TROQUIÑ ÑI CHILLCATUNGEAL 15
ÜLCANTUN 124 Nor piuquengeaiñ fill dungu mu
Doi maneluucüleaiñ Jehová ñi troquiñche mu
“Raquiduamniefimün feichi pu huentru tamün adnieteu, fei engün nütramcaeimünmeu Chau Dios ñi dungu” (HEB. 13:7).
¿CHEM QUIMAIÑ?
Chumaiñ taiñ doi falintunierpuafiel ca maneluucüleal Jehová tañi troquiñche mu.
1. Cuifi mu, ¿chumngechi Jehová adniefi pu hunenque cristiano?
ELUNGELIYIÑ quiñe cüdau Jehová mu cüpalu, Jehová ayüquei taiñ cüme adcünuafiel (1 Cor. 14:33). Jehová duamniei puhual com che mu taiñ amuldungun cüdau (Mat. 24:14). Elfalcünufi Jesús ñi adnieafiel feichi cüdau. ¿Chumngechi amulniei Jesús ñi elfalcünungeelchi cüdau? Hunen siglo, Jerusalén mu mülei fei mu tati pu apostol ca pu loncolelu, fei engün feipiquefui ñi chumcünungeal quiñeque dungu, fei ñi inayafiel pu trahunche (Hech. 15:2; 16:4). Femngechi pu loncolelu mülelu caque quiñeque trahunche mu quimelquefi pu peñi, pu lamngen chem pin pu loncolelu Jerusalén mu (Hech. 14:23). Pu trahunche ayühunquechi inafingün tañi feipingeel, feimu “doi nehuentui ñi feyentun engün. Cafei fill antü conquei che ti trahunche mu” (Hech. 16:5).
2. Jehová, ¿chumngechi amulei ñi adnieafiel tañi pu che fantepu meu?
2 Fachantü Jehová amulei ñi adnieafiel tañi troquiñche. Fei 1919 tripantu mu, Jesús elfalcünufi quiñeque dullinque huentru ñi adnieafiel ti amuldungun cüdau ca ñi quimeltuafiel ti pu che Biblia ñi dungu (Luc. 12:42). a Femngechi quimfalcülei Jehová tañi cümelcaquefiel ñi cüdau tüfachi pu huentru (Is. 60:22; 65:13, 14).
3, 4. 1) Ñi cüme adcülen Jehová tañi troquiñche, ¿chumngechi quelluqueiñmu? 2) ¿Chem peaiñ tüfachi troquiñ mu?
3 Nienofuliyiñ inei taiñ adnieaeteu, cüme enturpulayafuiñ taiñ amuldungun cüdau (Mat. 28:19, 20). Pu peñi feipinoeliyiñmu cheu taiñ amuldungual, caque quiñeque inayafuiñ quisu taiñ duamnieel müten. Femngechi rupale, quiñeque lof mu müten amuldunguafuiñ, huelu caquelu mu puulayafui taiñ amuldungun. ¿Ngüneduamfimi? Ñi cüme adcülen mu taiñ amuldungun, rume cüme tripalei. Raquiduamnge ñi cüme adcülen Jehová tañi troquiñche, ¿ca chumngechi quelluafeiñmu?
4 Chumngechi cüme adcünufi Jesús tañi pu discipulo ellaca mu, ca femngechi femquei fantepu. Tüfachi troquiñ mu, peafiyiñ Jesús ñi femün cuifi mu ca chumngechi Jehová tañi troquiñche inayentuquefi fantepu mu. Ca peafiyiñ chumngechi pengelafuiñ taiñ maneluucülen Jehová ñi troquiñche mu.
JEHOVÁ TAÑI TROQUIÑCHE INAYENTUQUEFI TA JESÚS
5. Jehová tañi troquiñche, ¿chumngechi inaquintuquefi Jesús? (Juan 8:28).
5 Jesús inaniefi tañi Chau ñi quimeltun, tañi feipin ca tañi femün mu. Ca femngechi Jehová tañi troquiñche entuquei Biblia mu com tañi quimeltun ca tañi ngülam (papeltunge Juan 8:28; 2 Tim. 3:16, 17). Ca femngechi yafültucuqueiñmu papeltuafiel Biblia ca taiñ inayafiel ñi chem pin. Femliyiñ, ¿chumngechi quelluafeiñmu? Peafiyiñ.
