1. Ang’o ma Jehova dwaro ni watim?

 JOMA okendore bedoga mamor ahinya sama ginyuolo nyathi. Kata obedo ni jonyuol nyalo bedo mamor gi nyathigino, gombogi en ni nyathino odong mobed maduong’. Kendo en gima nyalo chandogi ahinya ka nyathigino ok dongi. Kamano bende, Jehova mor sama wakawo okang’ mar puonjore kendo bedo jolup Yesu. Kata kamano, ok odwar ni wasik ka wan nyithindo e winjruokwa kode. (1 Kor. 3:1) Kar mano, odwaro ni wabed ‘jo ma dongo e pachwa’ tiende ni Jokristo motegno.​—1 Kor. 14:20.

2. Ang’o ma wadwaro nono e sulani?

² Ang’o ma nyalo konyowa bedo “jo ma dongo” e winjruokwa gi Nyasaye? Ang’o ma ng’ato nyalo timo mondo obed Jakristo motegno? Ere kaka chamo chiemo motegno nyalo konyowa bedo Jokristo motegno? To ang’o momiyo ok onego wapar ni winjruokwa gi Jehova otegno chuth ma ok ochuno ni watim kinda moro amora mondo wamed tege? E sulani, wabiro nono dwoko mag penjogo.

TIEND BEDO JAKRISTO MOTEGNO EN ANG’O?

3. Ang’o ma nyalo konyowa timo dongruok ma wabed Jokristo motegno?

³ E dho Grik, wach molok ni “jo ma dongo” inyalo lok bende ni “jo motegno,” kata “jo moromo chuth.” (1 Kor. 2:6) Mana kaka nyathi dongo mobed ng’ama duong’, e kaka wan bende wanyalo timo dongruok ma wabed Jokristo motegno ka wadhi nyime tego winjruokwa gi Jehova. En adier ni kata ka wasebedo Jokristo motegno, pod wabiro dhi nyime tego winjruokwa gi  Jehova. (1 Tim. 4:15) Waduto, bed ni wadongo kata watindo, wanyalo timo dongruok ma wabed Jokristo motegno. Kata kamano, en ang’o ma nyiso ni ng’ato en Jakristo motegno?

4. Ang’o ma nyiso ni ng’ato en Jakristo motegno?

⁴ Jakristo motegno dak ka luwore gi chike duto mag Nyasaye, kendo ok oluwgi mana sama timo kamano more. En adier ni nikech wan dhano morem, seche moko wanyalo both ma watim gik ma ok kare. Kata kamano, Jakristo motegno biro timo gik moko ka luwore gi dwach Nyasaye. Orwako kit dhano manyien kendo otemo matek mondo pache oluwre gi pach Nyasaye. (Efe. 4:22-24) Osetiego pache mondo okonye timo yiero mabeyo ka luwore gi chike kod puonj mag Jehova, kendo ok ochuno ni obed gi list ma rabora mag chike ma nyalo taye e ngimane. Sa asaya motimo yiero, otemo matek mondo otim yiero ka luwore gi dwach Nyasaye.​—1 Kor. 9:26, 27.

5. Gin ang’o ma nyalo yudo Jakristo ma ok otegno? (Jo-Efeso 4:14, 15)

⁵ Jakristo ma siko ka en nyathi e winjruokne gi Nyasaye iwuondoga mayot gi “riekni mag dhano” kod “riekni mopondo” kendo oyie ayiea gi weche mag miriambo milando gi jofwambo gi keyo kata joma ong’anyo moweyo adiera. a (Som Jo-Efeso 4:14, 15.) Ng’at ma kamano nenoga nyiego ne jomamoko, okeloga ywaruok, kendo iye wang’ga piyo. Bende, yot ahinya mondo olwar e tem.—1 Kor. 3:3.

