1. UJehova ufuna senzeni?

 ABANTU abatshadileyo bayathokoza kakhulu nxa bangaba lomntwana. Lanxa bemthanda kakhulu umntanabo futhi eligugu, kabafisi ukuthi ahlale elusane kokuphela. Bangaqalisa ukukhathazeka nxa engakhuli. Ngendlela efananayo, uJehova uyathokoza nxa siqalisa ukufunda ngaye. Kodwa kafuni ukuthi sihlale sizinsane ekukhonzeni, ufuna siqhubeke sithuthuka. (1 Khor. 3:1) Usikhuthaza ukuthi sibe “ngabantu abadala” ekuzwisiseni.—1 Khor. 14:20.

2. Sizaxoxa ngani esihlokweni lesi?

² Ngonjani umKhristu oqinileyo ekukhonzeni? Kuyini okungasinceda ukuthi sibe ngamaKhristu aqinileyo? Ukutaditsha iqiniso elijulileyo eliseBhayibhilini kungasinceda njani ukuthi siqhubeke sithuthuka? Kungani kungamelanga sizithembe kakhulu? Esihlokweni lesi sizaxoxa ngezimpendulo zemibuzo le.

NGONJANI UMKHRISTU OQINILEYO EKUKHONZENI?

3. Kutshoni ukuba ngumKhristu oqinileyo?

³ EBhayibhilini ibala lesiGrikhi elihunyutshwe ngokuthi ‘umuntu omdala’ lingatsho umuntu ‘olokholo oluqinileyo’ kumbe opheleleyo loba ovuthiweyo. a (1 Khor. 2:6) Njengoba umntwana eqhubeka ekhula aze abe ngumuntu omdala, lathi kumele siqhubeke sithuthuka ekukhonzeni. Nxa singenza njalo sizakuba ngamaKhristu avuthiweyo. Kodwa lanxa sesingamaKhristu  avuthiweyo kumele siqhubeke sithuthuka. (1 Thim. 4:15) Sonke nje kugoqela labasakhulayo singaba ngamaKhristu aqinileyo ekukhonzeni. Kodwa kuyini okutshengisa ukuthi umKhristu usethuthukile?

4. Ngonjani umKhristu oseqinile ekukhonzeni?

⁴ UmKhristu oqinileyo ekukhonzeni ulandela yonke imithetho kaNkulunkulu. Kakhethi leyo afuna ukuyilandela abesetshiya eminye. Kodwa lokho akutsho ukuthi kasaphambanisi ngoba sonke sizalwa silesono. Lanxa kunjalo, indlela aphila ngayo iyabe itshengisa ukuthi imicabango yakhe lezenzo zakhe kuhambelana lentando kaNkulunkulu. Uyabe esegqoke ubuntu obutsha futhi eqhubeka ezama ngamandla wonke ukuthi indlela acabanga ngayo ihambelane lendlela uNkulunkulu acabanga ngayo. (Efe. 4:​22-24) Uyabe esezifundise ukwenza izinqumo elandela imithetho lezimiso zikaJehova. Ngakho kadingi ukuthi aphiwe imithetho eminenginengi yokuthi kumele aziphathe njani. Nxa angenza isinqumo usebenza nzima ukuthi enze lokho ayabe ekhethe ukukwenza.—1 Khor. 9:​26, 27.

5. Kuyini okungenzakala kumKhristu ongaqinanga ekukhonzeni? (U-Efesu 4:​14, 15)

⁵ UmKhristu ongaqinanga ekukhonzeni angathatheka lula “ngobuqili babantu abasebenzisa amaqhinga okudlelezela.” Lokhu kungenza akholwe amahungahunga lezinto ezingamanga ezikhulunywa ngabezindaba futhi ayengwe ngabahlamuki. b (Bala u-Efesu 4:​14, 15.) Izikhathi ezinengi kuba lula ukuthi umKhristu lo abe lomhawu, adale izingxabano, aphangise lokucaphuka njalo kuba lula lokuthi awele esilingweni.—1 Khor. 3:3.

