1. Tsaban langai hta Yehowa gaw shi a masha ni hpe gara hku atsawm lajang nna galaw shangun wa ai kun?

 YEHOWA gaw shi a masha ni hpe lit langai jaw ai rai yang, atsawm lajang nna galaw shangun mayu ai. (1 Ko 14:33) Ga shadawn, mungkan ting hta kabu gara shiga chyam bra shangun mayu ai. (Mat 24:14) Ndai bungli hpe woi awn na matu Yesu hpe lit jaw da ai. Atsawm lajang nna hkaw tsun na matu Yesu woi awn ai. Tsaban langai hta, Yerusalem kaw na kasa ni, salang ni gaw nawku hpung yawng a matu dawdan ya ai. Dai dawdan lam ni hpe nawku hpung langai hpra hta na myitsu salang ni gaw, hpunau nauna ni hpe bai tsun dan ai. (Kas 14:23; 15:2; 16:4) Dawdan lam shagu hpe hpunau nauna ni hkan sa ai majaw, “hpung masha ni mung dai makam masham lam hta ngang wa nna, lani hte lani law htam wa ma ai.”—Kas 16:5.

2. 1919 kaw nna shi a masha ni hpe Yehowa gara hku lam matsun ai kun?

² Dai ni aten hta mung shi a masha ni hpe atsawm lajang nna galaw shangun ai. 1919 kaw nna namman chya hkam ai la hpung langai hpe Yesu akyu jashawn ai. Shanhte gaw hkaw tsun bungli hpe woi awn ya ai. Yesu a hpang hkan ai ni hpe aten dep Chyum Laika lam matsun ni jaw ai. a (Luk 12:42) Shanhte galaw ai lam ni hpe Yehowa shaman chyeju jaw ai gaw dan dawng ai.—Esa 60:22; 65:13, 14.

3-4. (a) Atsawm lajang nna galaw ai majaw hpa akyu ni lu nga ai kun? (b) Ndai sumhpa hta hpa lam hkaja na kun?

 ³ Atsawm lajang nna n galaw yang, Yesu jaw da ai lit hpe kang ka hkra anhte galaw lu na n re. (Mat 28:19, 20) Ga shadawn, hkaw tsun ra na lawk hpe n masat da ai sha, kam ai hku hkaw tsun mai ai ngu saga. Rai yang, lawk nkau hpe chyahkring hkring hkaw tsun nna, lawk nkau hpe gaw tsep kawp n hkaw tsun ai baw byin mat chye ai. Atsawm lajang nna galaw ai majaw lu ai akyu ni hpe myit yu u.

⁴ Yesu mungkan ga ntsa nga ai aten, shi a hpang hkan ni hpe atsawm lajang nna galaw shangun ai zawn, dai ni aten hta mung atsawm lajang nna galaw shangun nga ai. Yesu gara hku kasi ningli madun ai, Yesu a kasi ningli hpe uhpung gara hku kasi la nga ai, uhpung hpe chyeju dum ai myit gara hku madun mai ai ngu ai hpe ndai sumhpa hta hkaja na re.

YESU A KASI NINGLI HPE KARAI A UHPUNG HKAN SA

5. Yesu a kasi ningli hpe uhpung gara hku hkan sa ai kun? (Yawhan 8:28)

⁵ Sumsing Kawa sharin ya ai hte maren Yesu galaw ai, tsun ai. Yesu a kasi ningli hpe uhpung hkan sa ai. Chyum Laika hpe madung tawn nna sharin shaga ai, lam matsun ya ai. (Yawhan 8:28 hpe hti u; 2 Tm 3:16, 17) Chyum Laika hti na matu, tatut hkan sa na matu ayan sadi jaw ai. Dai hku galaw nga ai majaw hpa akyu lu nga ai kun?

