1. Yehowa etutekie kinyi?

 KIPUNGO kimune akikashaa mulume na mukashi na muloo, nsaa y’abatanda muana aabo e na mbidi bukome. Sunga bikale’shi baledi mbafule muana aabo ngofu, ta mbalombene kukumiina’shi yawa muana ashaale nka mukinga bua losoo nya. Biabia, su yawa muana t’akulu, baledi baye be kuitatshisha na muabo mooso bua badia kuuka buakinyi yawa muana t’akulu. Mu mushindo umune, Yehowa asankaa nsaa y’etumono atukitshi matabula a kumpala buatudia kulonda Yesu, anka t’asankaa bua’shi tushaale nka bu bakinga mu kikudi nya. (1 Ko. 3:1) Yehowa etutekie’shi, ‘tuikale bena Nkidishitu bakulu.’—1 Ko. 14:20.

2. Nkonko kinyi y’atukaluula mu uno muisambo?

² Muina Nkidishitu munyingie mu kikudi anangushenaa na kukita mianda mushindo kinyi? Abitungu tukite kinyi bua kuikala bena Nkidishitu banyingie mu kikudi? Bidibua binyingie bia mu kikudi bi na bukitshishi kinyi mu kukula kuetu kua mu kikudi? Buakinyi ta bi buwa kunangushena’shi tui bapue kukula mu kikudi na ta tui na lukalo na kutungunuka na kuikitshisha ngofu bua kuikala mu kipuano ki buwa na Yehowa? Mu uno muisambo, atukaluula ino nkonko yooso.

MUINA NKIDISHITU MUNYINGIE MU KIKUDI ANANGUSHENAA NA KUKITA MIANDA MUSHINDO KINYI?

3. Nkinyi akipushisha kuikala muina Nkidishitu bakulu mu kikudi?

³ Mu Bible, kishima kia mu kina Greke kiabadi baluule bu “kukula” nkilombene kupushisha “kunyinga mu kikudi,” “kupuidika” na “kulombana.” a (1 Ko. 2:6) Biabia, nka abitungunukaa muana mukinga na kukula buadia kufika muntu mukulu, n’atue namu tutungunukieyi na kukula mu kipuano kietu na Yehowa, su tubakitshi biabia atuikala bena Nkidishitu banyingie mu kikudi. Biabia sunga tuekala bapue kulombasha kano kepatshila, t’abitungu’shi tulekie kuenda kumpala mu kikudi nya. (1 Ti. 4:15) Atue booso mpaa na baaba booso ba ki bu bana bakinga ku mbidi, tui balombene kuenda kumpala  mu kikudi. Biabia, nkinyi kilombene kuleesha’shi muina Nkidishitu kuete ende kumpala mu kikudi?

4. Muina Nkidishitu munyingie mu kikudi atunduluaa naminyi?

⁴ Muina Nkidishitu munyingie mu kikudi ekalaa na nshalelo muipushene na bioso abiamba Efile Mukulu, t’akitaa mianda nka y’akumiina aye nabene nya. Mu binyibinyi, bu biashi mupuidikie, akitshi nka bilubilo. Atungunukaa na kuleesha ku nshalelo aaye a kuifuku n’efuku’shi binangu biaye na bikitshino biaye, mbipushene na kikiebe ki’eshimba di’Efile Mukulu. Afualaa bu muntu mupia na kuikitshisha buadia kuikala anangushena bu abinangushenaa Efile Mukulu. (Ef. 4:​22-24) Elongielaa buadia kuata bitshibilo bi buwa bimeene mu miiya ya Yehowa na mayi aaye a kulonda, na te na lukalo lua’shi bamuelele mulongo wa miiya kampanda yadia kulonda pabitale kintu kampanda nya. Nsaa y’aata kitshibilo ekitshishaa buadia kuikilombasha.—1 Ko. 9:​26, 27.

5. Mmianda kinyi ilombene kufikila muina Nkidishitu shi munyingie mu kikudi? (Bena Efeso 4:​14, 15)

⁵ Mu ungi ngakuilo, muina Nkidishitu shi munyingie mu kikudi mbibofule buabadia ‘kumukumbakasha aku-n’aku, ku madimi’ na ‘ku mayele aabo aalubishaa bantu,’ na e kukumiina mianda yooso ya madimi ayituuku ipia, mianda y’abakula ku internete, na ku ma televizio, mpaa na mianda ya bantu basumbule lukumiino. b (Badika Bena Efeso 4:​14, 15.) Ekubanga kukuatshila mpaa na bangi mukao, kuibashikua, pangi bi kuikala mpaa na bibofule buadia koobola ngoo, na dingi e kukita mianda i bubi nsaa y’atuele mu kitompuanga.—1 Ko. 3:3.

