1. Nganong makaingon ta nga organisado ang katawhan ni Jehova sa unang siglo?

 DIHANG hatagan ni Jehova ang iyang katawhan ug asaynment, gidahom niya nga himoon ni nila sa organisadong paagi. (1 Cor. 14:33) Pananglitan, kabubut-on sa Diyos nga ang maayong balita isangyaw sa tibuok yuta. (Mat. 24:14) Gitudlo ni Jehova si Jesus sa pagpanguna niana nga buluhaton. Giseguro ni Jesus nga mahimo ni sa organisadong paagi. Sa unang siglo, dihang naporma ang mga kongregasyon sa lainlaing lugar, ang mga ansiyano gitudlo sa paghatag ug direksiyon ug sa pagpanguna. (Buh. 14:23) Sa Jerusalem, ang nagamandong lawas—nga gilangkoban sa mga apostoles ug pipila ka eksperyensiyadong mga ansiyano—maoy nagahimog mga desisyon nga sundon sa tanang kongregasyon. (Buh. 15:2; 16:4) Kay ang mga igsoon misunod sa mga instruksiyon nga ilang nadawat, “ang mga kongregasyon padayon gayong nalig-on diha sa pagtuo ug nagkadako.”—Buh. 16:5.

2. Sukad sa 1919, sa unsang paagi si Jehova naggiya ug nagtaganag espirituwal nga pagkaon sa iyang katawhan?

² Padayong gigiyahan ni Jehova ang iyang katawhan bisan karon. Sukad sa 1919, ubos sa paggiya ni Jehova, migamit si Jesus ug gamayng grupo sa dinihogang mga brader aron maorganisar ang buluhatong pagsangyaw ug matagan-an ug espirituwal nga pagkaon ang iyang mga sumusunod. a (Luc. 12:42) Klaro nga gipanalanginan ni Jehova ang paningkamot sa maong mga brader.—Isa. 60:22; 65:​13, 14.

3-4. (a) Paghatag ug pananglitan kon sa unsang paagi ta nakabenepisyo sa atong pagkaorganisado. (b) Unsay atong hisgotan niining artikuloha?

³ Kon dili ta organisado, dili ta molampos sa buluhaton nga gisugo  ni Jesus kanato. (Mat. 28:​19, 20) Pananglitan, ibutang ta nga walay nakaasayn nga teritoryo sa matag kongregasyon ug ang tanan makasangyaw bisag asa nila gusto. Kon ingon ana, ang ubang teritoryo basin pirmeng mabalikbalikan sa lainlaing igsoon, samtang ang ubang teritoryo mapasagdan. Naa pa ba kay nahunahunaang laing paagi nga nakabenepisyo ta sa pagkahimong organisado?

⁴ Ang gihimo ni Jesus sa dinhi pa siya sa yuta mao pod ang iyang ginahimo karon aron magpabilin tang organisado. Niining artikuloha, atong hisgotan ang ehemplo ni Jesus ug kon giunsa kana pagsundog sa atong organisasyon. Ato pong hisgotan kon unsaon nato pagpakita ang atong apresasyon sa organisasyon ni Jehova.

GISUNDOG SA ATONG ORGANISASYON ANG EHEMPLO NI JESUS

5. Unsa ang usa ka paagi nga gisundog nato ang ehemplo ni Jesus? (Juan 8:28)

⁵ Nakakat-on si Jesus gikan sa iyang langitnong Amahan kon unsay isulti ug buhaton. Agig pagsundog kang Jesus, ang organisasyon ni Jehova naggamit sa Pulong sa Diyos sa pagtudlo kon unsay husto ug sayop ug sa paggiya kanato. (Basaha ang Juan 8:28; 2 Tim. 3:​16, 17) Pirme tang makadawat ug mga pahinumdom nga basahon ug ipadapat ang Pulong sa Diyos. Sa unsang paagi ta makabenepisyo sa pagsunod niini nga tambag?

