1. Kiko Yehova ke pa nos hasi?

 ORA un yuchi nase, su mayornan ta loko i kontentu kuné. Pero, aunke nan stima nan yu resien nasí, nan no ke p’e keda un yuchi pa semper. Si nan mira ku e no ta kresiendo, nan ta kuminsá preokupá. Asina tambe, Yehova ta keda masha kontentu ora nos dal nos promé stapnan pa siña konos’é. Pero, e no ke pa nos keda te ei. (1 Kor. 3:1) Mas bien, e ke pa tur kristian bira madurá.​—1 Kor. 14:20.

2. Kiko nos lo trata den e artíkulo akí?

² Kiko ke men bira kristian madurá? Kiko nos tin ku hasi pa alkansá madures? Dikon kuminda spiritual sólido ta asina importante? Dikon nos mester sigui krese? Nos ta bai kontestá e preguntanan ei den e artíkulo akí.

KIKO KE MEN BIRA UN KRISTIAN MADURÁ?

3. Kiko ke men bira un kristian madurá?

³ Den Beibel, e palabra griego tradusí komo “madurá” por duna e idea tambe di mustra madures den kualidatnan kristian. (1 Kor. 2:6) Meskos ku un yuchi ta sigui krese te ora e bira un adulto, asina tambe, nos tin ku sigui krese den nos amistat ku Yehova pa bira kristian madurá. Pero, asta ora nos yega e meta ei nos no mester stòp di krese. (1 Tim. 4:15) Nos tur, sea hóben òf di edat, por madurá den sentido spiritual. Pero na kiko nos por mira ku nos a madurá?

4. Deskribí un kristian madurá.

 ⁴ Un kristian madurá ta hasi tur loke Yehova ta ferwagt di dje i no djis e kosnan ku ta kumbinié. Klaru ku e ta imperfekto i ta hasi fout. Pero, tur dia e ta hasi su esfuerso pa aktua di akuerdo ku Yehova su boluntat. E tin e personalidat nobo bistí i ta hasi esfuerso konstantemente pa pensa mas manera Yehova. (Efe. 4:22-24) El a siña kon pa tuma bon desishon pasó e ta tene kuenta ku Yehova su lei- i prinsipionan. P’esei e no mester di un lista largu di regla pa bis’é loke e tin ku hasi òf nò. Anto, unabes e tuma un desishon, e ta hasi su máksimo esfuerso pa kumpli kuné.​—1 Kor. 9:26, 27.

5. Ki peligernan un kristian inmadurá por hañ’é kuné? (Efesionan 4:14, 15)

⁵ Di un otro banda, un kristian inmadurá, fásilmente ta “bai tras di hende ku ta usa triki i plannan engañoso.” E ta kla pa kere hende ku bin ku teorianan di konspirashon i hende apóstata. a (Lesa Efesionan 4:14, 15.) Kisas e ta yalurs, semper ta buska problema òf ta lihé pa rabia. Ademas, fásilmente e ta hasi kos robes ora e hañ’é ku tentashon.​—1 Kor. 3:3.

6. Usa un ehèmpel pa mustra kon kresementu di un kristian ta bai. (Wak e plachi.)

⁶ Manera nos a mira kaba, Beibel ta kompará kresementu spiritual ku kresementu di un mucha pa adulto. Tin hopi kos ku mucha no sa ni ta komprondé. P’esei, nan mester di adulto pa protehá nan i guia nan. Por ehèmpel, pensa riba un mama ku ta bai krusa kaya ku su yu chikitu. E ta bisa e yu pa tene su man duru. Segun ku e yu ta bira mas grandi, e mama ta lag’é krusa kaya su so. E ta djis kòrd’é pa e wak pariba i wak pabou promé ku e krusa. Ora e yu bira adulto, e mes sa kon pa evitá peliger. Meskos ta pasa den sentido spiritual: un kristian inmadurá mayoria di biaha mester pa kristiannan madurá yud’é evitá peliger i tuma bon desishon. Di otro banda, ora un kristian madurá tin ku tuma desishon, e ta tuma tempu pa meditá riba  loke Beibel ta bisa pa asina e komprondé kiko Yehova ta pensa i djei ta hasi loke ta korekto.

7. Un kristian madurá mester di yudansa di otro ruman?

⁷ Akaso esei ke men ku un kristian madurá nunka mester di yudansa? Klaru ku nò. Tin biaha lo e tin mester di yudansa di otro kristian madurá. Pero e diferensia entre e i un kristian inmadurá ta ku e no ta ferwagt pa otro ruman bis’é kiko pa hasi ni tuma desishon p’e. Komo un kristian madurá e ta buska konseho for di ruman ku tin mas sabiduria i eksperensia kuné, pero e sa ku Yehova ta ferwagt pa e mes “karga su propio karga di responsabilidat.”​—Gal. 6:5.

