipakua na Dios anna ari na nga pilian danuri laman ikaya na nga tuttulan. Siempre, imperfekto yayya yatutta makkamali yayya. Ngem ipasingan na ta inaggaw nga pattolena nga ikakkaguman na nga mannono anna magguyu segun ta uray na Dios. Inuli na ngana i kata-katolena anna ikakkaguman na nga parigan i appana-panono na Dios. (Efe. 4:​22-24) Sinanay na i baggi na nga mangngua tu makasta ira nga desision base ta dorob anna prinsipio ira ni Jehova. Ari na gafu kawagan i apapaddu nga lista na dorob nga makkagi ta mawag tu kuan na. Nu maddesision yayya, egga i disiplina na ta baggi tapenu kuan i nadesision na.—1 Cor. 9:​26, 27.

5. Anni i puede nga mesimmu ta tadday nga Cristiano nu ari yayya nga manakam? (Efeso 4:​14, 15)

⁵ Anni i mesimmu ta tadday nga Cristiano nu ari yayya nga manakam? Mabi laman yayya nga ilogo na “tolay nga minannaba-tabag” anna na “maganna-gannug nga para-paratuad-da nga pangilogo.” Mabi laman gapa yayya nga mangurug turi ira ta mamadda-padday tu conspiracy theory anna ta apostata ira. b (Bibbigan i Efeso 4:​14, 15.) Awayya na tu mabi laman yayya nga mappassil, makiddama, mattaki i nono na, onu mataga ta tentasion.—1 Cor. 3:3.

6. Ta anni nga meyarig i pammanakam ta espiritual? (Innan gapa i letratu.)

⁶ Nakagi ta nappasa nga parapo nga iyarig na Biblia i pammanakam ta espiritual ta paddakal na abbing. Kurang paga ta pakalippawa i abbing yayya nga mawag na i proteksion anna pangigiya na manakam. Meyarig yatun ta yena nga ikagi na ta ana na nga babay nga kemmikan na yayya ta pakkantay da ta dalan. Habang dumakal i abbing, baka ipamavulun ngana na yena na nga magitadday yayya nga makkantay. Ngem ikagi lagapa na yena na ta nisa nga innan na labbi nu awan tu takay nige na nga makkantay. Sonu nammanakam ngana i abbing, lillitan na lagapa ngana i kunnatun ira nga peligro. Kawagan na abbarabbing i uffun na manakam ira tapenu lisian i peligro. Kunnatun gapa i Cristiano ira nga ari paga nga manakam ta espiritual. Kawagadda i uffun na manakam ira nga Cristiano tapenu malillitadda i peligro ira ta  espiritual anna tapenu makangngua ira tu mapia nga desision. Nu maddesision i manakam nga Cristiano, ibase na yatun ta prinsipio ira na Biblia tapenu mammuan na i pagimamma ni Jehova tapus tuttulan na yatun.

7. Mawag kari na manakam ira nga Cristiano i uffun na tanakuan?

⁷ Nu manakam ngana i tadday, kayà na kari kagian nga ari na ngana kawagan i uffun na maski sinni? Ari. Nu karuan, mawag na lagapa i uffun na tanakuan. Ngem nu ari paga nga manakam ta espiritual i tadday, ekspektan na nga ikagi na tanakuan i kuan na onu maddesision ira para ta nisa. Kunnasi gapa i manakam nga Cristiano? Mappoffun yayya turi ira ta mas aru i ammu da anna mas ekspiriensadu. Ngem daddamman na nga ekspektan ni Jehova nga ‘akkatan na i karga na lagapa.’—Gal. 6:5.

