1. Баштапкы чактыҥ Иегованыҥ ишчилери канайып башкарылган?

 ИЕГОВА ишчилерине јакылта берзе, олор оны аайлу-башту бӱдӱрер деп кӱӱнзейт (1 Кор. 14:33). Темдектезе, сӱӱнчилӱ јар бастыра јердиҥ ӱстинде јарлалар учурлу (Матф. 24:14). Иегова бу ишти башкарзын деп, Иисусты кӧстӧп салган. Иисус дезе бу иш аайлу-башту ла ӧйинде эдилзин деп башкарып јат (Ап. ижи 14:23). Баштапкы чакта башка-башка јерлерде јуундар тӧзӧлип турарда, јарлаар ишти башкаратан аксагалдар кӧстӧлгӧн. А Иерусалимдеги апостолдордоҥ ло аксагалдардаҥ турган башкару јӧптиҥ чыгарган јӧптӧрин бастыра јуундар бӱдӱрер учурлу болгон (Ап. ижи 15:2; 16:4). Јуундар јобош болуп, олордыҥ башкартуларын бӱдӱрип турза, «бӱдетениле тыҥып, тоозыла кӱнӱҥ сайын арбындап» туратан (Ап. ижи 16:5).

2. Иегова 1919 јылдаҥ ала албатызын канайып башкарат ла кӧгӱс курсакты канайып берет?

² Иегова бойыныҥ албатызын бӱгӱнги де кӱнде аайлу-башту болзын деп кичееп јат. 1919 јылдаҥ ала Иисус јарлаар ишти башкарарга ла бойыныҥ ӱренчиктерин кӧгӱс курсакла јеткилдеерге, майлаткандардаҥ турган јаан эмес бӧлӱкти тузаланат (Лука 12:42) a. Бу улуска Иегованыҥ алкыжы једип турганына бир де алаҥзу јок (Иса. 60:22; 65:13, 14).

3, 4. а) Бистиҥ ижис аайлу-башту эдилип турганында кандый туза бар? б) Бу јӧрмӧлдӧ нени шӱӱжерис?

³ Бистиҥ ижис аайлу-башту башкарылбай турган  болзо, бис Иисустыҥ берген ижин јазап бӱдӱрип болбос эдис (Матф. 28:19, 20). Јарлайтан јерлер де болбос, кем-кайда кӱӱнзеген ондо ло јарлаар эди. Мынаҥ улам кезик јерлерде јарлап турган улус кӧп болор, а кезик јерлер ундылып калган турардаҥ айабас. Бистиҥ ижистиҥ аайлу-башту башкарылып турганыныҥ база кандый тузазын кӧрӧдӧӧр?

⁴ Бӱгӱнги кӱнде Иисустыҥ ӱренчиктери Христос јерде јӱрерде нени эткен, оны ла эдип јат. Бу јӧрмӧлдӧ Иисус ӱренчиктерине кандый тем артыргысканын ла оныҥ темин организация канайып тузаланып турганын кӧрӧрис. Анайда ок бис Кудайдыҥ организациязына бӱдӱп турганысты канайып кӧргӱзер аргалу деген суракты шӱӱжип кӧрӧрис.

БИСТИҤ ОРГАНИЗАЦИЯ ИИСУСТАҤ ТЕМ АЛАТ

5. Иегованыҥ организациязы Иисустаҥ кандый тем алат? (Иоанн 8:28).

⁵ Иисус Адазыныҥ ӱреткениле јӱрген. Иегованыҥ организациязы Иисустаҥ кандый тем алат? Олордыҥ биске берген башкартулары да, нези чын, нези јастыра деп ӱреткени де Кудайдыҥ Сӧзине тӧзӧлӧнӧт (Иоанн 8:28 кычырыгар; 2 Тим. 3:16, 17). Агару Бичикти кычырып ла шӱӱп сананып турзын деп, биске улам сайын айдылып јат. Бу јӧпти нениҥ учун бӱдӱрер керек?

6. Агару Бичикти ӱренип турганы́с, Иегованыҥ организациязына бӱдӱмјибисти канайып тыҥыдат?

