1. I biny bidy Yehow wiitulomb?

 CIISANG cya musangal muvul bwa biin maluw i diib didyobw balel mwaan. Ning mudy balel bakat mwaan aababw mulengel oow, kabiish bakaam neey ashaal teng mwaan-mutofw kay ukuluuh. Cya biin bidy mwa kwiibatond bab batal mwaan oow kaciy ukuluuh. Bya mushind aakaabumw, ning mudy Yehow umvw musangal bwa mutudy batang kulong myand yimutaatal, kiish Ukaam neey twiimanyin teng hiinaah. (1 Kor. 3:1) Ki wiituloolomb bwa twiikal biin ‘Krist bakuluuh.’—1 Kor. 14:20.

2. I biny bitwiiyiiy kukontonon mu ciin bwaal eecy?

² Kwiikal mwiin Krist mukuluuh kumvumvwiij biny? I biny bitudy mwa kulong bwa kushaal biin Krist bashimat? I mudimw kaay udy nend byaakudy bikasakan bya mu spirit bwiitut kukuluuh? Bwabiny bikaam tulek kuhit kwiiteekel micim? Mu ciin bwaal eecy, twiiyiiy kukontonon maalabul ma majooj aam.

KWIIKAL MWIIN KRIST MUKULUUH KUMVUMVWIIJ BINY?

3. Kwiikal mwiin Krist mukuluuh kumvumvwiij biny?

³ Mu Bibl mwaak wa mu ciin Krek udyobw baalabul neey “mukuluuh” udy cikwaabw mwa kumvwiij neey “mushimat,” eecy “mukumban.” a (1 Kor. 2:6, NWT) Tushaashaal biin Krist bakuluuh eecy bashimat, atwaalaaluk ku butofw ni batal ku bukuluuh mu myand ya mu spirit. Biin-biin, ning tut baman kushaal bashimat bikaam tutungunuk teng ni kuy kuuhal mu myand ya mu spirit. (1 Tim. 4:15) Woos wa kutudy, ning bacidy baasand, bady mwa kushaal biin Krist bashimat. I mushind kaay utudy mwa kumanyik neey mwiin Krist oow i mushimat?

4. I biny bileeleej neey mwiin Krist oow i mushimat?

⁴ Mwiin Krist mushimat i muut udy ni shikacil uheehetangan ni  may moos ma Mawej ni kiish usungul madyey mukat bwa kukooyel ulek makwaabw. Biin-biin, bu mudyey muut ukiish muwaakan, udy mwa kwiiy kulong bilem. Cikwaabw, uleeleej mu shikacil indiy a mafuk moos mudyey ulang, ni ulong myand bilondeshel lukat lwa Mawej. I muvwaal buumuut buhyaabuhy, ni wiikaakashishomw misang yoos bwa kwiikaley ulaang bu mulaalang Mawej. (Ef. 4:22-24) I mulong bwa kwangat mahangadik ma meej mashimacil a mikenj ni may matam bya Yehow, ni kiish ukaamoh bend mulong-long a mikenj bwa kumuleej cidyey mwa kulong. Hadyey wangat dihangadik, wiikaakashishomw bwa kwiidikumbaj.—1 Kor. 9:26, 27.

5. Bilondeshel Biin Efez 4:14, 15 mwiin Krist ukiish mushimat udy mwa kutwiilangan ni buuhund kaay?

⁵ Cikwaabw, mwiin Krist ukiish mushimat bady mwa kumuhambwiish biheehel ku “malongweesh maloolongweesh biin makos” ni “myand ya budimuk yifwiifwiikakanyobw.” Misang yikwaabw udy mwa kwiitab myand ya makos yimwaamwangalajobw kudy baat, ni miisamb ya makos ya ku enternet eecy bady mwa kumudingomw kudy batontolody. b (Bal Biin Efez 4:14, 15.) Udy mwa kutang kumvwiil bakwaabw kacik, kwiikal naab bilumbw, kufulul mund biheehel ni kulong teng myand yibiih hadyobw bamuteet.—1 Kor. 3:3.

