1. Dahme Siohwa ketin kupwurki kitail en wia?

 IPWIDI en seri pwelel men iei ehu ahnsou me keieu kaperen ong pwopwoud ehu. Ahpw, mendahki pahpa nohnou poakepoake neira seri pwelelo, ira sohte men en wiewiahte seri pwelel men kohkohlahte. Ni mehlel, ira pahn pwunodki laud ma serio sohte kekeirda. Duwehte met, mendahki Siohwa ketin kupwurperenki atail tepida sukuhlki duwen ih, e sohte kupwurki kitail en uhdihsang kekeirda. (1 Kor. 3:1) Ahpw e ketin kupwurki kitail en “wiahla aramas laud kei,” de Kristian koahiek kei.—1 Kor. 14:20.

2. Dahme kitail pahn koasoiapene nan iren onop wet?

² Ia wehwehn en wiahla Kristian koahiek men? Dahme kitail anahne wia pwehn wiahla Kristian koahiek kei? Ia duwen atail onopki padahk loal kan en Paipel eh sewese atail nanpwungmwahu rehn Siohwa en kekeirda? Oh dahme kahrehda kitail en dehr medewe me kitail koahieklahr? Nan iren onop wet, kitail pahn koasoiapene pasapengpen peidek pwukat.

IA WEHWEHN EN WIAHLA KRISTIAN KOAHIEK MEN?

3. Ia wehwehn en wiahla Kristian koahiek men?

³ Nan Paipel, lepin lokaiahn Krihs me kawehwehdi ong “wiahla aramas laud” pil kak wehwehki “koahiekla.” (1 Kor. 2:6) Eri duwehte seri pwelel men eh kin kekeirda oh wiahla aramas laud, kitail pil anahne doulahte kakairada atail nanpwungmwahu rehn Siohwa. Ni ahl wet, kitail kin wiahla Kristian koahiek kei. Ni mehlel, pil ni atail lel mehn akadei wet, kitail en dehr uhdihsang wia met. (1 Tim. 4:15) Kitail koaros, pil me pwulopwul kan, kak wia Kristian koahiek kei. Ahpw ia duwen atail kak ese ma kitail koahiekehr?

4. Ia duwen omw pahn kawehwehda Kristian koahiek men?

⁴ Kristian koahiek men kin wia soahng koaros me Koht ketin  kupwurki en wia. E sohte kin wiahte dahme e men wia. Ei mehlel, pwehki e sohte unsek, e pahn wiahda sapwung kan. Ahpw ehuehu rahn, e kin medewe oh mwekid ni ahl me pahrekiong kupwuren Koht. E pwuhriongehr mour kapw oh kin nantihong pwe eh elen madamadau en pahrekiong sapwellimen Koht. (Ep. 4:​22-24) E sukuhlkier en wiahda pilipil mwahu kan sang ni eh kin medemedewe sapwellimen Siohwa kosonned kan oh ire mehlel kan. Eri e sohte anahne kosonned tohto en padahkihong ih dahme e anahne wia. Ni eh wiahda pilipil ehu, e kin doadoahk laud pwehn kapwaiada dahme e koasoanedier.—1 Kor. 9:​26, 27.

5. Dahme kakete wiawihong Kristian men me soakoahiek? (Episos 4:​14, 15)

⁵ Ahpw e kakete mengei ong Kristian soakoahiek men en kamehlele “widing” oh “koasoandi mwersuwed kan.” E kakete kamehlele nuhs oh koasoi likamw kan. De e pil kakete mweidohng irail me kesehla oh uhwongada kaudok mehlel en pitihedi ih. a (Wadek Episos 4:​14, 15.) Ele e kin peiriniong meteikan, kahrehda akamai, de keh lingeringer. Oh ele e kin kalapw wia me sapwung ni eh lelohng kasongosong.—1 Kor. 3:3.

6. Dahme kahrehda kitail kak kapahrekiong atail kekeirda oh wiahla Kristian koahiek men kekeirdahn seri men? (Pil kilang kilel.)

