1. Mósĩ́ deè ní e Jìhóvà beè bõonè ló pá a gbò mm̀ túá gbò gbááá ẹ́?

 KỌ̀LÁÁ tṍó e Jìhóvà ne tóm pá a gbò, à ólò ẹ̀bmà dẽe kọ bàá naá boo bá ea bọ́ló. (1 Kọ́r. 14:33) Dì belí nu dòòmà bá, à dú bùlà Bàrì kọọ̀ bàá vee lé kpẹ̀a ea kil ló Boǹ Méné Bàrì imá kọ̀láá kĩée ea di bàlà booí. (Máát. 24:14) Jìhóvà beè tú Jíízọ̀s sẹlẹ́ togó tómí. Vaá Jíízọ̀s dì ea gé náa kọọ̀ tómí á siá boo bá ea bọ́ló. Tṍó e ba beè nveè bõ̀ònatõ̀ò gbẹá kele-kele ketõ̀ò mm̀ túá gbò gbááá, ba beè íbá ló gbò kànen kọ bàá nèva tùle. (Tóm 14:23) Gbò tóm nè gbò kànen beè olòó tõó Jèrúsalẹ̀m nè tùle ea dú bíi kọọ̀ dénè bõ̀ònatõ̀ò á tõó boo. (Tóm 15:2; 16:4) Boo béè kọọ̀ pá vígà beè gbàntṍ ló gbò tùle e bà né vaá “gbò e baè di mm̀ gbò bõ̀ònaló Kráìsta beè kpáá palàge ié agẹló mm̀ ba zìgà bel vaá gbò nen géè olòó ziga ló lé kpẹ̀aá kọ̀láá dee vaá dọ̀va ló bọ̀ọ̀vẹ̀va gã́bug.”​—Tóm 16:5.

2. Lọ̀l gé mm̀ gbáá 1919 na, mósĩ́ deè ní e Jìhóvà dì ea gé túlè pá a gbò e?

² Jìhóvà dì ea gé bṍònè ló pá a gbò dọ̀ọ̀mà kátogóí. Lọ̀l gé mm̀ gbáá 1919, Jíízọ̀s dì ea gé tú ńkem̀ gbò e Bàrì beè tṍ nóo ból nèèmà tùle pá a gbò kilma ló bé e bàé kọ́ kpẹ̀a naa vaá nèva gbò dùùlà bá deè tṍ ea di mm̀ Kpá Káí kà lèlà tṍó ea bọ́ló. a (Lúùk 12:42) Mm̀ kà-kà, Jìhóvà dì ea gé  tã́ànè dee bá tóm e gbòí gé sí.​—Àìz. 60:22; 65:​13, 14.

3-4. (a) Nè nu dòòmà bá ea kil ló bé e gè tõó boo tùle ólò dọ̀ bélè nèi naa (b) Éé ní eé ló bel boo mm̀ nakà togó belí é?

³ Be née beè naa nú boo kúu, née gáẹ̀ beè láá sí tóm e Jíízọ̀s beè nèiá. (Máát. 28:​19, 20) Dì belí nu dòòmà bá, be bà náa beè dòbá kĩée eé kọ́ kpẹ̀a nèi; buù nen gáẹ̀ beè kọ́ kpẹ̀a kĩée ea léémáe. Bà gáẹ̀ beè láá kọ́ kpẹ̀a gbẹá sìgà ketõ̀ò vaá olòó òòa boo, boo tṍó e bà náa gáẹ̀ beè kọ́ sìgà ketõ̀ò. É kọ òé láá kpáá bugi togó boo dõona kà bélè e ólò ié tṍó e náà nú boo kúu?

⁴ Dì belí bé e Jíízọ̀s beè bõonè ló pá a gbò tṍó ea beè di boo kunukẽ̀í naaá, níà bé ea gé bṍònè ló pá a gbò kátogóí naa ẽ́. Mm̀ nakà togó belí, èé ló bel boo nu dòòmà bá e Jíízọ̀s beè gbẹẹ́ kẽ nèi, nè bé e bẹẹ bõ̀ònatõ̀ò dì ea gé nyoone a nu dòòmà bá naa. Èé ló nágé bel boo bé eé láá zogè kọọ̀ nyíéi ẹ́ẹ ló bõ̀ònatõ̀ò Jìhóvà naa.