6. Papeltufiliyiñ Biblia, ¿chumngechi quelluaiñmu?
6 Papeltufiliyiñ Biblia ca taiñ publicacion, rume quelluqueiñmu. Femliyiñ, ngüneduamaiñ com taiñ feipiqueteu Jehová tañi troquiñche tripaquei Biblia mu, femngechi doi maneluuqueiñ Jehová tañi troquiñche mu (Rom. 12:2).
7. 1) ¿Chem amuldunguquefui Jesús? 2) Jehová tañi troquiñche, ¿chumngechi inayentuquefi Jesús?
7 Jesús amuldunguquefui “tati cümeque dungu Chau Dios ñi ngünenietual ta mapu” (Luc. 4:43, 44). Ca femngechi feipifi ñi femal tañi pu inanieteu (Luc. 9:1, 2; 10:8, 9). Fachantü ca femngechi femquei com pu coneltulelu Jehová tañi troquiñche mu, amuldunguqueingün chem mapu mülele rume, ca chem cüdau rume niele engün trahunche mu.
8. ¿Chem falin cüdau elungeiñ taiñ femal?
8 Taiñ amuldungulelafiel pu che Dios tañi dungu rume falin-ngei. Com che elungequelai tüfachi cüdau, ¿chumngelu feipiafuiñ? Mülepalu mapu mu, Jesús elulafi pu huecüfü ñi dungual quisu mu (Luc. 4:41). Taiñ antü mu, quiñe che ayüle ñi amuldungual Jehová ñi pu che engün, mülei ñi hune cüme yenietual ñi mongen. ¿Chumngechi pengelafuiñ taiñ falintuquefiel ti amuldungun? Mülei taiñ rumel amuldunguleal com püle. Jesús reque, yafüluucüleaiñ taiñ amuldungulelafiel ca quimelelafiel com pu che (Mat. 13:3, 23; 1 Cor. 3:6).
9. ¿Chumquei Jehová ñi troquiñche ñi quimeltuafiel pu che Chau Dios tañi üi?
9 Jesús quimeltui Chau Dios tañi üi. Quiñe llellipun mu feipifi tañi Chau: “Quimeltulelfiñ engün tami üi” (Juan 17:26). Fantepu Jehová ñi troquiñche ca femngechi yafüluuquei ñi quimeltuafiel Chau Dios tañi üi com pu che. ¿Chumngechi femqueingün? Entuingün tati Hue Mapu ñi Biblia pingelu, tüfachi Biblia mu huiño tuculelngetui Chau Dios ñi üi cheu ñi mülequefel cuifi. Com ti Biblia cam quiñeque troquiñ nentungei doi 270 quehun dungu mu. Tami doi quimal chumngelu huiño tucungetui Chau Dios tañi üi, Biblia mu ngüneduamafuimi ti apendice A4 mapudungun mu ca A5 huincadungun mu. Ca peafuimi ti Biblia de estudio huincadungun mu, ti apendice C, tüfa mu peafuimi chumngelu Chau Dios tañi üi mülei ñi tripayal 237 rupa ti Griego Huirintucun mu. b
10. ¿Chem quimeleiñmu ñi rupan quiñe domo Myanmar mapu mu?
10 Jesús reque, duamqueiñ com che ñi quimafiel Dios tañi üi. Peaiñ ñi rupan Myanmar mapu mu. Quiñe domo 67 tripantu nielu, quimürpui Chau Dios tañi üi Jehová pingelu. Quimlu müten, eluhui tañi ngümayal. Quisu feipi: “Allcütuquelafun Dios tañi üi, fachantü quimfiñ ti doi falilu tañi mongen mu”. ¿Chem quimeltuqueiñmu tüfa? Pu cüme piuquengelu quimelngen mu Chau Dios tañi üi, ca che reque feletuingün.
AMULEPE TAIÑ FALINTUNIEFIEL JEHOVÁ ÑI TROQUIÑCHE
11. Pu loncolelu, ¿chumngechi pengelafuingün ñi maneluuquen Jehová ñi troquiñche mu? (Ca inaduamnge ti adentun).
11 Pu loncolelu, ¿chumngechi pengelafuingün ñi maneluuquen Jehová ñi troquiñche mu? Pu loncolelu lloufile dungu Jehová ñi troquiñche mu cüpalu, mülei ñi cüme papeltuafiel ca inayafiel. Pu loncolelu feipingequei chumngechi ñi entuafiel chi trahun ca chumngechi ñi llellipual trahunche mu, ca femngechi feipingequei chumngechi ñi cuñiutucunieafiel tañi pu peñi ca pu lamngen. Pu loncolelu femle com ñi feipieteu Jehová tañi troquiñche, pu trahunche quimai Jehová tañi piuqueyeteu ca cuidanieteu.