⁶ Бис Агару Бичикти ле организацияныҥ чыгарып турган бичиктерин тӱҥдештирип турар аргалу. Анайып, ондогы бичилгени Кудайдыҥ Сӧзине тӧзӧлӧнгӧнин кӧрӱп турзаас, Иегованыҥ организациязына бӱдӱмјибис тыҥыйт (Рим. 12:2).

7. Иисус не керегинде јарлаган? Иегованыҥ организациязы Иисустаҥ кандый тем алат?

⁷ Иисус «Кудайдыҥ Каандыгы керегинде сӱӱнчилӱ јар» јарлаган (Лука 4:43, 44). Ол ӱренчиктерине бу јарды база јарлазын деп айткан (Лука 9:1, 2; 10:8, 9). Иегованыҥ ишчилери сӱӱнчилӱ јарды, кайда да јадып турган болзо, организацияда кандый да иш бӱдӱрип турган болзо, ончозы јарлап јадылар.

8. Биске кандый кӱндӱ эдилген?

⁸ Улуска Кудайдыҥ Каандыгы керегинде сӱӱнчилӱ јар јарлаары — сӱреен јаан кӱндӱ! Мындый кӱндӱ кажы ла кижиге берилбей јат. Темдектезе, Иисус јерде јӱрерде, калју тындарга ол керегинде айдарга јаратпаган (Лука 4:41). Бӱгӱнги кӱнде кижи Иегованыҥ албатызыла сӱӱнчилӱ јар јарлаарга турган болзо, ого озо баштап бойыныҥ јӱрӱмин Иегованыҥ нормаларыла тӱзедип алар керек. Бу арганы баалап турган болзоос, келишкен ле учуралда Каандык керегинде јарлап јадыс. Иисустаҥ тем алып, чындыктыҥ ӱренин улустыҥ јӱректерине отургызып, сугарарга албаданып јадыс (Матф. 13:3, 23; 1 Кор. 3:6).

9. Улус Кудайдыҥ адын билзин деп, бистиҥ организация нени эдет?

⁹ Иисус улусты Кудайдыҥ адыла таныштырган. Ол теҥеридеги Адазына мӱргӱп: «Мен олорго адыҥды ачтым» — деп айткан (Иоанн 17:26). Бӱгӱнги кӱнде Иегованыҥ организациязы улусты Кудайдыҥ адыла таныштырарга, сӱреен кӧп иш эдип јат. Мында «Јаҥы телекей» деп кӧчӱрме јаан тузазын јетирет. Бу кӧчӱрмеде Кудайдыҥ ады кайда турар керек, ондо ло тургузылып  калган. А канча тилге кӧчӱрилгенин алза, бӱдӱнге эмезе бӧлӱктей 270 тилдеҥ ажыра кӧчӱрилген. Бу кӧчӱрмениҥ А4 лӧ А5 деп приложениелеринде Кудайдыҥ ады нениҥ учун ла канайып орныктырылганы керегинде кӧптӧдӧ јарталып јат. Английский тилге чыккан «Агару Бичиктиҥ ӱренетен чыгармазында» приложениелердиҥ бирӱзинде (Appendix C) Христиан Грек Бичимелдерде Кудайдыҥ ады нениҥ учун 237 катап туштаар учурлу деп јарталат.

10. Мьянмада јадып турган ӱй кижи Кудайдыҥ адын угала, нени айткан, бис мынаҥ неге ӱренедис?

¹⁰ Бис Иисус ла чылап Кудайдыҥ адын кӧп улус билип алзын деп кӱӱнзеп јадыс. Мьянма деп ороондо јадып турган 67-ти јашту ӱй кижи кӧзиниҥ јажы тӧгӱлип туруп, ого Агару Бичик ӱренерге болужып турган бистиҥ эјеге мынайып айткан: «Јӱрӱмимде Кудайдыҥ ады — Иегова деп, баштапкы катап уктым. Сен меге коркышту јаан чындык ачтыҥ». Бу учуралды кӧрзӧӧс, ачык јӱректӱ улус Кудайдыҥ адын укса, јӱрӱмин солыырдаҥ айабас.

ИЕГОВАНЫҤ ОРГАНИЗАЦИЯЗЫНА БӰДӰГЕР

11. Аксагалдар Иегованыҥ организациязына бӱдӱп турганын канайып кӧргӱзет? (Јурукты база кӧрӱгер.)

