1. მუს ელჷ იეჰოვა ჩქინდე?

 ᲩᲘᲚ ᲓᲝ ᲥᲝᲛᲝᲜᲯᲨᲐ სასწაულ ხიოლ მოუღ ბაღანაშ შეძენას. თინეფს მანგარო უჸორა მუნეფიშ ჭიჭე, მარა მუშო ოკო რაგად, ვაკონა, ბაღანაქ ირიათო თეცალ ჭიჭექ ქუდოსქიდას. ბაღანაქ რდუალა ვედიჭყ-და, მშობლეფ მანგარო ინერვიანენა. თეშნერო, იეჰოვაშა ხოლო მანგარ დიდ ხიოლ მოუღ, მუჟამსით ქრისტეშ მიმაჸუნალეფო გინიფრთუთ, მარა თის ვაკო, სულიერო ვემიბრდათ დო თაშ ქოფთქუათინ, თოთო ბაღანაცალო ქუდოფსქიდათ (1 კორ. 3:1). თეშ გინაწონს, თინა მირაგადუნა, ნამდა „ძინათებულ“ ქრისტიანეფო გინიფრთათ (1 კორ. 14:20).

2. მუს გუვარჩიენთ თე სტატიას?

² თე სტატიას თეცალ კითხვეფს ქუპასუხენთ: მუს ნიშნენს, ქრისტიან სულიერ გაგებათ „ძინათებულ“ რდასჷ? მუ ოკო ვაკეთათ, ნამდა მოწიფულ ქრისტიანეფო გინიფრთათ? მუჭო მოხვარუნა „მანგარ ოჭკუმალ“ სულიერო რდუალას დო მუშენ ოკო ვა მიღუდან ჩქინ დუდშა ნაბეტან იმენდ?

ᲛᲣᲡ ᲜᲘᲨᲜᲔᲜᲡ ᲡᲣᲚᲘᲔᲠ ᲛᲝᲬᲘᲤᲣᲚᲝᲑᲐ?

3. მუს ნიშნენს, ქრისტიან „ძინათებულ“ რდასჷ?

³ ბიბლიას გიმორნაფილ ბერძნულ სიტყვა, ნამუთ თარგმნილ რე, მუჭოთ „ძინათებულ“, შილებე ნიშნენდას მოწიფულს, სრულს დო დასრულებურს a (1 კორ. 2:6). მუჭოთ ბაღანა ირდუ დო ჭიე-ჭიეთ დიდო გინირთუ, თეშნერო, მუჟამსით სულიერო იბრდუთ, „ძინათებულ“ ქრისტიანო გინიფრთუთ. სულიერ რდუალაქ მოწიფულობაშ მეჭირნაფაშ უკულ ხოლო ოკო გეგრძელას (1 ტიმ. 4:15). არძას, ქოთ ჭიჭელეფს დო ქოთ დიდეფს, შემლებუნა სულიერო მოწიფულეფ ვორდათ. საინტერესო რე, მუ ოძირანს, ნამდა ქრისტიან სულიერო მოწიფულ რე?

4. მუნერ რე მოწიფულ ქრისტიან?

 ⁴ მოწიფულ ქრისტიან ღორონთიშ ხვალე თი მოთხოვნეფს ვეცვენს, ნამუთ მუს ონწყუნს; თინა ოცად, ირფელ გაკეთას, მუდგას ღორონთ თხულენს თიშე. მუშო ოკო რაგად, არასრულყოფილებაშ გურშენ მინშა ჩირთუ, მარა ირნერო ოცად, მუშ ფიქრეფ დო საქციელ ღორონთიშ მოსაწონ რდასჷ. თინა, თაშ ქოფთქუათინ, ახალ პიროვნებათ რე გინორთელ დო ირფელს ორთჷ, ნამდა მუშ აზროვნება ღორონთიშის ქუგურუას (ეფეს. 4:22—24). მოწიფულ ქრისტიანს ვასაჭირ არძა სიტუაციაშო კონკრეტულ წესეფ, ნამდა ქიმეხვადას, მუნერ საქციელ მეწონებ ღორონთის, მუშენდა დოგურაფილ აფჷ, მუჭო გიმირინუას იეჰოვაშ კანონეფ დო პრინციპეფ გადაწყვეტილებეფიშ მეღებაშ დროს. მუჟამსით მუდგაინს გეგნოჭყვიდუნს, მუდგა ძნელ ვა აფუდას, ირფელს ორთჷ, ნამდა ვეგნურთას მუშ გადაწყვეტილებას (1 კორ. 9:26, 27).