Pu loncolelu quelluqueiñmu maneluhual taiñ feipieteu Jehová ñi troquiñche. (Inaduamnge parrafo 11). c
12. 1) ¿Chumngelu mülei taiñ feyentuafiel pu loncolelu? (Hebreos 13:7, 17). 2) ¿Chumngelu ngüneduamaiñ ñi cüme femün pu loncolelu?
12 Pu loncolelu elueliyiñmu quiñe huercün dungu, cümei taiñ pürümquechi allcütuafiel. Femngechi femliyiñ, cüdautulayaingün ñi femal tañi falin cüdau. Biblia feipi mülei taiñ allcütuafiel pu loncolelu, ca mülei taiñ eluucüleal taiñ adnieaeteu engün (papeltunge Hebreos 13:7, 17). Quiñeque mu cüdautuafuiñ, pu loncolelu ca femngechi culpafengelu cai. Huelu inaduamüñmalayafiyiñ tañi huelulcahun engün, doi mai cümeque dungu ñi femün. Taiñ pu caiñe ayüniei taiñ femngechi femal, ¿chumngelu? Fei engün ayüquei taiñ feyentuhuenoafiel pu loncolelu, femngechi taiñ maneluuhuenoal Jehová ñi troquiñche meu. ¿Chumafuiñ taiñ hueluraquiduamelnoaeteu taiñ pu caiñe ñi coilatun?
AMULEPE TAIÑ MANELUUCÜLEN JEHOVÁ ÑI TROQUIÑCHE MU
13. Taiñ pu caiñe, ¿chumquei taiñ huesa raquiduamelaeteu Jehová ñi troquiñche mu?
13 Jehová tañi troquiñche cümeque dungu femquei, huelu taiñ pu caiñe ayüquei taiñ huesa raquiduamelaeteu Jehová ñi troquiñche mu. Biblia quimeltuquei Jehová ayüquei taiñ cüme poyeafiel, taiñ yenieal lif mongen ca taiñ liftuucüleal. Jehová feipi quiñeque cristiano yeniele pod mongen repentiunole, mülei ñi tripatual Jehová ñi troquiñche mu (1 Cor. 5:11-13; 6:9, 10). Iñchiñ am inaquelu tüfachi huercün dungu, taiñ pu caiñe feipiqueiñmu taiñ piuqueyechequenon ca yamchequenon, re juzgachequeimün piqueiñmu.
14. ¿Inei ñi duam mu feipingequei coilaque dungu iñchiñ mu?
14 Inaduamaiñ rüfcünu inei am tati caiñe. Huecüfü meu “tripaquei com coilaque dungu” (Juan 8:44; Gén. 3:1-5). Quisu ñi duam mu feipingequei coilaque dungu Jehová ñi troquiñche mu. Feimu afmatulquelaeiñmu Huecüfü ñi adnieafiel taiñ pu caiñe taiñ huesa dunguyeaeteu fill püle. Fütra cuifi ñi femmequen ta Huecüfü, Jesús ca tati pu hunenque cristiano ñi antü meu.
15. Pu loncolechi religioso, ¿chumngechi dalluntucufingün ta Jesús ca pu hunenque cristiano?
15 Jesús turpu culpafengelai, ca femquefui fentren afmatufalchi dungu. Femfulu rume, Huecüfü adniefi quiñeque che ñi coilatudunguyeafiel Jesús. Jesús huemünentufilu huesaque püllü, pu loncolechi religioso feipiquefuingün Huecüfü ñi quellun mu femi (Mar. 3:22). Feichi juiciantucungelu Jesús, pu loncolechi religioso feipingün ñi caiñetudungufiel ta Chau Dios, fei rulpaduamelfi tati pu che langümngepe piafiel (Mat. 27:20). Rupachi antü mu, pu hunenque cristiano eluulu tañi amuldungual, pu loncolechi religioso ngüchaltucufingün pu che ñi caiñetuafiel (Hech. 14:2, 19). Cuifi mu La Atalaya feipi feitachi pu judio duamtulafingün pu hunenque cristiano ñi amuldungun, huelu ca femngechi dalluntucufingün ñi üdengeal ca ñi allcütungenoal engün (La Atalaya tripalu 1 diciembre 1998 tripantu).
