1. Paano an pagkaorganisar kan mga lingkod ni Jehova kan inot na siglo?

 PAG nagtatao si Jehova nin asignasyon sa saiyang mga lingkod, inaasahan niya na gigibuhon ninda iyan sa organisadong paagi. (1 Cor. 14:33) Halimbawa, kabutan nin Diyos na ihulit an maugmang bareta sa bilog na kinaban. (Mat. 24:14) Ninombrahan ni Jehova si Jesus na manginot sa gibuhan na iyan. Sinigurado ni Jesus na maisagibo iyan sa organisadong paagi. Kan inot na siglo, mantang naeestablisar an mga kongregasyon sa manlain-lain na lugar, nagnombra nin mga kamagurangan para magtao nin instruksiyon asin manginot sa kongregasyon. (Gibo 14:23) Sa Jerusalem, igwa nin sarong grupo nin kamagurangan na kinabibilangan nin mga apostol asin kamagurangan na naggigibo nin partikular na mga desisyon na inaasahan na susunudon kan gabos na kongregasyon. (Gibo 15:2; 16:4) Bilang resulta kan pagigin masinunod sa mga instruksiyon na inaako ninda, “padagos . . . na napapakusog an pagtubod kan mga kongregasyon asin padagos na nagdadakul an bilang kan mga tugang.”​—Gibo 16:5.

2. Puon 1919, paano si Jehova nagtao nin paggiya asin espirituwal na kakanon?

² Sagkod ngunyan padagos na inoorganisar ni Jehova an saiyang mga lingkod. Puon 1919, naggamit si Jesus nin sarong sadit na grupo nin linahidan na mga lalaki para organisaron an gibuhon na paghuhulit asin magtao nin espirituwal na kakanon sa saiyang mga parasunod. a (Luc. 12:42) Malinaw nanggad na binebendisyunan ni Jehova an gibuhon kan grupong iyan.​—Isa. 60:22; 65:​13, 14.

3-4. (a) Magtao nin halimbawa kun paano kita nakikinabang sa pagigin organisado. (b) Ano an pag-uulayan ta sa artikulong ini?

³ Kun bako kitang organisado, dai ta magigibo an gibuhon na  inasignar sa sato ni Jesus. (Mat. 28:​19, 20) Halimbawa, isipa na sana kun dai iinaasignar an mga teritoryo; an gabos puwedeng maghulit sain man ninda gusto. Posibleng may mga teritoryo na pauruutrong nahuhulitan nin manlain-lain na parahayag, mantang an ibang mga teritoryo dai lamang nahuhulitan. May naisip ka pa daw na ibang paagi kun paano kita nakikinabang sa pagigin organisado?

⁴ Kun paanong inorganisar ni Jesus an saiyang mga parasunod kan yaon pa siya digdi sa daga, padagos niya man na inoorganisar ngunyan an mga lingkod ni Jehova. Sa artikulong ini, pag-uulayan ta an halimbawa na ipinahiling ni Jesus asin kun paano sinusunod kan satong organisasyon an saiyang halimbawa. Pag-uulayan ta man kun paano ta maipapahiling an satong pagtitiwala sa organisasyon ni Jehova.

SINUSUNOD KAN SATONG ORGANISASYON AN HALIMBAWA NI JESUS

5. Ano an sarong paagi na sinusunod ta an halimbawa ni Jesus? (Juan 8:28)

⁵ Nanudan ni Jesus sa saiyang Ama sa langit kun ano an gigibuhon asin kun ano an sasabihon. Bilang pagsunod sa halimbawa ni Jesus, ibinabasar kan organisasyon ni Jehova sa Tataramon nin Diyos an moral na mga katukduan kaiyan asin an itinataong mga instruksiyon. (Basahon an Juan 8:28; 2 Tim. 3:​16, 17) Pirmi kitang nakakaresibi nin mga pagirumdom na basahon asin iaplikar an Tataramon nin Diyos. Paano kita nakikinabang sa pagsunod sa konsehong iyan?