BẸẸ BÕ̀ÒNATÕ̀Ò ÓLÒ NYOONE NVÉÈ NU DÒÒMÀ BÁ JÍÍZỌ̀S

5. Mósĩ́ deè ní e ólò nyoone nvéè nu dòòmà bá Jíízọ̀s e? (Jọ́ọ̀n 8:28)

⁵ Jíízọ̀s beè nó bé ea Tẹ̀ ea di káála ólò ló bel vaá naa nu naa. Bõ̀ònatõ̀ò Bàrì dì ea gé nyoone nvéè nu dòòmà bá Jíízọ̀s tení dú ló gè tú Kpá Káí nvèèmà bá nèi kọ é nyimá ló nú ea dú lé nè pọ́lọ́ vaá nèèmà nài gé gbò tùle ea é kpenài. (Bugi Jọ́ọ̀n 8:28; 2 Tím. 3:​16, 17) Bà ólò kẽeí nyíe lee kọ é bugi Kpá Káí vaá tú gbò nú e bugì siimá tóm. Mósĩ́ deè ní e gè tõó boo gbò dùùlà bá deè tṍí ólò dọ̀ bélè nèi ẽ́?

6. Mókà bélè ní e ólò ié tṍó e nóò Kpá Káí é?

⁶ À ólò dọ̀ bélè nèi tṍó e bugì Kpá Káí vaá gbĩ́tẽ́ ló nu lọl mm̀ bẹẹ gbò kpá ea dẹẹa boo Kpá Káí. Dì belí nu dòòmà bá, èé láá tú gbò nú e bugì lọl mm̀ Kpá Káí doolé ló gbò tùle e bõ̀ònatõ̀òí gé néi. Tṍó e monì kọọ̀ gbò tùleí dẹẹa boo Kpá Káí, àé náa kọ é palàge dẹlẹ nyíé boo bõ̀ònatõ̀ò Jìhóvà.​—Róm̀ 12:2.

7. Mókà kpẹ̀a ní e Jíízọ̀s géè vee é, vaá mósĩ́ deè ní e bõ̀ònatõ̀ò Jìhóvà ólò nyoone a nu dòòmà bá ẹ́?

⁷ Jíízọ̀s beè vee “lé kpẹ̀a ea kil ló lẹ̀ẹ̀là bel Bàrì.” (Lúùk 4:​43, 44) Jíízọ̀s beè kọ nagé nè pá a gbò nyòòne nvée kọ bàá vee lé kpẹ̀a ea kil ló Boǹ Méné Bàrì. (Lúùk 9:​1, 2; 10:​8, 9) Deè nieí, kọ̀láá gbò e bà di mm̀ bõ̀ònatõ̀ò Jìhóvà ólò kọ́ lé kpẹ̀a ea kil ló Boǹ Méné Bàrì gbẹá kọ̀láá kĩée e bà dì, kọ̀láá bé e tóm e bà ólò sí mm̀ bõ̀ònatõ̀ò bọọ naa

8. Mókà nèà deè ní e beele íè e?

⁸ Ge kọ́ kpẹ̀a ea kil ló Boǹ Méné Bàrì nè dõona gbò dú kà pọ̀b kà nèà deè e íè! Vaá níì dénè nen ní ea íe nakà nèà deèí é nì. Dì belí nu dòòmà bá, tṍó e Jíízọ̀s beè di boo kunukẽ̀í, náa beè zìgà kọọ̀ gbò zọ á kọ́ kpẹ̀a ea killíé ló. (Lúùk 4:41) Deè nieí, besĩ́ nen kálá zọ̀ Gbò Neǹ Ditõ̀ò Jìhóvà kọ́ kpẹ̀a, àé íè ge tõó dùm ea gbááá ló bùlà Jìhóvà. È ólò zogè kọọ̀ è nveè ka ló nakà nèà deèí tení dú ló gè kọ́ kpẹ̀a nè gbò nen kọ̀láá tṍó. È gbĩ́ gè belí Jíízọ̀s, vóà naa, èé piigà bé e bẹẹ kpóó sim tùlà naa gè kọ́ kpẹ̀a vaá noomà nuù gbò nen.​—Máát. 13:​3, 23; 1 Kọ́r. 3:6.

