1. Ifa ussun néún Jiowa kewe aramas ra kókkótéch lón fansoun ekkewe aposel?

 ATUN Jiowa a ewisa ngeni néún kewe aramas eú angang, a menei ar repwe apwénúetá fán kókkótéch. (1 Kor. 14:33) Áwewe chék, letipen Kot pwe ewe kapas allim epwe afalafal feil wóón unusen fénúfan. (Mat. 24:14) Jiowa a fen ewisa ngeni Jises an epwe emmweni ena angang. Me Jises a nochchei an epwe fis ena angang fán kókkótéch. Lón fansoun ekkewe aposel, atun a fférútá ekkewe mwichefel lón sókkopaten leeni, a kewis ngeni ekkewe mwán mi ásimaw ar repwe wisen emmweni ekkena mwichefel. (Féf. 14:23) A wor ewe kúmiin mwán mi ásimaw mi nóm lón Jerusalem, iir aposel me souakkomw ra féri ekkewe kefil mi lamot án meinisin ekkewe mwichefel repwe álleasochisiir. (Féf. 15:2; 16:4) Pokiten ar álleasochisi ekkena kapasen emmwen, “án chón ekkewe mwichefel lúkú a péppéchékkúleló me ra chóchchómmóngoló iteiten rán.”—Féf. 16:5.

2. Seni ewe ier 1919, ifa ussun Jiowa a awora emmwen me mwéngé lón pekin ngún?

² Jiowa a chúen sópweeló le akkóta néún kewe aramas pwal mwo nge lón ei fansoun. Seni ewe ier 1919, Jises a néúnéú eú kúkkún kúmiin mwán mi kepit le akkóta ewe angangen afalafal me akkawora mwéngé lón pekin ngún ngeni iir kewe mi tapweló mwirin Jises. a (Luk 12:42) Ese wor tipemwárámwár pwe Jiowa a efeiéchú án ena kúmi angang.—Ais. 60:22; 65:​13, 14.

3-4. (a) Áweweei ifa ussun sia kúna álilliséchún ach kókkótéch. (b) Met sipwe káé lón ei lesen?

 ³ Iká sise kókkótéch, esap tufich ach sipwe apwénúetá ewe angang Jises a ewisa ngenikich ach sipwe féri. (Mat. 28:​19, 20) Áwewe chék, iká ekkewe mwán rese akkóta ach sipwe afalafal lón meinisin ekkewe territory mi kewis ngeni ach we mwichefel, iwe meinisin chón ewe mwichefel repwe chék afalafal ia ra mochen afalafal ie. Eli sipwe afalafal fán fite lón ekkóch territory, nge likitaaló ekkóch sise mwo fen akkafalafal ie. Ka tongeni ekieki pwal ekkóch mettóch sia kúna álilliséchún seni ach kókkótéch?

⁴ Jises a chúen sópweeló le akkóta néún Kot kewe aramas lón ei fansoun, ussun chék an akkóta néún kewe chón káé atun a nóm fénúfan. Lón ei lesen, sipwe káé ewe leenien áppirú Jises a isettiw me ifa ussun án Jiowa we mwicheich a áppirú met a féri. Sipwe pwal káé ifa ussun sia tongeni pwáári pwe sia lúkúlúk wóón án Jiowa mwicheich.

ACH WE MWICHEICH A ÁPPIRÚ MET JISES A FÉRI

5. Ifa eú alen ach áppirú met Jises a féri? (Jon 8:28)

⁵ Jises a káé seni Seman we lón láng met epwe féri me met epwe apasa. Án Jiowa we mwicheich a áppirú Jises ren ar néúnéú án Kot we Kapas le álisikich le silei met mi pwúng me met mi mwáál, me awora ngenikich kapasen emmwen lón manawach. (Álleani Jon 8:28; 2 Tim. 3:​16, 17) Iteitan, sia kan angei kapasen áchchem ren ach sipwe álleani me apwénúetá masouen án Kot Kapas. Ifa ussun sia feiéch seni ach álleasochisi ena kapasen emmwen?

