1. Jehova’n kan lakah eng nge a beisei?

 NU LEH PATE tâna hlimna thlentu ber pakhat chu an fa a lo pian hian a ni a. Chutih rualin, an fa piang hlim chu hmangaih hle mah se, nausên renga a awm chu an duh lo. Dik takin, an fa nausên chu a ṭhang thei lo a nih chuan an rilru a hah hle dâwn a ni. Chutiang bawkin, Isua hnung zui tûra hma kan lâk ṭan hian Jehova chu a lâwm a; mahse, thlarau lama nausên renga awm tûrin min duh lo. (1 Kor. 3:1) Ani chuan Kristian mi “puitling” ni tûrin min beisei ṭheuh a ni.—1 Kor. 14:20.

2. He thuziakah hian eng nge kan sawiho vang?

² Kristian mi puilting tih awmzia chu eng nge ni? Engtin nge Kristian mi puilting kan nih theih? Kan puitlin chhohnaah thlarau lam chaw rum chu eng anga pawimawh nge a nih? Engvângin nge a lutuka inrintâwkna chu kan pumpelh ang? He thuziakah hian chûng zawhnate chhânna chu sawiho a ni ang.

KRISTIAN MI PUILTING TIH AWMZIA CHU ENG NGE NI?

3. Kristian mi puilting tih awmzia chu eng nge ni?

³ Bible-a “puitling,” tih Grik thu mal hian “famkim,” tih leh “kim,” a tih awmzia a nei thei bawk a. (1 Kor. 2:6) Jehova nêna kan inlaichînna a ngheh chhoh zêl hian Kristian mi puitling kan rawn ni a. Mahse, thlarau lama mi puitling kan nih hnuah pawh hma kan sâwn chhoh zêl a ngai a ni. (1 Tim. 4:15) Ṭhalaite pawh tiamin kan vai hian Kristian mi puitling kan ni thei a. Mahse, engtin nge Kristian mi puitling kan nih leh nih loh kan hriat theih ang?

4. Engin nge Kristian mi puitling nihna chu târ lang?

 ⁴ Kristian mi puitling chu thupêkte zînga a duh zâwng chauh zâwm lovin Pathianin a phût zawng zawngte nêna inmilin a nung a. Ṭha famkim lo a nih avângin thil tihsual châng a nei ngei mai. Mahse, a nî tin nunah Pathian duh zâwngte mila ngaihtuah a, thiltih a tum tlat a ni. Chu bâkah, mihring thara inthuamin, Pathian ngaihtuah dân nêna inmila thil ngaihtuah a tum tlat a. (Eph. 4:22-24) Jehova dânte leh thu bulte ṭanchhana thu tlûkna fing siam tûra a inzir avângin, a thiltihte thununtu tûr dân tam tak a mamawh lo. Chu bâkah, a thu tlûkna siamte mila nung tûrin a inthunun tlat bawk a ni.—1 Kor. 9:26, 27.

5. Puitlin lam pan lo Kristian chuan eng thil hlauhawmte nge a tawh theih? (Ephesi 4:14, 15)

⁵ Kawng leh lamah chuan, puitlin lam pan lo Kristian chu awlsam takin ‘ngamthlêmnate leh fin vervêknate’ bumin a awm a, thu lêng dik lote leh kal pêngte zirtîrna chu a ring mai ṭhîn a ni. b (Ephesi 4:14, 15 chhiar rawh.) Ani chuan îtsîk te, inhnial te leh, thinrimte a chîng a, awlsam takin thlêmnaah a tlu thei a ni.—1 Kor. 3:3.

