1. ¿Jas kraj ri Jehová che kqabʼano?

 ARE chiʼ jun kʼulaj kkʼojiʼ jun alaj kineʼ. Sibʼalaj kekikotik y paneʼ sibʼalaj kkiloqʼoqʼej ri alaj neʼ. Are kʼu kkaj taj che amaqʼel neʼ wi na, xaneʼ kkaj che kkʼiyik. We man kkʼiyik, qas kebʼison riʼ. Junam rukʼ, ri Jehová kkikot qukʼ are chiʼ kojkʼiy pa ri qakojonik, are kʼu kraj taj che amaqʼel kojux «jachaʼ akʼalabʼ» (1 Cor. 3:1). Xaneʼ kraj che qonojel ri oj cristianos kojux jetaneʼ nim chi qajunabʼ (1 Cor. 14:20).

2. ¿Jas preguntas kqatzalij na uwach pa wajun kʼutunem riʼ?

² Pa wajun kʼutunem riʼ kqetaʼmaj na ri kirespuestas ri preguntas riʼ: ¿jas kraj kubʼij che jun cristiano kuya ta kan kʼiyem?, ¿jas rajawaxik kqabʼano rech kkʼiy más ri qetaʼmanik?, ¿jasche rajawaxik kqakoj qachuqʼabʼ che retaʼmaxik ri kʼutunem che kʼax uchʼobʼik? y ¿jasche utz taj che kqakubʼsaj qakʼuʼx chqij chbʼil qibʼ?

¿JAS KRAJ KUBʼIJ CHE JUN CRISTIANO KUYA TA KAN KʼIYEM?

3. ¿Jas kraj kubʼij che jun cristiano kkʼiy pa ri ukojonik?

³ Are chiʼ ri Biblia kubʼij che jun cristiano kuya ta kan kʼiyem are ta kchʼaw chrij ri ujunabʼ. Ri tzij «kʼiyem» pa griego xuqujeʼ kraj kubʼij che jun winaq kkʼojiʼ utz taq ubʼantajik chuwach ri Dios (Efe. 4:13). a Junam rukʼ are chiʼ jun winaq kkʼiyik y amaqʼel taj kux akʼal, ri oj xuqujeʼ amaqʼel ta kojux akʼalabʼ pa ri qakojonik, xaneʼ kojkʼiyik are chiʼ kkʼiy ri qetaʼmanik chrij ri Dios. ¿La kraj kubʼij wariʼ che ri winaq ri kʼo chi retaʼmabʼal kʼo ta chi rajawaxik  kubʼano? No. Xaneʼ rajawaxik kkʼiy más ri ukojonik chrij ri Dios (1 Tim. 4:15). Are kʼu ¿jas kqabʼan che retaʼmaxik che jun cristiano kʼiyinaq chi pa ri ukojonik, paneʼ ala, ali o nim chi ujunabʼ?

4. ¿Jas kibʼanik ri cristianos che kʼo jun ko kikojonik?

⁴ ¿Jas kkibʼan ri cristianos che kʼiynaq chi ri kikojonik? Kkibʼan pa ri kikʼaslemal ronojel ri utaqanik ri Jehová, xaq xiw ta ri kʼax ta ubʼanik. Paneʼ xa e ajmakibʼ taq winaq y kʼi kesach wi, kkikʼut rukʼ ri kkichomaj y ri kkibʼano che kkaj kkibʼan ri kubʼij ri Jehová. Kikʼexom chi ri kikʼaslemal y kkikoj kichuqʼabʼ rech ri kichomanik kjunamataj rukʼ ri uchomanik ri Dios (Efes. 4:22-24). Kechoman chrij ri utaqanik y ri upixabʼ ri Jehová are chiʼ kʼo kkaj kkichaʼ ubʼanik pa ri kikʼaslemal, rumal laʼ rajawaxik ta na kbʼix chke ri rajawaxik kkibʼano. Xuqujeʼ, are chiʼ kkichaʼ ubʼanik jun jastaq, kkikoj kichuqʼabʼ che utzʼaqatisaxik (1 Cor. 9:26, 27).

5. ¿Jas kkikʼulmaj ri cristianos che e kʼiyinaq ta pa ri kikojonik? (Efesios 4:14, 15).

