1. Jehovap qanoq kissaateqarfigaatigut?

 AAPPARIIT nuannaarutiginerpaasaasa ilagaat peqqissumik meerartaarnertik. Angajoq­qaajusullu nuunuutertik asangaaraluarlugu nukangajuassasoq kissaatigin­ngilaat. Isumakuluutigingaas­savaammi peroriar­tunngippat. Taamatuttaaq Jiisusimut malinnit­tunngoraangatta Jehova nuannaartarpoq. Kissaatigin­ngilaali anersaakkut nukangajuas­sasugut. (Kor 1. 3:1) Kissaatigaali anersaakkut ‘inersimal­luartun­ngussasugut’. – Kor 1. 14:20.

2. Allaaserisami matumani suut sammissavagut?

² Anersaakkut inersimal­luartuuneq qanoq paasisariaqarpa? Qanoq anersaakkut inersimal­luartun­ngorsin­naavugut? Anersaakkut nerisassat tamuasarissat qanoq pingaaruteqartigaat? Aamma sooq anersaakkut inersimal­luartuunerput sulissutigiuas­savarput? Allaaserisami matumani apeqqutit taakku akissutis­sarsissavagut.

ANERSAAKKUT INERSIMAL­LUARTUUNEQ QANOQ PAASISARIAQARPA?

3. Anersaakkut inersimal­luartuuneq qanoq paasisariaqarpa?

³ Biibilimi grækerisut oqaatsimi ‘inersimal­luarnermik’ nutserneqartumi pineqarsinnaavoq kristumiutut pissuserineqar­tussanik ersersitsisin­naalluarneq. a (Ef 4:13) Soorlu naalungiarsuk inersimasun­ngornissami tungaanut alliartortartoq, uagut aamma anersaakkut inersimal­luartun­ngornissarput siunertaralugu Jehovamut attaveqarnerput ineriar­tortittuas­savarput. Inersimal­luartun­ngoreeraluarluta anersaakkut siumukar­tuassaagut. (Tim 1. 4:15) Tamatta, aamma inuusuttut, anersaakkut inersimal­luartun­ngorsin­naavugut.  Qanoq paasisin­naavarput anersaakkut inersimal­luartun­ngoreersimanerluta?

4. Anersaakkut inersimal­luartoq qanoq ittuua?

⁴ Anersaakkut inersimal­luartup Guutip peqqussutai tamaasa, nuannarisani kisiisa pinnagit, maleruartarpai. Soorunami naammal­luinnan­ngitsuugami kukkusarpoq. Ullulli tamaasa Jehovap piumasaa pingaar­nerpaatin­niarlugu sapinngisaminik iliuuseqartarpoq. Kinaassuseq nutaaq atereersimavaa, eqqarsar­tariaatsinilu Jehovap eqqarsar­tariaasianut naapertuutsin­niarsariuarpaa. (Ef 4:22-24) Jehovap inatsisai najoqqutassiaalu tunngavigalugit silatusaartumik aalajangiisarnini sungiusarsimagamiuk sunnguit tamaasa pillugit malittarisas­siarpassuit pisariaqar­tinngilai. Aalajangik­kamisut iliorniarluni ilungersortarpoq. – Kor 1. 9:26, 27.

5. Anersaakkut inersimal­luanngitsoq qanoq navianar­torsiortarpa? (Efesossimiut 4:14, 15)

⁵ Paarlattuanik, anersaakkut inersimal­luanngitsoq inuit ‘peqqusersusaarlutik salloqit­taataannit’ tammartin­neqariaan­naasarpoq. Aamma nutaarsiassani oqaluttuarineqartunit ilumuun­ngitsunit, tusatsiakkanit tunussisullu salluliuutaannit salloqit­tartissinnaavoq. b (Efesossimiut 4:14, 15 atuakkit). Imaassinnaavoq sinngaq­qajaasartoq, allat akerleriis­suteqarfigisarai, ajuallajasartoq ussernar­tunullu nakkaan­nariaan­naasarluni. – Kor 1. 3:3.

