1. Likl afta Jiizas ded, ou Jeuova did set op tingz iina im aaganaizieshan?

 ENITAIM Jeuova gi im piipl dem wok fi du, im waahn dem fi dwi’it sortn an sortn wie. (1 Kor. 14:33) Laik im waahn di gud nyuuz bout im Kindom govament fi priich aal uova di worl. (Mat. 24:14) So im put Jiizas inchaaj a da wok de an Jiizas mek shuor se im a dwi’it di wie ou Jeuova waahn it fi du. Likl afta Jiizas go baka evn an dem staat fi av kanggrigieshan a difrant difrant plies, dem pik som elda fi liid dem. (Aks 14:23) An iina Jeruusilem, yu did av di apasl an di elda dem we mek di breda an sista dem iina aal a di kanggrigieshan dem nuo wa Jeuova waahn dem fi du. (Aks 15:2; 16:4) An kaa di breda an sista dem du wa dem man de se, “dem get chrangga an chrangga iina wa dem biliiv an evridie muor an muor piipl jain dem gruup.”​—Aks 16:5.

2. A ou Jeuova a gi im piipl dem di ting dem we dem niid fi sorv im fram 1919 til nou?

² An Jeuova stil a set op tingz sortn an sortn wie fi im piipl dem. Fram 1919, Jiizas a yuuz som man we get pik fi go a evn fi mek wi nuo wa fi du iina di priichin wok an fi gi wi di ting dem we a-go mek wi jraa niera an niera tu Jeuova. a (Luuk 12:42) An wi kyan si se Jeuova a bles wa dem man ya a du.​—Aiz. 60:22; 65:13, 14.

3-4. (a) Tel wi ou it elp wi kaa tingz a ron sortn an sortn wie. (b) Wa wi a-go luk pan iina da lesn ya?

 ³ Ef tingz neehn a ron sortn an sortn wie iina Jeuova aaganaizieshan, wi wudn kyan du di wok we Jiizas gi wi fi du. (Mat. 28:19, 20) Kaa tingk bout it, ef wi neva nuo wich paat fi go priich an evribadi jos a priich wich paat dem waahn fi priich, yu wuda av som plies we difrant difrant piipl a priich iina aafn an som ada plies we nobadi naa go. Yu kyan tingk bout som ada gud tingz we apm kaa tingz a ron sortn an sortn wie?

⁴ Jos laik ou wen Jiizas did de pan di ort im mek tingz ron sortn an sortn wie, a siem so im a mek Jeuova piipl dem du tingz sortn an sortn wie ya nou. Iina da lesn ya, wi a-go luk pan wa Jiizas did du fi mek tingz ron sortn an sortn wie an ou di aaganaizieshan a du tingz laik ou im did dwi’it. An wi a-go luk pan ou wi kyan gwaan shuo se wi a chos iina Jeuova aaganaizieshan tu.

WI AAGANAIZIESHAN A DU TINGZ LAIK OU JIIZAS WUDA DWI’IT

5. Wa a wan wie ou di aaganaizieshan du tingz laik ou Jiizas wuda dwi’it? (Jan 8:28)

⁵ A Jeuova did mek Jiizas nuo wa fi du an wa fi se. Jos laik Jiizas, Jeuova aaganaizieshan yuuz Gad Wod fi mek wi nuo di sitn dem we rait fram di sitn dem we rang. (Riid Jan 8:28; 2 Tim. 3:16, 17) Di bredaz dem aalwiez a elp wi fi memba se wi fi riid Gad Wod an du wa it se. Bot ou it elp wi wen wi du dem sitn ya?

6. Wen wi stodi di Baibl, wa a wan gud sitn we it du fi wi?

⁶ Wen wi yuuz di buk an pamplet dem we wi get fram Jeuova aaganaizieshan wen wi a stodi di Baibl, it elp wi nof nof. Laik wi kyan luk pan di sitn dem we di Baibl a tiich an si ou dem mach op wid di sitn dem we di aaganaizieshan tel wi fi du. Wen wi du dat, it elp wi fi gwaan chos iina Jeuova aaganaizieshan muo an muo.​—Ruo. 12:2.

7. A wa Jiizas did priich bout an a ou Jeuova piipl dem a du laik im?

⁷ Jiizas priich “di gud nyuuz bout Gad Kindom.” (Luuk 4:43, 44) Jiizas aal tel im falara dem se dem fi priich bout di Kindom tu. (Luuk 9:1, 2; 10:8, 9) So tide, evribadi we a paat a Jeuova aaganaizieshan a priich bout Gad Kindom no mata wich paat dem liv, an it no mata umoch ada wok dem a du iina Jeuova aaganaizieshan.

