1. Mɩnla ɔhʋanɩ zʋ yɛ Gyehova yi mmenii valɩ nhyɩhyɛlɩyɛ yɛlɩ egyima wɔ adʋwavʋlɔ yɩ bɛ mmɩlɩ zʋ a?

 MMƖLƖ bela mɔɔ Gyehova kɛva egyima kowula yi mmenii bɛ sa nɩ, ikila ɔhʋanɩ kɛɛ bɛkɛva nhyɩhyɛlɩyɛ bekediã nwʋmɔ. (1 Kɔl. 14:33) Kɛ ndianwʋ nɩ, ɩdɩ Nyamɩnlɩ yɩ pɛ kɛɛ bɛkɛhã odwokɔba nɩ wɔ oyuwadɩ dɩka bela. (Mt. 24:14) Gyehova ɩyɩ Gyisɛsɩ kɛɛ ilí egyima eyi anyunu. Gyisɛsɩ kila kɛɛ yɛkɛyɛ egyima eyi mɔɔ nhyɩhyɛlɩyɛ la nwʋ. Wɔ adʋwavʋlɔ yɩ bɛ mmɩlɩ zʋ nɩ, bɛdɩlɩ asafʋ sʋ̃maa wɔ nnɩka azʋlɔtʋ na bɛyɩlɩ mbanimbani kɛɛ belí nninyeni anyunu wɔ asafʋ yi nu. (Egy. 14:23) Nɩ mbanimbani okuwu be wɔ Gyelusalamɩ mɔɔ bɔnlʋmmɔ yɛ lɛ asʋ̃mavʋlɔ yɩ nɩɩ mmenyia mbanimbani be mɔɔ besizi abɔkɔ, na nɩ bekila ɔhʋanɩ kɛɛ asafʋ azʋlɔtʋ nɩ kɛva kɛyɛ egyima. (Egy. 15:2; 16:4) Na iluwakɛɛ asafʋ azʋlɔtʋ nɩ valɩ ɔhʋanɩhilelɛ mɔɔ bɛ sa hanlɩ nɩ yɛlɩ egyima nɩ ti, “bɔ nwʋ ɩyɛlɩ ɛzɩzɩbɛ wɔ dedi nu na bɔ nwʋ ɩzʋnɩnlɩ.”—Egy. 16:5.

2. Ɔzʋmɩ ɔlʋbɔ 1919 nɩ, mɩnla ɔhʋanɩ zʋ yɛ Gyehova kile yi mmenii ɔhʋanɩ na ɩma sunzuma ɔfʋã nu alɩyɛ bɛ a?

² Nnɛ sʋ̃, Gyehova kɔ zʋlɔ ma yi mmenii fa nhyɩhyɛlɩyɛ di egyima wɔ yɩ ɔzʋ̃mɩnlɛ nu. Ɔzʋmɩ ɔlʋbɔ 1919 nɩ, ɩma Gyisɛsɩ va mmenii okuwu ɛgyɩkɩ̃ɩ̃ be li egyima ma bɛyɛ dasɩlɛlilɛ egyima yɩ nwʋ nhyɩhyɛlɩyɛ, na bɛma yi mmenii sunzuma ɔfʋã nu alɩyɛ. a (Lk. 12:42) Dɩyɛ bela da ali kɛɛ Gyehova iyilaa okuwu eyi be egyima yɩ zʋ.—Ayɩ. 60:22; 65:​13, 14.

3-4. (a) Kezimɔ yɛfa nhyɩhyɛlɩyɛ yɛyɛ egyima a yenyia zʋlɔ mfasʋ nɩ, ma nwʋmɔ ndianwʋ. (b) Mɩnla yɛ yekozunzu nwʋmɔ wɔ dɩyɛzumanlɛ eyi nu a?

