1. Lelaa bagwélél ba Yéhôva ba bé ntjegek i hiai hi bisu?

 HIKI ngéda Yéhôva a nti bagwélél bé ngim nson, a ngwés le ba sal yo ikété oda, tole ba ba ntjegek loñge inyu sal yo. (1 Korintô 14:33) Kiki hihéga, sômbôl i Nyambe i yé le ñañ nlam u añlana ni hisi hiosôna. (Matéô 24:14) Yéhôva a bi pohol Yésu inyu éga nson u. Yésu a nyoñ bitelbene le i bôt a ngwélél inyu yônôs i nson u, ba ba ntjegek loñge. I hiai hi bisu, ba bi bot makoda bahoma bahoma, ba téé ki mimañ inyu kena nson mu makoda ma. (Minson mi baôma 14:23) Juu li bakena ntôñ li bé i Yérusalem, hala wee baôma ni mimañ, bon ba bé yoñ ngim makidik makoda momasôna ma bé lama noñ. (Minson mi baôma 15:2; 16:4) Kiki ba bé noñ makidik ma, “makoda ma bi kônde bana ngui ikété hémle, yak nsoñgi wap u bedek hiki kel.”​—Minson mi baôma 16:5.

2. Ibôdôl i nwii 1919, imbe njel Yéhôva a ngwélél inyu éga bés ni i ti bés bijek bi mbuu?

² Yak i len ini, Yéhôva a nke ni bisu i tjek bagwélél bé. Ibôdôl i nwii 1919, Yésu a ngwélél man juu nu minhook inyu éga nson likalô, ni i ti banigil bé bijek mi mbuu. a  (Lukas 12:42) I ngéda di mbéñge i len ini, di nôgda toi le Yéhôva a yé sayap nson wap.​—Yésaya 60:22; 65:​13, 14.

3-4. (a) Ti hihéga hi hi ñunda nseñ di ñôt i ngéda di yé ntjegek loñge. (b) Kii di ga tehe munu yigil ini?

³ Ibale di bak bé ntjegek loñge, ki di ta bé le di yônôs nson Yésu a bi ti bés. (Matéô 28:​19, 20) Kiki hihéga, ibale hiki likoda li ban-ga bé jé libôga li likalô, ki hiki mut a ntéé ndik likalô i homa a ngwés. Hala a mboñ le, ngim mabôga i nséla hikôô hi ngélé, ki le mape, ma nséla bé to ngélé yada. Baa u nla ti dihéga dipe di di ñunda nseñ u yé i ba ntjegek?

⁴ I ngéda di ntehe lelaa Yésu a bi sal i ngéda a bé hana ’isi, di nla nok lelaa a ntjek nson likalô i len ini. Munu yigil ini, d’a tehe i ndémbél Yésu a bi yigle bés, ni lelaa ntôñ wés u noñ yo i len ini. D’a tehe ki lelaa di nla unda le di ndiihe ntôñ u Yéhôva.

NTÔÑ WÉS U NOÑ NDÉMBÉL YÉSU A BI YÉK

5. Sima njel yada di nla gwélél inyu noñ ndémbél i Yésu? (Yôhanes 8:28)

⁵ Yésu a bi nigil ipañ Isañ, kii a boñ ni kii a kal. Kiki i bé inyu Yésu, biniigana ni maéba ntôñ u nti bés bi nlôl i Bañga i Nyambe. (Añ Yôhanes 8:28; 2 Timôtéô 3:​16, 17) Ba mbéna hôñlaha bés le di añ Bañga i Nyambe, di bii ki yo i bibôñôl. Umbe nseñ di ñôt i nôgôl maéba ma?

6. Umbe nseñ di ñôt i ngéda di nigil Bañga i Djob?

⁶ Di ñôt nseñ ngandak i ngéda di nigil Bibel, di gwéélak bikaat bi ntôñ. Kiki hihéga, di nla hégha biniigana bi Bibel ni maéba ntôñ u nti bés. I ngéda di ntehe le maéba ma, ma nlôl toi i Bitilna, hala a nkônde lédés i bôdôl di gwééne ntôñ u Yéhôva.​—Rôma 12:2.

7. Umbe nwin Yésu a bé añal, lelaa ntôñ u Yéhôva u noñ ndémbél yé i len ini?

⁷ Yésu a bé añal “ñañ nlam u Ane Nyambe.” (Lukas 4:​43, 44) Yésu a bi ti ki banigil bé oda le ba añal ñañ nlam u Ane. (Lukas 9:​1, 2; 10:​8, 9) I len ini, ba bobasôna ba yé ikété ntôñ u Yéhôva ba ñañal ñañ nlam u Ane to hee homa ba nyééne, to ba ngwel umbe nson ikété likoda?

