1. Ni bata oku abahereza ba Yehova babire bari kugendera aha ntebekanisa omu kinyigana c’okubanza?

 BURIJO Yehova yaha abahereza beye obujunanizibwa naba ari kwenda ngu babuhikirize ge. (1 Kor 14:33) Ecokureberaho: Ruhanga nayenda ngu obutumwa burungi buburirwe omu nsi yona. (Mat 24:14) Ogo murimo Yehova akaguha Yesu ngu agwebembere. Kandi Yesu nareba yaba guri kukorwa omu buryo obuhikire. Omu kinyigana c’okubanza omu bibina byona hakaba hatirweho abazehe kugira ngu bagume batange obuhabuzi kandi bebembere. (Byak 14:23) Omuri Yerusalemu hakaba hatirweho akakiko k’abazehe, akabire karimu entumwa n’abakuru kugira ngu kagume kukwata ensharamu ezi ebibina byabire bishemerire kukuratiza. (Byak 15:2; 16:4) Ahabw’okorobera obuhabuzi obu babire bari kuhebwa, ‘ebibina bikagumibwa omu kwikiriza kandi byagumizamu kweyongera buri zoba.’—Byak 16:5.

2. Kwiha omu mwaka gwa 1919, ni bata oku Yehova yabire naha obuhabuzi n’ebyokurya by’omwika abahereza beye?

² Yehova akagumizamu kwebembera abahereza beye nangwa n’omuri obu bwire. Kwiha omu mwaka gwa 1919, Yesu akatandika kukoresa omutwe gw’Abakristo bace abashukirweho omwika kugira ngu bebembere omurimo g’okuburira kandi bahe ebyokurya by’omwika abakurasi beye. a (Luk 12:42) Kandi mazima nikirebeka ku Yehova ari kuha omugisha omurimo ogu bari kukora.—Isa 60:22; 65:13, 14.

3-4. (a) Gamba ecokureberaho ekiri kwereka oku turi kugasirwa ahabw’okugendera aha ntebekanisa. (b) Ni enki eki twaza kushwijuma omuri eki kicweka?

 ³ Kuri hataratibweho eyo ntebekanisa, tukaba tutari kubasa kukora ogo murimo ogu Yesu yatuhire. (Mat 28:19, 20) Ecokureberaho: Tecereza kuri hataratibweho entebekanisa ya za teritori buri muntu wena ari kuburira aho ari kweyendera. Eco nikibasa kutuma twaburira omuri teritori emwe tuguma turi kuyiburiramu emirundi myingi, konka oshanga hariho ezindi teritori ezi tutakaburiragamu. Mbehi nobasa kutecereza n’aha bundi buryo obu turi kugasirwamu ahabw’okugendera aha ntebekanisa?

⁴ Ebi Yesu yakozire acari omu nsi bikereka abakurasi beye ku yabire aragumizemu kutebekanisa abahereza ba Ruhanga n’omuri obu bwire. Omuri eki kicweka twaza kushwijuma ecokureberaho eki Yesu yatuterireho n’oku ekitongore kitu kiri kukuratiza eco cokureberaho. Nambwenu nitwija kureba oku turi kubasa kwereka ku nitwesiga ekitongore ca Yehova.

EKITONGORE KITU NIKIKURATIZA ECOKUREBERAHO CA YESU

5. Ni buha buryo bumwe obu turi kubasa kutorezamu ecokureberaho ca Yesu? (Yohana 8:28)

⁵ Yesu akegera ahari Ishe w’omu iguru ebi yabire ashemerire kukora n’ebi yabire ashemerire kugamba. Ekitongore ca Yehova nikikuratiza ecokureberaho ca Yesu, kiri kukoresa Ekigambo ca Ruhanga omu kutukwasa kumanya ekirungi n’ekibi kandi kituha obuhabuzi omuri obu bwire. (Shoma omuri Yohana 8:28; 2 Tim 3:16, 17) Emirundi myingi nituhebwa obuhabuzi oburi kutwijusya kushoma n’okuta omu bikorwa ebi twashoma omu Kigambo ca Ruhanga. Ni bata oku turi kugasirwa twakuratiza obwo buhabuzi?