6. Nika umzekeliso otshengisa indlela umuntu athuthuka ngayo. (Khangela lomfanekiso.)

⁶ Njengoba kuke kwatshiwo, iMibhalo ifanisa ukuthuthuka komuntu ekukhonzeni lokukhula komntwana aze abe ngumuntu omdala. Phela zinengi izinto umntwana angazaziyo, yikho edinga ukuvikelwa lokukhangelwa ngumuntu omdala. Ngokwesibonelo, umama angabamba umntanakhe isandla ngesikhathi bechapha umgwaqo. Kodwa njengoba umntwana lo eqhubeka ekhula, unina angamvumela ukuthi achaphe umgwaqo eyedwa, kodwa uyamkhumbuza ukuthi akhangele izimota engakachaphi. Nxa umntwana lo esekhulile, uyabe esekwazi okumele akwenze ukuze axwaye ingozi. Njengoba nje abantwana bedinga ukuncediswa ngabantu  abadala ukuze babalekele ingozi, izikhathi ezinengi lamaKhristu angaqinanga ekukhonzeni lawo adinga ukuncediswa ngamaKhristu aqinileyo ukuze abalekele izinto ezingaphambanisa ubungane bawo loJehova njalo enelise ukwenza izinqumo ezinhle. Kodwa amaKhristu aqinileyo wona nxa esenza izinqumo ayacabangisisa ngezimiso eziseBhayibhilini ukuze abone ukuthi uJehova uthini, abesesenza okuvumelana lentando yakhe.

7. AmaKhristu aqinileyo ayakudinga yini ukuncediswa ngabanye?

⁷ Kambe amaKhristu aqinileyo kawakudingi yini ukuncediswa ngabanye? Hatshi. Kwezinye izikhathi lawo ayakudinga ukuncediswa. Kodwa umKhristu ongaqinanga uyabe efuna ukuthi abanye bamtshele okumele akwenze futhi bamenzele lezinqumo okumele azenzele zona. Lanxa umKhristu oqinileyo engadinga ukuncediswa ngabanye abalolwazi kumbe asebelesikhathi eside bekhonza, uyananzelela ukuthi uJehova ufuna ‘azithwalele umthwalo wakhe.’—Gal. 6:5.

8. AmaKhristu aqinileyo atshiyene njani?

⁸ AmaKhristu aqinileyo alobuntu obutshiyeneyo njengoba nje labantu betshiyana indlela ababukeka ngayo. Ngokwesibonelo, amanye alenhlakanipho ukwedlula amanye, amanye alesibindi, amanye ayaphana futhi amanye alozwelo. Kanti njalo amaKhristu amabili aqinileyo ekukhonzeni asesimeni esifananayo angenza izinqumo ezitshiyeneyo kodwa zombili zibe zivumelana leMibhalo. Lokhu kujayele ukwenzakala ikakhulu nxa amaKhristu la esenza izinqumo ezivumela ukuthi umuntu asebenzise umzwangedwa wakhe. Yikho amaKhristu aqinileyo ekukhonzeni kawahlulelani ngoba ayakunanzelela lokho. Wona aqakathekisa ukuthi kuhlale kulokuthula phakathi kwabantu bakaNkulunkulu.—Rom. 14:10; 1 Khor. 1:10.

KUYINI OKUNGASINCEDA UKUTHI SIBE NGAMAKHRISTU AQINILEYO?

9. Ukuthuthuka ekukhonzeni kuyazenzakalela yini? Chasisa.

⁹ Ukukhula komntwana esiba ngumuntu omdala kuyazenzakalela, kodwa ukuthuthuka ekukhonzeni khona akuzenzakaleli. Ngokwesibonelo, abazalwane beKhorinte bamukela izindaba ezinhle babhabhathizwa basebesamukela umoya ongcwele. Kanti njalo uPhawuli wabafundisa izinto ezinengi. (Imiseb. 18:​8-11) Kodwa abanye babo babelokhu bengaqinanga lanxa basebeleminyaka eminengi bebhabhathiziwe. (1 Khor. 3:2) Manje singenzani ukuze siqhubeke sithuthuka?

10. Kumele senzeni ukuze sithuthuke? (UJuda 20)

¹⁰ Nxa sifuna ukuba ngamaKhristu aqinileyo kumele siqale sibe lesifiso sokuthuthuka. Labo ‘abakholisa ukuhlala bengelalwazi’ futhi abafuna ukuhlala bezinsane ekukhonzeni abasoze bathuthuke. (Zaga. 1:22) Kasifuni ukufanana lomuntu othi esekhule waba ngumuntu omdala abe elokhu esiyabuza abazali bakhe okokwenza. Kodwa sifuna ukuzithwalela imithwalo yethu, sisebenze nzima ukuze siqhubeke sithuthuka. (Bala uJuda 20.) Nxa usenza okusemandleni akho ukuthi uqhubeke uthuthuka, khuleka kuJehova umcele akuphe “isifiso lamandla okwenza okumthokozisayo.”—Flp. 2:13.

