1. Wa Jeuova waahn wi fi du?

 WAN a di ting we mek wan man an im waif api bad a wen dem av wan biebi. Alduo dem lov di biebi, dem no waahn im fi tan wan biebi fi di res a im laif. Kaa ef di biebi naa gruo, dem wuda nuo se sitn rang wid im. A siem so Jeuova api wen wi staat fi fala Jiizas. Bot aalduo Jeuova api wen wi dis staat fi fala Jiizas, im no waahn wi fi eva de gwaan laik biebi wen it kom aan tu di sitn dem bout Gad. (1 Kor. 3:1) Bot im se wi fi ‘tingk laik se wi a big piipl.’​—1 Kor. 14:20.

2. Wa wi a-go luk pan iina da lesn ya?

² Wa it miin fi tingk laik se wi a big piipl? Wa wi kyan du fi get chrang iina di sitn dem we wi biliiv iina? An wa mek wi afi stodi di sitn dem we no so iizi fi andastan ef wi a-go get chrang iina di sitn dem we wi biliiv iina? An wa mek wi no fi fiil tu se wi so chrang iina di sitn dem we wi biliiv iina dat wi kyaahn du notn rang? Wi a-go get di ansa fi dem kwestiyan ya iina da lesn ya.

A WA IT MIIN FI BI WAN KRISTIYAN WE CHRANG IINA DI SITN DEM WE DEM BILIIV IINA?

3. Wa di Baibl miin wen it se wi fi tingk laik se wi a big piipl?

³ Iina di Baibl, di Griik wod we dem yuuz we miin se wi fi ‘tingk laik se wi a big piipl’ kyan miin se sumadi “biliiv iina Gad nof nof.” (1 Kor. 2:6) So jos laik ou wan biebi no tap gruo til dem get big, wi fi gwaan gruo an get chrang iina di sitn dem we wi biliiv iina. An a so wi staat fi tingk laik se wi a big piipl. An aal wen wi get chrang iina wa wi biliiv iina, wi no fi tap chrai fi lorn muo tingz bout Jeuova. (1 Tim. 4:15) Aal a wi, aal di wan dem we yong, kyan get chrang iina di sitn dem we wi biliiv iina. Bot ou wi kyan nuo se sumadi riili chrang iina di sitn dem we dem biliiv iina?

4. A ou yu kyan nuo ef sumadi chrang iina wa dem biliiv iina?

⁴ Wan Kristiyan we chrang iina wa im biliiv iina a sumadi we a-go du evriting we Jeuova se dem fi du, dem naa go pik  an chuuz wa dem waahn fi du. Bot kaa dem no porfek, dem stil a-go mek mistiek som a di taim. Bot di wie ou im liv im laif evridie a-go shuo se im a tingk bout tingz an a du tingz di wie ou Jeuova waahn im fi dwi’it. An kaa im ton wan nyuu sumadi, im aalwiez a-go a chrai fi tingk bout tingz di wie ou Jeuova wuda tingk bout it. (Ifii. 4:22-24) So im nuo ou fi yuuz di sitn dem we im lorn iina di Baibl fi nuo ou fi riizn pan tingz. So im no niid no wol iip a ruul fi tel im wa fi du; im a-go nuo di rait ting fi du. An wen im mek op im main fi du sitn, im a-go mek shuor se im dwi’it.​—1 Kor. 9:26, 27.

5. Wa a som sitn we di wan dem we no get chrang iina wa dem biliiv iina mait-a fain it iizi fi du? (Ifiijan 4:14, 15)

⁵ Bot di sumadi we no get chrang iina di sitn dem we dem biliiv iina a-go kwik fi biliiv di “laiyad” piipl dem an di wan dem we a “chrik wi ar fuul wi op.” Dem kwik fi biliiv piipl we se aal saat a tingz we no go so, an dem a-go lisn tu di wan dem we yuus tu sorv Jeuova an tap we waahn ada piipl fi fala dem. a (Riid Ifiijan 4:14, 15.) An dem mait-a red yai, kwik fi kaaz prablem, an kwik fi get beks, an dem mait-a gi iin tu di sitn dem we rang.​—1 Kor. 3:3.