6. Chyum Laika hkaja ai kaw nna akyu lu mai ai ahkyak ai lam langai gaw hpa rai kun?

⁶ Uhpung a laika ni hpe akyu jashawn nna, Chyum Laika hkaja ai shaloi akyu grai lu ai. Uhpung a lam matsun ni Chyum Laika hte maren re ai, n re ai hpe shingdaw yu mai ai. Lam matsun ni Chyum Laika hta madung nga ai hpe chye wa ai shaloi, uhpung hpe grau kam wa ai.—Rom 12:2.

7. Yesu hpa lam hkaw tsun ai kun? Yesu a kasi ningli hpe uhpung gara hku kasi la nga ai kun?

⁷ “Karai Kasang mungdan a kabu gara shiga” hpe Yesu hkaw tsun ai. (Luk 4:43, 44) Sape ni hpe mung hkaw tsun shangun ai. (Luk 9:1, 2; 10:8, 9) Dai majaw, dai ni aten Karai a uhpung kaw nga ai yawng gaw, gara shara kaw nga ai raitim, gara lit hpe lu da ai raitim, Mungdan kabu gara shiga hkaw tsun ai.

8. Anhte hta gara laksan ahkaw ahkang nga ai kun?

⁸ Karai a Mungdan kabu gara shiga hkaw tsun ai laksan ahkaw ahkang hpe masha shagu n lu ai. Ga shadawn, Yesu mungkan ga kaw nga ai aten hta, nhkru ai nat ni hpe shi a lam hkaw mi mung n tsun shangun ai. Dai majaw, kabu gara shiga hkaw tsun ai hpe laksan ahkaw ahkang re ngu anhte sawn la ai. Dai laksan ahkaw ahkang hte ging dan hkra nga ai. Aten shagu shara shagu dang lu ai made hkaw tsun ai hku nna, dai laksan ahkaw ahkang hpe manu shadan ai lam madun ai. Yesu zawn sha, masha ni a myit masin de “mungdan teng man ai nli” gat nna, hka jaw ya mayu ai.—Mat 13:3, 23; 1 Ko 3:6.

9. Karai a mying hpe masha ni chye hkra uhpung gara hku galaw ai kun?

⁹ Karai Kasang a mying masha ni chye hkra Yesu galaw. Sumsing Kawa kaw Yesu akyu hpyi ai shaloi, “na a mying ningsang hpe ngai shanhte e shachye shachyang ma se ai” ngu tsun ai. (Yhn 17:26) Karai a uhpung gaw Yesu hpe kasi la nna, Karai a mying hpe masha ni chye wa hkra dang lu ai made karum ya nga ai. Lam langai gaw,  Mungkan Nnan Ga Gale Chyum Laika hku nna re. Dai hpe amyu ga 270 jan hte Chyum Laika buk ting (sh) adaw achyen hku nna lu nga sai. Dai Chyum Laika hta Karai a mying hpe, myi na shara ni hta bai bang da ya ai. Bungjat A4 hte A5 hta, Karai a mying bai bang da ai hte seng nna ahkri ahkrai lam ni hpe yu mai ai. Ga Shaka Ningnan hta, Karai a mying 237 lang bai bang da ai hte seng nna, Hkaja Chyum Laika (Inglik) Bungjat C hta kahtap nna madun da ai lam ni naw lawm ai.

10. Myanmar mungdan kaw na num langai tsun ai lam kaw na hpa chye lu ai kun?

¹⁰ Yesu zawn anhte mung, masha law lu ai daram law law Karai a mying chye wa hkra karum ya mayu ai. Myanmar mungdan kaw na, asak 67 ning re ai num langai gaw, Karai a mying chye dat ai shaloi myiprwi ing wa nna ndai hku tsun ai: “Karai a mying Yehowa re ai lam shawng nnan na ga ai re. Grai ahkyak ai hpe sharin ya dat ai re.” Karai a mying hpe chye lu ai gaw, myit dingman ai masha ni hpe grai akyu jaw ai lam ndai mabyin gaw madun nga ai.

