1. Nna ebɛn kwan do na wɔahyehyɛ Jehovah n’asomfo wɔ asomafo no hɔn aber do?

 ABER biara a Jehovah dze dwumadzi bɛhyɛ n’asomfo hɔn nsa no, ɔnnhwɛ kwan dɛ wɔbɛyɛ no biarabiara, mbom no ɔpɛ dɛ wɔdze nhyehyɛɛ pa yɛ. (1 Cor. 14:33) Dɛ nhwɛdo no, Nyankopɔn pɛ dɛ yɛka asɛmpa no wɔ wiadze nyina. (Matt. 24:14) Jehovah dze ahyɛ Jesus ne nsa dɛ ɔnhwɛ dɛm edwuma no do. Jesus so reyɛ dza obotum biara dɛ ɔbɛma biribiara akɔ do pɛpɛɛpɛ. Asomafo no hɔn aber do no, wɔtsetseew asafo ahorow wɔ mbea pii, na woyiyii mpanyimfo a nna wobedzi asafo no enyim na wɔdze akwankyerɛ ama. (Andw. 14:23) Tsetse Christianfo no hɔn aber do no, nna asomafo no nye mpanyimfo bi wɔ Jerusalem a wosisi gyinae ma asafo ahorow no, na wɔhwɛ kwan dɛ wɔdze gyinaesi no bɛyɛ edwuma. (Andw. 15:2; 16:4) Enuanom no tsiee akwankyerɛ a wɔdze maa hɔn no, dɛm ntsi ‘asafo ahorow no yɛɛ dzen wɔ gyedzi no mu, na hɔn dodow yɛɛ kɛse.’—Andw. 16:5.

2. Ofitsi afe 1919 reba no, ebɛn kwan na Jehovah afa do ama n’asomfo akwankyerɛ na ɔaboa hɔn ma wɔnye ne ntamu anyɛnkofa no mu ayɛ dzen?

² Jehovah da ho ara dze nhyehyɛɛ gu akwan mu a ɔnam do kyerɛ n’asomfo kwan ndɛ. Ofitsi 1919 reba no, Jehovah nam Jesus do dze mbarimba kakraabi a wɔasera hɔn no ridzi dwuma mbrɛ ɔbɛyɛ a wɔbɛyɛ asɛnka edwuma no ho nhyehyɛɛ, na wɔdze nkyerɛkyerɛ a Jesus n’ekyirdzifo behia ama wɔaakɔ do asom Jehovah no ma hɔn. a (Luke 12:42) Biribiara ma yehu dɛ Jehovah rihyira edwuma a dɛm mbarimba yi reyɛ no do.—Isa. 60:22; 65:​13, 14.

3-4. (a) Ma nhwɛdo a ɔma yehu dɛ sɛ yɛdze nhyehyɛɛ pa yɛ edwuma a, ɔboa paa. (b) Ebɛnadze na yebosusu ho wɔ adzesua yi mu?

 ³ Sɛ yennyi nhyehyɛɛ papa biara a yɛdze yɛ edwuma a Jesus dze ahyɛ hɛn nsa no a, nkyɛ yerunntum nnyɛ. (Matt. 28:​19, 20) Dɛ nhwɛdo no, yɛmfa no dɛ asafo biara nnyi asaasesin a ɔsɛ dɛ ɔyɛ mu edwuma; obiara soɛr a nna ɔakɛka asɛm no wɔ beebiara a ɔpɛ. Ehwɛ a, nkyɛ ebɛn asɛm besi? Asaasesin no bi wɔ hɔ a, nkyɛ yɛbɛyɛ mu edwuma abor do, na bi so wɔ hɔ a, bi a nkyɛ yɛrennyɛ mu edwuma koraa. Woara so botum adwendwen mfaso afofor a yenya wɔ nhyehyɛɛ pa a yɛdze yɛ edwuma no ho.

⁴ Aber a Jesus wɔ asaase do no, nhyehyɛɛ pa a ɔdze guu akwan mu maa n’ekyirdzifo no, dɛmara na ɔyɛ no ndɛ so. Adzesua yi mu no, yebosusu nhwɛdo a Jesus yɛe no ho, na yaahwɛ mbrɛ hɛn ahyehyɛdze yi dzi dɛm nhwɛdo no ekyir. Afei so, yɛbɔhwɛ ndzɛmba a yebotum ayɛ dze akyerɛ dɛ hɛn enyi sɔ Jehovah n’ahyehyɛdze no.

