1. Nĩ mũbango ũrĩkũ warĩ kuo karine-inĩ ya mbere harĩ andũ a Jehova?

 RĨRĨA rĩothe Jehova ahe andũ ake wĩra, erĩgagĩrĩra maũhingie na njĩra ĩrĩ na mũbango. (1 Kor. 14:33) Kwa ngerekano, Ngai nĩ endaga ũhoro ũrĩa mwega ũhunjio thĩinĩ wa thĩ yothe. (Mat. 24:14) Jehova nĩ athuurĩte Jesu arũgamĩrĩre wĩra ũcio. Na Jesu nĩ atigĩrĩire atĩ wĩra ũcio nĩ ũrarutwo na njĩra ĩrĩ na mũbango. Karine-inĩ ya mbere rĩrĩa ciũngano ciaambagĩrĩrio kũndũ gũtiganĩte, nĩ kwaamũragwo athuri a kĩũngano nĩguo maheanage motaaro na magatongoragia maũndũ. (Atũm. 14:23) Ningĩ thĩinĩ wa Jerusalemu, atũmwo na athuri a kĩama kĩrĩa gĩatongoragia nĩ maatuaga matua marĩa maabatiĩ kũrũmĩrĩrũo nĩ ciũngano ciothe. (Atũm. 15:2; 16:4) Nĩ ũndũ wa Akristiano gwathĩkĩra ũtongoria ũcio maamũkagĩra, “ciũngano [ciathiaga] na mbere kũgĩa na hinya ũhoro-inĩ wa wĩtĩkio na kuongerereka.”—Atũm. 16:5.

2. Jehova akoretwo akĩheana ũtongoria na irio cia kĩĩroho atĩa kuuma mwaka wa 1919?

² O na ũmũthĩ, Jehova atongoragia andũ ake na njĩra ĩrĩ na mũbango. Kuuma mwaka wa 1919, Jesu akoretwo akĩhũthĩra gakundi kanini ka ariũ a Ithe witũ aitĩrĩrie maguta kũbanga wĩra wa kũhunjia, na kũhe arũmĩrĩri ake irio cia kĩĩroho. a (Luk. 12:42) Hatarĩ nganja Jehova nĩ ararathima wĩra wao.—Isa. 60:22; 65:​13, 14.

3-4. (a) Heana ngerekano ĩronania ũrĩa tũgunĩkaga nĩ ũndũ wa gũtongorio na njĩra ĩrĩ na mũbango. (b) Nĩ maũndũ marĩkũ tũkwarĩrĩria gĩcunjĩ-inĩ gĩkĩ?

 ³ Kũngĩaga gũkorũo na mũbango, no tũremwo kũhingia wĩra ũrĩa Jesu atũheete. (Mat. 28:​19, 20) Kwa ngerekano, ta wĩcirie korũo ciũngano itikoragwo igaĩirũo icigo cia kũhunjia; o mũndũ angĩhunjagia kũrĩa ekwenda. Ũndũ ũcio no ũtũme icigo imwe ikahunjagio kaingĩ nĩ ahunjia matiganĩte, no ingĩ ikaga kũhunjio o na hanini. Hatarĩ nganja kũrĩ na njĩra ingĩ tũgunĩkaga nacio nĩ ũndũ wa gũtongorio na njĩra ĩrĩ na mũbango.

⁴ O ta ũrĩa Jesu aatongoragia arũmĩrĩri ake na njĩra ĩrĩ na mũbango rĩrĩa aarĩ gũkũ thĩ, noguo atũtongoragia nginya ũmũthĩ ũyũ. Gĩcunjĩ-inĩ gĩkĩ tũkwarĩrĩria kĩonereria kĩrĩa Jesu aatũigĩire, na ũrĩa ithondeka rĩa Jehova rĩrũmagĩrĩra kĩonereria kĩu. Ningĩ nĩ tũkwarĩrĩria ũrĩa tũngĩonania atĩ nĩ twĩhokete ithondeka rĩa Jehova.

