1. ¿Xi ribeza Jehová gúninu?

 TOBI de ca dxi jma riecheʼ ti guendaxheelaʼ nga ora rale xiiñicaʼ. Nabé nadxiicabe baʼduhuiiniʼ stícabe, peru qué racaláʼdxicabe guiaanabe zacá, purtiʼ pa gúʼyacabe cadi caniisibe la? guizáʼ ziuucabe xizaa. Zaqueca nga Jehová, guizáʼ riéchebe ora gúʼyabe ziniisinu lu Stiidxabe. Peru qué racaláʼdxibe gácanu casi «binni ni deruʼ caniisi» o «casi xcuidi» (1 Cor. 3:​1, nota). Ribézabe guiníʼ ique guiráʼ ca xpinni Cristu «casi riníʼ ique ti binni huaniisi» (1 Cor. 14:20).

2. ¿Gunáʼ nga ca pregunta chiguicábinu lu artículo riʼ?

² Lu artículo riʼ chiguicábinu caadxi pregunta: ¿xi riníʼ gaca ti xpinni Cristu ti binni huaniisi?, ¿xi caquiiñeʼ gúninu para gácanu ti xpinni Cristu ni maʼ biniisi lu Stiidxaʼ Dios?, ¿xiñee nabé risaca guidoʼno guendaró espiritual ni guquidxi fe stinu? ne ¿xiñee cadi naquiiñeʼ gápanu confianza laca laanu?

¿XI RINÍʼ GACA TI XPINNI CRISTU TI BINNI HUANIISI?

3. ¿Xi riníʼ gaca ti xpinni Cristu ti binni huaniisi?

³ Ora ruzeeteʼ Biblia de ti xpinni Cristu ni maʼ biniisi lu Stiidxaʼ Dios cadi caníʼ diʼ ni de iza nápabe. Lu Biblia, diidxaʼ griegu ni guca traducir «ti binni huaniisi» laaca riniʼni de tuuxa ni «naguidxi fe stiʼ» (1 Cor. 2:6). a Cásica reeda gaca ti baʼduhuiiniʼ ti binni huaniisi, zaqueca nga laanu, naquiiñeʼ guiniisinu lu Stiidxaʼ  Dios, ne para gúninu ni naquiiñeʼ chuʼnu jma gaxha de Jehová, zacatiʼ zusaana de gácanu casi xcuidi. ¿Ñee riníʼ nga ora maʼ biniisinu lu Stiidxaʼ Dios maʼ qué zúninu gastiʼ pur fe stinu la? Coʼ, purtiʼ ra tidiʼ dxi naquiiñeʼ guni progresarnu jma (1 Tim. 4:15). Peru ¿ximodo nánnanu pa maʼ biniisi ti xpinni Cristu lu Stiidxaʼ Dios neca joven laabe o maʼ huaniisibe yaʼ?

4. ¿Ximodo naca ca xpinni Cristu ni maʼ biniisi lu Stiidxaʼ Dios?

⁴ ¿Ximodo naca ca xpinni Cristu ni maʼ biniisi lu Stiidxaʼ Dios? Rinándacabe guiráʼ ca ley stiʼ Jehová ne cadi ca ni riuulaʼdxisícabe. Dxandíʼ, neca binni ruchee laacabe, pur modo nabánicabe rúnicabe stipa gusihuínnicabe riníʼ íquecabe ne rúnicabe ni ribeza Jehová guni ca xpinni. Maʼ nabánicabe galán yanna ne guiráʼ dxi rúnicabe stipa guiníʼ íquecabe modo riníʼ ique Dios (Efes. 4:​22-24). Maʼ biziidicabe guicaacabe decisión jneza purtiʼ rinándacabe ca ley ne ca principiu stiʼ Jehová, nga runi cadi caquiiñecabe ti lista naroʼbaʼ ra cá xi peʼ caquiiñeʼ gúnicabe. Ne ora guicaacabe ti decisión la? rúnicabe stipa gúnicabe ni maʼ gudixhe íquecabe (1 Cor. 9:​26, 27).

5. ¿Xi zándaca guizaaca ca xpinni Cristu ni naca casi xcuidi? (Efesios 4:​14, 15).