5. მუქ შილებე აღოლას ქრისტიანს, ნამუთ ვა რე მოწიფულ? (ეფეს. 4:14, 15).

⁵ მუნერ რე ქრისტიან, ნამუთ ვა რე მოწიფულ? თინა ადვილო იღორებ, ადამიანეფიშ „მზაკვრობათ დო ეშმაკურ გეგმეფით“. ხეთეშე იჯერს ტყურეფს, ჭორეფს დო მედიას გავრცელებურ არასწორ ინფორმაციას. თეცალ პიროვნება შილებე ადვილო მიოჩილითუან განდგომილეფქ ხოლო b (წეკითხით ეფესოელეფიშ 4:14, 15). მოწიფულ ვა რენ ფერ ქრისტიან მენჯარიშ რე, ხშირას უღჷ უთანხმოებეფ, ირფელშე გურ მალე დო ადვილო ეიაჸუნუ ცდუნებას (1 კორ. 3:3).

6. მუჭო მოგენს სულიერ რდუალა ბაღანაშ რდუალაშ პროცესის? (ქოძირით სურათ).

⁶ მუჭოთ ჟიშე ხოლო მიფშინეთ, ბიბლია სულიერ რდუალას ბაღანაშ რდუალას ადარენს. ბაღანას ბრელ მუდგარენ ვა უჩქჷ, ათეშენ უნჩაშეფშე ოსაჭირ დაცვება დო გეწურაფა. მაგალთო, მუჟამსით ბაღანა ჭიჭე რე, შარას გინულაშ დროს მშობელს თიშა ხე მეუთხ. მარა გემწირდუნ, თის უკვე უჩქჷ, მუჭო ეუჩილითუას დუდ თეცალ ოშქურანჯ სიტუაციეფს, ათეშენ ვასაჭირ შარაშ გინულაშ დროს დიდა დო მუმაშ ხეშ მოთხუმა, უბრალოთ მშობელქ შილებე იშენ ქუგაშინას, ნამდა ფრთხილას რდასჷ დო მელე-მოლე გემკიჯინას, მანქანა ხომ ვა მურსჷ. მუჭოთ ჭიჭე ბაღანას ოსაჭირ უნჩაშეფიშ მოხვარა, ნამდა საფრთხეს დუდ ეუჩილითუას, თეშნერო, სულიერო მოწიფულ ვა რენ ფერ ქრისტიანს ოსაჭირ მოწიფულ ქრისტიანეფიშ მოხვარა, ნამდა სულიერ საფრთხეს ეუჩილითუას  დუდ დო ჭკვერულ გადაწყვეტილებეფ მიღას. თეშ გინაწონს, მუჟამსით მოწიფულ ქრისტიანს მუდგაინ აფჷ გინაჭყვიდირალ, ფიქრენს ბიბლიურ პრინციპეფშე, ნამდა ქიგეგას, მუნერ დამოკიდებულება უღჷ იეჰოვას კონკრეტულ საკითხშე, დო უკულ თეშ მიხედვით ღებულენს გადაწყვეტილებას.

7. ქასაჭირუნო მოწიფულ ქრისტიანს შხვეფიშ მოხვარა?

⁷ ნიშნენსო თენა, ნამდა სულიერო მოწიფულ ქრისტიანს დღას ვედესაჭირებ სულიერო შხვაშ მოხვარა? მუშო ოკო რაგად, ვარ. მინშა თეცალ და დო ჯიმალეფს ხოლო ოსაჭირუნა, შხვეფს ქელაკითხუან რჩევა. იმწკუმა მუ განსხვავება რე სულიერო მოწიფულ ვა რენ ფერ დო მოწიფულ ქრისტიან შქას? მოწიფულ ვა რენ ფერ ქრისტიანს ოკო, ირო შხვაქ უწუას, მუჭო მიქცუას დო უსხუნ, მუშ გინაჭყვიდირალ ამბე შხვაქ გეგნუჭყვიდას. თეშ გინაწონს, სულიერო მოწიფულ ქრისტიანქ შილებე უმოს გამოცდილს ქელაკითხუას რჩევა, მარა თის არჩქილე, გადაწყვეტილება მუქ ოკო მიღასინ, მუშენდა იეჰოვა თიშე ელჷ, ნამდა „მუშ ოღალს“ მუ მიდეღანს (გალ. 6:5).