8. Tur kristian madurá ta meskos? Splika.

⁸ Meskos ku no ta tur adulto parse otro, no ta tur kristian madurá tin e mesun kualidatnan. Por ehèmpel, tin ta hopi sabí, otro tin masha kurashi, algun ta hopi generoso i tin otro tin masha empatia. Ademas, den un mesun situashon, foral si ta trata asuntu di konsenshi, dos kristian madurá por yega na konklushonnan diferente pero ku ta na armonia ku prinsipio di Beibel. P’esei, niun di nan dos lo no kritiká ni husga e desishon ku e otro a tuma. Na lugá di esei, nan lo hasi esfuerso pa keda uní.​—Rom. 14:10; 1 Kor. 1:10.

KIKO NOS TIN KU HASI PA MADURÁ?

9. Outomátikamente nos ta bira kristian madurá? Splika.

⁹ Tur mucha ku tempu ta krese bira adulto. Pero kresementu den sentido spiritual no ta bai outomátikamente. Por ehèmpel, e rumannan na Korinto a aseptá e bon notisia, batisá, haña spiritu santu i siña hopi kos for di Apòstel Pablo. (Echo. 18:8-11) Ma tòg, algun aña despues di nan boutismo hopi di nan ainda tabata inmadurá. (1 Kor. 3:2) Kon nos por evitá ku esei ta pasa ku nos?

10. Kiko nos tin ku hasi pa alkansá madures? (Hudas 20)

¹⁰ Pa nos krese bira kristian madurá, pa di promé nos mester tin gana di madurá. Esnan ku ta preferá di keda mané mucha inmadurá nunka lo progresá den sentido spiritual. (Pro. 1:22, nota) Nos no ke ta manera algun adulto ku ta kore pa responsabilidat i ta ferwagt pa nan mayornan disidí pa nan. Al kontrario, nos mes ke karga nos responsabilidat i hasi sigur ku nos amistat ku Yehova ta sigui krese. (Lesa Hudas 20.) Si bo ta sinti ku ainda bo no a alkansá madures den sentido spiritual, pidi Yehova duna bo “tantu e deseo komo e poder pa hasi tur loke ta agrad’é.”​—Flp. 2:13.

11. Ki yudansa Yehova a duna nos pa bira un kristian madurá? (Efesionan 4:11-13)

¹¹ Yehova no ta ferwagt pa nos alkansá madures riba nos mes. El a sòru pa den kongregashon tin wardadó i maestro ku ta yuda nos den sentido spiritual pa asina nos bira “kompletamente desaroyá, alkansando e pleno estatura di Kristu.” (Lesa Efesionan 4:11-13.) Tambe Yehova ta duna nos su spiritu santu pa yuda nos haña “e mente di Kristu.” (1 Kor. 2:14-16) Ademas, el a duna nos e kuater Evangelionan pa mustra nos kon Hesus a pensa, papia i aktua ora e tabata riba tera. Si nos imitá Hesus su manera di pensa i aktua, nos lo bira un kristian madurá.

 KUMINDA SPIRITUAL SÓLIDO TA IMPORTANTE

12. Kiko ta “e kosnan fundamental tokante Kristu”?

¹² Pa nos alkansá madures, nos tin ku siña mas ku djis “e kosnan fundamental tokante Kristu.” Algun di e siñansanan básiko di Kristu ta arepentimentu, fe, boutismo i resurekshon. (Heb. 6:1, 2) Nos no por ta un kristian si nos no ta kere den e kosnan ei. Ta p’esei, Apòstel Pedro a papia tokante e kosnan ei ora el a prediká na un multitut riba dia di Pentekòste. (Echo. 2:32-35, 38) Pa nos bira disipel di Kristu, nos mester aseptá e siñansanan ei. Por ehèmpel, Pablo a bisa bon kla ku si nos no ta kere den resurekshon, nos no ta un berdadero kristian. (1 Kor. 15:12-14) Pero nos no mester keda kontentu ku djis e siñansanan básiko ei.

13. Kiko nos tin ku hasi pa benefisiá di e kuminda spiritual sólido menshoná na Hebreonan 5:14? (Wak e plachi.)

¹³ Diferente for di e siñansanan básiko, kuminda spiritual sólido ta inkluí tantu Yehova su leinan komo su prinsipionan ku ta yuda nos komprondé Yehova su manera di pensa. Pa benefisiá di e kuminda ei, nos tin ku studia Beibel, meditá riba dje i hasi esfuerso pa apliká loke nos a siña. Ora nos hasi esei, nos ta siña tuma desishonnan ku ta agradá Yehova. b​—Lesa Hebreonan 5:14.