11. UJehova usincedisa njani ukuthi sithuthuke? (U-Efesu 4:​11-13)

¹¹ UJehova kakhangelelanga ukuthi sisebenze nzima sodwa ukuze sithuthuke. Labo abaphiwe umsebenzi wokwalusa lokufundisa ebandleni bazimisele ukusincedisa ukuthi ‘sikhule ngokwaneleyo’ kumbe ukuthi sithuthuke size “sifike ebangeni lokukhula ngokugcweleyo njengoKhristu.” (Bala u-Efesu 4:​11-13.) UJehova uyasinika lomoya wakhe ongcwele ukuze usincede ukuthi sibe ‘lengqondo kaKhristu.’ (1 Khor. 2:​14-16) Kanti njalo wasipha amaVangeli amane asitshengisa indlela uJesu ayecabanga  ngayo lalokho akukhulumayo kanye lezinto azenzayo ngesikhathi esemhlabeni. Nxa singalingisela indlela uJesu ayecabanga ngayo lalokho ayekwenza singathuthuka sibe ngamaKhristu aqinileyo.

UKUTADITSHA IZINTO EZIJULILEYO KUZAKUNCEDA NJANI?

12. Yiziphi ezinye izinto esazifunda kuqala?

¹² Kumele sifunde ‘sidlule emfundisweni yokuqala emayelana loKhristu’ ukuze sithuthuke. Ezinye izinto esazifunda kuqala zazimayelana lokuphenduka, lokholo, lobhabhathizo kanye lokuvuswa kwabafileyo. (Heb. 6:​1, 2) Lezi zimfundiso eziqakathekileyo wonke amaKhristu azikholwayo. Yikho umphostoli uPhetro wafundisa ngazo ngesikhathi etshumayela ngePhentekhosti. (Imiseb. 2:​32-35, 38) Umuntu ngeke abe ngumfundi kaKhristu nxa engazikholwa imfundiso lezi eziqakathekileyo. Ngokwesibonelo, uPhawuli wathi loba ngubani ophika ukuthi abafileyo bazavuswa uyabe ephika lonke ukholo lwesiKhristu. (1 Khor. 15:​12-14) Kodwa nxa sesizazi imfundiso eziqakathekileyo eziseBhayibhilini, akumelanga sigoqe izandla, kumele sizimisele ukufunda okunengi.

13. Kumele senzeni ukuze sincedwe yizinto ezijulileyo eziseLizwini likaNkulunkulu? (UHebheru 5:14) (Khangela lomfanekiso.)

¹³ Izimfundiso ezijulileyo zona zitshiyene lemfundiso zakuqala. Zigoqela imithetho lezimiso ezisinceda sizwisise indlela uJehova acabanga ngayo. Nxa sifuna ukuthi izinto lezi ezijulileyo zisincede kumele sitaditshe iLizwi likaNkulunkulu iBhayibhili, sicabangisise ngalokho esikufundayo futhi senze konke okusemandleni ethu ukuthi sikusebenzise. Nxa singenza njalo, siyabe sizifundisa ukwenza izinqumo ezithokozisa uJehova. c—Bala uHebheru 5:14.

14. UPhawuli wawancedisa njani amaKhristu aseKhorinte ukuthi athuthuke?

¹⁴ Izikhathi ezinengi amaKhristu angaqinanga ajayele ukuthwala nzima ukuthi enzeni endabeni ezidinga ukuthi asebenzise izimiso zeBhayibhili. Nxa eBhayibhilini kungelamthetho ocacileyo ngendaba ethile, abanye bangacabanga ukuthi bangazenzela umathanda. Abanye bangafuna kufakwe imithetho ezindabeni ezingadingi imithetho. Ngokwesibonelo, kukhanya angani amaKhristu aseKhorinte  ake acela uPhawuli ukuthi awanike umthetho omayelana lokuthi ayengadla yini ukudla okunikelwe ezithombeni, kodwa uPhawuli kazange awatshele okwakumele akwenze. Wawakhuthaza ukuthi asebenzise imizwangedwa yawo, wawatshela lokuthi umuntu ngamunye ‘ulelungelo lokuzikhethela.’ Wawatshela ezinye izimiso eziseBhayibhilini ayengazisebenzisa nxa esenza izinqumo ezazizawanceda ukuthi angasali ehlutshwa ngumzwangedwa futhi angakhubi abanye. (1 Khor. 8:​4, 7-9) UPhawuli wayencedisa amaKhristu aseKhorinte ukuthi athuthuke. Wayewafundisa ukuthi asebenzise iMibhalo nxa esenza izinqumo kulokuthi alindele ukwenzelwa izinqumo ngabanye abantu kumbe adinge imithetho ezintweni zonke nje.

