1. Биринҹи әсрдә Јеһованын халгы неҹә тәшкил олунмушду?

 ЈЕҺОВА халгына иш тапшыранда бунун низамлы шәкилдә едилмәсини ҝөзләјир (1 Кор. 14:33). Мәсәлән, Јеһова хош хәбәрин бүтүн јер үзүндә тәблиғ едилмәсини истәјир (Мәт. 24:14). О бу ишә башчылыг етмәји Иса Мәсиһә тапшырыб. Иса Мәсиһ дә бу ишин низамлы шәкилдә апарылмасына нәзарәт едир. Биринҹи әсрдә Јерусәлимдә һәвариләрдән вә бәзи тәҹрүбәли ағсаггаллардан ибарәт шура бүтүн јығынҹаглар үчүн гәрарлар верирди вә јығынҹаглардан бу гәрарлара әмәл етмәк тәләб олунурду (Һәв. 14:23). Мүхтәлиф әразиләрдә јаранан һәр јығынҹағын ағсаггаллары шуранын вердији гәрарлары баҹы-гардашлара чатдырырды (Һәв. 15:2; 16:4). Алдыглары ҝөстәришләрә итаәт етдикләри үчүн «јығынҹаглар иманда мөһкәмләнир вә ҝүнү-ҝүндән бөјүјүрдү» (Һәв. 16:5).

2. 1919-ҹу илдән бәри Јеһова һансы јолла халгына рәһбәрлик едир вә руһани гида верир?

² Јеһова халгыны бу ҝүн дә низамлы шәкилдә идарә едир. Онун рәһбәрлији алтында Иса Мәсиһ 1919-ҹу илдән бәри мәсһ олунмуш мәсиһиләрдән ибарәт кичик груп васитәсилә тәблиғ ишини тәшкил едир вә давамчыларына руһани гида верир a (Лука 12:42). Јеһованын бу групун ишини аванд етдији ҝөз габағындадыр (Әшј. 60:22; 65:13, 14).

3, 4. а) Тәшкилатда низам-интизамын олмасынын һансы хејри вар? Нүмунә чәкин. б) Бу мәгаләдә нә һагда данышылаҹаг?

³ Әҝәр тәшкилатымызда низам-интизам олмасајды, биз Исанын тапшырдығы иши јеринә јетирә билмәздик (Мәт. 28:19, 20).  Мәсәлән, тәсәввүр един ки, јығынҹағынызын тәблиғ саһәси јохдур вә һәрә истәдији јердә тәблиғ едир. Белә олсајды, тәблиғчиләр бәзи әразиләрдә тәкрар-тәкрар тәблиғ едәрди, бәзи әразиләрдә исә үмумијјәтлә тәблиғ едилмәзди. Бәс тәшкилатда низам-интизамын олмасынын башга һансы хејрини ҝөрмүсүнүз?

⁴ Бу ҝүн Иса Мәсиһ Аллаһын халгыны јер үзүндә оларкән гојдуғу низама ујғун олараг идарә едир. Бу мәгаләдә Иса Мәсиһин гојдуғу нүмунәни вә тәшкилатын онун нүмунәсини неҹә изләдијини арашдыраҹағыг. Һәмчинин Јеһованын тәшкилатына етибар етдијимизи ҝөстәрмәјин јолларындан данышаҹағыг.

ТӘШКИЛАТ ИСАНЫН НҮМУНӘСИНИ ИЗЛӘЈИР

5. Тәшкилатымызын Исанын нүмунәсини изләдијини ҝөстәрән саһәләрдән бири һансыдыр? (Јәһја 8:28).

⁵ Иса етдији вә дедији һәр бир шеји Атасындан өјрәнмишди. Јеһованын тәшкилаты Иса Мәсиһин нүмунәсини изләјәрәк әхлагла бағлы тәлимләрини вә вердији рәһбәрликләри Аллаһын Кәламына әсасландырыр (Јәһја 8:28 ајәсини охујун; 2 Тим. 3:16, 17). Тез-тез бизә Аллаһын Кәламыны мүталиә етмәјин ваҹиблији хатырладылыр. Бәс Аллаһын Кәламыны мүталиә етмәјин бир јолу һансыдыр вә бунун бизә һансы хејри вар?

6. Аллаһын Кәламыны һансы јолла мүталиә едәндә бунун хејрини ҝөрә биләрик?

