1. Bushe Yehova aletungulula shani abantu bakwe mu nshita ya batumwa?

 LYONSE Yehova nga apeela ababomfi bakwe imilimo, abenekela ukubomba bwino iyo milimo ukwabula icimfulunganya. (1 Kor. 14:33) Ku ca kumwenako, Lesa afwaya ukuti imbila nsuma ibilwe mwi sonde lyonse. (Mat. 24:14) Yehova asala Yesu ukuti aletungulula uyu umulimo. Yesu alishininkisha ukuti uyu umulimo ulebombwa ukwabula icimfulunganya. Mu nshita ya batumwa ilyo ifilonganino fyalepangwa mu ncende ishalekanalekana, kwali baeluda abo basontele pa kuti baletungulula aba bwananyina. (Imil. 14:23) Mu Yerusalemu mwali ibumba lya baeluda, umwali abatumwa na bakalamba abalepingula ifyo bonse abali mu filonganino balingile ukulakonka. (Imil. 15:2; 16:4) Pa mulandu wa kuti balekonka ifyo balebeba, “ifilonganino fyalekoshiwa mu citetekelo na ba mu filonganino balefulilako.”—Imil. 16:5.

2. Ukutula mu 1919, bushe Yehova atungulula shani abantu bakwe, kabili abapeela shani ifya kulya fya ku mupashi?

² Na muno nshiku mwine Yehova alitwalilila ukutungulula abantu bakwe. Ukutula mu 1919, Yesu abomfya ibumba ilinono ilya baume abasubwa no mupashi wa mushilo abatungulula umulimo wa kubila imbila nsuma, kabili abapeela abasambi bakwe ifya kulya fya ku mupashi pa nshita iyalinga. (Luka 12:42) Ukwabula no kutwishika, Yehova alabapaala ili ibumba pa mulimo libomba.—Esa. 60:22; 65:​13, 14.

3-4. (a) Landeni ifya kumwenako, ifilanga ifyo tubomba bwino umulimo pa mulandu wa kuti twalikwata abatutungulula. (b) Finshi twalasambilila muli cino cipande?

 ³ Nga ca kuti tatwakwata abatutungulula bwino, nga tatubomba bwino uyu umulimo uo Yesu atupeela. (Mat. 28:​19, 20) Ku ca kumwenako, nga ca kuti tabaletupeela ififulo fya kubilamo imbila nsuma, cila muntu nga alebila fye konse uko alefwaya. Bakasabankanya nga balebila sana mu fifulo fimo e lyo mu fifulo fimbi mwena nga tamwaleba na ba kubilamo. Tontonkanyeni na pa nshila shimbi isho tubombelamo bwino umulimo pa mulandu wa kuti twalikwata abatutungulula.

⁴ Filya fine Yesu aletungulula abasambi bakwe ilyo ali pano isonde, e fyo atungulula na bantu ba kwa Lesa muno nshiku. Muli cino cipande, twalasambilila pa fyo Yesu aletungulula abasambi bakwe, na pa fyo icilonganino ca kwa Yehova muno nshiku cikonka ifyo aletungulula abasambi bakwe. Twalasambilila na pa fyo twingalanga ukuti twalicetekela icilonganino ca kwa Yehova.

ICILONGANINO CESU CILAKONKA IFYO YESU ALECITA

5. Ni nshila nshi imo tulangilamo ukuti tulakonka ifyo Yesu alecita? (Yohane 8:28)

⁵ Yesu asambilile kuli Wishi wa ku muulu ifya kucita ne fya kulanda. Icilonganino ca kwa Yehova cilakonka ifyo Yesu alecita pantu cilatusambilisha ifyaba mu Cebo ca kwa Lesa pa kuti twishibe ifyo Yehova amona ukuti fibi ne fyo amona ukuti fisuma. Na kabili cilakonka ifyaba mu Cebo ca kwa Lesa pa kututungulula. (Belengeni Yohane 8:28; 2 Tim. 3:​16, 17) Lyonse icilonganino ca kwa Yehova cilatwibukishako ukuti tufwile ukulabelenga Icebo ca kwa Lesa kabili tulingile ukulacita ifyo cilanda. Busuma nshi bwaba mu kukonka ifi icilonganino citweba?

