1. Jehova okwa tegelela tu ninge shike?

 SHIMWE shomiiningwanima mbyoka hayi nyanyudha noonkondo aaihokani, okumona okanona ke na uukolele. Ihe nonando aavali oye hole noonkondo okanona kawo hoka opo ka valwa, ihaya kala ya hala ka kale okahanona sigo aluhe. Uushili owo kutya otaya ka kala nokuli taya ipula noonkondo, ngele itaka koko. Sha faathana, Jehova oha kala a nyanyukwa, uuna twa ningi aalanduli yaKristus, ihe ina hala tu tsikile okukala aanona pambepo. (1 Kor. 3:1) Pehala lyaashono, okwa hala tu ‘ninge Aakriste aakuluntu.’ — 1 Kor. 14:20.

2. Oshike tatu ka kundathana moshitopolwa shika?

² Osha hala okutya shike, okuninga Omukriste omukuluntu? Ongiini tatu vulu okuninga Aakriste ya koka pambepo? Iikulya yopambepo ya kola ohayi dhana onkandangala yini mokukoka kwetu? Omolwashike kaatu na okudhiladhila kutya otwa koka sha gwana pambepo? Moshitopolwa shika, otatu ka kundathana omayamukulo gomapulo ngoka.

OKUKALA OMUKRISTE A KOKA PAMBEPO OTASHI TI SHIKE?

3. Okukala Omukriste a koka pambepo otashi ti shike?

³ MOmbiimbeli, oshitya shOshigreka shoka sha tolokwa ‘uukuluntu’ otashi vulu wo okutya ‘okukoka’ nosho wo ‘okukala wa kola.’ a (1 Kor. 2:6) Onkee ngaashi owala okanona haka tsikile okukoka sigo ka ningi omukuluntu, natse otu na okutsikila okukokeka ekwatathano lyetu naJehova, nokungawo, ohatu ningi Aakriste ya koka pambepo. Odhoshili kutya nokuli nonando otwa adha elalakano ndyoka, katu na nando okweetha okuhuma  komeho pambepo. (1 Tim. 4:15) Atuheni, mwa kwatelwa aagundjuka, otatu vulu okukoka pambepo. Ihe oshike hashi ulike kutya Omukriste okwa koka pambepo?

4. Oshike hashi ndhindhilikitha mo Omukriste ngoka a koka pambepo?

⁴ Omukriste a koka pambepo, oongoka ha ningi kehe shoka Jehova te mu pula a ninge, ihe iha ningi owala iinima mbyoka a hala okuninga. Odhoshili kutya oha ningi omapuko, oshoka oku li omuntu inaa gwanenena. Ihe nando ongawo, oha ulike mokukalamwenyo kwe kwesiku kehe kutya oha dhiladhila noha katuka metsokumwe nehalo lyaKalunga. Okwa zala omuntu omupe, noha kambadhala okudhiladhila ngaashi Kalunga ha dhiladhila. (Ef. 4:22-24) Okwa ilonga okuninga omatokolo gopandunge ga kankamena koompango dhaJehova nokomithikampango dhe, noina pumbwa omusholondondo gwoompango, opo a mone kutya oku na okwiihumbata ngiini. Uuna a ningi etokolo, oha longo nuudhiginini a ninge shoka a tokola okuninga. — 1 Kor. 9:26, 27.

5. Iiponga yini Omukriste inaa koka pambepo ha taalele? (Aaefeso 4:14, 15)

⁵ Mepingathano naashoka, Omukriste ngoka inaa koka pambepo ota vulu okupukithwa nuupu ‘komalongo’ gaashunimonima nokuyulwa ‘koomwigo’ dhawo nosho wo okwiitaala omitotolombo ndhoka ta uvu. b (Lesha Aaefeso 4:14, 15.) Otashi vulika a kale e na egamo lyokutsila yalwe ondumbo, e hole oontamanana, ha geye mbala noha iyethele momamakelo. — 1 Kor. 3:3.