6. Anersaakkut inersimal­luartun­ngorneq sumut assersuun­neqarsinnaava? (Aamma asseq takuuk).

⁶ Eqqaaneqareersutut Biibilimi anersaakkut inersimal­luartun­ngorneq meeqqap inersimasun­ngoriar­torneranut assersuun­neqarpoq. Meeraq ilisimas­suseqarpiarneq ajorami inersimasunit illersor­neqartariaqarlunilu siunnersor­neqartariaqarpoq. Assersuutigalugu aqqusinikkut ikaarnialeraangamik anaanaasup paninnguani tasiortarpaa. Paninili peroriar­tortillugu kisimiilluni aqqusinikkut ikaartarnissaa anaanaasup akuerisinnaavaa. Sulili biileqarnersoq alaatsinaat­tassagaa eqqaasittarpaa. Inersimasun­ngoreerluni paniata nalussanngilaa navianar­torsiutaasinnaasut taamaattut qanoq nammineq ingalas­simasin­naanerlugit. Soorlu meeqqat ulorianartut pillugit inersimasunit mianersoq­quneqar­tariaqartut, anersaakkut inersimal­luanngitsut  Jehovamik ikinnguteqar­nerminnut navianaataasinnaasut pillugit inersimal­luartunit mianersoq­quneqar­tariaqar­tarlutillu silatusaartumik aalajangiinias­sagamik ikiorneqar­tariaqartarput. Anersaakkulli inersimal­luartut aalajangiinialeraangamik Jehovap isumaa paasiniarlugu Biibilimi najoqqutassiat eqqarsaatigisarpaat maleruarlugillu.

7. Anersaakkut inersimal­luartut allanit ikiorneqar­nissartik pisariaqar­tittarpaat?

⁷ Imaappa anersaakkut inersimal­luartup allanit ikiorneqar­nissani pisariaqartinneq ajoraa? Naamik. Aamma anersaakkut inersimal­luartut ilaannikkut ikioqqusarput. Anersaakkulli suli inersimal­luanngitsoq qanoq iliornis­saminik allanit oqarfigitik­kusuttarpoq aamma immaqa nammineq aalajangigas­saraluaminik allanut aalajangeeq­qusisarpoq. Anersaakkulli inersimal­luartoq ilisimas­suseqar­nerusunut misilit­tagaqar­nerusunullu ikioqqugaangami naluneq ajorpaa nammineq aalajangiis­salluni ‘nammagassanilu nammineq nammassallugu’. – Gal 6:5.

8. Anersaakkut inersimal­luartut qanoq assigiin­ngissin­naappat?

⁸ Soorlu inersimasut tamarmik assigiimmik isikkoqarneq ajortut, anersaakkut inersimal­luartut pissuserineqar­tussanik ersersitsinissamut tunngatillugu assigiin­ngitsunik pikkorif­feqartarput. Assersuutigalugu ilaat ilisimas­suseqangaartarput allallu sapiitsuullutik. Ilaallu tunisiumatuujusarput allallu misigin­neqatiginninneq pikkorif­figinerullugu. Aamma anersaakkut inersimal­luartut marluk assingusumik nalaataqartut assigiin­ngitsunik aalajangiisin­naagaluartut aalajangigaat tamarmik najoqqutassianut Biibilimeersunut naapertuus­sinnaapput. Ingammik Biibilimi aalajangersimasumik inatsiseqan­ngikkaangat taamaat­toqartarpoq. Taamaattumik anersaakkut inersimal­luartup allap aalajangigaa isornar­torsior­navianngilaa, ataasioqatigiin­nissarli pingaar­nerpaatissavaa. – Rom 14:10; Kor 1. 1:10.

