1. Johova kenem nal enamen nepisem?

 BOLSIMBEL yeamb tal ngal ende kangsibel kunum, kawei wei pisbel. Ba, enjel ngaljel kankawei kanbel, anjngo kumlamb mol pundo kanapisbel yau kerma narim dal, bunuman puli kele wari sinambel. Embe ding mal, kenem pulnombol Jises karkar esmen kunum Johova ka embe ding mal pisem, ba pilgi wal er wose dongal pu waknaronamen olom kapisem. (1 Kor. 3:1) Embe pile, olom kenem ki si “pilgi-wal” Kristen dongal ende moiya.—1 Kor. 14:20.

2. Yu duwom pi enamen bar nawal omukro kanamen?

² Kristen pilgi-wal dongal moramen panimen, nalne pilnimen? Kenem nawal pende ere Kristen dongal moramen? Pilgi mokun dongal sinam konganem nalmal ere pakerondo, Kristen dongal moramen? Nalende kenem pilgi wal dongal meimen nepismen mem, tuironamen? Yu duwom pi enamen bar ki embe mal pundom sinamen.

KRISTEN PILGI WAL DONGAL MOROL PANIMEN, NAL NE PILNIMEN?

3. Kristen ende pilgi-wal dongal moramen panimen, nal ne pilnimen?

³ Baibel a, Grik yu “pilgi-wal” Kristen dongal morol panijip e, alamb ende yau dongal meim bol ding mal. a (1 Kor. 2:​6, ftn.) Kenem pilgi-wal ngal mal meimen er wose dongal pumon kunum, Kristen pilgi-wal yira na ambra wei mal meimen. Weieri, kenem pilgi wal mak pakle er wose dongal punamen, ba  erse dongal pumon mem waknaronamen. (1 Tim. 4:15) Kenem porpor, ngal meim pra, pilgi wal dongal moram kaple enem. Ba, Kristen ende pilgi wal dongal meim, nawal taninde pilkane enam?

4. Kristen ende pilgi a dongal meim nawal tadom?

⁴ Kristen ende pilgi a dongal meim, nomolpa enem bar Got kapisem mambnem porpor karkar enem. Olom olom enal nekapisem mambnem mongse ere, pende sinakerem. Sin nganj a paim pile, kunum pende ne alla enda eri. Ba, kunum kunum dingding ne olom nomolpa enem bar, Got kapisem mambnem karkar enem. Olom mambnem kolnga si kunum kunum, Johova bunuman paim mal kane, karkar ere semand punal ne enem. (Efe. 4:​22-24) Olom Johova lo na kolta yu ne kem meim, karkar enda mal duwom ka er kanim. Embe pile, olom mambnem karkar enda mal pepa boll moklo kane karkar nanem. Wal ende enal nepisem bar, ombol-ere bunuman ka karkar ere enem.—1 Kor. 9:​26, 27.

5. Kristen ende pilgi wal dongal nameim, nal ombun pende kaunom? (Efesus 4:​14, 15)

⁵ Kristen ende pilgi a dongal namei, “yubol gend” nus wusngam a, intanet a na apostet ga yu gend ninam onom mal pilgi ninda. b (Efesus 4:​14, 15 gere.) Olom alamb ende bol kumbol kestonda, yumal enda, mo wal enda er kerambe popol sinda kunum, wal napaim mal enda eri.—1 Kor. 3:3.

6. Pilgi wal wose dongal punamen nalende, ngal ende yau min wonom bol ding mal? (Piksa pra kane.)

⁶ Yero Baibel a omukro kanjin, kenem pilgi wal erse minwo dongal moramen ne esmen, ngal ende yau minwo alamb dongal meim bol ding mal. Ngal meim wal enam mal kanpolnarom, embe pile alamb dongal ende kantawol ere kolta ninam. Yu ekin ende enamen, amb ende amblem kerei, angel ambi se malma yemro punambel padom. Ba, ambel e yau dongal enem kunum, mam kankere olom olom se malma yemro punom. Ba, olom amblem nengo nim pundol kunum, kar wonam malma yemyem ai kane padom. Ambel e yau minwo alamb wei meim kunum, ombun min wonda tuironda mal olom olom kanpol tonom. Alamb dongal pakeronambe ngal ombun wonda bar tuirom mal, Kristen pilgi a  dongal nameim ga, dongal meim ga pakeronambe wal ende minwo pilgi wal tokes moksa bar kanpolto, bunuman ka karkar ere wal omuk karom. Ala wal ende, Kristen pilgi a dongal meim ga wal ende enam nepisim kunum, Johova kolta yu Baibel a nekem meim kane, karkar ka esim.