8. მუჭო შილებე სულიერო მოწიფულ ქრისტიანეფ ართიანშე განსხვავებულეფ რდანჷ?

⁸ მუჭოთ არძა ადამიან მეჯინელო ართნერ ვა რე, თეშნერო სულიერო მოწიფულ ადამიანეფ ხოლო შხვადოშხვანერეფ რენა. მაგალთო, ნამთინე უმოსო გიმირჩქინანს გაბედულებას, ნამთინე უმოს მომთმენ ვარდა გონიერ რე დო ნამთინეს ხოლო უმოსო შეულებ მიშართას შხვაშ მდგომარეობაშა. ხვალე თენა ვარინ, შილებე ჟირ მოწიფულ ქრისტიანქ ართ დო იგივე სიტუაციას გვალო შხვადოშხვა გადაწყვეტილება მიღას დო ნამთინ ვაწინააღმდეგუდას ბიბლიურ პრინციპეფს. თენა უმენტაშო თიმწკუმა ხვადუ, მუჟამსით საქმე სინდისით გინაჭყვიდირალ საკითხეფს ოხუ. თეცალ დროს მოწიფულ ქრისტიანეფ ვაკრიტიკენა ართიანს შხვადოშხვანერ გადაწყვეტილებაშ გურშენ. თინეფშო მთავარ რე, მშვიდობას შეუნწყუან ხე (რომ. 14:10; 1 კორ. 1:10).

ᲛᲣ ᲝᲙᲝ ᲕᲐᲙᲔᲗᲐᲗ, ᲜᲐᲛᲓᲐ ᲡᲣᲚᲘᲔᲠᲝ ᲛᲘᲑᲠᲓᲐᲗ?

9. მუშით ხვადუნო სულიერო რდუალა? გენწყით.

⁹ ბაღანა დრო მეურსუნ თეშ ირდუ დო თე პროცეს მუშით მეურს, მარა სულიერ რდუალა თაშ მუთუნით ვა მოხვადუ. მაგალთო, კორინთელ და დო ჯიმალეფქ ქიგეგეს სახიოლო ამბე, დინათეს, წმინდა შურ მიღეს დო პავლე მოციქულშე ხოლო ბრელ მუდგარენ დიგურუეს (საქ. 18:8—11). მარა ნათუაშე წანეფიშ მიკულაშ უკულ ხოლო სულიერო ბაღანეფო ქუდოსქიდეს (1 კორ. 3:2). მუ ოკო ვაკეთათ, ნამდა ჩქინ სულიერ რდუალაქ ვა გაჩერდას?

10. მუ ოკო ვაკეთათ, ნამდა ქიმვოჭირინუათ მოწიფულობას? (იუდ. 20).

¹⁰ სულიერო მოწიფულეფო გინიფრთათინ, პირველ რიგის საჭირო რე, მთელ გურით მოკოდან თენა. თის, მიდგას შუროთ ვაწუხენს, გამოუცდელ რენ დო უსხუნ, სულიერო „ბაღანათ“ დოსქიდას, დღას ვეშიალებე მოწიფულ ქრისტიანო გინორთა (იგავ. 1:22). ნამთინე ძინათებულ რე, მარა დიდა დო მუმაშ უმშო, მუშით მუთუნ ვეგნაჭყვიდირე. ვა მოკონა, თეცალეფს ვაგურათ. მოკონა, ჩქინ სულიერ რდუალაშე პასუხიშმგებლობა ჩქინ დუდშა გებჭოფათ დო შხვაშ იმენდო ვა ვორდათ (წეკითხით იუდაშ 20). სულიერ მოწიფულობაშა დიო ვა გაფჷ მეჭირნაფილინ ქარწყექ-და, ქილოც დო ქოთხი იეჰოვას, ქიმერჩას „ქოთ სურვილ დო ქოთ მოქმედებაშ ძალა“ (ფილ. 2:13).

11. მუჭო მოხვარუნა იეჰოვა, სულიერ მოწიფულობას ქიმვოჭირინუათ? (ეფეს. 4:11—13).