ITHONDEKA RITŨ NĨ RĨRŨMAGĨRĨRA KĨONERERIA KĨA JESU

5. Nĩ na njĩra ĩrĩkũ ĩmwe ithondeka ritũ rĩrũmagĩrĩra kĩonereria kĩa Jesu? (Johana 8:28)

⁵ Maũndũ marĩa Jesu aaugaga na ageka eerutĩte kuuma kũrĩ Ithe. Ithondeka rĩa Jehova nĩ rĩrũmagĩrĩra kĩonereria kĩa Jesu tondũ ũtongoria ũrĩa rĩheanaga na maũndũ marĩa rĩrutanaga makoragwo maumĩte Kiugo-inĩ kĩa Ngai. (Thoma Johana 8:28; 2 Tim. 3:​16, 17) Nĩ tũririkanagio kaingĩ bata wa gũthoma Kiugo kĩa Ngai na kũhũthĩra maũndũ marĩa tweruta. Kũrũmĩrĩra ũtaaro ũcio gũtũgunaga atĩa?

6. Nĩ njĩra ĩrĩkũ ĩmwe tũgunĩkaga nayo tweruta Bibilia?

⁶ Nĩ tũgunĩkaga mũno rĩrĩa tweruta Bibilia tũgĩteithĩrĩrio nĩ mabuku maitũ. Kwa ngerekano, nĩ tũhotaga kũringithania ũrĩa Bibilia ĩrauga na ũtongoria ũrĩa tũraheo nĩ ithondeka ritũ. Rĩrĩa tuona ũrĩa ũtongoria ũcio ũratwarana na Maandĩko, nĩ twĩhokaga ithondeka rĩa Jehova o na makĩria.—Rom. 12:2.

7. Jesu aahunjagia ndũmĩrĩri ĩrĩkũ, na ithondeka rĩa Jehova rĩrũmagĩrĩra atĩa kĩonereria gĩake?

⁷ Jesu nĩ aahunjagia “ũhoro ũrĩa mwega wa Ũthamaki wa Ngai.” (Luk. 4:​43, 44) Nĩ aathire arutwo ake o nao mahunjagie ũhoro wa Ũthamaki. (Luk. 9:​1, 2; 10:​8, 9) Ũmũthĩ ũyũ andũ arĩa othe marĩ ithondeka-inĩ rĩa Jehova nĩ mahunjagia ndũmĩrĩri ya Ũthamaki gũtekũmakania kũrĩa maikaraga, kana maũndũ marĩa mehokeirũo ithondeka-inĩ.

8. Nĩ mweke ũrĩkũ wa mwanya tũheetwo?

⁸ Tuonaga ũrĩ mweke wa mwanya kũhunjĩria andũ ũhoro wa ma wĩgiĩ Ũthamaki wa Ngai. No ti mũndũ o wothe ũheagwo mweke ũcio. Kwa ngerekano, rĩrĩa Jesu aarĩ gũkũ thĩ, ndetĩkĩririe ndaimono irute ũira ũmwĩgiĩ. (Luk. 4:41) O na mahinda-inĩ maya, nĩgetha mũndũ ambĩrĩrie kũhunjia hamwe na kĩũngano, no mũhaka akorũo agĩtũũra kũringana na ithimi cia Jehova. Tuonanagia atĩ nĩ tuonaga mweke ũcio ũrĩ wa mwanya na njĩra ya kũhunjĩria andũ harĩa hothe mangĩoneka. O ta Jesu, muoroto witũ nĩ kũhanda mbeũ cia Ũthamaki ngoro-inĩ cia andũ na gũciitĩrĩria maĩ.—Mat. 13:​3, 23; 1 Kor. 3:6.