8. Anni ira i nadduman na manakam ira ta espiritual?

⁸ Nu kunnasi nga makkaduma i itchura na adulto ira, makkaduma gapa i kualidad ira na manakam ira ta espiritual. Angngarigan na, i karuan ay kuruga ma-uto. Magutu-gutu gapa i karuan. Egga ira i vuka-palag. Malalaki gapa nga makipattageno i karuan. Nu meparubang gapa ta parehu nga situasion i dua nga manakam ta espiritual, awayya na tu makkaduma i konklusiodda, ngem parehu nga nebase ta Biblia. Mas ngana nga kurug i kunnatun ta desision ira nga nakadepende ta konsensia. Megafu ta ammu da yatun, ari da nga husgan i kataggi-tadday maski nu makkaduma ira tu desision. Imbes lallagu, ikagumadda nga ari mawawan i makasta nga pavvulu da.—Roma 14:10; 1 Cor. 1:10.

KUNNASI ITTAM NGA MAMMANAKAM TA ESPIRITUAL?

9. Automatiko kari nga mammanakam ittam ta espiritual? Ipakanawag.

⁹ Ta pappasa na tiempo, gagangay laman nga dumakal i tadday nga abbing. Ngem awan tu maski sinni nga automatiko nga mammanakam ta espiritual. Kunnatun i wawwaragi ta Corinto. Kinurug da i mapia nga dumug, nappabawtiso ira, inalawa da i masanto nga espiritu, anna aru i nagigiammu da ta nituddu ni apostol Pablo ta nira. (King. 18:​8-11) Ngem piga ragun kabalin na bawtismo da, aru lagapa i ari paga nga nammanakam. (1 Cor. 3:2) Anni i kuattam tapenu ari nga mesimmu yatun ta nittam?

10. Anni i mawag tu kuattam tapenu mammanakam? (Judas 20)

¹⁰ Tapenu mammanakam ittam ta espiritual, mawag labbi tu karagatattam i mabbalin tu kunnatun. Danuri ‘kayà da lagapa nga kurang i ekspiriensa da’ onu mattalupaddian nga abbing ta espiritual, ay ari vuluvuga mapprogreso. (Prov. 1:22) Egga ira i totolay nga nakadepende ta magana da ta paddesisiodda maski nu adulto ngana ira. Ngem manaki tam nga mabbalin tu kagitta da. Ammu tam nga sittam lagapa i makarresponsibilidad ta pammanakam tam ta espiritual. (Bibbigan i Judas 20.) Nu ikakkagumammu pagalaman nga mammanakam, ipakimallo mu kani Jehova nga iddan naka tu ‘pakkaraga anna pakawayya nga mamarulo ta uray na.’—Fil. 2:13.

11. Anni ira i niyawa ni Jehova tapenu mammanakam ittam ta espiritual? (Efeso 4:​11-13)

¹¹ Ari ekspektan ni Jehova nga mammanakam ittam ta espiritual nga awan tu uffun na tanakuan. Sigga-paran nga uffunan ittam danuri mappastor anna mattuddu ta Cristiano nga kongregasion tapenu ‘mammanakam ittam ta appanono adde ta awan tu pakkurangan na kesipo tam ta kata-katolay ni Cristo.’ (Bibbigan i Efeso 4:​11-13.) Iyawa gapa ni Jehova i masanto nga espiritu na tapenu mala tam “i annonopan ni Cristo.” (1 Cor. 2:​14-16) Nipetura paga na Dios i appa nga Evanghelio tapenu mammuattam nu kunnasi nga nannono,  naguvovug, anna nagguyu si Jesus taw ta davvun. Nu parigammu nu kunnasi nga nannono anna nagguyu si Jesus, mammanakam ka ta espiritual.

I MEYUFFUN NA MATAGGA NGA ESPIRITUAL NGA KANAN

12. Anni ira i angngarigan na “ollu ira nga magigiammu meyannung kani Cristo”?

¹² Tapenu mammanakam ittam, mawag gapa tu “panawat-tam ngana i ollu ira nga magigiammu meyannung kani Cristo,” nga tumukoy ta primeru ira nga tuddu na Cristiano. I karuan nga angngarigan natun ay pabbabawi, pangurug, bawtismo, anna paginnolay. (Heb. 6:​1, 2) Kurugan yatun na ngamin nga Cristiano. Yayya nga nipakiyuvovug ni apostol Pedro danatun tari ira ta nilayyagayyan na ta Pentecostes. (King. 2:​32-35, 38) Mawag tu kurugattam danatun nga primeru nga tuddu tapenu mabbalin ittam tu disipulo ni Cristo. Angngarigan na, kinagi ni Pablo nga nu ari tam kurugan i paginnolay, ari tam nga makagi nga kurug ittam nga Cristiano. (1 Cor. 15:​12-14) Ngem ari tam nakuan nga makontentu nga primeru laman ira nga tuddu i ammu tam.

