1. Ihi i kingila Jihova kokwetu?

 KIMA kimoxi ki bhekela kisangusangu kyadikota ku dikaza, o kithangana kyoso kya avwala o mona ni sawidi yambote. Sumbala o jitata, a zolo o mona, ene kamesena kwila mwene usuluka mu kukala kabwetele. Mu kidi, ene eji thandanganya kyavulu se o mona ukamba o kukula. Kyene we kimoxi ni Jihova. Mwene usanguluka kyoso ki tumateka kudilonga yalungu ni mwene, maji kamesena kwila tusuka ngo bhu dimatekenu. (1 Ko. 3:1) Muveji dya kiki, mwene ututendelesa phala tukale tu “adyakime” mu nzumbi.—1 Ko. 14:20.

2. Ihi itwanda dilonga mu milongi yiyi?

² Ihi ilombolola o kukala mwadyakime mu nzumbi? Ihi itwatokala kubhanga phala kukala tu Jikidistá jakulu mu nzumbi? Kyebhi o kudilonga o milongi ya zongo ya Bibidya, itukwatekesa kukula mu nzumbi? Mukonda dyahi kitwatokala kuxinganeka kwila twakulu kya mu nzumbi, ni kwila kitwabhingi dingi kubhanga nguzu phala kukolesa o ukamba wetu ni Jihova? O milongi yiyi, yanda tambwijila o ibhwidisu yiyi.

IHI ILOMBOLOLA KUKITUKA KIDISTÁ WAKULU MU NZUMBI?

3. Ihi ilombolola o kukala mwadyakime mu nzumbi?

³ Mu Bibidya, o kizwelu kyolungulule “mwadyakime,” mu dimi dya Ngeleku, kitena we kulombolola “kukula,” “kuyuka,” ni “kutenena.” a (1 Ko. 2:6) Kala o kabwetele kaya ni kukula bhofele-bhofele, kate kya kituka mwadyakime, kyene we kimoxi n’etu, twatokala kusuluka mu kukolesa o ukamba wetu ni Jihova. Mu  kubhanga kiki, twanda kituka tu athu twakulu mu nzumbi. Maji ne-mwene se twala kya tu adyakime mu nzumbi, twatokala hanji kusuluka mu kukula. (1 Ti. 4:15) Etwenyoso, kate mwene o minzangala, tutena kukula mu nzumbi. Maji kyebhi ki tutena kwijiya kwila twakulu mu nzumbi?

4. Kyebhi ki weji jimbulula o Kidistá wakulu mu nzumbi?

⁴ O Kidistá wakulu mu nzumbi, yo ubhanga yoso i mubhinga Jihova muveji dya kubhanga o ima mu ukexilu wê. Kidi kwila, mukonda dya kukala mukwa ituxi, mwene wanda tondala. Maji ne kiki, kizuwa ni kizuwa, mwene ubhanga nguzu phala kuxinganeka ni kubhanga o ima kala kyandala Nzambi. Mwene uzwata o ukexilu wa ubhe anga ubhanga jinga yoso, phala o ixinganeku yê ilunge ni ixinganeku ya Jihova. (Efe. 4:​22-24) Mwene udilonga kubatula o maka ni unjimu, mu kuxinganeka mu itumu ni mu ijila ya Jihova. Mu kiki, mwene kabhingi kwila a mubhana itendelesu yavulu, i mutangela ihi yatokala o kubhanga. Kyoso kyasola kubhanga kima, mwene ubhanga yoso yatena phala kuditunda kyambote.—1 Ko. 9:​26, 27.