8. A wa a di big ting we wi get fi du?

⁸ A wan big ting se wi kyan priich bout Gad Kindom kaa a no eni an enibadi get da wok ya fi du. Laik wen Jiizas did de pan ort, im neehn mek di diiman dem priich bout im. (Luuk 4:41) An aal tide die, bifuo sumadi kyan staat priich wid di breda an sista dem iina di kanggrigieshan, dem afi mek shuor se dem a du di sitn dem we Jeuova waahn dem fi du. Wi shuo se wi nuo se fi priich tu piipl a wan big ting wen wi priich enitaim wi kyan dwi’it an no mata wich paat wi de. So jos laik Jiizas, wi waahn fi plaant an waata di siid bout Gad Kindom iina piipl aat.​—Mat. 13:3, 23; 1 Kor. 3:6.

9. A ou Jeuova aaganaizieshan a mek piipl nuo Gad niem?

⁹ Jiizas mek piipl nuo Gad niem. Im prie tu im Faada iina evn an se: “Mi mek dem nuo yu niem.” (Jan 17:26, NWT ) An siem laik Jiizas, Jeuova aaganaizieshan du evriting we dem kyan du fi mek ada piipl nuo Gad niem. Di New World Translation of the Holy Scriptures elp wi out uol iip kaa  it put bak Gad niem we it fi de. An paat a da Baibl ya ar di uol a it de iina muo dan 270 difrant difrant langwij. Iina di paat a di Baibl we niem Appendix A4 an A5, it mek wi nuo wa an wa dem du fi mek shuor se Gad niem de wich paat it fi de iina da Baibl ya. An iina di paat we niem Appendix C, we yu kyan fain iina di New World Translation Stodi Baibl, it shuo uol iip a tingz we mek wi nuo se Gad niem wuda de iina di paat a di Baibl we rait iina di Griik langwij 237 taim.

10. Wa yu lorn fram wa da uman ya we liv iina Maiyanmaar se?

¹⁰ Jos laik Jiizas, wi waahn fi du aal a wa wi kyan du fi elp uol iip a piipl nuo Gad niem. Wen wan 67 ier uol uman we liv iina Maiyanmaar lorn Gad niem shi staat fi baal an se: “A di fos iina mi laif mi ier se Gad niem Jeuova. Yu jos tiich mi di bes ting we mi kuda eva lorn.” So jos laik wa apm tu da uman ya, a siem so wen piipl we riili waahn fi lorn bout Gad get fi nuo im niem, a wan big ting fi dem.

GWAAN SHUO SE YU A CHOS IINA JEUOVA AAGANAIZIESHAN

11. A wa di elda dem fi du fi shuo se dem a chos iina Jeuova aaganaizieshan? (Luk pan di picha tu.)

¹¹ Wan a di wie dem we di elda dem kyan shuo se dem chos Jeuova aaganaizieshan a wen dem riid di leta dem an di ada sitn dem we di aaganaizieshan yuuz fi tel dem wa fi du gud, an den chrai dem bes fi du wa dem tel dem fi du. Laik wen di aaganaizieshan tel dem ou fi du di miitn paat dem, an ou dem fi prie wen dem de a di miitn dem, an ou dem fi tek kier a Jiizas Krais shiip dem, dem a-go dwi’it. Wen di elda dem du wa di aaganaizieshan tel dem fi du, it mek di breda an sista dem fiil sief an it mek dem si se dem lov dem tu.

12. (a) Wa mek wi fi du wa di breda dem we a liid wi tel wi fi du? (Iibruu 13:7, 17) (b) Wa mek wi fi tingk bout di gud wiez dem we di elda dem av?

¹² Wen di elda dem tel wi wa fi du wi fi redi fi dwi’it. An wen wi du dat, wi a mek it iiziya fi dem du dem wok. Di Baibl mek wi nuo se wi fi lisn tu di elda dem we a liid wi an du wa dem se. (Riid Iibruu 13:7, 17.) Bot dat naa go iizi fi du aal a di taim kaa dem man ya no porfek. So wi fi aalwiez chrai an tingk bout di gud wiez dem we dem av an no spen taim a tingk bout di bad wiez dem we dem av. Kaa dat a-go mek wi du wa di wan dem we a fait gens Jeuova aaganaizieshan waahn wi fi du. Ef wi staat fi du wa dem waahn wi fi du, wi naa go chos iina Jeuova aaganaizieshan agen. Wa wi kyan du fi nuo wen dem a tel lai pan Jeuova aaganaizieshan so dat wi no biliiv it?

NO MEK ADA PIIPL MEK YU NO GWAAN CHOS IINA JEUOVA AAGANAIZIESHAN

13. A ou di wan dem we a fait gens Jeuova an im aaganaizieshan a chrai fi mek Jeuova piipl dem luk bad?

¹³ Di piipl dem we a fait gens Jeuova an im aaganaizieshan waahn wi fi biliiv se di gud sitn dem we Jeuova aaganaizieshan a du a sitn bad. Laik di Baibl mek wi nuo se ef wi a worship Jeuova wi fi kliin iina evri wie, so wi no fi a du no seks sin an dem ting de an wi fi kip wi badi an wi plies kliin tu. An ef sumadi no tap du di sitn dem we Jeuova se dem no fi du dem fi get put out a di kanggrigieshan. (1 Kor. 5:11-13; 6:9, 10) An kaa wi du wa di Baibl se wi fi du, di piipl dem we a fait gens Jeuova aaganaizieshan mek it luk laik se wi no lov piipl we naa du di sitn dem we wi a du.