6. Wa wi kyan yuuz fi elp sumadi fi andastan wa it miin fi get chrang iina wa wi biliiv iina? (Luk pan di picha tu.)

⁶ So jos laik wa wi se aredi, di Baibl taak bout sumadi we a get chrang iina wa dem biliiv iina laik wan pikni we a gruo til dem get big. Kaa wan pikni naa go nuo wa fi du, im a-go niid sumadi big fi tek kier a im an tel im wa fi du. Laik wan mada mait-a tel ar daata fi uol aan pan ar an wen dem a kraas di ruod. Bot wen di pikni get biga, di mada a-go lou ar fi kraas di ruod pan ar uon, bot shi a-go mek di pikni memba se shi fi luk op di ruod an dong di ruod bifuo shi kraas. An wen di pikni get biga, shi a-go nuo ou fi du dem sitn ya pan ar uon. So jos laik ou wan likl pikni niid sumadi big fi elp dem fi no get iina chobl, a siem so wan Kristiyan we no chrang iina wa dem biliiv iina a-go niid sumadi we chrang fi elp dem fi du wa Jeuova waahn dem fi du so dat dem no go get iina chobl an so dat dem kyan du tingz we mek sens. Bot di sumadi we chrang iina wa dem biliiv iina kyan go riizn pan di sitn  dem we dem lorn iina di Baibl an si ou Jeuova fiil bout sitn, an den dem a-go du di rait ting.

7. Di wan dem we chrang iina wa dem biliiv iina niid sumadi fi elp dem som a di taim?

⁷ Dis no miin tu se sumadi we chrang iina wa dem biliiv iina naa go niid nobadi fi elp im. Som a di taim, dem mait-a aks sumadi fi elp dem fi nuo wa fi du. Bot di sumadi we neehn get chrang iina wa dem biliiv iina a-go waahn sumadi fi tel dem wa fi du, aal wen a sitn we dem fi mek op dem uona main bout. Bot di sumadi we chrang iina di sitn dem we dem biliiv iina a-go luk pan ada piipl an lorn fram dem, an nuo se Jeuova ekspek dem fi “kyari dem uona luod.”​—Gya. 6:5.

8. A ou di wan dem we chrang iina wa dem biliiv iina mait-a difrant fram dem wan aneda?

⁸ Jos laik ou big piipl no luk di siem wie, a siem so di Kristiyan dem we chrang iina wa dem biliiv iina no av di siem kain-a wiez dem. Laik a no aal a dem waiz di siem wie, ar briev di siem wie, ar kain tu piipl di siem wie, ar fiil it fi piipl di siem wie niida. An wen tuu sumadi we chrang iina wa dem biliiv iina afi mek op dem main bout di siem sitn, dem mait-a du tuu difrant sitn. An notn no rang wid wa di tuu a dem du, wos wen a sitn we av fi du wid dem kanchens. Wen dem nuo dis, dem naa go joj dem wan aneda kaa dem no du di siem ting, bot dem a-go wok tugeda az wan.​—Ruo. 14:10; 1 Kor. 1:10.

WA WI KYAN DU FI GET CHRANG IINA DI SITN DEM WE WI BILIIV IINA?

9. Sumadi a-go dis get chrang iina di sitn dem we dem biliiv iina jos so? Tel wi wa mek yu se so.

⁹ Wan biebi a-go gruo an get big jos so, bot wi naa go dis get chrang iina di sitn dem we wi biliiv iina jos so. Laik di breda an di sista dem we did de iina Korint did biliiv di gud nyuuz we dem ier, an get baptaiz, an did get Gad uoli spirit, an wa di apasl Paal did tiich dem did elp dem. (Aks 18:8-11) Bot wol iip a ier afta dem baptaiz, nof a dem stil neehn get chrang iina di sitn dem we dem biliiv iina. (1 Kor. 3:2) Wa wi kyan du fi mek shuor se dis no apm tu wi?

10. Ef wi waahn fi get chrang iina di sitn dem we wi biliiv iina, wa wi afi du? (Juud 20)

¹⁰ Ef wi a-go get chrang iina di sitn dem we wi biliiv iina, wi afi riili waahn fi dwi’it. Di wan dem we api se dem “no nuo nof sitn” an waahn stie laik biebi a-go aarait fi no get chrang iina di sitn dem we dem biliiv iina, so dem naa go get chrang. (Pr. 1:22) Wi no waahn fi bi laik di piipl dem we get big an dem mada an faada stil afi tel dem wa fi du. Bot wi waahn fi du di sitn dem we a-go elp wi fi get chrang iina wa wi biliiv iina fi wiself. (Riid Juud 20.) Ef yu stil a chrai aad fi get chrang iina di sitn dem we yu biliiv iina, prie an aks Jeuova fi mek yu ‘waahn fi du di sitn dem we im waahn yu fi du an fi gi yu di chrent fi du dem tu.’​—Fil. 2:13.