6. En ranyisi mane ma wanyalo tiyogo e lero kaka ng’ato nyalo timo dongruok mobed Jakristo motegno? (Ne picha bende.)

⁶ Mana kaka ne waseneno motelo, Ndiko pimo ng’at ma timo dongruok mondo obed Jakristo motegno gi nyathi ma dongo mondo obed ng’ama duong’. Nitie gik mang’eny ma nyathi matin ok ong’eyo, omiyo, pod dwarore ni ng’at maduong’ otaye. Kuom ranyisi, miyo nyalo nyiso nyare ma pod tin mondo omak lwete sama gikalo ndara. Kaka nyathineno medo dongo, samoro koro obiro weyega mondo okal ndara kende. Kata kamano, pod obiroga parone ni ong’iga ndara koni gi koni ka pok okalo. Bang’ ka nyathino osedongo mobedo ng’ama duong’, koro obiroga timo gik ma kamago ma onge ng’ama taye. Mana kaka nyithindo dwaroga kony kowuok kuom joma  dongo mondo kik giyud hinyruok, e kaka dwarore ni Jokristo ma pod yomyom oyud kony kowuok kuom Jokristo motegno mondo kik gitim gik ma nyalo ketho winjruokgi gi Nyasaye, to kar mano, gitim yiero mabeyo. Mopogore gi mano, sa asaya ma Jakristo motegno dwaro timo yiero, obiro tiyo gi puonj mag Muma moseng’eyo mondo okonye timo yiero ka luwore gi dwach Jehova.

7. Be Jakristo motegno nyalo kwayo kony kuom jomamoko?

⁷ Be mano nyiso ni Jakristo motegno koro ok nyal kwayo kony moro amora? Ooyo. Kata Jokristo motegno seche moko bende nyaloga kwayo kony. Kata kamano, joma pod yomyom e winjruokgi gi Nyasaye nyalo dwaro ni onyisgi gima onego gitim, kata ni otimnegi yiero e weche moko ma gin giwegi e monego gitimie yiero. Mopogore gi mano, Jokristo motegno biro timo yiero ka luwore gi puonj ma giseng’eyo, kendo kata obedo ni samoro ginyalo kwayo paro kuom Jokristo wetegi, ging’eyo ni e nyim Jehova ‘giniting’ ting’gi giwegi.’—Gal. 6:5.

8. Gin yore mage ma Jakristo motegno nyalo pogoree gi nyawadgi?

⁸ Mana kaka joma dongo niga gi kido mopogore opogore, e kaka Jokristo motegno e winjruokgi gi Jehova bende bedoga gi kido mopogore opogore. Kuom ranyisi, jomoko nyalo bedo joma riek, jochir, jochiwo, kata joma nyiso jowetegi ng’wono. E wi mano, Jokristo ariyo nyalo yudore e chal moro ma dwarore ni ng’ato ka ng’ato otimie yiero, kendo ng’ato nyalo timo yiero mopogore gi nyawadgi, to pod giduto gitimo yiero mabeyo ka luwore gi Ndiko. To mano timorega ahinya-ahinya e weche ma ng’ato onego otimie yiero ka luwore gi chunye mar pogo ber gi rach. Ka gifwenyo wachni, to ok gibi ng’ado ne jomamoko bura ka po ni gitimo yiero moro mopogore gi margi. Kar mano, gibiro keto pachgi e gik ma nyalo miyo gisik ka gin gi kuwe kod winjruok e kindgi.—Rumi 14:10; 1 Kor. 1:10.

ERE KAKA WANYALO BEDO JOKRISTO MOTEGNO?

9. Be bedo Jakristo motegno en gima biro abira kende? Ler ane.

⁹ Nyathi nyaloga dongo ma bed ng’ama duong’ mana kaka ndalo medo kalo, kata kamano, bedo Jakristo motegno ok en gima biro abira kende; nyaka ng’ato tim kinda. Kuom ranyisi, owete gi nyimine ma ne nie kanyakla mar Korintho norwako wach maber, ne obatisgi, ne giyudo roho maler, kendo ne giyudo ber kuom tiyo gi paro ma jaote Paulo nomiyogi. (Tich 18:8-11) To e ma higni moko bang’ ka ne osebatisgi, thothgi pod ne ok otegno e winjruokgi gi Nyasaye. (1 Kor. 3:2) Ang’o ma wanyalo timo mondo gima kamano kik timrenwa?

10. Ang’o ma nyaka watim mondo wabed Jokristo motegno? (Juda 20)

¹⁰ Mondo wabed Jokristo motegno, nyaka watem matek mondo wabed gi gombo mar bedo jo motegno. “Jo ma riekogi tin” sikoga ka gin joma yomyom e winjruokgi gi Nyasaye, kendo ok gitimga dongruok. (Nge. 1:22) Ok wadwar bedo kaka jomoko mosebedo madongo to pod gidwaroga ni jonyuolgi e ma otimnegi yiero. Kar mano, dwarore ni wan e ma wakaw ting’ mar loso winjruokwa gi Jehova. (Som Juda 20.) Ka pod idhi nyime timo kinda mondo ibed Jakristo motegno, kwa Jehova e lamo mondo omiyi “teko kod gombo mar timo duto mohero.”—Fil. 2:13.