HƐN AHYEHYƐDZE NO DZI JESUS NO NHWƐDO EKYIR

5. Kwan kor a yɛfa do suasua Jesus no nhwɛdo nye dɛn? (John 8:28)

⁵ Dza Jesus yɛe nye nsɛm a ɔkae no, osuae fii no sor Egya no hɔ. Jehovah n’ahyehyɛdze no so suasua Jesus no nhwɛdo no, dɛm ntsi wɔdze dza wɔkyerɛkyerɛ hɛn no nyina gyina Nyankopɔn n’Asɛm do na ɔma yehu dza Jehovah pɛ nye dza ɔmmpɛ. Afei so, wɔdze akwankyerɛ biara a wɔdze ma hɛn no gyina Bible no do. (Kenkan John 8:28; 2 Tim. 3:​16, 17) Da biara da, wɔtwe hɛn adwen si Nyankopɔn n’Asɛm a yɛdze bɔbɔ hɛn bra no do. Sɛ yetsie dɛm afotu yi a, ebɛn kwan do na ɔboa hɛn?

6. Sɛ yesua Bible no a, mfaso a yenya no bi nye dɛn?

⁶ Sɛ yɛdze asafo nwoma ahorow sua Bible no a, yenya do mfaso paa. Dɛ nhwɛdo no, yetum dze akwankyerɛ a yenya fi Jehovah n’ahyehyɛdze no hɔ no toto dza Bible no kyerɛkyerɛ no ho. Sɛ yehu dɛ akwankyerɛ a wɔdze ma hɛn no gyina Kyerɛwnsɛm no do a, ɔma ahotodo a yɛwɔ wɔ Jehovah n’ahyehyɛdze no mu no yɛ kɛse.—Rom. 12:2.

7. Ebɛnadze na Jesus kaa ho asɛm, na ebɛn kwan do na hɔn a wɔwɔ Jehovah n’ahyehyɛdze no mu no suasua dza Jesus yɛe no?

⁷ Jesus kaa ‘Nyankopɔn n’Ahendzi no ho asɛmpa.’ (Luke 4:​43, 44) Afei so, ɔkaa kyerɛɛ n’ekyirdzifo no dɛ wɔnka Ahendzi no ho asɛm nkyerɛ nkorɔfo. (Luke 9:​1, 2; 10:​8, 9) Ndɛ so, hɔn a wɔwɔ Jehovah n’ahyehyɛdze no mu no nyina ka Ahendzi no ho asɛm kyerɛ nkorɔfo, ɔmmfa ho beebi a wɔtse anaa dwumadzi biara a ɔhyehyɛ hɔn nsa wɔ ahyehyɛdze no mu no.

8. Ebɛn hokwan kɛse na yɛwɔ?

⁸ Ɔyɛ hokwan kɛse paa na yeenya dɛ yɛreka Nyankopɔn n’Ahendzi no ho asɛmpa akyerɛ afofor. Ɔnnyɛ obiara na ɔwɔ hokwan a ɔtse dɛm. Sɛ yɛbɛyɛ nhwɛdo a, aber a Jesus wɔ asaase do no, ɔamma kwan ma mbɔnsam enndzi no ho dase. (Luke 4:41) Ndɛ so, ansaana obi botum abɛka Jehovah n’asomfo ho ma wɔaaka asɛmpa no, ɔsɛ dɛ ɔbɔ bra a ɔsɔ Jehovah n’enyi. Sɛ yɛdze hokwan biara a yenya no ka asɛmpa no wɔ beebiara a yɛwɔ no dze dzi nkorɔfo dase a, nna yɛrekyerɛ dɛ hɛn enyi sɔ hokwan a Jehovah dze ama hɛn no. Dɛ mbrɛ Jesus yɛe no, hɛn so, hɛn botae nye dɛ yebodua Ahendzi aba no wɔ nkorɔfo hɔn akoma mu na yeegugu do nsu.—Matt. 13:​3, 23; 1 Cor. 3:6.