11. Wa a som a di sitn dem we Jeuova gi wi fi elp wi fi get chrang iina wa wi biliiv iina? (Ifiijan 4:11-13)

¹¹ Jeuova no ekspek se wi a-go dis git op an get chrang iina di sitn dem we wi biliiv iina jos so. Di elda dem iina di kanggrigieshan redi fi elp wi fi tingk laik se wi a big piipl an fi “gruo op an biyiev jos laik [Jiizas Krais].” (Riid Ifiijan 4:11-13.) Jeuova aal gi wi im uoli spirit so dat wi kyan “tingk laik ou Krais Jiizas tingk.” (1 Kor. 2:14-16) Plos Jeuova mek dem rait Matyu, Maak, Luuk, an Jan so dat wi kyan nuo wa Jiizas did du wen im did de pan ort. Wen yu chrai fi tingk bout tingz laik Jiizas an du tingz laik im, it a-go elp yu fi get chrang iina di sitn dem we yu biliiv iina.

 A OU DI SITN DEM WE IINA GAD WOD WE NO SO IIZI FI ANDASTAN KYAN ELP WI?

12. Wa a di sitn dem we wi don nuo aredi bout Krais Jiizas?

¹² Ef wi a-go get chrang iina di sitn dem we wi biliiv iina, wi afi “muuv paas di sitn dem we wi don [nuo aredi] bout Krais Jiizas.” Laik di sitn dem we wi lorn bout baptizam, an ou ded piipl a-go kom bak alaiv, an ou wi fi chos iina Gad, an ou wi fi beg im paadn fi di rang sitn dem we wi du. (Iib. 6:1, 2) A dem ya a som a di likl iizi ting dem we Kristiyan biliiv iina. An a das wai di apasl Piita did priich bout dem sitn ya wen im did a taak tu di kroud a piipl a Pentikas 33 C.E. (Aks 2:32-35, 38) Ef wi a-go fala Jiizas, wi afi biliiv dem likl sitn ya. Laik Paal did se ef wi no biliiv se Jiizas did kom ded fi wi, den a laik se wi a no wan Kristiyan. (1 Kor. 15:12-14) Bot wi no fi sidong an tingk se wi aarait jos kaa wi nuo dem likl sitn ya.

13. Ef di aad fuud we Iibruu 5:14 taak bout a-go elp wi, wa an wa wi afi du? (Luk pan di picha tu.)

¹³ Bot di sitn dem we no so iizi fi andastan iina di Baibl no onggl av fi du wid di laa dem we Jeuova gi wi, bot it av fi du wid di sitn dem we wi kyan riizn pan we de iina di Baibl we mek wi get fi andastan ou Jeuova fiil bout tingz. So fi kyan du dis, wi afi stodi an sidong an tingk bout di sitn dem we wi riid iina Gad Wod an du dem tu. Wen wi du dat, a chrien wi a chrien wiself fi du di sitn dem we a-go mek Jeuova api. b​—Riid Iibruu 5:14.

14. Wa Paal did du fi elp di Kristiyan dem iina Korint fi get chrang iina wa dem biliiv iina?

¹⁴ Di Kristiyan dem we no get chrang iina di sitn dem we dem biliiv iina naa go nuo wa dem fi du wen dem afi mek op dem main bout sitn we dem afi riid di Baibl an riizn pan fi nuo wa fi du. So ef di Baibl no av no laa pan it, dem mait-a fiil se dem kyan du eniting we dem waahn. An den yu av som ada wan we mait-a waahn wan laa fi tel dem wa fi du. Laik som Kristiyan iina Korint did a aks Paal ef dem shuda nyam di fuud we di piipl dem yuuz fi worship faalz gad. Insted-a fi tel dem wa fi du, Paal tel  dem se aal a dem ‘frii fi du wa dem waahn fi du’ bies pan wa dem kanchens lou dem fi du. Bot im tel dem bout sopm iina di Baibl we dem kyan riizn pan fi elp dem fi du di rait ting so dat dem kanchens no bada dem, an so dat wa dem du no kaaz ada piipl fi sin. (1 Kor. 8:4, 7-9) So im did a elp dem Kristiyan de iina Korint fi get chrang iina di sitn dem we dem biliiv iina, so dat dem na’afi dipen pan sumadi fi tel dem wa fi du an wa no fi du.