QANOQ ANERSAAKKUT INERSIMAL­LUARTUN­NGORSIN­NAAVUGUT?

9. Iliuuseqarpiarata anersaakkut inersimal­luartun­ngorsin­naavugut? Nassuiaruk.

⁹ Meeqqat piffissap ingerlanerani peroriar­tortarput inersimasun­ngortarlutillu. Uagulli iliuuseqarpiarata anersaakkut inersimal­luartun­ngornavian­ngilagut. Assersuutigalugu kristumiut Korintimiittut nutaarsiassat nuannersut tusarlugillu upperilerpaat, imermut morsutsin­neqarput, anersaamik illernartumik tunineqarput apustilimillu Paulusimit ilinniar­tinneqarnertik iluaqutigalugu. (ApS 18:8-11) Ukiuni arlalinni kristumiooreeraluarlutik taakkua ilarpassui suli anersaakkut inersimal­luartun­ngorsiman­ngillat. (Kor 1. 3:2) Uagut taakku qanoq ilaarnaveersaarsin­naavagut?

10. Anersaakkut inersimal­luartun­ngussagutta qanoq iliussaagut? (Juudarsi 20)

¹⁰ Siullertut, inersimal­luartun­ngornissarput kissaatigisariaqarparput. ‘Misilit­tagakinnermik iluarinnittut’ allanngorusun­navianngillat anersaakkullu nukangajuas­sallutik. (Uss 1:22) Inersimasun­ngorsimagaluartut nammineq akisussaaf­feqarusunnatik qanoq iliornis­saminnik angajoq­qaaminnit aalajangius­sissunneqartartut assigerusun­ngilagut. Anersaakkut ineriar­tornerput nammineq akisussaaf­figerusupparput. (Juudarsi 20 atuaruk). Suli anersaakkut inersimal­luartun­ngorsiman­ngikkuit Jehova qinnuigiuk ‘piumassuseqalersit­taqqullutit pissatsit­taqqullutillu’. – Flp 2:13.

11. Anersaakkut inersimal­luartun­ngussagutta Jehovap qanoq ikiortarpaatigut? (Efesossimiut 4:11-13)

¹¹ Jehovap naatsorsuutiginngilaa nammineerluta anersaakkut ineriar­tussasugut. ‘Kristusitut inersimal­luartun­ngornis­satsinnut’ ikiorneqar­niassagatta ilagiinni paarsisunik ilinniar­titsisunillu Jehovap tunivaatigut. (Efesossimiut  4:11-13 atuakkit). Aamma ‘Kristusitut eqqarsar­taaseqar­niassagatta’ Jehovap anersaaminik illernartumik ikiortarpaatigut. (Kor 1. 2:14-16) Tamatuma saniatigut iivangkiiliut sisamat Biibilimut allatsippai, taakkulu iluaqutigalugit Jiisusip nunarsuarmiin­nermini eqqarsar­tariaasia, oqaloriaasia iliuusiilu paasisin­naavagut. Jiisusip ilaarneratigut anersaakkut inersimal­luartun­ngorsin­naavugut.

ANERSAAKKUT NERISASSAT TAMUASARISSAT PINGAARUTEQARNERAT

12. “Kristusi pillugu ilinniar­titsissutigineqartut pingaarnerit” suuppat?

¹² Anersaakkut inersimal­luartun­ngussagutta “Kristusi pillugu ilinniar­titsissutigineqartut pingaarnerit” ilikkareerlugit suli ilinniar­tuartariaqarpugut. Ilinniar­titsissutigineqartut taakkua ilagaat peqqissimineq, upperneq, imermut morsutsin­neqarneq toqusunillu makititaaneq pillugit ilinniar­titsissutit. (Hebr 6:1, 2) Ilinniar­titsissutit taamaattut kristumiut upperisaannut tunngaviupput. Taamaattumik apustili Petrusi ullormi piinsimi oqalugiarami taakku eqqartorpai. (ApS 2:32-35, 38) Kristusimut ilinniar­titanngus­sagutta ilinniar­titsissutit pingaarnerit taakku upperisariaqarpagut. Assersuutigalugu Paulusi allappoq toqusunit makititaaneq pillugu ilinniar­titsissummik upperin­nikkusun­ngitsut kristumiutut upperneq tamaat itigartittaraat. (Kor 1. 15:12-14) Tunngaviusulli naammaginagit suli ilinniar­tuartariaqarpugut.