9. Ebɛn kwan na Jehovah n’ahyehyɛdze no fa do ma nkorɔfo hu Nyankopɔn ne dzin?

⁹ Jesus maa nkorɔfo hun Nyankopɔn ne dzin. Mpaa bi a Jesus bɔe mu no, ɔkaa kyerɛɛ no sor Egya no dɛ: “Miyii wo dzin kyerɛɛ hɔn.” (John 17:26) Jehovah n’ahyehyɛdze no suasua Jesus no nhwɛdo yi. Iyi ntsi wɔyɛ dza wobotum biara dɛ wɔbɛma nkorɔfo ehu Nyankopɔn ne dzin. Kwan kor a wɔfa do yɛ dɛm nye dɛ, beebi a nna ɔsɛ dɛ Nyankopɔn ne dzin no hyɛ no, wɔdze ahyehyɛ hɔ wɔ New World Translation of the Holy  Scriptures no mu. Yɛrekasa yi, wɔakyerɛ dɛm Bible yi anaa ne fa bi ase akɔ kasa bɔbor 270 mu. Sɛ ehwɛ Nkekaho A4 na A5 a ɔwɔ dɛm Bible yi mu no a, ibohu siantsir a wɔdze Nyankopɔn ne dzin no ahyehyɛ beebi a ɔwɔ dɛ ɔhyehyɛ nye kwan a wɔfaa do yɛɛ dɛm no ho nsɛm pii. Afei so, dase a ɔkyerɛ dɛ ɔsɛ dɛ Nyankopɔn ne dzin no pue mpɛn 237 wɔ Christianfo Greek Kyerɛwnsɛm no mu no, ibohu ho nkyerɛkyerɛmu pii wɔ Nkekaho A5 no mu.

10. Ebɛn adze na isua fi asɛm a maame bi a ofi Myanmar kae no mu?

¹⁰ Dɛ mbrɛ Jesus yɛe no, yɛpɛ dɛ yɛboa nyimpa dodow biara a yebotum ma wobohu Nyankopɔn ne dzin no. Aber a maame bi a oedzi mfe 67 a ɔwɔ Myanmar bohun dɛ Nyankopɔn wɔ dzin no, osui na ɔkaa dɛ: “Ndɛ nye ber a odzi kan wɔ m’asetsena mu a matse dɛ Nyankopɔn ne dzin dze Jehovah. . . . Akyerɛ me biribi a no ho hia sen biara.” Maame yi n’asɛm yi ma yehu dɛ, sɛ nyimpa akomapafo bohu Nyankopɔn ne dzin no a, otum sesa hɔn abrabɔ.

KƆ DO KYERƐ JEHOVAH N’AHYEHYƐDZE NO HO ENYISƆ

11. Ebɛnadze na asafo mu mpanyimfo botum ayɛ dze akyerɛ dɛ hɔn enyi sɔ Jehovah n’ahyehyɛdze no? (Hwɛ mfonyin no so.)

¹¹ Ebɛnadze na asafo mu mpanyimfo botum ayɛ dze akyerɛ dɛ hɔn enyi sɔ Nyankopɔn n’ahyehyɛdze no? Sɛ wɔdze akwankyerɛ bi ba a, ɔsɛ dɛ asafo mu mpanyimfo to hɔn bo ase kenkan no yie na wɔyɛ dza wobotum biara dze akwankyerɛ no yɛ edwuma. Dɛ nhwɛdo no, wɔma hɔn akwankyerɛ a ɔfa mbrɛ wobesi ayɛ hɔn dwumadzi wɔ adzesua ase, nye mbrɛ wobesi abɔ mpaa ama asafo no ho. Afei so, hɔn nsa ka akwankyerɛ a ɔma wohu mbrɛ wobesi ahwɛ Christ no nguan no. Sɛ asafo mu mpanyimfo dze akwankyerɛ a ahyehyɛdze no dze ma hɔn no yɛ edwuma a, ɔma enuanom hu dɛ Jehovah dɔ hɔn na ɔdwen hɔn ho.

12. (a) Ebɛnadze ntsi na ɔsɛ dɛ yɛbrɛ hɛnho adze ma asafo mu mpanyimfo? (Hebrewfo 13:​7, 17) (b) Ebɛnadze ntsi na ɔsɛ dɛ yɛdze hɛn adwen si suban pa a asafo mu mpanyimfo wɔ no do?