6. Bwabiny tudy mwa kufwanyikij mushind udy mwaan ukuluuh ni mushind udy muut ushimat mu spirit? (Tal cikwaabw cifwaatul.)

⁶ Teng mudyobw biibileej, Diiy dya Mawej difwaafwanyikij mushind udy muut ushimat mu myand ya mu spirit ni mushind udyaakal mwaan ukasakan ushaal muut mukuluuh. Kudy myand yivul yidy mwaan-mutofw kay mumanyik, ki bwabingany bikaam iikal ni muut mukuluuh bwa kumulam ni kumulombol. Twangat cileejel, maam udy mwa kwambil mwaan indiy mwaan-mukaj bwa kumukwaatey ku cikam adyobw basambuk njil. Ki hady mwaan oow ukuluuh, maam indiy udy mwa kumulek bwa asambuk njil kaayend, ki wiiyiiy teng kumuvulwiij bwa iikal mudimuk bwa mashiny mahiihit. Hady mwaan ukasakan ushaal muut mukuluuh udy mwa kwiiyeehush ku buuhund yiy kaayend. Teng bu mudy mwaan-mutofw ukaam dyambulwiish dya baat bakuluuh bwa kweehuk buuhund, mwiin Krist ukiish mushimat ukaakaam teng dyambulwiish dya biin Krist bashimat bwa kumwambulwiish bwa kweehukey buuhund ni kwangatey  mahangadik malengel. Ki hady biin Krist bashimat bakaam kwangat dihangadik balaalangil ha may matam ma mu Bibl bwa kumanyik mudy Yehow utal bwaal aabw ni balond may aam.

7. Biin Krist bashimat bakaakamok dyambulwiish dya bakwaabw eeny?

⁷ Byumvumvwiijok neey mwiin Krist mushimat kiish mwa kukaamok dyambulwiish kudy muut mukwaabw eeny? Waakweeh. Misang yikwaabw biin Krist bashimat bakaakaam byaabw dyambulwiish. Ki muut ukiish mushimat udy mwa kukaam bwa bakwaabw bamwambil cya kulong eecy mwa kwangat dihangadik didyey mwa kwiiyangacil kaayend. Ki mwiin Krist mushimat wiiyiiy kukaam meej ni dyambulwiish dya bakwaabw ni i mumanyik neey Yehow i mutakamin neey wiiyiiy ‘wiiyangacil bwindiy bujit.’—Kal. 6:5.

8. I mu mushind kaay udy baat bashimat bashilangan?

⁸ Teng mudy baat bakuluuh bashiilangan, biin Krist bashimat i bashiilangan byaab ku biikadil bya mu spirit bu mudy: Mucim mukasakan, mucim a kuh, ni kwiiteek ha cyaab cya bakwaabw. Cikwaabw, hady biin Krist bashimat babidy bahet bwaal bwa mushind aakaabumw, bady mwa kwangat mahangadik mashiilangan, ki moos miikal mahetangan ni Diiy dya Mawej. Biloolongek nook nangnang bwa myand yitaatal mucim a mund a muut. Bu mudyobw bamanyik naak, baleelek kulumbulwiishangan ning mahangadik maababw mashiilangan. Ki baloolong ni mwaababw moos bwa kushaal mu kaacyumw.—Rom 14:10; 1 Kor. 1:10.

I BINY BITUDY MWA KULONG BWIITUT KUSHAAL BIIN KRIST BASHIMAT?

9. Tudy mwa kukuluuh ni kushaal bashimat mu myand ya mu spirit katuy biikashishomw eeny? Umvwiij.

⁹ Mwaan-mutofw ukuukuluuh hady mivw yend ni kuvul. Ki muut ning waakaabumw kiish mwa kukuluuh ni kushimat mu myand ya mu spirit yiy kay mwiikashishomw. Cileejel biin-kweet ba mu Korent biitabil musah mulengel, bahetel baatiisumw, spirit mujilang ni malongweesh mavul ku myand yaakady mupostol Pool wiibalongweesh. (Yil. 18:8-11) Cikwaabw kuunyim kwa mivw bab baman kuhet baatiisumw, bavul bacyaakady teng kabay banj kushimat. (1 Kor. 3:2) I mushind kaay utudy mwa kweehuk kaleng bwiitut kukuluuh mu myand ya mu spirit?