⁵ Peru ca xpinni Cristu ni zeeda gaca casi ti xcuidi la? nagueenda zanda quiteʼ binni laacaʼ né «ca cosa ni cadi jneza rusiidiʼ ca hombre ni riguite binni». Dede zándaca guni crécabe ca cosa ni cadi dxandíʼ riníʼ binni para gucaalú xquidxi Dios ne ni riníʼ ca apóstata (biindaʼ Efesios 4:​14, 15). b Ca xpinni Cristu ni naca casi xcuidi zándaca nácacaʼ binni ni napa envidia o ruyúbicaʼ tíndecaʼ, ridxiichicaʼ nagueendaʼ o nagueenda riábacaʼ lu ca tentación ni guidxaagalucaʼ (1 Cor. 3:3).

6. ¿Xi ejemplu racané laanu guiénenu ximodo riniisi ti xpinni Cristu lu Stiidxaʼ Dios? (Biiyaʼ imagen ca).

⁶ Casi maʼ bidúʼyanu, Biblia rusiidiʼ laanu riniisi tuuxa lu Stiidxaʼ Dios cásica riniisi ti baʼduhuiiniʼ para gueeda gaca ti binni huaniisi. Nuu stale cosa ni qué ganna ti xcuidi. Nga runi caquiiñeʼ guʼyaʼ ne gapa ti binni huaniisi laabe. Zándaca caquiiñeʼ guinaaze ti gunaa náʼ dxaapahuiiniiʼ stiʼ para ganda tídicabe lu calle. Peru biaʼ ra ziniisibe, zudii jñaabe lugar tídibe lu  calle stúbibe, peru siempre rusietenalaʼdxiʼ laabe gutiixhi lube guiropaʼ ladu ante tídibe. Ne ora maʼ biniisi xhiiñibe la? nánnabe maʼ zanda guni ni stubi. Ngueca nga ni rizaaca ti xpinni Cristu ni naca casi ti xcuidi, stale biaje caquiiñeʼ gacané sti xpinni Cristu laabe para cadi guixélebe de Jehová ne guicaabe decisión jneza. Peru ti binni ni maʼ biniisi lu Stiidxaʼ Dios la? randa riníʼ ique ca principiu ni zeeda lu Biblia ni rusihuinni xi riníʼ ique Jehová de xiixa cosa ne nga racané laa guicaa decisión jneza.

7. ¿Ñee caquiiñeʼ ca xpinni Cristu ni maʼ huaniisi lu Stiidxaʼ Dios chuʼ tu gacané laacaʼ la?

⁷ ¿Ñee riníʼ nga cadi caquiiñeʼ ca xpinni Cristu ni maʼ huaniisi lu Stiidxaʼ Dios chuʼ tu gacané laacaʼ la? Coʼ xa. Nuu biaje caquiiñeʼ tu gacané laacabe. Ti xpinni Cristu ni naca casi xcuidi la? zándaca nisi cabeza guicaa xcaadxi decisión pur laa o gábicabe laa xi guni, gadxé si de tuuxa ni maʼ biniisi lu Stiidxaʼ Dios, laa riziidiʼ de xcaadxi hermanu ni napa stale experiencia ne rinabaʼ laacabe conseju, peru nánnabe «cada tobi zuáʼ carga de responsabilidad stiʼ» (Gál. 6:​5, nota).

8. ¿Xiñee zanda guininu gadxé gadxé modo naca ca xpinni Cristu ni maʼ huaniisi lu Stiidxaʼ Dios?

⁸ Gadxé gadxé modo naca cada binni huaniisi, zaqueca nga ca xpinni Cristu ni maʼ huaniisi lu Stiidxaʼ Dios, gadxé gadxé cualidad napa cada tobi de laacaʼ. Nuu tu laa nabé nanna guicaa decisión ne gudii conseju, nuu xcaadxi nabé nadxibalú, nuu tu riuulaʼdxiʼ gudii de ni napa ne nuu tu laa runi sentir ni runi sentir sti binni. Zándaca caquiiñeʼ guicaa chupa xpinni Cristu ti decisión ra qué zanda gabi stobi laacaʼ xi naquiiñeʼ gúnicaʼ, ne neca gadxé gadxé decisión gucuaa guirópacabe, peru biaʼsi ca ni purtiʼ yenándacabe ni ná Biblia. Nga runi, qué zaníʼ tobi mal de decisión ni gucuaa stobi, sínuque zúnicabe stipa chúʼcabe tobi si (Rom. 14:10; 1 Cor. 1:10).

¿XI CAQUIIÑEʼ GÚNINU PARA GÁCANU TI XPINNI CRISTU NI MAʼ BINIISI LU STIIDXAʼ DIOS?