¹² Sɛ asafo mu mpanyimfo dze akwankyerɛ bi ma hɛn a, ɔsɛ dɛ yefi hɛn akoma mu dze yɛ edwuma. Sɛ yɛyɛ dɛm a, ɔremma hɔn edwuma no nnyɛ dzen mma hɔn. Bible no tu hɛn fo dɛ yentsie hɔn a wodzi ndzɛmba enyim no na yɛmbrɛ hɛnho adze mma hɔn. (Kenkan Hebrewfo 13:​7, 17.) Naaso ɔtɔ da a, iyi ne yɛ nnda famu. Ebɛnadze ntsi a? Osiandɛ dɛm mbarimba yi yɛ nyimpa a bɔn wɔ hɔn ho. Ntsi sɛ yɛdze hɛn adwen si hɔn mberɛwyɛ do kyɛn suban pa a wɔwɔ no a, obowie ase no nna yɛroboa hɛn atamfo mbom. Ebɛnadze ntsi na yɛreka dɛm? Siantsir nye dɛ, hɛn atamfo pɛ dɛ hɛn adwen mu yɛ hɛn konsee wɔ ahyehyɛdze a Nyankopɔn nam do rekyerɛ hɛn kwan no ho. Dɛm ntsi, sɛ yɛdze hɛn adwen si dza asafo mu mpanyimfo mmbɔ mu mbɔdzen no do a, ɔremma yennya ahyehyɛdze no so ho adwen pa. Sɛ ɔba no dɛm a, yerinnya mu ahotodo bio. Yebesi dɛn ehu atorsɛm a hɛn atamfo keka no na yaatwe hɛnho efi ho?

MMA OBIARA NNDAADAA WO MA NNGYAA JEHOVAH N’AHYEHYƐDZE NO EKYIR DZI

13. Ebɛn kwan na Nyankopɔn n’atamfo fa do sɛɛ n’ahyehyɛdze no dzin?

¹³ Nyankopɔn n’atamfo bɔ mbɔdzen dɛ wɔbɛka atorsɛm afa ndzɛmba pa a n’ahyehyɛdze no yɛ no ho. Dɛ nhwɛdo no, Kyerɛwnsɛm no ama yeehu dɛ Jehovah pɛ dɛ n’asomfo nyinara dzi hɔnho nyi, wɔbɔ bra pa na wɔsom no wɔ kwan a ɔgye to mu no do. Afei so, Jehovah aka dɛ obiara a ɔkɔ do yɛ ndzɛmba bɔn na onnu noho no, ɔsɛ dɛ wotu no fi asafo no mu. (1 Cor. 5:​11-13; 6:​9, 10) Yɛdze Bible mu ahyɛdze yi yɛ edwuma. Osian iyi ntsi, hɔn a wɔtan hɛn no ka dɛ yɛmmpɛ nyimpa, yebu nkorɔfo atsɛn, na hɛn tsirmu so yɛ dzen.

14. Atorsɛm a wɔkeka fa Jehovah n’ahyehyɛdze no ho no, woana na ɔhyɛ ekyir?

 ¹⁴ Hu obi a ɔhyɛ atorsɛm no ekyir. Atorsɛm a wɔka fa Nyankopɔn n’ahyehyɛdze no ho nyina, Satan Abɔnsam na ɔhyɛ ekyir. Bible no ka dɛ ɔno nye ‘atofosɛm egya.’ (John 8:44; Gen. 3:​1-5) Dɛm ntsi ɔsɛ dɛ yɛhwɛ kwan dɛ Satan bɛfa n’ekyirtaafo do akeka atorsɛm afa Jehovah n’ahyehyɛdze no ho. Dɛm asɛm yi bi sii wɔ Jesus nye asomafo no hɔn aber do.

15. Ebɛnadze na nyamesom mpanyimfo no dze yɛɛ Jesus nye n’ekyirdzifo no?

¹⁵ Ɔmmfa ho dɛ nna Jesus yɛ Nyankopɔn ne Ba a bɔn biara nnyi no ho, na ɔyɛɛ anwanwadze akɛseakɛse mpo no, Satan maa nkorɔfo kekaa atorsɛm pii faa no ho. Dɛ nhwɛdo no, nyamesom mpanyimfo no kaa kyerɛɛ nkorɔfo dɛ Jesus nam “mbɔnsam hɔn panyin” do na otu mbɔnsam. (Mark 3:22) Aber a woridzi n’asɛm no, nyamesom mpanyimfo no bɔɔ no sombo dɛ ɔaka ebususɛm, na wotutui guu nyimpadodow no asomu dɛ wɔmma wonku no. (Matt. 27:20) Ekyir yi, aber a Christianfo no reka asɛmpa no, hɔn atamfo ‘kenyaan amanamamfo no, na wɔmaa wonyaa Christianfo no ho adwembɔn’ na wɔsoɛree tsiaa hɔn dzendzenndzen. (Andw. 14:​2, 19) December 1, 1998 Ɔweɔn-Aban no kyerɛkyerɛɛ Asomafo Ndwuma 14:2 no mu dɛ: “Aber a Jewfo asoɛrtsiafo no poow asɛm no, wɔamma annso hɔ ara, mbom no wɔhyɛɛ ase sɛɛ Christianfo no hɔn dzin, na wɔbɔɔ mbɔdzen dɛ wɔbɛma Amanamamfo no so enya Christianfo no ho adwembɔn.”