13. Anersaakkut nerisassat tamuasarissat Hebræerit 5:14-imi eqqaaneqartut iluaqutigis­sagutsigit qanoq iliussaagut? (Aamma asseq takuuk).

¹³ Anersaakkut nerisassat tamuasarissat tassaagin­nanngillat Jehovap inatsisai, aammali tassaapput najoqqutassiai. Taakkulu iluaqutigalugit Jehova qanoq isumaqarnersoq paasisin­naavarput. Nerisassat taakku iluaqutigis­sagutsigit Biibilimik misissueq­qissaar­tariaqarpugut, atuakkagut eqqarsaatigeq­qissaar­tariaqarpagut sapinngisatsinnillu ilikkakkagut maleruarlugit. Taamaalilluta sungiusarlutalu Jehovap iluarisaanik aalajangiinissarput ilikkas­savarput. c – Hebræerit 5:14 atuaruk.

14. Paulusip Korintimiut anersaakkut inersimal­luartun­ngornis­saannut qanoq ikiorpai?

¹⁴ Anersaakkut inersimal­luanngitsut Biibilimi  aalajangersimasumik inatsiseqan­ngikkaangat eqqortumik aalajangiuminaatsitaqartarput. Inuit ilaat eqqarsartarput qanorluunniit iliuuseqarsin­naallutik. Allat inatsimmik piumasaqartarput, uffa pisariaqan­ngikkaluartoq. Assersuutigalugu kristumiut Korintimiittut Paulusi aperisimagunarpaat nerisassat guutipilunnut pilliutigineqartut nerisin­naaneraat. Qanoq iliornis­saannik allaffiginagit Paulusip nassuiarpaa kinaluunniit nalunngeqatigin­nissutini tunngavigalugu ‘toqqaasin­naatitaasoq’. Ilerasuutaan­ngitsumik allanullu naakkius­sutaanngitsumik aalajangiinias­sammata najoqqutassiat Biibilimeersut iluaqutigisin­naasaat eqqaavai. (Kor 1. 8:4, 7-9) Taamaalilluni Paulusip Korintimiut anersaakkut inersimal­luartun­ngornis­saannut ikiorpai. Tassa inuit allat naatsorsuutiginagit imaluunniit inatsisis­sarsiuin­naratik Biibili tunngavigalugu namminneq aalajangiinias­sammata ikiorpai.

15. Kristumiut hebræerit anersaakkut siumukar­niassammata Paulusip qanoq ikiorpai?

¹⁵ Paulusip kristumiunut hebræerinut allatai ilinniarfigil­luarsin­naavagut. Taakkua ilaat anersaakkut siumukarnatik anersaakkut nerisassat ‘tamuasarissat pinnagit immuk pisariaqar­teqqilersimavaat’. (Hebr 5:12) Ilagiit aqqutigalugit Jehovap ilinniar­titsissutigisai nutaajusut paasinagillu akuerisiman­ngilaat. (Uss 4:18) Assersuutigalugu kristumiut juutiusut ilarpassui Moorsisip inatsisai, ukiut 30-t missaat tamatuma siorna Kristusip pilliutaa tunngavigalugu atorunnaareeraluartut, suli maleruar­neqassasoraat. (Rom 10:4; Tit 1:10) Periarfis­saqaraluarput ukiut 30-t iluanni eqqarsar­tariaatsiminnik allannguinis­saminnut. Paulusip ilumoortut itisuut ilinniar­titsissutigisani akuerinias­sammatigit ikiorniarsarivai. Allataalu iluaqutigalugit paasivaat kristumiut Jehovamik guutisioriaasiat juutit guutisioriaasiannit pitsaanerusoq juutinillu akerlilersor­neqaraluarlutik oqaluus­siuarnis­saminnut sapiillisin­neqarlutik. – Hebr 10:19-23.