11. Gin ang’o ma Jehova osemiyowa mondo okonywa bedo Jokristo motegno? (Jo-Efeso 4:11-13)

¹¹ Jehova ok dwar ni watim dongruok ma wabed Jokristo motegno gi tekowa wawegi. Jokristo ma gin jokwath kod jopuonj oikore konyowa mondo wabed Jokristo motegno ma chop kama “wasedongoe chuth e okang’ ma romre gi Kristo.” (Som Jo-Efeso 4:11-13.)  Bende, Jehova miyowa rohone ma konyowa bedo gi “pach Kristo.” (1 Kor. 2:14-16) E wi mano, Nyasaye osemiyowa buge mag Injili ma konyowa ng’eyo pach Kristo, weche ma nowacho, kod gik ma notimo ka ne en e piny ka. Ka waluwo ranyisi mar Yesu e yo ma noparogo kod gik ma notimo, to wabiro bedo Jokristo motegno.

KAKA CHAMO CHIEMB CHUNY MOTEGNO KONYOWA

12. ‘Puonj mag mise mag ng’eyo Kristo’ gin mage?

¹² Mondo wadhi nyime bedo Jokristo motegno, nyaka wadong ma wachop kama koro ok waten yiewa mana kuom “puonj ma gin mana mise mag ng’eyo Kristo,” tiende ni adiera ma ne wakwongo puonjore. Moko kuom puonj mag mise gin loko chunywa koa e richo, yie, batiso, kod chier. (Hib. 6:1, 2) Mago gin puonj ma nyaka ng’ato yiego e ka obed Jakristo. Mano e momiyo jaote Petro nopuonjo oganda ma ne nitie chieng’ Pentekost e wi wechego. (Tich 2:32-35, 38) Nyaka wayie gi puonj mag misego mondo e ka wabed jolup Kristo. Kuom ranyisi, Paulo nowacho ni ng’at ma ok oyie kuom chier kwedo Kristo. (1 Kor. 15:12-14) Kata kamano, ok onego wang’e mana puonj mag mise kende, to dwarore ni wadhi nyime puonjore e yo matut mondo wabed Jokristo motegno.

13. Ang’o ma nyaka watim mondo wayud ber kuom chiemb chuny motegno miwuoye e Jo-Hibrania 5:14? (Ne picha bende.)

¹³ Mopogore gi puonj mag mise moriwo chike Jehova, chiemb chuny motegno to oriwo bende puonj mag Muma ma konyowa ng’eyo pach Jehova. Mondo wayud ber kuom chiemb chuny motegno, nyaka wapuonjre Wach Nyasaye, wapar matut kuom gik ma wapuonjorego, kendo wati gi weche ma wapuonjore. Timo kamano biro konyowa timo yiero mabeyo ma moro Jehova. b—Som Jo-Hibrania 5:14.

14. Ere kaka Paulo nokonyo Jo-Korintho mondo gibed Jokristo motegno?

¹⁴ Jokristo ma pod yomyom yudoga ka teknegi timo yiero sama onge chik moro ma achiel kachiel e Muma motudore gi yiero ma gidwaro timo. Sama onge chik ma achiel kachiel  ma nyalo tayowa, jomoko nyalo yiero timo mana gima gidwaro. Jomoko to nyalo dwaro ni onyisgi chik moro ma tayo wach moro kata ka chik ma kamano onge. Kuom ranyisi, nenore ni Jokristo ma ne ni Korintho nopenjo Paulo ka be nitie chik ma ne nyalo yie ne ng’ato chamo chiemo motimgo misango ne sanamu. Kar mondo onyisgi gima nonego gitim, Paulo nonyisogi ni ng’ato ka ng’ato nigi ‘ratiro mar timo yiero’ ka luwore gi chunye mar pogo ber gi rach. Nowuoyo e wi puonj ma ne nyalo konyo ng’ato timo yiero maber kendo ma weyo ka chunye nigi kuwe, to konchiel bende ok ochwanyo jomamoko. (1 Kor. 8:4, 7-9) Omiyo, Paulo nokonyo Jo-Korintho mondo gitim dongruok mi gibed Jokristo motegno ma nyalo tiyo gi pachgi mosetiegi e timo yiero, kar luwo mana chike mondiki.