6. Ifa eú mettóch mi aúchea sia kúna álilliséchún seni ach káé ewe Paipel?

⁶ Sia fókkun kúna álilliséchún ach káé ewe Paipel ren álillisin néúch kewe puk me pwal ekkewe ekkóch álillisin káé Paipel. Áwewe chék, sia tufichin alélléfengeni ekkewe káit seni Paipel me ekkewe emmwen sia angei seni ewe mwicheich. Atun sia kúna pwe ekkewe emmwen sia angei ra lóngólóng wóón ewe Paipel, a lapóló ach lúkúlúk wóón án Jiowa we mwicheich.—Rom 12:2.

7. Ifa ewe pwóróus Jises a afalafala, me ifa ussun án Jiowa we mwicheich a áppirú met a féri?

⁷ Jises a afalafala “ewe kapas allim ussun ewe Mwúún Kot.” (Luk 4:​43, 44) Jises a pwal allúkú ngeni néún kewe chón káé ar repwe afalafala ussun ena Mwú. (Luk 9:​1, 2; 10:​8, 9) Lón ei fansoun, meinisin chókkewe mi chóni án Jiowa we mwicheich ra afalafala pwóróusen ewe Mwú ese lifilifil ia ra nóm ie are úkúúkún chómmóngun ar angang lón án Jiowa we mwicheich.

8. Ifa ewe wis mi aúchea a kewis ngenikich?

⁸ Ach afalafala ngeni aramas ewe enlet ussun ewe Mwúún Kot, ina eú watteen feiéch ngenikich! Ena feiéch ese suuk ngeni ese lifilifil ié. Áwewe chék, atun Jises a nóm fénúfan, ese mut ngeni ekkewe ngún mi ngaw ar repwe afalafala ussun i. (Luk 4:41) Lón ei fansoun, me mwen án emén epwe tongeni fiti néún Jiowa kewe aramas le afalafal, a lamot epwe fich ngeni ena wis. Sia pwáári úkúúkún ach aúcheani wisach le afalafal ren ach afalafal ese lifilifil ia sia nóm ie, me ese lifilifil ineet a suuk ngenikich. Sia áppirú Jises le achocho ngeni le fótukaalong me étútúúi pwikilin ewe enlet lón letipen aramas.—Mat. 13:​3, 23; 1 Kor. 3:6.

9. Ifa ussun ach we mwicheich a pwáraaló iten Kot we?

⁹ Jises a esile ngeni aramas iten Kot we. Lón án Jises we iótek ngeni Seman we lón láng, a erá: “Úa fen esilei ngeniir itom we.” (Jon 17:26) Ussun chék met Jises a féri, án Jiowa we mwicheich a pwal féri meinisin  met epwe atufichi án aramas repwe silei iten Kot we. Eú alen án ewe mwicheich féri ena, ina ren kaworen ewe New World Translation of the Holy Scriptures. Ena Paipel a eliwinalóng iten Kot we lón úrúrún leenian lón ewe Paipel. Iei a chiyakú unusen are kinikinin ena Paipel lón lap seni 270 fósun fénúfan. Kopwe kúna lón Appendix A4 me A5 lón ena Paipel ekkewe pwóróus mi affataéchú liwinlongun iten Kot we lón ewe Paipel. Lón ewe Appendix C lón ewe Study Bible, a awora chómmóng pisekin pwáraatá iká pwata itá epwe nóm fán 237 iten Kot we lón néún Chón Kraist we Tesin Krik.

10. Met sia káé seni alon emén fefin lón Myanmar?

¹⁰ Sia áppirú Jises le mochen álisi chómmóng aramas le silei iten Kot we. Atun emén fefin 67 ierin seni Myanmar a silei pwe a wor iten Kot, a kechiw me apasa: “Iei ewe áeúin fansoun lón manawei úa kerán rong pwe iten Kot, Jiowa. . . . Ka fen áiti ngeniei eú pwóróus mi kon aúchea seni meinisin met úa silei.” Ena pwóróus a áiti ngenikich pwe án emén mi letipwenechar silei iten Kot, a wesewesen tongeni achchúngú letipan.

