ˈWƆN ˗GƆ 15
ˈˈTAN 124 ˗Kwa ˈto kwa ˗wo ˗ta
˗Kwa kwa ˗bha ˗zoyö Zoova ˗bha ˗kɔlokota ˗dhɛ ˗sü ˗gɛn ˗gban
«Ka ˗zʋ ˈya ˈdho bhɔ ˈmɛ [ . . . ] ˈwo zian bho ka ˈka bha˗ ˗nu ˈka.»—EBL. 13:7.
˗A ˗GƆ
ˈMën ˈkwa dho ˗a kë kö ˈkwa ꞊bhlëë ˗ya Zoova ˗bha ˗kɔlokota ˗bha, ˈkwa kwa ˗zoyö ˗a ˗dhɛ ˗kplawo?
1. ˗Zlan ˗dhɔkëmɛn ˗nu ˈwo kun ˗kwɛ këŋ do ˗blɛɛsü ˈgü bhë, ˗wo ˈwɔn ˗nu ˗kë ö ˗naan ˈka ˗kɔ ˗kë ꞊dhɛ?
ZOOVA yö dɔ ö ˗dhɔkëmɛn ˗nu ˗kɔ ˈka, ˈö˗ ˈˈpiʋ̈ kö ˗wa kë ö ˗naan ˈka. (1 Ko. 14:33) ˗A ˈwɔnzuan ˈnën ˗tɔ Zoova ˗ya ˈˈpiʋ̈ kö nɔɔn˗ ˗së ˗yö pö ˈˈkpɔnŋtaadhɛ ˗todhʋ̈sü ˈgü. (Mat. 24:14) Zoova ˗yö Yesu ˗ya yö ˈö bhë ˗a ˗gɔdhiʋ̈, ˈö Yesu ˗yö pë ˈˈpɛpɛ kë kö ˗yö kë ö ˗naan ˈka. ˗Kwɛ këŋ do ˗blɛɛsü ˈgü, ˗yö mɛn zii ˗nu ˗ya ˗zlanwokɔdhi ˗nu ˗gɔdhiʋ̈ kö ˗wo ˈˈdhiʋ̈sü ˗an ˈka. (Këw. 14:23) Mɛn zii ˗nu ˈwo kun bɔmɛn ˗nu ˈka, ˈö˗ mɛn ˈbha ˗nu kun mɛn ˗nu ˈö ˗wa kë zii ˗an ˈka ˗wo ˗kun Zedhizadhɛmö. ˗Wo ˈwɔn ˗nu ˗yökodhiʋ̈ ˗kë ˈö ˗zlanwokɔdhi ˈˈpɛpɛ ˗nu ˗wo wo ˗gɔ dho ˗an ˗dhɛ ˈˈshia. (Këw. 15:2; 16:4) ˈDhɛ ˗kë ˈˈdhʋ̈ ˈwɔn ˗së ˗nu ˈwo go ˗a ˈgü ˈwo ˗tɔ «˗dhɛkpaɔyi ˈsaadhö ˈka, mɛ ˗nu ˗wo ˗da ˗an ˗ta.»—Këw. 16:5, NTBL.
2. ˈÖ sü ˗kwɛ 1919 ˗bha, Zoova ˗yö ˈˈdhiʋ̈sü ö ˗bha ˈˈsɛgümɛn ˗nu ˈka ˗kɔ ˗kë ꞊dhɛ?
2 ꞊Dɛɛ, Zoova ˗yö ö ˗dhɔkëmɛn ˗nu ˗lokota ˗kɔ ˗kë ꞊dhɛ? ˈÖ sü ˗kwɛ 1919 ˗bha Yesu ˗yö mɛn kpö ˈdɛdɛ ˈö ˈwo ˈˈɲɔn ˗a ꞊troo ˗nu ˈka ˗an ˗lokota kö ˗wo ˈˈdhiʋ̈sü ˗zlanwopösü ˈka, ˗wo ˗zuu ˈgü ˗bhöpë nu ö ˗bha gwëëˈˈ ˗nu ˗dhɛ. a (Dhu. 12:42) ˈYaa za ˈgü ꞊dhɛ Zoova ˗yö ˈdhuëë˗ ˈkpɔ ˗ni ˈgü mɛn kpö ˈwo bhë ˗an ˗bha yö ˗bha.—Is. 60:22; 65:13, 14.