⁵ Are kʼu ri cristianos che kekʼiy ta pa ri kikojonik, kʼax ta kbʼan che kisubʼik kumal «ri winaq ri kenaʼw che ubʼixik jeʼlalaj taq tzij, ri kkaj kojkikʼam bʼik pa jun bʼe jalan chi wi». Weneʼ kkikoj ronojel ri molom taq tzij che kbʼix chke y ri kkibʼij ri apóstatas (chasikʼij Efesios 4:14, 15). b Weneʼ kʼax kkinaʼ che jun chik, kkitzukuj chʼoj, aninaq kpe koyowal o kʼax ta kkibʼano keqaj pa jun mak (1 Cor. 3:3).

6. ¿Jas kʼutbʼal kojutoʼo rech kqachʼobʼo jas kraj kubʼij che kojux cristianos che ko ukojonik? (Xuqujeʼ chawilaʼ ri e wachbʼal).

⁶ Junam rukʼ ri qilom chik, ri Biblia kubʼij che ri ukʼiyem jun alaj akʼal kjunamataj rukʼ ri qakʼiyem pa ri qakojonik. Kʼo kʼi jastaq che jun akʼal retaʼm taj. Rumal laʼ, kajwataj ri utobʼanik jun winaq che che nim chi ujunabʼ. Jun kʼutbʼal, are chiʼ jun nan kkiqʼaxej jun bʼe rukʼ ri alaj ral ali, weneʼ kuchap bʼi che ri uqʼabʼ. Are chiʼ kkʼiy ri ral, weneʼ kuchap ta chi ri uqʼabʼ y kuyaʼo che kuqʼaxej ri bʼe utukel, are kʼu amaqʼel kubʼij che che qas kril na ri ubʼe.  Are chiʼ ri ali kkʼiyik, weneʼ kajwataj ta chi ri utobʼanik ri unan che. Are je kkʼulmataj pa ri qakojonik: ri cristianos che ko ta ri kikojonik kajwataj ri kitobʼanik ri nikʼaj chik chke rech knimar ri kikojonik y rech utz ri kkichaʼ ubʼanik pa ri kikʼaslemal. Are kʼu ri cristianos che kʼiyinaq chi ri kikojonik, kechoman chrij ri pixabʼ che kʼo pa ri Biblia rech kketaʼmaj ri kuchomaj ri Jehová chrij jun jastaq y je wariʼ utz ri kkichaʼ ubʼanik pa ri kikʼaslemal.

7. ¿La rajawaxik tobʼanik chke ri cristianos che kʼo jun ko kikojonik?

⁷ ¿La kraj kubʼij wariʼ che ri cristiano che ko chi ri ukojonik kajwataj ta chi tobʼanik che? No. Jujun taq mul kajwataj tobʼanik che. Are chiʼ jun cristiano majaʼ kkʼiy pa ri ukojonik weneʼ kreyeʼj che ri nikʼaj chik kkibʼij che ri rajawaxik kubʼano, are kʼu ri cristiano che kʼiyinaq chi ri ukojonik kukoj uchuqʼabʼ rech kʼo kretaʼmaj chrij ri pixabʼ che kkiya ri qachalal che che kʼo nim ketaʼmabʼal, are kʼu retaʼm che xaq utukel krukʼaj ri qas reqaʼn (Gál. 6:5).

8. ¿Jasche xaq ta e junam ri cristianos che ko kikojonik?

⁸ Konojel ta ri winaq junam kekaʼyik, xa junam rukʼ, konojel ta ri cristianos che kʼo jun ko kikojonik junam ri kibʼantajik. Jun kʼutbʼal, e jujun kʼo nim ketaʼmabʼal, nikʼaj chik kkixiʼj ta kibʼ, nikʼaj chik e sipanelabʼ y jujun chik kel kikʼuʼx chke nikʼaj chik. Xuqujeʼ weneʼ kebʼ cristianos che ko chi ri kikojonik kjunamataj ri kkikʼulmaj pa ri kikʼaslemal —más na ri jastaq che kʼo kubʼan che ri retaʼmabʼal kikʼuʼx—, are kʼu jalan ri kkichaʼ ubʼanik chkijujunal y ri Biblia kubʼij taj che utz ta ri tajin kkibʼano. Rumal laʼ, kʼo ta nijun kubʼij che utz ta ri xuchaʼ ubʼanik ri jun chik, xaneʼ ri e kebʼ kkikoj kichuqʼabʼ rech kekʼojiʼ pa junamil (Rom. 14:10; 1 Cor. 1:10).