7. Kristen pilgi a dongal meim ga, ende enjep pakeronam ambsik paim mo?

⁷ Kristen ende pilgi a dongal meim, alamb ende bol pake nasinda mo? Ma. Pilgi a dongal meim ga kunum pende ne, pakeroya ne ki sinam. Ba, pilgi a dongal meim Kristen olom olom wal enda kaple enem, ba alamb ende ki si bunuman ka ngo pakeronambe enal padom. Ala Johova olom enda kaple enem nepisem wal pilkane enem, e “olom konganem” paim enda.—Gal. 6:5.

8. Pilgi a dongal ga meim nawal pende esim bar, mambnem ding mal karkar nasim?

⁸ Alamb dongal meim, nganj singarem na dongal jeljel paim. Embe ding mal, pilgi a dongal meim Kristen, mambnem aijep jeljel paim. Mambnem pende embe mal, bunuman ka, kumbol dongal mem, ende bol mambnem ka ere wal ngom mem. Pilgi a meibel Kristen tal, wal ende ding mal enjel bol min wonda, enjel mambnem jeljel ere wal omukrombel, ba Baibel yu dom mal karkar ere embe esbel. Ende embe mal, kumboljon yu dom mal karkar ere embe esbel. Enjel mambnem embe karkar esbel erkelde, ende na erind mal nim endel, naenen panadom. Embe esbel erkelde kumbol ding meibel.—Rom 14:10; 1 Kor. 1:10.

KENEM NALERE KRISTEN DONGAL MORAMEN?

9. Kenem pilgi wal wamnam er wose dongal punamen mo? Yu bolto.

⁹ Ngal meim kongar pende wopundo, yau min wo ngal dongal meim, ba pilgi wal alamb ende wamnam er wose dongal punam kaple nanem. Ende embe mal, pilgi ding angjen ambajen man Korin monjup, Baibel yu ka sinjip, nol panjip, Got murmulom dongal mo oli spirit sinjip, ala aposol Pol pu enjep yu nengom bar pake sinjip eri. (Apo. 18:​8-11) Enjep nol panjip kongar puli wopum, ba pilgi wal dongal namonjup. (1 Kor. 3:2) Mambnem embe kenem bol min woninda, kanpolto tuironamen.

10. Kenem nawal ere pilgi wal dongal moramen? (Jut 20)

¹⁰ Kenem pilgi wal dongal moramen nepinjin dal, ombol ere wose dongal punamen ne enamen. Pilgi wal er wose dongal punam bar kanapile “ngal mal meim” ga, er wose dongal punam kaple nanda. (Prov. 1:22) Ga pende yau kerma enjip, ba wal ende omukro enam bar, danjep manjep nengonambe eri enam ne esim mal, kenem embe nanamen. Kenem kenem enamen kaple enem wal ere, Johova bol senomon mem na pilgi wal er dongal enamen. (Jut 20 gere.) Nim ombol ere pilgi wal er wose dongal punal ne ermon dal, yane ne Johova ngoi olom “nim embe enal nekapisen mem, na dongal ngondo” erkaple endel.—Fili. 2:13.

11. Johova nawal pende ngonom erkelde, pilgi wal er wose dongal punamen? (Efesus 4:​11-13)

¹¹ Kenem kenem pilgi wal er wose dongal punamen ne Johova napisem. Kongrikeisen Kristen dingding ne sembar, kenem kantawol esim ga kem meim wusngam a, Johova “kenem pilgi-wal” ngo er dongal enem. Johova kenem pakerondo, “Krais mak pakle erse minwo kaple wei erim mal, kenem ding mal enamen.” (Efesus 4:​11-13 gere.) Johova murmulom dongal kenem ngo pakerondo, “Krais bunuman aiyem” simen eri. (1 Kor. 2:​14-16) Wal ende, Got murmulom dongal bu ngongo, Baibel Meitu, Mak Luk na Jon bonjup bar, Jises ya mala Baibel yu neori kel wanim kunum,  yu ne mambnem erim mal kenem duwom enamen ne boll kenjip meim eri. Embe pile, Jises yu ne mambnem erim mal karkar erin dal, erse minwo Kristen dongal ende morol.