6. Ni bata oku turi kugasirwa twayeyegesa Bibuli?

⁶ Nitugasirwa munonga twayeyegesa Bibuli hamwe n’ebitabo ebi turi kuhebwa n’ekitongore kitu. Eco nikitukwasa kugezaho kugeranisa enyegesa z’omuri Bibuli, n’obuhabuzi obu turi kuhebwa n’ekitongore kitu. Twashanga obuhabuzi obu turi kuhebwa buri kuba bwegamire ahari Bibuli nikituma twakizaho kwesiga ekitongore ca Yehova.—Rom 12:2.

7. Ni buha butumwa obu Yesu yabire ari kuburira kandi ni bata oku ekitongore ca Yehova kiri kukuratiza ecokureberaho ceye?

⁷ Yesu akaburira ‘obutumwa burungi bw’Obukama bwa Ruhanga.’ (Luk 4:43, 44) Nambwenu, Yesu akaragira abegi beye kuburira ebiri kukwata aha Bukama. (Luk 9:1, 2; 10:8, 9) Omuri obu bwire abantu bona abari kwekwatanisa n’ekitongore ca Yehova nibaburira obutumwa bw’Obukama oku embera n’obushoborozi ebi bine byakuba biri kona.

8. Ni guha mugisha ogu twine?

⁸ Mazima twine omugisha g’omuhendo g’okugambira abandi ebikwatirine n’Obukama bwa Ruhanga! Ogo mugisha ti ogwa buri omwe. Ecokureberaho: Obu Yesu yabire ari omu nsi tarabire ari kwikiririza emyika mibi kumuhamya. (Luk 4:41) Omuri obu bwire kugira ngu omuntu atandike kwekwatanisa omu murimo g’okuburira n’abahereza ba Yehova naba ashemeire kubanza yayijuza ebiri kushabwa. Nitwereka ku turi kusima ahabw’ogo mugisha ogu twine g’okuburira turi kuburira ahantu hona, kandi tukoresa obwire bwona obu turi kutunga. Kimwe na Yesu entego yitu ni ey’okubyara n’ey’okushucera embibo y’Obukama bwa Ruhanga eyi turi kubiba omu mitima y’abantu.—Mat 13:3, 23; 1 Kor 3:6.

9. Ni bata oku ekitongore ca Yehova kiri kutuma abantu bamanya izina rya Ruhanga?

⁹ Yesu akamanyisa abantu izina rya Ruhanga. Omu shara eyi yashabire Ishe w’omu iguru akagamba ati: ‘Nkabamanyisa izina ryawe.’ (Yoh 17:26) Ekitongore ca Yehova nikitoreza Yesu kiri kukora cona ekiri kubasika kugira ngu kikwase abantu kumanya izina rya Ruhanga. Emwe omu ntego ya Bibuli y’obuhinduzi bw’ensi  ensya ni okugaruza izina rya Ruhanga omu mwanya gwaryo. Eyo Bibuli hati nerebaka yona ninga ebicweka byayo omu ndimi eziri kurenga 270. Wareba omu Nyongezo ya A4 na A5 z’eyo Bibuli, noyija kushangamu byingi ebiri kukwata aha nshonga ahabw’enki bagarwize izina rya Ruhanga omu mwanya gwaryo, n’oku bakikozire. Omu Nyongezo ya C eri kurebeka omuri Bibuli y’okweyegeserezamu harimu byingi ebiri kugamba aha nshonga izina rya Ruhanga rishemerire kurebeka omu Byahandikirwe bya Kristo by’Orugurika emirundi 237.

10. Ni enki eki wayegera aha bigambo ebi omukazi w’omuri Miyanimari yagambire?

¹⁰ Kimwe na Yesu n’itwe nitwenda kukwasa abantu bingi kumanya izina rya Ruhanga. Omukikuru w’omuri Miyanimari oyine emyaka 67, ku yamanyire izina rya Ruhanga akagamba ari kurira ati: “Ogu ni go murundi g’okubanza omu kubaho kwange ogu nahuriraho ku izina rya Ruhanga ari Yehova. . . . Mwanyegesa ekintu c’omugasho munonga kukira ebindi ebi nayegire byona.” Nk’oku eki cokureberaho kiri kubyereka abantu b’emitima mirungi bamanya izina rya Ruhanga, nikibasa kuhindura amagara gabo.

