1. Anhte hpe Yehowa hpa byin shangun mayu ai kun?

 YAN la ni a pyaw htum aten langai gaw, ma shangai wa ai aten re. Ma chyangai hpe yu nna grai pyaw tim, n kaba wa shangun mayu ai ngu n myit ai. N kaba wa na hpe pyi tsang ai. Dai hte maren, tengman lam de anhte lahkam sa wa ai shaloi, Yehowa grai pyaw ai. Raitim, tengman lam hta ma chyangai n byin shangun mayu ai. (1 Ko 3:1)“Myit su ai ni tai” wa shangun mayu ai.—1 Ko 14:20.

2. Ndai sumhpa hta hpa lam bawngban na kun?

² Myitsu ai, kunghpan ai ngu ai gaw hpa rai kun? Gara hku nna kunghpan wa lu ai kun? Kunghpan ai Hkristan byin na matu ja ai shahpa sha ai gaw kade daram ahkyak ai kun? Hpa majaw tinang hkum tinang ladu lai n kam ging ai kun? Ndai sumhpa hta, dai ga san ni hpe bawngban mat na re.

KUNGHPAN AI NGU AI GAW HPA RAI KUN?

3. Kunghpan ai ngu ai gaw hpa rai kun?

³ Chyum Laika hta, “myit su ai” ngu ga gale da ai Grik ga si gaw, “kunghpan ai” ngu nna mung lachyum nga ai. a (1 Ko 2:6) Kunghpan ai ngu ai gaw, tengman ai lam hta ma chyangai zawn, n myit ai, n galaw ai sha, Karai Kasang hte hku hkau lam grau kaja wa ai hpe tsun ai re. Kunghpan mat yang pyi, matut rawt jat ra ai lam ni naw nga ai. (1 Tm 4:15) Ramma ni hte hpawn, anhte yawng kunghpan ai Hkristan byin lu ai. Kunghpan ai hpe gara hku chye lu ai kun?

4. Kunghpan ai Hkristan re ai lam hpa gaw madun dan ai kun?

 ⁴ Kunghpan ai Hkristan ni gaw, Karai hpyi shawn ai lam yawng hpe hkan sa ai. Tinang ra ai hpe sha lata nna n hkan sa ai. N hkum tsup ai majaw, shut ai lam ni galaw hkrup chye ai. Raitim, Karai a myit ra ai lam hte maren, dang lu ai made shani shagu myit ai, galaw ai. Karai Kasang myit ai hku myit chye hkra galoi mung shakut ai. Gawng shing-yan ningnan hpe hpun ai. (Ehp 4:22-24) Karai a tara ni, Chyum Laika npawt tara ni hpe madung nna, hpaji rawng ai dawdan lam ni jahkrat chye hkra shaman ai. Dai majaw, galaw ra na, n galaw ra na hte seng ai rit kawp tara law law n ra ai. Dawdan ngut yang, dawdan ai hte maren galaw na matu tinang hkum tinang hkang ai.—1 Ko 9:26, 27.

5. Kunghpan ai lam n nga ai Hkristan ni hpa byin chye ai kun? (Ehpesu 4:14, 15)

⁵ Kunghpan ai lam n nga ai Hkristan ni gaw, “n hkru n hkra ai” hte “maw da ai hkalem hkalau ai” ni hpang de aloi sha lawm mat chye ai. Shawa matut mahkai midiya ni hta, n jaw ai shiga shapoi ai ni, makam masham htak ai ni a ga hpe na yawng mat chye ai. b (Ehpesu 4:14, 15 hpe hti u.) Manawn masham byin chye ai, ga law saw chye ai, masin n si hkraw ai, hkalem hkrum ai shaloi lawm mat chye ai.—1 Ko 3:3.