3-4. (1) ˈWɔnzuan do ˈö˗ ˗zɔn ꞊dhɛ ˈkwa kë baasü ˈka, ˗yö ˈwɔn ˗së ˗kë kwa ˗dhɛ ˗a ˗zɔn. (2) ˈMën ˈkwa dho ˗a yö ˈwɔn ˗gɔ yö ˗a ˈgü?
3 Kwa ˈti ˈwɔn ˗nu ˗mɔn ˈˈkwöö, kwa ˗kɔ ˈti ˗dho ˗mɔn yö ˈö Yesu ˗ya nu kwa ˗dhɛ bhë ˗a kë ˗sü ˗bha. (Mat. 28:19, 20) ˗A ˈwɔnzuan ˈnën ˗tɔ ˗ya kë ꞊dhɛ kwa ˈti ˈˈyasa ˗nu ˗ya ˈkö ˈkwa ˗zlanwopö mü ˗be, mɛn ˈö ˗dhö ˗yö ˗dho ˗zlanwopö ˈdhɛ ˗dhi ˗a ˗dhɛ ˗a ˗bha. Kwa ˗dho ˗zlanwopö ˗gɛnɲan ˈka ꞊va ˈˈyasa ˈbha ˗nu ˈgü, ˈö˗ ˈbha ˗nu ˈde ˈpö kwa ˈti ˗dho ˗zlanwopö mü toŋtoŋdhö. ˗Kɔ ˈˈwɛɛ ˈbha ˈö ˈkwa ˈwɔn ˗nu ˗mɔn ˈˈkwöö ˗a ˈka ˈzü, ka˗ dɔ ˗ee?
4 Kö Yesu ˗yö ꞊kun ˈˈsɛ ˗ta yö, ˗yö ö ˗bha gwëëˈˈ ˗nu ˗lokota. Pë do ˈö bhë ˈpö ˈyö˗ kë ˗ni ˈgü ꞊dhɛ ˗Zlan ˗dhɔkëmɛn ˗nu ˈka. ˈWɔn ˗gɔ ˈö yö ˗a ˈgü, ˈwɔnzuan ˈö Yesu ˗ya to kwa ˗dho ˗a ˗ga, kö ˗kɔ ˈö kwa ˗bha ˗kɔlokota ˗yö to ˗a ˈka ˗a ˈˈpiʋ̈ ˈkwa˗ yö. ˗Ya ˈgo mü, ˗kɔ ˈkwa dho ˗a ˗zɔn ˗a ˈka ꞊dhɛ Zoova ˗bha ˗kɔlokota ˗yö kwa ˗dhɛ ˗së kwa ˗dho ˗a yö.
KWA ˗BHA ˗KƆLOKOTA ˗YÖ ˗TO YESU ˗BHA ˈWƆNZUAN ˈˈPIƲ̈
5. ˗To Yesu ˗bha ˈwɔnzuan ˈˈpiʋ̈ ˗kɔ do ˈnën ˗tɔ ˗mën? (Zan 8:28)
5 Pë ˈö dho ˗a kë waa pë ˈö dho ˗a pö, Yesu ˗yö ˗an ˗draan ö Dë ˈˈpiʋ̈ dhaŋ˗ ˈgü. Zoova ˗bha ˗kɔlokota ˗yö ˗to Yesu ˗bha ˈwɔnzuan ˈˈpiʋ̈ ˈö bɔ Biblö ˗ta ˈö ˈˈdhiʋ̈sü kwa ˈka. (Zan 8:28 ˗wo pö; 2 Timote 3:16, 17) ˗Yo kwa ꞊faanmën ˗kplawo Biblö ˗wopösü waa˗ ˗ya ꞊bhlëë ˈgü ˗sü ˗bha. ˈWɔn ˗së ˗mɛɛn ˈkwa˗ ꞊slɔɔ ˗a ˈgü?
6. ˈWɔn ˗së ˈkpii˗ ˗mɛɛn ˈkwa˗ ꞊slɔɔ Biblö draansü ˈgü?
6 ˈKwa bɔ kwa ˗bha ˈsëëdhɛ ˗nu ˗ta ˈkwa Biblö draanˈˈ, ˗yö kwa ˗takun ꞊dedewo. Kwa ꞊mɔɔn˗ ˗bha ˈpö kö ˈkwa Biblö ˗bha ꞊klaŋwo ˗nu waa ˗dhioo ˗nu ˈö kwa ˗bha ˗kɔlokota ˗yö ˗an nu kwa ˗dhɛ bhë, ˗an dan ˈˈkwöö. ˈKwa˗ yö ꞊dhɛ ˗dhioo ˗nu ˈwo ˈˈdhʋ̈ ˗wo ˗gban ˗sü ˈka Biblö ˗ta, ˗yö kwa ˗bha ˗zoyö Zoova ˗bha ˗kɔlokota ˗dhɛ ˗sü ˗gɛn ˗gban.—Wlɔ. 12:2.