GUMIZAMU KWEREKA KU NOYESIGA EKITONGORE CA YEHOVA

11. Ni bata oku abazehe bari kubasa kwereka ku nibesiga ekitongore ca Yehova? (Nambwenu reba ekishushani.)

¹¹ Ni buha buryo bumwe obu abazehe bari kubasa kwerekamu ku nibesiga ekitongore ca Ruhanga? Abazehe bahebwa obuhabuzi, nibaba bashemerire kubushoma betonzire kandi babukuratiza nk’oku buri. Ecokureberaho: Oyihireho obuhabuzi obu bari kuhebwa bw’oku bashemerire kwebembera enterane n’oku bashemerire kushaba omu kibina, nambwenu nibahebwa obuhabauzi bw’oku bashemerire kufa aha ntama za Kristo. Abazehe bakuratiza obuhabuzi obu bari kuhebwa n’ekitongore nikituma benetata na banyanyazi bahurira ku Yehova ari kubakunda kandi ku ari kubafaho.

12. (a) Ahabw’enki tushemerire kukoringana ge na benetata abari kwebembera? (Abaheburayo 13:7, 17) (b) Ahabw’enki tushemerire kufa aha mitwarize mirungi ya benetata abari kwebembera?

¹² Abazehe batuha obuhabuzi nituba tushemerire kubukuratiza twekundire. Eco twakikora nikija kutuma cayorobera abari kutwebembera kukora omurimo gwabo. Bibuli netushaba kuhurira n’okorobera abari kutwebembera. (Shoma omu Baheburayo 13:​7, 17.) Eco obumwe na bumwe hine obu kiri kuba kigumire. Ahabw’enki? Ahabw’okuba abo bashija na bo tibahikirire. Konka twata omutima aha mitwarize mibi yabo omu mwanya gw’okuguta aha mitwarize mirungi yabo nikibasa kutuma twabareba nk’abangi bitu. Bata shi? Abangi bitu nibaba bari kwenda ngu tutayikiriza ku Ruhanga ari kukoresa ekitongore kitu omu kutuhabura. Obwe rero, twafa aha mitwarize mibi y’abazehe nitubasa kutandika kutecereza kubi aha kitongore kitu kituma tutacesiga. Mbwenu shi nitubasa kukora ki kugira ngu tumanye kandi twerinde ebishuba by’abangi bitu?

OTARIYIKIRIZA NGU ABANDI BATUME WAREKA KWESIGA EKITONGORE KITU

13. Ni bata oku abangi ba Ruhanga bari kugezaho kutuma twareba kubi ekitongore ceye?

¹³ Abangi ba Ruhanga nibagezaho kutuma twareba ebintu ebi ekitongore ca Ruhanga kiri kuhikaho nk’ebintu bibi. Ecokureberaho: Tukega omu Byahandikirwe ku abantu abari kuramya Yehova bari kuba bari abashemire aha mubiri, omu bitecerezo n’omu by’omwika. Nayenda ngu omuntu wena ori kugumizamu kukora ebikorwa bibi kandi akanga kwehana, abingwe omu kibina. (1 Kor 5:11-13; 6:9, 10) Nitworobera eco kiragiro ekiri omu Byahandikiwe. Konka abangi bitu nibagamba ku eco kiri ekikorwa c’obugomi, ekitarimu oburinganiza kandi ekitari kwereka rukundo.

14. Ni buha burugo bw’ebishuba ebi bari kutugambaho?

 ¹⁴ Guma omanye enshonga bari kuturwanisa. Sitane omuregi ni we ori kutuma batugambaho ebyo bishuba byona. Ni we ‘ishe w’ebishuba.’ (Yoh 8:44; Kut 3:1-5) Obwe rero tushemerire kumanya ku Sitane ari kukoresa abari kumushagika kugira ngu bagambe ebishuba aha kitongore ca Yehova. Ebyo bikabaho n’omu kinyigana c’okubanza.

