1. Nikuru na Yehova nasasedheyile dhavi vyaka zana dhoroma?

 DILA dhotene dhinvaha Yehova nlogo naye mabasa iyene onjedhela wi mabasaya attiddiwe na mukalelo wosasanyedheya. (1 Kor. 14:33) Ninga motagiha, efunelo ya Yehova jawi miselu dhapama dhilaleyiwe orugunuwa elabo yotene. (Mt. 24:14) Yehova ohimuttoma Yezu wila asogorhelege mabasa aba. Nona Yezu onjedhela wi mabasaya akosiwege na mukalelo wosasanyedheya. Sekulu yoroma vetiwe milogo mmiburhoni dhottiyana-ttiyana ahittomiwamo anddimuwa a mmulogoni wila eddihege vina asogorhelege milogodha. (Mer. 14:23) Milogo esi dhafwara malago dhakelani na arumiwi vamodha na anddimuwa a mulogo ali o Jeruzalemi mwari mwa sekulu yoroma. (Mer. 15:2; 16:4) Yodhelavoya, “mitugumano dhanliba muroromelani; [vina] muthengo wa [Akristu] wanunuwa siku-siku.”—Mer. 16:5.

2. Txini enkosa Yehova oromana 1919, wi avahe malago vina yoja yomuyani nikuru naye?

² Masaka abano Yehova onodhowavi asasanyedhaga nlogo naye. Oromana yaka ya 1919, Yezu onolabihedha nikuru ning’ono na alobwana ottikitteliwa wila asasanyedhe mabasa a olaleya vina wavaha oja womuyani anamafwara aye. a (Lk. 12:42) Kaninaganyedha wila Yehova onoruriha mabasa alobwana aba.—Iza. 60:22; 65:​13, 14.

3-4. (a) Kavaha dhotagiha dhinoniha mukalelo ompurelamo iyo sabwa ya okala nikuru nosasanyedheya. (b) Txini enone iyo mwari mwa nsunzo nti?

³ Iyo kohikala nikuru nosasanyedheya kanigawodhile okosa mabasa anittomele Yezu. (Mt. 28:​19, 20) Motagiha, kobuwela, iyo kohikana masasanyedho a mirudda dholaleya,  muttu-muttu aganlaleya mburho onfuniye. Ejo egattukulela mirudda dhina olabiwa venjene oku mirudda dhina se olabiwa. Onowubuwela dhopurelamo dhina dhinkana iyo sabwa ya okala nikuru nosasanyedheya?

⁴ Vali Yezu velaboni yavati, iyene wannasasanyedha anamafwara aye vina onodhowavi asasanyedhaga nlogo naye masaka abano. Mwari mwa nsunzo ntti ninele osunza yotagiha enittiyedhi Yezu vina ninele wona mukalelo onfwara nikuru nehu yotagiha yaye. Vina ninele wona mukalelo wa woniha oriha vina okuluvela wehu nikuru na Yehova.

NIKURU NEHU NINOFWARA YOTAGIHA YA YEZU

5. Ninafware dhavi yotagiha ya Yezu? (Joau 8:28)

⁵ Yezu osunzile na Babe dhilobo dhafwanyeliye okosa vina ologa. Nikuru na Yehova nifwaraga yotagiha ya Yezu ninolabihedha Mazu sa Mulugu wi anisunzihe eli yapama vina eli yabure ottiya ejo ninonivaha malago annikamihedha omwagalaliha Yehova mwigumini mwehu. (Kengesa Joau 8:28; 2 Tim. 3:​16, 17) Nikuru na Yehova ninonubutxedha omwengesa Bibilia vina ovirihamo esile dhinsunzehu. Okosa eji enanikamihedhe dhavi?

6. Txini empurelamo iyo nigamusunza Bibilia?

⁶ Iyo ninopurelamo venjene nigamusunzaga Bibilia nilabihedhaga mapublikasau ehu. Motagiha, ninoladdaniha enloga Bibilia na malago anakelihu na nikuru nehu. Venevo vanonihu wi malago anakelihu anowiwanana na Malebo, okuluvela wehu nikuru na Yehova ninowunuwa.—Rom. 12:2.

7. Miselu Gani dhalaleya Yezu vina nikuru na Yehova ninfwara dhavi yotagiha yaye?

⁷ Yezu wanlaleya muttaka wapama. (Lk. 4:​43, 44) Ottiya ejo, Yezu vina ohawaddela anamafwara aye wi anfwanyela olaleya miselu dhapama dha Omwene. (Lk. 9:​1, 2; 10:​8, 9) Masaka abano iyo notene ninkosa mpaddi wa nikuru na Yehova ninolaleya miselu dha Omwene kintanala onkalihu obe ettomo enihu mu nikuruni na Yehova.