6. Thlarau lama ṭhan chhohna chu eng nên nge tehkhin theih a nih? (Milem en bawk rawh.)

⁶ Kan sawi tâk angin, Bible chuan thlarau lama puitling tûra ṭhan chhoh zêlna chu naupang puitlin chhohna nên a tehkhin a. Naupangte chuan hriatna an tlâkchham avângin puitlingte vênhimna leh enkawlna an mamawh a ni. Entîr nân, nu pakhat chuan a fanu naupang chu kawng an kân laiin a kut a vawntîr a. Chu hmeichhe naupang chu a lo len deuh hnu chuan a nuin mahniin kawng kântîr mah se, motor tlân a awm leh awm loh en tûrin a la hrilh tho a ni. A lo puitlin hnu chuan mahniin chutiang hlauhthâwnawm thil chu a pumpelh thei a. Naupangte’n thil hlauhthâwnawm pumpelh tûra puitlingte ṭanpuina an mamawh ang bawkin, Kristian mi puitling la ni lote chuan thlarau lam dinhmun hlauhawmte pumpelh tûr leh thu tlûkna fing siam tûrin Kristian mi puitlingte ṭanpuina an mamawh ṭhîn a ni. Chutih rualin, Kristian mi puitling chuan thu tlûkna a siam hunah,  chumi chungchânga Jehova thlîr dânte hre tûrin Bible thu bulte a ngaihtuah a, chumi mil chuan thu tlûkna a siam ṭhîn a ni.

7. Kristian mi puitlingte’n mi dangte ṭanpuina an mamawh em?

⁷ Kristian mi puitling chuan mi dangte ṭanpuina a mamawh lo tihna a ni em? Ni lo ve. Kristian puitlingte pawhin mi dangte ṭanpuina mamawh châng an nei a. Mahse, Kristian puitling la ni lo tu emaw chuan a thiltih tûrah emaw, a thu tlûkna siam tûrah emaw mi dangte hrilh a beisei thei a. Chutih rualin Kristian mi puitling chuan finna leh thiltawn ngah takte hnêna ṭanpuina a dîl rualin, Jehova’n “mahni phur” phur tûrin a beisei tih a hria a ni.—Gal. 6:5.

8. Eng kawngtein nge Kristian mi puitlingte chu an inan loh?

⁸ Tisa lama puitlingte chu an pumrua a inan loh ang bawkin, Kristian mi puitlingte pawh finna, huaisenna, thilphalna leh, lainatna ang chi thlarau lam miziate an neih dân a inang lo va. Chu bâkah, dinhmun inang an hmachhawn hunah pawh Kristian mi puitling pahnih chuan Bible thu bul nêna inmilin thu tlûkna inang lo an siam thei a ni. Chu chu chhia leh ṭha hriatna nêna inkûngkaih thilahte a ni lehzual a. Chumi chungchâng an hriat avângin, an thu tlûknate a inan loh hunah pawh an insawisêl tawn lo va. Chu aiin, inpumkhata awm an tum tlat zâwk a ni.—Rom 14:10; 1 Kor. 1:10.

KRISTIAN MI PUITLING NI TURIN ENG NGE KAN TIH NGAI?

9. Thlarau lamah kan puitling nghâl mai em? Hrilhfiah rawh.

⁹ Hunte a liam zêl rualin tisa lamah kan puitling chho zêl a; mahse, thlarau lama puitlinna chu amaha lo awm thei a ni lo. Entîr nân, Korinth khuaa unaute chuan chanchin ṭha an pawm a, baptisma changin thlarau thianghlim an dawn bâkah, tirhkoh Paula ngei pawhin anni chu thil tam tak a zirtîr a ni. (Tirh. 18:8-11) Mahse, baptisma an chan aṭanga kum eng emaw zât hnuah pawh, an zînga tam tak chuan puitlin lam an la pan lo va. (1 Kor. 3:2) Engtin nge chutiang chu kan chunga thleng ve lo tûra kan pumpelh theih?

10. Puitlin lam pan tûrin eng nge kan tih ngai? (Juda 20)

¹⁰ A hmasa berin, puitling chho tûr chuan puitlin duhna kan neih a ngai a. Thlarau lama nausên nih reng duh, ‘mâwlna ngainatute’ chuan thlarau lamah puitlin lam an pan thei lo vang. (Thuf. 1:22) Tisa lama puitlin tawh hnu pawha thu tlûkna siam tûra an nu leh pate rinchhan rengtute ang nih chu kan duh lo va. Chu aiin, thlarau lama kan puitlin theih nân mahni ngeiin mawhphurhna lâk kan duh a ni. (Juda 20 chhiar rawh.) Thlarau lama puitlin lam pan tûra i la bei mêk a nih chuan, ‘tih tum tûr leh beih’ duhna pe tûr chein Jehova hnênah ṭawngṭai ang che.—Phil. 2:13.