³ Sɛ yɛ́dɩ mmenii mɔɔ yɛyɛ nhyɩhyɛlɩyɛba a, ankɩ yɛlɔ́kʋla yɛkɛyɛ  egyima mɔɔ Gyisɛsɩ va wula yɛ sa nɩ. (Mt. 28:​19, 20) Kɛ ndianwʋ nɩ, mɔwʋ fa yɩ kɛɛ bɛáhyɩhyɛ azɩlɛ-sini bɛma yɛ, ankɩ abiyela twodwu a ɩkɔhɔ dasɩlɛlilɛ wɔ dɩka mɔɔ yɩzayɩ ɩpɛ yɩ. Sɛ ɩba yɩ zɔ a, ankɩ azɩlɛ-sini be wɔ kɛnɩ a, yɛkɛyɛ numɔ egyima mbɔmɩ sʋ̃maa, na ebiye sʋ̃ wɔ kɛnɩ a, yelétiyia kɛnɩ po. Sɛ yɛyɛ nhyɩhyɛlɩyɛba a, ekila a mɩnla ɔhʋanɩ mvʋlɔ zʋ sʋ̃ yɛ yenyia zʋlɔ mfasʋ a?

⁴ Kɛmɔ Gyisɛsɩ manlɩ yɩ adʋwavʋlɔ yɩ valɩ nhyɩhyɛlɩyɛ yɛlɩ egyima mmɩlɩ mɔ nɩ ɩwɔ azɩlɛ yɩ zʋ nɩ, ɔzɔ la yɛ nnɛ sʋ̃ ɩkɔ zʋ ɩma Nyamɩnlɩ mmenii fa nhyɩhyɛlɩyɛ yɛ egyima a. Wɔ dɩyɛzumanlɛ eyi nu nɩ, yekozunzu ndianwʋ mɔɔ Gyisɛsɩ yɛlɩ nɩɩ kezimɔ yɛ ahyɩhyɛdɩ yɩ di yi ndianwʋ mɛda nɩ nwʋ. Akʋ̃ sʋ̃, yekehila kezimɔ yɛkɛla yɩ ali kɛɛ yɛwɔ Gyehova yɩ ahyɩhyɛdɩ yɩ nu anwʋlazʋ.

YƐ AHYƖHYƐDƖ YƖ DI GYISƐSƖ YI NDIANWƲ YƖ MƐDA

5. Ɔhʋanɩ mɔɔ yɛ ahyɩhyɛdɩ yɩ duwa zʋ di Gyisɛsɩ yi ndianwʋ mɛda nɩ, numɔ ɔkʋ̃ yɛ lɛ mɩnla a? (Dwɔɔnʋ 12:49)

⁵ Gyisɛsɩ zumanlɩ mɔɔ ɩsɛ kɛɛ ɩyɛ nɩɩ mɔɔ ɩsɛ kɛɛ ɩkã wɔ yɩ sʋlɔ Ɛzɩlɛ yɩ kɛnɩ. Gyehova yɩ ahyɩhyɛdɩ yɩ di Gyisɛsɩ yi ndianwʋ yɩ mɛda, na bekyina Bayɩbʋlʋ yɩ zʋ bɛma ɛbɩlawɔlɛ nu fʋlɔdulɛ nɩɩ ɔhʋanɩhilelɛ yɛ. (Kɩnga Dwɔɔnʋ 12:49; 2 Tim. 3:​16, 17) Bɔkɔ zʋ bɛhyɛ yɛ ɛzɩzɩbɛ kɛɛ yɛɣɩngá Nyamɩnlɩ Odwokɔ na yɛva yɛyɛ egyima. Mɩnla ɔhʋanɩba ɔkʋ̃ yɛ yeduwa zʋ yesuma Bayɩbʋlʋ yɩ a, na kɛ yenyia zʋlɔ mfasʋ yese a?