8. Gari gani enihu?

⁸ Mwa iyo, gari enddimuwa olaleya miselu dhapama dha Omwene wa Mulugu! Kahiyo attu otene ana gari eji. Motagiha, vali Yezu velaboni ya vati iyene karumela wi adomonyo avahe onamoona mwaha waye. (Lk. 4:41) Masaka abano vina muttu ahinaroma olaleya na nikuru na Yehova, onofwanyela okana mikalelo dhorumelihiwa wi akane gari eji. Iyo ninolagiha wi ninovaha ttima gari eji ya olaleya nigavahaga onamoona mudhidhi mudhidhivi vina mburho-mburhovi. Dhahene ninga Yezu yogana yehu ja wala beu dha Omwene mmirimani mwa attu vina wasunziha ebaribari.—Mt. 13:​3, 23; 1 Kor. 3:6.

9. Nikuru na Yehova ninttittimiha dhavi nzina na mulugu?

⁹ Yezu wannasunziha attu ena nzina na Mulugu. Amulobelelaga Babe, Yezu ohiloga: “Ddihaziwiha nzina nenyu.” (Jo. 17:26) Nifwaraga yotagiha ya Yezu, nikuru na Yehova ninokosa muli-mwetemwene wi akamihedhe attu oziwa nzina na Mulugu. Otapuleliwa wa Bibilia Tradução do Novo Mundo das Escrituras Sagradas mukalelo mmodha ononiha ejuwene. Bibilia oddu owiyihedha nzina na Mulugu mmimburhoni mwafwanyeyani mu dhilogelo dhoroma dhilebiwena Bibilia. Bibilia oddu ohitapuleliwa wetene obe mpaddi-mpaddi na dhilogelo dhowakwana 270. Mu Apêndice A4 vina A5 wa Bibilia oddu onele ofwanyamo miselu dhiniwanana na wiyihedhiwa nzina na Mulugu mBibiliani. Apêndice C, onfwanyeya mwari  mwa Bibilia de Estudo, munofwanyeyamo vizinddiyelo dhinoniha sabwaya enfwanyela nzina na Mulugu ofwanyeya mMaleboni a Egregu dila 237.

10. Mazu alogile muyana dhahi wo Mianmar annisunziha eni?

¹⁰ Dhahene ninga Yezu, iyo ninfuna nakamihedhe attu enjene oziwa nzina na Mulugu. Muyana dhahi w’o Mianmar wanna vyaka 67 musunzeliye wi nzina na Mulugu ddi Yehova wahiroma wunla, iyene ohiloga: “Okalawo waga wotene ddaligi ddihinewaga nzina na Mulugu. . . . Weyo ohiddisunziha elobo yamakamakaya.” Ninga monile iyo na nipadduwo ntti, dhigumi dha attu dinodhaga otxinja sabwa ya osunza nzina na Mulugu.

KADHOWAVI OLAGIHAGA WI ONOKULUVELA NIKURU NA YEHOVA

11. Anddimuwa a mmulogoni anlagiha dhavi wila anokuluvela nikuru na Yehova? (Koona vina foto.)

¹¹ Anddimuwa a mmulogoni anlagiha dhavi wi anokuluvela nikuru na Yehova? Anddimuwa a mmulogoni agakela malago, anowengesa nofwasa vina anokosa muli-mwetemwene wila avirihemo. Ninga motagiha, ottiya wakela malago sabwa ya okosa dhipaddi mmatugumanoni vina olobelela mulogo, awene anowakela malago aniwanana na weddiha mabila a Kristu. Anddimuwa a mmulogoni agavirihamo malago anakelani na nikuru na Yehova, abali anowona wi anokweliwa vina anozuzumeliwa na Yehova.

12. (a) Ninakamihedhela nni wakamihedha abali annisogorhela? (Ahebreu 13:​7, 17) (b) Ekaleleni yofuneya ofwaseyela mikalelo dhapama dha abali annisogorhela?

¹² Nigakela malago na anddimuwa, ninofwanyela ovirihamo. Nigakosa ejuwene ninele ovevutxa mabasa awa a osogorhela mulogo. Bibilia ononaddela wi ninofwanyela wawiwelela abale annisogorhela. (Kengesa Ahebreu 13:​7, 17.) Mbwenyi okosa ejuwene masaka mena enorutxaga. Sabwaya? Sabwani abali aba attu ohiligana. Mbwenyi akala ninofwaseyela dhowobana dhawa ottiya mikalelo dhawa dhapama, mwebaribari ninakamihedha amwiddani. Na mukalelo gani? Amwiddani ehu anfuna wi iyo naganyedhe akala Yehova onolabihedha nikuru naye wi anivahe malago. Akala ninogilatela wang’ana dhovonya dha abali ansogorehela enele onittukulela wubuwela dhilobo dhohifwanyelela mwaha wa nikuru nehu, dhahene nirimeliwaga nikuluvelo ninehu na nikuru na Yehova. Txini enfwanyelihu okosa wila nizinddiyele vina nirabele dhottambi dhinloga amwiddani ehu?