SÓPWEELÓ LE PWÁÁRI ÓM LÚKÚLÚK WÓÓN ÁN JIOWA WE MWICHEICH

11. Ifa ussun ekkewe mwán mi ásimaw ra pwáári ar lúkúlúk wóón án Jiowa we mwicheich? (Pwal ppii ewe sasing.)

¹¹ Ifa eú alen án ekkewe mwán mi ásimaw repwe tongeni pwáári pwe ra lúkúlúk wóón án Kot we mwicheich? Atun ra angei kapasen emmwen, a lamot repwe álleaniéchú, me mwirin apwénúetá úkúúkún ar tufich. Áwewe chék, ra angei kapasen emmwen esap chék ren ifa ussun repwe féri ar kewe kinikin lón mwiich me iótek, nge ra pwal angei kapasen emmwen ren ifa ussun repwe túmúnú néún Kraist kewe siip. Ekkewe mwán mi ásimaw mi álleasochisi ekkewe emmwen seni ewe mwicheich, ra álisi chókkewe iir mi nóm fán túmúnúer le meefi núkúnúkéch me tong.

12. (a) Pwata a lamot ach sipwe álleasochisi emmwenien chókkewe iir mi emmwenikich? (Ipru 13:​7, 17) (b) Pwata sipwe nefótófót wóón án ekkewe chón emmwenikich napanap mi múrinné?

¹² Atun sia angei kapasen emmwen seni ekkewe mwán mi ásimaw, a lamot sipwe tipemecheres le apwénúetá. Iká sia féri ena, epwe ámecheresi ar repwe féri ar angang. Ewe Paipel a pesekich ach sipwe álleasochisi me onómukich fán emmwenien chókkewe mi wisen emmwenikich. (Álleani Ipru 13:​7, 17.) Fán ekkóch, a tongeni weires ena. Pwata? Pokiten ekkena mwán, rese unuséch. Iwe nge, iká sia nefótófót wóón apwangapwanger kewe lap seni napanaper kewe mi múrinné, iwe ussun itá sia álisaatá chón oputach kewe. Ifa ussun? Epwe kisikisiló ach lúkúlúk wóón án Kot we mwicheich, ewe mettóch chón oputach kewe ra mochen ach sipwe meefi. Met sia tongeni féri pwe sipwe esilla me ttii senikich án chón oputach kewe kapas chofona?

KOSAP MUT NGENI EMÉN EPWE APWANGAPWANGAALÓ ÓM LÚKÚLÚK WÓÓN EWE MWICHEICH

13. Ifa ussun chón oputen Kot kewe ra sótun angawa an we mwicheich?

¹³ Ekkewe chón ú ngeni Kot ra sótun angawa ekkewe mettóch mi múrinné ussun án Jiowa we mwicheich. Áwewe chék, sia káé seni ewe Paipel pwe Jiowa a mochen án ekkewe chón fel ngeni repwe liméch lón pekin inis, manaw, me ngún. A erá pwe emén ese mochen úkútiw le sópweeló le féri met mi ngaw, epwe katowu seni ewe mwichefel. (1 Kor. 5:​11-13; 6:​9, 10) Sia álleasochisi ena allúk seni Paipel. Me chón oputach kewe ra sótun áeá ena mettóch ren ar tipimwáál ngenikich pwe sise tongei aramas, sia apwúngúúr, me sia lifilifil aramas.

14. Ié ewe a wesewesen mochen angawaaló ewe mwicheich?

 ¹⁴ Esilla ié ewe a wesewesen mochen angawaaló ewe mwicheich. Setan ewe Tefil i ewe chón álisaatá ekkewe pwóróus mi chofona ussun ewe mwicheich. I “semen chofona.” (Jon 8:44; Ken. 3:​1-5) Ina popun sia silei pwe Setan epwe néúnéú ekkewe chón peni le achéwú pwóróus mi chofona ussun án Jiowa we mwicheich. Ina met a fis ngeni Jises me ekkewe aposel lón fansoun lóóm.