6. Hkristan kunghpan ai lam hpe hpa hte shingdaw mai ai kun? (Sumla hpe mung yu u.)

⁶ Nnan hta tsun wa ai hte maren, Hkristan kunghpan ai lam hpe ma ni kaba wa ai lam hte Chyum Laika hta shingdaw da ai. Ma ni gaw n chye ai lam ni law ai. Dai majaw, masha kaba ni lam madun nna makawp maga ya ra ai. Ga shadawn, lam lai ai shaloi, ma hpe kanu gaw lata jum da shangun ai. Loi kaba wa ai shaloi, shi hpe hkrai lai shangun ai. Lam n lai shi yang, pai, hkra yu na matu gaw naw sadi jaw ai. Asak kaba wa ai shaloi, tinang hkrai shoihpa hpe koi chye wa ai. Ma ni shoihpa hpe koi lu hkra, masha kaba ai karum ya ra ai zawn, kunghpan ai lam n nga ai Hkristan langai, Karai hte hku hkau lam  hkra machyi chye ai shoihpa hpe koi lu hkra, kaja ai dawdan lam ni jahkrat lu hkra, kunghpan ai Hkristan ni a karum shingtau lam ra ai. Kunghpan mat yang, dawdan lam jahkrat ra wa ai shaloi, Yehowa a myit mang ai lam hpe chye na matu, Chyum Laika npawt tara ni hpe sawn dinglik ai. Dai npawt tara ni hpe madung tawn nna dawdan ai.

7. Kunghpan ai Hkristan ni gaw, kaga ni a karum shingtau lam ra ai kun?

⁷ Kunghpan ai Hkristan ni gaw, kaga ni a karum shingtau lam galoi mung n ra sai ngu tsun mayu ai kun? N re. Nyan hpaji, mahkrum madup grau nga ai ni kaw na karum hpyi ra ai aten ni nga ai. Raitim, tinang nan dawdan lam jahkrat ra ai. “Tinang a lit gun hpai” na matu, Yehowa hpyi shawn da ai hpe hkap la ai. (Gal 6:5) Kunghpan ai lam n nga ai Hkristan ni gaw, hpa galaw ra na lam kaga ni hpe san chye ai. Tinang jahkrat ra na dawdan lam ni hpe kaga ni hpe jahkrat shangun chye ai.

8. Kunghpan ai ni gaw langai hte langai gara hku shai chye ai kun?

⁸ Ma ni a kaba wa ai lam n bung hkat ai zawn, Hkristan ni a kunghpan ai lam mung n bung hkat ai. Nkau gaw, machye machyang law ai, nkau gaw nden marai nga ai, nkau gaw gam jaw gam ya chye ai, nkau gaw myit tau ya chye ai. Dai sha n-ga, masa bung yang pyi, kunghpan ai marai lahkawng a dawdan lam shai chye ai. Grau nna gaw, myit nsam hte seng ai lam ni hta re. Raitim, lahkawng yan a dawdan lam gaw, Chyum Laika npawt tara hte maren rai na re. Dai majaw, shada da n jeyang ai sha kahkyin gumdin hkra shakut ai.—Rom 14:10; 1 Ko 1:10.

GARA HKU KUNGHPAN WA LU AI KUN?

9. Shi hkrai kunghpan wa chye ai kun? Ga shadawn jaw u.

⁹ Ma ni gaw shi hkrai kaba wa tim, Hkristan ni gaw shi hkrai kunghpan wa na n re. Ga shadawn, Korinhtu mare na hpunau nauna ni gaw, kabu gara shiga hkap la ai, hkalup hkam ai, chyoi pra ai wenyi lu ai, kasa Pawlu kaw na mung grai sharin la lu ai. (Kas 18:8-11) Raitim, hkalup hkam da ai grai na sai raitim, kunghpan ai lam n nga shi ai. (1 Ko 3:2) Dai zawn n byin hkra gara hku koi lu na kun?

10. Kunghpan wa hkra hpa galaw ra ai kun? (Yuda 20)

¹⁰ Kunghpan wa na matu, kunghpan mayu ai myit nga ra ai. Nkau gaw, “myit n su ai amu” hta sharawng ai. Wenyi lam hta ma chyangai sha naw byin mayu ai. Kunghpan wa hkra n kam shakut ai. (Gsh 1:22) Asak ram wa tim, lama ma dawdan ra yang, kanu kawa ni hpe naw kam nga ai ni zawn anhte n byin mayu ai. Tinang a lit tinang gun nna, kunghpan ai ni byin hkra shakut mayu ai. (Yuda 20 hpe hti u.) Kunghpan hkra naw shakut nga ai rai yang, “galaw mayu ai myit, . . . galaw lu ai” atsam jaw na matu, Yehowa kaw akyu hpyi u.—Hpl 2:13.