8. Umbe nsima di gwé?

⁸ Hala a yé toi nsima i añle bôt bape ñañ nlam u Ane i Nyambe! Bôt bobasôna bé bon ba nla gwel nson u. Kiki hihéga, i ngéda Yésu a bé hana ’isi, a bi nwas bé le mimbuu mimbe mi bok mbôgi inyu yé. (Lukas 4:41) I len ini, ilole ntôñ u Yéhôva u nti mut kunde i añal ñañ nlam, a nlama ndugi yônôs ngim matode. Di ñunda le di ndiihe nsima di gwé i añal ñañ nlam i ngéda di ntéé likalô to hee homa di yé, ni hiki ngéda pôla i nene. Kiki Yésu, njômbi yés i yé le di bel mbôô i maliga miñem mi bôt, di kôp ki malép mu.​—Matéô 13:​3, 23; 1 Korintô 3:6.

9. Kii ntôñ u Yéhôva u mboñ inyu hôla bôt i yi jôl li Djob?

⁹ Yésu a bi boñ le jôl li Djob li yiba. I ngéda a bé soohe Isañ, Yésu a bi kal le: “Me bi boñ le ba yi jôl joñ.” (Yôhanes 17:26) I len ini, yak ntôñ u Yéhôva u noñ ndémbél i Yésu mu kiki u mboñ kii yosôna u nla inyu hôla bôt i yi jôl li Nyambe. Bitilna Bipubi. Ngobol mbok yondo i ntimbis jôl li Nyambe bahoma bobasôna li nlama ba. I ngobol  i Bibel i, i ma pam ikété iloo 270 dilémb. I Apendis A4 ni A5, u ga léba ngandak mam i i ntoñol inyuki ba bi timbis jôl li Nyambe mu bahoma ba ikété Bibel. Apendis C, i di nléba i Bible d’étude, i nti ndoñi ipe i i nhôla bés i nok inyuki i jôl li, li nlama ba ikété Bitilna ni hop Lôk Grikia letee ni 237 ngélé.

10. Kii di nigil mu jam muda wada nu a niñ i loñ Myanmar a bi kal?

¹⁰ Kiki Yésu, di gwé ngôñ i hôla ngandak bôt i yi jôl li Nyambe. I ngéda a bi nigil le Nyambe a gwé jôl, muda wada nu a niñ i Myanmar a ban-ga 67 ma nwii a bi kal ni gwiiha i mis le: “Ibôdôl nu me bii gwéé, ngélé bisu ini le me nok le jôl li Nyambe le Yéhôva. . . . I jam ni niiga me li nlôôha nseñ iloo i mam momasôna me ma nigil i niñ yem.” Kiki ñañ unu u ñunda, i nigil jôl li Nyambe i nla héñha biniñ bi bôt ba miñem minlam, héñha yosôna.

DI KEE NI BISU I DIIHE NTÔÑ WÉS

11. Lelaa mimañ mi nla unda le mi ndiihe ntôñ u Yéhôva? (Béñge yak titii.)

¹¹ Lelaa mimañ mi nla unda le mi ndiihe ntôñ u Yéhôva? I ngéda ntôñ u ntip pémés biniigana, mimañ mi nlama yoñ ngéda i tibil nigil gwo, mi nôgôl ki gwo kiki la yap. Kiki hihéga, ikété maéba ba nkôs, ntôñ u niiga bo lelaa ba lôôs minkwel, ni lelaa ba nla soohe inyu likoda. U niiga ki bo lelaa ba nlama yoñ ndun ni mintômba mi Kristô. Mimañ mi mi noñ biniigana bi ntôñ mi nhôla i bet ba yé isi yap i nôgda le ba ntôñ bo ni le ba ngwés bo.

12. (a) Inyuki di nlama nôgôl i bet ba ñéga bés? (Lôk Héber 13:​7, 17) (b) Inyuki di nlama bok mahoñol i ngii bilem bilam bi bet ba ñéga bés?

¹² I ngéda mimañ mi nti bés biniigana, di nlama nôgôl gwo ni ñem wés wonsôna. Ibale di mboñ hala, i ga ba jam li ntomb inyu i bet ba ñéga bés i sal bôlô yap. Bibel i nti bés makénd i nôgôl ni i suhus bésbomede isi i bet ba ñéga bés. (Añ Lôk Héber 13:​7, 17.) Ngim mangéda, hala a nla ba ndutu. Inyuki? Inyule i bôt ba, ba ta bé peles. Ndi ibale di mbok mahoñol i ngii bibomb gwap iloole di bok mo i ngii bilem gwap bilam, wee di yé i sal inyu baoo bés. Lelaa hala? Ibale di mboñ hala, di ga bôdôl ha ntôñ u Yéhôva ñem, i jam li jon baoo bés ba mbem. Kii i tôbôtôbô di nla boñ inyu yimbe ni inyu tjél noñ i mam baoo bés ba mboñ inyu boñ le di bôdôl ha bañ ntôñ u Yéhôva ñem?

