1. Yuun kɔbesɛka n deŋɛ nɛŋa la poan, Yehowa nɛreba yuun tigese bamea la wani?

 YEHOWA ni san bo a nɛreba tuunɛ, a boti la ba tum de ma’a ma’a. (1 Ko. 14:33) Makerɛ, Naayinɛ puti’irɛ dela to mɔɔlɛ na’am yelesoma la tinparɛ wa za’a poan. (Mt. 24:14) Yehowa loe la Yezu ti a bisa tuunɛ wa. Yezu me basɛ ti to tuna de la ma’a ma’a. Se’em ma’a ti ba yuun yu’usa tansuga tisi sise’esi yuun kɔbesɛka n deŋɛ nɛŋa la poan la, ba yuun loe la keendoma ti ba bisa ba. (Tm. 14:23) Yerusalem tiŋa poan, tuuntuneba la keendoma la yuun kɔ’ɛ ba puti’irɛ mɛ yɛla ase’a poan ti la me nara ti mabiisi la za’a sakɛ dɔla. (Tm. 15:2; 16:4) Ban yuun sakɛ doose pa’alegɔ la zuo, ‘tansuga la yuun kɔ’ɔn zɛ’a la kankaŋi sakerɛ la poan ge kɔ’ɔn pa’asa.’—Tm. 16:5.

2. Kɔ’ɔn pɔsɛ yuun 1919, Yehowa iti la wani bɔ’ɔra to pa’alegɔ, la vo’osum poan dia?

² Yehowa kelum tigesa a nɛreba mɛ zina beere wa. Kɔ’ɔn pɔsɛ yuun 1919, Yezu tari la loore mabiisi fii wa bɔ’ɔra to vo’osum poan dia ge me pa’ala tɔ ton wan tuna na’am mɔɔlegɔ tuuma la se’em. a (Lu. 12:42) Yelemɛŋɛrɛ, Yehowa kɔ’ɔn kã’ara basa tuuma wa zuo mɛ.—Isa. 60:22; 65:​13, 14.

3-4. (a) Bo makerɛ pa’alɛ ton nyɛti nyuurɛ se’em la ton tigese tomea la. (b) To wan sɔsɛ la bem zaseŋɔ wa poan?

 ³ To san ka tigese ni tomea, to kan ta’an tum tuunse’ere ti Yezu dekɛ bo to la. (Mt. 28:​19, 20) Makerɛ, ba san ka bo ni to zɛse’esi ti to wan mɔɔla bim, daanse’ere nɛra woo n paɛ zɛ’an ti a wan mɔɔla. To wan kɔ’ɔn mɔɔli ni la zɛ’ɛsi sise’esi zɔ’ɔra ge basɛ zɛ’ɛsi sise’esi. Nyuurɔ tuni ti to le nyɛta to san tigese tomea?

⁴ Se’em ma’a ti Yezu yuun bɔna tingɔŋɔ wa zuo la, a yuun tigese a podɔleba la mɛ. Bala mea nɔɔ ti a tigesa tɔ zina beere wa. Zaseŋɔ wa poan, to wan sɔsɛ Yezu n yuun eŋɛ makesonɛ se’em la to tigere la n tɔɣeseri bala se’em. To wan le bisɛ ton wan ta’an dekɛ tomea delum Yehowa tigere la se’em.

TO TIGERE LA TƆƔESERI LA YEZU MAKESONƐ LA

5. To tɔɣeseri Yezu makesonɛ la wani? (Yon 8:28)

⁵ Yezu yuun basɛ ti a saazuo Sɔ la n pa’alɛ en eŋa n wan yele ge me eŋɛ sɛla. Yehowa tigere la n tɔɣeseri Yezu makesonɛ la zuo, ba tari la Naayinɛ Yelesum la bɔ’ɔra to pa’alegɔ ti to mina sɛla n ani soŋa la sɛla n de be’em. (Kaalɛ Yon 8:28; 2 Tim. 3:​16, 17) Saŋa woo, ba ni ti’ɛ tɔ ti to kaala Baabule la ge tara ton kaalɛ sɛla la tuna tuuma. To nyɛti nyuurɔ la wani to san kɛlesa ka’aŋɔ wa?