11. Puitling ni tûrin Jehova’n eng ṭanpuinate nge min pêk? (Ephesi 4:11-13)

¹¹ Jehova chuan mahnia puitlin lam pan tûrin min beisei lo va. Kristian kohhranah thlarau lama “puitling” kan nih a, “Krista famkimna lenzia tluka kan zaa kan lo awm” theihna tûra mi mal tinte min ṭanpui tûrin berâm vêngtute leh zirtîrtute min pe a ni. (Ephesi 4:11-13 chhiar rawh.) Ani chuan “Krista rilru” pu tûra min ṭanpui tûrin a thlarau thianghlim min pe bawk a. (1 Kor. 2:14-16) Chu bâkah, leia Isua rawngbâwl laia a ngaihtuah dân te, a thusawi te leh, a thiltihte chu kan hriat theih nân Chanchin Ṭha Ziak palite ziak tûrin a thâwk khum bawk. Isua ngaihtuah dân leh thiltihte chu entawnin, Kristian mi puitling kan ni thei a ni.

 THLARAU LAM CHAW RUM PAWIMAWHNA

12. “Krista thu bul” chu eng nge ni?

¹² Puitlin lam pan tûr chuan, Bible zirtîrna bulpui “Krista thu bul” aia tam kan zir a ngai a. Chûng zirtîrna bulpui ṭhenkhatah chuan sual simna, rinna, baptisma leh, thawhlehna chungchânga zirtîrnate a tel a ni. (Heb. 6:1, 2) Chûngte chu Kristiante thurin nghahchhan a ni a. Chuvângin, tirhkoh Petera chuan Pentikost nîa mipui hnêna thu a hrilh khân chumi chungchâng chu a sawi a ni. (Tirh. 2:32-35, 38) Krista zirtîr ni tûr chuan chûng zirtîrna bulpuite chu kan pawm a ngai a. Entîr nân, Paula chuan thawhlehna chungchâng zirtîrna pawm lotute’n Kristian thurin zawng zawng an hnâwl a ni tih a vaukhân a. (1 Kor. 15:12-14) Mahse, thutak hriatna bulpui maiah chuan kan lungawi tûr a ni lo.

13. Hebrai 5:14-a târ lan thlarau lam chaw rum hlâwkpui tûrin eng nge kan tih ngai? (Milem en bawk rawh.)

¹³ Zirtîrna bulpuite ang lo takin, thlarau lam chaw rumah chuan Jehova dânte chauh ni lovin a ngaihtuahnate hre thiam tûra min ṭanpuitu thu bulte a tel bawk. Chu chaw rum chu hlâwkpui tûrin Pathian Thu kan zir a, kan chhût ngun a, fîmkhur taka kan zawm a ngai a. Chutianga kan tih lai chuan, Jehova tilâwmtu thu tlûknate siam tûrin kan inzir a ni. c—Hebrai 5:14 chhiar rawh.

14. Engtin nge Paula chuan Korinth khuaa mite chu puitlin lam pan tûra a ṭanpui?

¹⁴ Kristian mi puitling lo chuan Bible thu bulte ngun taka ngaihtuah a, nunpui a ngaihna dinhmunte an hma chhawn hunah harsatna an tâwk ṭhîn a. Mi ṭhenkhat chuan Bible-a chiang taka dân pêk a awm loh chuan an duh apiang an ti thei niin an ngai a. Mi dangte chuan dân zam an phût thung. Entîr nân, Korinth khuaa Kristiante chuan milem biak nâna hman tawh chu ei theih a nih leh nih loh chungchângah dân zam tûrin an phût a. Mahse, Paula chuan an tih tûrte hrilh aiin, mi tinte chu an chhia leh ṭha hriatna ṭanchhana ‘duhthlan theihna’ an neih chu a târ lang a. Mi dangte titlu lova, chhia leh ṭha hriatna thiang tak nei tûra ṭanpuitu Bible thu bul ṭhenkhat  chu a chhûtpui a ni. (1 Kor. 8:4, 7-9) Chutiang chuan Paula’n Korinth khuaa mite chu mi dangte rinchhan emaw, dân zam mai emaw aiin an hriat thiam theihna hmang thei tûra thlarau lama puitlin lam pan tûrin a ṭanpui a ni.