6. Buakinyi mbapuandikishe kuenda kuetu kua kumpala mu kikudi na ku kukula kua muana? (Tala dingi kifuatulo.)

⁶ Nka bu biabadi bebileshe ku mbangilo, Bifundue abipuandikisha kuenda kua muntu kumpala mu kikudi na abikulaa muntu ku mbidi. Kui bintu bi bungi biabash’abauku kui muana mukinga. Ngi buakinyi abitungu muntu mukulu amukaluile na kumukunkusha. Bu kileshesho, nyina muana e kuteka muana aaye bua’shi amukuate ku mboko nsaa y’abasambuka kilayi. Apende muana aaye na kukula, nyina muana e kumulekiela aye nabene bua’shi asambukie kilayi. Anka atungunuka na kutentekiesha muana aaye’shi, otale mpese yooso ibidi kumpala kua kusambuka kilayi. Nsaa ayikulu yawa muana, abanga kusuuka aa masaku aye nabene. Nka bu muana mukinga e na lukalo na muntu mukulu bua’shi amukaluile ku masaku, muina Nkidishitu shi munyingie mu kikudi, e na lukalo namu  na bena Nkidishitu banyingie mu kikudi buabadia kumukuasha bua’shi asuukie masaku a mu kikudi, na kuata bitshibilo bi buwa. Ku lungi lupese, nsaa i muina Nkidishitu munyingie mu kikudi akiebe kuata kitshibilo, anangushenaa bi mayi a kulonda a mu Bible pabitale abinangushenaa Yehowa mu wawa muanda, na dingi atumikila yaya mianda y’alongo.

7. Bena Nkidishitu banyingie mu kikudi abekalaa na lukalo lua bukuashi bua bangi su?

⁷ Bino abikiebe kuleesha’shi muina Nkidishitu munyingie mu kikudi te na lukalo na bukuashi abufiki kui ungi muntu su? Nya. Bena Nkidishitu banyingie mu kikudi, abekalaa namu na lukalo ingi nsaa lua kuteka bukuashi. Anka muntu shi munyingie mu kikudi, akumiina’shi bangi bamulungule kiadia kukita, sunga kitshibilo kiadi mulombene kuiatshila aye nabene. Ku lungi lupese, muina Nkidishitu munyingie mu kikudi akulupilaa binangu na mianda yabadi bapue kumona kui bangi nsaa y’atundula’shi Yehowa akumiina’shi “esemuine bushito buaye aye nabene.”—Nga. 6:5.

8. Bena Nkidishitu banyingie mu kikudi mbelekeene mu mushindo kinyi?

⁸ Nka abikalaa bilekeene bantu bakulu ku mbidi, bena Nkidishitu banyingie mu kikudi abekalaa belekeene ku ngikashi bu ino: Binangu, eshimba dinyingie, kalolo na kuituula pa mbalo ya bangi. Biabia bena Nkidishitu babidi banyingie mu kikudi be kupeta muanda wi mumune, kadi baata bitshibilo bipushene na mayi a kulonda a mu Bible bilekeene. Bino abikambaa kukitshika nsaa ayikiebe bena Nkidishitu banyingie mu kikudi kuata bitshibilo bimeene pa kondo kabo k’eshimba. Kuwuka bino akuitukuasha bua kupela kutshibila bangi kiimu nsaa y’abaata bitshibilo bilekeene na bietu. Pa mutue pa biabia, abatuulu binangu biabo pa bitale kulama buumune.—Lom. 14:10; 1 Ko. 1:10.

ABITUNGU TUKITE KINYI BUA KUIKALA BENA NKIDISHITU BANYINGIE MU KIKUDI?