13. Anni i kuattam tapenu mammakapia ta matagga nga espiritual nga makan nga nakagi ta Hebreo 5:14? (Innan gapa i letratu.)

¹³ Makkaduma i primeru ira nga tuddu ta matagga nga espiritual nga makan. Fuera gare ta dorob ni Jehova, nelagum ta matagga nga espiritual nga makan i prinsipio na ira nga makaduffun tapenu malippawa tam i appanono na. Tapenu mammakapia ittam ta kuddanatun nga makan, mawag tu gigiammuattam i Biblia, pannonopan tu mapia yatun, anna kuattam i adde na mawayya tam nga iyaplika i nagigiammu tam. Nu kuattam yatun, mapenam tam i baggi tam nga mangngua tu desision ira nga mamagayayya kani Jehova. c—Bibbigan i Hebreo 5:14.

14. Kunnasi nga inuffunan ni Pablo i taga-Corinto ira nga mammanakam ta espiritual?

¹⁴ Marigatan nga mangngua tu fustu nga desision i Cristiano ira nga ari paga manakam mas ngana nu awan tu espesipiko nga dob ta Biblia. Nu awan gare tu espesipiko nga dob ta Biblia, nonopan na karuan nga puede da lapa nga kuan i ikaya da. Makkiddaw gapa i karuan tu annuttulan maski nu ari mabba nakuan kawagan yatun. Angngarigan na, gitta na  nakkiddaw i Cristiano ira nga taga-Corinto kani Pablo tu tadday nga annuttulan nu puede da kari nga kanan i makan nga netunnag ta sinan-dios ira. Imbes tu ikagi ni Pablo i kuadda, nipasingan na nga mawayya na kada tadday nga ‘kuan i urena lagapa’ base ta ipamavulun na konsensia na. Nakkagi yayya tu prinsipio ira nga makaduffun ta kada tadday tapenu makangngua tu desision nga marenu lapa i konsensia na anna ari nga makesiddukal ta tanakuan. (1 Cor. 8:​4, 7-9) Inuffunan gafu ni Pablo i taga-Corinto ira nga mammanakam ta espiritual tapenu meyusa da lagapa i abilidad da nga maningan ta nadduman na mapia anna marake imbes tu maddepende ira ta tanakuan onu magaleg tu annuttulan ira.

15. Kunnasi nga inuffunan ni Pablo i Cristiano ira nga Hebreo tapenu mammanakam ta espiritual?

¹⁵ Egga i makasta nga magigiammu tam ta nitura ni Pablo ta Cristiano ira nga Hebreo. Ari nga tulu-tuloy nga nammanakam i karuan ta nira; ‘matagga [nga espiritual] nga makan ngana nakuan i mepangngo para nira, ngem mawag pagalaman tu gatto i inumadda.’ (Heb. 5:12) Ari da nga ginigiammu anna inalawa i bagu ira nga ituttuddu ni Jehova ta nira gukaban na kongregasion. (Prov. 4:18) Angngarigan na, aru nga Cristiano nga Judio i tumuttul lagapa ta Mosaiko nga Dob maski nu 30 dagun ngana i nappasa turi ta nangultimu yatun megafu ta tavvu ni Jesus. (Roma 10:4; Tito 1:10) Fugurammu yatun! Makalanno ngana nakuan i 30 dagun tapenu malippawa danatun nga Judio nga Cristiano nga ari da ngana nga mawag nga tuttulan i Dob. Yayya nga nikaguman ni Pablo nga uffunan ira tapenu alawatadda i matagga nga espiritual nga makan nga ituttuddu na nira. Yatun mismu i kawagan danatun nga Cristiano tapenu mapakaladda i pangurug da nga mas makasta ngana i unnug na paddayaw kani Jehova gukaban ni Jesus. Pinaggutu gapa ira natun tapenu ari ira magimmang nga mallayyagayya maski nu peppersigian ira na Judio ira.—Heb. 10:​19-23.