¿JAS RAJAWAXIK KQABʼANO RECH KKʼIY MÁS RI QAKOJONIK?

9. ¿Jasche kqabʼij che jun cristiano xaq ta kʼateʼ knimar ri ukojonik?

⁹ Jun akʼal utukel kkʼiyik, are kʼu ri cristiano xaq ta utukel kkʼiy pa ri ukojonik. Jun kʼutbʼal, ri cristianos pa Corinto utz xkita ri xbʼix chke, xkibʼan kiqasanjaʼ, xqaj ri ruxlabʼixel ri Dios pa kiwiʼ y kʼi xketaʼmaj chrij ri apóstol Pablo (Hech. 18:8-11). Are kʼu, are chiʼ qʼaxinaq chi kʼi junabʼ che kibʼanom kiqasanjaʼ, kʼi chke kekʼiy ta pa ri kikojonik (1 Cor. 3:2). ¿Jas rajawaxik kqabʼano rech kqakʼulmaj ta wariʼ?

10. ¿Jas rajawaxik kqabʼano rech kojkʼiy pa ri qakojonik? (Judas 20).

¹⁰ Rech kkʼiy ri qakojonik, rajawaxik che qas kqaj kqanimarisaj. Ri kkaj che amaqʼel keʼux junam rukʼ jun alaj akʼal che kʼo ta ketaʼmabʼal, kekʼiy ta wi pa ri kikojonik (Prov. 1:22). Kqaj taj kqabʼan qe junam kukʼ jujun winaq che kʼo chi kijunabʼ are kʼu kkaj taj kechakunik y kkeyeʼj che are ri kitat kinan kbʼin chke ri rajawaxik kkibʼano. Xaneʼ rajawaxik oj kojilow ri kqabʼan che ukowirisaxik ri qakojonik (chasikʼij Judas 20). We kawilo che kʼo na rajawaxik kabʼano rech kkowir ri akojonik, chataʼ che ri Jehová che kuya pa ri awanimaʼ «ri urayixik ubʼanik ri kqaj chuwach» (Filip. 2:13).

11. ¿Jas tobʼanik kuya ri Jehová chqe rech kojkʼiy pa ri qakojonik? (Efesios 4:11-13).

¹¹ Ri Jehová kreyeʼj taj che qatukel kojkʼiy pa ri qakojonik. E uyaʼom kʼamal taq bʼe pa ri congregación rech kojkitoʼ pa ri qakojonik rech «kqariq kʼut ri tzʼaqatalaj etabʼalil re ri tzʼaqatil ri kqariq pa ri Cristo Jesús» (chasikʼij Efesios 4: 11-13). Xuqujeʼ uyaʼom ri ruxlabʼixel chqe che kojutoʼo rech «kʼo ri chomanik re ri Cristo qukʼ» (1 Cor. 2:14-16). Y xubʼano che xetzʼibʼax kan ri kajibʼ Evangelios, rech kojkunik kqetaʼmaj chrij ri xubʼan ri Jesús are chiʼ xkʼojiʼ cho ri uwach Ulew. We kqesaj uwach ri uchomanik, ri xubʼij y ri e ubʼantajik, kojkunik kojkʼiy pa ri qakojonik.

NIM UBʼANIK CHE KQAKOJ QACHUQʼABʼ CHE RETAʼMAXIK RI KʼUTUNEM CHE KʼAX KICHʼOBʼIK

12. ¿Jas riʼ «ri nabʼe taq etaʼmanik aj Cristo»?

¹² Rech kojkʼiy pa ri qakojonik, rajawaxik xaq xiw ta kqetaʼmaj «ri nabʼe taq etaʼmanik aj Cristo». E jujun chke ri e kʼutunem riʼ kchʼaw chrij ri uyaʼik kan ri makaj, ri kojonik, ri qasanjaʼ y ri kʼastajibʼal (Heb. 6:1, 2). Konojel ri qastzij cristianos rajawaxik kketaʼmaj wariʼ. Rumal laʼ, ri apóstol Pedro xuya ubʼixik wariʼ are chiʼ xutzijoj ri utzij ri Dios chke kʼi winaq pa ri Pentecostés (Hech. 2:32-35, 38). Rech jun winaq kkunik kux utijoxel ri Jesús, rajawaxik kubʼan ronojel wariʼ. Ri Pablo xubʼij che ri kkojon ta chrij ri kʼastajibʼal, kkun taj kubʼij che kʼo ukojonik (1 Cor. 15:12-14). Are kʼu, rech kkowir ri qakojonik, xaq xiw ta waʼ ri rajawaxik kqetaʼmaj.