KUWATTIYE ENA WOBANIHA OKULUVELA WAWO NIKURU NA YEHOVA

13. Txini enkosa amwiddani a Mulugu wi apigidhe nikuru na Yehova?

¹³ Asadduweli a Mulugu anokosa muli-mwetemwene wi dhilobo dhapama dha munikuruni na Yehova dhoniwege ninga dhabure. Motagiha, iyo ninosunza mBibiliani wi Yehova onojeedhela wi alabeli aye akale otxena mpaddi womaningoni, womuyani vina akane mweddelo wofwanyelela. Muttu onkosa yottega enddimuwa se otxinuwa, kanfwanyela okosa mpaddi wa mulogo. (1 Kor. 5:​11-13; 6:​9, 10) Vowila iyo ninowiwelela nlamulo ntti, amwiddani ehu anloga wi iyo kaninakwela attu, ninowattonga vina kaninatanala attu ali ottiyana na iyo.

14. Bani onita miselu dhottambi sabwa ya nikuru nehu?

¹⁴ Ononelemo bani onita dhottambi esi. Ddi Satana Ddiabo onvaviha miselu dhottambi mwaha wa nikuru nehu. Iyene ddi “niparha na wota.” (Jo. 8:44; Wita 3:​1-5) Nona  kanintikina Satana agalabihedha attu wi avavihe miselu dhottambi mwaha wa nikuru na Yehova. Jijuwene empadduweli Yezu vina Akristu oroma.

15. Yezu na anamafwara aye akoseliwe eni na asogorheli a marelijiau?

¹⁵ Yezu Mwana Mulugu wali muttu woligana vina ohikosa matikiniho menjene, masiki dhahene Satana ohalabihedha attu ena wi avavihe miselu dhottambi mwaha wa Yezu. Motagiha, asogorheli a marelijiau annawaddela attu wi Yezu wanttamagiha adomonyo modhela guru ya “munddimuwa wa muya dhabure.” (Mk. 3:22) Mudhidhi wattongiwa Yezu, asogorheli a relijiau ahimpwatteliha muladdu wa oveyiha nzina na Yehova vina ahitamela watujela attu wila akumbirhe wi Yezu apiwe. (Mt. 27:20) Musogorhomwa valaleya miselu dhapama anamafwara a Yezu, amwiddani awa “[ahatujela] amalabo wi àzugunuwele [Akristu].” (Mer. 14:​2, 19) Atapulelaga nlebo na Merelo 14:​2, A Sentinela wa 1 de Dezembro de 1998, ohiloga: “Attu amukamihedha Satana ahikodda ovuruwana miselu dhalaleya Akristu, ottiya ejo awene vina ahiloga miselu dhabure dhàttukulela attu ena okodda wavuruwana Akristu vina wawidda.”

16. Txini enfwanyelihu wubuwela nigewa miselu dhottambi sabwa ya nikuru na Yehova?

¹⁶ Mpaka ovanene Satana onodhowavi avavihaga miselu dhottambi “iyene onowakwekwettela mubureni attu otene.” (Ovuh. 12:9) Akala onowiwa miselu dhottambi sabwa ya nikuru nehu vina abali annisogorhela, koona mukalelo oweddihiwe Yezu vina anamafwara aye a nsaka zana noroma na amwiddani a mulugu. Dhahene ninga mwalogile  Bibilia attu agahifwara-fwara vina agahivuwiha miselu dhottambi mwaha wa nlogo na Mulugu. (Mt. 5:​11, 12) Iyo kaninarumele miselu esi dhottambi niganonelamo vandelani vina nigakosa muli mwetemwene wi nirabele miselu esi. Txini enfwanyelihu okosa wila nirabele miselu esi?

17. Txini enfwanyelihu okosa wi nirabele miselu dhottambi? (2 Timóteo 1:13) (Koona vina kasha “ Txini Enfwanyeliwe Okosa Ogewa Miselu Dhottambi?”)

¹⁷ Kufwaseyele miselu dhottambi. Murumiwi Paulo ohinaddela enfwanyelihu okosa nigewa miselu dhottambi. Iyene omwaddela Timóteo wi awaddele attu ena wila ahizuzumele miselu dhawota vina okodda miselu dhottambi. (1 Tim. 1:​3, 4; 4:7) Ebaribari wi mwana mung’ono onodhaga oddodda elobo vati beka mwano mbwenyi muttu munddimuwa txipo kagakosile ejuwene sabwani onoziwa yodhelavoya. Iyo ninorabela miselu esi dhottambi sabwani ninoziwa bani onita. iyo ninvuruwana bahi mazu opureleyamo a ebaribari.—Kengesa 2 Timóteo 1:13.

18. Ninalagihe dhavi wi ninokuluvela nikuru na Yehova?

¹⁸ Munsunzoni ntti iyo nonile mikalelo miraru bahi dhinoniha wi nikuru na Yehova ninomutagiha Yezu. Venevo vandhowiwe omusunzaga Bibilia kafwaseyela wona mikalelo dhinoniha wila nikuru na Yehova ninomutagiha Yezu. Kakamihedhe ena mmulogoni oriha vina okuluvela nikuru na Yehova. Vina kadhowagavi omulabelaga Yehova nororomeleya modhela okamihedha nikuru ninlabihedhiye wila akwanihe efunelo yaye. (Masal. 37:28) Iyo notene nivilibihedhe ovaha ttima gari enihu ya olaba mumodhani na abali okweleya vina oweddeyana.