6. Unsa ang usa ka importanteng paagi nga makabenepisyo ta sa pagtuon sa Bibliya?

⁶ Makabenepisyo ta pag-ayo kon atong tun-an ang Bibliya gamit ang atong mga publikasyon. Pananglitan, makompara nato ang mga gitudlo sa Bibliya ug ang mga direksiyon gikan sa organisasyon. Dihang makita nato nga ang giya nga atong nadawat gibase sa Bibliya, mas modako ang atong pagsalig sa organisasyon ni Jehova.—Roma 12:2.

7. Unsang mensahe ang gisangyaw ni Jesus, ug sa unsang paagi ang organisasyon ni Jehova nagsundog sa iyang ehemplo?

⁷ Gisangyaw ni Jesus “ang maayong balita sa Gingharian sa Diyos.” (Luc. 4:​43, 44) Gisugo pod ni Jesus ang iyang mga tinun-an sa pagsangyaw bahin sa Gingharian. (Luc. 9:​1, 2; 10:​8, 9) Karon, ang tanan diha sa organisasyon ni Jehova nagsangyaw sa mensahe sa Gingharian bisag asa sila nagpuyo o bisag unsay ilang responsibilidad.

8. Unsang pribilehiyo ang gihatag kanato?

⁸ Pribilehiyo gyod para nato nga sangyawan ang uban sa kamatuoran bahin sa Gingharian sa Diyos! Dili tanan ang gihatagan ani nga pribilehiyo. Pananglitan, sa dinhi pa si Jesus sa yuta, wala niya tugoti ang mga demonyo sa pagsangyaw bahin niya. (Luc. 4:41) Karon, sa dili pa tugotan ang usa nga mosangyaw uban sa mga Saksi ni Jehova, kinahanglan una niyang makab-ot ang kuwalipikasyon para niana. Mapakita nato nga giapresyar gyod nato kini nga pribilehiyo pinaagi sa pagsangyaw bisan asa ug bisan kanus-a. Sama kang Jesus, tumong nato nga magtanom ug magbisbis sa binhi sa kamatuoran diha sa kasingkasing sa mga tawo.—Mat. 13:​3, 23; 1 Cor. 3:6.

9. Sa unsang paagi gipaila sa atong organisasyon ang ngalan sa Diyos?

⁹ Gipaila ni Jesus ang ngalan sa Diyos. Sa pag-ampo niya sa iyang langitnong Amahan, si Jesus miingon: “Akong gipaila kanila ang imong ngalan.” (Juan 17:26) Sama kang Jesus, ang organisasyon ni Jehova naningkamot sa pagtabang sa uban nga mahibalo sa ngalan sa Diyos. Ang Bag-ong Kalibotang Hubad sa Balaang Kasulatan dako kaayog natabang kay gibalik niini ang ngalan sa Diyos sa kon asa ni angayng makita diha sa Bibliya. Ang tibuok o mga bahin niini nga hubad sa Bibliya mabatonan na sa kapig 270 ka pinulongan. Sa Apendise A4 ug A5 niini nga hubad, makita nimo  ang mga detalye kon giunsa pagbalik ang ngalan sa Diyos diha sa Bibliya. Ang Apendise C, nga makita sa Study Bible, naghatag ug detalyadong pamatuod nga ang ngalan sa Diyos angayng makitag 237 ka beses diha sa Kristohanon Gregong Kasulatan.

10. Unsay imong nakat-onan sa giingon sa usa ka babaye nga taga-Myanmar?

¹⁰ Sama kang Jesus, gusto natong tabangan ang daghang tawo kutob sa maarangan nga makaila sa ngalan sa Diyos. Sa Myanmar, naay 67 anyos nga babaye nga nakakat-on sa ngalan sa Diyos. Nakahilak siya ug miingon: “Sa tibuok nakong kinabuhi, karon pa gyod ko nakabalo nga Jehova ang ngalan sa Diyos. . . . Kini gyod ang pinakaimportanteng butang nga akong nakat-onan.” Sama sa gipakita niini nga eksperyensiya, ang pagkahibalo sa ngalan sa Diyos dako kaayog epekto sa mga tawo nga sinserog kasingkasing.

