1. Lembe ugam upangere nenedi i kind dhanu pa Yehova i rundi ma kwong’a?

 KA YEHOVA umiyo tic moko ni dhanu pare, ekwayu nia gitime i ayi m’upangere ma ber. (1 Kor. 14:33) Ku lapor, yeny pare utie nia jurwey lembanyong’a i ng’om zoo. (Mat. 24:14) Emiyo tic maeno i kor Yesu. Ugam ukwayu Yesu unen nia tije ubewotho i ayi m’upangere ma ber. Kinde ma jucaku the cokiri i kabedo ma tung’ tung’ i rundi ma kwong’a, juketho judong cokiri pi nibemiyo telowic man pi nitelo wi cokirinegi. (Tic. 14:23) Saa moko guriri mi judong cokiri mi Yeruzalem m’ugam udiko jukwenda ku judong cokiri mange i iye, ubeb umaku yub m’ubed ukwayu cokiri ceke uwor. (Tic. 15:2; 16:4) Adwogi mi woro telowicne ubino nia, “cokiri umediri nidoko tek i yiyoyic man wendgi de [umedere].”—Tic. 16:5.

2. Niai i oro 1919, Yehova ubemiyo telowic man cam mi tipo nenedi?

² Yehova ubemedere nipangu lembe i kind dhanu pare cil tin. Niai i oro 1919, Yesu ubetiyo kud ungu moko ma nok mi jumaco ma juwiro pi nipangu tic mi rweyo lembanyong’a man pi nimiyo cam mi tipo ni julub pare. a (Luka 12:42) Ubenen kamaleng’ nia Yehova ubemiyo mugisa iwi tic mir ungu maeno.—Isa. 60:22; 65:13, 14.

3-4. (a) Kemii lapor moko mi bero ma wabenwang’u pilembe wan’i dilo ma lembe upangere ma ber i iye. (b) Wabiponjo lembang’o i thiwiwec maeni?

 ³ Ka nwang’u lembe upangere ngo ma ber i kindwa, nwang’u ecicopere ngo iwa nitimo tic ma Yesu umiyo i korwa. (Mat. 28:19, 20) Ku lapor, ka nwang’u umego gimaku ngo yub mi poko therithwar mi rweyo lembanyong’a, nwang’u ng’atuman ucirweyo kaka moko ci m’emaru. Nwang’u jurwey ma wendgi lee gibecirweyo zoo i therithwar ma rom, man nwang’u jubeciwil magwei ku therithwar mange. Nyo ibeparu pi bero mange ma wanwang’u pilembe wan’i dilo ma lembe upangere ma ber i iye?

⁴ Tin Yesu ubemedere nipangu lembe i kind dhanu pa Mungu tap i ayi m’etimo kinde m’ebino iwi ng’om. I thiwiwec maeni, wabiweco iwi lapor m’eweko man wabineno kite ma dilo mwa ubelubo ko lapor pare. Wabineno bende kite ma wacopo nyutho ko nia wageno dilo pa Yehova.

DILO MWA UBELUBO LAPOR MA YESU UWEKO

5. Dilo mwa ubelubo lapor pa Yesu i yo acel ma kani? (Yohana 8:28)

⁵ Yesu uponjo gin m’ukwayu eyer man etim ceke i bang’ Won m’i polo. Pi nilubo lapor pare, dilo pa Yehova ketho ponji m’ebemiyo iwi lembe mi kurajo man telowic m’ubeai kud i iye ujengere iwi Lembe pa Mungu. (Som Yohana 8:28; 2 Tim. 3:16, 17) Wabed wanwang’u poyowic thiri thiri iwi somo Lembe pa Mungu man iwi ayi mi tiyo kude. Wanwang’u bero ma kani ka wabetiyo ku poyowic maenogi?

6. Wanwang’u bero acel ma kani ma lee ka wabeponjo Biblia?

⁶ Wanwang’u bero lee mandha ka wabetiyo ku girasoma mwa pi niponjo Biblia. Ku lapor, eno uketho ecopere iwa niporo ponji mi Biblia ku telowic ma wabenwang’u niai kud i dilo mwa. Ka wabeneno nia telowicne ujengere iwi Lembagora, genogen ma watie ko iwi dilo pa Yehova medere ameda.—Rum. 12:2.

7. Yesu urweyo rwonglembe ma kani, man dilo pa Yehova ubelubo lapor pare nenedi?

⁷ Yesu urweyo “lembanyong’a mi Ker pa Mungu.” (Luka 4:43, 44) Eng’olo bende ni julub pare nia girwey pi Kerne. (Luka 9:1, 2; 10:8, 9) Pieno, tin dhanu ceke ma gin’i dilo pa Yehova girweyo rwonglembe mi Ker kadok nwang’u gibekwo kani kunoke gitie ku rwom ma nenedi i dilone.