¹¹ იეჰოვა ველჷ, ნამდა ხვალე ჩქინით ქიმვოჭირინუანთ მოწიფულობას. კრებას პჸუნა ჭყიშეფ დო მასწავლებერეფ, მით მომზადებულ რენა, თითოულს ქიმმეხვარან, გინიფრთათ სულიერ გაგებათ „ძინათებულეფო“ დო თიცალ მოწიფულეფო, მუნერით ქრისტე რდჷ (წეკითხით ეფესოელეფიშ 4:11—13). თეწკუმა ართო, იეჰოვა მარზენა წმინდა შურს, ნამდა „ქრისტეშ აზროვნება“ მიღუდან (1 კორ. 2:14—16). ხოლო ართ, მუდგათ იეჰოვა მოხვარუნა, რე თიშ შთაგონებათ ჭარილ ოთხ სახარება,  სოვრეშეთ ბგებულენთ, მუჭო ფიქრენდჷ, იჩიებუდ დო იქციებუდ იესო დედამიწას მსახურებაშ დროს. ქრისტეცალ აზროვნებაშ გავითარება დო თიცალო მოქმედება ქიმმეხვარებუნა, მოწიფულ ქრისტიანეფო გინიფრთათ.

ᲛᲣსხᲘᲗ ᲛᲜᲘᲨᲕᲜᲔᲚᲝᲕᲐᲜ ᲠᲔ „ᲛᲐᲜᲒᲐᲠ ᲝᲭᲙᲣᲛᲐᲚ“?

12. ნამ რე ქრისტიანობაშ მთავარ გურაფეფ?

¹² სულიერო მოწიფულეფო გინიფრთათინ, ოკო ვეგეფსქიდათ თი რჩქინას, ნამუთ ქრისტეშ გურშენ დაჭყაფუს მიბღით. მაგალთო, გებგით, მუს ნიშნენს დაშებულიშ ნარღება, რწმენა, ნათუა დო გათელება (ებრ. 6:1, 2). მუშო ოკო რაგად, თენეფ ქრისტიანობაშ მთავარ გურაფეფ რე დო აუცილებერო ოკო ბწანდან, მუდგაქ თევრეშე ხოლო ქიძირ, ნამდა ჟარნეჩდომავითა დღაშ დღახუს აკოშაყარელ ხალხწკუმა ქადაგებაშ დროს პეტრექ ზუსტას თე საკითხეფიშ გურშენ იჩუ (საქ. 2:32—35, 38). პიროვნებაქ თე მთავარ გურაფეფ ვერწმუნ-და, ვეჸუაფ ქრისტეშ მოწაფე. მაგალთო, პავლექ თქუ, ნამდა მიდგაინს გათელებაშ ვა წანდ-და, თინა მთელ ქრისტიანულ რწმენაშ წინააღმდეგ მიშჷ (1 კორ. 15:12—14). თაშ ნამდა, ოკო ბწანდან მთავარ ქრისტიანულ გურაფეფ, მარა ხვალე თეს ოკო ვეგებჯერდათ.

13. მუ ოკო ვაკეთათ, ნამდა მიბღათ „მანგარ სულიერ ოჭკუმალ“, ნამდგაშეთ ებრაელეფიშ 5:14-ის მეურს ჩიება? (ქოძირით სურათ).

¹³ ძირითად ქრისტიანულ გურაფეფიშ გინაწონს, „მანგარ სულიერ ოჭკუმალშა“ ხვალე იეჰოვაშ კანონეფ ვარინ, პრინციპეფ ხოლო მიშურს, ნამუთ მოხვარუნა, ქენვანჭათ თიშ აზროვნებას. მანგარ ოჭკუმალ მიბღათინ, საჭირო რე, იბგურუათ ღორონთიშ სიტყვა, იფიფქრათ თიშე დო გეგმიბრინუათ ნაგურეფ. თენა ქიმმეხვარებუნა ღორონთიშ მოსაწონ გადაწყვეტილებეფიშ მეღებას c (წეკითხით ებრაელეფიშ 5:14).

14. მუჭო მეხვარ პავლექ კორინთელ ქრისტიანეფს, სულიერო მირდესკო?