PADAYONG IPAKITA ANG IMONG APRESASYON SA ATONG ORGANISASYON

11. Sa unsang paagi mapakita sa mga ansiyano ang ilang apresasyon sa organisasyon ni Jehova? (Tan-awa sab ang hulagway.)

¹¹ Unsa ang usa ka paagi nga mapakita sa mga ansiyano nga ilang giapresyar ang organisasyon sa Diyos? Dihang ang mga ansiyano makadawat ug direksiyon, kinahanglang basahon nila kinig maayo ug ipadapat kutob sa ilang maarangan. Pananglitan, makadawat silag giya dili lang kon unsaon paghatag ug mga bahin sa tigom ug pag-ampo para sa kongregasyon, kondili kon unsaon pod pag-atiman ang mga karnero sa Kristo. Ang mga ansiyano nga nagsunod sa direksiyon sa organisasyon makatabang sa mga igsoon nga mobating luwas ug gimahal.

12. (a) Nganong angay tang magpasakop sa mga nanguna kanato? (Hebreohanon 13:​7, 17) (b) Nganong angay tang magpokus sa maayong mga hiyas niadtong nagapanguna?

¹² Dihang makadawat tag direksiyon gikan sa mga ansiyano, kinahanglang sundon nato ni nga kinabubut-on. Kon ato ning himoon, dili sila malisdan sa paghimo sa ilang buluhaton. Ang Bibliya nagdasig nato nga magmasinugtanon ug magpasakop niadtong mga nagapanguna. (Basaha ang Hebreohanon 13:​7, 17.) Lisod na usahay. Ngano? Kay kini nga mga brader dili hingpit. Pero kon magpokus ta sa ilang negatibong mga kinaiya imbes sa ilang maayong mga hiyas, mora na hinuog gitabangan nato ang atong mga kaaway. Ngano? Kay makawala ni sa atong pagsalig sa organisasyon sa Diyos, nga maoy gusto sa atong mga kaaway nga mahitabo. Unsay atong mahimo aron mailhan ug masalikway ang bakak nga mga impormasyon gikan sa atong mga kaaway?

AYAWG TUGOTI NGA MAWALA ANG IMONG PAGSALIG SA ORGANISASYON

13. Unsay ginahimo sa mga kaaway sa Diyos aron ang uban maghunahuna nga dili maayo ang atong organisasyon?

¹³ Ang maayong mga butang bahin sa atong organisasyon ginahimong negatibo sa mga kaaway sa Diyos. Pananglitan, atong nakat-onan sa Bibliya nga gusto ni Jehova nga ang iyang mga magsisimba mahimong hinlo sa pisikal, moral, ug espirituwal. Siya nagsugo nga kadtong padayong maghimog daotan ug dili maghinulsol tangtangon gikan sa kongregasyon. (1 Cor. 5:​11-13; 6:​9, 10) Atong gisunod kini nga sugo sa Bibliya. Pero gigamit ni sa atong mga magsusupak aron ipakita nga kita kuno mga estrikto ra kaayo, mahukmanon, ug walay gugma.

14. Kang kinsa gyod gikan ang dili tinuod nga mga impormasyon bahin sa atong organisasyon?

¹⁴ Ilha kon kinsa gyoy nagaatake sa atong organisasyon. Kang Satanas nga Yawa naggikan ang tanang dili tinuod nga estorya bahin nato. Siya “ang amahan sa bakak.” (Juan 8:44; Gen. 3:​1-5) Busa dahomon gyod nato nga gamiton ni  Satanas ang atong mga kaaway sa pagpakaylap ug dili tinuod nga mga estorya bahin sa organisasyon ni Jehova. Kanay nahitabo sa unang siglo.