7. Nɔɔnwo ˗mɛɛn ˈö Yesu ˗ya pö? ˈYö Zoova ˗bha ˗kɔlokota ˗yö ˗to ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?
7 Yesu ˗yö «ˈwuntaɔsë ˈö ˗gban ˗Zlan ˗bha ˗Gblüdëdhɛ ˗bha» ˗a ˗pö. (Dhu. 4:43, 44, NTBL) Yesu ˗ya ˗pö ö ˗bha gwëëˈˈ ˗nu ˗dhɛ ˗wo ˗Gblüdëdhɛ nɔɔn˗ pö ˈpö. (Dhu. 9:1, 2; 10:8, 9) ꞊Dɛɛ mɛn ˈˈpɛpɛ ˈwo Zoova ˗bha ˗kɔlokota ˈgü ˗wo ˗Gblüdëdhɛ nɔɔn˗ ˗pö ˗dhɛ suu ˈˈoo ˗su ˈgü, ˈkö ˗kë ꞊dhɛ yö ꞊va ˗kë ˗an ˗kɔ ˗ta.
8. Yö ꞊bhlëësü ˗mɛɛn ˈö dɔ ˗sü ˈka kwa ˗kɔ ˈka?
8 ˗Zlan ˗bha ˗Gblüdëdhɛ ˗wɔn ˗blɛɛ mɛn ˈˈwɛɛ ˗nu ˗dhɛ ˗sü ˈö bhë, ꞊bhlëëwɔn ˗mü kwa ˗bha ˈka. Yö suu ˈö ˈˈdhʋ̈, ˈyaa dɔ ˗sü ˈka mɛn ꞊gban ˗kɔ ˈka. ˗A ˈwɔnzuan ˈnën ˗tɔ ˈdhɛ Yesu kun ˈˈsɛ ˗ta yö, ˗yö ˈti ˈˈwɩ ˗a ˗bha kö ˗zuu yaa ˗nu ˗wo ˈwɔn ˈö ˗gban ö ˗bha ˗a blɛɛˈˈ. (Dhu. 4:41) ꞊Dɛɛ ˈˈsanni mɛn ˈbha ˗yö ˗zlanwopö Zoova ˗dhɔkëmɛn ˗nu ˈˈpiʋ̈, ˗a ˗mɛn dua ˗mü kö ˗yö ö ˈˈtakɔ ˗bɛ Zoova ˗bha ˈˈtɔŋ˗ ˗nu ˗bha. Kwa˗ ˗zɔn ꞊dhɛ yö ˈö bhë ˗yö kwa ˗dhɛ ˗së ꞊dedewo ˈö ˈkwa ˗Zlan ˗bha ˗Gblüdëdhɛ ˗wɔn ꞊blɛɛ mɛn ˗nu ˗dhɛ ˗dhɛ ꞊gban ˈgü, ˈˈtʋ̈ŋ ˈˈpɛpɛ ˈka. Kwa˗ ˈˈpiʋ̈ kö ˈkwa˗ kë ꞊dhɛ Yesu ˈdhö, ˗a ˗wɔn ˈgü kwa kwa ˈgü ˗dɔ ˈˈgbɩɩ˗ ˈö ˈkwa ˗zlanwopö mɛn ˈˈwɛɛ ˗nu ˗dhɛ, ˈkwa ˗an ꞊klaŋkë gagade ˈka.—Mat. 13:3, 23; 1 Cor. 3:6.