5. Ibhidi yebhi itena kudibhana-nayu o Kidistá kakulu mu nzumbi? (Efezu 4:​14, 15)

⁵ Ku mbandu yamukwa, o Kidistá ukamba kukula mu nzumbi atena kumunganala ni lusolo, bhukaxi ka unjimu wa athu. Mwene utena kuxikina ku athu ene mumwanga jinjimbu jamakutu, jimbwembwe, ni misoso ya makutu mu mitelembe. Mba-phe atena kumunganala ku akwa kulungulukila o kidi. b (Tanga Efezu 4:​14, 15.) Mwene utena kukwatela lwimbi ku akwa, kubhanga jimvunda, mba kukala ni njinda ni lusolo. Mu ithangana yavulu, kyoso kyadibhana ni tendasá, mwene ubhanga ima yayibha.—1 Ko. 3:3.

6. Mukonda dyahi tutena kusokesa o kukula mu nzumbi ni kukula kwa mon’a ndenge? (Tala we ofoto.)

⁶ Kala ki twamono kudima, o Bibidya isokesa o kukula mu nzumbi, ni kukula kwa muthu kate kya kituka mwadyakime. O mon’a ndenge kejiya ima yavulu, mukonda dya kiki wabhindamena mwadyakime phala kumulanga ni kumwendesa. Mu kifika, o mama utena kubhinga kwa mon’ê wa muhatu wamukwenda-nê, phala kumukwata ku lukwaku mu kumatuka o kikoka. Kyoso o kakilumba kyaya ni kukula, o mama utena kumwehela kumatuka o kikoka ubheka we, maji ne kiki, mwene uya ni kumulembalesa kwila watokala kutonginina kyambote mu jimbandu,  ande dya kumatuka o kikoka. Kyoso o mona kya kituka mwadyakime, mwene wandatena kya kubhanga o ima yiyi ubheka we. Kala o mon’a ndenge, wabhindamena kikwatekesu kya adyakime phala kadite mu kilwezu, o Kidistá kakulu mu nzumbi, ithangana yoso wabhindamena o kikwatekesu kya Jikidistá akulu mu nzumbi, phala kulenga o ilwezu yeji zanga o ukamba we ni Jihova. Ku mbandu yamukwa, o Jikidistá akulu mu nzumbi, kyoso kyabhinga kusola kima, mba kubatula maka, ene axinganeka kyambote mu Mak’a Nzambi phala atene kumona ihi ibanza Jihova. Mu kusuluka, ene abhanga o kima kyatokala.

7. O kwila o Jikidistá akulu mu nzumbi abhindamena kikwatekesu kya akwa?

⁷ O kwila kiki kilombolola kwila, o Kidistá wakulu mu nzumbi nuka wanda bhindamena kikwatekesu kya akwa? Kana, kikyene. Sayi ithangana, o Jikidistá akulu mu nzumbi, abhingi we kusota kikwatekesu. Maji o muthu wamukula mu nzumbi, nange umesena kwila, akwa ene amutangela se ihi yatokala o kubhanga mba ene amusolela bhu kididi kyê. Ku mbandu yamukwa, kyoso o Kidistá wakulu mu nzumbi, kyabhinga kikwatekesu kya akwa ala dingi ni unjimu ni kutetuluka, mwene kakingila kwila akwa ene amusololela bhu kididi, ni kwila mwene watokala “kwambata o kimbamba kyê.”—Nga. 6:5.

8. Mu maukexilu ebhi o Jikidistá jakulu mu nzumbi kadifu?

⁸ Kala o adyakime kadifwangana mu ukexilu wa xitu, kyene we kimoxi, o Jikidistá joso kala ni idifwa imoxi. Mu kifika, amoxi ala ni unjimu wavulu, akamukwa ala ni kuswina kwavulu. Amoxi aditunda kyambote mu ukexilu wa kubhana, akamukwa a ditunda kyambote mu kusuwa o mbote ya akwa. Ku mbandu ya mukwa, Jikidista jiyadi a kulu mu nzumbi a tena kudibhana ni maka amoxi, maji kala muthu utena kwa batula mu ukexilu wengi, sumbala kiyadi kya, akibhanga mwene mu kukayela o Bibidya. Kiki kibhita benge-benge mu kubatula maka alungu ni kitongolwelu. Kyenyiki, seku muthu wanda fundisa mukwa se o ibanzelu kiyadifu. Maji muveji dya kiki, ene bhanga yoso phala kukala kumoxi.—Lom. 14:10; 1 Ko. 1:10.

