1. Yisinke a ndindire ko Jehova kwetu?

 SIRUWO simwe esi a vhuru kuhafa unene guhya ntani zinya, kuna kara apa ava mu hampuruka mukeke. Nye nampili ngomu vakondi va hara unene mukeke, awo kapi vana mu harere a twikire kukara ngorooro mukeke. Awo kuvhura va kare nosinka sosinene nsene munawo kapi ana ku kura. Mokulifana, nampili ngomu Jehova a hafa apa a tu tameke kulironga kumuhamena, age kapi ana hara tu hagere poopo. (1 Kol. 3:1) Nye age kuna tu harere tu kare “sikurona” ngoVakriste.​—1 Kol. 14:20.

2. Yisinke natu ka zogera mosirongwa esi?

² Yisinke ayi tanta kukara Mukriste ogu ga kara nelikwatakano lyewa naJehova? Yisinke twa hepa kurugana yipo tu kare Vakriste ava va kara nelikwatakano lyewa naJehova? Ngapi omu kulironga mausili gokonhinhi gomoBibeli, nayi vatera elikwatakano lyetu naJehova li twikire kukura? Ntani morwasinke natu nyokerera po elinenepeko? Mosirongwa esi, tatu ka gwana malimbururo komapuro ogo.

YISINKE AYI TANTA KUKARA MUKRISTE OGU GA KARA NELIKWATAKANO LYEWA NAJEHOVA?

3. Yisinke ayi tanta kukara Mukriste ogu ga kara nelikwatakano lyewa naJehova?

³ MoBibeli nkango zoRugereka ezi va toroka asi “kukara sikurona” kutanta asi kukara “mukondi.” (1 Kol. 2:6) Ngwendi moomu mukeke a twikire kukura dogoro ta ya kara mukondi, nose twa hepa kutwikira kukara nelikwatakano lyewa naJehova. Nampili apa atu ya kara nelikwatakano lyewa naJehova, twa hepa kutwikira, nye kapisi tu hageke. (1 Tim. 4:15) Natuvenye kukwatera mo vanona, kuvhura tu kare nelikatakano lyewa naJehova. Nye ngapi natu yi diva asi twa kara nelikwatakano lyewa naJehova?

4. Ngapi omu no vhura kufaturura muntu ogu ga kara nelikwatakano lyewa naJehova?

 ⁴ Mukriste ogu ga kara nelikwatakano lyewa naJehova kusikisa mo nompango daKarunga ntani kurugana nkenye eyi a mu pura Jehova. Nye morwa kudira kusikilira mo, age nga tura mapuko. Nye nampili ngoso, age ngayi likida nkenye ezuva meparu lyendi asi age kugazara nokurugana yininke kuliza nomu gayi harera Jehova. Age ga dwara muntu gomupe ntani kuhetekera ko kugazara monkedi omu a gazara Jehova. (Efe. 4:22-24) Age ga lironga kutura po matokoro gomawa kuliza nonoveta daJehova ntani nonompango dendi. Yipo nye, kapi ga hepa noveta dononzi edi nadi vhura kumutantera eyi na rugana. Apa a tura po etokoro, age kurugana paapa ga hulira yipo a sikise mo eyi ana tokora.​—1 Kol. 9:26, 27.

5. Yisinke nayi vhura kuhorokera Mukriste ogu ga dira kukara nelikwatakano lyewa naJehova? (Vaefeso 4:14, 15)

⁵ Ano koruha rumwe, Mukriste ogu ga dira kukara nelikwatakano lyewa naJehova, kuvhura kumupukisa “marongo goyimpempa” ntani novarwanesi usili. a (Resa Vaefeso 4:14, 15.) Age kuvhura a zuvhire wopeke mfudu nokudira kulizuvha nawo ndi a handuke usimbu ntani age kuvhura a rugane yininke yoyidona nsene a ligwanekera neheteko.​—1 Kol. 3:3.