⁶ Nin duwen me kitail koasoiapenehr mwoweo, Paipel kin kapahrekiong atail kekeirda nin duwen Kristian kei duwehte seri men me kekeirda oh wiahla aramas laud. Mie soahng tohto me seri men sohte ese, eri e anahne aramas laud men en pere oh kaweid ih. Karasepe, nohno men ele ndaiong nah kisin serepeino en kol peho ni ara kotehla ahlo. Ni kisin serepeino eh laudla, ele nohnou pahn mweidohng en kelehpw kotehla ahlo, ahpw nohnou pahn katamankihongete en tehk mwahu me sohte sidohsa pohn ahlo. Ni serio eh wiahla aramas laud, e eseier ia duwen eh pahn soikala soangen keper kan me duwehte met. Eri duwehte seri kan ar anahne sawas sang me laud kan pwehn soikala keper, Kristian soakoahiek kan kin kalapw anahne sawas sang Kristian koahiek kan pwehn soikala keper kan me kak kauwehla arail nanpwungmwahu rehn Siohwa oh pwehn wiahda pilipil mwahu. Weksang met, ni Kristian koahiek kan ar kin wiahda  pilipil ehu, irail kin medemedewe mwahu duwen dahme Paipel mahsanih pwe irail en kak kilang ia sapwellimen Siohwa madamadau. Irail eri doadoahngki dahme re sukuhlki.

7. Kristian koahiek kan kin anahne sawas sang meteikan?

⁷ Ia duwe, met wehwehki me Kristian koahiek men sohte anahne sawas sang meteikan? Soh. Me koahiek kan pil kin anahne peki sawas ekei pak. Ahpw emen me soakoahiek ele men meteikan en padahkihong dahme e pahn wia de wiahiong eh pilipil. Weksang met, ni Kristian koahiek men eh peki sawas sang irail kan me erpit oh koahiek sang ih, e ese me e pwukoahki wiahda pein eh pilipil oh anahne “wa pein eh wisik.”—Kal. 6:5.

8. Ni ahl dah me me koahiek kan kin wekpeseng?

⁸ Duwehte mesen aramas laud koaros eh sohte duwepenehte, kaidehn Kristian koahiek koaros ahneki soangen irair kaselel tehieu. Karasepe, ekei ele ahneki erpit laud oh ekei uhdahn eimah. Mwein ekei kin uhdahn kadek, ekei pil kin kak wehwehki pepehm en meteikan. Oh ni Kristian koahiek riemen ara lelohng irair ehu me duwepenehte, ara pilipil kan kakete wekpeseng ahpw pilipil ko kin pahrekiong kaweid kan en Paipel. Met kin kalapw wiawi ni Kristian kan ar kin wiahda pilipil ehu me poahsoandahsang kadeikpen loalarail. Eri, irail sohte kin kadeik ahn emenemen pilipil ma arail pilipilo wekpeseng. Ahpw irail kin medemedewehte en kolokol arail miniminpene.—Rom 14:10; 1 Kor. 1:10.

DAHME KITAIL EN WIA PWEHN WIAHLA KRISTIAN KOAHIEK KEI?

9. Atail nanpwungmwahu rehn Siohwa kin pein kekeirda? Menlau kawehwehda.

⁹ Seri men pahn kin wie kekeirda, ahpw ahn emen nanpwungmwahu rehn Siohwa sohte kin pein kekeirda. Karasepe, Kristian kan nan Korint alehda rongamwahwo, papidaisla, alehdi sapwellimen Koht manaman, oh sukuhlki soahng tohto sang wahnpoaron Pohl. (Wiewia 18:​8-11) Ahpw sounpar kei mwurin arail papidaisla, me tohto rehrail soakoahiekte. (1 Kor. 3:2) Ia duwen atail kak tehk mwahu me met sohte pahn wiawihong kitail?

10. Dahme kitail anahne wia pwehn koahiekla? (Sud 20)

¹⁰ Pwehn koahiekla, keieu kitail anahne kakairada ineng en koahiekla. Irail kan me ‘perenki arail soakoahiek,’ de men wiewiahte aramas soakoahiek, sohte pahn koahiekla. (Lep. Pad. 1:​22, NW) Kitail sohte men duwehte aramas laud men me kin soikala pwukoa kan oh men arail pahpa oh nohno en wiahiong ih eh pilipil. Ahpw kitail men pwukoahki oh tehk mwahu me pein atail nanpwungmwahu rehn Siohwa en pousehlahte kekeirda. (Wadek Sud 20.) Ma ke kin nannantihte pwehn koahiekla, kapakapkihong Siohwa en ketin ‘kakehlakahda omw ineng en wia soahng koaros me e ketin kupwurki.’—Pil. 2:13.

