1. ?Olsem wanem ol man blong Jehova long faswan handred yia oli wok folem oda?

 TAEM Jehova i givim wok long ol man blong hem, hem i wantem se oli mekem long fasin we i gat oda. (1 Kor. 14:33) Eksampol, God i wantem se oli talemaot gud nius long olgeta ples long wol. (Mat. 24:14) Taswe, hem i putumap Jisas blong i lidim wok ya. Mo Jisas i wantem se oli mekem wok ya long fasin we i gat oda. Long faswan handred yia, taem oli stanemap ol kongregesen long ol defdefren ples, oli putumap ol elda blong lukaot long olgeta mo lidim olgeta. (Wok 14:23) Mo long Jerusalem, i gat wan bodi blong elda we hemia ol aposol mo ol elda we oli stap mekem ol desisen blong ol kongregesen ya oli folem. (Wok 15:2; 16:4) Taem oli obei long ol advaes ya, “bilif blong ol kongregesen i stap kam strong moa, mo . . . namba blong olgeta i stap kam antap moa.”—Wok 16:5.

2. Stat long 1919, ?olsem wanem Jehova i lidim ol man blong hem mo i givimaot kakae long saed blong spirit?

² Tede, Jehova i gohed blong mekem se ol man blong hem oli wok folem oda. Stat long 1919, Jisas i yusum wan smol grup blong ol tabu man blong oli mekem ol plan blong wok blong prij, mo givimaot kakae long saed blong spirit long stret taem long ol man blong Hem. a (Luk 12:42) Mo i klia se Jehova i stap blesem wok blong olgeta.—Aes. 60:22; 65:​13, 14.

3-4. (1) Tokbaot wan eksampol we i soemaot gudfala samting we yumi kasem taem yumi folem wan plan. (2) ?Bambae yumi tokbaot wanem long stadi ya?

³ Sipos yumi no wok folem wan plan, bambae yumi no naf blong finisim wok we Jisas i givim long yumi. (Mat. 28:​19, 20)  Eksampol, sipos ol brata oli no mekem plan blong yumi prij long ol teritori blong kongregesen, bambae evriwan oli prij long eni ples nomo we oli wantem. Maet ol pablisa oli go prij plante taem long sam eria, be sam narafala eria nogat. ?Yu yu tingbaot sam gudfala samting we i kamaot taem yumi folem wan gudfala plan?

⁴ Taem Jisas i stap long wol, hem i stanemap wan plan blong mekem se ol man blong hem oli wok folem oda, mo hemia nao sem samting we hem i stap mekem tede. Long stadi ya, bambae yumi tokbaot samting we Jisas i mekem, mo olsem wanem oganaesesen blong yumi i folem eksampol blong hem. Mo tu, bambae yumi tokbaot olsem wanem yumi save soemaot se yumi trastem moa oganaesesen blong Jehova.

OGANAESESEN BLONG YUMI I FOLEM EKSAMPOL BLONG JISAS

5. ?Olsem wanem oganaesesen blong yumi i folem eksampol blong Jisas? (Jon 8:28)

⁵ Jisas i talem mo i mekem ol samting nomo we hem i lanem long Papa blong hem. Oganaesesen blong Jehova i folem eksampol blong Jisas, blong yusum Tok blong God blong givhan long yumi blong save samting we i stret mo i no stret, mo i givim advaes blong lidim gud yumi. (Ridim Jon 8:28; 2 Tim. 3:​16, 17) Taswe, oltaem yumi kasem advaes blong ridim mo folem ol advaes we i kamaot long Tok blong God. Taem yumi folem advaes ya, ?olsem wanem hemia i givhan long yumi?

6. Taem yumi stadi Baebol, ?olsem wanem hemia i givhan long yumi?

⁶ Yumi kasem plante gudfala samting, taem yumi stadi long ol buk blong yumi we i stanap long Baebol. Eksampol, yumi naf blong skelem ol tijing blong Baebol wetem ol advaes we yumi kasem long oganaesesen. Mo taem yumi luk se ol advaes we yumi kasem oli stanap long Baebol, hemia i mekem se yumi trastem moa oganaesesen blong Jehova.—Rom 12:2.

7. ?Wanem mesej we Jisas i talemaot, mo olsem wanem oganaesesen blong Jehova i folem eksampol blong hem?

⁷ Jisas i talemaot “gud nius blong Kingdom blong God.” (Luk 4:​43, 44) Hem i givim oda tu long ol disaepol blong hem blong oli talemaot mesej blong Kingdom. (Luk 9:​1, 2; 10:​8, 9) Tede, olgeta we oli joen long oganaesesen blong Jehova, oli stap talemaot mesej blong Kingdom ya, nomata weples oli stap long hem o hamas wok we oli gat.

8. ?Wanem nambawan janis we yumi gat?

