1. Baka ni nembiak Jehovah diatur ba abad keterubah?

 LEBUH Jehovah meri pengawa ngagai bala nembiak Iya, Iya dekaka sida ngereja nya enggau teratur. (1 Kor. 14:33) Ambika chunto, Petara dekaka Berita Manah ditusui ba serata dunya. (Mat. 24:14) Jehovah udah milih Jesus ngiring pengawa nya. Lalu Jesus nentuka pengawa nya digaga enggau teratur. Ba abad keterubah, lebuh raban gempuru ditumbuhka ba mayuh endur, tuai gempuru dilantik ngambika ngulu raban gempuru sereta meri iring. (SKR. 14:23) Ba jeman nya mega, di Jerusalem, bisi seraban tuai gempuru ke nyengkaum bala rasul, ti ngaga pemutus ke patut dititihka raban gempuru. (SKR. 15:2; 16:4) Lebuh bala menyadi ngasika iring ke diterima, “pengarap raban gempuru ba dia majak tegap, lalu ninting hari penyampau sida majak nambah.”—SKR. 16:5.

2. Kenyau ari taun 1919, baka ni Jehovah ngiring bala nembiak Iya sereta meri sida pemakai rohani?

² Kemayaharitu, Jehovah agi ngatur bala nembiak Iya. Kenyau ari taun 1919, Jesus udah ngena seraban mit menyadi lelaki ke dipilih ngagai serega kena ngatur pengawa nginjil sereta meri pemakai rohani ngagai bala murid iya. a (Luk. 12:42) Endang terang, Jehovah merekatka pengawa raban nya.—Isa. 60:22; 65:​13, 14.

3-4. (a) Nama penguntung iya enti kitai teratur? Padahka siti chunto. (b) Nama deka dikerandauka kitai dalam artikel tu?

 ³ Enti kitai enda teratur, kitai enda ulih ngereja pengawa ke diberi Jesus ngagai kitai. (Mat. 28:​19, 20) Ambika chunto, enti bala menyadi lelaki enda ngatur endur nginjil ba kandang raban gempuru kitai, reti iya semua bala menyadi ulih nginjil ba dini-dini endur. Tu engka ngujungka kitai suah agi nginjil ba siti endur lalu enda nginjil ba endur ke bukai. Tang ketegal kitai teratur, kitai ulih nginjil ngagai semua endur ba kandang raban gempuru kitai. Ulih nuan berundingka penguntung ke bukai enti kitai teratur?

⁴ Baka Jesus ke ngatur bala murid iya maya iya agi ba dunya, iya mega ngatur nembiak Petara kemayaharitu. Dalam artikel tu, kitai deka beratika teladan Jesus lalu baka ni gerempung kitai nitihka teladan iya. Kitai mega deka berandauka baka ni kitai ulih nunjukka diri andal agi ngagai gerempung Jehovah.

GEREMPUNG KITAI NITIHKA TELADAN JESUS

5. Nama siti chara gerempung kitai nitihka teladan Jesus? (John 8:28)

⁵ Jesus belajar utai ke patut dikereja sereta utai ke patut disebut ari Apai iya. Gerempung Jehovah mega neladan Jesus. Sida ngena Jaku Petara ngiring kitai sereta nulung kitai nemu utai ti betul enggau utai ti salah. (Bacha John 8:28; 2 Tim. 3:​16, 17) Kitai seruran dikingatka ngambika macha sereta nitihka utai ke diajar Bup Kudus. Nama penguntung iya enti kitai nitihka jaku lalau tu?

6. Nama penguntung ti besai ke diulih kitai lebuh belajarka Bup Kudus?

⁶ Kitai bulih penguntung ti besai lebuh belajarka Bup Kudus ngena litaricha kitai. Ambika chunto, kitai ulih mandingka ajar Bup Kudus enggau iring ke diterima kitai ari gerempung Jehovah. Lebuh kitai meda iring ke diberi gerempung bepelasarka Bup Kudus, nya nulung kitai andal agi ke gerempung Jehovah.—Rom. 12:2.

7. Nama pesan ke ditusui Jesus lebuh iya nginjil, lalu baka ni gerempung Jehovah nitih teladan iya?

⁷ Jesus nusui “Berita Manah pasal Perintah Petara.” (Luk. 4:​43, 44) Jesus mega ngasuh bala murid iya nginjil pasal Perintah Petara. (Luk. 9:​1, 2; 10:​8, 9) Kemayaharitu, semua nembiak Jehovah nginjil pasal Perintah Petara, enda ngira dini alai sida diau tauka pemayuh tanggung pengawa ke dipegai sida dalam gerempung Jehovah.

8. Nama basa ke dikembuan kitai?

⁸ Endang basa ti besai laban kitai ulih madah pasal Perintah Petara ngagai orang bukai! Ukai semua orang diberi basa kena ngereja pengawa tu. Ambika chunto, lebuh Jesus ba dunya, iya enda ngemendarka bala melikat ti jai besaksi pasal iya. (Luk. 4:41) Kemayaharitu, sebedau sesiku orang ulih nginjil enggau Saksi-Saksi Jehovah, iya patut ngembuan pengidup ti ngelantangka ati Jehovah. Kitai nunjukka diri beterima kasih ke basa tu lebuh kitai nginjil ba sebarang endur enggau ba sebarang maya. Baka Jesus, tuju kitai nya deka nanam sereta manjah benih pemendar pasal Perintah Petara ba ati orang.—Mat. 13:​3, 23; 1 Kor. 3:6.