⁶ Мүгәддәс Китабы нәшрләримизин көмәји илә мүталиә едәндә бунун бөјүк хејрини ҝөрүрүк. Мәсәлән, Аллаһын Кәламында јазыланлары тәшкилатын нәшрләримиз васитәсилә вердији ҝөстәришләрлә тутушдура билирик. Бу заман биз ҝөрүрүк ки, алдығымыз бүтүн ҝөстәришләр Аллаһын Кәламына әсасланыр вә бу бизим Јеһованын тәшкилатына етибарымызы артырыр (Ром. 12:2).

7. Иса Мәсиһ һансы мүждәни тәблиғ едирди вә бу ҝүн Аллаһын тәшкилаты онун нүмунәсини неҹә изләјир?

⁷ Иса Мәсиһ «Аллаһын Падшаһлығы һаггында мүждәни» тәблиғ едирди (Лука 4:43, 44). О, шаҝирдләринә дә Падшаһлыг һагда тәблиғ етмәји әмр етмишди (Лука 9:1, 2; 10:8, 9). Бу ҝүн Јеһованын тәшкилатында олан һәр бир кәс һарада јашамасындан, нә гәдәр мәсулијјәти олмасындан асылы олмајараг, хош мүждәни инсанлара чатдырыр.

8. Биз һансы шәрәфә лајиг ҝөрүлмүшүк?

⁸ Инсанлара Аллаһын Падшаһлығы һагда данышмаг бизим үчүн бөјүк шәрәфдир. Бу шәрәф һәр кәсә нәсиб олмур. Мәсәлән, Иса Мәсиһ јер үзүндә оланда ҹинләрә онун һагда шаһидлик вермәји гадаған етмишди (Лука 4:41). Бу ҝүн инсан Аллаһын халгы илә бирликдә тәблиғдә иштирак етмәк үчүн мүәјјән тәләбләрә ҹаваб вермәлидир. Әҝәр биз тәблиғ етмәји шәрәф һесаб едириксә, вахтындан вә јериндән асылы олмајараг, имкан дүшән кими инсанларла Аллаһын Падшаһлығы һагда данышаҹағыг. Иса Мәсиһ кими бизим дә мәгсәдимиз һәгигәт тохумларыны инсанларын үрәјинә әкмәк вә сувармагдыр (Мәт. 13:3, 23; 1 Кор. 3:6).

9. Аллаһын адынын танынмасы үчүн тәшкилатымыз нә едиб?

⁹ Иса Мәсиһ инсанлара Аллаһын адыны ачмышды. О, Аллаһа етдији дуасында демишди: «Сәнин адыны онлара ачдым» (Јәһ. 17:26). Јеһованын тәшкилаты да Иса Мәсиһдән өрнәк алараг инсанларын Аллаһын адыны билмәси үчүн әлиндән ҝәләни едир. Мәсәлән, тәшкилатын дәрҹ етдији «Мүгәддәс Јазыларын Јени Дүнја Тәрҹүмәси»нин бу ишдә бөјүк ролу вар. Орада Аллаһын ады орижинал мәтндә истифадә олунан һәр бир јердә бәрпа олунуб. Һәмин тәрҹүмә там вә ја гисмән 270-дән чох дилдә мөвҹуддур. Бу тәрҹүмәнин А4 вә А5 әлавәләриндә  Аллаһын адынын бәрпа олунмасы илә бағлы әтрафлы мәлумат вар. Һәмчинин А5 әлавәсиндә Аллаһын адынын Инҹилдә 237 јердә истифадә олунмасынын әсаслы сәбәбләри ачыгланыр.

10. Мјанмада јашајан бир гадынын сөзләриндән нә өјрәнирсиниз?

¹⁰ Иса Мәсиһ кими биз дә мүмкүн гәдәр чох инсана Аллаһын адыны ачмаг истәјирик. Мјанмада јашајан 67 јашлы бир гадын Аллаһын адыны ешидәндә ҝөз јашлары ичиндә демишди: «Һәјатымда илк дәфәдир ки, Аллаһын адынын Јеһова олдуғуну ешидирәм... Сиз мәнә бу һәјатда ән ваҹиб шеји өјрәтдиниз». Бу һадисәдән ҝөрдүјүмүз кими Аллаһын адыны билмәк сәмими-гәлбли инсанларын һәјатында дөнүш нөгтәси ола биләр.

ТӘШКИЛАТА ЕТИБАР ЕТДИЈИНИЗИ ДАИМА ҜӨСТӘРИН

11. Ағсаггаллар Јеһованын тәшкилатына етибар етдикләрини неҹә ҝөстәрә биләр? (Һәмчинин шәклә бахын.)