15. Ere kaka Paulo nokonyo Jokristo ma Jo-Hibrania timo dongruok mondo gibed Jokristo motegno?

¹⁵ Nitie puonj moro ma wayudo e weche ma Paulo nondiko ne Jokristo ma Jo-Hibrania. Moko kuomgi ne ok dhi nyime timo dongruok mondo gibed Jokristo motegno, kendo ‘ne gisedok chien mi gibedo jo ma dwaro mana chak, to ok chiemo motegno.’ (Hib. 5:12) Ne ok gimakore gi adiera ma nosebed ka ielonegi mosmos kokalo kuom kanyakla mar Jokristo. (Nge. 4:18) Kuom ranyisi, Jo-Yahudi mang’eny ma noseyie, ne pod dhi nyime luwo Chike Musa ma tho mar Yesu nosemiyo owe tigo higni 30 motelo. (Rumi 10:4; Tito 1:10) Kuom adier, higni 30 noromo Jokristo ma Jo-Yahudigo timo lokruok kendo ng’eyo ni koro ne ok ochuno ni giluw Chike Musa! Ng’ato ang’ata ma osesomo barua ma Paulo nondiko ne Jo-Hibrania nyalo yie ni wechego oting’o chiemb chuny motegno. Baruano nokonyo Jokristo ma Jo-Hibraniago bedo gi yie motegno kuom chenro manyien mar lamo kendo dhi nyime lendo gi chir kata obedo ni Jo-Yahudi wetegi ne kwedogi.—Hib. 10:19-23.

DHI NYIME TIMO DONGRUOK MONDO ISIK KA IN JAKRISTO MOTEGNO

16. Mopogore gi kinda ma watimo mondo wabed Jokristo motegno, en ang’o kendo ma nyaka watim?

¹⁶ Mopogore gi kinda ma nyaka watim mondo wabed Jokristo motegno, dwarore bende ni watim kinda mondo wasik ka wan Jokristo motegno. Mano nyiso ni ok onego wapar ni wasebedo Jokristo motegno ma koro onge  dongruok moro amora monego watim. (1 Kor. 10:12) Onego wasik ka ‘wanonore wawegi’ mondo wane ka be wadhi nyime timo dongruok.—2 Kor. 13:5.

17. Ere kaka barua ma Paulo nondiko ne Jo-Kolosai nyiso ni ne dwarore ni gisik ka gin Jokristo motegno?

¹⁷ E barua ma Paulo nondiko ne Jo-Kolosai, nojiwo gimomiyo ne dwarore ni gidhi nyime siko ka gin Jokristo motegno. Kata obedo ni ne gisetimo dongruok ma gibedo Jokristo motegno, Paulo noparonegi ni nonego gitang’ mondo kik wuondgi gi riekni mag pinyni. (Kol. 2:6-10) Bende, Epafra ma ne ong’eyo kanyaklano maber, nosiko ka lemonegi mondo ‘gikone gibed jo motegno.’ (Kol. 4:12) Mano puonjowa ang’o? Paulo gi Epafra nong’eyo ni mondo ng’ato osik ka en Jakristo motegno, nyaka otim kinda kendo Nyasaye nyaka konye. Ne gidwaro ni Jo-Kolosai osik ka gin Jokristo motegno kata obedo ni ne giromo gi pek moko.

18. En ang’o ma nyalo timore ne Jakristo motegno? (Ne picha bende.)

¹⁸ Paulo nonyiso Jo-Hibrania ni gitang’ nikech kata mana Jakristo motegno pod nyalo lalo winjruok ma en-go gi Jehova. Chuny Jakristo ne nyalo bedo matek motamre lokore kendo weyo richone mondo Jehova ong’wonne. Gima ber en ni Jo-Hibrania ma Paulo nondikonegi ne pok ochopo e chal ma kamano. (Hib. 6:4-9) To nade Jokristo ma kindewagi ma nodok chien kata ma nogol e kanyakla, to bang’e ne giloko chunygi kendo chako tiyo ne Jehova? Nikech gibolore kendo giyie loko chunygi, mano nyiso ni gipogore gi joma Paulo ne wuoyo kuomgi. Kata kamano, sama giduogo ir Jehova, pod biro dwarore ni Jehova okonygi. (Eze. 34:15, 16) Jodong-kanyakla nyalo chano mondo Jokristo motegno okonygi tego winjruokgi gi Jehova kendo.

19. En gombo mane monego ibedgo?

¹⁹ Inyalo bedo Jakristo motegno ka itimo kinda. Dhi nyime chamo chiemb chuny motegno kendo item timo gik moko ka luwore gi dwach Jehova. To kisetimo dongruok mibedo Jakristo motegno, dhi nyime timo duto minyalo mondo isik kitegno.