1. Modi ki povu di Jeová staba organizadu na ténpu di apóstlus?

 SÉNPRI ki Jeová ta da se povu un trabadju pa es faze, el krê pa es faze-l di manera organizadu. (1 Kor. 14:33) Pur izénplu, vontadi di Deus é pa notísias sábi pregadu na téra interu. (Mat. 24:14) Jeová da Jizus responsabilidadi di orienta es trabadju, i Jizus sta ta orienta kel trabadju li pa el fazedu di manera organizadu. Na ténpu di apóstlus, kantu kongregasons formadu na txeu lugar, ansions diziginadu pa da orientason i pa toma kónta di kongregason. (Atus 14:23) Na Jiruzalen tinha un grupu di apóstlus ku ansions ki ta tomaba disizons, i tudu kongregason ta sigiba ses orientason. (Atus 15:2; 16:4) Pamodi es ta sigiba kes orientason, “kes kongregason ba ta fika más fórti na fé i es ba ta omenta”. — Atus 16:5.

2. Désdi anu 1919, modi ki Jeová sta ta orienta se povu i ta da-s kumida spritual?

² Oji tanbê, Jeová sta kontinua ta organiza se povu. Désdi anu 1919, Jizus sta ta uza un grupu pikinoti di irmons skodjedu ku spritu santu pa organiza trabadju di pregason i pa da se povu kumida spritual. a (Luk. 12:42) Nu ta odja klaru ma Jeová sta ta abênsua trabadju ki kes irmon sta ta faze. — Isa. 60:22; 65:13, 14.

3-4. (a) Da un izénplu ki ta mostra modi ki sta organizadu ta djuda-nu. (b) Kuzê ki nu sta ben odja na kel studu li?

 ³ Sen organizason di Jeová nu ka ta konsigi fazeba kel trabadju ki Jizus da-nu pa nu faze. (Mat. 28:19, 20) Pur izénplu, imajina si ka tinha un tiritóriu diziginadu pa kada kongregason i kada irmon ta pregaba sima el kreba. Talvês nu ta pregaba na un lugar txeu bês, má otus lugar ta fikaba sen prega. Bu ta konsigi pensa na otus manera ki sta organizadu ta djuda-nu?

⁴ Sima Jizus organiza se sigidoris kantu el staba na téra, el sta ta kontinua ta organiza se povu oji. Na kel studu li, nu sta ben odja izénplu ki Jizus dexa i modi ki nos organizason sta ta sigi se izénplu. Tanbê, nu sta ben odja modi ki nu pode mostra ma nu ta ruspeta i ma nu ta kunfia na organizason di Jeová.

NOS ORGANIZASON TA SIGI IZÉNPLU DI JIZUS

5. Kal ki é un di kes manera ki nu ta sigi izénplu di Jizus? (Juan 8:28)

⁵ Jizus prende kuzê ki el ta faze i kuzê ki el ta fla ku se Pai. Organizason di Jeová ta sigi izénplu di Jizus, i es ta inxina i da orientason ku bazi na Palavra di Deus. (Lé Juan 8:28; 2 Tim. 3:16, 17) Sénpri nu ta lenbradu pa nu lé i pa nu faze sima nu ta prende na Palavra di Deus. Ki bons rezultadu nu ta ten si nu sigi kel konsedju li?

6. Pamodi ki é inportanti studa Bíblia?

⁶ Nu ta tra txeu pruvetu óras ki nu ta uza nos publikason pa studa Bíblia. Pur izénplu, nu ta konsigi konpara kuzê ki Bíblia ta fla ku kes orientason ki nu ta resebe di organizason di Jeová. Óras ki nu ta odja ma kes orientason ki nu ta resebe ten bazi na Bíblia, nos kunfiansa na organizason di Jeová ta bira más fórti. — Rom. 12:2.

7. Ki mensajen Jizus prega i modi ki organizason di Jeová ta sigi se izénplu?

⁷ Jizus ta pregaba “kes notísia sábi di Reinu di Deus”. (Luk. 4:43, 44) Tanbê, Jizus manda se disiplus pa prega sobri Reinu. (Luk. 9:1, 2; 10:8, 9) Oji tudu kes algen ki ta faze párti di organizason di Jeová ta prega mensajen di notísias sábi di Reinu, ka ta inporta na undi ki es ta vive ô kantu responsabilidadi ki es ten.