6. To nyɛti nyuurɔ la wani to san zamesa Baabule la?

⁶ To san zamesa Baabule la, la to tigere la gɔnɔ la, to ni nyɛta la nyuurɔ. Makerɛ, to wan ta’an dekɛ yelese’a n boi Baabule la poan makɛ la tigere la n pa’ali to sɛla la. To san bɔkɛ ti pa’alegɔ la woo ze’ele la Baabule la poan, la ni basɛ ti to dekɛ tomea delum Yehowa tigere la mɛ malum pa’asɛ.—Arom 12:2.

7. Yezu yuun mɔɔlɛ la bem yele ge Yehowa tigere la me tɔɣeseri a makesonɛ la wani?

⁷ Yezu yuun mɔɔlɛ la ‘Naayinɛ Na’am la yelesoma.’ (Lu. 4:​43, 44) Leyɛ’ɛsa, Yezu yuun yele a podɔleba ti ba mɔɔla Na’am la yɛla. (Lu. 9:​1, 2; 10:​8, 9) Zina beere wa, sɛba woo n boi Yehowa tigere la poan kɔ’ɔn mɔɔla la Na’am la yelesoma, la ka pakɛ la ban tari tuuma zo’e zo’e se’em.

8. Bem yɔ’ɔ ti to tara?

⁸ La dela yɔ’ɔ kãtɛ bɔ’ɔra tɔ ti to mɔɔla Naayinɛ Na’am la yɛla bɔ’ɔra nɛreba! Daɣɛ nɛra woo n tari yɔ’ɔ wa. Makerɛ, Yezu n yuun boi tingɔŋɔ wa zuo la, a yuun ka bo kolekpabɛ’ɛsi la yɔ’ɔ ti ba mɔɔlɛ eŋa yɛla bo nɛreba. (Lu. 4:41) Zina beere wa me, nɛra san wan ta’an naɛ la Yehowa nɛreba mɔɔla, la nari ti a ita yelese’a n wan basɛ ti Yehowa puurɛ pee. To san mɔɔla bɔ’ɔra nɛreba saŋa woo la zɛ’an woo ti to bɔna, la pa’alɛ ti to puurɛ pee mɛ la yɔ’ɔ sɛka ti to tara la. To boti to ana wuu Yezu, mɔɔla bɔ’ɔra nɛreba ge me pa’ala ba yelemɛŋɛrɛ la.—Mt. 13:​3, 23; 1 Ko. 3:6.

9. Yehowa tigere la iti la wani basɛ ti nɛreba baŋera Naayinɛ yu’urɛ la?

⁹ Yezu yuun basɛ ti nɛreba baŋɛ Naayinɛ yu’urɛ la mɛ. Yezu yuun zusɛ yele a saazuo Sɔ la yeti: ‘Mam basɛ ti ba baŋɛ ho yu’urɛ la mɛ.’ (Yon 17:26) Yehowa tigere la n tɔɣeseri Yezu makesonɛ la zuo, ba tiregeri mɛ ti ba basɛ ti nɛreba baŋɛ Naayinɛ yu’urɛ la. New World Translation of the Holy Scriptures la poan, ba dekɛ Naayinɛ yu’urɛ lebe eŋɛ la zɛse’esi  ti la yuun bɔna diimi gulesegɔ la poan la. Baabule leregere wa za’a bii ku bɔba ase’a boi la yetɔɣum n gaŋɛ 270 poan. Ho san bisɛ Baabule wa Appendixes A4 la A5, ho wan baŋɛ sɛla n sɔi ti ba lebe dekɛ Naayinɛ yu’urɛ eŋɛ zɛse’esi ti ku yuun bɔna la. Appendix C n boi Study Bible la poan la me pa’alɛ la sɛla n sɔi ti Naayinɛ yu’urɛ la bɔna Kristakɔma Greek Gulesegɔ la poan sugumnɔɔrɛ 237.

10. To zamesɛ la bem la Myanmar tiŋa pɔka la n yele sɛla la?

¹⁰ Wuu Yezu la, to boti la to soŋɛ nɛreba zo’e zo’e ti ba baŋɛ Naayinɛ yu’urɛ la. Pɔka ayima n boi Myanmar tiŋa dɛna yuum 67 yuun keli mɛ ge yeti: “Mam vom poan, zina n de dabese’ere ti mam wum ti Naayinɛ yu’urɛ dela Yehowa. . . . Ya pa’alɛ mam la sɛla n de tuulum paa.” Zi’irego poan yele wa pa’alɛ ti, nɛra san baŋɛ Naayinɛ yu’urɛ, la ta’an tee a vom.