6. Ano an sarong paagi kaya nakikinabang kitang marhay sa pag-adal kan Bibliya?

⁶ Nakikinabang kitang marhay sa pag-adal nin Bibliya sa tabang kan satong mga publikasyon. Halimbawa, naikukumparar ta kun baga an mga instruksiyon na itinatao kan organisasyon kauyon kan mga itinutukdo kan Bibliya. Pag nahihiling tang an mga giyang itinatao sa sato nakabasar sa Kasuratan, mas nagkukusog an satong pagtitiwala sa organisasyon ni Jehova.​—Roma 12:2.

7. Anong mensahe an ihinulit ni Jesus, asin paano sinusunod kan organisasyon ni Jehova an halimbawa niya?

⁷ Ihinulit ni Jesus an “maugmang bareta kan Kahadian nin Diyos.” (Luc. 4:​43, 44) Ipinagbuot man ni Jesus sa saiyang mga disipulo na ihulit an manungod sa Kahadian. (Luc. 9:​1, 2; 10:​8, 9) Sa ngunyan, an gabos na kabilang sa organisasyon ni Jehova naghuhulit kan mensahe kan Kahadian, sain man sinda nakaistar o gurano man kadakul an saindang responsabilidad sa organisasyon.

8. Anong pribilehiyo an itinao sa sato?

⁸ Ibinibilang ta nanggad na sarong pribilehiyo na sabihon sa iba an katotoohan manungod sa Kahadian nin Diyos! Bako gabos igwa kan onrang iyan. Halimbawa, kan yaon si Jesus digdi sa daga, dai niya tinugutan an maraot na mga espiritu na magpatotoo manungod sa saiya. (Luc. 4:41) Sa ngunyan, bago an saro umiba sa mga lingkod ni Jehova sa pagmiministeryo, dapat makuwalipikar nguna siya sa pribilehiyong iyan. Ipinapahiling ta an satong dakulang pagpapahalaga sa pribilehiyong maghulit paagi sa pagpapatotoo sain man asin nuarin man may pagkakataon. Arog ni Jesus, pasuhan niyato na magtanom asin baribian an mga banhi kan katotoohan kan Kahadian sa puso nin mga tawo.​—Mat. 13:​3, 23; 1 Cor. 3:6.

9. Paano ipinapamidbid kan organisasyon an pangaran nin Diyos?

⁹ Ipinamidbid ni Jesus an pangaran nin Diyos. Sa pamibi niya sa saiyang Ama sa langit, sinabi ni Jesus: “Ipinamidbid ko sa sainda an saimong pangaran.” (Juan 17:26) Arog kan ginibo ni Jesus, ginigibo kan organisasyon ni Jehova an ano man na paaging posible para tabangan an iba na mamidbid an pangaran nin Diyos. An New World Translation of the Holy Scriptures igwa nin dakulang kabtang diyan paagi sa pagbalik kan pangaran nin Diyos sa tamang kinamumugtakan  kaiyan. An traduksiyon na ini kan Bibliya makukua na ngunyan nin kumpleto o porsiyon sana sa labing 270 lengguwahe. Sa Apendise A4 asin A5 kan traduksiyon na iyan, mahihiling mo an mga detalye mapadapit sa pagbalik kan pangaran nin Diyos sa Bibliya. An Apendise C, na mahihiling sa Bibliya Para sa Pag-aaral, nagtatao nin dakul na patunay na an pangaran nin Diyos dapat na maglataw sa Kristiyanong Griegong Kasuratan nin 237 beses.

10. Ano an nanudan mo sa sinabi kan sarong babayi na taga Myanmar?

¹⁰ Arog ni Jesus, gusto tang tabangan an pinakadakul na tawong posible na mamidbid an pangaran nin Diyos. Kan maaraman kan sarong 67 anyos na babayi sa Myanmar na may pangaran an Diyos, napaluha siya asin nagsabi: “Ngunyan ko lang nadangog sa bilog kong buhay na Jehova an pangaran kan Diyos. . . . Itinukdo nindo sa sako an pinakaimportanteng bagay na puwede kong manudan.” Arog kan ipinapahiling kan eksperyensiyang ini, puwedeng magkaigwa nin dakulang epekto sa mga tawong sadiyosan an puso pag naaraman ninda an pangaran nin Diyos.