6. Ni nshila nshi imo iyacindama iyo tunonkelamo nga tuleisambilisha Baibo?

⁶ Tulanonkelamo sana nga ca kuti ilyo tuleisambilisha Baibo tulebomfya impapulo ishilanda pali Baibo. Ku ca kumwenako, tulalinganya ifyo tusambilila mu Baibo ku fyo icilonganino ca kwa Yehova citweba. Nga twamona ukuti ifyo icilonganino ca kwa Yehova citweba fifuma mu malembo, tulacetekela sana icilonganino ca kwa Yehova.—Rom. 12:2.

7. Ni pali finshi Yesu alebila, kabili icilonganino ca kwa Yehova cimupashanya shani muno nshiku?

⁷ Yesu alebila “imbila nsuma iya bufumu bwa kwa Lesa.” (Luka 4:​43, 44) Na kabili Yesu aebele abasambi bakwe ukuti balebila pali ubu Ubufumu. (Luka 9:​1, 2; 10:​8, 9) Muno nshiku bonse ababa mu cilonganino ca kwa Yehova balabila imbila nsuma pali ubu Ubufumu te mulandu na uko bekala nelyo imilimo bakwata mu cilonganino.

8. Bushe Yehova atucindamika shani?

⁸ Yehova alitucindamika sana ifi atupeela umulimo wa kubila pa Bufumu bwa kwa Lesa! Te bantu bonse bakwata ili ishuko. Ku ca kumwenako, ilyo Yesu ali pano isonde talesuminisha ifibanda ukulabila pali ena. (Luka 4:41) Muno nshiku, pa kuti umuntu atampe ukulabila imbila nsuma pamo na bantu ba kwa Yehova alingile ukulaikala ukulingana ne fyo Lesa afwaya. Tulanga ukuti tulatasha pali ili ishuko lya kubila imbila nsuma nga ca kuti tulebila imbila konse uko tuli kabili pa nshita ili yonse. Tufwaya ukuba nga Yesu. E co tubilila imbila nsuma pa kuti tulesambilisha abantu icine.—Mat. 13:​3, 23; 1 Kor. 3:6.

9. Bushe icilonganino ca kwa Yehova cilenga shani abantu baishiba ishina lya kwa Lesa?

⁹ Yesu alilengele abantu baishiba ishina lya kwa Lesa. Ilyo Yesu alepepa kuli Wishi wa ku muulu, apepele ati: “Nalenga beshibe ishina lyenu.” (Yoh. 17:26) Icilonganino ca kwa Yehova naco cilalenga abantu baishiba ishina lya kwa Lesa. Inshila imo iyo cicitilamo ifi, fintu cacita muli Baibolo Amalembo ya Calo Cipya. Muli iyi Baibo ponse apaba ishina lya kwa Lesa  ukulingana ne ndimi isho balembeelemo Baibo pa kubala, balibwekeshapo ili ishina. Iyi Baibo eko yaba yonse nelyo mu fiputulwa mu ndimi ukucila pali 270. Nga mwabelenga akatabo katila Akatabo ka Kutwafwa Ukusambilila Icebo ca kwa Lesa pe bula1-13 mukeshiba ifyalengele babweseshe ishina lya kwa Lesa muli Baibo. Pa Ifyebo Fyalundwako C muli Baibo ya Kusambililamo iya mu ciNgeleshi balilondolola ubushininkisho bwine bwine ubwa kuti mu Amalembo ya ciGriki aya Bena Kristu, ishina lya kwa Lesa lifwile ukubamo imiku 237.

10. Finshi mwasambilila ku fyo umwanakashi uwikala ku Myanmar alandile?

¹⁰ Na ifwe tufwaya ukwafwilisha abantu abengi pa kuti nabo baishiba ishina lya kwa Lesa, nga filya fine Yesu alecita. Ilyo umwanakashi wa ku Myanmar uwakwete imyaka 67 aishibe ishina lya kwa Lesa alilukwishe ifilamba kabili atile: “Uyu e muku wa kubalilapo naishiba ukuti ishina lya kwa Lesa ni Yehova. . . . Ala ico mwansambilisha e cintu icacindamisha pa fintu fyonse ifyo ningasambilila.” Nga fintu twamona, abantu abakwata imitima iisuma nga baishiba ishina lya kwa Lesa kuti ba-aluka.