IHI I TWATOKALA O KUBHANGA PHALA KUKULA MU NZUMBI?

9. O kwila tutena kukula mu nzumbi se kubhanga kima? Jimbulula.

⁹ O mon’a ndenge ukula kyoso o kithangana kiya ni kubhita, mwene kabhingi kubhanga kima, maji phala kukula mu nzumbi kwabhingi kubhanga nguzu. Mu kifika, o jiphange mu mbanza ya Kolindu, axikina o njimbu yambote, a batizala, a tambula nzumbi ikola, ya akatula mbote mu itendelesu ya poxolo Phawulu. (Ika. 18:​8-11) Ne kiki, mu kubhita mivu, avulu mudya kakudile luwa mu nzumbi. (1 Ko. 3:2) Ihi itutena kubhanga phala o kilwezu kiki kikibhite n’etu?

10. Ihi itwatokala kubhanga phala kukula mu nzumbi? (Juda 20)

¹⁰ Phala kukula mu nzumbi, kya dyanga, twatokala kukala ni vondadi ya kubhanga kiki. O yo awabhela o “ulalu,” anga amesena kusuluka mu kukala an’andenge mu nzumbi, nuka anda tena kukula mu nzumbi. (Jisa. 1:22) Etu kitwamesena kukala kala yo ala adyakime kya, maji a suluka hanji mu kukingila kwila o jitata jâ, ene abatula o maka mba a asolela bhu kididi. Muveji dya kiki, etu twamesena kukumbidila o kikalakalu kyetu kya kukolesa o ukamba wetu ni Jihova. (Tanga Juda 20.) Se wamubhanga hanji nguzu phala kukula mu nzumbi, samba kwa Jihova phala a kubhane “o hânji ni kutena kwa kubhanga o vondadi yê.” —Fil. 2:13.

11. Kikwatekesu kyebhi ki tubhana Jihova phala tukule mu nzumbi? (Efezu 4:​11-13)

¹¹ Jihova kamesena kwila tukula mu nzumbi mu nguzu yetu ngo. Mwene watubhana tufunga ni alongexi mu kilunga, atukwatekesa kukituka tu “adyakime” mu nzumbi, phala tukale ni ukamba wambote ni Jihova, “anga tukula katé mukitala  kyatenena kya Kidistu.” (Tanga Efezu 4:11-13.) Jihova utubhana we o nzumbi ye ikola, phala kutukwatekesa kukala ni “kilunji kya Kidistu.” (1 Ko. 2:​14-16) Ku mbandu yamukwa, Nzambi watubhana madivulu awana a Bibidya, atukwatekesa kutendela kyebhi Jezú kyexile mu xinganeka, kuzwela ni kubhanga o ima, kyoso kyexile mu ixi. Mu kukayela o ukexilu wa kuxinganeka ni wa kubhanga o ima wa Jezú, eye wanda tena kukala Kidistá wakulu mu nzumbi.

O VALOLO YA KUDYA KWA NGUZU MU NZUMBI

12. Ihi ilombolola “o maulongelu a dyanga alungu ni Kidistu”?

¹² Phala kukula mu nzumbi, kitwatokala kudilonga ngo “o maulongelu a dyanga alungu ni Kidistu,” kifwa, o ima ya dyanga itwadilongo yalungu ni Jezú. O milongi yiyi ya dyanga, yalungile ni kudyela o ituxi, kixikanu, batizu, ni difukunukinu dya madifundu. (Jih. 6:​1, 2) Yiyi yene o milongi ya dyanga ixikina o Jikidistá joso. Kyoso poxolo Phetele kyabokela o athu mu Pendekoxi, wazwela yalungu ni milongi yiyi. (Ika. 2:​32-35, 38) Etu twatokala kuxikina o milongi yiyi ya dyanga, phala kukituka tu maxibulu a Kidistu. Mu kifika, Phawulu wadimuna kwila, muthu woso udituna o milongi ya difukunukinu, katena kuzwela kwila mukayedi wa Jezú. (1 Ko. 15:​12-14) Maji, etu kitwatokala kusanguluka mu kwijiya ngo o ilongesu ya dyanga ya Bibidya.