6. Mfasʋ titili mɔɔ yenyia wɔ Bayɩbʋlʋ zumanlɛ zʋ nɩ, numɔ ɔkʋ̃ yɛ lɛ mɩnla a?

⁶ Sɛ yɛfa awuuku nɩɩ nninyeni mvʋlɔ mɔɔ ahyɩhyɛdɩ yɩ fa ma yɛ nɩ yesuma Bayɩbʋlʋ yɩ a, yenyia zʋlɔ mfasʋ sʋ̃maa. Kɛ ndianwʋ nɩ, sɛ yɛfa mɔɔ Bayɩbʋlʋ kilehile nɩ yetindiã ɔhʋanɩhilelɛ mɔɔ ahyɩhyɛdɩ yɩ duwa yɛ awuuku nɩɩ nninyeni mvʋlɔ zʋ fa ma yɛ nɩ nwʋ, na yɛnwʋ kɛɛ ɔhʋanɩhilelɛ yɩ gyĩ Bayɩbʋlʋ yɩ zʋ a, ɩma yenyia anwʋlazʋ kezile wɔ Gyehova yɩ ahyɩhyɛdɩ yɩ nu.—Wul. 12:2.

7. Mɩnla yɛ Gyisɛsɩ wɔlɩ nwʋmɔ ɛlawulo a, na mɩnla ɔhʋanɩ zʋ yɛ Gyehova yɩ ahyɩhyɛdɩ yɩ di yi ndianwʋ yɩ mɛda a?

⁷ Gyisɛsɩ hanlɩ “Nyamɩnlɩ yi Bulombunlililɛ nɩ nwʋ Odwokɔba.” (Lk. 4:​43, 44) Akʋ̃ sʋ̃, Gyisɛsɩ hyɛlɩ yɩ adʋwavʋlɔ yɩ kɛɛ bɛhã Bulombunlililɛ nɩ nwʋ odwokɔba yɩ. (Lk. 9:​1, 2; 10:​8, 9) Nnɛ, bɛzabɛ mɔɔ bɔwɔ Gyehova yɩ ahyɩhyɛdɩ yɩ nu nɩ, bɛkã Nyamɩnlɩ Bulombunlililɛ yɩ nwʋ odwokɔba ɩávalɩ nwʋmɔ dɩka mɔɔ bɛda anzɛnyɩɩ asɛdɩ mɔɔ iwula bɛ sa wɔ Gyehova yɩ ahyɩhyɛdɩ yɩ nu nɩ.

8. Mɩnla ɔnwʋmɔ ɔhʋanɩ kezile yɛ yɛwɔ a?

⁸ Ɩdɩ ɔnwʋmɔ ɔhʋanɩ kezile kɛɛ yɛkã Nyamɩnlɩ Bulombunlililɛ yɩ nwʋ odwokɔba yekile mmenii mvʋlɔ! Kɛ abiyela yɛ inyia ɔnwʋmɔ ɔhʋanɩ mɔɔ ɩdɩ zɔ a. Kɛ ndianwʋ nɩ, mmɩlɩ mɔ Gyisɛsɩ wɔ azɩlɛ yɩ zʋ nɩ, ɩáma ɔhʋanɩ ma azunzuma evinli di yɩ nwʋ dasɩlɛ. (Lk. 4:41) Nnɛ sʋ̃, ansaana abiye kenyia ɔnwʋmɔ ɔhʋanɩ kɔhɔ dasɩlɛlilɛ nɩ, ɩsɛ kɛɛ bɔnwʋ yɩ kɛɛ ɩfata ansaana. Sɛ yɛkã odwokɔba yɩ yekile mmenii wɔ dɩka bela mɔɔ yɛwɔ nɩ a, nɩ yɛdaa yi ali kɛɛ yɛ anyɩ sɔ ɔnwʋmɔ ɔhʋanɩ eyi. Dɩkɛɛ Gyisɛsɩ nɩ, yɛ bʋtayɩ yɛ lɛ kɛɛ yekoluwa Bulombunlililɛ yɩ mma yɩ wɔ mmenii bɛ ahʋnlɩnɩ nu na yɛagugua zʋlɔ nzulo.—Mt. 13:​3, 23; 1 Kɔl. 3:6.