6. Okukoka pambepo otatu vulu oku ku yelekanitha nashike? (Tala wo ethano.)

⁶ Ngaashi sha popiwa metetekelo, Omanyolo oga yelekanitha omukalo moka omuntu ha koko pambepo nomukalo moka okanona haka koko. Okanona kake na owino, onkee oka pumbwa okugamenwa nokusilwa oshimpwiyu komukuluntu. Natu shi thaneke ngeyi: Omuvalakadhi otashi vulika a kale ha pula okamwanakadhona ke mu kwate moshikaha, uuna taya taaguluka opate. Sho taka ende taka koko, otashi vulika e ka ethe ka taaguluke opate oko akeke, ihe natango oku na okukala he ka dhimbulukitha ka kale haka tala koombinga adhihe, ngele otaku zi oohauto, manga inaaka taaguluka. Ngele ka ningi omukuluntu, otaka ka kala ke shi okutaaguluka opate nokuyanda iiponga. Ngaashi owala  aanona ya pumbwa ekwatho lyaakuluntu, opo ya yande iiponga, Aakriste mboka inaaya koka pambepo, olundji oya pumbwa okukwathelwa kAakriste mboka ya koka pambepo, opo ya yande okuninga shoka tashi yono po ekwatathano lyawo naJehova, noya ninge omatokolo ge li pandunge. Mepingathano nayo, uuna Aakriste ya pyokoka taya ningi etokolo, ohaya dhiladhila muule kombinga yaashoka Ombiimbeli tayi ti, opo nduno taya tula miilonga shoka ya ilonga.

7. Mbela Omukriste a koka pambepo okwa pumbwa ngaa ekwatho lyayalwe?

⁷ Mbela shono osha hala okutya Omukriste ngoka a pyokoka ina pumbwa nando okukwathelwa kugulwe? Hasho nando. Naye omathimbo gamwe okwa pumbwa okupula ekwatho. Ihe omuntu ngoka inaa koka pambepo otashi vulika a tegelele yalwe oyo ye mu lombwele shoka e na okuninga, nenge ye mu ningile omatokolo, ngoka oye e na ando oku ga ninga. Omanga Omukriste ngoka a pyokoka, shampa a pula ekwatho kwaamboka ye na owino noye na uunongo, oku shi kutya oye mwene e na okuninga etokolo nosho wo ‘okuhumbata omutenge gwe.’ — Gal. 6:5.

8. Omomikalo dhini omuntu a koka pambepo a yooloka ko kuyalwe?

⁸ Ngaashi owala aakuluntu ye na omalupe ga yoolokathana, Aakriste mboka ya koka pambepo oye na omaukwatya gopambepo ga yoolokathana, ngaashi uunongo, uulaadhi, ombepo yokugandja nosho wo olukeno. Shimwe ishewe, uuna Aakriste yaali ya taalela onkalo ya faathana, otashi vulika ya thike pehulithodhiladhilo lya yoolokathana, ihe kehe limwe oli li metsokumwe nomithikampango dhOmbiimbeli. Olundji shino ohashi ningwa, uuna Aakriste taya ningi etokolo lya ikolelela keiyuvo lyawo. Onkee ihaya ipangula, ngele omatokolo gawo oga yoolokathana. Pehala lyaashono, ohaya gandja eitulomo kokukala ya hangana. — Rom. 14:10; 1 Kor. 1:10.

ONGIINI TATU VULU OKUNINGA AAKRISTE YA KOKA PAMBEPO?

9. Mbela omuntu oha koko owala pambepo nopwaahe na okuninga oonkambadhala dhasha? Shi yelitha.

⁹ Okanona ohaka koko paunshitwe mokweendela ko kwethimbo, ihe kapu na omuntu ha koko pambepo nokaapu na okuninga oonkambadhala. Pashiholelwa, aamwatate naamwameme yomuKorinto, oya li ya taamba ko onkundana ombwanawa, ya ninginithwa, ya pewa ombepo ondjapuki noya li ya mono uuwanawa melongo lyomuyapostoli Paulus. (Iil. 18:8-11) Ihe konima yomimvo dhontumba, okuza sho ya ninginithwa, oyendji kaya li natango ya koka pambepo. (1 Kor. 3:2) Ongiini tatu vulu okushilipaleka kutya oshinima sha faathana itashi tu ningilwa?

10. Oshike tu na okuninga, opo tu koke pambepo? (Judas 20)

¹⁰ Opo tu koke pambepo, tango otu na okukala tu na ehalo lyokukoka. Mboka “yanathangwa” noya hala okukala ngaashi ye li, kaye na siku ya koke pambepo. (Omayel. 1:22) Inatu hala okukala twa fa aantu mboka ya koka palutu, ihe natango oya ikolelela kaavali yawo, oyo ye ya ningile omatokolo. Pehala lyaashono, otwa hala okukala tu uvite tu na oshinakugwanithwa, ngele tashi ya pokukoka kwetu pambepo nokushilipaleka kutya ekwatathano lyetu naJehova otali tsikile nokukoka. (Lesha Judas 20.) Ngele natango oto ningi ngaashi to vulu wu koke pambepo, galikana Jehova e ku pe “ehalo noonkondo” dhoku shi ninga. — Fil. 2:13.