¹¹ Аксагалдар Иегованыҥ организациязына бӱдӱп турганын канайып кӧргӱзер аргалу? Олор јуунга башкартулар келзе, оны лаптап кычырала, канча ла кире јакшы тузаланарга албаданат. Темдектезе, аксагалдар јаҥыс ла јуунды канайып башкарары ла ака-эјелер учун мӱргӱӱри јанынаҥ башкартулар эмес, је Христостыҥ койлорын канайып корулаары јанынаҥ башкартулар аладылар. Организациянаҥ келген бу башкартуларды аксагалдар бӱдӱрип турза, бистиҥ ака-эјелер Иегованыҥ сӱӱжин ле корузын кӧрӧт.

12. а) Јуунда башкарар јаҥ алган акаларга биске нениҥ учун сӧсуккур болор керек? (Еврейлерге 13:7, 17). б) Нениҥ учун аксагалдардыҥ јакшы јандарын кӧрӧргӧ албаданар керек?

¹² Аксагалдар башкарту берзе, биске олорды тургуза ла бӱдӱрер керек. Анайып олорго бойыныҥ молјуларын бӱдӱрерге јеҥил болор. Анайда ок Агару Бичик бисти јуунда башкарар јаҥ алган улуска сӧсуккур болуп, багынып турзын деп ӱредет. (Еврейлерге 13:7, 17, ЈТ кычырыгар.) Је мыны эдерге јеҥил эмес болордоҥ айабас. Нениҥ учун дезе аксагалдар толо кеминде улус эмес. Је бис олордыҥ јакшы јандарын кӧрбӧй, јӱк ле јаман јандарын кӧрӱп турзаас, бистиҥ ӧштӱлерис сӱӱнер. Нениҥ учун анайып айдарга јараар? Нениҥ учун дезе бис Иегованыҥ организациязына бӱтпей барардаҥ айабазыс. А ӧштӱлерге бу ла керек. Айдарда, ӧштӱлердиҥ тӧгӱн пропагандазына бӱдӱп калбаска нени эдер керек?

КУДАЙДЫҤ ОРГАНИЗАЦИЯЗЫНА БӰДӰП ТУРГАНААР УЙАДАБАЗЫН

13. Кудайдыҥ ӧштӱлери оныҥ организациязын канайып јамандайт?

¹³ Кудайдыҥ ӧштӱлери оныҥ организациязын јамандап јат. Темдектезе, Кудай бисти нравственный ла кӧгӱс јанынаҥ ару болзын деп некейт. Анайда ок эди-каныс ару болор учурлу деп ӱредет. Агару Бичикте айдылганыла болзо, кинчектӱ јолын артыргызарга кӱӱнзебей турган улусты јууннаҥ чыгарып салар керек (1 Кор. 5:11—13; 6:9, 10). Бис бу јакаруны бӱдӱрип јадыс. Оныҥ да учун бистиҥ ӧштӱлерис бис улусты  сӱӱбей турганыс ла бистеҥ башка улусты јаман кӧрӧдис деп бурулайдылар.

14. Иегованыҥ организациязы керегинде тӧгӱнди кем јайат?

¹⁴ Тӧгӱнниҥ ары јанында кем турганын билип турыгар. Оны Сатана Дьявол эдет. Агару Бичикте ол «тӧгӱнниҥ адазы» деп адалат (Иоанн 8:44; Баш. 3:1—5). Бис оныҥ да учун Сатана Иегованыҥ организациязы керегинде тӧгӱн неме јайаарга, бистиҥ ӧштӱлерди тузаланып турганына кайкабай јадыс. Андый неме баштапкы да чакта болгон.

15. Тӧгӱн кудай јаҥныҥ башчылары улусты Иисуска ла оныҥ ӱренчиктерине бӱтпезин деп нени эткендер?