9. Baka ni gerempung Jehovah ngasuh nama Petara ditemu orang?

⁹ Jesus ngasuh nama Petara ditemu orang. Lebuh Jesus besampi ngagai Apai iya, iya madah: “Aku udah ngasuh nama Nuan ditemu sida.” (Jhn. 17:26) Sejalai enggau teladan Jesus, gerempung Jehovah enggau naka ulih nulung orang bukai nemu nama Petara. Siti chara gerempung Jehovah ngereja nya, iya nya nengah Bup Kudus Salin Dunya Baru. Salin Bup Kudus tu udah mulaika baru nama Petara ba endur asal iya. Salin Bup Kudus tu ti lengkap tauka sebagi udah diasilka dalam  lebih ari 270 iti bansa jaku. Ba Poin 1 enggau 2 dalam Rujukan kena Belajarka Bup Kudus, nuan ulih belajar mayuh agi pasal kebuah sereta baka ni nama Petara udah dipulaika baru ngagai Bup Kudus. Ba dia mega bisi meri mayuh agi bukti kena nunjukka kebuah nama Petara patut ayan 237 kali dalam Bup Kudus Begian Jaku Gerika.

10. Nama ulih dipelajarka nuan ari utai ke disebut siku indu ba Myanmar?

¹⁰ Baka Jesus, kitai deka nulung mayuh orang nemu nama Petara. Lebuh siku indu ba Myanmar ke beumur 67 taun, belajar Petara bisi nama, iya berengkah nyabak. Ku iya madah: “Tu meh terubah kali iya aku ninga nama Petara nya Jehovah. . . . Nuan udah ngajar aku utai ti pemadu penting.” Baka ke ulih dipeda ari pengalaman tu, lebuh orang belajar pasal nama Petara, tu ulih ngubah pengidup sida.

TERUS MEH NGAYANKA DIRI ANDALKA GEREMPUNG JEHOVAH

11. Baka ni bala tuai gempuru nunjukka sida andalka gerempung Jehovah? (Peda mega gambar.)

¹¹ Nama siti chara bala tuai gempuru nunjukka sida andalka gerempung Petara? Lebuh gerempung Petara meri iring ngagai bala tuai gempuru, sida patut macha iring nya enggau manah lalu enggau naka ulih nitihka iring nya. Ambika chunto, sida ukai aja nerima iring pasal chara ngenataika begian ba gempuru, sereta chara besampi ba gempuru, tang mega pasal chara nyaga raban bedus Kristus. Lebuh bala tuai gempuru nitihka semua iring ari gerempung Jehovah, bala menyadi Kristian ulih ngasaika pengerindu Jehovah sereta meda chara Jehovah nyaga sida.

12. (a) Nama kebuah kitai patut bekerejasama enggau sida ke ngiring kitai? (Hebrew 13:​7, 17) (b) Nama kebuah kitai patut befokus ba sifat manah bala menyadi ke ngiring kitai?

¹² Lebuh kitai nerima iring ari bala tuai gempuru, kitai patut nitihka iring nya enggau ati ti rela. Enggau nya, bala menyadi ke ngiring senang agi ngereja pengawa sida. Bup Kudus meransang kitai ngasi sereta sanggup nitihka iring bala menyadi ke ngiring. (Bacha Hebrew 13:​7, 17.) Tang kekadang, tu ulih nyadi siti cabaran. Nama kebuah? Laban bala menyadi lelaki ke ngiring kitai enda sempurna. Enti kitai semina befokus ba penyalah sida, lalu ukai befokus ba sifat manah sida, kitai kebendar iya benung nulung bala munsuh kitai. Nama kebuah kitai bejaku munyi nya? Bala munsuh kitai deka kitai kakang ati enggau gerempung Petara. Nyadi, enti kitai bisi runding ti negatif pasal bala tuai gempuru, nya ulih ngasuh kitai belabuh ngembuan runding ti negatif pasal gerempung Petara lalu enda agi arapka iya. Nama patut digaga kitai ngambika ulih ngelala sereta nulak pemula bala munsuh kitai?

ANANG NEJUKA ORANG BUKAI NGASUH NUAN KAKANG ATI ENGGAU GEREMPUNG JEHOVAH

13. Baka ni bala munsuh kitai nguji deka ngenyaika reputasi gerempung Jehovah?

¹³ Bala munsuh kitai deka kitai ngumbai pemanah ke bisi ba gerempung Jehovah nya kebendar iya utai ti jai. Ambika chunto, kitai belajar ari Bup Kudus, Jehovah dekaka kitai bisi tubuh ti beresi, ulah ti tuchi, sereta nyembah Iya enggau chara ti diterima Iya. Jehovah madahka, barang sapa ke terus ngereja utai ti jai lalu enggai ngaga ubah, deka dibuai ari raban gempuru. (1 Kor. 5:​11-13; 6:​9, 10) Kitai ngasika pesan Bup Kudus nya. Ketegal nya, bala munsuh kitai nuduh kitai enda rinduka orang, udu ngakim orang, lalu enda ulih nerima sapa-sapa ke bebida ari kitai.