9. Mɩnla ɔhʋanɩ zʋ yɛ Gyehova yɩ ahyɩhyɛdɩ yɩ ɩma mmenii nwʋ Nyamɩnlɩ dima yɩ a?

⁹ Gyisɛsɩ manlɩ bɔnwʋnlɩ Nyamɩnlɩ yi dima. Mmɩlɩ mɔ Gyisɛsɩ ɩbɔɔ yɩ sʋlɔ Ɛzɩlɛ yɩ mpayɩ nɩ, ɩhanlɩ kɛɛ: “Mɩma bɔnwʋ wu dima.” (Dwɔ. 17:​26, NWT) Gyehova yɩ ahyɩhyɛdɩ yɩ sʋ̃ ɩyɛ mɔɔ ɩkɔhʋla bela kɛɛ ɩkɔwʋwa mmenii ma bɔkɔnwʋ Nyamɩnlɩ yi dima kɛmɔ Gyisɛsɩ yɛlɩ nɩ. Ɔhʋanɩ ɔkʋ̃ mɔɔ boduwa zʋ bɛyɛ zɔ yɛ lɛ kɛɛ, wɔ Oyuwadɩ Fʋlɔ Yɩ Tʋhilelɛ Bayɩbʋlʋ yɩ nu nɩ,  bɛva Nyamɩnlɩ yi dima yɩ bowulawula nnɩka mɔɔ ɩsɛ kɛɛ iwula nɩ. Yekenyia Oyuwadɩ Fʋlɔ Yɩ Tʋhilelɛ Bayɩbʋlʋ yɩ munwatĩĩ anzɛnyɩɩ yɩ ɔfʋã be wɔ ɛdɩndɛlɛ mɔɔ ɩbʋ 270 nu. Sɛ ekila Appendix A4 nɩɩ A5 wɔ Bayɩbʋlʋ eyi nu a, ɔkɔnwʋ ndwokɔ sʋ̃maa mɔɔ ɩfalɩ Nyamɩnlɩ yi dima mɔɔ yezia yɛva yewula Bayɩbʋlʋ yi nu nɩ nwʋ. b

10. Mɩnla yɛ osuma wɔ ndwokɔ mɔɔ baalɛ yɩ mɔɔ ɩda Myanmar nɩ hanlɩ nɩ nu a?

¹⁰ Kɛmɔ Gyisɛsɩ yɛlɩ nɩ, amɩyɛ sʋ̃ yɛpɛ kɛɛ yɛbʋwa mmenii dʋdʋ bela mɔɔ yɛkɔhʋla nɩ ma bɔnwʋ Nyamɩnlɩ yi dima. Mmɩlɩ mɔ baalɛ be mɔɔ ɩwɔ Myanmar mɔɔ ili alʋbɔ 67 ɣa nwʋnlɩ Nyamɩnlɩ dima nɩ, ɩhanlɩ yɩ ma izunli, na ɩhanlɩ kɛɛ: ‘Eyi yɛ ɩdɩ mmɩlɩ mɔ ili bɔmʋnlɩ mɔɔ mʋnwʋ kɛɛ Nyamɩnlɩ yi dima yɛ lɛ Gyehova a. Bɛma mʋnwʋ debe mɔɔ nwʋmɔ hyinyia paa.’ Ozumanlɛnwʋnlɛ eyi ma yɛnwʋ kɛɛ, sɛ mmenii mɔɔ bɔwɔ ahʋnlɩnɩba suma Nyamɩnlɩ nwʋ dɩyɛ a, ɩkʋla ɩsɩnza bɛ ɛbɩlawɔlɛ.