14. Kon Pablo a yuda e rumannan na Korinto madurá?

¹⁴ Kristiannan ku ta inmadurá hopi biaha ta lucha pa tuma bon desishon ora no tin un lei spesífiko den Beibel ku ta bisa kiko pa hasi. Den e kasonan ei, tin kisas ta pensa ku nan por hasi loke nan ke. Algun ke pa pone un regla ora ku realmente esaki no ta nesesario. Por ehèmpel, ta parse ku e kristiannan na Korinto a pidi Pablo pa pone un regla tokante si tin mag di kome kuminda ku a ser ofresé na dios falsu. Na lugá di bisa nan loke nan tin ku hasi, Pablo a splika nan ku kada ken tin “derecho di skohe” segun su konsenshi. El a menshoná  vários prinsipio di Beibel ku lo a yuda nan tuma un desishon ku lo a laga nan keda ku un bon konsenshi i sin pone otro ruman trompeká. (1 Kor. 8:4, 7-9) Pablo tabata siñando e rumannan na Korinto pa usa Skritura pa tuma nan mes desishon, na lugá di stèns riba otro hende òf djis buska regla. Di e manera ei Pablo tabata yudando nan madurá.

15. Kon Pablo a yuda e kristiannan hebreo progresá den sentido spiritual?

¹⁵ Nos ta siña un otro lès importante den e karta ku Pablo a skirbi na e kristiannan hebreo. Algun di nan no a sigui krese den sentido spiritual; nan a “bira manera hende ku mester di lechi atrobe, no kuminda [spiritual] sólido.” (Heb. 5:12) Nan no a keda al dia ku e kosnan nobo ku Yehova tabata siña nan mediante e kongregashon. (Pro. 4:18) Por ehèmpel, hopi kristian di orígen hudiu ainda tabata insistí ku mester a kumpli ku Lei di Moises, aunke ku ya tabatin 30 aña kaba ku e sakrifisio di Kristu a hasi e lei ei inbálido. (Rom. 10:4; Tito 1:10) Sin duda 30 aña tabata sufisiente tempu pa nan aseptá e kambio! P’esei, den Pablo su karta, e tabata purba di yuda nan aseptá e bèrdatnan profundo ei. E kuminda spiritual sólido ei tabata nèt loke nan tabatin mester pa mira ku e manera nobo di adorá Yehova tabata mihó. Ademas e karta a duna nan kurashi pa sigui prediká apesar di persekushon di e hudiunan.​—Heb. 10:19-23.

SIGUI KRESE

16. Ademas di alkansá madures, kiko nos tin ku hasi?

¹⁶ Nos mester hasi esfuerso pa no solamente alkansá madures ma pa mantené asina tambe. Esei ta nifiká ku nunka nos lo pensa ku nos ta kla. Nos tin ku sigui krese. (1 Kor. 10:12) Ta masha importante pa nos “sigui saminá” nos mes pa hasi sigur ku nos ta progresando.​—2 Kor. 13:5.

17. Kiko Pablo su karta na e rumannan na Kolósas ta siña nos tokante madures?

¹⁷ Den Pablo su karta na e rumannan na Kolósas, el a enfatisá un biaha mas e  importansia di alkansá madures i no pèrd’é. Aunke ku e kristiannan ei ya tabata madurá, el a bisa nan ku nan mester tabatin masha kuidou pa no laga pensamentu di mundu engañá nan. (Kol. 2:6-10) Anto Epafras, kende tabata konosé e rumannan di e kongregashon ei bon, konstantemente tabata hasi orashon pa nan “finalmente por ta maduro.” (Kol. 4:12) Kiko esei ta siña nos? Tantu Pablo komo Epafras tabata sa ku pa nos keda madurá den sentido spiritual nos mester hasi esfuerso i konta ku yudansa di Yehova. Nan tur dos tabata ke, pa apesar di kualke difikultat ku e rumannan na Kolósas haña nan kuné, nan no pèrdè nan madures.

18. Kiko por pasa ku un kristian madurá? (Wak e plachi.)

¹⁸ Pablo a spièrta e rumannan hebreo ku si un kristian madurá no tene kuidou, e por pèrdè Dios su aprobashon pa semper. Si su kurason bira duru, e por alehá asina leu for di Yehova ku e no por arepentí i haña Dios su pordon. Danki Dios ku esei no tabata e kaso ku e rumannan hebreo. (Heb. 6:4-9) Pero kiko awe di esnan ku bira inaktivo òf ser ekspulsá pero ku despues arepentí? Wèl e echo ku nan ta arepentí, ta mustra ku nan ta humilde i no ta kai den e kategoria di esnan ku Pablo a papia di dje. Ma, ora nan bolbe serka Yehova, nan tin mester di su yudansa. (Eze. 34:15, 16) P’esei e ansianonan por asigná un ruman madurá pa yuda nan drecha nan amistat ku Yehova atrobe.

19. Ki meta nos mester tin?

¹⁹ Bo por logra bo meta di bira madurá den sentido spiritual! Sigui kome kuminda spiritual sólido i hasi esfuerso pa kada bes pensa mas manera Yehova. I si ya bo a alkansá madures komo kristian, hasi tur bo esfuerso pa keda asina pa semper!