⁸ Yumi glad tumas we yumi gat janis ya blong save talemaot Kingdom blong God long ol narafala, from i no evri man we oli save joen long wok ya. Eksampol, taem Jisas i stap long wol, hem i no letem ol dimon blong oli tokbaot hem. (Luk 4:41) Bifo we wan man i stat blong prij wetem ol Witnes blong Jehova, hem i mas mekem laef blong hem i laenap wetem tingting blong Jehova. Yumi soemaot se yumi glad tumas long nambawan janis ya we yumi gat, taem yumi tekem janis blong tokbaot Kingdom blong God long ol man long eni ples mo eni taem. Olsem Jisas, mak blong yumi hemia blong planem mo wotarem ol sid blong Kingdom long hat blong ol man.—Mat. 13:​3, 23; 1 Kor. 3:6.

9. ?Olsem wanem oganaesesen blong Jehova i mekem ol man oli save nem blong God?

⁹ Jisas i mekem olgeta man oli save nem blong God. Jisas i prea i go long Papa blong hem i talem se: “Mi mi mekem olgeta oli save nem blong yu.” (Jon 17:26) Oganaesesen blong Jehova i folem eksampol blong Jisas, taem i givhan long ol man blong oli save nem blong God. Wan rod we hem i mekem olsem, hemia taem i putumbak nem blong God long ol stret ples blong hem long Baebol Long Niu Wol Translesen. Naoia ful Baebol ya o sam haf blong hem, i kamaot long bitim 270 lanwis. Long Apendiks A4 mo A5 blong Baebol ya, bambae yu lanem  from wanem oli putumbak nem blong God mo ol wok we oli mekem blong putumbak nem blong God long Baebol. Mo long Apendiks C blong stadi Baebol long Inglis, i gat plante pruf we i soemaot se nem blong God i sud kamaot 237 taem long Kristin Grik Haf Blong Baebol.

10. ?Yu lanem wanem long ol toktok we woman ya i talem?

¹⁰ Yumi wantem mekem olsem Jisas, blong halpem plante man oli save nem blong God. Taem wan woman long Mianma we i gat 67 yia, i lanem se God i gat wan nem, hem i stat blong krae mo i talem se: “Hemia faswan taem long laef blong mi we mi harem se God i gat wan nem, hemia Jehova. . . . Yufala i talem wan impoten samting we mi neva lanem bifo.” Olsem we yumi luk long ekspiriens ya, taem ol man oli save nem blong God, hemia i save gat bigfala paoa long laef blong olgeta.

GOHED BLONG SOEMAOT SE YU TRASTEM OGANAESESEN

11. ?Olsem wanem ol elda oli soemaot se oli trastem oganaesesen blong Jehova? (Mo tu, yu luk pija.)

¹¹ ?Olsem wanem ol elda oli soemaot se oli trastem oganaesesen blong God? Taem ol elda oli kasem advaes long saed blong sam samting, oli mas ridim gud mo traem bes blong olgeta blong folem. Eksampol, oli kasem advaes we i eksplenem olsem wanem blong lidim ol haf long ol miting mo prea, be tu oli kasem advaes olsem wanem blong lukaot gud long ol sipsip blong Kraes. Taem ol elda oli folem ol advaes ya, ol brata mo sista oli haremsave se Jehova i lavem olgeta, mo i stap lukaot gud long olgeta.

12. (1) ?From wanem yumi mas wok gud wetem ol elda? (Hibru 13:​7, 17) (2) ?From wanem yumi mas tingbaot nomo ol gudfala fasin blong ol elda?

¹² Taem yumi kasem advaes long ol elda, yumi mas glad blong folem. Sipos yumi mekem olsem, bambae yumi mekem se wok blong olgeta i kam isi. Baebol i leftemap tingting blong yumi blong obei mo putum yumi i stap aninit long olgeta we oli stap lidim yumi. (Ridim Hibru 13:​7, 17.) Be samtaem i no isi blong mekem olsem. ?From wanem? From olgeta tu oli sinman. Sipos yumi tingbaot nomo ol slak fasin blong olgeta, be i no ol gudfala fasin blong olgeta, yumi stap halpem ol enemi blong yumi. ?From wanem yumi talem olsem? Hemia from we ol enemi blong yumi oli wantem mekem yumi no sua sipos God i stap yusum oganaesesen blong hem blong lidim yumi. Sipos yumi gat nogud tingting long saed blong ol elda, maet bambae yumi stat blong gat nogud tingting tu long oganaesesen blong Jehova, mo yumi no moa trastem. Taswe, ?yumi save mekem wanem blong luksave mo blokem ol giaman toktok blong ol enemi blong yumi?

NO LETEM NARAFALA I MEKEM SE YU NO MOA TRASTEM OGANAESESEN

13. ?Olsem wanem ol enemi blong God oli traem pulum yumi blong gat nogud tingting long saed blong oganaesesen?