9. Ithondeka rĩmenyithanagia rĩĩtwa rĩa Ngai atĩa?

⁹ Jesu nĩ aamenyithanirie rĩĩtwa rĩa Ngai. Eerire Ithe ũũ mahoya-inĩ: “Nĩ ndĩmamenyithĩtie rĩĩtwa rĩaku.” (Joh. 17:26) Ithondeka rĩa Jehova nĩ rĩrũmagĩrĩra kĩonereria kĩa Jesu na njĩra ya gwĩka ũrĩa wothe rĩngĩhota gũteithia andũ kũmenya rĩĩtwa rĩa Ngai. Bibilia ya New World Translation nĩ ĩhingĩtie itemi rĩu na njĩra nene, tondũ nĩ ĩcoketie rĩĩtwa rĩa Ngai harĩa hothe rĩarĩ Maandĩko-inĩ ma tene. Bibilia ĩyo yonekaga ĩrĩ yothe kana icunjĩ ciayo na thiomi makĩria ma 270. Thĩinĩ wa  Ũhoro Muongerere A4 na A5 thĩinĩ wa New World Translation, no wone ũhoro makĩria wĩgiĩ gũcokio kwa rĩĩtwa rĩa Ngai thĩinĩ wa Bibilia ĩyo. Ũhoro Muongerere C, ũrĩa ũrĩ thĩinĩ wa Bibilia ya Wĩruti ya Gĩthũngũ, nĩ ũtaarĩirie na njĩra ndikĩru gĩtũmi gĩa gũcokia rĩĩtwa rĩa Ngai maita 237 thĩinĩ wa Maandĩko ma Gĩkristiano ma Kĩngiriki.

10. Ũreruta atĩa kuumana na ciugo icio ciaugirũo nĩ mũtumia ũmwe kuuma bũrũri wa Myanmar?

¹⁰ O ta Jesu, nĩ twĩrutanagĩria gũteithia andũ aingĩ ũrĩa wothe kũngĩhoteka mamenye rĩĩtwa rĩa Ngai. Mũtumia ũmwe wa mĩaka 67 kuuma Myanmar nĩ aaitire maithori thutha wa kũmenya rĩĩtwa rĩa Ngai. Aaugire: “Rĩrĩ nĩrĩo riita rĩakwa rĩa mbere kũigua atĩ Ngai etagwo Jehova. . . . Nĩ wanduta ũndũ ũrĩa wa bata mũno itarĩ ndamenya.” Ũndũ ũcio ũronania atĩ kũmenya rĩĩtwa rĩa Ngai no kũhutie na njĩra nene andũ arĩa marĩ na ngoro njega.

THIĨ NA MBERE KWĨHOKA ITHONDEKA RITŨ

11. Athuri a kĩũngano mangĩonania atĩa atĩ nĩ mehokete ithondeka rĩa Jehova? (Ningĩ rora mbica.)

¹¹ Athuri a kĩũngano mangĩonania atĩa atĩ nĩ mehokete ithondeka rĩa Jehova? Rĩrĩa mamũkĩra ũtongoria, mabatiĩ kũũthoma na kinyi, na meke ũrĩa wothe mangĩhota nĩguo maũrũmĩrĩre. Kwa ngerekano, nĩ mamũkagĩra ũtongoria wĩgiĩ ũrĩa mabatiĩ kũruta tũcunjĩ mĩcemanio-inĩ, ũrĩa mabatiĩ kũhoithia kĩũngano-inĩ, na ũrĩa mangĩrũmbũiya ngʼondu cia Kristo. Rĩrĩa athuri marũmĩrĩra ũtongoria wa ithondeka, nĩ matũmaga aarĩ na ariũ a Ithe witũ maigue atĩ Jehova nĩ amendete na nĩ amarũmbũyagia.

12. (a) Twagĩrĩirũo gwathĩkĩra arĩa matongoragia maũndũ nĩkĩ? (Ahibirania 13:​7, 17) (b) Tũbatiĩ kũroraga ngumo ciao iria njega nĩkĩ?