11. Anhte kunghpan wa na matu Yehowa hpa ni jaw da ai kun? (Ehpesu 4:11-13)

¹¹ Tinang a atsam hte sha kunghpan wa na matu Yehowa n myit mada ai. Nawku hpung hta, sagu rem ni, sara ni hpe jaw da ai. Anhte hkum tsup re ai masha byin wa na matu, “Hkristu hte shadawn ram ai gawng shingyan a lanang hkap lu hkra” shanhte karum ya ai. (Ehpesu 4:11-13 hpe hti u.) “Hkristu a amyit” nga wa hkra chyoi pra ai wenyi hpe mung Yehowa jaw da ai. (1 Ko 2:14-16) Dai sha n-ga, mungkan ga kaw nga ai  shaloi, Yesu gara hku myit ai, galaw ai, tsun ai hpe chye na matu, Kabu Gara Shiga Laika 4 hpe jaw da ai. Yesu hpe kasi la yang, kunghpan wa na re.

JA AI WENYI MALU MASHA AHKYAK AI LAM

12. “Hkristu a shawng npawt na ga kanu” gaw hpa rai kun?

¹² Kunghpan wa na matu, “Hkristu a shawng npawt na ga kanu” madung Chyum Laika sharin achyin lam ni hpe tawn da ra ai. Madung sharin achyin ai lam hta, myit malai lu ai lam, makam masham, hkalup, hkrung rawt ai hte seng ai sharin achyin lam ni lawm ai. (Heb 6:1, 2) Dai sharin achyin lam ni gaw, Hkristan makam masham a madung re. Dai majaw, Pentikoti poi hta, shawa hpawng hpe kasa Petru hkaw tsun ai shaloi, dai sharin achyin lam ni hpe tsun shalawm ai re. (Kas 2:32-35, 38) Hkristu a sape byin wa na matu, dai sharin achyin ai lam ni hpe hkap la ra ai. Ga shadawn, hkrung rawt ai sharin achyin lam hpe n hkap la ai wa gaw, Hkristan makam masham yawng hpe n hkap la ai re ngu Pawlu sadi jaw ai. (1 Ko 15:12-14) Raitim, madung sharin achyin lam ni hte sha n mai myit dik nga ai.

13. Hebre 5:14 hta tsun da ai ja ai shahpa kaw na akyu lu na matu hpa galaw ra ai kun? (Sumla hpe mung yu u.)

¹³ Madung sharin achyin ai lam ni hte n bung ai sha, ja ai shahpa gaw Jep Ai Tara ni sha n-ga, Chyum Laika npawt tara ni mung lawm ai. Karai a myit mang ai lam hpe chye na shangun ai. Dai zawn chye na na matu, Chyum Laika hkaja ra ai, myit sawn sumru ra ai, hkan sa ra ai. Dai gaw, Karai Kasang ra sharawng ai dawdan lam ni jahkrat lu hkra, shaman ya ai hte bung ai. c—Hebre 5:14 hpe hti u.

14. Korinhtu nawku hpung na Hkristan ni kunghpan wa na matu Pawlu gara hku karum ya ai kun?

¹⁴ Kunghpan ai lam n nga ai Hkristan ni gaw, masat da ai Chyum Laika tara n nga ai masa hta, jaw ai hku dawdan na matu yak chye ai. Nkau gaw, masat da ai Chyum Laika tara n nga ai majaw, tinang galaw mayu ai lam hpe galaw mai ai ngu myit ai. Nkau  chyawm gaw, tara jahkrat shangun mayu ai. Gaja nga yang, n ra ai majaw, Karai Kasang tara n jahkrat da ya ai re. Ga shadawn, sumla ni hpe nawng ai hkungga sha mai, n mai hpe Korinhtu nawku hpung na Hkristan ni gaw, Pawlu hpe tara jahkrat shangun na masa nga ai. Hpa galaw u ngu Pawlu n tsun ai. Langai hpra a myit nsam hpe madung tawn nna lata na “ahkang” nga ai hpe shi chye ai. Tinang a myit nsam hpe awu asin n byin shangun ai sha, kaga ni hpe ahtu kataw n byin shangun ai sha, dawdan lu na Chyum Laika npawt tara nkau hpe tsun dan ai. (1 Ko 8:4, 7-9) Kaga ni hpe kamhpa na malai, tara jahkrat shangun na malai, garan ginhka chye ai atsam hte dawdan chye na matu, kunghpan wa na matu Pawlu karum ya wa ai.

