1. Tiheeni Yehova onaweheryeiye wa hiyo?

 NIHIKU noohakalalihaxa mu okumi wa mutheli nri nihiku na oyariwa wa mwanaya oopacerya. Mwawiihiiha, naamwi asitiithi esiveliwaka nnikwiya naya awo hanaweherya wi owo onahaala otitelela okhala mwaana mu okumi awe woothene. Mweeparipari, awo yaamukhala awuukhuwaxa wakhala wi owo hanannuwa. Moolikana, Yehova onnatepa ohakalala vaavaa nnapaceryaahu opaka owetha wahu ntoko oomuchara a Yesu, nyenya Owo hanachuna wi ntitelele okhala anamwane mmakupa oomunepani. (1 Ako. 3:1) Moohiyana ni yeeyo, owo onaniveka wi ‘nikhale atokweene.’—1 Ako. 14:20.

2. Tiheeni nnahaalaahu othokororya mmwaha yoola?

² Enataphulela eheeni okhala Mukristu awiichwelavo? Tiheeni nnaphwanelaahu weera wi nikhale Akristu awiichwelavo? Ntakhara heeni yoolya yoomunepani ti yoochuneyaxa wi nunnuwe omunepani? Nave ntakhara heeni nihinaphwanelaahu wiiroromela? Mmwaha yoola, nnahaala othokororya maakhulo a makoho ene yaala.

ENATAPHULELA EHEENI OKHALA MUKRISTU AWIICHWELAVO?

3. Enataphulela heeni okhala mutokweene mmakupa oomunepani?

³ Mpiipiliyani, masu ataphuleliwe mu Ekiriki ntoko “atokweene” ananwerya otaphulela “awiichwelavo,” “oophaameya,” ni “awaakhwanela.” a (1 Ako. 2:6) Ninnakhala atokweene naari awiichwelavo ntoko Akristu, vaavaa nnannuwaahu mmakupa oomunepani nave nnakhalaahu alopwana naari athiyana oomunepani. Eparipari wi, naamwi naakhwanihenrye yoolakelela, hannaphwanela ohiya otitelela wunnuwa mmakupa oomunepani. (1 Tim.  4:15) Oothene ahu, ophitaanyerya yaale eri amiravo, nnanwerya okhala awiichwelavo mmakupa oomunepani. Nyenya, tiheeni enooniherya wi Mukristu ohiichwelavo?

4. Tiheeni enooniherya wi Mukristu tawiichwelavo?

⁴ Mukristu onnakhala awiichwelavo vaavaa onakhaleiye mwawiiwanana ni yookhwela ya Yehova, nave hanathanla pahiru ichu seiho onachuneiye naari inamusivela opaka. Eparipari wi, owo toohiphaameya nave mu ilukuluku ikina onahaala opaka soocheka. Naamwiihiiha, owo onnooniherya mu okumi awe mmahiku oothene wi onnuupuwela ni onnapaka ichu mwawiiwanana ni yookhwela ya Muluku. Owo onwara muchu muvyaani nave ilukuluku soothene onniilipixerya wuupuwela hiiha ntoko Yehova. (Aef. 4:22-24) Owo ohuserya opaka soolakelela mwa miruku mwawiiwanana ni malakiheryo ni malamulo a Yehova, mwawiihiiha honachuneya owo okhalano elista yoorakama wi alamuleleke muupuwelo awe. Vaavaa onapakeiye yoolakelela, owo onniilipixerya wi apake mwawiiwanana ni yeeyo olakelenleiye.—1 Ako. 9:26, 27.

5. Yawoopiha taani Mukristu oohiichewelavo onahooleleiye? (Aefesu 4:14, 15)

⁵ Vakina vaya, Mukristu oohiichwelavo onanwerya okhala wookhweya owokiwa ni “ovyaka” naari “ohuwelihiwa wa mawokano” a achu yaale anamwaramwaxa sawootha, ophiyerya wi ananwerya ohuwelihiwa ni alipa oomwaryeya. b (Mwaalakhanye Aefesu 4:14, 15.) Mukristu yoowo ohiri awiichwelavo onanwerya waakhalelaka akina nrima, waakhulanaka ni akina mmulokoni, waakuvela onyeenyeya wa yeeyo achu akina anapakaaya ni omorela mmuraakhoni wa opaka yoocheka.—1 Ako. 3:3.