9. ¿Xiñee zanda guininu cadi nagueendaca riniisi ti xpinni Cristu lu Stiidxaʼ Dios?

⁹ Chaahuiʼ chaahuiʼ nga riniisi ti xcuidi, peru qué riniisi ti xpinni Cristu lu Stiidxaʼ Dios purtiʼ si zidiʼdiʼ iza. Guzéʼtenu ti ejemplu, ca hermanu de guidxi Corinto gucuaacaʼ ca noticia galán, guyuunísacaʼ, gucuaacaʼ espíritu santu ne biziidicaʼ stale de ejemplu stiʼ apóstol Pablo (Hech. 18:​8-11). Peru neca maʼ gudiʼdiʼ chupa chonna iza de guyuunísacabe, bisihuínnicabe caʼruʼ guiniisicabe lu Stiidxaʼ Dios (1 Cor. 3:2). ¿Xi zanda gúninu para cadi guizaacanu ni bizaacacabe ca yaʼ?

10. ¿Xi caquiiñeʼ gúninu para gácanu ti xpinni Cristu ni maʼ biniisi lu Stiidxaʼ Dios? (Judas 20).

¹⁰ Para gácanu xpinni Cristu ni maʼ huaniisi lu Stiidxaʼ Dios, primé naquiiñeʼ guiale de laanu gúninu ni. Ca ni racalaʼdxiʼ gaca casi ti xcuidi ni qué lica ganna gastiʼ la? qué ziuu dxi guni progresarcaʼ (Prov. 1:22). Qué racaláʼdxinu gácanu casi xcaadxi binni, qué rinacaʼ gápacaʼ nin ti responsabilidad ne ribézacaʼ guicaa bixhózecaʼ ne jñaacaʼ decisión pur laacaʼ. Cada tobi de laanu naquiiñeʼ guyubi guiniisi lu Stiidxaʼ Dios, lu nanu nuuni (biindaʼ Judas 20). Pa runi sentirluʼ caʼruʼ guiniisiluʼ lu Stiidxaʼ Dios la? gunabaʼ Jehová gudii lii deseu ne poder para gúniluʼ guiráʼ ni riuuláʼdxibe (Filip. 2:13).

11. ¿Ximodo racané Jehová laanu guiniisinu lu Stiidxaʼ? (Efesios 4:​11-13).

¹¹ Racalaʼdxiʼ Jehová guiniisinu lu Stiidxaʼ, peru qué ribézabe gúninu ni stúbinu. Rudiibe laanu pastor ne maestru ndaaniʼ congregación ni racané laanu «gácanu casi ti binni huaniisi ne gácanu casi Cristu» (biindaʼ Efesios 4:​11-13). Laaca rudiibe laanu espíritu santu, ni racané laanu guiníʼ íquenu modo «riníʼ ique  Cristu» (1 Cor. 2:​14-16). Ne bíʼnibe guicá tapa evangeliu, lúcani zanda guiduʼyaʼ chaahuinu ni biʼniʼ Jesús dxi guyuu lu Guidxilayú riʼ. Pa chinándanu modo riníʼ íquebe, modo riniʼbe ne ni rúnibe la? zaniisinu lu Stiidxaʼ Dios.

XIÑEE NABÉ RISACA GUIDOʼNO GUENDARÓ ESPIRITUAL NI GUQUIDXI FE STINU

12. ¿Gunáʼ nga «ca cosa ni jma naquiiñeʼ gánnanu de Cristu»?

¹² Para guiniisinu lu Stiidxaʼ Dios, naquiiñeʼ guizíʼdinu xcaadxi cosa aparte de «ca cosa ni jma naquiiñeʼ gánnanu de Cristu». Caadxi de ca cosa ni naquiiñeʼ guizíʼdinu nga ni caníʼ de gaca arrepentir tuuxa, de fe, chúʼnisa binni ne dxi guiasa ca gueʼtuʼ ca (Heb. 6:​1, 2). Nabé risaca gannaʼ ca ni dxandíʼ xpinni Cristu ni bizéʼtenu ca. Nga runi guníʼ apóstol Pedro de laacani dxi biʼniʼ predicar stale binni lu Saa stiʼ Pentecostés (Hech. 2:​32-35, 38). Para gueeda gaca tuuxa discípulo stiʼ Jesús, naquiiñeʼ guni aceptar ca cosa ni cadi nagana zeeda lu Stiidxaʼ Dios. Pablo peʼ bizeeteʼ ora qué runi cré tuuxa ziasa ca gueʼtuʼ la? qué zanda gueeda gaca discípulo stiʼ Jesús (1 Cor. 15:​12-14). Peru cadi ca cosa si ni cadi nagana zeeda lu Biblia nga ni naquiiñeʼ guizíʼdinu.