¹⁴ სულიერო მოწიფულ ვა რენ ფერ ქრისტიანს მანგარო უჭირს, გეგნოჭყვიდას მუდგაინ, მუჟამსით კონკრეტულ კანონ ვა არსებენს დო პრინციპ ოკო გიმირინუას. თეცალ დროს, შილებე მიდგაინქ იფიქრას, ნამდა რახანს კონკრეტულ კანონ სოთინ ვა ჭარჷ, შეულებ მუს მუჭო უსხუნუნ თეშ მიქცუას. ნამთინე ხოლო ირფელშენ კანონს ითხინს, თიმწკუმა ხოლო, მუჟამსით შურო ვა რე საჭირო, მუდგაინ კანონ არსებენდას. მაგალთო, მუჭოთ იძირენ, კორინთელ ქრისტიანეფ პავლეშე ითხინდეს, თიქ  გეგნუჭყვიდუკო, ჭკუმესკო დო ვარ კერპთშენაწირ ოჭკუმალ. პავლეს ვართ თეშ უთქუალ დო ვართ თაშ. თიქ ქაძირუ კორინთელეფს, ნამდა ირკოჩის უღუდ უფლება, მუშ სინდისით გეგნოჭყვიდუკო, მუჭო მიქციებუდ. თინეფშა მეჭარილ წერილს პავლექ ქუგაშინ თინეფს ბიბლიურ პრინციპეფ, ნამდგაშ მოხვარათ შეიალებედეს თე საკითხ თეშ გეგნოჭყვიდესკო, ნამდა ვართ სინდისიქ შეაწუხესკო დო ვართ შხვეფ დაბრკოლესკო (1 კორ. 8:4, 7—9). თეშნერო პავლექ მეხვარ კორინთელეფს სულიერ რდუალას, ნამდა შეულებუდესკო გადაწყვეტილებეფიშ მუნეფიშით მეღება დო შხვეფს ვემიოჯინესკო ვარდა ირფელშენ კანონეფ ვემითხისკო.

15. მუჭო მეხვარ პავლექ ებრაელ ქრისტიანეფს სულიერო რდუალას?

¹⁵ ებრაელეფშა მეჭარილ წერილ ხოლო მნიშვნელოვან გაკვეთილს მოგურუანა. თე კრებას ნამთინეს მეტებულ აფუდ სულიერ რდუალა დო „მანგარ [სულიერ] ოჭკუმალ ვარინ, კინ ბჟა“ ოსაჭირუდ (ებრ. 5:12). თინეფ ჯვეშ გურაფეფს რდესჷ ინოსქილადირ დო უჭირდეს თი ახალ გურაფეფიშ მეჸუნა, ნამდგას ქრისტიანულ კრებაშე ღებულენდეს (იგავ. 4:18). მაგალთო, ნამთინე ქრისტიან ამტკიცენდჷ, ნამდა აუცილებერ რდჷ მოსეშ კანონიშ დაცვება, ვარინ თე კანონ იესოშ მსხვერპლით უკვე 30 წანაშ გაუქმებულ რდჷ (რომ. 10:4; ტიტ. 1:10). წერმიდგინით, თე ქრისტიანეფს 30 წანაქ ვა უბაღეს თიშ მიოხვამლაფარო, ნამდა მოსეშ კანონშა მეტო ვა აფუდეს მიოჸუნალ. ებრაელეფშა მეჭარილ წერილს პავლექ ქიმეხვარ თინეფს, ქინანჭესკო თე საკითხის, მუთ თინეფშო, თაშ ქოფქთუათინ, „მანგარ ოჭკუმალ“ რდჷ. თენა ქიმეხვარებუდ ებრაელეფს, ქინანჭესკო, ნამდა თაყვანიშმცემლობაშ თე ახალ ფორმა, ნამუთ იეჰოვაქ იესოშ ხეთ მიშეღ, ბრელით უჯგუშ რდჷ. თეწკუმა ართო, თე „მანგარ სულიერ ოჭკუმალ“ ქიმეჩანდჷ თინეფს გაბედულებას, ნამდა იუდეველეფიშ წინააღმდეგობაშ უმკუჯინუო, გაგრძელესკო ქადაგება (ებრ. 10:19—23).

ᲕᲐᲘᲦᲣᲓᲐᲜ ᲗᲥᲕᲐᲜ ᲓᲣᲓᲨᲐ ᲜᲐᲑᲔᲢᲐᲜ ᲘᲛᲔᲜᲓ

16. მუ ოკო ვაკეთათ სულიერ მოწიფულობაშ მეჭირნაფაწკუმა ართო?