14. A uu a mek piipl tel lai pan Jeuova aaganaizieshan?

¹⁴ Chrai fi nuo a uu a mek di piipl dem  fait gens Jeuova an im aaganaizieshan. A Sietan di devl a mek dem dwi’it. Im a “di faada fi aal lai.” (Jan 8:44; Jen. 3:1-5) So im a-go yuuz di piipl dem we a bak im fi tel aal kain-a lai bout Jeuova aaganaizieshan. An a dis im did mek apm tu Jiizas an di Kristiyan dem we did de bout likl afta im did ded.

15. A wa di choch liida dem did du tu Jiizas an im falara dem?

¹⁵ Aalduo Jiizas did porfek an a wok som wol iip a mirikl, Sietan stil mek wol iip a piipl tel lai pan im. Laik di choch liida dem kliem se a ‘di diiman ruula gi Jiizas powa fi ron out diiman.’ (Maak 3:22) An wen dem did a chrai Jiizas, di choch liida dem kliem se im a disrispek Gad an mek di piipl dem beg fi dem kil Jiizas. (Mat. 27:20) An afta dat, wen di wan dem we a fala Jiizas staat fi priich bout di gud nyuuz, di wan dem we did a fait gens im “rail op di piipl dem” fi mek dem mek tingz aad fi di Kristiyan dem. (Aks 14:2, 19) The Watchtower fi Disemba 1, 1998 se dis bout Aks 14:2: “Di Juu dem we did a fait gens di Kristiyan dem neehn jos no waahn lisn tu dem, bot dem did a chrai aad fi tel lai pan dem fi mek di piipl dem we a no Juu ton gens di Kristiyan dem tu.”

16. Wa wi fi memba se ef wi ier dem a se tingz bout di aaganaizieshan we no go so?

¹⁶ Sietan stil a tel bie lai. Im a “chrik di uol worl fi sin gens Gad.” (Rev. 12:9) So ef yu ier dem a taak som bad sitn bout Jeuova aaganaizieshan ar bout di breda dem we a liid wi, memba ou dem did chriit Jiizas an di Kristiyan dem we did de bout afta im ded. A siem so dem a mek tingz aad fi Jeuova piipl tide an a tel lai  pan dem, jos laik wa di Baibl se wuda apm. (Mat. 5:11, 12) So ef wi nuo se a Sietan de baka dem piipl de, dem naa go get fi chrik wi op. So wa wi fi du so dat dem no get fi chrik wi op?

17. Wa wi fi du so dat dem no kech wi wid di tuori dem we no chuu? (2 Timoti 1:13) (Luk pan di paat we niem “ Wa Yu Fi Du Wen Yu Ier Di Tuori Dem We No Chuu.”)

¹⁷ No lisn tu di tuori dem we no chuu. Di apasl Paal tel wi wa fi du ef wi ier tuori we no go so. Im tel Timoti fi ‘waan di piipl dem se dem no fi wies dem taim pan mek op tuori we no mek no sens at aal’ an fi “no av notn fi du wid di tuori dem we no chuu an we a jos fuulinish.” (1 Tim. 1:3, 4; 4:7) Aalduo wan likl biebi mait-a pik op sitn aafa di grong an put it iina im mout, wan big sumadi we nuo wa kyan apm ef dem du dat, naa go dwi’it. A siem so wi no lisn tu di tuori dem we no chuu kaa wi nuo a uu dem a kom fram. An wi naa go let go aafa di sitn dem we wi biliiv.​—Riid 2 Timoti 1:13.

18. Wa wi kyan du fi shuo se wi a gwaan chos iina Jeuova aaganaizieshan?

¹⁸ Wi jos luk pan chrii a di ting dem we Jeuova aaganaizieshan a du we shuo se dem a fala Jiizas. So wen yu a stodi di Baibl, luk fi si ef yu kyan si som ada tingz we Jeuova aaganaizieshan a du we shuo se dem a fala Jiizas. An elp ada breda an sista iina yu kanggrigieshan fi gwaan chos iina Jeuova aaganaizieshan muo an muo. An gwaan sorv Jeuova an stie kluos tu im aaganaizieshan we im a yuuz tide. Wen yu du dem sitn ya, a so yu shuo se yu a gwaan chos iina im aaganaizieshan. (Sa. 37:28) So wi fi aalwiez tangk Jeuova fi wi breda an sista dem we lov im an a stik tu im tu.