11. Ekwatho lini twa pewa, opo tu vule okukoka pambepo? (Aaefeso 4:11-13)

¹¹ Jehova ina tegelela tu koke pambepo kutse yene. Mboka ye li aasita yoonzi naalongi megongalo lyopaKriste, oya ilongekidha oku tu kwathela tu ninge ‘aakuluntu’ pambepo, ano ‘tu thike kegwano lyuukuluntu waKristus.’ (Lesha Aaefeso 4:11-13.) Jehova ohe tu pe wo ombepo ondjapuki yi tu kwathele tu kale tu na “omadhiladhilo  gaKristus.” (1 Kor. 2:14-16) Shimwe ishewe, Kalunga okwe tu pa Omavaangeli gane, opo e tu ulukile nkene Jesus a li ha dhiladhila, ha popi noha katuka, sho a li kombanda yevi. Ngele otwa holele omukalo gwaJesus gwokudhiladhila, naashono a li ha ningi, otatu vulu okwaadha elalakano lyetu lyokukoka pambepo.

NKENE IIKULYA YA KOLA YOPAMBEPO HAYI TU KWATHELE

12. “Iilongwa yopetameko yomuukriste” oshike?

¹² Opo tu tsikile okukoka pambepo, otwa pumbwa okwiilonga oshindji kaashi shi owala “iilongwa yopetameko yomuukriste,” nenge tu tye omalongo gopetameko gopaKriste. Iiholelwa yomalongo gopetameko ongaashi, okwiiyela ombedhi, eitaalo, eninginitho nosho wo eyumuko. (Heb. 6:1, 2) Omalongo ngoka oge li omalongo gopetameko, ngoka Aakriste ayehe ya itaala. Omolwetompelo ndyoka, omuyapostoli Petrus okwa popi kombinga yago, sho a li ta uvithile ongundu yaantu pOpentekoste. (Iil. 2:32-35, 38) Otu na okutaamba ko omalongo ngoka gopetameko, opo tu ninge aalongwa yaKristus. Pashiholelwa, Paulus okwa ti kutya ngele inatu itaala meyumuko, itatu vulu okutya tse Aakriste yashili. (1 Kor. 15:12-14) Ihe nonando ongawo, katu na owala okukala twa gwanenwa kontseyo yopetameko yoshili.

13. Oshike tatu vulu okuninga, opo tu mone uuwanawa miikulya ya kola yopambepo, mbyoka ya popiwa mAahebeli 5:14? (Tala wo ethano.)

¹³ Okuyelekanitha nomalongo gopetameko, iikulya ya kola yopambepo inayi kwatela mo owala oompango dhaJehova, ihe oya kwatela mo wo omithikampango dhe, ndhoka tadhi tu kwathele tu uve ko omadhiladhilo ge. Opo tu mone mo uuwanawa miikulya ya tya ngawo, otu na okukonakona, okutedhatedha nokutula miilonga shoka twa ilonga mOohapu dhaKalunga. Ngele otwa ningi ngawo, otatu idheula tu kale hatu ningi omatokolo ngoka taga nyanyudha Jehova. c — Lesha Aahebeli 5:14.

14. Paulus okwa li a kwathele ngiini Aakriste Aakorinto ya koke pambepo?

¹⁴ Aakriste mboka inaaya koka pambepo ohaya mono oshidhigu okuninga omatokolo ge li mondjila, uuna kaapu na oompango dhokondandalunde. Ngele kapu na ompango, yamwe otashi vulika ya kale ye uvite kutya otaya vulu  okuninga kehe shoka ya hala. Yamwe otashi vulika ya pule ngele opu na ompango, nonando inayi pumbiwa. Pashiholelwa, Aakriste yomuKorinto otashi vulika ya li ya pula Paulus, ngele opu na ompango yi na ko nasha nokulya iikulya ya yambelwa iikalunga. Pehala lyoku ya lombwela shoka ye na okuninga, Paulus okwe shi ulike kutya kehe gumwe oku na ‘emangululo lyokutokola’ kutya ota ka ninga po shike, sha ikolelela kwaashoka eiyuvo lye tali mu pitike a ninge. Okwa li wo a popi omakotampango gamwe ngoka taga vulu okukwathela kehe gumwe, a ninge etokolo ndyoka itaali mu thigi e na eiyuvo tali mu nyenyetele, noitali pundukitha yalwe. (1 Kor. 8:4, 7-9) Paulus okwa li a kwathele Aakorinto ya koke pambepo, opo ya vule okulongitha oondunge dhawo dhokuyoolola, pehala lyokwiikolelela muyalwe, nenge okupula ngele opu na oompango dhasha.