KƆ ZƲLƆ NYIA ANWƲLAZƲ KEZILE WƆ YƐ AHYƖHYƐDƖ YƖ NU

11. Mɩnla ɔhʋanɩ zʋ yɛ asafʋ nu mbanimbani kɔhʋla kehile kɛɛ bɔwɔ Gyehova yɩ ahyɩhyɛdɩ yɩ nu anwʋlazʋ a? (Kila mfonyini yi sʋ̃.)

¹¹ Mɩnla ɔhʋanɩ ɔkʋ̃ zʋ yɛ asafʋ nu mbanimbani kɔhʋla kehile kɛɛ bɔwɔ Nyamɩnlɩ yɩ ahyɩhyɛdɩ yɩ nu anwʋlazʋ a? Sɛ bɛ sa kã ɔhʋanɩhilelɛ be a, ɩsɛ kɛɛ bɛkɩnga na bɛtɩ yɩ tʋ bʋwɔ, na bɛyɛ mɔɔ bɔkɔhʋla bela kɛɛ bɛkɛva kɛyɛ egyima. Kɛ ndianwʋ nɩ, benyia ɔhʋanɩhilelɛ wɔ kezimɔ bekehila dɩyɛzumanlɛ zʋ nɩɩ kezimɔ bɔkɔwɔ mpayɩ wɔ asafʋ yi nu. Akʋ̃ sʋ̃, bɛma bɔnwʋ kezimɔ bekehila Kɩlayɩsɩ yɩ mmuwuanɩ yɩ zʋ. Sɛ asafʋ nu mbanimbani fa ɔhʋanɩhilelɛ mɔɔ bɛ sa kã yɩ wɔ ahyɩhyɛdɩ yɩ kɛnɩ nɩ yɛ egyima a, ɩbʋwa ma mmeliyema mmenyia nɩɩ mmaalɛ sʋ̃ tɩ nɣanlɩ kɛɛ Gyehova dɔ bɛ na ɩdwɩnɩ bɔ nwʋ baaba.

12. (a) Mɩnla ti mɔɔ ɩsɛ kɛɛ yɛyɛ sutiye yɛma bɛzabɛ mɔɔ beli nninyeni anyunu nɩ a? (Hibulumaa 13:​7, 17) (b) Mɩnla ti mɔɔ ɩsɛ kɛɛ yɛfa yɛ adwɩnɩ yesiye subanɩba mɔɔ bɛzabɛ mɔɔ beli nninyeni anyunu bɔwɔ nɩ zʋ a?

¹² Sɛ yenyia ɔhʋanɩhilelɛ be wɔ asafʋ nu mbanimbani bɛ kɛnɩ a, ɩsɛ kɛɛ yɛzʋ̃ yɛ pɛ nu yɛfa yɛyɛ egyima. Sɛ yɛyɛ zɔ a, ɩma mbanimbani yi be egyima yɛ mɛlɛkɛ. Bayɩbʋlʋ yɩ hyɛ yɛ ɛzɩzɩbɛ kɛɛ yɛyɛ́ sutiye na yɛhã yɛ nwʋ azɩ yɛma bɛzabɛ mɔɔ beli nninyeni anyunu nɩ. (Kɩnga Hibulumaa 13:​7, 17.) Itwu mmɩlɩ be a, eyi ɩyɛlɛ kɔhʋla kɛyɛ sɩ. Mɩnla ti a? Iluwakɛɛ asafʋ nu mbanimbani yi bɛáli munli. Naasʋ̃ sɛ yɛáfa yɛ adwɩnɩ yesiye bo subanɩba zʋ na yɛfa yesiye be sinidɔlɛ zʋ a, nɩ ɩdɩ kɛɛ mɔɔ yɛbʋwaa yɛ adamvʋlɔ. Mɩnla ɔhʋanɩ zʋ a? Yɛ adamvʋlɔ pɛ kɛɛ yenyia adwɩnɩ kɛɛ, kɛ Gyehova yɩ ahyɩhyɛdɩ yɛ dɩ. Meti sɛ yeányia asafʋ nu mbanimbani bɔ nwʋ adwɩnɩba a, ɩkɛzɩkɛ anwʋlazʋ mɔɔ yɛwɔ wɔ Gyehova yɩ ahyɩhyɛdɩ yɩ nu nɩ. Kɛ ɩkɛyɛ na yɛanwʋ awohwi mɔɔ yɛ adamvʋlɔ bedi bɛfalɩ Gyehova yɩ ahyɩhyɛdɩ yɩ nwʋ na yɛábʋ a?