PADAGOS NA IPAHILING AN PAGTITIWALA SA SATONG ORGANISASYON

11. Paano maipapahiling kan mga elder an pagtitiwala sa organisasyon ni Jehova? (Hilingon man an ritrato.)

¹¹ Ano an sarong paagi na maipapahiling kan mga elder na nagtitiwala sinda sa organisasyon nin Diyos? Pag nakakaresibi nin instruksiyon an mga elder, kaipuhan nindang basahon iyan na marhay asin gibuhon an saindang pinakamakakaya na sunudon iyan. Halimbawa, nakakaresibi sinda nin giya bako lang kun paano ipepresentar an mga kabtang sa mga pagtiripon asin kun paano irerepresentar an kongregasyon sa pamibi kundi kun paano man aatamanon an mga karnero ni Cristo. Pag sinusunod kan mga elder an mga instruksiyon kan kongregasyon, namamatian kan mga tugang na namumutan sinda ni Jehova asin na inaataman niya sinda.

12. (a) Taano ta dapat kitang makikooperar sa mga nanginginot? (Hebreo 13:​7, 17) (b) Taano ta dapat kitang magpokus sa positibong mga kuwalidad kan mga nanginginot?

¹² Pag tinatawan kita nin instruksiyon kan mga elder, dapat na sunudon ta iyan nin gikan sa buot. Paagi kaiyan, natatabangan ta sinda na magin mas madali an saindang panginginot. Ineenkaminar kita kan Bibliya na magin masinunod asin mapagpasakop sa mga nanginginot. (Basahon an Hebreo 13:​7, 17.) Puwedeng magin dipisil iyan kun minsan. Taano? Huling bako sindang perpekto. Pero kun an pagpaparahilingon ta iyo an saindang negatibong mga kuwalidad imbes na an mga positibo, garo ta man sana kaiyan sinusuportaran an satong mga kaiwal. Sa paanong paagi? Pinapaluya ta an satong pagtitiwala sa organisasyon nin Diyos. Asin iyan mismo an gusto kan mga nagkokontra sato. Ano an puwede tang gibuhon para marisa ta an mga kaputikan kan satong mga kaiwal asin isikwal iyan?

DAI PAGTUGUTAN AN IBA NA PALUYAHON AN SAIMONG PAGTITIWALA

13. Ano an ginigibo kan mga kaiwal nin Diyos para pakarauton an saiyang organisasyon?

¹³ Hinihinguwa kan mga nagkokontra sa Diyos na paluwason na negatibo an positibong mga bagay manungod sa organisasyon niya. Halimbawa, nanudan ta sa Kasuratan na inaasahan ni Jehova sa saiyang mga parasamba na magin malinig sa pisikal, moral, asin espirituwal. Kahagadan niya na halion sa kongregasyon an siisay man na dai nagsusulsol asin padagos na naggigibo nin maating mga bagay. (1 Cor. 5:​11-13; 6:​9, 10) Sinusunod ta an pagbuot na iyan sa Kasuratan. Pero an mga nagkokontra sa sato hinihinguwang gamiton iyan para akusaran kita na mga panatiko, mapanghusgar, asin maringis.

14. Siisay an nasa likod kan mga kaputikan manungod sa organisasyon?

¹⁴ Tandaan kun siisay an nasa likod kan pagkontra. Si Satanas na Diyablo an promotor  kan mga kaputikan manungod sa organisasyon. Siya “an ama kan kaputikan.” (Juan 8:44; Gen. 3:​1-5) Kaya asahan ta nang gagamiton ni Satanas an mga nagsusuportar sa saiya para ipalakop an mga kaputikan manungod sa organisasyon ni Jehova. Risang-risa iyan kan inot na siglo.