13. ¿Xi naquiiñeʼ gúninu para gacané guendaró espiritual ni riete lu Hebreos 5:14 laanu? (Biiyaʼ ca imagen ca).

¹³ Aparte de ca cosa ni cadi nagana zeeda lu Biblia, laaca nápanu guendaró espiritual ni zacané laanu iguidxi fe stinu. Luni zeeda ca ley ne ca principiu stiʼ Jehová ni racané laanu guiénenu modo riníʼ íquebe. Para gacané ni laanu la? naquiiñeʼ guni estudiarnu Biblia, guiníʼ íquenu ni nani ne gúninu stipa gúninu ni cazíʼdinu. Nga nga ni zacané laanu guicaanu decisión ni chuʼlaʼdxiʼ Jehová (biindaʼ Hebreos 5:14). c

14. ¿Ximodo gucané Pablo ca xpinni Dios de guidxi Corinto guiniisicaʼ lu Stiidxaʼ Dios?

¹⁴ Ca xpinni Cristu ni zeeda gaca casi ti xcuidi la? raca nagana para laacaʼ guicaacaʼ xiixa decisión pa cadi zeeda xiixa ley lu Biblia ni gabi laacaʼ xi naquiiñeʼ gúnicaʼ. Ne pur nga nuu de laacaʼ riníʼ íquecaʼ zanda gúnicaʼ ni gápacaʼ gana. Xcaadxi rinábacaʼ gataʼ ti ley ni gabiʼ laacaʼ xi gúnicaʼ neca cadi caquiiñeʼ ni. Guzéʼtenu  ni bizaaca ca xpinni Cristu de guidxi Corinto, ruluíʼ si gunábacabe Pablo quixheʼ ti ley ni gabi laacabe pa zanda gócabe guendaró ni guca sacrificar para ca bidóʼ. Lugar de ñabi Pablo laacabe xi naquiiñeʼ gúnicabe, bisiene laacabe cada tobi napa derechu cuí xi guni ra chinanda ni ná conciencia stiʼ. Bizeetebe caadxi principiu ni zacané laacaʼ guicaacaʼ decisión sin guchiiñaʼ xquendabiaanicaʼ ne para cadi gucaacaʼ tuuxa ni nuu débil guchee (1 Cor. 8:​4, 7-9). Zacá gucanebe laacaʼ guiniisicaʼ lu Stiidxaʼ Dios para ganda guiníʼ íquecaʼ ne guiénecaʼ ti cadi cuézacaʼ gabi xcaadxi laacaʼ xi gúnicaʼ ne cadi guyúbicaʼ ti ley para cada cosa.

15. ¿Ximodo gucané Pablo ca xpinni Cristu hebreu para cadi gusaana de guiniisicaʼ lu Stiidxaʼ Dios?

¹⁵ Rizíʼdinu sti cosa nabé risaca lu ca diidxaʼ ni bicaa Pablo ra nuu ca xpinni Cristu hebreu. Caadxi de laacaʼ bisaana de guiniisicaʼ lu Stiidxaʼ Dios, ne pur nga gúdxibe laacaʼ: «Nuutu casi baʼduʼ, leche si zanda guetu, qué zanda goto gueta casi ti binni huaniisi» (Heb. 5:12). Qué niziidicabe ca cosa nacubi cusiidiʼ Jehová laacabe ndaaniʼ congregación (Prov. 4:18). Stale de ca xpinni Cristu ni naca judíu nabé guzíñecaʼ ne guniʼcaʼ naquiiñeruʼ chinanda binni ni ná Ley stiʼ Moisés neca maʼ gudiʼdiʼ biaʼ 30 iza de maʼ cadi zinanda binni ni pur sacrificiu stiʼ Cristu (Rom. 10:4; Tito 1:10). Gúpacabe tiempu para ñénecabe xiñee guca cambiu que. Ngue runi biyubi Pablo gacané laacabe, lu carta ni gudxi Dios laabe gucaabe ra nuucaʼ bisiidibe laacaʼ ca cosa ni zeeda lu Stiidxaʼ Dios ni uquidxi fe sticaʼ. Guendaró espiritual ca nga ni caquiiñeʼ ca xpinni Cristu que para guiénecaʼ jma jneza modo racalaʼdxiʼ Jehová guni adorárcabe laa, ne zacané ni laacaʼ gácacaʼ nadxibalú ne cadi gusaana de guni predicarcaʼ neca gucaalú ca judíu que laacaʼ (Heb. 10:​19-23).