15. Unsay gihimo sa mga lider sa relihiyon kang Jesus ug sa iyang mga sumusunod?

¹⁵ Sa unang siglo, si Satanas migamit ug mga tawo sa pagpakaylap ug daghang bakak bahin sa Anak sa Diyos, kinsa hingpit ug naghimog nindot nga mga milagro. Pananglitan, ang mga lider sa relihiyon miingon nga ang gahom nga gigamit ni Jesus sa pagpalayas sa mga demonyo naggikan kuno sa “magmamando sa mga demonyo.” (Mar. 3:22) Dihang si Jesus gihusay, ang mga lider sa relihiyon miingon nga gipasipalahan kuno niya ang Diyos, ug ilang gisulsolan ang mga tawo nga ipapatay siya. (Mat. 27:20) Sa ulahi, samtang ang mga sumusunod sa Kristo nagsangyaw sa maayong balita, kadtong supak kanila “naghulhog ug nag-impluwensiya sa katawhan” nga lutoson ang maong mga Kristohanon. (Buh. 14:​2, 19) Bahin sa Buhat 14:​2, Ang Bantayanang Torre sa Disyembre 1, 1998 miingon nga ang Hudiyong mga magsusupak wala lang makontento sa pagsalikway mismo sa mensahe, kondili sila “milansad ug usa ka kampanya sa walay-pamatuod nga mga sumbong” batok sa mga Kristohanon, aron ang mga Hentil magdumot sa mga Kristohanon.

16. Unsay angay natong hinumdoman kon makadungog tag dili tinuod nga mga estorya?

¹⁶ Si Satanas wala mohunong sa pagpakaylap ug bakak hangtod karon. Gani, padayon niyang ‘gipahisalaag ang tibuok gipuy-ang yuta.’ (Pin. 12:9) Kon makadungog kag negatibong mga estorya bahin sa atong organisasyon o sa mga brader nga nanguna, hinumdomi kon unsay gihimo sa mga kaaway sa Diyos kang Jesus ug sa mga Kristohanon sa unang siglo. Karon, ang  katawhan sa Diyos gilutos ug gihimoag dili tinuod nga mga estorya, nga mao gyoy gitagna sa Bibliya nga mahitabo. (Mat. 5:​11, 12) Dili ta mailad sa bakak nga mga estorya kon atong hinumdoman kon kang kinsa gyod ni naggikan ug kon molihok dayon ta aron protektahan ang atong kaugalingon. Unsay angay natong himoon?

17. Sa unsang paagi maprotektahan nato ang atong kaugalingon gikan sa bakak nga mga estorya? (2 Timoteo 1:13) (Tan-awa sab ang kahong “ Unsay Angay Natong Reaksiyon sa Dili Tinuod nga mga Estorya?”)

¹⁷ Isalikway ang dili tinuod nga mga estorya. Si apostol Pablo naghatag ug klarong instruksiyon kon unsay himoon dihang makadungog tag dili tinuod nga mga impormasyon. Giingnan niya si Timoteo nga ‘tambagan ang pipila ka indibiduwal nga dili magtagad’ niini ug “isalikway ang bakak nga mga estorya nga nagpasipala sa Diyos.” (1 Tim. 1:​3, 4; 4:7) Ang gamayng bata mopunit lang tingalig bisan unsa diha sa salog ug ibutang kini sa iyang baba. Pero dili kana himoon sa hamtong nga tawo kay nakasabot siya nga peligroso kana. Gisalikway nato ang bakak nga mga estorya kay nahibalo ta kon asa gyod gikan kini nga impormasyon. Maminaw lang ta sa “maayong mga pulong” sa kamatuoran.—Basaha ang 2 Timoteo 1:13.

18. Unsaon nato pagpakita nga atong giapresyar ang organisasyon ni Jehova?

¹⁸ Nahisgotan nato ang tulo lang sa daghang paagi nga ang organisasyon sa Diyos nagsundog kang Jesus. Samtang imong tun-an ang Bibliya, matikdi ang uban pang paagi nga gisundog sa atong organisasyon ang ehemplo ni Jesus. Tabangi ang mga igsoon sa inyong kongregasyon sa pagpalig-on sa ilang pagsalig sa organisasyon. Ug padayong ipakita ang imong apresasyon pinaagi sa pag-alagad nga maunongon kang Jehova ug pagpabilin sa organisasyon nga gigamit niya sa pagtuman sa iyang kabubut-on. (Sal. 37:28) Hinaot padayon natong pabilhan ang pribilehiyo nga mahimong bahin sa mahigugmaon ug maunongong katawhan ni Jehova.