¹¹ Ағсаггаллар тәшкилата етибар етдикләрини һансы јолла ҝөстәрә биләрләр? Ағсаггаллар һансыса ҝөстәриши аланда ону диггәтлә охумалы вә әлләриндән ҝәләни едиб әмәл етмәјә чалышмалыдырлар. Мәсәлән, онлар ҝөрүшләрин бәндләрини неҹә апармаг, јығынҹағын адындан неҹә дуа етмәклә бағлы ҝөстәришләр алырлар. Бунлардан әлавә, ағсаггаллара Мәсиһин гузуларынын гејдинә галмагла бағлы да ҝөстәришләр верилир. Онлар тәшкилатдан ҝәлән бүтүн ҝөстәришләрә әмәл едәндә баҹы-гардашлар Јеһованын севҝисини вә гајғысыны дујур.

12. а) Нәјә ҝөрә рәһбәрлик едән гардашларла әмәкдашлыг етмәлијик? (Ибраниләрә 13:7, 17). б) Нәјә ҝөрә диггәтимизи ағсаггалларын мүсбәт хүсусијјәтләринә ҹәмләмәлијик?

¹² Ағсаггаллардан ҝөстәриш аланда онлара ҹанла-башла әмәл етмәлијик. Биз белә едәндә онлара ишләрини иҹра етмәк даһа асан олаҹаг. Мүгәддәс Китаб бизи рәһбәрлик едән гардашлара итаәт етмәјә вә онлара табе олмаға тәшвиг едир. (Ибраниләрә 13:7, 17 ајәләрини охујун.) Амма бу, һәмишә асан олмур, чүнки бу гардашлар да гејри-камилдирләр. Әҝәр биз диггәтимизи онларын мүсбәт јох, мәнфи ҹәһәтләринә ҹәмләсәк, дүшмәнләримизин дәјирманына су төкмүш оларыг. Һансы мәнада? Чүнки ағсаггаллар һагда мәнфи фикирләшириксә, ола биләр ки, тәшкилат һаггында да мәнфи дүшүнмәјә башлајаг вә она етибарымызы итирәк. Дүшмәнләримизин дә истәји елә будур. Бәс дүшмәнләримизин јаланларыны сезмәк вә онлара гаршы дурмаг үчүн конкрет һансы аддымлары ата биләрик?

ГОЈМАЈЫН КИМСӘ ТӘШКИЛАТА ЕТИБАРЫНЫЗЫ САРСЫТСЫН

13. Аллаһын дүшмәнләри тәшкилатымызы ҝөздән салмаг үчүн нәләр едир?

¹³ Аллаһын дүшмәнләри тәшкилатын мүсбәт тәрәфләрини мәнфи бир шеј кими гәләмә вермәјә чалышырлар. Мәсәлән, Мүгәддәс Китаба әсасән Јеһова хидмәтчиләринин физики, әхлаги вә руһани ҹәһәтдән тәмиз олмасыны истәјир. О дејир ки, өз натәмиз әмәлләринә давам едән вә дәјишмәк истәмәјән инсан јығынҹагдан кәнар едилмәлидир (1 Кор. 5:11—13; 6:9, 10). Биз Мүгәддәс Китабда јазылмыш бу әмрә табе олуруг. Амма дүшмәнләримиз буну бизим әлејһимизә истифадә едир. Онлар бизи иттиһам едиб дејирләр ки, инсанлары олдуғу кими гәбул етмирик, онлары мүһакимә едирик, севмирик.

14. Тәшкилатымыз һагда јајылан јаланлар кимдән гајнагланыр?

¹⁴ Һүҹумларын кимдән гајнагландығыны билин. Тәшкилатымыз һагда јајылан јаланларын  архасында Шејтан Иблис дурур. О, «јаланын атасыдыр» (Јәһ. 8:44; Јар. 3:1—5). Шејтан Јеһованын тәшкилаты һагда јаланлар јајмаг үчүн тәрәфдарларындан истифадә едир. Бу да бизи тәәҹҹүбләндирмир. Чүнки белә бир шеј биринҹи әсрдә дә баш вермишди.

15. Дин хадимләри Исаја вә онун давамчыларына гаршы нәләр едирдиләр?