6. Kosinke natu fanekesa Mukriste ogu ana kutwikira kukara nelikwatakano lyewa naJehova? (Tara hena efano.)

⁶ Ngomu tuna yi tumbura, Matjangwa kuhetakanesa muntu ogu ana kutwikira kukara nelikwatakano lyewa naJehova komuntu ogu ana kukura yipo a ya kare mukondi. Pwa kara yininke yoyinzi eyi ga dira kudiva munona, yipo nye ga hepa mukurona ogu na vhura kumupopera nokumupitisira. Zinya kuvhura a ninke munendi gomukadona a mu kwate mewoko, ngomu vana kutaguruka sitaura. Ngomu ana kukura munona gomukadona, ozina kuvhura va mu pulisire yipo a taguruke sitaura pwamwene nye nampili ngoso, awo kuvhura va mu diworokese yipo a tare komaruha nagenye komeho a taguruke. Apa munona ogo nga kara mukondi, age nga nyokera po maudigu ogo pwamwene. Ngwendi moomu tupu munona ga hepa evatero kovakurona yipo a nyokere po siponga, Vakriste ava va dira kukara nelikwatano lyewa naJehova nawo va hepa evatero lyokutunda koVakriste ava va kara nelikwatakano lyewa naJehova, yipo  va nyokere po nkenye eyi nayi tura elikwatakano lyawo naJehova mosiponga ntani nokutura po matokoro gomawa. Mokulisiga, apa Vakriste ava va kara nelikwatakano lyewa naJehova ava tura po matokoro, awo kugazadara ko momunene eyi azi uyunga Bibeli yipo va dive omu Jehova a tara yininke. Makura awo kutura pasirugana eyi vana lirongo.

7. Mukriste ogu ga kara nelikwatakano lyewa naJehova kapi ga hepa evatero lyava wopeke ndi?

⁷ Ngoso eyi kutanta asi Mukriste ogu ga kara nelikwatakano lyewa naJehova kapi ga hepa evatero lyava wopeke ndi? Hawe. Vakriste ava va kara nelikwatakano lyewa naJehova nawo poyiruwo yimwe va hepa kupura evatero. Nye muntu ogu ga dira kukara nelikwatakano lyewa naJehova, kundindira kwava wopeke va mu tantere eyi na rugana ndi va mu tulire po etokoro eli ngano ga hepa kutura po mwene. Nye Mukriste ogu ga kara nelikwatakano lyewa naJehova, kupura evatero kwava wopeke ava va kara nounongo ntani noudivi, nye nampili ngoso age ga yi diva asi ga hepa kutura po matokoro gamwene ntani “ga hepa kusimba mudigo gwendi.”​—Gar. 6:5.

8. Mononkedi musinke va lisiga Vakriste ava va kara nelikwatakano lyewa kumwe naJehova?

⁸ Ngwendi moomu tupu vakurona va lisiga monkedi omu ava moneka, mokulifana kapisi Vakriste navenye va kara noyikara yokulifana. Pasihonena, vamwe nondunge unene ano vamwe kwa kara nouradi wounene ntani vamwe kuvhura va kare nougavi wounene, ano vamwe kuvhura va kare nonkenda zonene. Ntani Vakriste vavali ava vakara nelikwatakano lyewa naJehova kuvhura va ture po matokoro gokulisiga, nye matokoro nagenye ogo ga liza nonompango domoBibeli. Rorunzi eyi kuhoroka apa Vakriste ava tura po matokoro kuliza nezwi lyawo lyokomutjima. Monkedi ezi, awo kunyokera po kulipangura vene navene nsene matokoro gawo gana li sigi. Nye awo kutwikira kukara mouumwe.​—Rom. 14:10; 1 Kol. 1:10.

YISINKE NATU RUGANA YIPO TU KARE VAKRISTE AVA VA KARA NELIKWATAKANO LYEWA NAJEHOVA?

9. Kuvhura tu kare nelikwatakano lyewa naJehova ose twa hana kurugana ko yuma ndi? Faturura.

⁹ Munona kukura pwamwene ngomu sina kuza siruwo, nye muntu kapi ta vhuru kutwikira kukara nelikwatakano lyewa naJehova ga hana kurugana ko yuma. Pasihonena, Vakriste womoKolinte kwa tambwire mbudi zongwa nokugwana mpepo zokupongoka ntani va lirongerere ko yoyinzi kweyi ga va rongere mupositoli Paurusa. (Yirug. 18:8-11) Nye nampili ngoso, konyima zonomvhura kutunda apa va gwene ekuho, sinzi sawo kapi va kere simpe nelikwatakano naJehova. (1 Kol. 3:2) Ngapi omu natu divilisa asi kapi yina kutuhorokera oyo?

10. Yisinke natu rugana yipo tu kare nelikwatakano lyewa kumwe naJehova? (Juda 20)

¹⁰ Mokuninka asi tu kare Vakriste ava va kara nelikwatakano lyewa naJehova, pomuhowo twa hepa kukara neharo lyokukara nelikwatakano lyewa naJehova. Ava va hara kukara “magova” nokudira kuhara kutulisa po elikwatakano kumwe naJehova, kapi ngava tura po ezokomeho. (Yis. 1:22) Kapi tuna hara kukara ngwendi vantu ava va kura ava ava ndindire vakondi vawo vava tulire po matokoro. Nye aso situmbukira setu sokudivilisa asi elikwatakano lyetu naJehova kuna kunkondopara. (Resa Juda 20.) Nsene ove kuna kukondja yipo o kare nelikwatakano lyewa naJehova, kanderera kwendi yipo a ku pe “eharo nononkondo dokusikisa mo nayinye eyi ga hara.”​—Fil. 2:13.