ÁMA ƐMA MMENII SƖKƐ ANWƲLAZƲ MƆƆ ƆWƆ WƆ GYEHOVA YƖ AHYƖHYƐDƖ YƖ NU NƖ

13. Mɩnla ɔhʋanɩ zʋ yɛ Nyamɩnlɩ yɩ adamvʋlɔ bɔ mmɔdɩnɩ kɛɛ bɛkɛzɩkɛ yɩ ahyɩhyɛdɩ yɩ dima a?

¹³ Nyamɩnlɩ yɩ adamvʋlɔ bɔ mmɔdɩnɩ kɛɛ bɛkɛma mmenii kenyia adwɩnɩ kɛɛ, nninyeniba mɔɔ Gyehova yɩ ahyɩhyɛdɩ yɛ nɩ ɩdɩbɛ. Kɛ ndianwʋ nɩ, yezuma wɔ Ɛhɛlɛlɛ yɩ nu kɛɛ ɩsɛ kɛɛ Gyehova yɩ azʋ̃mɩvʋlɔ bɔ nwʋ tɩ wɔ nnwʋnlamɩ ɔfʋã nu, ɛbɩlawɔlɛ ɔfʋã nu nɩɩ sunzuma ɔfʋã nu. Ɩkã kɛɛ abiyela mɔɔ ɩkɔhɔ zʋlɔ ɩkɔwɔ ɛbɩla tanɩ mɔɔ iánu yɩ nwʋ nɩ, bɛyɩ́ yɩ wɔ asafʋ yi nu. (1 Kɔl. 5:​11-13; 6:​9, 10) Yɛfa Bayɩbʋlʋ nu mmɛla eyi yɛyɛ egyima. Na iluwa eyi ti, yɛ adamvʋlɔ kã kɛɛ yɛálɔ mmenii, yɛádwɩnɩ bɔ nwʋ na yebuwa mmenii ndɛnɩ.

14. Aninyia yɛ iwula awohwi ndwokɔ mɔɔ bɛkã bɛfalɩ Gyehova yɩ ahyɩhyɛdɩ yɩ nwʋ nɩ mɛda a?

 ¹⁴ Nwʋ enii mɔɔ iwula awohwi ndwokɔ yɩ mɛda. Setanɩ Abɔnsamɩ yɛ iwula awohwi ndwokɔ mɔɔ bɛkã bɛfalɩ ahyɩhyɛdɩ yɩ nwʋ nɩ mɛda. Ɩdɩ “awohwimaa munwala bɛ zɩ.” (Dwɔ. 8:44; Gyn. 3:​1-5) Meti ɩsɛ kɛɛ yekila ɔhʋanɩ kɛɛ Setanɩ koluwa yɛ adamvʋlɔ zʋ kɛbɩndɩ awohwi ndwokɔ mɔɔ bɛkã bɛfalɩ Gyehova yɩ ahyɩhyɛdɩ yɩ nwʋ nɩ. Ɔzɔ la yɛ ɩdʋlɩ Gyisɛsɩ nɩɩ ɔwɔkɩ Kilisinyiamaa nɩ a.