PILGI MOKUN DONGAL SIMEN KONGANEM KA ENEM

12. “Krais bol nal yu kerma duwom erkane” pilgi ninjin?

¹² Kenem pilgi wal er wose dongal punamen nepinjin dal, wal pende enamen, “Krais bol yu kerma mongse sape nasinamen,” e Kristen porpor pulnombol yu duwom ere, pilgi nim yu. Yu kerma embe pende pulnombol yu duwom enjip embe mal, sin enjip bar kumbol to akronam, pilgi ninam, nol panam, na gonjup alamb akil seyem wonam pane duwom ere pilgi nim. (Hib. 6:​1, 2) E, Baibel yu kerma pende Kristen porpor bol duwom ere pilgi nim. Embe pile, Pentikos kunum, aposol Pol alamb puli monjup bar, yu embe mal ne enjep ngom. (Apo. 2:​32-35, 38) Yu kerma embe mal kenem duwom erkane, wo Krais disaipol moramen. Embe pile, aposol Pol embe nim, alamb ende gonjup alamb akil siyem wonam panimen pilgi nanim dal, olom Kristen wei ende nameim. (1 Kor. 15:​12-14) Embe pile, yuwei kerma mongse duwom erkanmen bar porne napisamen, yu puli duwom erkane Kristen dongal ende moramen.

13. Hirbu 5:14 pilgi mokun dongal padom, kenem nalmal er sipe pakeronda? (Piksa pra kane.)

¹³ Kenem pulnombol Baibel yu kerma pende kanjin yu, na Johova lo mongse pilnadom, Baibel a kolta yu pende meim kenem kanpolto, Johova bunuman paim pilkane enamen e, pra pildom. Pilgi mokun embe mal kenem pakeronda nepinjin dal, kunum kunum Baibel yu duwom ere, duwom esmen yu buro yem kel pile, ala duwom esmen wal konganem enamen. Kenem bunuman karkar ere wal omuk karonamen bar Johova kapisa. c—Hibru 5:14 gere.

14. Pol nalmal Korin ga pakerongo, pilgi wal er wose dongal punjup?

¹⁴ Kristen pilgi wal dongal nameim ga, kunum pende ne nomolpa esim bar wal pende min wonom wondo, nalmal enam Baibel lo kun neori nakerem bar, wal omuk nalmal  tonam kanpolnarom. Wal pende enam paim Baibel lo kun neori nakerem kunum, enjep kapisim mal enam nepisim. Ala ga pende, lo ende paim a ne ki sim. Korin Kristen monjup wal embe mal min wom, enjep Pol ki si mokun pende opa ere got gend ngonjup, nonamen kun paim moma ninjip? Pol enjep nalmal enam kun nenangom, ba kumboljop yu ninda mal karkar ere, “enam kun panda wal enam” panim. Olom Baibel kolta yu pende mom si ne, erkerambe kumboljop yu napande alamb ende bonaronam panim. (1 Kor. 8:​4, 7-9) Aposol Pol Korin gal duwom erngo pakerondo, wal omukronam bar enjep enjep Baibel yu konganem ka ere, alamb ende bol sengse namoram ne erim. Mambnem embe karkar enam pakero kelde Kristen dongal ende moram.