9. Mósĩ́ deè ní e bõ̀ònatõ̀ò Jìhóvà ólò naa kọọ̀ gbò nen á nyimá béè Bàrì e?

⁹ Jíízọ̀s beè naa kọọ̀ gbò nen á nyimá béè Bàrì. Mm̀ tã̀àgã ló e Jíízọ̀s beè tã̀àgã̀ má a Tẹ̀ ea di káálaá, a beè kọọ̀: “M beè naa kọ bàá nyimá ni ló.” (Jọ́ọ̀n 17:26)  Bõ̀ònatõ̀ò Jìhóvà ólò nó Jíízọ̀s tení dú ló gè naa kọọ̀ gbò nen á nyimá béè Bàrì. Kpá Káí ea kọlà New World Translation of the Holy Scriptures a palàge nvèè bá mm̀ ge òòmà béè Bàrì sẹlẹ́ kĩée ea beè dì, belí bé ea beè di mm̀ túá kà Kpá Káí naaá. Baa tab báàsĩ́ àbèè zivè kpoò New World Translation of the Holy Scriptures nvee mm̀ nú ea é sígá ló 270 dém bel. Appendix A4 nè A5 ea di mm̀ nakà Kpá Káíí, òé mon bé e ba beè òòmà béè Bàrì nvee mm̀ Kpá Káíí naa. Appendix C, ea di mm̀ Study Bible, kpáá palàge baatẽ́ kọ à bọ́ló kọọ̀ béè Bàrì á dọa bàlà kẽ 237 tóm mm̀ kpá Máátìù tẹlẹ Kùùà Nù.

10. Éé ní eo nóò lọl ló nú e ene kà ńnváá ea ólò tõó Myanmar beè kọ̀ ẹ?

¹⁰ È gbĩ́ gè nvèè bá nè gã́bug nen kọ bàá nyimá béè Bàrì belí bé e Jíízọ̀s beè naaá. Tṍó e ene kà ńnváá ea ólò tõó Myanmar ea ni tóólá 67 gbáá dã́ kọọ̀ Bàrì íe bée, a beè tò vaá kọọ̀: “Níì túá tṍó mm̀ nà dùm em gé dã́ kọọ̀ béè Bàrì kọlà Jìhóvà ẹ. . . . Ò nóòmàmi nú ea palàge dú bíi em gáà beè nyimá tọ́ọ̀ dee.” Dì belí bé e nòòtẽ́í tẹ́lẹ bàlà kẽ naa, tṍó e gbò nen nyímá kọọ̀ Bàrì íe bée à ólò nyaaná ba dùm.

KILSĨ́ GÈ ZOGÈ KỌỌ̀ NYÍÉ NI Ẹ́Ẹ LÓ BÕ̀ÒNATÕ̀Ò JÌHÓVÀ

11. Mósĩ́ deè ní e gbò kànen é láá zogè kọọ̀ nyíé va ẹ́ẹ ló bõ̀ònatõ̀ò Bàrì e? (Ẹ̀b nàgé fòtó.)

¹¹ Mósĩ́ deè ní e gbò kànen é láá zogè kọọ̀ nyíé va ẹ́ẹ ló bõ̀ònatõ̀ò Bàrì e? Tṍó e bà ne dùùlà bá deè tṍ gbò kànen, à dú bíi kọọ̀ bàá tú ọ̀ẹ̀ dẽe bùgmà vaá tú gbò nú e bà bugi siimá tóm. Dì belí nu dòòmà bá, níì áá tùle ea kil ló bé bàé sẹlẹ nònù vaá tãagã ló Bàrì gbẹá nònù naa ní e bà ólò nè gbò kànen ẽ́ nì, sõò bà ólò kọ nagé bé e bàé ẹb nú ea kil ló naanà ból Kráìst naa. Tṍó e gbò kànen tõó boo gbò tùle e bà né va, à ólò naa kọ pá vígà á nyimá kọọ̀ Jìhóvà vulè va vaá lóó va ólò dĩ̀ìnà.

12. (a) Éé ní ea náa vaá à bọ́ló kọ é tõó kè kẽè gbò e bà gé túlèi é? (Híbrù 13:​7, 17) (b) Éé ní ea náa vaá à bọ́ló kọ é ká dẽe gbẹẹ́ boo lé kpãa ea di mm̀ gbò e bà gé túlèi é?