11. Sawas dah kan me Siohwa ketikihda pwehn sewese kitail en kekeirda oh koahiekla? (Episos 4:​11-13)

¹¹ Siohwa sohte ketin kasik me kitail en pein kekeirda oh koahiekla. E ketikihong kitail sounsilepe kan oh sounpadahk kan nan mwomwohdiso en Kristian me kin sewese kitail en “wiahla aramas laud” kei oh “uhdahn koahiekla duwehte Krais.” (Wadek Episos 4:​11-13.) Siohwa pil ketikihda sapwellime manaman pwehn sewese kitail en ahneki “sapwellimen Krais madamadau.” (1 Kor. 2:​14-16) Patehng met, Koht ketin kaweid ntingdahn pwuhken Rongamwahu pahieu ko pwehn kasalehiong kitail mwomwen ahn Sises madamadau, koasoi, oh wiewia kan erein eh ketiket nin sampah. Sang ni atail kin kahlemengih sapwellimen Sises madamadau oh wiewia kan, kitail kak wiahla Kristian koahiek kei.

 ONOPKI PADAHK LOAL KAN EN PAIPEL KAK SAWAS

12. Ia wehwehn “tepin padahk kan duwen Krais”?

¹² Pwe kitail en kekeirda oh koahiekla, kitail pil anahne “doula sangehr tepin padahk kan duwen Krais.” Ekei tepin padahk kan me kitail sukuhlki iei me pid koluhla, pwoson, papidais, oh kaiasada. (Ipru 6:​1, 2) Padahk pwukat iei ekei tepin padahk kan me Kristian koaros kin kamehlele. Eri ni wahnpoaron Piter eh kalohk ong pokono ni rahnen Pendekos, e koasoia duwen soahng pwukat. (Wiewia 2:​32-35, 38) Kitail anahne pwungki padahk pwukat pwe kitail en wiahla sapwellimen Krais tohnpadahk. Karasepe, Pohl kasalehda me ma kitail sohte kamehlele duwen kaiasada, kitail sohte kak nda me kitail Kristian mehlel kei. (1 Kor. 15:​12-14) Ahpw kitail sohte men itarkihte padahk mengei kan en Paipel.

13. Dahme kitail anahne wia pwehn paiekihda mwenge kekeluwak me kileldi nan Ipru 5:14? (Pil kilang kilel.)

¹³ Weksang tepin padahk kan, padahk loal en Paipel kan sohte kin pidadahte sapwellimen Siohwa kosonned kan, ahpw e pil pidada ire mehlel kan me kin sewese kitail en wehwehki sapwellime madamadau. Pwehn paiekihda padahk pwukat, kitail anahne onopki, doudouloale dahme kitail wadek, oh wia uwen atail kak en kapwaiada. Ni atail wia met, kitail kin kaiahne kitail en wiahda pilipil kan me kin kaperenda Siohwa. b—Wadek Ipru 5:14.

14. Ia duwen Pohl eh sewese Kristian en Korint ko ren koahiekla?

¹⁴ Kristian soakoahiek kan kin apwalki wiahda pilipil pwung ni ahnsou me sohte mie kosonned sang nan Paipel me pidada irairo. Ma sohte kosonned sang nan Paipel, ekei ele medewe me re kak wia sohte lipilipil dahme re men wia. Ekei ele men kosonned ehu en wiawihda mehnda ma sohte anahnepe. Karasepe, e mwomwen me Kristian kan nan Korint peki Pohl en wiahda kosonned ehu me pid ma irail kak tungoale mwenge me meirongalahr ong dikedik. Pohl sohte ndaiong dahme irail en wia, ahpw e kasalehda me emenemen irail ahneki “pwuhng en pilipil” me poahsoanda sang dahme kadeikpen loalarail mweidohng irail en wia. E koasoia duwen ekei  ire mehlel kan sang nan Paipel me kak sewese irail en wiahda pilipil ehu me sohte pahn kansensuwedihada kadeikpen loalarail oh sohte pahn kadipekelekelih meteikan. (1 Kor. 8:​4, 7-9) Pohl kin padapadahkihong mehn Korint ko en doadoahngki Nting Sarawi kan pwehn wiahda pein arail pilipil, a ren dehr koapworopworki ahn meteikan, de rapahki kosonned kan. Ni ahl wet, Pohl kin song en sewese irail en koahiekla.