16. Sɛ yɛtse atorsɛm bi a, ebɛnadze na ɔsɛ dɛ yɛkaa?

¹⁶ Satan nngyaa atorsɛm keka. Ndɛ na ndɛ nyina, ɔda ho ara ‘redaadaa wiadze nyina.’ (Nyi. 12:9) Ntsi sɛ etse dɛ nkorɔfo rekeka atorsɛm fa Jehovah n’ahyehyɛdze na mbarimba a wodzi ndzɛmba enyim no ho a, ɔyɛ a kaa dɛ Nyankopɔn n’atamfo dze bi yɛɛ Jesus nye n’ekyirdzifo  no wɔ asomafo no hɔn aber do. Jesus kaa dɛ nkorɔfo bɔsoɛr etsia hɔn a wɔsom Jehovah na wɔbɛkeka atorsɛm dze asɛɛ hɔn dzin, na dɛm pɛpɛɛpɛ na ɔrokɔ do ndɛ. (Matt. 5:​11, 12) Sɛ yehu obi a ɔhyɛ atorsɛm no ekyir na yehu dza ɔsɛ dɛ yɛyɛ no ntsɛmara dze bɔ hɛnho ban a, worunntum nndaadaa hɛn da. Ɔno dze ebɛnadze na yebotum ayɛ?

17. Ebɛnadze na yɛbɛyɛ amma wɔaammfa atorsɛm anndaadaa hɛn? (2 Timothy 1:13) (Hwɛ adakaba a wɔato dzin “ Dza Ɔsɛ Dɛ Eyɛ Aber A Atse Atorsɛm Bi” no so.)

¹⁷ Mma nntsie atorsɛm. Ɔsomafo Paul maa yehun dza ɔsɛ dɛ yɛyɛ ber a yɛatse atorsɛm bi no. Ɔkaa kyerɛɛ Timothy dɛ: ‘Tu binom fo, amma woeenntsie anansesɛm na ma wɔmpow ebususɛm huhuw.’ (1 Tim. 1:​3, 4; 4:7) Sɛ abofra a ɔrowea hu biribi wɔ famu a, obotum afa ahyɛ n’anomu, naaso panyin dze, ɔrennyɛ dɛm da osiandɛ onyim dɛ obotum ama ɔayar. Dɛmara na hɛn so, ɔnnsɛ dɛ yetsie atorsɛm biara osiandɛ yenyim beebi a ofi. Mbom no ɔsɛ dɛ yɛkɔ do suo “nsɛm pa” a ɔfa nokwar no ho mu dzendzenndzen.—Kenkan 2 Timothy 1:13.

18. Yebesi dɛn akyerɛ Jehovah n’ahyehyɛdze no ho enyisɔ?

¹⁸ Akwan ahorow a Nyankopɔn n’ahyehyɛdze no fa do suasua Jesus no, yeesusu no mu ebiasa pɛ ho wɔ adzesua yi mu. Sɛ irusua Bible no a, ɔyɛ a hwehwɛ ndzɛmba afofor a Nyankopɔn n’ahyehyɛdze no yɛ dze suasua Jesus no. Afei so, boa enuanom afofor a wɔwɔ w’asafo mu no ma wɔnkyerɛ Jehovah n’ahyehyɛdze no ho enyisɔ. Kɔ do som Jehovah na yɛ dza ibotum biara fa woho fam n’ahyehyɛdze a ɔnam do ma n’apɛdze yɛ hɔ no ho. (Ndw. 37:28) Hokwan a yeenya dɛ yɛabɛka Jehovah no nkorɔfo a wɔdɔ no na wodzi no nokwar no ho no, hom mma yɛnkɔ do ara nkyerɛ dɛ ɔsom bo ma hɛn.