1. Kouman sèrvitèr Jéova-ya té òrganizé annan 1^é syèk-a ?

 LÒ JÉOVA ka bay so sèrvitèr roun travay pou yé fè, i lé yé byen òrganizé yé kò pou yé fè l’ (1 Cor. 14:33). Parèkzanp, i mété Jézi pou i dirijé travay prédikasyon-an paské i lé bon nouvèl-a préché asou tout latè-a (Mat. 24:14). É Jézi ka fè tousa ki fo pou tout bagaj byen òrganizé. Annan 1^é syèk-a, tout koté yé té ka fè roun asanblé yé té ka mété ansyen pou okipé di sa asanblé-a (Actes 14:23). A Jérizalèm, i té gen roun kolèj santral ki té fèt ké apot ké ansyen ki té gen èspéryans. Yé té ka pran désizyon tout asanblé-ya té divèt swiv (Actes 15:2 ; 16:4). É kou asanblé-ya té ka swiv sa yé té ka di yé, yé « té ka kontinyé divini pi fò annan lafwa é yé té ka vin pi bokou chak jou » (Actes 16:5).

2. Dipi 1919, kouman Jéova ka gidé so sèrvitèr é ka bay yé manjé èspirityèl-a ?

² Jòdla osi, Jéova ka fè tousa ki fo pou so pèp byen òrganizé. Dipi 1919, Jézi ka sèrvi roun ti group frè wen pou òrganizé prédikasyon-an épi pou bay so disip manjé èspirityèl-a a (Luc 12:42). Tout moun ka wè ki Jéova ka béni sa sa frè-ya ka fè (Is. 60:22 ; 65:13, 14).

3-4. a) Bay roun èkzanp ki ka montré ki nou ka jwenn bénédiksyon paské nou òrganizé. b) Kisa nou ké wè annan sa artik-a ?

³ Si nou pa té òrganizé, nou pa té ké rivé fè travay Jézi bay nou fè-a (Mat. 28:19, 20). Parèkzanp, imajiné  ki yé pa té ka bay chak moun roun téritwar, é tout moun té ka préché koté yé lé. Roun patché proklamatèr té ké alé annan menm téritwar-ya souvan, alòr ki pyès moun pa té ké alé annan ròt téritwar-ya. Ès to ka wè ròt bénédiksyon nou ka jwenn paské nou òrganizé ?

⁴ Jézi ka òrganizé nou jòdla dapré modèl i sèrvi pou òrganizé so disip lò i té asou latè-a. Annan sa artik-a, nou ké wè èkzanp i lésé-a é nou ké wè kouman so òrganizasyon ka swiv so èkzanp. Nou ké wè osi kouman nou pouvé montré ki nou ka fè òrganizasyon Jéova-a konfyans.

NOU ÒRGANIZASYON KA SWIV ÈKZANP JÉZI

5. Bay roun rézon ki ka montré ki òrganizasyon Jéova-a ka swiv èkzanp Jézi (Jean 8:28).

⁵ Jézi anprann tousa i té divèt fè ké tousa i té divèt di òbò so Papa ki annan syèl-a. Òrganizasyon Jéova-a ka swiv èkzanp Jézi : i ka sèrvi Labib pou idé nou savé sa ki bon ké sa ki pa bon, épi pou gidé nou annan nou lavi (li Jean 8:28 ; 2 Tim. 3:16, 17). É a souvan i ka fè nou sonjé ki sa enpòrtan pou nou li l’ é nou apliké l’. Ki bénédiksyon nou ka jwenn lò nou ka apliké sa konsèy-a ?

6. Bay roun bèl bénédiksyon nou ka jwenn lò nou ka étidyé Labib.

⁶ Lò nou ka étidyé Labib ké nou piblikasyon, nou ka jwenn roun patché bénédiksyon. Parèkzanp, nou pouvé konparé sa Labib ka di ké sa òrganizasyon Jéova-a ka di. Lò nou ka wè ki sa so òrganizasyon ka di nou fè ka vini di Labib, nou gen plis konfyans annan l’ ankò (Rom. 12:2).

7. Kisa Jézi préché é kouman òrganizasyon Jéova-a ka swiv so èkzanp ?

⁷ Jézi préché « bon nouvèl rwayonm Bondjé-a » (Luc 4:43, 44). I di so disip fè menm bagaj-a (Luc 9:1, 2 ; 10:8, 9). Jòdla, tout sa ki ka vin annan òrganizasyon Jéova-a ka préché sa mésaj-a asou Rwayonm-an kèlkéswa koté yé ka rété, é kèlkéswa rèsponsabilité yé gen annan asanblé-a.