15. Hebre Hkristan ni kunghpan wa na matu Pawlu gara hku karum ya ai kun?

¹⁵ Hebre Hkristan ni hpang de ka ai Pawlu a laika kaw na mung naw sharin la lu ai. Hebre Hkristan nkau gaw, “ja ai [wenyi] shahpa hte n ram ai ni, chyu sha naw lu ra ai ni” hte bung nga ai. (Heb 5:12) Nawku hpung kaw na Yehowa madun dan ai tengman ai tara nnan ni hpe n hkap la ai. (Gsh 4:18) Ga shadawn, Hkristu a shagu hkungga a majaw, Jep Ai Tara htum mat ai gaw, shaning 30 daram rai sai. Raitim, Mawshe A Tara hpe naw hkan sa nga ai. (Rom 10:4; Tit 1:10) Myit mang ai lam galai shai na matu, shaning 30 ting aten lu da ai. Ja ai shahpa hte bung ai sung htum ai tengman ai tara ni hpe hkap la na matu, Pawlu karum ya nga sai. Pawlu a laika gaw, Hkristan nawku dawjau lam, hpa majaw grau htum ai hpe chye na shangun ai. Yuda masha ni ninghkap tim, matut hkaw tsun gwi ai nden marai nga shangun ai.—Heb 10:19-23.

TINANG HKUM TINANG LADU LAI HKUM KAM

16. Kunghpan hkra galaw ai sha n-ga, hpa naw galaw ra ai kun?

¹⁶ Kunghpan ai ni byin na matu shakut ra ai zawn, matut kunghpan nga na matu mung shakut ra ai. Kunghpan sai ngu nna tinang hkum tinang ladu lai n mai kam ai. (1 Ko 10:12) Matut rawt jat nga, n nga hpe dinglik yu ra ai.—2 Ko 13:5.

17. Matut kunghpan ra ai lam Kolose nawku hpung de ka ai Pawlu a laika gaw gara hku madun dan ai kun?

 ¹⁷ Kolose nawku hpung de ka ai laika hta, matut kunghpan ra ai lam Pawlu tsun da ai. Kunghpan nga sai raitim, masha myit mang lam a majaw hkalem n hkrum na matu sadi jaw da ai. (Kol 2:6-10) Shanhte “hkum tsup ai hte dinggrin nga let lahpran tsap nga lu” na matu, dai nawku hpung kaw na hpunau nauna ni a lam atsawm chye ai Epahpra myit rawt let akyu hpyi ya ai. (Kol 4:12) Hpa chye lu ai kun? Matut kunghpan nga na matu, Karai a karum shingtau sha n-ga, tinang nan shakut shaja ra ai lam, Pawlu hte Epahpra chye na ai lam chye lu ai. Mayak mahkak ni nga tim, Kolose nawku hpung kaw na Hkristan ni hpe matut kunghpan nga shangun mayu ai.

18. Kunghpan ai Hkristan raitim, hpa byin chye ai kun? (Sumla hpe mung yu u.)

¹⁸ Kunghpan ai Hkristan ni mung, n sadi yang Karai a myi man htani htana sum mat chye ai ngu Hebre Hkristan ni hpe Pawlu sadi jaw ai. Hkristan langai gaw, aten grai na hkra myit malai n la ai, Karai a mara raw ya ai lam hpe n hkap la ai du hkra myit masin ja mat chye ai. Hebre Hkristan ni gaw dai hku n byin wa ai. (Heb 6:4-9) Dai ni aten na wenyi lam hta katsi mat ai ni, shapraw hkrum ai ni gaw, hpang de myit malai lu yang gara hku kun? Shanhte shagrit shanem let myit malai la ai gaw, Pawlu a laika hta lawm ai ni hte grai shai ai. Yehowa hpang de bai wa ai shaloi, shanhte karum shingtau lam ra ai. (Eze 34:15, 16) Wenyi lam bai kaja wa hkra karum ya na matu, mahkrum madup nga ai sakse hkam ni hpe myitsu salang ni lajang ya na re.

19. Anhte hta hpa bandung nga ging ai kun?

¹⁹ Nang gaw kunghpan na matu shakut ai rai yang, kunghpan wa na re. Matut nna ja ai wenyi malu masha hpe sha u. Yehowa myit ai zawn myit u. Kunghpan nga sai rai yang pyi, myitsu ai Hkristan hku nna matut ngang ngang tsap nga u.