13. Ihi itwatokala kubhanga phala kukatula mbote mu kudya kwa nguzu kwotumbule mu divulu dya Jihebelewu 5:14? (Tala we ofoto.)

¹³ O Kudya kwa nguzu mu nzumbi kikwasokela ni milongi ya dyanga, mukonda o kudya kwa nguzu kikwalungu ngo ni kwijiya o ijila ya Jihova, maji we ni itumu yê, itukwatekesa kutendela o ixinganeku yê. Phala kukatula mbote mu kudya kuku, twatokala kudilonga, kuxinganeka mu ima itudilonga, ni kubhanga yoso phala ku ikumbidila. Mu kubhanga kiki, etu tudilonga kusola o ima isangulukisa Jihova. c—Tanga Jihebelewu 5:14.

14. Kyebhi Phawulu kyakwatekesa akwa Kolindu kukula mu nzumbi?

¹⁴ O Jikidistá kakulu mu nzumbi kya abhonza kyavulu kusola ni unjimu, se seku kijila kya Bibidya, kyalungu ni maka amudibhana-nawu. Se seku kijila kya Bibidya, amoxi abanza kwila  atena kubhanga kabasa kima kyamesena. Akamukwa atena kusota kijila, ne-mwene se o maka kabhingi kijila. Mu kifika, o Jikidistá mu mbanza ya Kolindu, nange abhingile kwa Phawulu, phala ku abhana ijila phala kwijiya se eji tena kudya o kudya kwosatele o iteka mba kana. Muveji dya ku atangela ihi yatokalele o kubhanga, Phawulu walondekesa kwila, kala muthu wala ni “ufolo wa kusola” mu kukayela o kitongolwelu kye. Mwene watumbula itumu ya Bibidya yeji ku akwatekesa kubatula maka ni unjimu, sé kuditatela, sé kubhangesa we akwa kutondala. (1 Ko. 8:​4, 7-9) Kyenyiki, Phawulu wexile mukwatekesa akwa Kolindu kukula mu nzumbi, phala atene kukalakala kyambote ni kitongolwelu kyâ, muveji dya kukingila akwa ku atangela yatokalele o kubhanga mba kusota ijila.

15. Kyebhi Phawulu kyakwatekesa o Jikidistá Jihebelewu kukula mu nzumbi?

¹⁵ Tutena kudilonga disá dyamukwa dya katunda mu maka asoneka Phawulu phala o Jikidistá Jihebelewu. Amoxi mudyâ, kasulukile mu kukolesa o ukamba wâ ni Jihova; mu kidi, ene avutukile mu ku “bhindamena dingi lete kana o kudya kwa nguzu [mu nzumbi].” (Jih. 5:12) Ene kadikwatenena mu kudilonga ni kuxikina o ima ya ubhe yexile mwalonga Jihova bhukaxi ka kilunga. (Jisa. 4:18) Mu kifika, Jijudé javulu akitukile Jikidistá, exile hanji mu kayela o Kijila Kya Mozé, sumbala 30 a mivu kudima, o sata ya kukula ya Jezú, yabhinganesene kya o Kijila kiki. (Lom. 10:4; Tit. 1:10) O 30 a mivu yabhitile, exile kithangana kyasoko phala ku akwatekesa kutendela kwila, ene kabhindamene dingi kukayela o Kijila! Mu kiki, mu kithangana kyenyokyo Phawulu wexile mu akwatekesa kuxikina o milongi yazongo yexile mu alonga. O mukanda we wa akwatekesa kumona kwila, o ukexilu wa ubhe wa kubheza wasokejekele Jihova bhukaxi ka Jezú, wabetele-dingi-kota. Kiki kya abhana we o kuswina kwa kusuluka mu kuboka, sumbala ni izukutisu ya Jijudé.—Jih. 10:​19-23.