8. Ki priviléjiu nu ten?

⁸ Nu ta da valor pa kel priviléjiu ki nu ten di pâpia sobri verdadis di Reinu di Deus ku otus algen! É ka tudu algen ki ten kel priviléjiu li. Pur izénplu, kantu Jizus staba na téra, el ka dexa pa dimónis da tistimunhu sobri el. (Luk. 4:41) Oji, antis di un algen kumesa ta prega ku Tistimunhas di Jeová, el meste vive di un manera ki ta agrada Jeová. Nu ta mostra ma nu ta da valor pa kel priviléjiu li óras ki nu ta pruveta tudu oportunidadi pa nu prega. Sima Jizus, nos obijetivu é planta i rega simentis di verdadi di Reinu na korason di pesoas. — Mat. 13:3, 23; 1 Kor. 3:6.

9. Modi ki organizason di Jeová ta poi otus algen ta konxe nómi di Deus?

⁹ Jizus inxina nómi di Deus. Na un orason ki Jizus faze pa se Pai, el fla: “N pô-s ta konxe bu nómi”. (Juan 17:26) Organizason di Jeová ta imita izénplu di Jizus óras ki es ta faze tudu kel ki es ta pode pa es djuda otus algen konxe nómi di Deus. Un di kes manera ki organizason di Jeová ta faze kel-li é através di Traduson di Mundu Novu. Kel traduson li  torna poi nómi di Deus na kes lugar ki el ta parseba na Bíblia, na kes língua ki Bíblia skrebedu. Nu pode atxa kel traduson di Bíblia li interu, ô párti di el, na más di 270 língua. Na Apéndisi A4 i A5 di kel traduson li na purtugês, bu pode prende más sobri pamodi i modi ki nómi di Deus podu na Bíblia otu bês. Apéndisi C, ki sta na Bíblia di studu na purtugês, ta da-nu más próva di pamodi ki nómi di Deus debe parse 237 bês na kes livru di Mateus ti Apokalipse.

10. Kuzê ki bu prende di kes palavra ki un mudjer ki ta mora na Mianmar fla?

¹⁰ Sima Jizus, nu krê djuda más algen ki nu ta pode konxe nómi di Deus. Kantu un mudjer na Mianmar, ki tinha 67 anu, prende ma Deus ten un nómi, el kumesa ta txora, i el fla: “Kel-li é primeru bês na nha vida ki N obi ma nómi di Deus é Jeová... N prende kel kuza más inportanti ki N podia prendeba.” Kel spiriénsia li ta mostra ma prende nómi di Deus pode muda vida di un algen.

KONTINUA TA MOSTRA KUNFIANSA NA NOS ORGANIZASON

11. Modi ki ansions pode mostra ma es ta da valor pa organizason di Jeová? (Odja fotus.)

¹¹ Kal ki é un di kes manera ki ansions pode mostra ma es ta kunfia na organizason di Deus? Óras ki ansions ta resebe orientason di organizason, es debe le-s ku kuidadu i aplika kes orientason di midjór manera ki es ta pode. Pur izénplu, es ta resebe orientasons, ka sô sobri modi ki es ta faze kes párti di runion i modi ki es ta faze orason pa kongregason, má tanbê modi ki es ta kuida di ovelhas di Kristu. Óras ki ansions ta sigi kes orientason ki ta ben di organizason di Jeová, irmons ku irmans ta xinti ma Jeová ta ama-s i ta preokupa ku es.

12. (a) Pamodi ki nu debe obi ku kes ki ta da-nu orientason? (Ebreus 13:7, 17) (b) Pamodi ki nu debe konsentra na kes bon kualidadi di kes ki ta da-nu orientason?

¹² Óras ki nu resebe orientason di ansions, nu debe sta prontu pa sigi-l. Si nu faze asi, ta fika más fásil pa ansions faze ses trabadju. Bíblia ta insentiva-nu pa nu obi i pa nu seta autoridadi di kes ki ta orienta-nu. (Lé Ebreus 13:7, 17.) Alvês faze kel-li pode ser difísil. Pamodi? Pamodi kes ómi li é inperfeitu. Má, si nu konsentra na ses fadja, envês di konsentra na ses bon kualidadi, nu sta ta djuda nos inimigu. Di ki manera? Nu ta perde kunfiansa na organizason di Jeová. É kel-li própi ki nos inimigu krê. Kuzê ki nu meste faze pa nu sabe ki mintiras ki nos inimigus ta konta i modi ki nu pode ivita-s?

KA BU DEXA OTUS ALGEN PÔ-U TA PERDE BU KUNFIANSA NA ORGANIZASON

13. Modi ki inimigus di Deus ta tenta prujudika organizason di Jeová?

¹³ Inimigus di Deus ta tenta poi kes kuza dretu sobri organizason di Jeová ta parse mariadu. Pur izénplu, nu ta prende na Palavra di Deus ma Jeová krê pa nu mante nos korpu linpu, pa nu ten un konportamentu linpu i pa nu adora-l di manera ki el ta aprova. El ta fla ma kalker algen ki kontinua ta faze kuzas mariadu i ki ka muda ses konportamentu, ka pode faze párti di kongregason. (1 Kor. 5:11-13; 6:9, 10) Nu ta obi ku kel lei li ki sta na Bíblia. Má pamodi kel-li, nos inimigus ta fla ma nu ka ta ama pesoas, ma nu ta kondena-s i ma nu ka ta seta ningen ki é diferenti.