ARI NAKUAN NGA SOBRA I KOMFIANSA TAM TA BAGGI TAM

16. Fuera ta pammanakam ta espiritual, anni paga i mawag tu kuattam?

¹⁶ Mawag tu ikagumattam nga mammanakam ta espiritual. Ngem mawag gapa nga kuattam i adde na mawayya tam tapenu mattalupaddian ittam nga kunnatun. Makua tam  laman yatun nu ari tu sobra i komfiansa tam ta baggi tam nga nonopattam tu ari tam ngana nga kawagan i mapprogreso. (1 Cor. 10:12) Mawag tu tulu-tuloy nga ‘usitakkattam tu mapia’ i baggi tam tapenu masiguradu tam nga mappopprogreso ittam lagapa.—2 Cor. 13:5.

17. Kunnasi nga ipasingan na tura ni Pablo ta taga-Colosas ira nga mawag tu mattalupaddian ittam nga manakam ta espiritual?

¹⁷ Ta tura ni Pablo ta taga-Colosas ira, nipasigo na uli nga mawag tu mattalupaddian ittam nga manakam ta espiritual. Maski nu manakam ngana ta espiritual danatun nga Cristiano, sinabarangngan lagapa ira ni Pablo nga magimmugug ira tapenu ari ira mainfluwensian na appana-panono na mundo. (Col. 2:​6-10) Kanayun nga nipakimallo ni Epafras, nga fermi nga makakkilala ta taga-Colosas ira, nga nakuan tu ‘mapakaladda ira ta angngurug’ onu mammanakam ira. (Col. 4:12) Anni i punto natun? Parefu nga nalippawa ni Pablo anna ni Epafras nga mawag tam i uffun na Dios anna mawag gapa tu kuattam i parte tam tapenu mattalupaddian ittam nga manakam. Kayà da nga mattalupaddian nga manakam ta espiritual i taga-Colosas ira maski nu anni paga nga problema i arubangadda.

18. Anni i posible nga mesimmu ta tadday nga manakam nga Cristiano? (Innan gapa i letratu.)

¹⁸ Sinabarangngan ni Pablo i Hebreo ira nga posible lapa nga interamente nga mawawan na tadday nga manakam nga Cristiano i pangapruba na Dios. Nu managga i futu na tadday nga Cristiano, ari ngana yayya nga makapabbabawi anna makalawa tu pamakoma na Dios. Pia ngana laman ta ari nga nesimmu i kunnatun ta Hebreo ira. (Heb. 6:​4-9) Kunnasi gapa sangawe danuri nabbalin tu inactive onu nadisfellowship ngem turi kua, nabbabawi? Ipasingan na mapakalinno nga pabbabawi da nga neruma ira turi ira ta kinagi ni Pablo ta tura na. Ngem oras tu manoli ira kani Jehova, mawag da i uffun nga iyawa na. (Eze. 34:​15, 16) Awayya nga iyunnug na elder ira nga uffunan ira na tadday nga manakam nga brother onu sister tapenu metoli i relasiodda kani Jehova.

19. Anni nakuan i goal tam?

¹⁹ Nu ikakkagumammu nga mammanakam ta espiritual, madde mu yatun nga goal mu. Itulu-tuloy mu laman nga kuman tu matagga nga espiritual nga makan anna ikagumammu nga mas parigan i appana-panono ni Jehova. Nu nabbalikka ngana gapa nga manakam, kuammu i adde na mawayyam nga mattalupaddian tu kunnatun sangawe anna ta mannanayun!