XIÑEE CADI NAQUIIÑEʼ GÁPANU CONFIANZA LACA LAANU

16. Neca maʼ biniisinu lu Stiidxaʼ Dios, ¿xiruʼ naquiiñeʼ gúninu?

¹⁶ Naquiiñeʼ gúninu stipa guiniisinu lu Stiidxaʼ Dios, peru laaca risaca cadi gusaana de guni progresarnu. Nga runi cadi naquiiñeʼ gápanu confianza laca laanu (1 Cor. 10:12). Galán gatigá guidúʼyanu ximodo nuunu para cadi gusaana de guni progresarnu.

17. ¿Xi rusiidiʼ Carta para ca Colosenses laanu de guiniisi tuuxa lu Stiidxaʼ Dios?

¹⁷ Lu Carta para ca Colosenses, laaca bizeeteʼ  Pablo xiñee nabé risaca guiniisinu lu Stiidxaʼ Dios ne gúninu stipa cadi gusaana de guiniisinu. Neca maʼ biniisi ca xpinni Cristu que lu Stiidxaʼ Dios, gúdxibe laacaʼ chuʼcaʼ cuidadu para cadi guchenda tuuxa laacaʼ né ni zeeda si de xquendabiaaniʼ (Col. 2:​6-10). Ne Epafras, ti hombre ni runibiáʼ chaahuiʼ laacabe, siempre runi orar pur laacabe ti ganda gaca fe stícabe naguidxi (Col. 4:12). ¿Xi rusiidiʼ ndiʼ laanu yaʼ? Cásica Pablo ne zaqueca Epafras, gúnnacaʼ para ganda guiniisi tuuxa lu Stiidxaʼ Dios, naquiiñeʼ guni stipa ne guyubi gacané Jehová laa. Biyubi guirópacabe cadi gusaana de guiniisi ca binni de guidxi Colosa lu Stiidxaʼ Dios neca guidxaagalucaʼ guendanagana.

18. ¿Xi zanda guizaaca ti xpinni Cristu ni maʼ huaniisi lu Stiidxaʼ Dios? (Biiyaʼ imagen ca).

¹⁸ Gudxi Pablo ca hebreu zanda gusaana tuuxa de guiniisi lu Stiidxaʼ Dios ne maʼ qué ziuulaʼdxiʼ Jehová ni guni. Pa iguidxi ladxidoʼloʼ la? zanda guixéleluʼ de Jehová ne zándaca maʼ qué zaca arrepentirluʼ ne qué zuyúbiluʼ guni perdonarbe lii. Galán nga qué niguidxi peʼ ladxidóʼ ca hebreu que (Heb. 6:​4-9). ¿Xi rizaaca ca ni nuu inactivu ne ca ni gucaʼ expulsar despué de gaca arrepentircaʼ yaʼ? Ra gácacabe humilde ne gaca arrepentírcabe, rusihuínnicabe cadi nácacabe casi ca binni ni bizeeteʼ Pablo. Peru ora ribiguétacabe ra nuu Jehová, naquiiñeʼ gudiicabe lugar gacané Jehová laacabe (Ezeq. 34:​15, 16). Nga runi, zanda gabi ca ancianu ti hermanu ni maʼ huaniisi lu Stiidxaʼ Dios gacané laacabe gaca xhamígucabe Jehová sti biaje.

19. ¿Xi naquiiñeʼ quixhe íquenu gúninu?

¹⁹ Pa caniisiluʼ lu Stiidxaʼ Dios la? cadi guireeluʼ gana dede ra ugaandaluʼ meta stiluʼ. Gudó guendaró espiritual ni uquidxi fe stiluʼ ne biʼniʼ stipa guiziidiluʼ guiníʼ íqueluʼ modo riníʼ ique Jehová. Ne pa maʼ nácaluʼ ti xpinni Cristu ni maʼ huaniisi lu Stiidxaʼ Dios la? biʼniʼ stipa para cadi gusaana de guni progresarluʼ.