14. Kenha ki ta spadja mintiras sobri organizason di Jeová?

 ¹⁴ Rekonhese kenha ki sta ta ataka organizason di Jeová. Satanás ta spadja mintiras sobri organizason di Jeová. El é “pai di mintira.” (Juan 8:44; Gén. 3:1-5) Pur isu, nu pode spera ma Satanás ta uza alguns algen pa spadja informasons falsu sobri organizason di Jeová. Foi kel-li ki kontise ku Jizus i kes kriston na ténpu di apóstlus.

15. Kuzê ki xéfis di relijion faze ku Jizus i se sigidoris?

¹⁵ Enbóra Jizus, Fidju di Deus, éra perfeitu i el faze milagris, Satanás uza alguns algen pa spadja txeu mintira sobri el. Pur izénplu, xéfis di relijion ta flaba pesoas ma Jizus ta traba dimónis ku “puder di xéfi di dimónis.” (Mar. 3:22) Kantu Jizus staba ta julgadu, kes xéfi di relijion akuza-l di pâpia kóntra Deus i es konvense povu pa pidi pa mata-l. (Mat. 27:20) Dipôs, kantu sigidoris di Jizus staba ta prega notísias sábi, kes algen ki ta pirsigiba es “poi kes algen di nason ta fika xatiadu”, asi pa es pode pirsigiba kes sigidor di Jizus. (Atus 14:2, 19) Sentinéla di 1 di dizenbru di 1998, ta fla kel-li sobri Atus 14:2: “Kes algen ki ta apoiaba Satanás ka seta kel mensajen ki sigidoris di Jizus ta pregaba i tanbê es fla kuzas mariadu sobri kes sigidor di Jizus. Es faze kel-li pa pesoas ka obiba es i pa odiaba es.”

16. Di kuzê ki nu meste lenbra si nu obi un stória falsu?

¹⁶ Oji Satanás ta kontinua ta spadja mintiras. Inda el sta ta “ingana téra interu.” (Apo. 12:9) Si bu obi un kuza negativu di organizason di Jeová ô di  kes irmon ki ta da-nu orientason, lenbra modi ki inimigus di Deus trata Jizus i se disiplus na ténpu di apóstlus. Oji, povu di Deus sta ta pirsigidu i pesoas sta ta pâpia mal di es sima Bíblia dja flaba. (Mat. 5:11, 12) Nu ka ta kridita na kes stória falsu si nu lenbra kenha ki ta konta-s i si nu faze algun kuza lógu pa nu proteje nos kabésa. Modi ki nu pode proteje nos kabésa?

17. Modi ki nu pode ka dexa stórias falsu prujudika-nu? (2 Timótiu 1:13) (Odja kuadru “ Modi ki nu ta nega stórias falsu”.)

¹⁷ Nega kes stória falsu. Apóstlu Paulu fla-nu klaru kuzê ki nu debe faze óras ki nu obi stórias falsu. El fla Timótiu pa “manda sértus algen pa es ka... presta atenson na stórias falsu” i pa es “nega kes stória falsu”. (1 Tim. 1:3, 4; 4:7) Pensa na kel-li: Un mininu pikinoti pode panha un kuza suju na txon i poi na bóka, má un algen grandi nunka ka ta fazeba kel-li pamodi el sabe ma el pode fika duenti. Nu ta nega kes stória falsu pamodi nu sabe di kenha ki kes mintira ta ben. Nu ta obi sô “bons palavra” di verdadi. — Lé 2 Timótiu 1:13.

18. Modi ki nu pode mostra ma nu ta da valor pa organizason di Jeová?

¹⁸ Dja nu odja três manera ki organizason di Deus ta imita Jizus. Timenti bu ta studa Bíblia, tenta odja otus manera ki organizason di Deus ta sigi izénplu di Jizus. Djuda otus algen na kongregason kunfia na se organizason más txeu. I kontinua ta sirbi Jeová di manera lial i mante pértu di se organizason ki el sta ta uza pa faze se vontadi. Di kel manera li, bu ta mostra ma bu ta da valor pa se organizason. (Sal. 37:28) Nu kontinua ta da valor pa priviléjiu ki nu ten di faze párti di povu di Jeová ki ta ama-l i ki é lial pa el.