6. Ti mwawiihai nnahaalaahu olikanyiha wunnuwa woomunepani wa Mukristu? (Moone tho eruku.)

⁶ Ntoko noonnaahu, Piipiliya onnalikanyiha mukhalelo wa winnuwa omunepani ni mukhalelo wa winnuwa omwiilini. Mwaana onnachuneya okhapeleliwa ni ohooleliwa wa muchu mutokweene woona wi owo haanono mavyakelo a mookumini. Ntoko yootakiherya, maai onanwerya ompharela mwanawe ntata vaavaa onacupheiye muxewe. Vaavaa mwaana onannuweiye amama awe ananwerya omweemererya ocupha muxewe mukhateiye, nyenya awo ilukuluku soothene enammuupuxeryaka mwanaya oweha wu ni wu ahaakumve ocupha muxewe ni okhalano ekaasoope wa ikaaro. Voocharela,  vaavaa mwaana onannuweiye, owo onnasuwela echu yaweera vaavaa onacupheiye muxewe. Hiiha ntoko anamwane akhaani anachuna nikhaviheryo na atokweene wi esepe yawoopiha, Akristu oohiichwelavo ikwaha sincipale annachuna nikhaviheryo na Akristu awiichwelavo wi esepe sawoopiha soomunepani ni opaka soolakelela mwa miruku. Vakina vaya, vaavaa Akristu awiichwelavo anachunaaya opaka soolakelela, awo annuupuwelela mwawiiwanana ni malakiheryo a Mpiipiliyani wi ewerye okhalano muupuwelo wa Yehova vooloca sa mwaha owo nave voocharela yeereno mwawiiwanana ni yeeyo ahusenryaaya.

7. Apwanne Akristu awiichwelavo annachuna nikhaviheryo na akina?

⁷ Eyo enataphulela wi Mukristu awiichwelavo harwa achuna nikhaviheryo na mukina? Hooye. Mu ikwaha ikina, awiichwelavo tho annachuna nikhaviheryo. Nyenya munna yoowo ori oohiichwelavo onanwerya ochuna wi akina emuleeleke echu yaweera naari yoolakelela ya opaka. Mukristu awiichwelavo vakina vaya, onnavaha esisapo osuwela ni mavyakelo a akina asuwelaka wi Yehova onaweherya wi owo ‘ateexe murici awe.’—Aka. 6:5.

8. Mmikhalelo taani Akristu awiichwelavo anakhalaaya oohiyana wa mukina ni mukhwaawe?

⁸ Hiihaa ntoko oothene ahu nryaahu oohiyana mmukhalelo woomwiilini, Akristu awiichwelavo toohiyana mmikhalelo soomunepani, ntoko osuwela, olipa murima, mahala nniphwanya. Moohiyana ni yeeyo, vaavaa Akristu awiichwelavo eeli anahoolelaaya mikhalelo soovila soolikana, awo ananwerya ophiyerya makuchuwelo oohiyana, nyenya eri aweemereryeya mu Soorempwa. Eyo enneereya nthowa na yawuupuxerya ya murima yoohiyana ya muchu ti muchu. Osuwela yeela, awo annasepa othorihana mukina ni mukhwaawe wa nthowa na ohiyana yoola. Moohiyana ni yeeyo, awo anatikitheryeya mu otitelela okhala awiiwanana.—Aro. 14:10; 1 Ako. 1:10.

TIHEENI NNAPHWANELAAHU WEERA WI NIKHALE AKRISTU AWIICHWELAVO?