KELUM DEKƐ HOMEA DELUM TO TIGERE LA

11. Keendoma wan eŋɛ la wani pa’alɛ ti ba dekɛ bamea delum Yehowa tigere la? (Bisɛ foote la.)

¹¹ Keendoma wan eŋɛ la wani pa’alɛ ti ba dekɛ bamea delum Naayinɛ tigere la? Tigere la san bo ba pa’alegɔ, la nari ti ba kaalɛ de soŋa ge dekɛ pa’alegɔ la tum tuuma nima nima. Makerɛ, ba pa’alɛ ba ban wan ita tansugere zamesegɔ se’em, la ban wan zusa tansugere zamesegɔ poan se’em. Leyɛ’ɛsa, ba pa’alɛ ba ban wan bisa Krista piisi la soŋa se’em. Keendoma san dɔla tigere la pa’alegɔ, mabiisi la wan baŋɛ ti keendoma la nɔŋɛ ba mɛ ti la ana ba lama lama.

12. (a) Beni n sɔi ti la nara ti to nana keendoma la? (Hebru 13:​7, 17) (b) Beni n sɔi ti la nara ti to bisa keendoma la halesoma?

¹² Keendoma la san bo to pa’alegɔ, la nari ti to sirege tomea dɔla. To san ita bala, la wan dɛna naana bɔ’ɔra keendoma la ti ba tuna ba tuuma la. Baabule la kpemese to giila ti to nana ge me siregera tomea bɔ’ɔra keendoma la. (Kaalɛ Hebru 13:​7, 17.) Saŋa ase’a, la ta’an ni kpe’em mɛ ti to eŋɛ bala. Beni n sɔi? Se’ere n sɔi la, mabiisi wa ka di mi’a. Bala la, to san kɔ’ɔn bisa la ba tuurɛ yɛla la ma’a, to soŋeri la to dima la. Wani wani? To kan le dekɛ tomea delum Naayinɛ tigere la. To dindoma n boti sɛla n bala. To wan eŋɛ la bem wana mɔpi ta’an baŋɛ ge zaɣesɛ to dindoma pumpa’asum la?

DA BO YƆ’Ɔ TI NƐREBA BASƐ TI HO KAN DEKƐ HOMEA DELUM NAAYINƐ TIGERE LA

13. Naayinɛ dindoma iti la bem ti ba sa’am a tigere la yu’urɛ?

¹³ Naayinɛ dindoma ni tiregɛ mɛ ti ba basɛ ti nɛreba ti’isa ti yelesoma la ti to tigere la ita la dela be’em. Makerɛ, to zamesɛ Baabule la poan baŋɛ ti Yehowa boti la nɛreba ana filam innaanɛ, vo’osum la ba sareŋɔ poan. A yeti se’em woo n ka boti a basɛ dɛɣerɔ tuuma, ba yese en tansugere la poan. (1 Ko. 5:​11-13; 6:​9, 10) To kɔ’ɔn dɔla Baabule pa’alegɔ wa mɛ. Ge to dindoma la yeti, ton ni yese nɛra tansugere la poan la pa’alɛ ti to ka nɔŋɛ ba ge me dɛna daregadoma.

14. Ani n basɛ ti nɛreba parena yɛla bɔ’ɔra to tigere la?

¹⁴ Baŋɛ se’em n zɛregeri to tigere la. Sitaana n de to Dima la n basɛ ti nɛreba  parena yɛla bɔ’ɔra tɔ. Eŋa n de ‘pumpɔreŋɔdoma la sɔ.’ (Yon 8:44; Pin. 3:​1-5) Bala la, to mina ti Sitaana wan basɛ ti nɛreba parum yɛla bo Yehowa tigere la. A yuun eŋɛ la bala yuun kɔbesɛka n deŋɛ nɛŋa la poan.