15. Paulus okwa li a kwathele ngiini Aakriste Aahebeli ya ninge ehumokomeho lyopambepo?

¹⁵ Otwa ilonga oshiilongomwa sha simana moohapu ndhoka Paulus a li a nyolela Aakriste Aahebeli. Yamwe yomuyo kaya li ya tsikile okukoka pambepo, oya li owala ‘taya nu omahini, nando oya li ye na okulya iikulya ya kola.’ (Heb. 5:12) Kaya li ya dhiginine oshili, ndjoka ya li taya tsikile okulongwa okupitila megongalo. (Omayel. 4:18) Pashiholelwa, Aajuda oyendji oya li natango ya itaala mOmpango yaMoses, nonando oya li ya hulithwa po keyambo lyaKristus, pwa pita omimvo 30 lwaampono. (Rom. 10:4; Tit. 1:10) Osha yela kutya kasha li oshipu kAakriste Aajuda ya lundulule okudhiladhila kwawo momukokomoko gwomimvo ndhono 30. Kehe gumwe ngoka a lesha ontumwafo yaPaulus ya nwethwa mo, ndjoka a li a nyolele Aahebeli, ota vulu oku shi koleka kutya embo ndyoka oli na iikulya yopambepo ya kola. Shoka osho owala Aakriste ya li ya pumbwa, opo ya koleke eitaalo lyawo melongekidho lyopaKriste li na ko nasha nokulongela Kalunga, nosha li she ya tsu omukumo ya tsikile okuuvitha, nonando otaya patanekwa kAajuda. — Heb. 10:19-23.

YANDA OKUDHILADHILA KUTYA OWA KOKA PAMBEPO SHA GWANA

16. Kakele kokuninga ehumokomeho lyopambepo, oshike ishewe tu na okuninga?

¹⁶ Katu na owala okukambadhala okuninga Aakriste ya koka pambepo, ihe otu na wo okutsikila okukoka pambepo. Onkee otwa pumbwa okukala twa kotoka kaatu dhiladhile kutya otwa koka sha gwana pambepo. (1 Kor. 10:12)  Otwa pumbwa ‘okwiikonakona’ tse yene, tu tale ngele otatu tsikile tuu okuninga ehumokomeho. — 2 Kor. 13:5.

17. Ontumwafo ndjoka Paulus a nyolele Aakolossa otayi ulike ngiini kutya otwa pumbwa okutsikila okukala twa koka pambepo?

¹⁷ Montumwafo ye ndjoka a li a nyolele Aakolossa, Paulus okwa li natango a tsu omuthindo kutya oya pumbwa okukala ya koka pambepo. Nonando oya li ya ningi Aakriste aakuluntu, Paulus okwa li e ya londodha ya kale ya kotoka kaaya nwethwe mo komadhiladhilo guuyuni. (Kol. 2:6-10) Epafras, ngoka tashi vulika oye a li e shi nawa egongalo ndyoka, okwa li ha galikana aluhe li kale ‘lya kola meitaalo,’ nenge li koke pambepo. (Kol. 4:12) Shino otashi tu longo shike? Paulus naEpafras oya li ye uvite ko kutya opo omuntu a kale Omukriste a pyokoka, okwa pumbwa okuninga oonkambadhala nokwa pumbwa ekwatho lyaKalunga. Oya li ya hala Aakolossa ya kale Aakriste ya koka pambepo, nando oya taalela omashongo.

18. Oshike tashi vulu okuningilwa Omukriste a koka pambepo? (Tala wo ethano.)

¹⁸ Paulus okwa li a londodha Aahebeli kutya Omukriste ngoka a koka pambepo, ngele ina kotoka, ota vulu okukala inaa hokiwa we kuKalunga sigo aluhe. Omukriste ota vulu okukukutika omutima gwe e ta kala itaa vulu we okwiiyela ombedhi nokudhiminwa po kuKalunga. Oshi shi okupandulwa, sho Aahebeli kaaya li monkalo ya tya ngawo. (Heb. 6:4-9) Ongiini kombinga yaamboka kunena haya kala inaayi ipyakidhila we, nenge haya kondwa e taya iyele ombedhi? Okwiiyela ombedhi kwawo neifupipiko otaku ulike kutya oya yooloka ko kwaamboka Paulus a popi kutya otaya vulu okukala inaaya hokiwa kuKalunga sigo aluhe. Ihe ngele oya galukile kuJehova, oya pumbwa okupewa ekwatho ndyoka ha gandja. (Hes. 34:15, 16) Aakuluntugongalo otaya vulu okuninga omalongekidho, opo Onzapo yimwe ya pyokoka yi ya kwathele ya koleke ishewe uupambepo wawo.

19. Otu na okwiitulila po elalakano lini?

¹⁹ Ngele oto lalakanene okukala Omukriste a koka pambepo, oto vulu okwaadha elalakano ndyoka. Tsikila okulya iikulya yopambepo ya kola e to kala ho dhiladhila ngaashi Jehova. Ngele owu li nale Omukriste a koka pambepo, kala wa kolelela waa tenguke sigo aluhe.