9. Apwanne wunnuwa omunepani pahiru onamoona weereya? Mutharihe.

⁹ Anamwane oothene moovira wa elukuluku annakhala atokweene, nyenya winnuwa mmukhalelo woomunepani tahi pahiru echu enaamoona weereya. Ntoko yootakiherya, anna ni arokora o Korintu yaaheemererya michaka saphaama nave epatisiwa, yaakhela munepa waweela nave yaaphura ni mahusiheryo a murummwa Paulo. (Saw. 18:8-11) Nyenya ancipale a yaawo, naamwi saavinrevo iyaakha emanle opatisiwa, awo nlelo yaari oohiichwelavo. (1 Ako. 3:2) Tiheeni nnaphwanelaahu weera wi eyo eheereye ni hiyaano?

10. Tiheeni nnaphwanelaahu weera wi nikhale awiichwelavo? (Yuta 20)

¹⁰ Wi nikhale awiichwelavo, wuupaceryani nnaphwanela wunnuwiha nchuno na okhala awiichwelavo. Yaale ‘anasivela ohisuwela’ nave ehinachuna oya vahoolo herwa ekhala awiichwelavo. (Mas. 1:22) Hinnachuna okhala ntoko achu yaawo yunnunwe moomalela makupa oomwiilini, nyenya enatitelela waawehererya asitiithi aya wi epake soolakelela wa yaawo. Ohiya yeeyo, hiyaano nookhalano murici wa wunnuwiha mukhalelo ahu woomunepani ni wiiliwiili olipiha onthamwene ahu ni Yehova. (Mwaalakhanye Yuta 20.) Waakhanle wi nlelo munnapaka owetha wanyu wi mukhale awiichwelavo, mumveke Yehova wi oovaheeni “nchuno ni owerya wa weerano yeeyo enamuhakalaliha.”—Afi. 2:13.

11. Nikhaviheryo taani nnavahiwaahu wi nikhale awiichwelavo? (Aefesu 4:11-13)

¹¹ Yehova hanaweherya wi nunnuwe ni okhala awiichwelavo pahiru mukhatiihu. Yaale anarumeela ntoko akukhula ni ahusiha a mmuloko Weekristu, eri ooreheryeya wi emukhaviherye mmoha ti mmoha a anna okhala “awiichwelavo” mmakupa oomunepani, ‘wi aakhwaniherye omoha wa masuwelelo awaakhwanela a mwaana  a Muluku.’ (Mwaalakhanye Aefesu 4:11-13.) Yehova tho onnavahererya munepa awe waweela wi anikhaviherye okhalano “muupuwelo wa Kristu.” (1 Ako. 2:14-16) Ohiya yeeyoru, Muluku ooveerela Soorepa mu aliivuru axexe a michaka wi anooniherye mukhalelo Yesu uupuweleiye, aaloceiye ni eereiyeno ichu variyari va muteko awe woolaleerya veelaponi yavathi. Moorweela wa ochariha mukhalelo wa wuupuwela ni opaka ichu wa Yesu, nyuwaano munanwerya waakhwaniherya yoolakelela ya okhala Mukristu awiichwelavo.

OCHUNEYA WA YOOLYA YOOMUNEPANI YOOLIPA

12. Taavi ari “mahusiheryo oopacerya vooloca sa Kristu?”

¹² Wi nikhale awiichwelavo, nnaphwanela ohiya “mahusiheryo oopacerya vooloca sa Kristu.” Ntoko yootakiherya, mahusiheryo yaala oopacerya anaphitaanyerya ocharuwa, nroromelo, opatiso ni ovinya mookhwani. (Ahe. 6:1, 2) Ala mahusiheryo makina oopacerya yaawo Akristu oothene aneemereryaaya. Ti nthowa nene, murummwa Petru aalonceiye wa mahusiheryo yaawo vaavaa aalalenryeiye mucici muncipale wa achu mu Pentekoste. (Saw. 2:32-35, 38) Nnaphwanela weemererya mahusiheryo yaala oopacerya wi niwerye okhala oohuserya a Kristu. Ntoko yootakiherya, murummwa Paulo ooloca wi muchu vyakala yoowo onakhooca nihusiheryo na ovinya mookhwani onnakhooca nroromelo mwa Kristu. (1 Ako. 15:12-14) Mwawiihiiha, hannaphwanela waakhwaneliwa pahiru ni masuwelelo oopacerya a eparipari.