¹³ Ol enemi blong God oli traem yusum ol gudfala samting we oganaesesen i mekem, blong talem se i no stret. Eksampol, yumi lanem long Baebol se Jehova i wantem se ol man we oli wosipim hem, oli mas stap klin long bodi, fasin, mo spirit. Mo hem i talem se eni man we i no wantem tanem tingting blong hem from sin blong hem, kongregesen i mas putumaot hem. (1 Kor. 5:​11-13; 6:​9, 10) Yumi obei long loa ya. Be ol man we oli agensem yumi, oli yusum loa ya blong talem se yumi no soemaot lav, yumi agensem man, mo yumi no mekem i sem mak long ol man.

14. ?Hu i stamba blong ol giaman stori long saed blong oganaesesen?

¹⁴ Luksave man we i stap traem blong spolem oganaesesen. Setan nao i stamba blong ol giaman stori long saed blong oganaesesen. Baebol  i talem se hem i “papa blong ol giaman toktok.” (Jon 8:44; Jen. 3:​1-5) Taswe, hem i yusum sam man blong oli talem ol giaman stori long saed blong oganaesesen blong Jehova. Hemia nao samting we i bin hapen long ol fas Kristin.

15. ?Ol lida blong skul oli mekem wanem long Jisas mo ol disaepol blong hem?

¹⁵ Nating se Jisas we i pikinini blong God, i stret gud olgeta mo i mekem plante merikel, be Setan i yusum sam man blong talem ol giaman tok long saed blong hem. Eksampol, ol lida blong skul oli talem long ol man se paoa we Jisas i yusum blong ronemaot ol dimon, i kamaot long “rula blong ol dimon.” (Mak 3:22) Taem Jisas i pas long kot, ol lida blong skul oli talem se hem i tok nogud long God, mo oli pulum ol man blong talem se Jisas i mas ded. (Mat. 27:20) Biaen, taem ol disaepol blong Kraes oli stap talemaot gud nius, ol man blong agens “oli goraon long ol man . . . oli pulum olgeta” blong mekem i nogud long ol Kristin. (Wok 14:​2, 19) Folem Ol Wok 14:​2, Wajtaoa blong 1 Disemba 1998, i eksplenem se: “Ol man Jiu we oli agens, oli sakemaot mesej blong Pol mo Banabas, be long tingting blong olgeta, hemia i no naf yet. Taswe, oli mekem ol giaman toktok olbaot, blong traem pulum ol Hiten man blong agensem ol Kristin.”

16. ?Yumi mas tingbaot wanem taem yumi harem ol giaman stori?

¹⁶ Setan i no giaman nomo long ol fas Kristin. Tede tu, hem i gohed yet blong “lidim olgeta man long wol oli go krangke.” (Rev. 12:9) Sipos yu harem ol giaman stori long saed blong oganaesesen, o ol brata we oli stap lidim yumi, tingbaot se hemia nao samting we ol enemi blong God oli mekem long Jisas mo ol disaepol bifo. Tede, ol man oli jikim ol man blong Jehova mo mekem i nogud long olgeta, stret olsem  we Baebol i talem. (Mat. 5:​11, 12) Sipos yumi luksave se hu nao i stamba blong ol giaman stori ya, bambae yumi tekem aksen kwiktaem blong no letem oli trikim yumi. ?Yumi save mekem wanem blong protektem yumi?

17. ?Yumi save mekem wanem blong ol giaman stori oli no spolem yumi? (2 Timoti 1:13) (Mo tu yu luk bokis ya “ Samting We Yu Mas Mekem Sipos Yu Harem Ol Giaman Stori.”)

¹⁷ Sakemaot ol giaman stori. Aposol Pol i talem klia samting we yumi mas mekem sipos yumi harem ol giaman stori. Hem i talem long Timoti blong i “tok strong long sam man blong oli no . . . lesin long ol giaman stori,” mo blong oli “sakemaot ol giaman stori we oli daonem God.” (1 Tim. 1:​3, 4; 4:7) Traem tingbaot. Wan smol pikinini i save karem wan doti we i stap long floa, mo i putum long maot blong hem. Be wan bigman i no save mekem olsem, from we hem i kasemsave se hemia bambae i spolem hem. Long sem fasin, yumi sakemaot ol giaman stori from yumi kasemsave se Setan nao i stamba blong olgeta. Mo yumi lesin nomo long “ol gudfala tok” we oli tru.—Ridim 2 Timoti 1:13.

18. ?Olsem wanem yumi soemaot se yumi trastem oganaesesen blong Jehova?

¹⁸ Yumi tokbaot tri samting nomo we i soemaot se oganaesesen blong Jehova i folem eksampol blong Jisas. Taem yu stadi long Baebol, traem makem sam moa samting we i soemaot se oganaesesen i stap folem eksampol blong Jisas. I gud yu givhan long olgeta long kongregesen blong yu blong oli gohed blong trastem oganaesesen. Mo tu, i gud yu gohed blong soemaot se yu trastem oganaesesen, taem yu holemstrong long Jehova, mo yu gohed blong stap insaed long oganaesesen ya we hem i yusum blong mekem samting hem i wantem i kamtru. (Sam 37:28) I gud yumi gohed blong tinghae long nambawan janis ya we yumi gat, blong joen wetem ol man we oli lavem Jehova mo oli holemstrong long hem.