UHPUNG HPE CHYEJU DUM AI MYIT MATUT MADUN U

11. Uhpung hpe chyeju dum ai lam myitsu salang ni gara hku madun mai ai kun? (Sumla hpe mung yu u.)

¹¹ Uhpung hpe chyeju dum ai lam myitsu salang ni madun mai ai lam langai gaw hpa rai kun? Myitsu salang ni gaw, zuphpawng daw ni gara hku galaw ra na, nawku hpung hta gara hku akyu hpyi ra na, Hkristu a sagu ni hpe gara hku rem ra na hte seng nna lam matsun ni lu la ai. Lam matsun ni hpe myitsu salang ni hkan sa ai gaw, hpunau nauna ni hpe Yehowa a tsawra myit hte lanu lahku ai lam hpe hkamsha lu shangun ai.

12. (a) Woi awn ai ni hpe hpa majaw madat mara nna npu taw ging ai kun? (Hebre 13:7, 17) (b) Woi awn ai ni a kaja ai lam hpe hpa majaw myit maju jung ging ai kun?

¹² Myitsu salang ni kaw na lam matsun lu ai shaloi, anhte sharawng awng let hkan sa ging ai. Rai yang, woi awn ai ni myit atsang sha hte lit gun hpai lu na re. Woi awn ai ni hpe madat mara na matu, lata npu taw na matu, Chyum Laika hta n-gun jaw da ai. (Hebre 13:7, 17 hpe hti u.) Kalang lang chyawm gaw n loi ai. Hpa majaw kun? Myitsu salang ni gaw n hkum tsup ai majaw re. Shanhte a kaja ai lam ni hpe n re ai sha, gawngkya lam ni hpe hkan yu ai rai yang, hpyen wa hpe n-gun jaw ai zawn rai mat na. Hpyen ni gaw Karai a uhpung hpe n kam shangun mayu ai. Anhte gaw myitsu salang ni hpe n kaja ai hku mu wa yang, uhpung hpe mung n kaja ai hku mu wa na, n kam mat na. Hpyen ni a masu ga ni hpe gara hku chye lu ai kun? Gara hku nyet kau lu ai kun?

KADE A MAJAW MUNG CHYEJU DUM AI MYIT HKUM YAWM

13. Uhpung hpe Karai a hpyen ni gara hku jahpoi asawng ai kun?

¹³ Uhpung a kaja ai lam ni hpe, gawngkya lam hku nna mu wa hkra hpyen ni shakut ai. Ga shadawn, hkum hkrang, akyang lailen, nawku dawjau lam hta Karai Kasang gaw anhte hpe san seng shangun mayu ai. Myit malai n la ai sha n san seng ai prat hkrun lam hte matut nga ai wa hpe, nawku hpung kaw na shapraw kau na matu hkang da ai. (1 Ko 5:11-13; 6:9, 10) Dai hkang da ai ga hpe anhte madat ai. Raitim, dai gaw tsawra myit n nga ai, tara jeyang ai, ningmu gyip ai lam re ngu uhpung hpe hpyen ni jahpoi asawng ai.

14. Uhpung a lam n teng n man tsun ai a shingdu hta kadai nga ai kun?

 ¹⁴ Gasat ai lam a npawt hpe chye u. Shut ai shiga ni a shingdu hta Satan nga ai. Shi gaw, “masu magaw ai a kawa mung, rai nga ai.” (Yhn 8:44; Nin 3:1-5) Uhpung a lam n teng ai shiga ni shabra na matu, hpyen ni hpe Satan akyu jashawn ai. Tsaban langai hta dai zawn byin wa ai.