15. A ou Paal did elp di Iibruu Kristiyan dem fi get chrang iina wa dem biliiv iina?

¹⁵ Wen wi luk pan di leta we Paal did rait tu di Iibruu Kristiyan dem, wi si se som a dem Kristiyan de neehn a du wa dem fi du fi get chrang iina wa dem biliiv iina. So dem “ton piipl we niid milk, [dem] kyaahn nyam aad fuud.” (Iib. 5:12) So dem neehn a gwaan lorn di sitn dem we Jeuova did a tiich dem iina di kanggrigieshan. (Pr. 4:18) Laik nof a dem did stil biliiv se dem stil did fi a kip di Laa we Gad did gi Muoziz, aalduo a 30 ier did gaan sins Jiizas did kom gi op im laif so dat dem no afi kip di laa dem. (Ruo. 10:4; Taitos 1:10) So dem Kristiyan de did av wol a 30 ier fi si se dem na’afi kip di Laa no muor. So enibadi we riid di leta we Gad did mek Paal rait tu dem Iibruu Kristiyan de, kuda si se a nof tingz iin de we kuda elp dem fi get chrang iina di sitn dem we dem biliiv iina. An dat a wa dem Kristiyan de did niid fi elp dem chos iina ou Jeuova set op tingz fi dem worship im, an fi mek dem gwaan briev op demself fi gwaan priich aalduo di Juu dem did a fait gens dem.​—Iib. 10:19-23.

WI NO FI FIIL TU SE WI SO CHRANG IINA DI SITN DEM WE WI BILIIV IINA DAT WI KYAAHN DU NOTN RANG

16. Wa els yu fi chrai an du?

¹⁶ Wi no fi onggl chrai aad fi get chrang iina di sitn dem we wi biliiv iina, bot wi fi chrai an stie chrang. So dat miin tu se wi naa go tingk se wi so chrang iina di sitn dem we wi biliiv iina dat wi kyaahn du notn rang. (1 Kor. 10:12) So wi fi gwaan “luk an tes” wiself fi mek shuor se wi a gwaan du di sitn dem we a-go mek wi get chrang iina di sitn dem we wi biliiv iina.​—2 Kor. 13:5.

17. Di leta we Paal did rait tu di Kristiyan dem iina Kolasi, ou dat did elp dem fi si wa mek dem fi gwaan tan op chrang?

 ¹⁷ Iina di leta we Paal rait tu di Kristiyan dem iina Kolasi, im tel dem tu se dem fi gwaan tan op chrang iina di sitn dem we dem biliiv iina. So aalduo dem did chrang iina di sitn dem we dem biliiv iina, Paal did tel dem se dem fi chrai aad an mek shuor se dem no staat fi tingk bout tingz laik ou di piipl dem we naa sorv Gad tingk bout tingz. (Kol. 2:6-10) An Epafras, we did nuo di breda an sista dem iina di kanggrigieshan gud, aalwiez prie se dem “wi biliiv iina Gad so til nobadi kyaahn mek [dem] tap chos iina im.” (Kol. 4:12). So dis mek wi si se Paal an Epafras nuo se fi sumadi tan op chrang iina di sitn dem we dem biliiv iina, dem afi wok aad fi du it an se a Gad afi elp dem fi dwi’it tu. An dem did waahn di breda an sista dem iina Kolasi fi tan op chrang no mata wa dem a go chuu.

18. Wa kyan apm tu wan Kristiyan we chrang iina di sitn dem we dem biliiv? (Luk pan di picha tu.)

¹⁸ Paal did mek di Iibruu Kristiyan dem nuo se sumadi we did chrang iina wa dem biliiv iina wuda don fa ef dem mek sin ful op dem aat an mek it tof op. Kaa wen dat apm, Gad naa go paadn di sumadi kaa dem kyaahn fiil sari bout dem sin. Bot wi api se dat neehn apm tu non a dem breda an sista de. (Iib. 6:4-9) Bot wa bout di breda an sista dem tide we mait-a tap go a miitn an fiil sorvis an dem ting de, ar di wan dem we get put out a di kanggrigieshan bot afta dat dem sari fi wa dem du an ton tu Gad? Wen dem du dat, dem shuo se dem difrant fram di wan dem we Paal did a taak bout we Gad naa go paadn. Bot yu si wen dem kom bak tu Jeuova, dem a-go niid Jeuova fi gwaan elp dem. (Izii. 34:15, 16) So di elda dem mait-a aks sumadi we chrang iina wa dem biliiv iina fi elp dem wan ya fi get chrang agen tu.

19. Wa aal a wi fi waahn fi du?

¹⁹ Ef yu a chrai aad fi get chrang iina di sitn dem we yu biliiv iina, it kyan apm! So gwaan riid an stodi yu Baibl an di buk an pamplet dem we bies aafa di Baibl, an chrai fi tingk bout tingz di wie ou Jeuova tingk bout tingz. An ef yu chrang iina di sitn dem we yu biliiv iina aredi, gwaan stie chrang laik big piipl.