9. Kwa ˗bha ˗kɔlokota ˗yö ˗Zlan ˈtɔ ˗zɔn mɛn ˗nu ˗dhɛ ˗kɔ ˗kë ꞊dhɛ?
9 Yesu ˗yö ˗Zlan ˈtɔ ˗zɔn mɛn ˗nu ˗dhɛ. Yesu ˗yö ˗bhɛɛ ö Dë ˗dhɛ, ˈö˗ pö: «ˈMa˗ kë ꞊wa ü dɔ.» (Zan 17:26, NTBL.) Zoova ˗bha ˗kɔlokota ˗yö ˗to Yesu ˗bha ˈwɔnzuan ˈˈpiʋ̈ ˈö pë ˈˈpɛpɛ ˗kë ˈkö mɛn ˗nu ˗wo ˗Zlan ˈtɔ dɔ. La Bible. Traduction du monde nouveau ˗yö ˗Zlan ˈtɔ ˗ya ö pinŋ˗ ˈgü. Biblö ˈö bhë ˗a ˗be ˗todhʋ̈sü ɛɛnˈˈ ˗a ˈˈpian do ˗yö ꞊dhiëëta ˗sü ˈka ˗wo ˈö ˗ʒiö 270 ˗ta ˗a ˈgü. ˗A ˈˈpian ˈö ˗kë Appendice A4 waa A5 ˈka bhë ˗a ˈgü, ˈpë ˗kë ˈö ˗Zlan ˈtɔ ˈdhö bɛnzë ˗sü ˈka mü waa ˗kɔ ˈwo˗ ˗kë ˗a ˈka ˗wa ˈgü ˗pʋ. Appendice C ˈö Bible d’étude ˈgü bhë ˗a ˈgü, ˈpë ˗kë ˈö ˗Zlan ˈtɔ ˈdhö ˗ya ˗sü ˈka ˗gɛnɲan ˈka 237 Biblö ˈˈpian ˗dhɛ ˈö Glɛkö ˗wo ˈgü bhë ˗a ˈgü, ˗ya ˗blɛɛ.
10. ˗Wo ˈö dhebɔ do ˈö Biimani ˈö˗ pö bhë, ˗gleŋ ˗mɛɛn ˈö˗ ˗da kwa ˗bha?
10 ꞊Dhɛ Yesu ˈdhö, kwa˗ ˈˈpiʋ̈ kö ˈkwa mɛn ꞊va ꞊dede ˗takun ˗wo ˗Zlan ˈtɔ dɔ. ˈDhɛ dhebɔ do ˈö˗ ˗kwɛ ˈdhö 67 ˈö Biimani ˈö˗ man ꞊dhɛ ˗Zlan ˈtɔ ˗yö ˗dhö, ˗yö ˈˈgbʋ ˗bɔ ˈö˗ pö: «˗Zlan ˈtɔ ˗bha ˗kë Zoova ˈka ˗sü ˈö bhë, n ˗man ˗a man ˗sü blɛɛsü ˗mü. ˈKa pë ˗wɔngbɩɩsü ꞊dede ˗zɔn n ˗dhɛ.» ꞊Dhɛ ˗kɔ ˈö ˈwɔnzuan ˈö bhë ˈö ˗zɔn ˗a ˈka ˗a ˈdhö, ˗Zlan ˈtɔ dɔ ˗sü ꞊mɔɔn˗ ˗bha ˈö pa zuʋ̈puumɛn ˗nu ˈka ꞊dedewo.
˗KWA KWA ˗BHA ˗ZOYÖ ZOOVA ˗BHA ˗KƆLOKOTA ˗DHƐ ˗SÜ ˗GƐN ˗GBAN ˗KPLAWO
11. Mɛn zii ˗nu ꞊mɔɔn˗ ˗bha kö ˗wa ˗zɔn ꞊dhɛ wo wo ˗zoyö Zoova ˗bha ˗kɔlokota ˗dhɛ ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)
11 ˗Kɔ ˗mɛɛn ˈö mɛn zii ˗nu ꞊mɔɔn˗ ˗bha kö ˗wa ˗zɔn ˗a ˈka ꞊dhɛ wo wo ˗zoyö Zoova ˗bha ˗kɔlokota ˗dhɛ? ˗Wa ˗dhioo ˗nu bɔ ˗an ˗dhɛ, ˗an dua ˗mü kö ˗wa ˗wo pö wo ˈsuaan˗ ˈka kö ˗wo wo ˈgü dɔ ˈˈgbɩɩ˗ ˗wa ˗ya ꞊bhlëë ˈgü. ˗A ˈwɔnzuan ˗nu ˈnën ˈwo ˗tɔ ˗dhioo ˗nu ˈwo ˗gban ˗bhɔkwëë kë ˗kɔ, bhɛɛsü ˈö ˗zlanwokɔdhi ˗bha ˈka waa ˗zokë Klito ˗bha ˗tuëë ˗nu ˈˈpiʋ̈ ˗sü ˗bha, ˗wo ˗an ˗slɔɔ. Mɛn zii ˗nu ˗wa ˗dhioo ˗nu ˈwo ˈˈdhʋ̈ ˗an ꞊gban ˗ya ꞊bhlëë ˈgü, kwa ꞊dhegblü ˗nu ˗wa ˗yö ꞊dhɛ wo ˗dhɔ ˗yö Zoova ˗kë ˈö ö ˗zokë wo ˈˈpiʋ̈.