ANERSAAKKUT INERSIMAL­LUARTUUNERPUT SOOQ SULISSUTIGIUAS­SAVARPUT?

16. Anersaakkut inersimal­luartun­ngoreersimagaluarluta susariaqarpugut?

¹⁶ Anersaakkut inersimal­luartun­ngornissarput ilungersuutigisariaqarparput sulissutigiuarlugulu. Inersimal­luartuujuas­saguttalu imminut tatigival­laassan­ngilagut. (Kor 1. 10:12) ‘Imminut misilit­tuartariaqarpugut’ paasiniarlugu  anersaakkut siumukar­tuarnerluta. – Kor 2. 13:5.

17. Paulusip Kolossimiunut allakkamini anersaakkut inersimal­luartuujuarnissap pingaaruteqarnera qanoq ersersippaa?

¹⁷ Paulusip Kolossimiunut allakkamini anersaakkut inersimal­luartuujuarnissap pingaaruteqarnera eqqartoqqippaa. Kolossimiut anersaakkut inersimal­luartun­ngoreeraluartut inuit allat eqqarsar­tariaasiannit tigusarineqaq­qunagit Paulusip mianersoqquai. (Kol 2:6-10) Aamma Epafrasip ilagiin­niittut ilisarisimal­luakkani ‘inersimal­luartuujuar­niassammata’ qinnuttuarpai. (Kol 4:12) Qanoq ilinniarfigaarput? Paulusip aamma Epafrasip paasivaat anersaakkut inersimal­luartuujuas­sagaanni nammineq iliuuseqarnissaq Guutimillu ikiorneqarnissaq pisariaqartut. Kissaatigaat Kolossimiut anersaakkut inersimal­luartuujuassasut qanorluunniit unamminiar­nartunik nalaataqaraluarlutik.

18. Qanoq pisoqarsinnaava? (Aamma asseq takuuk).

¹⁸ Paulusip hebræerit mianersoqquai anersaakkut inersimal­luartup Guutimit iluarisaanini annaasinnaagaa. Kristumiup uummataa ima mannger­tigilersinnaavoq allaat allamik isumataarsin­naajunnaarluni Guutimillu isumakkeerfigineqarsin­naajunnaarluni. Hebræerit qujanartumik taamaas­simanngillat. (Hebr 6:4-9) Nalitsinnimi unittoorsimallutik ilaajun­naarsitaasimal­lutilluunniit kingusin­nerusukkut peqqissimisut? Maniguullutik peqqissimigamik ersersippaat Guutimit iluarisaajun­naartunit Paulusip allaatigisaanit allaanerullutik. Soorunalimi Jehovamut utereerunik taassumannga ikiorneqar­nissartik akuerisariaqarpaat. (Ez 34:15, 16) Imaassinnaavoq utoqqaanertat Nalunaajaasoq inersimal­luartoq aperigaat utersimasoq Jehovamut qanimut attaveqaq­qilerniassammat ikiorsin­naaneraa.

19. Suna anguniagaris­savarput?

¹⁹ Anersaakkut inersimal­luartun­ngornissat sulissutigigukku anguniakkat angusinnaavat! Anersaakkut nerisassat tamuasarissat pisakkit, Jehovallu eqqarsar­tariaasia ilaarneruniarlugu iliuuseqarit. Anersaakkullu inersimal­luartun­ngoreeruit inersimal­luartuujuarnissat sulissutigiuaruk.