13. ¿Jas rajawaxik kqabʼano rech kqachʼobʼ ri e kʼutunem che kʼax kichʼobʼik junam rukʼ ri kubʼij pa Hebreos 5:14? (Xuqujeʼ chawilaʼ ri e wachbʼal).

¹³ Jujun chke ri rajawaxik kqetaʼmaj are ri kʼutunem che kʼax uchʼobʼik. Wariʼ xaq xiw ta kchʼaw chrij ri e taqanik che uyaʼom ri Jehová chqe, xaneʼ xuqujeʼ ri e upixabʼ che kojutoʼ che uchʼobʼik ri kuchomaj. Rech kqetaʼmaj wariʼ, rajawaxik kqasikʼij ri Biblia, kojchoman chrij y kqabʼan pa ri qakʼaslemal ri kqetaʼmaj. Wariʼ kojutoʼo rech utz ri kqachaʼ ubʼanik pa ri qakʼaslemal (chasikʼij Hebreos 5:14). c

14. ¿Jas xubʼan ri Pablo che kitoʼik ri corintios rech xekʼiy pa ri kikojonik?

¹⁴ Jujun cristianos che kekʼiy ta pa ri kikojonik kʼax kkibʼan che uchaʼik jujun  jastaq pa ri kikʼaslemal are chiʼ kkiriq ta pa ri Biblia jun pixabʼ che keʼutoʼo. Weneʼ rumal laʼ, e jujun kkichomaj che kekunik kkibʼan ri kkaj. Weneʼ jujun chik kkaj kyaʼ pixabʼ are chiʼ qas ta rajawaxik. Jun kʼutbʼal, ri cristianos re Corinto xkibʼij che ri Pablo che kuya jun taqanik che kukʼut chkiwach we utz ktij ri kyaʼ chke ri e tyox. Ri Pablo xubʼij ta chke ri rajawaxik kkibʼano, xaneʼ xubʼij che chkijujunal kekunik kkichaʼ ri kkaj kkibʼano we kuya bʼe ri retaʼmabʼal kikʼuʼx. Xukoj kʼi pixabʼ re ri uTzij ri Dios rech utz ri kkichaʼ ubʼanik y che ri kkichaʼ ubʼanik kubʼan taj che ri nikʼaj chik keqaj pa mak (1 Cor. 8:4, 7-9). Je wariʼ ri Pablo xeʼutoʼo rech kekʼiy pa ri kikojonik, rech kketaʼmaj ri utz y ri utz taj y rech amaqʼel ta kkitaʼ chke ri nikʼaj chik ri rajawaxik kkibʼano.

15. ¿Jas xubʼan ri Pablo che kitoʼik ri cristianos hebreos rech xekʼiy pa ri kikojonik?

¹⁵ Xuqujeʼ kʼo kqetaʼmaj chrij ri xubʼij ri Pablo chke ri cristianos hebreos. E jujun kiyaʼom kan ukʼiysaxik ri kikojonik, rumal laʼ xubʼij wariʼ chke: «Rajawaxik chi na ri lecheʼ chiwe, man are ta ri wa» (Heb. 5:12). Y xkibʼan ta pa ri kikʼaslemal ri pixabʼ che xuya ri Jehová chke pa ri congregación (Prov. 4:18). Jun kʼutbʼal, e kʼi cristianos judíos kkibʼij che rajawaxik na knimax ri Taqanik che xyaʼ che ri Moisés paneʼ qʼaxinaq chi 30 junabʼ che ri Jesús xusachisaj uwach (Rom. 10:4; Tito 1:10). Qastzij riʼ che xekunik xkikʼex ri kichomanik. Rumal laʼ, ri Pablo xraj che xketaʼmaj ri kʼax uchʼobʼik che rukʼ ri ruxlabʼal ri Dios tajin kukʼut chkiwach. Are laʼ ri rajawaxik kketaʼmaj ri cristianos riʼ rech kkilo che xkʼextaj ri kbʼan che upatanexik ri Jehová y che are ri más utz na, xuqujeʼ rech kkʼojiʼ kichuqʼabʼ y rech kkiya ta kan utzijoxik ri utzij ri Dios paneʼ kbʼan kʼax chke kumal ri judíos (Heb. 10:19-23).