Mɛn zii ˗nu ˗wo kwa ˗takun kö ˈkwa kwa ˗zoyö Zoova ˗bha ˗kɔlokota ˗bha ˈˈdhiʋ̈sü kwa ˈka ˗sü ˗dhɛ. (Kpɔɔˈˈ ˗wo ˗bhüöö kpö 11 ˈgü.) b
12. (1) ˈMën ˗kë ˈö kwa dua ˈdhö ˗mü kö ˈkwa ˈwɔnman ˈˈdhiʋ̈sü kwa ˈka ˗mɛn ˗nu ˗ta? (Eblö 13:7, 17) (2) ˈMën ˗kë ˈkwa dho kwa ˈˈɲan ˗klu dosɛnŋ ˈˈdhiʋ̈sü kwa ˈka ˗mɛn ˗nu ˗bha ˈˈklʋʋsë ˗nu ˗bha?
12 Mɛn zii ˗nu ˗wa ˗dhioo dɔ kwa ˗ta, kwa dua ˗mü kö ˈkwa ˈto mü ˈkwa˗ ˗ya ꞊bhlëë ˈgü kwa zuʋ̈ˈˈ ꞊gban ˈka. ˈKwa˗ kë ˈˈdhʋ̈, kwa ˗dho ˈˈdhiʋ̈sü kwa ˈka ˗mɛn ˗nu ˈwo bhë ˗an ˗bha yö kë ˈˈplëëplë. Biblö ˗ya ˗pö ꞊dhɛ ˈkwa kwa ˗gɔ ˈdho mɛn ˗nu ˈwo ˈˈdhiʋ̈sü kwa ˈka ˗an ˗dhɛ ˈˈshia. (Eblö 13:7, 17 ˗wo pö.) ˈˈTʋ̈ŋ ˈbha ˗nu ˈka, ˗a ˗kë ˈˈdhʋ̈ ˗sü ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. ˈMën ˗kë? ˈYö ˗tɔ ꞊dhɛ ˈwɔn yaa kë ˗dhii ˗yö ˗an ˗bha. ˈDhɛ ˈˈdhʋ̈ ˈkwa kwa ˈˈɲan ˗klu ˗an zaadhɛ ˗nu ˗bha, kwa ˈti kwa ˈˈɲan ˗klu ꞊ʒiaan ˗an ˗bha ˈˈklʋʋsë ˗nu ˗bha, ˗yö ˗dho kë ꞊dhɛ ˈpë ˈkwa kwa ˈyɔɔ˗ ˗nu ˗takun ˗ni ˈgü ˗a ˈdhö. ˗Kɔ ˗kë ꞊dhɛ? Kwa ˈyɔɔ˗ ˗nu ˗wa ˈˈpiʋ̈ kö ˈkwa dɔ ˈdudhö ꞊dhɛ ˗Zlan ˗yö ˗bɔ ö ˗bha ˗kɔlokota ˗ta ˈö ˈˈdhiʋ̈sü kwa ˈka. Mɛn zii ˗nu yö ˗kɔ ˗së ˈti kë kwa ˗gɔ, kwa ˈti ˗dho ˈdhaŋ˗ bho Zoova ˗bha ˗kɔlokota ˈˈdhiʋ̈. ˈMën ˈkwa dho ˗a kë kö ˈkwa kwa ˈyɔɔ˗ ˗nu ˗bha ꞊sua ˗nu dɔ, ˈkwa ˈˈkan ˗an ˗bha.
ˈMËN ˈKWA DHO ˗A KË KÖ MƐN ˗NU ˈWA ˗DHO KWA ˗BHA ˗ZOYÖ ˗KƆLOKOTA ˗DHƐ ˗SÜ SHIƲ̈ˈˈ?
13. ˗Kɔ ˗mɛɛn ˈö ˗Zlan ˈyɔɔ˗ ˗nu ˗wa ˗bha ˗kɔlokota ˗wɔn yaa ꞊blɛɛ ˗a ˈka?