9. Kukula kua mu kikudi akuifikilaa su? Patuula.

⁹ Muntu mmulombene kukula ku mbidi mu kukila kua mafuku, anka kukula kua mu kikudi t’akuifikilaa nya. Bu kileshesho, bakuetu balume na bakashi ba mu kibundi kia Kodinda babaadi bakumiine mukandu wi buwa, babatshishibua, bapeta kikudi kiselele, na mianda ibaabadi bebalongieshe kui Mpoolo ibaadi ibakuashe. (Bik. 18:​8-11) Anka bingi bipua bi bungi kunyima kuabo kubatshishibua, be bungi babasheele kushi’bo kuenda kumpala mu kikudi. (1 Ko. 3:2) Bua’shi tatukutuanga kuenda kumpala mu kikudi, abitungu tukite kinyi?

10. Abitungu tukite kinyi bua kuikala bena Nkidishitu banyingie mu kikudi? (Yuda 20)

¹⁰ Bua kuenda kumpala mu kikudi, abitungu kia kumpala tukumiine atue banabene kufika bena Nkidishitu banyingie mu kikudi. Baaba booso “bashi na lushingulwilo” abakumiina kushaala mu kikudi nka bu bana bakinga, na t’abendaa kumpala mu kikudi nya. (Nki. 1:​22, EEM) T’atukumiina kuikala bu baaba bantu abakulu ku mbidi, kadi abatungunuka nka na kukulupila baledi baabo buabadia kuibatshila bitshibilo. Mu kuilekeena na biabia, abitungu tuiatshile mashito na kuikala bashinkamishe’shi kipuano kietu na Yehowa, kikuete kutungunuka na kutama. (Badika Yuda 20.) Su tubatungunuka na kuikitshisha bua kuenda kumpala mu kikudi, atutekie Yehowa’shi etupe bioso bibidi “lukalo na bukome bua kukita mianda.”—Fid. 2:13.

11. Mbukuashi kinyi buabadi betupe bua’shi tuende kumpala mu kikudi? (Bena Efeso 4:​11-13)

¹¹ Yehowa t’etutekie’shi tukule mu kikudi mu atue banabene nya. Mmuitupe balami na balongieshi mu kakongie buabadia kuitukuasha bua’shi tufikie bantu abende kumpala mu kikudi “bua kufika bu bantu banyingie mu kipimo kimune na Nkidishitu.” (Badika Bena Efeso 4:​11-13.) Yehowa etupeyaa dingi kikudi kiaye kiselele bua’shi tuikale na “binangu bia Nkidishitu.” (1 Ko. 2:​14-16) Anka Efile Mukulu baadi muyokiele ma Evanjile ananka bua kuituleesha mushindo ubaadi aunangushena Yesu, ubaadi aakula, na ubaadi akitshi mianda mu mudimo waye wa pano pa nsenga. Su wambula mushindo wa Yesu wa kunangushena na  wa kukita mianda, olombasha kepatshila koobe ka kuikala bu muina Nkidishitu munyingie mu kikudi.

BIDIBUA BINYINGIE BIA MU KIKUDI BI NA BUKITSHISHI KINYI MU KUKULA KUETU KUA MU KIKUDI?

12. “Malongiesha a ku kibangilo pabitale Nkidishitu” nkinyi?

¹² Buatudia kuenda kumpala mu kikudi, abitungu tulekie “malongiesha a ku kibangilo pabitale Nkidishitu,” kuamba’shi mmalongiesha a kitako a Nkidishitu. Bu kileshesho, mu malongiesha a kitako a Nkidishitu mui kuilanga, lukumiino, lubatshisho, na lusangukilo. (Eb. 6:​1, 2) Ano ngangi malongiesha a ku kibangilo abadi bakumiine kui bena Nkidishitu booso. Nsaa ibaadi Mpiele alungula kibumbu kia bantu mukandu wi buwa muifuku dia Pantekote, baadi muibalungule pabitale ino mianda. (Bik. 2:​32-35, 38) Abitungu tukumiine malongiesha a ku kibangilo buatudia kufika balongi ba Nkidishitu. Bu kileshesho, Mpoolo bakuile’shi su ta tui bakumiine mu lusangukilo, ta tui balombene kuakula’shi tui balongi ba Nkidishitu. (1 Ko. 15:​12-14) Abitungu tulongie mianda i bungi bua kufika bena Nkidishitu banyingie mu kikudi, kushi kuimeena penda ku malongiesha a ku kibangilo.