U NWAS BAÑ LE BÔT BAPE BA BOÑ LE U DIIHE HA BAÑ NTÔÑ U YÉHÔVA

13. Lelaa baoo ba Nyambe ba noode boñ le di bôdôl ha bañ ntôñ wé ñem?

¹³ Baoo ba Djob ba noode hindis i mam malam ntôñ u Yéhôva u mboñ. Kiki hihéga, Bibel i niiga bés le Yéhôva a nsômbôl le bagwélél bé ba ba mapubi, i pes minsôn, maboñok, ni i pes mbuu. Ibale kristen i ntjél noñ biniigana bi, i nai ndik le i nkena liboñok jé libe ni bisu, Yéhôva a ngwés le ba héya i nya mut i ikété likoda. (1 Korintô 5:​11-13; 6:​9, 10) Di noñ i oda i Nyambe i. Ndi baoo bés ba ñôm bés nsohi le di nkéés bôt, le di gwé minledek mi miñem, ni le di ngwés bé to bôt.

14. Njee a yé i mbus miñañ mi bitembee bôt ba mbot inyu hindis ntôñ wés?

 ¹⁴ Di hôya bañ njee a yé i mbus bitembee bi. Satan Nsohop nyen a yé i mbus miñañ mi bitembee mi. A yé “isañ bitembee.” (Yôhanes 8:44; Bibôdle 3:​1-5) Di nyi le Satan a ngwélél i bet ba nit nye inyu bot bitembee bi bi nhindis jôl li ntôñ u Yéhôva. A bi boñ hala i hiai hi bisu.

15. Kii baéga base ba hiai hi bisu ba bi boñ Yésu ni banigil bé?

¹⁵ I hiai hi bisu, bagwélél ba Satan ba bi bot bitembee inyu Man Nyambe nu a bé peles, a boñok manyaga. Kiki hihéga, baéga base ba bi kal bôt le i ngui Yésu a bé gwélél inyu pémés mimbuu mimbe i bé lôl nye yak “ñane mimbuu mimbe.” (Markô 3:22) I ngéda Yésu a bé tégbaha manut mé ma nsôk hana ’isi, baéga base ba bi ôm nye nsohi le a ñôbôs jôl li Nyambe, ba tinde ki litén i bat le ba nol nye. (Matéô 27:20) I mbus, i ngéda banigil ba Kristô ba bé añal ñañ nlam, i bet ba bé kolba bo ba bi tinde bôt ba matén i tééñga bikristen bi. (Minson mi baôma 14:​2, 19) Nkum Ntat nu hilo 1 hi sôñ Libuy li nyéé nwii 1998, a bé toñol Minson mi baôma 14:2 haana le: “Lôk Yuda i i bé kolba bikristen i bi tjél ndik bé emble ñañ nlam, ndi i bé tinde bôt ba matén mape i kolba bo.”

16. Kii di nlama bé hôya i ngéda di nok miñañ mi bitembee?

¹⁶ Satan a bi waa bé tembee i hiai hi bisu. I len ini, a ngi kenek ni bisu i “yumus nkoñ ’isi wonsôna.” (Masoola 12:9) Ibale u nok ba mpot bitembee inyu ntôñ u Yéhôva, ni inyu  i bet ba ñéga bés, u nlama bigda i yom baoo ba Nyambe ba bi boñ Yésu ni banigil bé i hiai hi bisu. I len ini, ba ntééñga bagwélél ba Yéhôva kiki Bibel i bi bôk i kal. (Matéô 5:​11, 12) Miñañ mi bitembee mi, mi ta bé le mi yumus bés, ibale di nhoñol njee a yé mu i mbus. Bimbe bitelbene bi ngui di nla yoñ?

17. Kii di nla boñ inyu boñ le miñañ mi bitembee mi kena bañ bés haa ni Yéhôva? (2 Timôtéô 1:13) (Béñge yak minkéñék mi matila le “ Kii u nla boñ i ngeñ u nok miñañ mi bitembee.”)

¹⁷ Di tjél emble miñañ mi bitembee. Ñôma Paul a bi kal bilôk bikéé kii ba nlama boñ ibale ba nok miñañ mi bitembee. A bi kal Timôtéô le “a ti bôt bahogi oda le . . . ba emble bañ to miñañ mi bitembee” ni le “ba tjél ki miñañ mi bitembee mi mi nyan Nyambe.” (1 Timôtéô 1:​3, 4; 4:7) Hisii hi mañge hi nla bada yom isi, hi ha yo i nyo, ndi nhôôlak mut u u nyi i ndutu a nla kôhna ibale u mbada yom isi ndi u je yo, u ga boñ bé hala. Di ntjél miñañ mi bitembee inyule di nyi hee mi nlôl. Di ntéñbe ni “bibañga bi maliga.”​—Añ 2 Timôtéô 1:13.

18. Lelaa di nla unda le di ndiihe ntôñ u Yéhôva?

¹⁸ Munu yigil ini, di ntehe manjel maa ntôñ u Nyambe u ngwélél inyu kôna Yésu. Kiki u nigil Bibel, yimbe manjel mape ntôñ u ngwélél inyu noñ ndémbél i Yésu. Hôla bôt bape mu likoda joñ i diihe ntôñ u Yéhôva. Kee ni bisu i unda le u ndiihe ntôñ mu kiki u ntéñbe i gwélél Yéhôva, ni i nit ntôñ a ngwélél inyu yônôs sômbôl yé. (Tjémbi 37:28) Di kee ni bisu i diihe nsima di gwé i ba ikété ntôñ u Yéhôva u u tiñi ni nye.