8. Ki lònò nou gen ?

⁸ Pou nou, a roun lònò nou gen di palé di lavérité asou rwayonm Bondjé-a ké ròt-ya ! A pa tout moun ki gen sa lònò-a. Parèkzanp, lò Jézi té asou latè-a, i pa lésé lèspri mové-ya bay témwanyaj asou li (Luc 4:41). É jòdla, roun moun ki lé préché ansanm ké pèp Jéova-a divèt gen roun lavi ki k’alé ké sa Jéova ka doumandé. Lò nou ka palé di rwayonm Bondjé-a chak kou nou pouvé é tout koté nou fika, nou ka montré ki sa lònò-a gen valò pou nou. Kou Jézi, sa nou lé, a sonmen grenn lavérité Rwayonm-an annan tchò moun épi rozé sa grenn-yan (Mat. 13:3, 23 ; 1 Cor. 3:6).

9. Kouman nou òrganizasyon ka fè moun konnèt non Bondjé-a ?

⁹ Jézi fè moun konnèt non Bondjé-a. Annan roun lapriyè, i di so Papa : « Mo fè yé konnèt to non » (Jean 17:26). Kou Jézi fè l’, nou òrganizasyon ka fè tousa i pouvé pou fè moun konnèt non Bondjé-a. Parèkzanp, i ka sèrvi La Bible. Traduction du monde nouveau ki ka  roubay non Bondjé plas i mérité annan so Paròl. Jòdla, moun pouvé li tout Labib, ouben plizyèr parti annan l’, annan pasé 270 lang. Appendice A4 ké A5 annan sa tradiksyon-an ka bay èsplikasyon pou montré poukisa yé roumété non Bondjé-a annan Labib. É appendice C ki annan La Bible d’étude ka bay roun patché prèv pou montré ki sa non-an divèt parèt 237 fwa annan Ékritir grèk-ya.

10. Kisa témwanyaj roun madanm ki ka rété Birmani ka anprann to ?

¹⁰ Kou Jézi, nou lé tout moun vin konnèt non Bondjé-a. Lò i anprann ki Bondjé té gen roun non, roun madanm Birmani ki gen 67 lannen koumansé pléré. É i di sò-a ki té ka étidyé Labib ké li : « A prémyé fwa yé ka di mo ki non Bondjé, a Jéova […] To anprann mo roun bagaj ki enpòrtan, a pi bèl bagaj mo té pouvé anprann ». Lò roun moun sensèr ka anprann konnèt non Bondjé-a, sa pouvé chanjé so lavi.

MONTRÉ KI TO KA FÈ NOU ÒRGANIZASYON KONFYANS

11. Kouman ansyen-yan pouvé montré ki yé ka fè òrganizasyon Jéova-a konfyans ? (gadé zimaj-a osi).

¹¹ Kouman ansyen-yan pouvé montré ki yé ka fè òrganizasyon Jéova-a konfyans ? Yé divèt byen li ké apliké sa i ka di yé fè. Parèkzanp, i ka montré yé kouman pou yé fè roun diskour, kouman pou yé priyè pou asanblé-a, é kouman pou yé pran swen di brébi Kris-ya osi. Lò ansyen-yan ka swiv sa i ka di yé fè, brébi-ya annan asanblé-a ka santi ki yé protéjé é ki yé kontan yé.

12. a) Poukisa nou divèt travay ansanm ké sa-ya ki ka dirijé nou ? (Hébreux 13:7, 17). b) Poukisa nou divèt mété nou lidé asou kalité sa-ya ki ka dirijé nou gen ?

¹² Lò ansyen-yan ka di nou sa pou nou fè, nou divèt fè l’ ké tout nou tchò. Konsa, sa ké pi fasil pou yé. Labib ka ankourajé nou obéyi épi soumèt nou kò anba sa-ya ki ka dirijé nou (li Hébreux 13:7, 17). Mé détan, sa pouvé rèd. Poukisa ? Paské yé pa parfè ! Mé si nou ka mété nou lidé asou yé défo pasé nou wè yé kalité, nou ké fè sa nou lèlmi lé. Poukisa nou ka di sa ? Nou lèlmi lé nou douté ki Bondjé ka sèrvi òrganizasyon-an pou gidé nou. Donk, si nou ka pansé mové bagaj asou ansyen-yan, nou ka riské koumansé pansé mové bagaj asou òrganizasyon-an osi épi finalman pa fè l’ konfyans ankò. Alòr, kouman nou pouvé rivé wè manti nou lèlmi ka bay épi rijété yé ?

PA LÉSÉ PYÈS MOUN FÈ TO ARÉTÉ FÈ NOU ÒRGANIZASYON KONFYANS

13. Kouman lèlmi Bondjé ka éséyé fè nou krè ki so òrganizasyon pa bon ?

¹³ Òrganizasyon Bondjé-a pran roun patché bèl dispozisyon. Mé sa-ya ki kont Bondjé lé fè nou krè ki yé pa bon. Annou pran roun èkzanp. Kou Labib ka di, Jéova lé so sèrvitèr pròp, ki yé gen roun bon kondwit é ki yé adoré l’ kou i ka doumandé. Si roun moun ka mennen roun vyé lavi é i pa ka répanti, Bondjé ka di ki nou divèt « tiré » sa moun-an di asanblé-a (1 Cor. 5:11-13 ; 6:9, 10). É nou ka obéyi sa koumannman-an ki annan Labib. Mé nou lèlmi ka sèrvi sa kont nou é yé ka di ki nou pa  ka asèpté ròt-ya lò yé diféran, ki nou rèd lò nou ka jijé yé é ki nou pa gen lanmou.