¹² Tṍó e gbò kànen néi tùle, à dú bíi kọ é gbàn va tṍ ló. Be è náa vó, àé válí ló gbò e bà gé túlèi gè sí ba tóm. Kpá Káí síèi kpóó ló kọọ̀ é gbàntṍ ló vaá tõó kè kẽè gbò e bà gé túlèi. (Bugi Híbrù 13:​7, 17.) Sõò sìgà tṍó, àé láá tàvàlàí ló gè naa vó. Ló éé? Boo béè kọọ̀ gbò kànen náa gbõoma. Sõò, be è ká bùlà gbẹẹ́ boo ba lọ̀ èlmà gbò lé kpãa ea dì vá m, àé náa kọọ̀ nyíè bẹẹ gbò ọ́b á ẹẹ. Éé ní ea náa è kọ́ vó é? Níí dú boo béè kọọ̀ ge naa vó é náa kọ é gá dẹlẹ na nyíé boo bõ̀ònatõ̀ò Jìhóvà vaá níà nú e bẹẹ gbò ọ́b gbĩ́ kọ é naa ẽ́. Sõò, éé ní eé láá naa kọbé è nyímá vaá kìn kyáá bel ea aa bá gbò e bà ọ́bvíi é?

Ó GÁ ZÌGÀ KỌỌ̀ DÕONA GBÒ Á NAA KỌ Ó GÁ DẸLẸ NA NYÍÉ BOO BÕ̀ÒNATÕ̀Ò BÀRÌ

13. Éé ní e gbò ọ́b Bàrì ólò naa kọbé gbò nen tú pọ́lọ́ bá ẹ̀bmà bõ̀ònatõ̀ò Bàrì e?

¹³ Gbò ọ́b Bàrì gbĩ́ kọ é tú pọ́lọ́ bá ẹ̀bmà gbò lé nu e bõ̀ònatõ̀ò Bàrì gé náa. Dì belí nu dòòmà, Kpá Káí a nóòmài kọọ̀ Jìhóvà gbĩ́ kọ gbò e bà gé fã́e á õ̀òa ló, labví lé láb vaá fã̀e mm̀ sĩ́deè ea ténmá. À kọ́ọ̀ bàá kpó kọ̀láá nen ea lábví pọ́lọ́ láb vaá náa ọ́gá lọl mm̀ bõ̀ònatõ̀ò. (1 Kọ́r. 5:​11-13; 6:​9, 10) È ólò gbàntṍ ló nakà log ea di mm̀ Kpá Káíí. Sõò gbò nàà uú boo ólò gbài bel kọ née vulè gbò nen, è béèlà bel ló gbò nen, vaá née ólò zọ̀ gbò e ba láb dú kele ló ńbeéle naaá nu.

14. Mée ní ea di nvéè dénè kyáá bel e gbò nen gé kpọ́ kilma ló bõ̀ònatõ̀ò Bàrì e?

 ¹⁴ Nyimá ló nen ea gé náa uú boo bõ̀ònatõ̀ò Bàrì. Dénè kyáá bel e bà gé kpọ́ ló bõ̀ònatõ̀ò Bàrì aa bá Sétàn ea dú Pọ́lọ́ Nyómá. Ẹlẹ ní ea dú “tẹ̀ kyáá bel” é. (Jọ́ọ̀n 8:44; Jén. 3:​1-5) Vóà naa, èé láá ẹ̀bmà dẽe kọọ̀ Sétàn é náa kọọ̀ gbò e bà nveèe sãa kúm á kpọ́ kyáá bel ló bõ̀ònatõ̀ò Jìhóvà. Níà nú ea beè naaá mm̀ túá gbò gbááá ẹ́.

15. Éé ní e gbò tùle bõ̀ònaló fã̀ beè naa Jíízọ̀s nè pá a gbò nyòòne nvée ẽ́?

¹⁵ Mm̀ túá gbò gbááá, Sétàn beè naa kọọ̀ gbò nen á kpọ́ kyáá bel ló gbò tóm dũ̀ùnè e Jíízọ̀s beè sì. Dì belí nu dòòmà bá, gbò tẹ̀sĩ́ bõ̀ònaló fã̀ beè kọ́ nè gbò nen kọọ̀ Jíízòs géè tú kpóó ea aa bá Pọ́lọ́ Nyómá ea gé “bẹl boo dénè gbò zọ” kpoomá zọ lọl mm̀ gbò nen (Máàk 3:22) Tṍó e bà géè beelá bel ló Jíízọ̀s, gbò tùle bõ̀ònaló fã̀ beè lóe bel ló vaá kọ bàá fẹ́ẹ. (Máát. 27:20) Tṍó e tṍó téní, e gbò nyòòne nvéè Kráìst géè kọ́ lé kpẹ̀aá, gbò nàà uú boo “beè gbóó ló bel kyọ̀ọ̀mà nyíè gbò e bè níì pá Júù nì” naa ní e bà bíìgè va ló. (Tóm 14:​2, 19) Dẹ̀ẹ̀a boo nú e di mm̀ kpá Tóm 14:​2, Kpá Tọ Kùdẽe Ló níí December 1, 1998, baatẽ́ kọọ̀: “Gbò e bà nveè sãa kúm Sétàn beè kìn lé kpẹ̀a e gbò níí Kráìst géè veeá, ló pọ́lọ́ bel kìlmà vá ló kọbé gbò nen ọ́bví va, vaá kìn ge pãané va tṍ ló.”