15. Ia duwen Pohl eh sewese Kristian en Ipru ko en kekeirda oh koahiekla?

¹⁵ Kitail sukuhlki pil ehu mehn kasukuhl kesempwal sang dahme Pohl ntingkilahng Kristian en Ipru ko. Ekei irail sohte kin kekeirda; ni mehlel irail “pwurehng pwurala anahne milik, ahpw kaidehn mwenge kekeluwak [padahk loal kan].” (Ipru 5:12) Irail sohte esehla oh pwungki padahk kapw kan me Siohwa ketin doadoahngki mwomwohdiso pwehn padahkihong irail. (Lep. Pad. 4:18) Karasepe, Kristian en Suhs tohto kin uhki duwen Kosonned en Moseso mendahki sounpar 30 samwa mwohn mwo Kosonnedo imwiseklahr pwehki sapwellimen Sises meirongo. (Rom 10:4; Taitus 1:10) Sounpar 30 wia ahnsou laud ehu ong Kristian en Suhs ko en wehwehki me irail solahr anahne idawehn Kosonnedo! Eri ahnsowo, Pohl kin songosong en sewese irail en pwungki padahk mehlel loal kan me e padapadahkihong irail. Nah kisinlikowo sewese irail en kilang me elen kaudok kapw me Siohwa ketin koasoanedier ni eh ketin doadoahngki Sises uhdahn mwahusang mwoweo. Met pil kihong irail eimah en pousehlahte kalohk mendahki uhwong sang mehn Suhs kan.—Ipru 10:​19-23.

DEHR MEDEWE ME KITAIL KOAHIEKEHR

16. Patehng atail en kekeirda oh koahiekla, dahme kitail pil anahne wia?

¹⁶ Kitail en nantihong en dehr koahieklahte, ahpw kitail en wie koakoahiekte. Eri kitail en kanahieng en dehr medewe me kitail koahiekehr oh sohte anahne pousehlahte kalaudehla atail nanpwungmwahu rehn Siohwa. (1 Kor. 10:12) Kitail anahne “pousehlahte kasawih” pein kitail pwehn tehk mwahu me kitail kin pousehlahte kekeirda.—2 Kor. 13:5.

17. Ia duwen nein Pohl kisinlikowo ong mehn Kolose ko eh kasalehda anahnepen en koakoahiekte?

¹⁷ Nan nah kisinlikowo ong mehn Kolose  ko, Pohl pwurehng kasalehda anahnepen en koakoahiekte. Mendahki irail wialahr Kristian koahiek kei, Pohl padahkihong irail en uhdahn kanahieng pwe aramas akan en ahnsowo en dehr lidipihekiniraildi madamadau en sampah. (Kol. 2:​6-10) Oh Epapras, me eselahr irail kan nan mwomwohdisou, kin kalapw kapakapki me irail en “kesihnenda ni unsek,” de irail en koahiek. (Kol. 4:12) Dahme kitail kak sukuhlkihsang met? Pohl oh Epapras wehwehki me kitail anahne sapwellimen Koht sawas ma kitail men koakoahiekte, ahpw kitail pil anahne en tehk mwahu me atail nanpwungmwahu reh en doulahte kekeirda. Ira men mehn Kolose ko en wiahte Kristian koahiek kei mendahki kahpwal kan me irail lelohng.

18. Dahme kakete wiawihong Kristian koahiek men? (Pil kilang kilel.)

¹⁸ Pohl padahkihong mehn Ipru ko me Kristian koahiek men me sohte kin kanahieng kakete luhssang sapwellimen Koht kupwuramwahu kohkohlahte. Ma e sohte kin peikiong Siohwa, e kak dohla sang oh sohla kak koluhla oh ale sapwellimen Koht mahk. Mehn Ipru ko sohte lelohng nan irair wet. (Ipru 6:​4-9) Ahpw ia duwen irail kan rahnpwukat me sohla iang kalohk oh mihting de piskenla ahpw mwuhr koluhla? Ma ni aktikitik irail koluhla, irail kasalehda me irail sohte duwehte irail kan me Pohl koasoia duwe nan nah kisinlikowo. Ahpw, ni arail pwurodo rehn Siohwa, irail anahne sawas me e kin ketikihda. (Esek. 34:​15, 16) Elder kan ele pahn koasoanehdi me emen Kristian koahiek en sewese pwehn pwurehng kakehlakahda arail nanpwungmwahu rehn Siohwa.

19. Mehn akadei dahieu me kitail en ahneki?

¹⁹ Ma ke kin nantihong kekeirda pwehn wiahla Kristian koahiek men, ke kak lel mehn akadei wet! Pousehlahte sukuhlki padahk mehlel loal kan en Paipel oh kalaudehla omw kin medewe duwen soahng kan ni ahlohte me Siohwa kin ketin wia. Oh ma ke koahiekla, wia uwen omw kak koaros en koakoahiekte ahnsou wet oh pil kohkohlahte.