15. Aposol Pol Ibru Kristen ga nalmal pakerongo, pilgi wal er wose dongal punjup?

¹⁵ Pol pepe bollo Ibru Kristen ga ngom bar, kenem wal kerma ende duwom esmen eri. Ga pende pilgi wal er wose dongal punam ne nanjip, enjep pilgi mokun dongal sinam sikele ne, “ngal ende mam am anjngo nonom mal embe monjup, [pilgi] mokun dongal nanojup.” (Hib. 5:12) Kongrikeisen wusngam a Johova yuwei kolkol duwom erngom, pilsi karkar nanjip. (Prov. 4:18) Ende embe mal, Jises Krais golo kenem topro siyem kem bar, Mosis Lo pam pornim kongar 30-poro wopum, ba enjep anjngo karkar er monjup. (Rom 10:4; Tai. 1:10) Kongar 30-wopum e kanan keswei, Kristen ga Mosis Lo karkar nanam pilkane enjip ba, anjngo ere monjup! Pol murmulom dongal mo oli spirit bu ngongo, pepe boll Ibru ga ngom bar, gerjip ga pilgi mokun dongal wei sinjip. Pepe e pakerongo Kristen walem pilkane enjip Jises wusngam a, wusngam kolnga karkar ere Johova lotu erngonam kawei pam. Ala pakerongo enjep Baibel yu neori kenjip bar Juda ga opyem enjip, ba kumbol dongal wei pange akilgi ninjip.—Hib. 10:​19-23.

KENEM PILGI A DONGAL MEIMEN NEPISMEN MEM TUIRONAMEN

16. Pilgi a dongal moramen nepinjin dal, kenem nawal pende enamen?

¹⁶ Kenem pilgi a wal er wose dongal punjin dal, dongal mei ne napisel, anjngo ngo endel. E tadom kenem pilgi wal dongal meimen ne  napisamen, kunum kunum Johova bol senomon mem er dongal enamen. (1 Kor. 10:12) Kunum kunum kenem kenem “pilgi a dongal” meimen moma omuk moma omuk manero kanamen.—2 Kor. 13:5.

17. Pol pepe bollo Kolosi ga ngom bar tadom, nalmal pilgi a dongal moram ambsik pam?

¹⁷ Pol pepe bollo Kolosi ga ngom bar, pilgi wal er wose dongal punam mal yu kerma ala boll ngom. Enjep pilgi a wal erse minwo Kristen dongal-monjup ba, enem ya mala alamb bunuman na mambnem tuiro kanpol tuiroya nim. (Kol. 2:​6-10) Epapras, olom kongrikeisen a ga monjup kanpol weirom, olom yane kunum kunum ne enem “akilgi” ne Kristen dongal ende moram panim. (Kol. 4:12) Yu embe nim bar kenem nawal duwom esmen? Pol na Epapras ai pilkane enjil, kenem kenem mongse pilgi a wal er wose dongal napunamen, Got pakerondo embe enamen kaple enem. Enjel kapijil, Kolosi ga ombun nal ombun ende wonda, kauwo anjngo akilgi ne Kristen-dongal ende moram nepinjil.

18. Pilgi a dongal meim Kristen nawal enjep bol min wonda? (Piksa pra kane.)

¹⁸ Pol Ibru Kristen pilgi a dongal monjup ga, kanpol tonam yu ende nengom e, kunum pende ne enjep Got bol kamei mem, weieri wakro sikeram panim. Kristen ende olom Got yu dom karkar narim dal, erkelde Got bol se kolbar punda, olom kumbol to akrondo Johova olom alla wakronda bar kanapisa. Kenem sangiyo wei ninamen, Ibru ga mambnem embe mal karkar nanjip. (Hib. 6:​4-9) Yipe kunum Kristen pende pilgi wal dongal nameim, mo to ori kesim ba bulto kumbol to akrom kunum, kenem nalne pisamen? Enjep molmene kele kumbol to akrom tadom, Pol pepe bollo ga pende mambnem enam panim ga bol ding mal nameim. Weieri, enjep kumbol to akro seyem Johova bol wo, pake sinam ne kolto kem seimbar pake sinam. (Ese. 34:​15, 16) Elda walem wusngam erkun enambe, pilgi a dongal meim ga, enjep pakeronambe Johova bol senom mem ala er dongal enam.

19. Kenem nawal ende mak pakle er semin wonamen?

¹⁹ Nim ombol er semin wo Kristen dongal ende moral ne erin dal, mak paksen ere kaple endel, kaple enem! Kunum kunum Baibel a pilgi mokun dongal meim si, Johova bol se mand pu, olom bunuman paim mal kunum kunum karkar endel. Ala nim pilgi wal er wose dongal punpam dal, pilgi a-Kristen dongal men mal anjngo mol pundol.