13 ˗Gban ˗Zlan ˗gɔ ˗mɛn ˗nu ˗wa ˈˈpiʋ̈ kö ˈwɔn ˗së ˗nu ˈwo ˗gban Zoova ˗bha ˗kɔlokota ˗bha bhë ˈkwa ˗an sü ꞊dhɛ pë yaa ˗nu ˈdhö. Zoova ˗ya ˈˈpiʋ̈ kö ö ˗dhɔkëmɛn ˗nu ˗wo kë ˈˈslʋ̈ʋ̈slʋ̈ wo kwibhadhɛ, wo ˈˈtakɔ waa wo ˗bha ˗Zlan ˗dhɔkë ˗kɔ ˈgü. ˗Ya ˗pö ˈzu ꞊dhɛ mɛn ˈö ˗dhiiwɔn ˗kë ˗yö ˈti ö ꞊kwaa˗ ˗zü, ˗wa bho kwa kpö ˈgü. (1 Ko. 5:11-13; 6:9, 10) Kwa ˗Zlan ˗bha ˈtɔŋ˗ ˈö bhë ˗a ˗ya ꞊bhlëë ˈgü. ˗A ˗wɔn ˈgü, ˗gban kwa ˗gɔ ˗mɛn ˗nu ˗wa ˗pö ꞊dhɛ mɛn ˗nu ˗dhɔ ˈyaa kwa kë, kwa ˗zadɔ ˗an ˗bha, ˈö ˈkwaa ˗an ˗bhawɔn ˈto.
14. De ˈö mɛn ˗nu ˗blü kö ˗wo ꞊suawɔn blɛɛˈˈ Zoova ˗bha ˗kɔlokota ˗bha?
14 Mɛn ˗nu ˈwo nu kwa ˗gɔ, kwa ˗an dɔ. Sɔtraan Dügɔmɛn ˈnën mɛn ˗nu ˗blü kö ˗wo ꞊suawɔn blɛɛˈˈ Zoova ˗bha ˗kɔlokota ˗bha. ˗A ˗gɛn ˗mü ꞊dhɛ yö ˈnën «꞊sua dë ˈka.» (Zan 8:44, NTBL; ˈWun. 3:1-5) ˗Yö kë kwa ˈˈɲaan ꞊dhɛ Sɔtraan ˗dho bɔ ö ˗bha mɛn ˗nu ˗ta kö ˗wo ꞊suawɔn ˗nu ˗pɛn Zoova ˗bha ˗kɔlokota ˗bha. Pë do ˈö bhë ˈnën kun ˗a kë ˗ni ˈgü ˗kwɛ këŋ do ˗blɛɛsü ˈgü.
15. ˈMën ˗zlanwo ˗gɔdhiʋ̈mɛn ˗nu ˗wa ˗kë Yesu waa ö ˗bha gwëëˈˈ ˗nu ˗an ˈka?
15 ˈKö ˗kë ꞊dhɛ ˗Zlan Gbö Yesu ˈö kun ˈˈslʋ̈ʋ̈slʋ̈ bhë ˗yö ˗dhiidha ꞊va ˗kë, Sɔtraan ˗yö mɛn ˗nu ˗blü kö ˗wo ꞊suawɔn blɛɛˈˈ ˗a ˗bha. ˗A ˈwɔnzuan do ˈnën ˗tɔ ˗zlanwo ˗gɔdhiʋ̈mɛn ˗nu ˗kun ˗a pö ˗ni ˈgü ꞊dhɛ Yesu ˗yö «ˈˈyina yaa ˗nu ˗kë ˗a ˗nu ˗gɔmɛ [ . . . ] faan ˈka.» (Mak. 3:22) ˗Wo ˗go mü ˈzü ˈwo ꞊suawɔn dɔ ˗a ˗bha ꞊dhɛ ˗ya ˗Zlan ꞊bhlëë ˗shiʋ̈. ˗A ˗wɔn ˈgü, ˈwo mɛn ˗nu ˗blü kö ˗wa zë. (Mat. 27:20) ꞊Taabha ˈdhɛ Yesu ˗bha gwëëˈˈ ˗nu kun nɔɔn˗ ˗së pö ˗ni ˈgü, ˗gban ˗an ˗gɔ ˗mɛn ˗nu ‹˗wo mɛn ˗nu ˗blü kö ˗wo ˗zʋ ˈgɔn ˗kɔ yaa kë ˗an ˗wɔn ˈgü,› ˗wo ˗an klʋʋbhɔ. (Këw. 14:2, 19) ˈˈGlaadhiʋ̈ ˗tɔn ˈö kun ˗kwɛ 1998 Desanblö 1 ˈgü ˗yö ˗gban Këwɔn ˗nu 14:2 ˗ta ˈö˗ pö: «Nɔɔn˗ ˗së ˈö Yesu ˗bha gwëëˈˈ ˗nu kun ˗a pö ˗ni ˈgü ˈˈdhʋ̈, Zuifö ˗nu ˈwo kun ˗gban ˗an ˗gɔ ˗mɛn ˗nu ˈka bhë ˗wo ˗kɔ ˗a ˈka, ˈwo˗ pö mɛn ˗nu ꞊dhɛ ˈwa ˗dho ˈˈwɩ ˗a ˗bha. ˗Wo ˗go mü ˈzü ˈwo kletiɛn ˗nu ˗wɔn yaa ꞊blɛɛ mɛn ˗nu ˗dhɛ.»