15. Engtin nge Paula’n Hebrai Kristiante chu thlarau lama puitlin lam pan tûra a ṭanpui?

¹⁵ Hebrai Kristiante hnêna Paula lehkhathawn aṭangin thil pawimawh tak dang kan zir thei a. Mi ṭhenkhat chu thlarau lama puitlin lam pan zawm zêl lovin, “[thlarau lama] chaw rum ni lova hnute la ngai mi” an ni a. (Heb. 5:12) Anni chuan Jehova’n kohhran kal tlanga thil thar a zirtîrte chu an pawm lo va. (Thuf. 4:18) Entîr nân, Krista inthawina ṭanchhanin Mosia Dân zawm a ngaih tawh lohna chu kum 30 lai ni tawh mah se, Juda ringtu tam tak chuan chu chu zawm an la tum reng a ni. (Rom 10:4; Tit. 1:10) Juda Kristiante chuan an ngaihtuahna thlâkthleng tûrin kum 30 vêl chhûng hun an nei tih a chiang hle! Chuvângin, Paula chuan thlarau lam chaw rum, thutak ril tak chu pawm tûrin ṭanpui a tum a ni. Chu chu Kristiante tân Kristian biakna ruahmanna chungnung zâwk chunga an rinna tinghet tûr leh Judate dodâlna kâra huaisen taka thu hril zawm zêl tûra an mamawh tak a ni.—Heb. 10:19-23.

A LUTUKA INRINTAWKNA CHU PUMPELH RAWH

16. Puitlin chhoh mai bâkah, eng nge kan tih ngai?

¹⁶ Thlarau lama puitlin chhoh mai bâkah, puitling reng thei tûra hma kan lâk a ngai a. Chutianga ti thei tûr chuan a lutuka inrintâwkna kan pumpelh a ngai bawk. (1 Kor. 10:12) Hma kan sâwn zêl leh zêl loh hre tûrin kan “infiah” ṭhîn tûr a ni.—2 Kor. 13:5.

17. Engtin nge Kolossa khuaa mite hnêna Paula lehkhathawn chuan puitling renga awm a pawimawhzia a târ lan?

¹⁷ Tirhkoh Paula chuan Kolossa khuaa mite hnêna a lehkhathawnah puitlin reng a pawimawhzia a târ lang nawn leh a. Anni chu Kristian puitling ni tawh mah se, Paula chuan khawvêl ngaihtuahna thununa an awm loh nân a vaukhân a ni. (Kol. 2:6-10) Chu kohhrana unaute ṭha taka hre chiangtu Epaphra chuan “puitling” taka an din ngheh theih nân a ṭawngṭai fo ṭhîn bawk. (Kol. 4:12) Chuta  ṭang chuan eng nge kan zir theih? Paula leh Epaphra chuan puitling renga awm tûr chuan mi mala ṭan lâkna leh Pathian ṭanpuina a ngai tih an hria a. Anni chuan Kolossa khuaa mite chu eng harsatna pawh hmachhawn mah se, Kristian mi puitling ni reng tûrin an duh a ni.

18. Kristian mi puitlingte chungah eng thil nge thleng thei? (Milem en bawk rawh.)

¹⁸ Paula chuan Hebrai Kristiante hnênah Kristian mi puitlingte pawhin Pathian duhsakna an chân hlen thei tih a vaukhân a. Kristian thinlung chu inchhîrna nei thei lo khawp leh Pathian ngaihdam tlâk loh khawpin a khauh thei a. Chutiang dinhmuna Hebrai Kristiante an awm lo chu a lâwmawm hle. (Heb. 6:4-9) A nih leh, a hnua inchhîrna lantîrtu rawngbâwlnaa tel tawh lote leh hnawhchhuahte hi engtin nge ni ang? Anni chuan inngaitlâwm taka inchhîrna lantîrin Paula’n Pathian duhsakna dawng thei ngai lo tûrte chungchâng a ziahte ang an nih lohzia an târ lang a ni. Mahse, Jehova hnêna kan kîr leh hian, a ṭanpuina kan mamawh a. (Ezek. 34:15, 16) Kohhran upate chuan thlarau lama an rawn chak leh theih nân anmahni ṭanpui tûrin tawn hriat ngah tak Thuhretu tu emaw chu an ruat thei a ni.

19. Eng thiltum nge kan insiam ang?

¹⁹ Kristian mi puitling ni tûra ṭan i lâk chuan i thiltum chu i hlen thei a! Thlarau lam chaw rumte chu ei zawm zêl la, Jehova ngaihtuah anga ngaihtuah tum chhunzawm zêl ang che. Kristian mi puitling i ni tawh a nih pawhin, puitling nih reng tum ang che.