15. Ano an ginibo ki Jesus asin sa saiyang mga parasunod kan mga lider nin relihiyon?

¹⁵ Kan inot na siglo, dawa ngani an Aki nin Diyos perpekto asin naggigibo nin mga milagro, an mga nagsusuportar ki Satanas nagparapalakop nin mga kaputikan manungod sa saiya. Halimbawa, sinabihan kan mga lider nin relihiyon an mga tawo na an kapangyarihan ni Jesus na magpalayas nin mga demonyo hali sa “tagapamahala kan mga demonyo.” (Mar. 3:22) Kan binibista si Jesus, inakusaran siya kan mga lider nin relihiyon nin paglanghad asin sinulsulan an mga tawo na ipagadan siya. (Mat. 27:20) Dangan, kan an mga parasunod ni Cristo maghulit kan maugmang bareta, an mga nagkokontra sa sainda “sinutsutan an mga tawo” na persegiron an mga Kristiyanong idto. (Gibo 14:​2, 19) Mapadapit sa Gibo 14:​2, ipinaliwanag kan An Torrengbantayan na Disyembre 1, 1998 na an nagkokontrang mga Judio dai sana isinikwal an mensaheng ihinuhulit kan mga Kristiyano kundi pinunan man ninda an sarong kampanya nin pagpakaraot tanganing dai sa sainda maniwala an mga tawo asin ikaungis sinda.

16. Ano an dapat tang tandaan pag nakakadangog kita nin mga bakong totoong istorya?

¹⁶ Bako lang kan inot na siglo nagpalakop nin kaputikan si Satanas. Sa ngunyan, padagos pa man giraray siya na “nanglalagalag sa bilog na daga.” (Kap. 12:9) Kun makadangog ka nin negatibong mga istorya manungod sa organisasyon o sa mga tugang na nanginginot, girumdumon kun paano si Jesus asin an mga disipulo  kan inot na siglo trinatar kan mga kaiwal nin Diyos. Sa ngunyan, an mga lingkod ni Jehova pinepersegir asin pinapakaraot arog mismo kan ihinula kan Bibliya. (Mat. 5:​11, 12) Dai kita madadaya kan mga kaputikan kun tatandaan ta kun kiisay iyan hali asin mahiro tulos para protektaran an satong sadiri. Paano ta iyan magigibo?

17. Paano kita makakalikay sa mga peligrong dara kan mga bakong totoong istorya? (2 Timoteo 1:13) (Hilingon man an kahon na “ Kun Ano an Gigibuhon Pag Nakadangog nin mga Bakong Totoong Istorya.”)

¹⁷ Isikwal an mga bakong totoong istorya. Tinawan kita ni apostol Pablo nin malinaw na instruksiyon kun ano an dapat tang gibuhon pag nakadangog kita nin mga bakong totoong istorya. Sinabihan niya si Timoteo na tawan nin “magabat na sadol an nagkapirang indibidwal na dai . . . magtao nin atensiyon sa mga bakong totoong istorya” asin na “isikwal [ninda] an mga uruistorya na bakong totoo.” (1 Tim. 1:​3, 4; 4:7) An sarong sadit na aki tibaad inosenteng puruton an sarong bagay sa salog asin ikaag iyan sa saiyang nguso, pero dai lamang iyan gigibuhon kan sarong adulto na nakakasabot kan peligro. Isinisikwal ta an mga bakong totoong istorya huling aram ta kun sain iyan hali. An “marahay na mga tataramon” sana nin katotoohan an dinadangog ta.​—Basahon an 2 Timoteo 1:13.

18. Paano ta maipapahiling na nagtitiwala kita sa organisasyon ni Jehova?

¹⁸ Napag-ulayan ta an tulo sana sa kadakul na paagi kun paano inaarog si Jesus kan organisasyon nin Diyos. Sa pag-adal mo kan Bibliya, hilingon an iba pang mga paagi kun paano sinusunod kan organisasyon an halimbawa ni Jesus. Tabangan an iba sa saindong kongregasyon na pakusugon an saindang pagtitiwala sa organisasyon. Asin padagos na ipahiling an saimong pagtitiwala paagi sa maimbod na paglilingkod ki Jehova asin pagdadanay na harani sa organisasyon na ginagamit niya para utubon an saiyang kabutan. (Sal. 37:28) Lugod na padagos tang pahalagahan an satong pribilehiyo na mapabilang sa mamumuton asin maimbod na mga lingkod ni Jehova.