TWALILILENI UKULANGA UKUTI MWALICETEKELA ICILONGANINO CA KWA YEHOVA

11. Bushe baeluda kuti balanga shani ukuti balicetekela icilonganino ca kwa Yehova? (Moneni ne cikope.)

¹¹ Ni nshila nshi imo iyo baeluda bengalangilamo ukuti balicetekela icilonganino ca kwa Lesa? Icilonganino nga cabeba fimo ifya kucita, bafwile ukubelenga bwino ifyo icilonganino cabeba kabili balingile ukukonka ifyo fine cibebele. Ku ca kumwenako, balabeba ifyo balingile ukulalanda amalyashi ilyo balelongana ne fyo bafwile ukulapepa amapepo mu cilonganino. Na kabili balabeba ifyo balingile ukulacita pa kusakamana impaanga sha kwa Kristu. Nga ca kuti baeluda balekonka ifyo icilonganino ca kwa Yehova cilebeba, bamunyinefwe na bankashi balomfwa ukuti Yehova alibatemwa kabili alabasakamana.

12. (a) Mulandu nshi cawamina ukulaumfwila abatutungulula? (AbaHebere 13:​7, 17) (b) Mulandu nshi tulingile ukulabikila amano ku mibele iisuma iyo abatutungulula bakwata?

¹² Baeluda nga batweba ifya kucita, tulingile ukuitemenwa ukucita ifyo batweba. Nga tulecita ifi, abatutungulula cikabangukila ukubomba umulimo wabo. Baibo itweba ukuti tulingile ukulaumfwila no kulanakila abatutungulula. (Belengeni AbaHebere 13:​7, 17.) Kwena inshita shimo cilakosa ukucita ifi. Mulandu nshi cikosela? Ni co aba bamunyinefwe abatutungulula tabapwililika. Nomba nga ca kuti tulebika fye amano ku fyo bashicita bwino, mu cifulo ca kulabika amano ku mibele yabo iisuma, ninshi tuleafwilisha abalwani besu. Cinshi twalandila ifi? Abalwani besu bafwaya twalatwishika icilonganino ico Lesa abomfya pa kututungulula. E ico nga tuletontonkanya ifyabipa pali baeluda, kuti twalatontonkanya ifyabipa na pa cilonganino cine. Ifi kuti fyalenga twaleka ukucetekela icilonganino ca kwa Yehova. Finshi twingacita pa kuti tuleishiba ubufi ubo abalwani besu babepa kabili twilasumina ubu ubufi?

MWIKALEKA UMUNTU NANGU UMO AKALENGE MUKALEKE UKUCETEKELA ICILONGANINO CA KWA YEHOVA

13. Finshi abalwani besu bacita pa kuti abantu balemona ifintu ifisuma ifyo icilonganino ca kwa Yehova cicita ukuti fibi?

¹³ Abalwani ba kwa Lesa bafwaya abantu balamona ifintu ifisuma ifyo icilonganino ca kwa Yehova cicita ukuti fibi. Ku ca kumwenako, tulasambilila mu Amalembo ukuti Yehova afwaya tulesunga imbili yesu iya busaka, tuleba ne mibele iisuma kabili tulemupepa ukulingana ne fyo afwaya. Alitweba ukuti onse uucita ifyabipa uushifwaya ukuleka, talingile ukutwalilila ukuba mu cilonganino ca kwa Lesa. (1 Kor. 5:​11-13; 6:​9, 10) Fwe babomfi ba kwa Lesa tulakonka ili  ifunde lya mu Baibo. Pa mulandu wa kuti tulakonka ili ifunde, abalwani besu balatupeela imilandu ya kuti tatwatemwa abantu, tubamona ukuti babi kabili tatwatemwa bonse abashasumina mu fyo twasuminamo.

14. Nani alenga abantu balelanda ifya bufi pa cilonganino ca kwa Yehova?

¹⁴ Muleishiba uusansa icilonganino ca kwa Yehova. Satana Kaseebanya eulenga abantu balelanda ifya bufi pa cilonganino ca kwa Yehova. Satana “e wishi wa bufi.” (Yoh. 8:44; Ukute. 3:​1-5) Kanshi kuti twaenekela ukuti Satana kuti abomfya abantu bakwe pa kulanda ifya bufi pa cilonganino ca kwa Yehova. Ifi fine e fyo acitile pa kulanda ifya bufi pali Yesu na pa Bena Kristu ba kubalilapo.