16. Éé ní ea bọ́ló kọ é kẽea boo tṍó e dã́à kyáá bel ea kil ló bõ̀ònatõ̀ò Bàrì e?

¹⁶ Deè nieí, Sétàn dì ea gé kpọ́ nágé kyáá bel belí bé ea beè naá mm̀ túá gbò gbááá naaá. Kàsĩ́, à dì ea gé “kẹlẹ dénè bàlà boo.” (Kùùà 12:9) Be ò dã́ pọ́lọ́ bel  ea kil ló bõ̀ònatõ̀ò Bàrì àbèè gbò e bà gé túlèi, kẽ̀èa boo bé e gbò ọ́b Bàrì beè ló bel ló Jíízọ̀s nè pá a gbò nyòòne nvée mm̀ túá gbò gbááá naa. Deè nieí, bà gé bíìgè ló gbò níí Jìhóvà belí bé e Kpá Káí beè gbẹẹ́ sĩ́ kọ́ naa. (Máát. 5:​11, 12) Née é ziga ló kyáá bel e Sétàn nè pá a gbò gé kpọ́, tãa vó, èé kpenà bẹẹ bá vaá kìn gbò belá tẽ̀ènè tṍóá. Èé láá kpènà bẹẹ bá naa vàẹ?

17. Mósĩ́ deè ní eé láá kìn kyáá bel é? (2 Tímotì 1:13) (Bugi nagé ńkpó ea kọ́ọ̀, “ Bé Eo É Lábví Láb Naa Tṍó Eo Dã́à Kyáá Bel.”)

¹⁷ Kìn kyáá bel. Neǹ tóm Pọ́ọ̀l beè kọ́ nú ea bọ́ló kọ é naa tṍó e dã́à kyáá bel e bà kpọ́. A beè kọ́ nè Tímotì kọ á “kùb gbò e bà gé . . . tú lóó nè gè olòó logí lóg” vaá kọ bàá “kpòòlà lóó lọl ló gbò dagi bá lóg pá bàlà boo.” (1 Tím. 1:​3, 4; 4:7) Ni bugi togó boo níí, nvín ea gé kuu é láá tú nu lọl kunukẽ̀ nvea gã́, sõò kànen náa é náa vó, boo béè kọọ̀ à nyímá kọ àé nveenìèe kom ló. È ólò kìn kyáá bel boo béè kọọ̀ è nyímà kọ à aa bá Sétàn, vaá tú “lèlà dòbá nu” ea di mm̀ Kpá Káí.​—Bugi 2 Tímotì 1:13.

18. Mósĩ́ deè ní eé é láá zogè kọ è dẹlẹ̀ nyíé boo bõ̀onatõ̀ò Jìhòvà ẹ?

¹⁸ E ló bel boo taà sĩ́deè e bõ̀ònatõ̀ò Jìhóvà ólò nó Jíízọ̀s. Tṍó eo gé nó Kpá Káí, nvèè kpíi ló dõona kà sĩ́deè e bõ̀ònatõ̀ò Jìhóvà ólò nó Jíízọ̀s. Nvèè bá nè gbò e bà di mm̀ bọọ bõ̀ònatõ̀ò kọ bàá kpáá palàge dẹlẹ nyíé boo bõ̀ònatõ̀ò Jìhóvà. Kilsĩ́ gè zogè kọ ò dẹlẹ̀ nyíé boo Jìhóvà tení dú ló gè sí tóm nèe mm̀ bọ́ọ̀ló dẹ̀lẹ̀ nyíé boo, vaá ò dává gbẹá ló a bõ̀ònatõ̀ò ea gé tú siimá tóm mm̀ ge mm-mè a bùlà. (Ps. 37:28) Naanii èé kilsĩ́ gè zogè kọọ̀ nyíéi ẹ́ẹ ló nèà deè e íè gè dũunà gbò e Jìhóvà vulè.