14. Kimoun ki ka fè moun manti asou nou ?

¹⁴ A pou to konprann kimoun ki ka éséyé ataké nou òrganizasyon. A Satan ki ka fè moun rakonté manti asou nou. Fo pa nou bliyé ki i sa « papa manti-a » (Jean 8:44 ; Gen. 3:1-5). Donk nou pa étoné si sa-ya ki ka maché ké li ka sonmen manti asou nou toupatou pou sali òrganizasyon Jéova-a. A sa i té ja ka fè annan 1^é syèk-a.

15. Kouman chèf rélijyé-ya trété Jézi ké so disip ?

¹⁵ Annan 1^é syèk-a, menm si Pitit Bondjé-a té parfè é i té ka fè mirak, sa-ya ki té ka maché ké Satan di manti asou manti asou l’. Parèkzanp, chèf rélijyé-ya té ka di pèp-a ki si Jézi té ka rivé tiré démon-yan, a té gras a « chèf démon-yan » (Marc 3:22). É lò yé jijé l’, yé di ki i té ka dérèspèkté Bondjé. É yé fè moun-yan doumandé pou yé tchwé l’ (Mat. 27:20). Pita, toupannan disip-ya té ka préché bon nouvèl-a, yé lèlmi ‘fè moun lévé faché kont yé é yé fè yé’ pèrsékité yé (Actes 14:2, 19). Men sa La Tour de Garde 1^é désanm 1998 ka di asou Actes 14:2 : « Non sèlman Jwif-ya ki pa té dakò pa té lé kouté mésaj-a, mé anplis di sa yé koumansé sali répitasyon krétyen-yan pou éséyé monté moun-yan ki pa té jwif kont krétyen-yan. »

16. Si nou ka tandé moun ka manti asou nou òrganizasyon, kisa nou divèt sonjé ?

¹⁶ Jis jòdla, Satan ka kontinyé manti. I « ka bloublou tout moun asou latè-a » (Rév. 12:9). Si to ka tandé  moun ka manti pou sali répitasyon nou òrganizasyon ouben frè-ya ki ka dirijé nou, a pou to sonjé kouman lèlmi Bondjé trété Jézi ké so disip. Kou Labib té di, yé ka pèrsékité é yé ka manti asou sèrvitèr Jéova di nou lépòk (Mat. 5:11, 12). Mé, pou nou pa lésé yé bloublou nou ké yé manti, nou divèt wè kimoun ki dèyè tousa épi byen réyaji lanmenm. Kouman nou divèt réyaji ?

17. Kisa nou divèt fè pou nou pa lésé enfòrmasyon ki pa vré bloublou nou ? (2 Timothée 1:13 ; gadé osi karé-a «  Enfòrmasyon ki pa vré : sa to divèt fè lanmenm »).

¹⁷ Pa kouté enfòrmasyon ki pa vré. Apot Pòl byen èspliké sa pou nou fè lò nou ka vin tandé manti moun ka di. I doumandé Timoté « bay sèrten moun lòrd pa […] kouté istwè ki pa vré » (1 Tim. 1:3, 4 ; 4:7). Souvan, bébé-ya ka ranmasé bagaj ki atè é ka mété sa annan yé bouch. Mé roun granmoun pa ké janmen fè sa paské i savé ki problèm i pouvé trapé. Menm fason-an, nou pa ka kouté enfòrmasyon ki pa vré paské nou savé kimoun ki dèyè sa. Nou ka kouté « bon paròl » lavérité rounso (li 2 Timothée 1:13).

18. Kouman nou pouvé montré ki nou ka fè òrganizasyon Jéova-a konfyans ?

¹⁸ A sèlman trwa domenn nou wè koté òrganizasyon Bondjé-a ka imité Jézi. Lò to ka étidyé Labib, éséyé wè ròt domenn koté i ka swiv so èkzanp. Ankourajé frè ké sò-ya annan to asanblé fè òrganizasyon-an ankò plis konfyans. Épi kontinyé adoré Jéova ké fidélité toupannan to ka rété annan so òrganizasyon pou montré ki to ka fè l’ konfyans, paské a li i ka sèrvi pou so volonté fèt (Ps. 37:28). Annan pèp Jéova-a nou ka jwenn moun ki fidèl é ki kontan yé konpanyen. Annou tout toujou gen rékonésans pou lònò nou gen di fè parti di sa pèp-a !