11. Yisinke Jehova a tu pe yi tu vatere yipo tu kare nelikwatakano lyewa kumwe nendi? (Vaefeso 4:11-13)

¹¹ Jehova kapi a ndindire ko kwetu tu twikire kukara nelikwatakano lyewa kumwe nendi pwanyamwetu. Jehova kwa tu pa vasita ntani varongi mombungakriste, yipo va tu vatere tu kare nelikwatakano lyenene naJehova yipo ngatu sike “koukurona wene wene ngwendi Kristusa.”  (Resa Vaefeso 4:11-13.) Jehova kutupa hena mpepo zendi zokupongoka zi tu vatere tu kare “nomagazaro gaKristusa.” (1 Kol. 2:14-16) Mokugwederera ko, Karunga kwa tu pa Mavangeli gane, aga aga likida omu Jesus nga gazara, neyi nga uyunga ntani eyi nga rugana apa nga zuvhisa. Nsene o honena monkedi omu Jesus nga gazara neyi nga rugana, kuvhura ngo sikise mo sitambo soge sokukara nelikwatakano lyewa kumwe naJehova.

EYI AGA SIKISA MO MARONGO GOMOBIBELI GOKONHINHI

12. Marongo musinke gomuhowo twa lirongere kuhamena Kristusa?

¹² Mokuninka asi tu kare nelikwatakano lyewa naJehova, twa hepa kulironga yininke yoyinzi kupitakana tupu eyi twa lirongere pomuhowo kuhamena Kristusa. Yininke yimwe eyi twa lirongere pomuhowo kuna kara kulitezurura, epuro, ekuho ntani evhumbuko. (Heb. 6:1, 2) Aga kuna kara marongo gamwe gomuhowo aga va pura Vakriste navenye. Eyi kuna kara yininke eyi ga rongere mupositoli Peturusa vantu poPentekoste. (Yirug. 2:32-35, 38) Twa hepa kutambura marongo aga yipo tu kare varongwa vaKristusa. Pasihonena, Paurusa kwa rondwere asi nkenye ogu a nyoka kutambura erongo lyokuhamena kevhumbuko, kapi ta vhuru kukara murongwa gwaKristusa. (1 Kol. 15:12-14) Nye nampili ngoso, twa hepa kudiva yoyinzi kupitakana tupu marongo gomuhowo aga twa lirongere.

13. Yisinke natu rugana yipo tu gwanene mo uwa momarongo gokonhinhi, aga va tumbura moVahebeli 5:14? (Tara hena efano.)

¹³ Mokulisiga nomarongo gopomuhowo, marongo gokonhinhi gomoBibeli kapi tupu ga kwatera mo noveta daJehova, nye hena nompango dendi edi adi tu vatere tu kwate egano omu a tara yininke. Mokugwanena mo uwa momarongo ogo, twa hepa kulironga nokuteda ko ntani nokurugana unene yipo tu ga ture pasirugana. Nsene tu yi rugana ngoso, ngatu lironga kutura po matokoro aga aga hafesa Jehova. b​—Resa Vahebeli 5:14.

14. Ngapi omu Paurusa ga vaterere Vakolinte va twikire kukara nelikwatakano lyewa naJehova?

¹⁴ Vakriste ava va dira kukara nelikwatakano lyewa naJehova, kuvadigopera kutura po etokoro nsene moBibeli kapi mwa kara veta zokuvyukilira. Vamwe kuvhura va lizuvhe asi awo  kuvhura va rugane nkenye eyi vana hara nsene pwato veta zokuvyukilira moBibeli. Vamwe kuvhura va pure veta ezi za dira kukara moBibeli. Pasihonena, ayo kumoneka asi Vakriste womoKolinte kwa pulire Paurusa veta ezi za uyungire kuhamena nsene kuvhura va lye nondya edi ava zamba koyikarunga. Mevango lyokuvatantera eyi nava rugana, Paurusa kwa yi likidire asi nkenye gumwe ga hepa kutura po etokoro kuliza nezwi lyendi lyokomutjima. Age kwa tumbwire nompango dimwe domoBibeli edi da vhulire kuvavatera va ture po etokoro eli lya dilire kuvaninkisa va kare nousima ntani yipo va dire kupundukisa wopeke. (1 Kol. 8:4, 7-9) Paurusa kwa vaterere Vakolinte va kare nelikwatakano lyokupama kumwe naJehova, yipo va ruganese nondunge dawo va ture po matokoro mevango lyokuhuguvara wopeke vava tulire po matokoro ndi va papare noveta.