MUKONDA DYAHI TWABHINGI KUSULUKA MU KUBHANGA NGUZU PHALA KUKULA MU NZUMBI?

16. Ne-mwene se twakulu kya mu nzumbi, ihi dingi itwatokala kubhanga?

¹⁶ Etu kitwatokala ngo kubhanga nguzu phala kukula mu nzumbi, maji we twatokala kusuluka mu kulanga ukexilu yu. Mukonda dya kiki, twatokala kudilanga phala kitubanze kwila twakulwetu kya mu nzumbi, ni kwila kitwabhingi dingi kukolesa o ukamba wetu ni Jihova. (1 Ko. 10:12)  Etu twatokala kusuluka mu “ku di tonginina” mudyetu phala kumona se twamusukula mu kukula mu nzumbi.—2 Ko. 13:5.

17. Kyebhi o mukanda wa Phawulu ku akwa Kolose, ulondekesa kwila twabhingi kusuluka mu kukula mu nzumbi?

¹⁷ Mu mukanda we ku akwa Kolose, Phawulu walondekesa dingi kwila twatokala kusuluka mu kukula. Sumbala akwa Kolesa exile kya Jikidistá jakudile mu nzumbi, Phawulu wa atangela phala kudilanga, phala ka anganale ku ixinganeku ya akwa mundu. (Kol. 2:6-10) Epafala, wejidile kyambote o athu atokalele mu kilunga kyenyokyo, wexile musamba kyavulu, phala ene asuluke mu kukala Jikidistá jakulu mu nzumbi. (Kol. 4:12) Ihi itwadilongo? Phawulu ni Epafala, ejidile kwila phala kusuluka mu kukula mu nzumbi, twabhingi kubhanga nguzu, twabhingi we o kikwatekesu kya Nzambi. Ene a mesenene kwila o akwa Kolose asuluka mu kukula mu nzumbi, sumbala ni ibhidi yexile mudibhana-nayu.

18. Ihi itena kubhita ni Kidistá wakulu mu nzumbi? (Tala we ofoto.)

¹⁸ Phawulu wadimuna o Jihebelewu kwila, o Kidistá wakulu mu nzumbi, se kadilange, utena kudibotesa o ukamba we ni Jihova kate ku hadya ni hadya. Se o Kidistá udituna kubelesela Jihova, kiki kitena kumubhangesa kudisandula kwa Mwene, anga ulembwa kudyela ni kutambula o muloloki wa Nzambi. Tusanguluka mu kwijiya kwila, o Jihebelewu kadisandula kwa Nzambi mu ukexilu yu. (Jih. 6:4-9) Maji ihi i twamba yalungu ni yo azoza mu nzumbi, mba yo a ata mu kamukonde, maji ku pholo dya kwenda adyela? O kulenduka kwâ mu kudyela, kulondekesa kwila ene kadifu ni yo a atumbula kwa Phawulu kwila eji dibotesa ukamba wa ni Nzambi. Maji kyoso kyavutuka mu kilunga, ene abhidamena o kikwatekesu kibhana Jihova. (Ize. 34:15, 16) O tufunga atena kubhinga ku jiphange ja mala mba ja ahatu akulu mu nzumbi, phala ku akwatekesa kukolesa dingi o ukamba wâ ni Jihova.

19. Mbambe yebhi itwatokala kusuwa?

¹⁹ Se eye wamubhanga nguzu phala kukula mu nzumbi, utena kukumbidila o mbambe yiyi! Suluka mu kudilonga o milongi yazongo ya Bibidya ni kubhanga nguzu phala kuxinganeka kala kixinganeka Jihova. Ku mbandu ya mukwa, se eye wakulu kya mu nzumbi, bhanga yoso i utena phala usuluke ni ukexilu yu tunde kindala kate ku hadya ni hadya.