10. Bilondeshel Yuud 20 bikaam tulong biny bwiitut kushaal bashimat?

¹⁰ Bwa kushimat, bikaam twiikal ni mucim a kushaal baat bashimat. Ba “bihing-hing,” i bakat kushaal teng batofw mu myand ya mu spirit ni kabaakuyoh bend kuuhal bwa kushaalobw bashimat. (Tus. 1:22) Katwiish bakat kufwaanok baat bamweemweek bakuluuh ki batungunuk ni kweeyeleel balel baababw bwa kwiibangacilobw dihangadik. Ki hamut a kulong nook, tudy bakat kwiiyangacil bujit bwiitut kutal mushind kaay utudy mwa kuy kuuhal mu myand ya mu spirit. (Bal Yuud 20.) Uw mwiikal utungunuk ni kwiikashishomw bwa kwiikal mushimat, sambil Yehow bwa akwaakish “lukat ni bukash bwa kulong myand.”—Fili. 2:13, NWT.

11. Bilondeshel Biin Efez 4:11-13, i biny bidy Yehow wiitwaakish bwa kwiitwambulwiish bwiitut kushaal bashimat?

¹¹ Yehow kiish ukaamoh bend bwa tukuluuh ni tushimat tut kaayeet. I mwiitwaakish balamy ni balongweesh mu cisumbw balongolol bilengel bwa kwiitwambulwiish bwiitut kushaal ‘bakuluuh’ mu myand ya mu spirit, bwa ‘kufik ku kwiikal bu mudy Krist.’ (Bal Biin Efez 4:11-13.) Yehow wiitwambambulwiish cikwaabw ni spirit mujilang indiy bwiitut kwiikal ni “meej ma Krist.” (1 Kor. 2:14-16) Cikwaabw, Mawej usakil baat bwa kufundobw mikand yinaay ya misah yilengel ku bukash bwa spirit mujilang bwa kwiituleej mwaakady Yeez ulang, uleeb ni ulong myand hacyaakadyey ha bulab. Hawendend ni kwiidikij mushind waakady Yeez uleeb, ulang ni  ulong myand, udy mwa kukumbaj kiihacil kiibuh bwiibuh kushaal mwiin Krist mushimat.

MUDIMW A BYAAKUDY BIKASAKAN BYA MU SPIRIT

12. “May ma butambwiil ma musah a Krist” i biny?

¹² Bwiitut kuy kuuhal bwa kushaal biin Krist bashimat, bikaam tulek cikwaabw kwiimanyin teng ha “may ma butambwiil ma musah a Krist,” i bwiin kuleeb neey, malongweesh ma butambwiil matudy balong habitaatal Krist. Cileejel, mu malongweesh ma butambwiil matudy balong mudy, kwaalabul micim, lwiitabij, baatiisumw ni kusanguk. (Ebr. 6:1, 2) Miinaam i mam malongweesh ma butambwiil mady biin Krist boos biitab. Ki bwabiny haakady mupostol Pyeel udiil baat musah mu diifuk dya Pentekoot, uleebel bwa malongweesh aam. (Yil. 2:32-35, 38) Bwiitut kushaal biiyij ba Krist bikaam twiitab malongweesh ma butambwiil aam. Cileejel Pool uleejel neey, woos uleelek kwiitabiij dilongweesh dya kusanguk kwa bafw i mulek kwiitabiij Kirst. (1 Kor. 15:12-14) Bwiitut kushaal bashimat, bikaam tumanyik myand yikwaabw yivul hamut iitut kushaal bimanyin teng a malongweeh ma butambwiil.