16. ˗Wa ꞊suawɔn blɛɛˈˈ kwa ˗bha ˗kɔlokota ˗bha, ˈmën kwa ˗zo ˈti ˗dho bhɔ ˗a ˈka?
16 Sɔtraan ꞊kun ꞊suakë ˗ni ˈgü ˗kplawo ꞊dɛɛ. ˗Yö «ˈˈkpënng˗ ˗kë ˈˈkpʋngtaadhɛ ˗todhʋ̈sü ˗gɔ.» (˗Dhɛ. 12:9) ˈWɔn yaa ˗nu ˈwo ˗an blɛɛˈˈ ˗ni ˈgü Zoova ˗bha ˗kɔlokota ɛɛnˈˈ kwa ꞊dhegblü ˗nu ˈwo ˈˈdhiʋ̈sü ˗ni ˈgü kwa ˈka ˗an ˗bha bhë ˈkwa ˗an man, kwa ˗zo ˈya ˗dho bhɔ ˗kɔ ˈö ˗Zlan ˈyɔɔ˗ ˗nu ˗wo ˈwɔn ˗wɔ ˗a ˈka Yesu waa ö ˗bha gwëëˈˈ ˗nu ˗an ˗ta ˗a ˈka. ꞊Dɛɛ, ˗wo Zoova ˗dhɔkëmɛn ˗nu ˈˈklʋʋbhɔ ˗ni ˈgü ꞊dhɛ ˗kɔ ꞊dede ˈö Biblö ˗ya to ˗a ˈka ˈˈdhiʋ̈ ˈö˗ ꞊blɛɛ, ˗a ˈdhö. (Mat. 5:11, 12) ꞊Suawɔn ˗nu ˈwo blɛɛˈˈ ˗ni ˈgü Zoova ˗bha ˗kɔlokota ˗bha ˈkwa ˗an ˈgodhɛ dɔ, ˈkwa ˈto mü ˈkwa kwa ˗de ˗takpa ˗an ˗gɔ ˈwi ˗dho kwa ˗gɔ bho ʒian. ˗Kɔ ˗kë ꞊dhɛ?
17. ˈMën ˈkwa dho ˗a kë kö ꞊suawɔn ˗nu ˈwa ˗dho ˈwɔn yaa kë kwa ˈka? (2 Timote 1:13) (Kpɔɔˈˈ ˈkɔnën « ˈKwa ꞊suawɔn ˗nu man, ˈmën ˈkwa dho ˗a kë?» ˗bha.)