13. Tiheeni nnaphwanelaahu weera wi niphurevo ni yoolya yoomunepani yoolipa yeeyo elociwe mu Ahepri 5:14? (Moone tho eruku.)

¹³ Moohiyana ni mahusiheryo oopacerya, yoolya yoolipa yoomunepani enaphitaanyerya ohiya pahiru malamulo a Yehova, nyenya tho malakiheryo awe yaawo ananikhaviherya wiiwexexa muupuwelo awe. Wi niphurevo mu yoolya yeela, nnaphwanela ohuserya, wuupuwelela ni opharihela moopwacha Masu a Muluku. Mu weerano yeela, ninniivyakiha wi nipake soolakelela seiho sinamuhakalaliha Yehova. c—Mwaalakhanye Ahepri 5:14.

14. Mmukhalelo taani Paulo aakhavihenryeiye Akristu o Korintu okhala awiichwelavo?

¹⁴ Akristu oohiichwelavo ikwaha sincipale onakhala woovila wuupuwelela malakiheryo a  Mpiipiliyani ni opharihela yaawo vaavaa anachunaaya opaka yoolakelela yammoori. Akina anuupuwela wi woona wi hinaamo nlamulo Mpiipiliyani, ananwerya opaka yeeyo anachunaaya. Akina anachuna oleeliwa yaweera naamwi ohiri woochuneya. Ntoko yootakiherya, ti yawooneya wi Akristu o Korinto yaahimveka Paulo otikitherya nlamulo waakhanle wi yaanaphwanela olyaaka yoolya yeeyo yaaveleeliwa wa soophwaniherya. Ohiya waaleela echu yaaphwanelaaya weera, Paulo aahisuwela ochuneya waya yawuupuxerya ya murima ni wi muchu ti muchu ookhalano “owerya wa othanla.” Owo aahaatharihela yaawo moorweela wa malakiheryo a Mpiipiliyani yaawo yaahaala omweemererya mmoha ti mmoha okhala mmureceleni ni yawuupuxerya ya murima awe, ahaakwaculinhe akina. (1 Ako. 8:4, 7-9) Mwawiihiiha, Paulo aanaakhaviherya Akorintu wunnuwiha makupa aya oomunepani wi eweryeke opharihela owerya waya wa wiiwexexa ohiya waaroromela akina naari waavyaka malamulo.

15. Paulo aakhavihenrye hai Akristu a Ahepri oya vahoolo omunepani?

¹⁵ Ninnahuserya nihusiheryo noochuneyaxa nenlo Paulo aarepenleiye Akristu a Ahepri. Akina hiyaatitelenle wunnuwa mmakupa aya oomunepani, mweeparipari awo ‘yaakookela ochuna waamwa nipele, ohiya soolya soolipa [soomunepani].’ (Ahe. 5:12) Awo hiyaahusenrye weemererya ichu ivyaani seiho Yehova aahusiheiye moorweela wa muloko awe. (Mas. 4:18) Ntoko yootakiherya, Akristu yaawo yaari Ayuta yaanatitelela ochariha nlamulo na Mose, naamwi variyari va iyaakha 30 muculi nlamulo nlo naaxipihiwe ni mukucho wa Kristu. (Aro. 10:4; Titu 1:10) Mweeparipari, iyaakha seihe 30 saahaavaha Akristu elukuluku yincipale wi yiiwexexe wi hiyaaphwanela ochariha nlamulo nenle! Muchu vyakala aalakhanya ekaarata yooveereliwa ya Paulo wa Aheepiri aanawerya weemererya wi liivuru yoola yookhalamo yoolya yoolipa yoomunepani. Yaari yeeyo ene Akristu yaale yaachunaaya wi elipihe nroromelo naya mmukhalelo aya wa omulapela Yehova ni okhala oolipa murima wi etitelele olaleerya moohipwacha wiiciwa ni Ayuta.—Ahe. 10:19-23.