15. Pu’usegɔ nɛŋadoma la yuun eŋɛ Yezu la a podɔleba la bem?

¹⁵ La boi bim ti Yezu yuun ani la kasi ge me tum tuunkiresi ge Sitaana yuun basɛ ti nɛreba parum la yɛla bo en. Makerɛ, pu’usegɔ nɛŋadoma la yuun yele nɛreba ti Yezu n tari pansɛka sa’asa kolekpabɛ’ɛsi la ze’ele la ‘kolekpabɛ’ɛsi naba’ la zɛ’an. (Mr. 3:22) Ban yuun gãkeri Yezu la, pu’usegɔ nɛŋadoma la yuun parum ti a zɛregɛ la Naayinɛ ge yele nɛreba la ti ba basɛ ti ba ku Yezu. (Mt. 27:20) Pooren, Krista podɔleba n yuun mɔɔli la, ba dindoma yuun ‘isige mɛ dekɛ sɛba n daɣɛ Yudadoma la tugule’ Kristakɔma la ti ba mɛlesa ba. (Tm. 14:​2, 19) The Watchtower December 1, 1998 tɔɣɛ Tooma 14:2 yele ti: “Naayinɛ dindoma la yuun ka yeen zaɣesɛ la yelemɛŋɛrɛ la ma’a ge ba yuun pã’asɛ nɛreba la mɛ ti ba da kelese Kristakɔma la ge yaɛ ba.”

16. To san wum pumpɔreŋɔ yɛla, la nari ti to eŋɛ la bem?

¹⁶ Sitaana kelum parena mɛ zina beere wa. Eŋa n kɔ’ɔn ‘pã’asera tingɔŋɔ wa za’a.’ (Lil. 12:9) Ho san wum ti nɛreba parena yɛla bɔ’ɔra Naayinɛ tigere la bii mabiisi la n biseri tigere la, tɛ̃ra Naayinɛ dindoma n yuun eŋɛ Yezu, la yuun kɔbesɛka n deŋɛ nɛŋa podɔleba la se’em. Wuu Baabule la n yele se’em la, zina  beere wa, ba kɔ’ɔn parena ge me mɛlesa Yehowa nɛreba mɛ paa. (Mt. 5:​11, 12) To san mina se’em n basɛ ti nɛreba parena yɛla bɔ’ɔra tɔ ge kɔ’ɔn zaɣesɛ ba pumpɔreŋɔ la, to kan buregɛ. La nari ti to eŋɛ la bem?

17. To wan eŋɛ la wani ti pumpɔreŋɔ yɛla da daam tɔ? (2 Timoti 1:13) (Bisɛ daka la zuo n de “Hon Wan Eŋɛ Se’em Ho San Wum Pumpɔreŋɔ Yɛla.”)

¹⁷ Zaɣesɛ pumpɔreŋɔ yɛla. Tuuntuna Paul yuun pa’alɛ tɔ ton wan eŋɛ se’em to san wum pumpɔreŋɔ yɛla. A yuun yele Timoti ti a yele ba ti ba ‘da kɛlesa sɔlema yɛla’ ge me ‘zaɣesɛ yetɔɣeyooro.’ (1 Tim. 1:​3, 4; 4:7) La boi bim ti bia ta’an pi’e sɛla tiŋa dekɛ eŋɛ nɔɔren ge se’em n bi kãsegɛ kan sakɛ eŋɛ bala. A mi dɛŋa n boi bim se’em mɛ. Ton mi pumpɔreŋɔ yɛla n ze’ele zɛ’an na la zuo, to zaɣesɛ a mɛ. To kɔ’ɔn gurɛ la ‘yelemɛŋɛrɛ yɛla la.’—Kaalɛ 2 Timoti 1:13.

18. To wan eŋɛ la bem pa’alɛ ti to dekɛ tomea delum Yehowa tigere la?

¹⁸ To zamesɛ la yɛla atã ti Naayinɛ tigere la ita ti la pa’alɛ ti ba tɔɣeseri la Yezu. Ho san zamesa Baabule la, tiregɛ nyɛ yelese’a n le pa’alɛ ti tigere la tɔɣeseri la Yezu. Soŋɛ mabiisi la n boi ho tansugere la poan ti ba dekɛ bamea delum Naayinɛ tigere la. Kɔ’ɔn tara yelemɛŋɛrɛ bɔ’ɔra Yehowa ge me ana tapi lapi la a tigere la n basɛ ti a puti’irɛ tuna tuuma la. (Ym. 37:28) Basɛ ya ti to za’a puurɛ pee la yɔ’ɔ sɛka ti to tara ti to laɣum pa’asɛ Yehowa nɛreba poan la.