17 ˗Kwa kwa ˈˈtʋ bho ꞊suawɔn ˗nu ˈˈpiʋ̈. ˈKwa ꞊suawɔn ˗nu man, ˈpë ˈkwa dho ˗a kë bɔmɛn Pɔdhö ˗ya ˗zɔn kwa ˗dhɛ ˈˈpuu ˈka. Pɔdhö ˗ya ˗pö Timote ˗dhɛ ꞊dhɛ «˗yö ˗dhio dɔ mɛ ˈwo bha wo ꞊në˗ ˗nu ˗ta kö ˈwɔn ˈö ˗gban ˗kwɛzlan [꞊suasü ˗nu] bho ˗sü [ . . . ] bha ˗wo wo kwaa˗ ˗zü.» (1 Tim. 1:3, 4; 4:7) ˈNën ˈˈpuu ꞊mɔɔn˗ ˗bha ˈö pë sü ˈˈshia˗ ˈö˗ ˗da ö ˈˈdhi, ˈˈkɛɛ mɛn ˈö˗ zo ˗ya ˗gban ˈyaa ꞊mɔɔn˗ ˗bha kö ˗ya kë ˈˈdhʋ̈, ˈyö sü ꞊dhɛ ˈwɔn yaa ˈö˗ ˗kë ˈˈdhʋ̈ ˗sü ˈgü ˗ya ˗dɔ. Kwa kwa ˈˈtʋ bho ꞊suawɔn ˗nu ˈˈpiʋ̈ ˈyö sü ꞊dhɛ kwa ˗an ˈgodhɛ ˗dɔ. ˈPë ˈkwa˗ ˈˈpiʋ̈ ꞊ʒiaan ˈyö ˗tɔ ˈkwa kwa ˈˈtʋ ˈto «tɛanwɔn ˗nu» ˗bha.—2 Timote 1:13 ˗wo pö.
18. ˈMën ˈkwa dho ˗a kë kö ˈkwa˗ ˗zɔn ꞊dhɛ kwa ˈdhaŋ˗ ˗bho ꞊dedewo Zoova ˗bha ˗kɔlokota ˈˈdhiʋ̈?
18 ˗Kɔ ˈö Zoova ˗bha ˗kɔlokota ˗yö to ˗a ˈka Yesu ˗bha ˈwɔnzuan ˈˈpiʋ̈, ˈkwa˗ ˗yaaga yö. Ka Biblö draanˈˈ ˗ni ˈgü, ˗kɔ ˈö˗ ˗kë ˗a ˈka ˈˈdhʋ̈ ˗kaa ˈbha ˗nu ˈsuan˗ bho. ˗Kwa mɛn ˗nu ˗takun kwa ˗bha ˗zlanwokɔdhi ˈgü kö ˗wo wo ˗bha ˗zoyö Zoova ˗bha ˗kɔlokota ˗dhɛ ˗sü ˗gɛn ˗gban. Kwa kwa ˗bha ˗zoyö Zoova ˗bha ˗kɔlokota ˗dhɛ ˗sü ˗gɛn ˗gban ˗klu Zoova ˗bha ˗sü ˈka. ˗Ya ˈgo mü, kwa ˗klu ˗kɔlokota ˈö bɔ ˗ni ˈgü ˗a ˗ta kö ˈö ö dhɔɔbhawɔn kë bhë, ˗a ˗bha. (Ps. 37:28) Kwa ˗bha ˗kë Zoova ˗dhɔkëmɛn ˗nu ˈwo ˗klu ˗a ˗bha ˗an ˈˈpiʋ̈ ˗sü ˈö bhë, kwa˗ ˈˈnuɛ ˗bho ˗a ˗wɔn ˈgü ꞊dedewo.
Ü ˗DHO ˗A ˗YƆ BƆ ˗KƆ ˗KË ꞊DHƐ?
-
˗Zlan ˗dhɔkëmɛn ˗nu ˗wo ˗to Yesu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?
-
ˈMën ˈkwa dho ˗a kë kö ˈkwa˗ ˗zɔn ˗kplawo ꞊dhɛ kwa ˈdhaŋ˗ ˗bho Zoova ˗bha ˗kɔlokota ˈˈdhiʋ̈?
-
ˈKwa ꞊suawɔn ˗nu ˈwo ˗gban Zoova ˗bha ˗kɔlokota ˗bha ˗an man, ˈmën ˈkwa dho ˗a kë?
ˈˈTAN 103 Kwa ˗maankëmɛn ˗nu ˈö ˗Zlan ˗yö ˗an nu kwa ˗dhɛ
a Kpɔɔˈˈ ˈkɔnën « Pourquoi 1919? » ˈsëëdhɛ ˗be Le culte pur de Jéhovah—Enfin restauré, ˈˈpian 102-103 ˈgü.
b PË ˈˈBIN ˈKLƆƆ˗: Mɛn zii ˗nu ˗wo ˗zlanwopö gɔnën ˈka ˗kɔ ˗yökodhiʋ̈ kë ˗ni ˈgü. ˈˈDhiʋ̈sü ˗zlanwopömɛn kpö ˈka ˗mɛn do ˗ya pö ˗ni ˈgü kwa ꞊dhegblü ˗nu ˗dhɛ ˗wo wo ˗ta yö ˈkɔ ˈˈbhaŋ ˗bha.