15. Mɩnla yɛ nyamɩnlɩzʋ̃mɩnlɛ nu mbanimbani va yɛlɩ Gyisɛsɩ nɩɩ yɩ mɛdalilɛmaa yɩ a?

¹⁵ Wɔ adʋwavʋlɔ yɩ bɛ mmɩlɩ zʋ nɩ, Setanɩ luwalɩ mmenii be zʋ hanlɩ awohwi ndwokɔ valɩlɩ Gyisɛsɩ mɔɔ ɩdɩ Nyamɩnlɩ Ɣalɛ mɔɔ idi munli na ɩyɛ nnwʋánlɩ nninyeni po nɩ nwʋ. Kɛ ndianwʋ nɩ, nyamɩnlɩzʋ̃mɩnlɛ nu mbanimbani hanlɩ hileli mmenii kɛɛ, tumi mɔɔ Gyisɛsɩ ɩfa itu azunzuma evinli nɩ, ɩzʋ̃ “azunzuma evinli be ebani” nɩ kɛnɩ. (Mk. 3:22) Mmɩlɩ mɔ bedii Gyisɛsɩ yi odwokɔ nɩ, nyamɩnlɩzʋ̃mɩnlɛ nu mbanimbani valɩ ɔzʋnɩ dianlɩ yɩ zʋ kɛɛ ɩhã Nyamɩnlɩ nwʋ mmuzulo ndwokɔ, na bɛmanlɩ ɔlɔmɩ nɩ hanlɩ kɛɛ bohũ Gyisɛsɩ. (Mt. 27:20) Aɣinzi yi mɔɔ Kɩlayɩsɩ yɩ mɛdalilɛmaa bɛkãã odwokɔba yɩ nɩ, bɛ adamvʋlɔ yɩ ‘bonlunkunli mmenii nɩ’ ma bodwodwuli bediyialɩ Kilisinyiamaa nɩ. (Egy. 14:​2, 19) December 1, 1998 Ɔwɩɛnɩlɛ Aɣanɩ yɩ hilehileli Egyima 14:2 yɩ nu kɛɛ: “Kɛ odwokɔba yɩ nkʋ̃ la yɛ Dwuumaa odwodwudiyialɛmaa yɩ bʋlɩ a, mfomi bɛzɩkɛlɩ Kilisinyiamaa nɩ be dima na bɔwɔlɩ mmɔdɩnɩ kɛɛ bɛkɛma mmenii mɔɔ bɛdɩ Dwuumaa nɩ kenyia Kilisinyiamaa nɩ bɔ nwʋ adwɩnɩ tanɩ na bɛadanɩ bɛ.”

16. Sɛ yɛtɩ awohwi ndwokɔ be a, mɩnla yɛ ɩsɛ kɛɛ yɛkakɛ a?

¹⁶ Nnɛ sʋ̃, Setanɩ kɔ zʋlɔ di awohwi. Ɩlanwʋ la “ɩdahɩlɩdahɩlɩ oyuwadɩ munwatĩĩ.” (Yik.  12:9) Meti sɛ ɛtɩ awohwi ndwokɔ ɛfalɩ ahyɩhyɛdɩ yɩ nɩɩ bɛzabɛ mɔɔ bedi nninyeni anyunu nɩ nwʋ a, kakɛ kɛɛ ɔzɔ la yɛ Nyamɩnlɩ yɩ adamvʋlɔ va yɛlɩ Gyisɛsɩ nɩɩ adʋwavʋlɔ yɩ a. Nnɛ, botwodwu betiyia Gyehova yi mmenii na bɛkã awohwi ndwokɔ bɛfalɩ bɔ nwʋ kɛmɔ Gyisɛsɩ hyɛlɩ nwʋmɔ nkɔmɩ nɩ la. (Mt. 5:​11, 12) Sɛ yɛnwʋ dɩka mɔɔ awohwi ndwokɔ yɩ zʋ̃ a, yeléde yekeli, na ɩkɛma yɛkɛyɛ nwʋmɔ debe ndɛndɛ. Mɩnla yɛ yɛkɛyɛ wɔ nwʋmɔ a?