13. Abitungu tukite kinyi bua’shi tukuashibue na bidibua bi bukopo bia mu kikudi biabadi bateemune mu Bena Ebelu 5:14? (Tala dingi kifuatulo.)

¹³ Mu kuilekeena na ndambukiisho ya ku kibangilo, mu biakudia bia mu kikudi bi bukopo ta mui penda miya ya Yehowa, kadi mui mpaa na mayi a kulonda alombene kuitukuasha buatudia kuuka bi binangu bia Yehowa. Bua’shi bino bidibua bitukushe, abitungu tuilongiele, tunangushene, na kutumikila abiakula Eyi di’Efile Mukulu kalolo. Su tubakitshi biabia, atuilongiesha atue banabene biatudia kuiatshila bitshibilo abisankisha Yehowa. c—Badika Bena Ebelu 5:14.

14. Mpoolo baadi mukuashe bena Nkidishitu ba mu Kodinda biabadia kunyinga mu kikudi naminyi?

¹⁴ Bena Nkidishitu bashi banyingie mu kikudi, abapetaa lukalakashi lua kuata bitshibilo bi buwa nsaa ya kushi muiya kampanda wa mu Bible awakuila wawa muanda. Su ta kui muiya wa mu Bible, bangi be kumona’shi be kukita kioso ki’abakumiina. Bangi be kuteka muiya nsaa ishayitungu winyi muiya. Bu kileshesho, bena Nkidishitu ba mu Kodinda, pangi babaadi bepushe Mpoolo bua muiya pabitale bia kudia biabadi balombene kudia, na pabitale kudia biakudia bilambule ma nkishi. Bua  kuibaluula, Mpoolo baadi muibaleeshe’shi muntu ooso e na “bulungantu bua kuiatshila bitshibilo” muyile abimutumu kondo kaaye k’eshimba. Mpoolo baadi muteemune angi mayi a kulonda alombene kuibakuasha bua kuata bitshibilo bilombene kuibekasha mu butaale na kondo kaabo k’eshimba, na bishi bilombene kukokosha bangi. (1 Ko. 8:​4, 7-9) Mpoolo baadi mulambukishe bena Kodinda biabadia kufubisha Bifundue bua kuiatshila bitshibilo abo banabene, pa mutue pa kuikala abakulupila bangi bantu, sunga kukimba penda miiya. P’aye kukita bino, baadi muibakuashe buabadia kuikala banyingie mu kikudi.

15. Mpoolo baadi mukuashe bena Nkidishitu ba mu Ebelu buabadia kunyinga mu kikudi naminyi?

¹⁵ Atulongo malongiesha e na muulo ukata abaabadi bafundile bena Nkidishitu ba mu Ebelu kui Mpoolo. Bangi babaadi batungunukie nka na kubofula mu kikudi, na “babanga dingi kuikala na lukalo lua mabeele, kushi bidibua [bia mu kikudi] bibukopo.” (Eb. 5:12) Ta babaadi abalongo na kukumiina mianda ipia ibaabadi abebalongiesha kui Yehowa ku bukuashi bua kakongie nya. (Nki. 4:18) Bu kileshesho, bena Yunda be bungi babaadi nka batungunukie na kuneemeka muiya wa Moyise, mpaa na kunyima kua bipua 30 abo bapue kuiwimika kui mulambu wa Yesu Nkidishitu. (Lom. 10:4; Tit. 1:10) Bino bipua 30 bibaadi bipe bena Nkidishitu be bungi mushindo wabadia kuuka’shi, ta ba ki na dingi lukalo lua kulonda muiya wa Moyise! Muntu ooso baadi mubadikie mukanda wa Mpoolo uyokelue ubaadi mufundile bena Nkidishitu ba mu Ebelu, baadi mulombene kushinkamisha’shi uno nyi mmukanda wi na bidibua bia mu kikudi bi bukopo. Bino ngi bidibua bibaabadi nabio lukalo kui bena Nkidishitu buabadia kunyingisha lukumiino luabo, kulumbuula bena Nkidishitu kalolo, bua kuuka mushindo upia wa kulanguila, na bua kuikala n’eshimba dinyingie buabadia kutungunuka na kulungula mukandu wi buwa, sunga bibaakudi kubinguabingua akufiki kui bena Yunda.—Eb. 10:​19-23.