15. Finshi intungulushi sha mapepo shacitile Yesu na basambi bakwe?

¹⁵ Ilyo Yesu ali pano isonde abantu ba kwa Satana balebepa ubufi ubwalekanalekana pa Mwana wa kwa Lesa uwapwililika kabili uwalecita ifipesha mano. Ku ca kumwenako, intungulushi sha mapepo shale-eba abantu ukuti amaka ayo Yesu alefumishako ifibanda ni “kateka wa fibanda” amupeele. (Marko 3:22) Ilyo Yesu balemulubulwisha, bamupeele umulandu wa kuti alesaalula Lesa kabili intungulushi sha mapepo shatunkile abantu ukuti bamwipaye. (Mat. 27:20) Ilyo abasambi ba kwa Kristu balebila imbila nsuma, abalwani babo “bafundawile abena fyalo” pa kuti balecusha Abena Kristu. (Imil. 14:​2, 19) Ulupungu lwa kwa Kalinda ulwa December 1, 1998, lwalandile pe lembo lya Imilimo 14:2 ukuti: “AbaYuda abalekaano kuumfwa babalamwine Abena fyalo no kubakalifya imitima ukuti bemine Abena Kristu.”

16. Cinshi tulingile ukulaibukisha nga twaumfwa amalyashi ya bufi?

¹⁶ Satana taleka ukubepa. Na muno nshiku mwine Satana acili alelufya “aba pano isonde  bonse.” (Ukus. 12:9) Nga ca kuti mwaumfwa amalyashi ya bufi pa cilonganino ca kwa Yehova, muleibukisha ifyo abalwani ba kwa Lesa bacitile Yesu na basambi bakwe mu nshita ya batumwa. Muno nshiku abantu ba kwa Yehova balabacusha kabili balababepesha. Ifi fine e fyo Baibo yasobele. (Mat. 5:​11, 12) Tatwakacetekele amalyashi ya bufi nga ca kuti tuleibukisha uulenga abantu balelanda aya amalyashi. Finshi tufwile ukucita nga twaumfwa amalyashi ya bufi?

17. Finshi tufwile ukucita pa kuti tuicingilile ku malyashi ya bufi? (2 Timote 1:13) (Moneni na kabokoshi akaleti “ Ifya Kucita nga Twaumfwa Amalyashi ya Bufi.”)

¹⁷ Mwilakutika amalyashi ya bufi. Umutumwa Paulo alilandile ifyo tufwile ukucita nga twaumfwa amalyashi ya bufi. Aebele Timote ati ukonkomeshe bamo “belabika amano ku malyashi ya bufi” kabili balekaana “amalyashi ya bufi.” (1 Tim. 1:​3, 4; 4:7) Umwana kuti atoola icintu panshi acibika na mu kanwa, lelo umukalamba te kuti acite ifi pantu naishiba ukuti nga acita ifi kuti alwala. Tatukutika amalyashi ya bufi pantu twalishiba uko aya amalyashi yafuma. Tubika amano ku “mashiwi ayatuntulu.”—Belengeni 2 Timote 1:13.

18. Kuti twalanga shani ukuti twalicetekela icilonganino ca kwa Yehova?

¹⁸ Twasambilila fye pa nshila shitatu isho icilonganino ca kwa Yehova cipashanyamo Yesu. Nga mulebelenga Icebo ca kwa Lesa mulemona inshila na shimbi isho icilonganino ca kwa Yehova cipashanyamo Yesu. Muleafwa aba bwananyina mu filonganino pa kuti nabo balecetekela sana icilonganino ca kwa Yehova. Mutwalilile ukulalanga ukuti mwalicetekela icilonganino ca kwa Yehova ukupitila mu kuba aba cishinka ilyo mulemubombela, na mu kubombela pamo ne cilonganino ico alebomfya pa kucita ifyo afwaya. (Amalu. 37:28) Natutwalilile ukutasha pe shuko twakwata ilya kuba pa bantu ba kwa Yehova abatemwana kabili aba cishinka.