15. UPhawuli wawanceda njani amaKhristu angamaHebheru ukuthi athuthuke ekukhonzeni?

¹⁵ Kulesinye isifundo esiqakathekileyo esisifunda emazwini umphostoli uPhawuli awabhalela amaKhristu angamaHebheru. Amanye awo ayengamadela, engathuthuki ekukhonzeni. Yikho ‘kwasekumele aphiwe uchago futhi, hatshi ukudla okuqinileyo.’ (Heb. 5:12) Babesehluleka ukufunda lokwamukela izinto uJehova ayebacacisela zona kancane kancane esebenzisa ibandla. (Zaga. 4:18) Ngokwesibonelo, amanye amaKhristu angamaJuda ayelokhu esithi abantu kumele bagcine uMthetho kaMosi lanxa kwasekudlule iminyaka engaba ngu-30 umhlatshelo kaKhristu wasusa uMthetho lo. (Rom. 10:4; Tit. 1:10) Iminyaka engu-30 yayenele ukuthi amaKhristu la azwisise utshintsho lolu. Yikho uPhawuli wawabhalela incwadi ukuze awancede azwisise izinto ezijulileyo ayewafundisa zona. Incwadi leyo yawanceda amaKhristu lawo ukuthi aqinise ukholo lwawo njalo abone ukuthi uhlelo lwebandla lobuKhristu lwalungcono kakhulu ukwedlula indlela amaJuda ayekhonza ngayo. Yawanceda lokuthi abe lesibindi sokuqhubeka etshumayela lanxa ayethwaliswe nzima ngamanye amaJuda.—Heb. 10:​19-23.

UNGAZITHEMBI KAKHULU

16. Lanxa siyabe sesithuthukile ekukhonzeni kuyini okunye okuyabe kumele sikwenze?

¹⁶ Nxa sesisebenze nzima ukuthi sibe ngamaKhristu aqinileyo kumele siphinde sisebenze nzima ukuthi sihlale sinjalo. Lokhu kutsho ukuthi akumelanga sizithembe kakhulu. (1 Khor. 10:12) Kufanele ‘siqhubeke sizihlola’  ukuze sibe leqiniso lokuthi lokhu sithuthuka.—2 Khor. 13:5.

17. Incwadi uPhawuli ayibhalela abaseKholose itshengisa njani ukuqakatheka kokuhlala silokholo oluqinileyo?

¹⁷ Encwadini ayibhalela amaKhristu aseKholose, uPhawuli wacacisa ukuqakatheka kokuhlala silokholo oluqinileyo. Lanxa amaKhristu aseKholose ayesethuthukile, uPhawuli wawaxwayisa ukuthi ananzelele angathatheki ngemicabango yomhlaba. (Kol. 2:​6-10) U-Ephafrasi, okumele ukuthi wayebazi kuhle abantu abasebandleni lelo, wayehlala ethandazela ukuthi ‘ekucineni babe ngabapheleleyo’ kumbe babe ngamaKhristu aqinileyo. (Kol. 4:12) Sifundani kulokhu? UPhawuli lo-Ephafrasi babekuzwisisa ukuthi ukuze umuntu aqhubeke ethuthuka kumele asebenze nzima futhi acele ukuncediswa nguJehova. Babefisa ukuthi amaKhristu aseKholose aqhubeke ethuthuka futhi ahlale elokholo oluqinileyo lanxa ayehlangana lobunzima.

18. Kuyini okungenzakala kumKhristu oqinileyo ekukhonzeni? (Khangela lomfanekiso.)

¹⁸ UPhawuli waxwayisa amaKhristu angamaHebheru ukuthi nxa umKhristu oqinileyo angayekela ukunanzelela angenza izinto ezingenza ukuthi acine engasenguye mngane kaNkulunkulu. Inhliziyo yomKhristu ingaba lukhuni acine engasenelisi ukuzisola lokuphenduka besekusenza ukuthi uJehova engasamthetheleli. Okungcono yikuthi amaKhristu angamaHebheru wona ayengakafiki ebangeni lelo. (Heb. 6:​4-9) Kodwa kwenzakalani ngalabo abayabe bengasafezi inkonzo kumbe abake basuswa bacina bephendukile? Nxa bangazithoba besebephenduka bayabe betshengisa ukuthi kabafanani lalabo uPhawuli abhala ngabo. Kodwa nxa bangaphenduka kuJehova kuyabe kumele bavume ukuncediswa nguye. (Hez. 34:​15, 16) Abadala bangahlela ukuthi omunye umKhristu ovuthiweyo abancedise ukuthi baphinde babe ngabangane bakaJehova.

19. Kuyini okumele sizimisele ukukwenza?

¹⁹ Nxa uzama ngamandla wonke ukuba ngumKhristu ovuthiweyo, qiniseka ukuthi uzaphumelela. Qhubeka utaditsha izinto ezijulileyo eziseBhayibhilini njalo lokhu kuzakwenza ukuthi imicabango yakho ihambelane lekaJehova. Kanti njalo nxa usuthuthukile zimisele ukuhlala unjalo kuze kube nini lanini.