¹⁵ Иисус Кудайдыҥ Уулы болгон ло кинчек јок то болгон болзо, анайда ок кӧп кайкалдар эткен де болзо, Сатана тӱҥей ле ол керегинде улус ажыра тӧгӱн неме јайган. Темдектезе, тӧгӱн кудай јаҥныҥ башчыларыныҥ айтканыла болзо, Иисус «шилемир бийиниҥ кӱчиле» кӧрмӧстӧрди чыгара сӱрӱп турган (Марк 3:22). Оноҥ Иисус јаргыда болордо, кудай јаҥныҥ башчылары Иисус Кудайдыҥ адын быјарсыдып турган деп бурулап, албатыны оныҥ ӧлӱмин суразын деп тукурып ийген (Матф. 27:20). А кийнинде, Христостыҥ ӱренчиктери сӱӱнчилӱ јарды јарлап турарда, Кудайдыҥ ӧштӱлери еврей эмес улусты «тӱймедип, карындаштарга удурлаштырып ийдилер» (Ап. ижи 14:2, 19). 1998 јылдыҥ јаҥар айыныҥ баштапкы кӱниниҥ «Каруулчы шибеезинде» Апостолдордыҥ ижи 14:2 керегинде мындый сӧстӧр бичилген: «Иудейлер христиан јаҥды јектеп, улусты Христостыҥ ӱренчиктерине бӱтпезин деп, коркышту јаман немелер куучындагылаар болгон».

16. Иегованыҥ организациязы керегинде јаман неме угуп ийзеес, нени ундыбас керек?

 ¹⁶ Сатана бӱгӱнги де кӱнде тӧгӱн неме јайат. Ол эмдигенче ле «бастыра телекейди мекеле[йт]» (Ачыл. 12:9). Оныҥ учун слер Кудайдыҥ организациязы ла јуунда каруулу акалар керегинде тӧгӱн неме угар болороор. Ол тушта баштапкы чакта Кудайдыҥ ӧштӱлери Иисуска ла оныҥ ӱренчиктерине канайып баштанганын сананып туругар. Агару Бичикте Кудайдыҥ ишчилери јаман кӧрдӱрер ле истедер деп айдылып калган. Бис оны бӱгӱн бойыстыҥ кӧзисле кӧрӱп јадыбыс (Матф. 5:11, 12). Је Сатананыҥ тӧгӱнине јыга соктыртпаска, биске ол тӧгӱнниҥ ары јанында кем турганын аайлап турар керек ле капшай ла бойысты корулаар керек. Канайып?

17. Тӧгӱнниҥ тузагына тӱшпеске, биске не болужар? (2 Тимофейге 1:13). ( «Тӧгӱнге бӱтпеске нени эдер керек?» деген рамканы база кӧрӱгер.)

¹⁷ Тӧгӱн немеге бӱтпегер. Бу јанынаҥ апостол Павел чике, јарт јакарулар берип салган. Ол Тимофейге Кудайдыҥ адын быјарсыдып турган «улустыҥ сананып тапкан» куучындарын укпазын деп јакарган. Анайда ок андый некелтени јуундагы улуска да тургуссын деп јакарган (1 Тим. 1:3, 4; 4:7). Бис дезе кичинек бала чылап јерде јаткан немени капшай ла оозыстӧӧн апарарга кӱӱнзебей јадыс. Јаан улус анайып этпей турган эмей. Нениҥ учун дезе тӧгӱнниҥ ары јанында кем турганын бис јакшы оҥдоп турганыс. Оныҥ ордына бис чындыктаҥ бек тудунадыс. (2 Тимофейге 1:13, ЈТ кычырыгар.)

18. Иегованыҥ организациязына бӱдӱп турганысты канайып кӧргӱзерис?

¹⁸ Бис Иегованыҥ организациязы Иисустаҥ тем алып турганыныҥ јӱк ле ӱч јанын кӧрдис. Агару Бичикти ӱренип јатсаар, организация Иисустаҥ база не јанынаҥ тем алып турганын кӧрӧргӧ албаданыгар. Анайда ок јуундагы ака-эјелериске Кудайдыҥ организациязына бӱдӱп турарга болужыгар. Анайда ок бойыгар да Иеговага бӱдӱп, Кудайдаҥ ла оныҥ организациязынаҥ бек тудуныгар (Сар. 37:28). Ундыбагар, биске Иеговага оныҥ албатызыла кожо иштейтен кӱндӱ эдилген. Бу кӱндӱни баалап јӱректер!