8. Watie ku rwom ma kani?

⁸ Etie iwa rwom ma dit nirweyo lemandha mi Ker pa Mungu ni dhanu mange! Dhanu zoo ngo re ma gitie ku rwom maeno. Ku lapor, kinde ma Yesu ubino iwi ng’om eyiyo ngo nia pajogi gimii lembatuca i wiye. (Luka 4:41) Tin, i wang’ ma ng’atini ucak rweyo karacelo ku dhanu pa Yehova, kit kwo pare ucikere ninyutho nia eromo pi rwomne. Wanyutho nia pi rwom maeno utie tek i iwa nwang’u wabemiyo lembatuca i kaka ceke man i saa ceke m’ecopere iwa. Tap calu Yesu, lembakeca mwa utie nipidho lemandha mi Ker i adunde dhanu man nikwoyo pii i wiye.—Mat. 13:3, 23; 1 Kor. 3:6.

9. Dilo mwa ubetimo ang’o kara jung’ey nying’ Mungu?

⁹ Yesu uketho jung’eyo nying’ Mungu. I rwo m’erwo ko i bang’ Won m’i polo, eyero kumae: “Aketho ging’eyo nyingi.” (Yoh. 17:26) Nimakere ku lapor m’eweko, dilo pa Yehova ubetimo lembe ceke m’ukwayere pi nikonyo dhanu ging’ey nying’ Mungu. Biblia—Lok mi ng’om ma nyen ubekonyo lee dit pi nitundo i kum lembakeca  maeno, pilembe edwoko nying’ Mungu i kaka ceke m’enwang’ere i iye i dhok ma jukiewo Biblia i igi. Kawoni lok maeno mi Biblia nwang’ere i zoone kunoke i thenge moko i dhok ma kadhu 270. I Thenge ma jumedo A4 man A5 mi lokne, ibinwang’u thelembe m’uketho judwoko nying’ Mungu i iye man ibineno kite ma judwoke ko. Thenge ma jumedo C ma nwang’ere i Biblia mi ponji ke umiyo thelembe mange m’ubenyutho nia nying’ Mungu ucikere ninwang’ere wang’ 237 i Lembagora mi Jugiriki mi Jukristu.

10. Lembe ma mego moko ma kwo i ng’om mi Myanmar uyero ubemiyo iri ponji ma kani?

¹⁰ Tap calu Yesu, wabemito wakony dhanu ma wendgi lee ging’ey nying’ Mungu. Saa ma mego moko m’i ng’om mi Myanmar ma oro pare 67 uponjo nying’ Mungu, eyero ku pii wang’e kumae: “I kwo para zoo, eni tie wang’ ma kwong’a niwinjo nia nying’ Mungu tie Yehova. . . . Wuponja ku lembe ma pire tek nisagu zoo!” Lapor maeno ubenyutho nia ning’eyo nying’ Mungu copo bedo kud atelatela ma lee iwi dhanu m’adundegi tie ayika.

MEDIRI NINYUTHO NIA IGENO DILO PA YEHOVA

11. Judong cokiri gicopo nyutho nenedi nia gigeno dilo pa Yehova? (Nen bende cal.)

¹¹ Yo acel ma kani ma judong cokiri gicopo nyutho ko nia gigeno dilo pa Yehova? Kinde ma ginwang’u telowic moko, ukwayu gisome cuu mandha man gitii kude i kadhiri ceke ma copere igi. Ku lapor, gibed ginwang’u telowic iwi kite mi timo theng program ma tung’ tung’ mi coko, iwi ayi mi rwo i wang’ cokiri, man bende iwi kite mi gwoko rombe pa Kristu. Judong cokiri ma gibeworo telowic mi dilo pa Yehova giketho ju ma gibetelo wigi giwinjiri nia gitie agwoka man nia jumarugi.

12. (a) Pirang’o wacikara nidiko cingwa ku ju ma gibetelo wiwa? (Juebrania 13:7, 17) (b) Pirang’o ukwayu waketh wiwa i kum kite ma beco mi ju ma gibetelo wiwa?

¹² Ka judong cokiri gimiyo iwa telowic moko, wacikara niwore m’umbe gul ic. E kumeno, wabidwoko lembe yot igi. Biblia ubekwayuwa nia wabed wor man wajwigara ni dhanu ma gibetelo wiwa. (Som Juebrania 13:7, 17.) Saa moko eromo bedo iwa tek nitimo kumeno. Pirang’o? Pilembe dhanu maeno gitie ku dubalaga. Tek wabed waketho wiwa i kum ng’ico migi kakare niketho wiwa i kum kite migi ma beco, wabikonyo judegi mwa. Nenedi? Nok nok wabibayu genogen ma watie ko i dilo pa Yehova; eno ke utie tap lembakeca mi judegi mwa. Dong’ wacopo timo ang’o dhe pi ning’iyo vupo mi judegi mwane man niurogi?

KUD IWEK JUMANGE GIKETH IBAY GENOGEN M’ITIE KO I DILO PA YEHOVA

13. Judegi pa Mungu gibed gipimo nenedi nicido nying’ dilo pare?

¹³ Judegi pa Mungu giweco rac i kum lembe ma beco mi dilo pare pi nipimo nicido nying’ dilone. Ku lapor, waponjo i Lembagora nia Yehova ubekwayu nia jutic pare gibed leng’ i thenge mi kum, mi kurajo man i thenge mi tipo. Ebekwayu bende nia jukoy kud i cokiri ng’atu moko ci m’ubemedere ku timo m’ucido m’umbe niloko cwinye. (1 Kor. 5:11-13; 6:9, 10) Wan waworo cik maeno. Ento judegi mwa gitiyo kude pi niyero nia i lembe mwa tek dit, nia wapoko lembe iwi dhanu man nia wamaru ngo jumange.