MUSEPE OKHALA AWIIROROMELAXA

16. Ohiya pahiru okhala awiichwelavo omunepani, echu taani tho ekina nnaphwanelaahu weera?

¹⁶ Nnaphwanela opaka owetha wahu ohiya pahiru wi nikhale awiichwelavo, nto wi ntitelele okhala awiichwelavo. Ela enataphulela osepa wiiroromela. (1 Ako. 10:12) Nnaphwanela tho  ‘otitelela wiivarerya’ mukhatiihu wi nroromele waakhanle wi ninnatitelela oya vahoolo.—2 Ako. 13:5.

17. Ti mwawiihai ekaarata ya Paulo wa Akolose enooniheryaaya ochuneya waya otitelela okhala awiichwelavo?

¹⁷ Mu ekaarata awe wa Akolose, Paulo aahithariha wiili ochuneya waya wa otitelela okhala awiichwelavo. Naamwi yaari Akristu awiichwelavo, Paulo aahaaleela vooloca sa yawoopiha erivovo mu wuupuwelaka ntoko achu ahinamurumeela Yehova. (Ako. 2:6-10) Nave Epafra, yoowo aasuwenle phaama achu a mmulokoni, aanavekela moohihiyererya wi awo ‘vookuchulani ekhale awaakhwanela,’ naari awiichwelavo. (Ako. 4:12) Tiheeni nnahuseryaahu ni yeela? Ooweeli, Paulo ni Epafra yaahiiwexexa wi otitelela okhala awiichwelavo onachuneya wiilipixerya wa muchu vamoha nnikhaviheryo na Muluku. Awo yaachuna wi Akolose etitelele okhala Akristu awiichwelavo nave wi ekhale atokweene mmakupa oomunepani, moohipwacha makacamiho vyakala yaawo yaahoolelaaya.

18. Tiheeni yaahaala weereya ni Mukristu awiichwelavo? (Moone tho eruku.)

¹⁸ Paulo aahaalopola Ahepri wi Mukristu awiichwelavo aanwerya oyeleela moomalela weemereryiwa ni Muluku. Mukristu aanwerya wuumiha murima awe ophiyerya ohiwerya ocharuwa moomalela yoocheka awe wi aakhele okhurumuweliwa ni Muluku. Moohakalaliha, Ahepri hiyaavoloweliwe ni mukhalelo ene yoola. (Ahe. 6:4-9) Hanka vooloca sa yaale mmahiku ahu ari ooceecheya naari yiikariwe mmulokoni, nyenya voocharela echaruwa? Ocharuwa waya mwawiiyeviha onnooniherya wi awo toohiyana ni yaale Paulo aalonceiye mu ekaarata awe. Mwawiihiiha, vaavaa awo anamukookelaaya Yehova, awo annachuna nikhaviheryo nenlo owo onavahereryeiye. (Ese. 34:15, 16) Atokweene a mmulokoni ananwerya omwaavya munna amavyakelo wi awerye omukhaviherya okookela okhalano ikuru mmukhalelo woomunepani.

19. Yoolakelela taani nnaphwanelaahu okhalano?

¹⁹ Waakhanle wi nyuwaano munnaya vahoolo wi mukhale Mukristu awiichwelavo, munanwerya waakhwaniherya yoolakelela anyu! Mutitelele wiilyiha ni soolya soomunepani soolipa nave wiiliwiili mwiiwananiheke muupuwelo anyu ni muupuwelo wa Yehova. Waakhanle wi nyuwaano muri awiichwelavo, mutitelele okhala oohicikinyeya ntoko Mukristu awunnuwelavo.