BUAKINYI ABITUNGU TUTUNGUNUKIE NA KUIKITSHISHA BUA KUIKALA BENA NKIDISHITU BANYINGIE MU KIKUDI?

16. Kukatusha kuenda kumpala bua kuikadika bena Nkidishitu banyingie mu kikudi, abitungu nyi tukite kinyi?

¹⁶ Abitungu tuikitshishe ngofu kushi nka penda bua kuikala bena Nkidishitu banyingie mu kikudi, anka na kuibushaadidiila. Abitungu tuikale badimukie ngofu bua kupela tala tuekala atunangushena’shi tui bapue kuikala bena Nkidishitu banyingie mu kikudi, ta tui na lukalo lua kutungunuka na kunyingisha kipuano kietu na Yehowa nya. (1 Ko. 10:12) Kadi, abitungu tutungunukie na kuitompa  atue banabene buakuikala bashinkamishe’shi tukuete kuyididiila na kuenda kumpala.—2 Ko. 13:5.

17. Mmushindo kinyi ubaadi mukanda wa Mpoolo kui bena Kolose uleeshe abitungu kushaala banyingie mu kikudi?

¹⁷ Mu mukanda wa Mpoolo kui bena Kolose baadi mushimikie dingi kasele bua kuleesha’shi abitungu tushaale nka bena Nkidishitu banyingie mu kikudi. Sunga mbibaadi bena Kolose bapue kuikadika bena Nkidishitu banyingie mu kikudi, Mpoolo baadi muibalungule buabadia kuikala bapasukie ngofu kupela kua’shi tala bekala abadimbiibua na binangu bia bantu ba mu uno ndumbuluilo e bubi. (Kol. 2:​6-10) Na Epafrase, baadi mupue kuuka’shi kakongie kabaadi akenda nka kalolo, baadi nka atekie nsaa yooso bua’shi bena Nkidishitu ‘bekale nka banyingie.’ (Kol. 4:12) Ndilongiesha kinyi di’atupe? Mpoolo na Epafrase babaadi bawukie’shi bua kushaala banyingie mu kikudi, abitekie kuikitshisha kua muntu pa bupenka na bukuashi bu’Efile Mukulu. Babaadi bakumiine’shi bena Nkidishitu ba mu Kolose bashaale nka banyingie mu kikudi, na banyiishe kukula mu kikudi sunga bapeta lukalakashi lui naminyi.

18. Nkinyi kilombene kukitshikila muina Nkidishitu munyingie mu kikudi? (Tala dingi kifuatulo.)

¹⁸ Mpoolo baadi mudimushe bena Nkidishitu banyingie mu kikudi ba mu Ebelu bua’shi bekale bapasukie ngofu, muanda be kukutua kukuminyibua n’Efile Mukulu bua losoo. Su muina Nkidishitu akutua kuteemesha dino elango ekala muende kula n’Efile Mukulu, t’apete mushindo wadia kuilanga kuishimba na kufuidibua lusa nya. P’atunangushena kalolo, bena Nkidishitu ba mu Ebelu ta babaadi mu uno muanda nya. (Eb. 6:​4-9) A bikuikala naminyi bua bano ba ano eetu mafuku bash’abafubila nyi Yehowa sunga batushibue mu tukongie, anka kunyima belanga ku mashimba? Su babelanga ku mashimba na kuiyisha kooso, babaleesha’shi ta be bu bano bantu babaabadi bafunde mu mukanda kui Mpoolo pabitale kukutua kukuminyibua n’Efile Mukulu bua losoo nya. Biabia, su babaaluka kui Yehowa, abekala na lukalo lua bukuashi bu’atuushaa. (Es. 34:​15, 16) Bakulu be kulungula mukuetu muina Nkidishitu munyingie mu kikudi mulume sunga mukashi buadia kuibakuasha bua’shi balushuule kipuano kiabo na Yehowa dingi.

19. Abitungu tuikale na kepatshila nkinyi?

¹⁹ Su okuete kuenda kumpala bua kufika muina Nkidishitu munyingie mu kikudi, we mulombene kulombasha kaaka kepatshila! Tungunuka na kudia bidibua bi bukopo, na wekale na binangu bu bia Yehowa. Su bopu kuikala muina Nkidishitu munyingie mu kikudi, kita kioso kiodi mulombene kukita bua kuibushaala kubanga binobino, mpaa na bua losoo.