13. Bikaam tulong biny bwa kuhet dyambulwiish ku byaakudy bya mu spirit bikasakan bidyobw baleej mu Biin Ebreh 5:14? (Tal cikwaabw cifwaatul.)

¹³ Bishiilangan ni may ma butambwiil, mu byaakudy bikasakan bya mu spirit kamwiish teng mikenj ya Yehow, ki mudy cikwaabw may matam mindiy miitwambambulwiish bwiitut kumvw mushind udy Yehow ulang. Bwa byaakudy eeby kwiitwambulwiish bikaam tulong diiy dya Mawej tulongelomw ni twiidikooyel mu mushind mulengel. Tut balong nook, twiiloolongolol bwiitut kwiikal kwangat mahangadik masaasangeej Yehow. c—Bal Biin Ebreh 5:14.

14. I mushind kaay waakady Pool mwambulwiish biin Korent bwa kushaalobw baat bashimat?

¹⁴ Biin Krist bakiish bashimat bady ni lutat lwa kwangat dihangadik dilengel hadyobw bahet bwaal bukaakaam kulangil ha may matam ma mu Bibl ni bwa kwiimakooyel. Hadyok kakuy mukenj a mu Bibl, bakwaabw bady mwa kulang neey bady mwa kulong cyoos cidyobw bakat kulong. Bakwaabw bady mwa kulomb bwa biibaakish mukenj hadyok kakuy mukenj mumb. Cileejel, biin Krist ba mu Korent  balombel Pool bwa iibambil ning baakady mwa kudy byaakudy bilambul hing. Hamut a kwiibambil cyaakadyobw mwa kulong, Pool waakady mumanyik mudimw waakady nend mucim a mund ni mutwiishiibw neey muut woos udy ni ‘buneem bwa kwiisungwiil myand.’ Uteelel mamw may matam ma mu Bibl maakady mwa kwiibambulwiish bwa kwangatobw dihangadik dyaakady kadiy mwa kulong bwa mucim aabab a mund iibafwiij naay ni kadiy mwa kuhambwiish bakwaabw. (1 Kor. 8:​4, 7-9, NWT) Pool waakady mulongweesh biin Korent bwa kukalobw mudimw ni Diiy dya Mawej bwa kwiikalobw biiyangacil mahangadik kaayaabw hamut a kweeyeleel baat bakwaabw bwa kwiikalobw biibangacil mahangadik ni biibambil cya kulong. Halongeley nook, waakady ukaam bwa kwiibambulwiish bwa kushaalobw bashimat.

15. I mushind kaay waakady Pool mwambulwiish biin Krist biin Ebreh bwa kutungunukobw ni kuy kuuhal mu myand ya mu spirit?

¹⁵ Tuheehetel dilongweesh dikwaabw dya buseeb ku myand yaakady mupostol Pool mufundil biin Krist biin Ebreh. Bakwaabw kabaakadyoh bend batungunuk ni kukuluuh mu myand ya mu spirit. ‘Hamut a kudy byaakudy bikasakan bya mu [spirit], bacyaakady bakaam kwaamw mabeel.’ (Ebr. 5:12) Kabaakadyoh bend balong ni biitab myand yihyaayihy yaakady Yehow wiibalongweesh ku dyambulwiish dya cisumbw. (Tus. 4:18) Cileejel, biin kwiitabij biin Yuud bacyaakady balond may ma Mawej maheeley Moyiiz ning mwaakady mulambw a Yeez muman kuhing ha may aam mivw 30 yiman kuhit. (Rom 10:4; Tiit 1:10) Mivw 30 eey yambulwiishil biin Krist biin Yuud bwa kumvobw neey kabyaakady bikaam bwaababw kutungunuk ni kulond may ma Mawej maheeley Moyiiz! Baat boos babaabal mukand ufundil Pool biin Ebreh ku bukash bwa spirit mujilang bady mwa kujaadik neey mukand oow udy ni byaakudy bikasakan bwa biin Krist. I bwaal bwaakady biin Krist bakaam bwa kukashish lwiitabij lwaabab mu mushind muhyaamuhy a kuhambidil waakady Mawej muteekok bwa kwiibambulwiish bwa kwiikalobw ni mucim mukasakan bwa kutungunukobw ni kudiilangan musah ning mwaakadyok bulwiish bwa biin Yuud.—Ebr. 10:19-23.