¹⁵ Исанын камил олмасына, мөһтәшәм мөҹүзәләр ҝөстәрмәсинә бахмајараг, биринҹи әсрдә Шејтанын тәрәфдарлары онун һагда ард-арда јаланлар сөјләјирдиләр. Мәсәлән, дин хадимләри халга дејирди ки, Иса «ҹинләри елә ҹинләрин һөкмдарынын әли илә говур» (Марк 3:22). Иса Мәсиһә мәһкәмә гуруланда дин хадимләри ону кафирликдә иттиһам етмишдиләр вә халгы өјрәтмишдиләр ки, онун едам едилмәсини истәсинләр (Мәт. 27:20). Сонралар Мәсиһин давамчылары мүждәни тәблиғ едәндә дүшмәнләр халгы гызышдырыб, онлары бу мәсиһиләри тәгиб етмәјә тәһрик едирди (Һәв. 14:2, 19). «Ҝөзәтчи гүлләси»нин 1998-ҹи ил 1 декабр сајында Һәвариләрин ишләри 14:2 ајәси илә бағлы белә сөзләр јазылмышды: «Јәһуди әлејһдарлар хош мүждәни рәдд етмәклә кифајәтләнмәдиләр. Онлар гејри-јәһудиләри Исанын давамчыларына гаршы галдырмаг үчүн бөһтанлара әл атдылар».

16. Јалан мәлуматлар ешидәндә нәји унутмамалыјыг?

¹⁶ Шејтан биринҹи әсрдә олдуғу кими бу ҝүн дә јаланлар јајыр. О һәлә дә «бүтүн дүнјаны [алдадыр]» (Вәһј 12:9). Тәшкилатымызла вә рәһбәрлик едән гардашларла бағлы мәнфи мәлуматлар ешидәндә биринҹи әсрдә Аллаһын дүшмәнләринин Иса Мәсиһлә вә онун давамчылары илә неҹә даврандығыны јадыныза салын. Аллаһын халгынын  бу ҝүн үзләшдији тәгибләр вә адына јахылан гаралар габагҹадан пејғәмбәрлик олунмушду. Бу ҝүн баш верәнләр һәмин пејғәмбәрлијин дәгиглијинә кими иҹрасыдыр (Мәт. 5:11, 12). Бу јаланлара алданмамаг үчүн биз онларын кимдән гајнагландығыны унутмамалыјыг вә дәрһал тәдбир ҝөрмәлијик. Бәс нә едә биләрик?

17. Јалан мәлуматларын бизә зәрәр вермәмәси үчүн нә етмәлијик? (2 Тимутијә 1:13). (Һәмчинин « Јалан мәлуматлар ешидәндә нә етмәлијик?» адлы чәрчивәјә бахын.)

¹⁷ Јалан мәлуматлара гулаг асмајын. Јалан мәлуматлар ешидәндә нә етмәк лазым олдуғуну һәвари Булус ајдын баша салмышды. О, Тимутијә демишди ки, бәзиләринә «ујдурма рәвајәтләрә... баш гошмағы» гадаған етсин вә «нағыллара бәнзәјән, јаланла, күфрлә долу рәвајәтләри» рәдд етсин (1 Тим. 1:3, 4; 4:7). Балаҹа ушаг јердән нәсә ҝөтүрүб ағзына гоја биләр. Амма бөјүк инсан буну һеч вахт етмәз. Чүнки бунун зәрәрли олдуғуну баша дүшүр. Биз дә јалан мәлуматларын кимдән гајнагландығыны билдијимиз үчүн онлара гулаг асмырыг. Биз јалныз һәгигәтин «сағлам сөзләр»ини динләјирик. (2 Тимутијә 1:13 ајәсини охујун.)

18. Јеһованын тәшкилатына етибар етдијинизи неҹә ҝөстәрә биләрсиниз?

¹⁸ Бу ҝүн Јеһованын тәшкилаты бир чох саһәдә Исанын нүмунәсини изләјир. Мәгаләдә бунларын үчүндән данышдыг. Мүгәддәс Китабы мүталиә едәндә башга саһәләри дә ҝөрмәјә чалышын. Јығынҹагдакы баҹы-гардашлара тәшкилата етибарларыны артырмаға көмәк един. Өзүнүз дә тәшкилата етибар етдијинизи ҝөстәрин. Буну Јеһоваја сәдагәтлә хидмәт етмәклә вә ирадәсини јеринә јетирмәк үчүн истифадә етдији тәшкилата бағлы галмагла ҝөстәрә биләрсиниз (Зәб. 37:28). Ҝәлин Јеһованын мәһәббәт долу вә сәдагәтли халгынын арасында олмаг шәрәфини һәмишә гијмәтләндирәк.