15. Ni ebiki ebi abebembezi b’amadini bakorire Yesu n’abakurasi beye?

¹⁵ Omu kinyigana c’okubanza abari kukwatanisa na Sitane bakaba nibajanjaza ebishuba aha mirimo mirungi n’eby’okutangaza ebi Omwana wa Ruhanga yabire nakora. Ecokureberaho: Abebembezi b’amadini bakagambira abantu ku amani agu Yesu yabire ari kukoresa omu kubinga badayimoni yabire ari kugahebwa na ‘mukama wa badayimoni.’ (Mar 3:22) Obu Yesu yabire ari kugezibwa abebembezi b’amadini bakagamba ebishuba ahari Yesu kugira ngu ayitwe. (Mat 27:20) Bwanyima abakurasi ba Kristo ku babire bari kuburira obutumwa burungi, abari kubahakanisa ‘bakososya abantu ngu bahiganise abo Bakristo. (Byak 14:2, 19) Omunara g’Omurinzi gwa ahakiro ca 1 Okwikuminabiri 1998, gukashoborora ebiri omu Byakozirwe 14:2 guri kugira ngu: “Abari kushagika Sitane bakanga kwikiriza obutumwa obu Abakristo babire bari kuburira kandi babagambaho ebintu ebyabire biratume abantu bayanga kubahurikiza kandi bakabanga.”

16. Ni enki eki tushemerire kwijuka twahurira bari kutugambaho ebishuba?

¹⁶ Sitane tararekire kugamba ebishuba aha Bakristo. N’omuri obu bwire acagumizemu ‘kuhabisa ensi yona.’ (Kush 12:9) Waguma kuhurira ebishuba ebiri kugambwa aha kitongore kitu ninga ahari benetata abari kwebembera,  ogume oyijuke oku abangi ba Ruhanga babire bari kutwariza Yesu n’Abakristo b’omu kinyigana c’okubanza. Omuri obu bwire abahereza ba Yehova nibahiganisibwa kandi bababeherera nk’oku Bibuli yabire yakigambire. (Mat 5:11, 12) Ebishuba tibirije kutuhabisa twaguma kwijuka oburugo bwabyo, kandi tukahika turi kugira eki twakora. Ni enki eki turi kuba tushemerire kuhika turi kukora?

17. Ni bata oku tushemerire kwerinda engaruka z’ebishuba ebi bari kutugambaho? (2 Timoteyo 1:13) (Nambwenu reba akashanduku akari kugira ngu “Oku tushemerire kukwata ebishuba ebi bari kutugambaho.”)

¹⁷ Yerinde ebishuba. Entumwa Pawulo akatugambira eki tushemerire kukora twahurira bari kutugambaho ebishuba. Akagambira Timoteyo ngu ‘ahane bamwe bareke kuhugira omu. . . migani y’ebishuba’ n’‘okwerinda ebitecerezo by’ebishuba by’abakikuru.’ (1 Tim 1:3, 4; 4:7) Tecereza ahari eki: Omwana nabasa kutoragura ekintu kibi ahaasi akirya konka omuntu mukuru we, naba ari kumanya ku biri kubasa kumugiraho engaruka niyo nshonga atari kubasa kubirya. N’itwe nitwerinda ebishuba ahabw’okuba turi kumanya aho buri kuruga. Omu mwanya gw’eco nituta omutima aha ‘bigambo by’amazima.’—Shoma omuri 2 Timoteyo 1:13.

18. Ni bata oku turi kubasa kwereka ku nitwesiga ekitongore ca Yehova?

¹⁸ Twamara kushwijuma oburyo bushatu obu ekitongore ca Ruhanga kiri kutorezamu Yesu. Konka hariho n’obundi bwingi. Waguma kweyegesa Bibuli ogume oyetegereze n’obundi buryo obu ekitongore ca Yehova kiri kutorezamu ecokureberaho ca Yesu. Guma okwase abandi omu kibina cawe kukizaho kwesiga ekitongore kitu. Kandi n’iwe ogume oyereke ku ori kwesiga ekitongore ca Yehova ori kugumizamu kuhereza Yehova omu bwesigwa, kandi ori kwikiriza ku ari co eki ari kukoresa omu kuhikiriza ebi ari kwenda. (Zab 37:28) Ni mureke tugumizemu kwesimira omugisha ogu twine g’okuba turi omu kitongore ca Yehova ekiri kukundana kandi ekirimu abantu b’abesigwa.