¹⁶ თიშ უკულ ხოლო, მუთ ქიმვოჭირინუანთ სულიერ მოწიფულობას, ბრელ ოკო იფხანდათ, ნამდა ვა ვოდინუათ თინა. ათეშენ დღას ოკო ვეფიფქრათ, ნამდა რახანს სულიერო მოწიფულეფ ვორეთ, ანწ ვა მოსაჭირუნა იეჰოვაწკუმა ურთიერთობაშ გამანგარება (1 კორ. 10:12). ირიათო ოკო „შევამოწმათ“ ჩქინ დუდ, ნამდა ქობძირათ, კინ ქუვაგრძელენთ დო ვარ სულიერო წიმი ულას (2 კორ. 13:5).

17. მუჭო იძირე კოლოსელეფშა მეჭარილ პავლეშ წერილშე, ნამდა საჭირო რე, ვა ვოდინუათ მოწიფულობა?

 ¹⁷ კოლოსელეფშა მეჭარილ პავლეშ წერილშე ხოლო ირწყებე, ნამდა საჭირო რე, ვა ვოდინუათ სულიერ მოწიფულობა. თიშ უმკუჯინუო, ნამდა თე ქრისტიანეფ სულიერო „ძინათებულეფ“ რდესჷ, პავლექ გაფრთხილ თინეფ, ნამდა ვემეჩირთესკო ქვეყნიურ აზროვნებათ (კოლ. 2:6—10). ეპაფრა ხოლო, ნამუთ ჯგირო იჩინენდკონ იჸიდ თე და დო ჯიმალეფს, ირიათო ლოცულენდჷ, ნამდა „ბოლოშაᲮ მოწიფულეფქ“ ქუდოსქიდესკო (კოლ. 4:12). მუს ბგურაფლენთ თავრეშე? ქოთ პავლეს დო ქოთ ეპაფრას ჯგირო არჩქილედეს, ნამდა ქრისტიანქ სულიერო მოწიფულო ქუდოსქიდასინ, ღორონთიშ მოხვარაწკუმა ართო, საჭირო რე, მუქ ხოლო ბრელ იხანდას. თინეფს მთელ გურით ოკოდეს, კოლოსელეფქ მოწიფულეფო ქუდოსქიდესკო თი სირთულეეფიშ უმკუჯინუო, ნამუთ უღუდეს.

18. Მუქ შილებე აღოლას მოწიფულ ქრისტიანს? (ქოძირით სურათ).

¹⁸ პავლექ გაფრთხილ ებრაელეფ, ნამდა მოწიფულ ქრისტიანქ ხოლო შილებე სადღამუშოთ მიოდინუას ღორონთიშ მოწონა. შილებე ქრისტიანქ თეშ ჩეთხუას ღორონთის დო გურქ თეშ გოურგიდას, ნამდა შურო ვა ნარღენდას დაშებულს დო ღორონთშე პატიებაშ მეღებას ვაცადუდას. ჯგირ რე, ნამდა ებრაელეფ გვალო თეცალ მდგომარეობას ვა რდესჷ (ებრ. 6:4—9). მუშ რაგად შილებე ამდღარ ქრისტიანეფშე, მიდგაქ არააქტიურეფო გინირთეს ვარდა გერიცხეს, მარა უკულ თანდაბლურო ინარღეს მუნეფიშ საქციელ? თეთ ოძირანა, ნამდა თიცალეფ ვა რენა, მიდგაშეთ პავლექ ებრაელეფშა მეჭარილ წერილს თქუ, ნამდა სადღამუშოთ აფუდეს დინაფილ ღორონთიშ მოწონა. მარა, მუჟამსით თინეფ დართუნა იეჰოვას, მოხვარა იშენით დესაჭირებუნა (ეზეკ. 34:15, 16). ათეშენ უხუცესეფქ შილებე ქოთხუან ნამდგაინ გამოცდილ ქრისტიანს, სულიერო ქელუდირთას თეცალ პიროვნებას.

19. მუ მიზან ოკო მიღუდან?

¹⁹ მოწიფულობაშა ქინჭუაფუთ-და, რჯერდან, თქვა შეილებუნა თე მიზანიშ მეჭირნაფა! ქეცადით, „მანგარ სულიერ ოჭკუმალ“ მიღათ დო ირიათო უმოსო ქოუგურუათ თქვან აზროვნება იეჰოვაშის. თე მიზანშა უკვე მეჭირნაფილ ქუგაფუნან-და, ირფელ გაკეთით, ნამდა ვადინუათ სულიერ მოწიფულობა.