15. Yesu hte shi hpang hkan ai ni hpe nawku htung ningbaw ni hpa galaw ai kun?

¹⁵ Yesu gaw hkum tsup ai Karai a Kasha re. Mauhpa amu ni galaw ai. Raitim, Yesu a lam n teng ai shiga ni shabra na matu, masha nkau hpe Satan akyu jashawn ai. Ga shadawn, Yesu gaw “nat ni a agyi” jaw ai atsam hte nhkru ai nat ni hpe shaden kau ai re ngu nawku htung ningbaw ni tsun ai. (Mrk 3:22) Yesu san jep hkrum ai aten hta, Karai hpe jahpoi asawng ai wa ngu tsun ai. Sat na matu hpyi shawn u ngu, shawa hpawng hpe shadut ai. (Mat 27:20) Kabu gara shiga hkaw tsun ai Yesu a hpang hkan ni hpe mung nju ndawng na matu, zingri na matu “masha ni hpe myit shadut” ma ai. (Kas 14:2, 19) 1998, December 1, Sin Langchyi hta, Kasa 14:2 hte seng nna ndai zawn tsun da ai: “Yuda ninghkap ai ni gaw, shanhte nan shiga hpe nyet kau ai hta n-ga, Hkristan ni hpe maigan masha ni nju hkra jahpyak wa ai.”

16. N teng ai shiga ni hpe na ai shaloi hpa hpe dum ging ai kun?

¹⁶ Dai ni aten du hkra mung, masha ni hpe Satan hkalem nga ai. Shi gaw “mungkan ga ting hpe hkalem” nga ai. (Shr 12:9) Dai majaw, uhpung a lam, woi awn nga ai hpunau ni a lam n teng ai shiga ni na ai shaloi, Yesu, tsaban langai na Hkristan ni hpa hkrum wa  ai hpe dum nga ga. Dai ni aten, Karai a masha ni gaw Chyum Laika hta tau hkrau tsun da ai hte maren, ninghkap hkrum nga ai, jahpyak hkrum nga ai. (Mat 5:11, 12) N teng ai shiga ni a shingdu hta kadai nga ai hpe chye da yang, kalang ta nyet kau ai rai yang, anhte hkalem hkrum na n re. Gara hku nyet kau lu ai kun?

17. N teng ai shiga ni hpe gara hku koi lu ai kun? (2 Timohti 1:13) (“ Ga Law Ga La Shapraw Ai Maumawi Ga Hpe Nyet Kau U” ngu ai lawk hpe mung yu u.)

¹⁷ N teng ai shiga ni hpe nyet kau u. N teng ai shiga ni na ai shaloi, hpa galaw ra na hpe kasa Pawlu asan sha matsun da ai. “Sharin shaga ai lam kaga,” “ga law ga la shapraw ai maumawi ga . . . hpe n hkan shachyut na matu” hte “N san n seng ai . . . ga hpe yeng kau” na matu “masha nkau mi hpe daru” sharin na matu Timohti hpe Pawlu tsun ai. (1 Tm 1:3, 4; 4:7) Ma langai gaw, chyinghkyen kaw na matsat shabat arai hpe n-gup de bang chye tim, masha kaba langai gaw dai zawn galoi mung galaw na n re. Shoihpa byin chye ai hpe chye da ai majaw re. Anhte mung n teng ai shiga ni gara kaw na sa wa ai hpe chye da ai majaw nyet kau ai. “Teng man ai masan maseng mungga ningli” hpe hkan sa ai.—2 Timohti 1:13 hpe hti u.

18. Uhpung hpe chyeju dum ai lam gara hku madun lu ai kun?

¹⁸ Yesu hpe kasi la ai uhpung hpe chyeju dum ai lam madun mai ai lam law law kaw na, masum hpe sha bawngban wa ai. Chyum Laika hkaja ai shaloi, kaga lam ni hpe tam yu u. Uhpung hpe chyeju dum chye na matu hpunau nauna ni hpe karum ya u. Yehowa hpe sadi dung let nawku ai, shi a myit ra ai lam ngut kre na matu, Yehowa akyu jashawn nga ai uhpung hte jawm galaw ai hku nna, chyeju dum ai lam matut madun u. (Shk 37:28) Sadi dung ai, tsawra myit nga ai Karai a amyu masha byin lu ai majaw, chyeju dum ai lam ayan madun u.