16. ¿Chumaiñ allcütuliyiñ coilaque nütram?
16 Huecüfü rumel coilatuquei, feimu fachantü “ngünencamequefi com mapu müleyechi pu che” (Apoc. 12:9). Feimu quiñeque mu allcürumeafuiñ coilaque dungu ñi feipingeel Jehová ñi troquiñche mu cam pu loncolelu mu, huelu loncontucunieaiñ ñi ca femngechi coila dalluntucungen Jesús ca tati pu hunenque cristiano. Jesús feipi ñi caiñetuñmangeal Jehová tañi pu che ca coila dalluntucungeal engün, femngechi femtripalei taiñ antü meu (Mat. 5:11, 12). Loncontucunieliyiñ Huecüfü mu ñi cüpan ti coilatun ca cuñiutucuuliyiñ, taiñ pu caiñe ngünencalayaiñmu. ¿Chumaiñ taiñ cuñiutucuucüleal? Peafiyiñ.
17. Allcütuliyiñ coilaque nütram, ¿chumaiñ? (2 Timoteo 1:13; ca inaduamfinge ti huichulechi dungu “ ¿Chumaiñ acule quiñe coila nütram?”).
17 Famentuafiyiñ coilaque nütram. Ti apostol Pablo feipieiñmu chem taiñ femal. 1 Timoteo 1:3, 4 feipieiñmu taiñ allcütunoal coilaque nütram. Ca feipifi ta Timoteo: “Quiñepülecünuafimi feichi coilaque nütram caiñetuquefilu ta Chau Dios” (1 Tim. 4:7). Raquiduamnge, quiñe pichiche tucuafui tañi hun mu chem rume podcülelu, huelu quiñe tremche femlayafui, quimi tañi cutranelafeteu. Iñchiñ ca femngechi quimnieiñ coilaque nütram taiñ huesalcayafeteu, feimu lloulayafiyiñ, doi mai allcütuafiyiñ tati rüf dungu müten (papeltunge 2 Timoteo 1:13).
18. ¿Chumngechi pengelafuiñ taiñ maneluucülen Jehová ñi troquiñche mu?
18 Jehová tañi troquiñche inayentuquefi Jesús tañi femün. Tüfachi troquiñ mu, ngüneduamiyiñ cüla dungu. Huelu papeltufilmi Biblia, doi peaimi Jehová tañi troquiñche chumngechi inayentuquefi ta Jesús. Quelluntucufinge tami pu peñi, pu lamngen ñi doi maneluhual engün Jehová ñi troquiñche meu. Rumel cüdauconcülenge Jehová mu, chem no rume catrütulayaimu tami inayafiel Jehová tañi troquiñche. Jehová huechunentual tañi cüdau pünequefi tañi troquiñche (Sal. 37:28). Rume ayühun-ngei fülconcüleal Jehová tañi poyenque troquiñche mu, ¿felelai am?
¿CHEM HUIÑOLDUNGUAFUIMI?
-
Jehová ñi troquiñche, ¿chumngechi inaquintuquefi Jesús?
-
¿Chumngechi pengelafuiñ taiñ maneluucülen Jehová ñi troquiñche mu?
-
¿Chumaiñ allcütuliyiñ coilaque nütram?
ÜLCANTUN 103 Pu loncolelu, yehun reque feleingün
a Inaduamnge ti huichulechi dungu “¿Y por qué 1919?” tripalu ti lifru La adoración pura de Jehová: ¡por fin restaurada! pagina 102 ca 103.
b Griego Huirintucun mu ñi feipial Chau Dios ñi üi meli versiculo re feipilei Jah, huelu mapudungun mu huirintucungei com ti üi, Jehová. Feimu 241 rupa tripai Jehová ñi üi Mateo puulu Apocalipsis mapudungun mu.
c ¿CHEM PENGELI TI ADENTUN? Pu loncolelu trahuluuquei chumngechi tañi amuldungual cheu ñi rupaquen fentrenque che. Fei hula, quiñe loncolelu feipifi epu lamngen chumngechi cüdahual carrito mu, feipi ñi furi pülecünuhual quiñe muralla mu.