14. Ng’a dhe m’utie acaki mi lembatada mi vupo ma bemew iwi dilo pa Mungu?

 ¹⁴ Nyang’ nia ng’a dhe m’ubekiedo i dhu dilo mwa. Sitani Wonabali re m’ubemewo lembatada mi vupo. Poy nia etie “wego mi vupo.” (Yoh. 8:44; Tha. 3:1-5) Pieno, ukwayu ngo wawil nia ebitiyo ku dhanu pare pi nimewo lembatada mi vupo iwi dilo pa Yehova. Lembe maeno ugam unen kamaleng’ i rundi ma kwong’a.

15. Judong dini gigam gitimo ang’o i kum Yesu man i kum julub pare?

¹⁵ I rundi ma kwong’a, dhanu ma gin’i ng’ete pa Sitani gicwayu vupo wi wadi wi wadi iwi Wod Mungu ma pwe man m’utimo udu dupa. Ku lapor, judong dini giyero ni dhanu nia tego pa Yesu mi wodho pajogi uai i bang’ “jadit mi pajogi.” (Mark. 3:22) Kinde ma jubeng’olo lembe pa Yesu, gidote nia eyero lembacidi man gicung’o lembe i udul dhanu nia gikway junege. (Mat. 27:20) I ng’eye kinde ma julub pare giberweyo lembanyong’a, judegi migi “gicung’o lembe i dhanu mi thek mange man giroyo adegi i igi” kara ginyay ragedo i kum Jukristu. (Tic. 14:2, 19) Otkur ma Wiw mi nindo 1, dwi mir 12, 1998 ukoro iwi Tic mi Jukwenda 14:2 kumae: “Calu ma rwonglembe mi Ker ubino foyo ngo i Juyahudi ma jujai, gicaku gamba ma rac man gipimo nicung’o lembe i dhanu mi thek mange kara gijai i kum Jukristu.”

16. Ukwayu wapoy i kum ang’o kinde ma wawinjo lembatada mi vupo?

¹⁶ Sitani ujigo ngo nicwayu vupo i rundi ma kwong’a. Fodi asu ebemedere ‘niwondo ng’om zoo.’ (Nyu. 12:9) Tek iwinjo lembatada ma rac iwi dilo mwa kunoke iwi umego ma gibetelo wiwa, poy wang’  acel i kum lembe ma judegi pa Mungu gitimo i kum Yesu man i kum julub mi rundi ma kwong’a. Tin bende gibenyayu ragedo i kum dhanu pa Yehova man gibecwayu vupo i wigi tap calu ma Biblia ular uewo. (Mat. 5:11, 12) Lembatada mi vupo biwingo ngo wiwa tek wanyang’ i kaka ma gicuku ai i iye man tek watimo lembe moko ndhu ndhu pi nigwokara. Dong’ wacopo gwokara nenedi i kumgi?

17. Wacopo timo ang’o kara lembatada mi vupo kud uwing wiwa? (2 Timoteo 1:13) (Nen bende sanduku ma thiwiye tie, “ Ukwayu watim ang’o tek wawinjo lembatada mi vupo?”)

¹⁷ Kwer lembatada mi vupo. Jakwenda Paulo umiyo telowic ma terere iwi gin m’ukwayu watim kinde ma wawinjo lembatada mi vupo. Ekwayu Timoteo “[ukwer] dhanu moko nia kud . . . giketh wigi i kum lembatada mi vupo” man nia “kud [giwinj] lembuda mi ndra.” (1 Tim. 1:3, 4; 4:7) Ku lapor, nyathin ma nyanok romo kwanyu piny mi ng’om man eluthe i dhoge m’umbe ng’eyong’ec, re jadit nyang’ i ariti mi timo maeno. Kumeno bende, wakwero lembatada mi vupo pilembe wang’eyo kaka m’ebeai i iye. Ento wamoko i kum “ponji ma ber” mi lemandha.—Som 2 Timoteo 1:13.

18. Wacopo nyutho nenedi nia wageno dilo pa Yehova?

¹⁸ Dilo mwa ubelubo lapor ma Yesu uweko i yo ma dupa; waweco iwi yone adek kende. Kinde m’ibeponjo Biblia, say yone mange. Kony jumange m’i cokiri peri gimediri nigeno dilo pa Yehova. Mediri bende ninyutho nia in de igene, pieno tim ni Yehova ku gwoko bedoleng’ man mok kikiki i kum dilo m’ebetiyo ko kara yeny pare utimere. (Zab. 37:28) Dong’ wek wan ceke wamedara nifoyo Yehova pilembe emiyo iwa rwom mi bedo i kind dhanu pare ma gimare man ma gibegwoko bedoleng’ migi ire.