15. Met ekkewe néúwisin lamalam ra féri ngeni Jises me ekkewe chón tapweló mwirin?

¹⁵ Lón fansoun ekkewe aposel, chókkewe mi peni Setan ra eáni chómmóng kapas mi chofona ussun Jises, Néún Kot we, ewe mi unuséch me féri chómmóng manaman. Áwewe chék, ekkewe néúwisin lamalam ra ereni ekkewe aramas pwe án Jises manamanen atowu ekkewe timon, a feito seni “ewe sounemenemen ekkewe timon.” (Mark 3:22) Atun Jises a kúna kapwúng, ekkewe néúwisin lamalam ra etipisi pwe i emén chón turunufasa Kot me pesei ekkewe aramas ar repwe tingor an epwe niniiló. (Mat. 27:20) Mwirin, atun ekkewe chón tapweló mwirin Kraist ra afalafala ewe kapas allim, chókkewe mi ú ngeniir, ra “asongaatá me etipetipa” ekkewe aramas ar repwe eriáfféwú ekkena Chón Kraist. (Féf. 14:​2, 19) Iei met a mak ussun Féffér 14:2 lón ewe Puken Ekkewe Lesen Sipwe Kaeo 1 (br1): “Ekkewe chon Jus mi u ngeni rese chok pwisin oputa ar afalafal, nge ra pwal mwo nge pweniir pwe repwe etipetipa ekkewe chon Jentail ar repwe pwal oputa ekkewe Chon Kraist.”

16. Met a lamot sipwe chemeni iká sia rong pwóróus mi chofona?

¹⁶ Setan ese úkútiw le kapas chofona lón fansoun ekkewe aposel. Lón ei fansoun, a chúen “otupu unusen fénúfan.” (Pwá. 12:9)  Iká ka rong pwóróus ese pwúng ussun ach we mwicheich are ussun ekkewe mwán mi wisen emmwenikich, chemeni met ekkewe chón oputa Kot ra féri ngeni Jises me ekkewe chón tapweló mwirin lón ar we fansoun. Lón ei fansoun, néún Jiowa kewe aramas ra kúkkúna riáfféúmwáál, me aramas ra chofonatá ussur. Me ina met Paipel a fen osuni. (Mat. 5:​11, 12) Ekkewe pwóróus mi chofona resap otupukicheló iká sia esilla ié we a poputááni, me mwittir mwékút. Ifa ussun sipwe mwékút?

17. Ifa ussun sia tongeni ttii senikich efeiengawen pwóróus mi chofona? (2 Timoty 1:13) (Pwal ppii ewe pwóór “ Met Kopwe Féri iká Ka Róng Pwóróus mi Chofona?”)

¹⁷ Ttii sonuk pwóróus mi chofona. Ewe aposel Paul a affata met a lamot sipwe féri iká sia rong pwóróus mi chofona. A ereni Timoty an epwe “allúkú ngeni ekkewe ekkóch ar resap . . . aúseling ngeni ekkewe túttúlap mi chofona” me ar repwe ttii seniir “ekkewe túttúlap mi chofona mi ésúfélúngaw.” (1 Tim. 1:​3, 4; 4:7) Inaamwo iká eli emén semirit epwe angei och mettóch me wóón ewe simen me waalong lón awan, nge emén mi mwukóló mi weweiti efeiengawen ena, esap fókkun féri ena. Sia ttii senikich pwóróus mi chofona pokiten sia silei ié ena pwóróus mi chofona a pop seni. Sia chék aúseling ngeni “ekkewe kapas mi álilliséch” ussun ewe enlet.—Álleani 2 Timoty 1:13.

18. Ifa ussun sipwe pwáári ach lúkúlúk wóón án Jiowa we mwicheich?

¹⁸ Sia chék káé úlúngát me lein ekkewe chómmóng mettóch án Kot we mwicheich a áppirú Jises lón. Atun ka káé ewe Paipel, achocho le ekieki pwal ekkóch mettóch ewe mwicheich a áppirú Jises lón. Álisi chón óm we mwichefel le alapaaló ar lúkúlúk wóón ewe mwicheich. Me sópweeló le pwáári óm lúkúlúk wóón ena mwicheich ren óm angang ngeni Jiowa fán túppwél me fitipachei an na mwicheich a áeá le apwénúetá letipan. (Kölf. 37:28) Amwo sipwe sópweeló le aúcheani feiéchúch le kapachelong lein néún Jiowa kewe aramas mi tong me túppwél.