LEK KWIITEEKEL MICIM

16. Tut baman kuy kuuhal ni bashaal bashimat bikaam tulong biny bikwaabw?

¹⁶ Bikaam twiikashishomw kiish teng bwiitut  kushaal bashimat ki bwiitut kutungunuk nu kushaal bashimat. Biineeby bikaakaam neey tweehuk kwiiteekel kwa micim. (1 Kor. 10:12) Bikaam ‘tutungunuk ni kwiiteet’ tut kaayeet bwa kujaadik ni tutuutungunuk ni kuy kuuhal.—2 Kor. 13:5.

17. I mushind kaay udy mukand udy Pool mufundil biin Kolos uleej buseeb bwa kutungunuk ni kuy kuuhal?

¹⁷ Mu mukand udy Pool mutumin biin Kolos, wiimaamanyin nang-nang ha buseeb bwa kutungunuk ni kushaal teng bashimat. Ning mwaakady biin Kolos biikal biin Krist bashimat, Pool wiibambiil bwa kwiikalobw badimuk bwa kabalong biibahambwiish ni meej ma baat ba ha bulab. (Kol. 2:6-10) Ni Epafras, waakady mumanyik biin mu cisumbw aamw bilengel, ulombel bikasakan kudy Mawej ‘bwaababw kwiikal bashimat.’ (Kol. 4:12) I biny bituloolongel ku bwaal oobw? Pool ni Epafras baakady bamanyik neey bwa muut kutungunuk ni kushaaley mushimat, byaakady bikaam iikashishomw ni Mawej amwambulwiish. Baakady bakat bwa biin Kolos batungunuk ni kushaal bashimat, eecy biin Krist bakuluuh ning mwaakadyobw bamon makab ni mal.

18. I biny bidy mwa kulongekel mwiin Krist mushimat? (Tal cikwaabw cifwaatul.)

¹⁸ Pool udimushil biin Ebreh neey mwiin Krist udy kay mudimuk udy mwa kujimbaj loos dyanyish dya Mawej. Mucim a mwiin Krist udy mwa kuhah ukaakal ni mushind a kwiifwiij naay ni kwaalabul micim bwa Mawej kumufwiileyok lus. Dyaakaleng biin Ebreh kabaakadyoh bend bahon mu bwaal oobw. (Ebr. 6:​4-9) Tudy mwa kuleeb bicy bwa aab bakaady balek kutweel mu bisangil, balek mudimw a bukajaady eecy badyobw biihat mu cisumbw ki kuunyim kwa mafuk biiy biifwiij naay ni baalabul micim? Bab baalabul micim ni kwiihweekesh koos baleeleej neey kabiish bu baat baakady Pool mufund bwaababw neey baakady mwa kujimbaj dyanyish dya Mawej buyiil. Ki hadyobw bahingomw kudy Yehow, bakaakaam bwa iibambulwiish. (Ez. 34:​15, 16) Bakul bady mwa kulongolol bwa Temw mushimat iibambulwiish bwa kuhetululobw cikwaabw makand ma mu spirit.

19. Bikaam twiikal ni kiihacil kaay?

¹⁹ Biby biikal neey uyaay kuuhal bwa kushaal mwiin Krist mushimat, udy mwa kukumbaj kiihacil kiibuh! Tungunuk ni kudy byaakudy bikasakan bya mu spirit ni long bwa meej mawulaalang miikal mahetangan ni ma Yehow. Uw mwiikal muman ni kushimat, kwiimanyin teng iinaah, long cyoos ciwudy mwa kulong bwa kwiikal teng mwiin Krist mukuluuh.