14. Sapa ngepunka cherita bula pasal gerempung Jehovah?

¹⁴ Kelala meh sapa ke benung nyerang kitai.  Sitan ngerembaika pemula pasal gerempung Jehovah. Iya “apai semua pemula.” (Jhn. 8:44; P-kal. 3:​1-5) Nyadi, kitai enda tekenyit lebuh Sitan ngena bala penyukung iya ngerembaika cherita bula pasal gerempung Jehovah. Utai nya kala nyadi ba Jesus enggau orang Kristian ba abad keterubah.

15. Nama utai ke digaga bala tuai pengarap ngagai Jesus enggau bala murid iya?

¹⁵ Taja pan Anak Petara, Jesus, nya sempurna sereta ngereja mayuh kereja ajih, Sitan ngena sekeda orang ngerembaika pemula pasal iya. Ambika chunto, bala tuai pengarap madahka kuasa ke dikena Jesus muru bala melikat ti jai nya datai ari “ketuai melikat ti jai.” (Mrk. 3:22) Lebuh Jesus dipechara, bala tuai pengarap nuduh iya bejaku ngelaban Petara, lalu sida ngasut orang mayuh minta Jesus dibunuh. (Mat. 27:20) Pengudah nya, lebuh bala murid Jesus nusui Berita Manah, orang ke nyakal sida “ngasut orang ari bansa bukai” merinsaka sida. (SKR. 14:​2, 19) Bekaul enggau Surat Kereja Rasul 14:​2, Menara Jaga 1 Disember 1998 nerangka: “Bala penyakal ke bebansa Judah nulak pesan ke dibai orang Kristian, lalu nyebut utai ti jai pasal sida ngambika orang enda ningaka sida lalu deka begedika sida.”

16. Nama patut dikingatka kitai enti kitai ninga cherita bula?

¹⁶ Sitan ukai semina ngerembaika cherita bula ba abad keterubah. Tang, iya terus “nesatka serata dunya” kemayaharitu. (Pem. 12:9) Enti nuan bisi ninga cherita bula pasal gerempung Jehovah tauka pasal bala menyadi lelaki ke ngiring, kingatka meh utai ke digaga bala munsuh Petara ngagai Jesus enggau orang Kristian ba abad keterubah. Jesus madahka, bala nembiak Jehovah deka disakal lalu orang deka nyebut mayuh utai ti bula  pasal sida. Nya meh utai ke benung nyadi diatu. (Mat. 5:​11, 12) Enti kitai nemu sapa ke benung ngerembaika pemula nya, kitai tentu enggai pechayaka pemula nya, lalu enggau jampat ngelindung diri ari pemula nya. Baka ni kitai ulih ngelindung diri?

17. Baka ni kitai ulih ngelindung diri ari cherita ti bula? (2 Timoti 1:13) (Peda mega kutak “ Nama Patut Digaga lebuh Nuan Ninga Cherita Bula?”)

¹⁷ Anang mendingka cherita bula. Rasul Paul madah enggau terang utai ke patut digaga kitai enti kitai bisi ninga cherita bula. Iya madah ngagai Timoti ngambika ‘ngerara sekeda orang awakka sida enda beratika cherita ti bula’ sereta “anang mendingka cherita bula ke ngenyaika nama Petara.” (1 Tim. 1:​3, 4; 4:7) Perundingka tu: Anak mit engka ngutip utai ti kamah ari lantai lalu nepu nya ke dalam mulut iya. Tang orang ke besai tuai enda ngereja nya laban iya nemu utai nya ulih ngasuh iya sakit. Baka nya mega, kitai enggai mendingka cherita bula laban kitai nemu ari ni penatai cherita nya. Kitai semina bepegai ba “jaku ti manah,” iya nya pemendar.—Bacha 2 Timoti 1:13.

18. Baka ni kitai nunjukka pengandal kitai ngagai gerempung Jehovah?

¹⁸ Kitai semina berandauka tiga iti chara alai gerempung Jehovah udah neladan Jesus. Tang agi bisi mayuh chara ke enda dikerandauka dalam artikel tu. Lebuh nuan belajarka Bup Kudus, uji peratika chara bukai gerempung Jehovah nitihka teladan Jesus. Tulung meh bala menyadi dalam raban gempuru nuan negapka agi pengandal sida ngagai gerempung Jehovah. Nuan mega ngayanka pengandal nuan lebuh nuan terus nyembah Jehovah enggau tetap ati sereta mengkang semak enggau gerempung ke dikena Iya ngereja peneka Iya. (Mas. 37:28) Arapka kitai terus menghargai peluang ulih nyadi sebagi ari nembiak Jehovah ti bepengerindu sereta setia!