17. Kɛ ɩkɛyɛ na yɛabʋ awohwi ndwokɔ a? (2 Timoti 1:13) (Kila alɩka mɔɔ ise “ Mɔɔ Ɛkɛyɛ Wɔ Awohwi Ndwokɔ Nwʋ.”)

¹⁷ Pʋ́ awohwi ndwokɔ. Sʋ̃mavʋlɔ Pɔɔlʋ manlɩ yɛnwʋnlɩ mɔɔ ɩsɛ kɛɛ yɛyɛ mmɩlɩ mɔ yɛdɩ awohwi ndwokɔ be nɩ. Ɩhã ihileli Timoti kɛɛ ‘ɩhyɛ́ mmenii nɩ ma beyiaki ndwondwodʋlɛ na ɩhwɩ̃ yɩ nwʋ wɔ tɩɩtɩɩ ndwokɔ mbʋanlɩ mbʋanlɩ nɩ nwʋ.’ (1 Tim. 1:​3, 4; 4:7) Mɔwʋ dwɩnɩ eyi nwʋ kila, ebiye a kuakula be kɛva debe mɔɔ nwʋmɔ yɛ evinli wɔ azɩ ikowula yi munwa nu, naasʋ̃ ebani mɔɔ izi nɣɛlɛbɛ mɛyɩ ɩlɛ́yɛ zɔ kyɩ̃. Mɩnla ti a? Iluwakɛɛ izi kɛɛ sa ɩkʋla ipila yɩ anzɛnyɩɩ ɩma yɩ nwʋ pa yɩ. Yɛpʋ awohwi ndwokɔ iluwakɛɛ yezi dɩka mɔɔ ɩzʋ̃, na yɛsɔ ‘nɔhʋanlɛ ndwokɔ nu bʋwɔ.’—Kɩnga 2 Timoti 1:13.

18. Kɛ ɩkɛyɛ na yɛahile kɛɛ yɛwɔ anwʋlazʋ kezile wɔ Gyehova yɩ ahyɩhyɛdɩ yɩ nu a?

¹⁸ Kezimɔ Nyamɩnlɩ yɩ ahyɩhyɛdɩ yɩ sumazuma Gyisɛsɩ nɩ, yezunzu numɔ asã pɛ nwʋ. Sɛ osumaa Bayɩbʋlʋ yɩ a, bɔ mmɔdɩnɩ kɛɛ ɛkɛbɩbɛ ɔhʋanɩ mvʋlɔ mɔɔ ahyɩhyɛdɩ yɩ duwa zʋlɔ sumazuma Gyisɛsɩ. Bʋwa mmenii mɔɔ bɔwɔ wʋ asafʋ yi nu ma bɛhyɛ anwʋlazʋ mɔɔ bɔwɔ wɔ ahyɩhyɛdɩ yɩ nu nɩ ɛzɩzɩbɛ. Kɔ zʋlɔ fa nɔhʋanlɛlilɛ sʋ̃mɩ Gyehova, na fa wʋ nwʋ fʋãmɩ yɩ ahyɩhyɛdɩ yɩ mɔɔ iduwaa zʋlɔ ɩkɛma yɩ apɛdɩ kɛɣa numɔ nɩ nwʋ fa kile kɛɛ ɔwɔ yɩ ahyɩhyɛdɩ yɩ nu anwʋlazʋ kezile. (Ndw. 37:28) Ɔnwʋmɔ ɔhʋanɩ mɔɔ yɛwɔ kɛɛ yɛkɩnla Gyehova yi mmenii mɔɔ bɔwɔ ɔlɔlɛ na bedi nɔhʋanlɛ yɩ nwʋ nɩ, bɛmá yɛzɔ numɔ bʋwɔ na yehile nwʋmɔ anyɩnlɩzɔlɛ.