¿JASCHE UTZ TAJ CHE KQAKUBʼSAJ QAKʼUʼX CHBʼIL QIBʼ?

16. Are chiʼ nim chi ri qakojonik, ¿jas más rajawaxik kqabʼano?

¹⁶ Rajawaxik kqakoj qachuqʼabʼ xaq xiw ta che unimaxik ri qakojonik, xaneʼ kqaya ta bʼe che kqaj uchuqʼabʼ. Rumal laʼ maqakubʼaʼ qakʼuʼx chbʼil qibʼ (1 Cor. 10: 12). Rajawaxik amaqʼel kqilo we tajin kojkʼiy pa ri qakojonik (2 Cor. 13:5).

17. ¿Jas kukʼut ri Carta a los Colosenses chqawach chrij ri kʼiyem pa ri kojonik?

¹⁷ Pa ri Carta a los Colosenses, ri Pablo xuqujeʼ xchʼaw chrij che nim ubʼanik kojkʼiy pa ri qakojonik y kqaya ta bʼe che kqaj uchuqʼabʼ. Paneʼ ri cristianos riʼ ko chi ri kikojonik, are kʼu ri Pablo xubʼij chke che qas kkichajij kibʼ y che kkiya ta bʼe che ri kichomanik ri winaq re wajun uwach Ulew riʼ kubʼan kʼax che ri kikojonik (Col. 2:6-10). Ri Epafras, che weneʼ qas retaʼm kiwach, amaqʼel kubʼan uchʼawem pa kiwiʼ rech kekʼiy pa ri kikojonik (Col. 4:12; nota). ¿Jas kukʼut wariʼ chqawach? Che junam rukʼ ri Pablo y ri Epafras qas xketaʼmaj che rajawaxik kqakoj qachuqʼabʼ y kqataʼ ri utobʼanik ri Jehová rech kqaj ta uchuqʼabʼ ri qakojonik. Xkaj che ri colosenses kkʼiy más ri kikojonik paneʼ kkikʼulmaj jujun taq kʼax.

18. ¿Jas weneʼ kukʼulmaj jun cristiano che ko pa ri ukojonik? (Xuqujeʼ chawilaʼ ri wachbʼal).

¹⁸ Ri Pablo xubʼij chke ri hebreos che we jun cristiano kuchajij ta ribʼ paneʼ ko pa ri ukojonik, are kʼu weneʼ kubʼan jun jastaq che kubʼano che kqaj ta chi chuwach ri Jehová. We kubʼan ko che ri ranimaʼ, weneʼ kuya kan upatanexik ri Jehová, kuya ta kan ubʼanik ri itzelal y weneʼ kkuyutaj ta chi ri umak. Are kʼu ri cristianos hebreos qas ta qajinaq uchuqʼabʼ ri kikojonik (Heb. 6:4-9). Y pa ri qaqʼij kimik, ¿jas kkikʼulmaj ri kiyaʼom kan upatanexik ri Jehová o ri e esam bʼi pa ri congregación? Are chiʼ kkikʼut machʼachʼem y kkitaʼ kuybʼal kimak, kkikʼutu che kejunamataj ta kukʼ ri winaq che xubʼij ri Pablo. Are chiʼ ketzalij lo pa ri utinamit ri Dios, qas kajwataj ri utobʼanik ri Jehová chke (Ezeq. 34:15, 16). Rumal laʼ, utz che jun kʼamal bʼe kutaʼ ri utobʼanik jun qachalal che ko ukojonik, rech kekitoʼ ri qachalal riʼ rech kutzir chi jumul ri kachilanik rukʼ ri Jehová.

19. ¿Jas kqaj kqabʼano?

¹⁹ We tajin kakoj achuqʼabʼ rech katkʼiy pa ri akojonik, mayaʼ kan ubʼanik. Chakojoʼ achuqʼabʼ che retaʼmaxik ri kʼax uchʼobʼik che kʼo pa ri Biblia, rech kjunamataj ri achomanik rukʼ ri uchomanik ri Jehová. Y we kanaʼo che tajin kkʼiy ri akojonik, qas chachajij awibʼ rech kqaj ta uchuqʼabʼ.