15. Ngapi omu Paurusa ga vaterere Vakriste woVahebeli va ture po ezokomeho?

¹⁵ Ose kulirongera ko sirongwa somulyo kweyi Paurusa ga tjangerere Vakriste woVahebeli. Vamwe kapi va twikilire kukara nelikwatakano lyewa naJehova, ‘awo kwa tengwire komasini nye kapisi konondyandya.’ (Heb. 5:12) Awo kapi va lirongere nokutambura yininke yoyipe eyi ga va rongere Jehova mombungakriste. (Yis. 4:18) Pasihonena, sinzi soVajuda nga va kwama simpe Veta zaMosesa nampili ngomu pwa pitire nomvhura 30 kutunda apa Jesus ga hagekesere po Veta ozo. (Rom. 10:4; Tit. 1:10) Yosili nomvhura odo 30 da pere mpito Vakriste va kwate egano asi kapi va hepere hena kukwama Veta zaMosesa. Nkenye ogu ga resere mbilive ezi ga tjangerere Paurusa koVahebeli ga yi dimbwilire asi mobuke ozo kwa kere mo marongo gokonhinhi. Mbilive zendi kwa va vaterere va dimburure asi nkedi zompe zokukarera Jehova kupitira mwaJesus Kristusa, azo ngwa unene ntani kwa va vaterere va kare nouradi wokuzuvhisa nampili momahepeko gokutundilira koVajuda.​—Heb. 10:19-23.

NYOKERA PO KULINENEPEKA

16. Kugusa ko kukara nelikwatakano lyewa naJehova, yisinke twa hepa kurugana?

¹⁶ Twa hepa kurugana unene, nye kapisi tu kare tupu nelikwatakano lyokupama naJehova nye hena tu twikire kuyirugana. Yipo nye, twa hepa kunyokera po elinenepeko. (1 Kol. 10:12) Twa hepa kulikona-kona nyamwetu yipo tu divilise asi ose kuna kutwikira kutura po ezokomeho.​—2 Kol. 13:5.

17. Ngapi omu mbilive zaPaurusa ga tjangerere Vakorosi azi likida mulyo gokutwikira kukara nelikwatakano lyewa naJehova?

 ¹⁷ Mombilive ezi Paurusa ga tjangerere Vakorosi, age kwa tumbwire mo hena asi twa hepa kutwikira kukara nelikwatakano lyewa naJehova. Nampili ngomu Vakorosi va kere nare nelikwatakano lyewa naJehova, Paurusa kwa va rondwere va dire kuhonena magano govantu womouzuni. (Koros. 2:6-10) Epafurasa ogu ga divire nawa womombungakriste, nga kanderere nkenye apa yipo va “twikire kukura” ndi va kare nelikwatakano lyewa naJehova. (Koros. 4:12) Yisinke tuna kulirongera ko? Paurusa naEpafurasa navenye va yi kwete egano asi mokuninka asi tu twikire kukara nelikwatakano lyewa naJehova, pwa hepa elituromo lyenene ntani nevatero lyaKarunga. Awo kwa here Vakorosi va twikire kukara nelikwatakano lyewa naJehova yi kare asi maudigu musinke va ligwanekerere nago.

18. Yisinke nayi vhura kuhorokera Mukriste ogu ga kara nelikwatakano lyewa naJehova? (Tara hena efano.)

¹⁸ Paurusa kwa rondwere Vakriste woVahebeli asi Jehova kuvhura a dire kuvahafera nsene kapi vana kutakamesa. Nsene Mukriste a nyoka kulimburukwa Jehova, kuvhura yi mu ninkise a li kare ure nendi ntani a dire kulitezurura nokugwana egusiro po lyokutunda kwaKarunga. Nye Vahebeli kapi va kere moukaro owo. (Heb. 6:4-9) Nye ngapi kuhamena womomazuva getu ava va tengura monyima ndi ava va gusa mombunga nye konyima va ya litezurure? Elitezururo lyawo kulikida asi awo va lisiga novantu ava ga tjangerere Paurusa. Nye nampili ngoso, apa ava tengura kwaJehova, awo va hepa evatero eli a gava. (Hes. 34:15, 16) Vakuronambunga kuvhura va pure munazinyetu ogu ga kara nelikwatakano lyewa naJehova yipo a va vatere va tengwidire po elikwatakano lyawo naJehova.

19. Sitambo musinke natu li tulira po?

¹⁹ Nsene ono hara kukara nelikwatakano lyewa naJehova, kuvhura o sikise mo sitambo soge. Twikira kulironga mausili gokonhinhi gomoBibeli ntani nokutara yininke ngwendi moomu ayi tara Jehova. Ntani nsene wa kara nare nelikwatakano lyewa naJehova, twikira kukara nelikwakano lyangoso dogoro narunye.