¹² Rĩrĩa twaheo ũtongoria nĩ athuri a kĩũngano, twagĩrĩirũo kũũrũmĩrĩra twĩyendeire. Tweka ũguo, nĩ tũrĩmahũthagĩria wĩra ũrĩa mehokeirũo. Bibilia ĩtwĩkĩraga ngoro twathĩkagĩre arĩa matongoragia maũndũ na tũmenyihagĩrie. (Thoma Ahibirania 13:​7, 17.) Rĩmwe ti hahũthũ gwĩka ũguo, tondũ ariũ a Ithe witũ acio ti akinyanĩru. No tũngĩroraga mũno mawathe mao handũ ha ngumo ciao njega, tũngĩkorũo tũkĩnyita mbaru thũ citũ. Na njĩra ĩrĩkũ? No twambĩrĩrie gwĩkĩrĩra nganja ithondeka rĩa Jehova, na ũguo nĩguo akararia aitũ mangĩenda twĩke. Tũngĩka atĩa nĩguo tũhote gũkũũrana na kũregana na maheeni marĩa thũ citũ itheremagia?

NDŨKAREKE ARĨA ANGĨ MATŨME ŨTIGE KWĨHOKA ITHONDEKA

13. Thũ cia Jehova igeragia atĩa kũmenereria ithondeka rĩake?

¹³ Thũ cia Jehova nĩ igeragia kũmenereria maũndũ mega marĩa ithondeka rĩake rĩkaga. Kwa ngerekano, Bibilia nĩ ĩtũrutĩte atĩ Jehova erĩgagĩrĩra athathaiya ake makorũo marĩ atheru kĩĩmwĩrĩ, kĩĩmĩtugo, na kĩĩroho. Augĩte atĩ mũndũ wothe wĩingĩranagia na mĩtugo ĩtarĩ mĩtheru na akaga kwĩrira agĩrĩire kweherio kĩũngano-inĩ. (1 Kor. 5:​11-13; 6:​9, 10) Nĩ twathĩkagĩra ũtongoria ũcio wa Kĩĩmandĩko. Ũndũ ũcio ũtũmaga akararia aitũ mauge atĩ tũtiendete andũ, tũtirĩ tha, na atĩ nĩ tũrĩ mũthutũkanio.

14. Nũũ ũkoragwo arĩ kĩhumo kĩa maheeni marĩa matheremagio megiĩ ithondeka?

¹⁴ Menya nũũ ũkoragwo agĩtũũkĩrĩra. Shaitani nĩwe kĩhumo kĩa maheeni marĩa matheremagio megiĩ ithondeka. Bibilia yugaga nĩwe “ithe wa maheeni.” (Joh. 8:44; Kĩam. 3:​1-5) Kwoguo no twĩrĩgĩrĩre Shaitani ahũthĩre thũ citũ gũtheremia maheeni megiĩ ithondeka rĩa Jehova. Ũguo noguo kwarĩ karine-inĩ ya mbere.

15. Nĩ maũndũ marĩkũ atongoria a ndini meekire Jesu na arũmĩrĩri ake?

 ¹⁵ O na gũtuĩka Jesu, Mũrũ wa Ngai, aarĩ mũkinyanĩru na nĩ aaringire ciama cia magegania, Shaitani nĩ aahũthĩrire andũ amwe gũtheremia maheeni maingĩ mamwĩgiĩ. Kwa ngerekano, atongoria a ndini meeraga andũ atĩ hinya ũrĩa Jesu aahũthagĩra kũingata ndaimono aaheetwo nĩ “mũnene wa ndaimono.” (Mar. 3:22) Rĩrĩa Jesu aaciirithagio, atongoria a ndini nĩ maamũthitangĩire atĩ nĩ arumĩte Ngai na magĩcogera kĩrĩndĩ kiuge oragwo. (Mat. 27:20) Thutha-inĩ rĩrĩa arũmĩrĩri a Kristo maahunjagia ũhoro ũrĩa mwega, arĩa maamakararagia nĩ ‘maacogerire andũ a ndũrĩrĩ na makĩmathũkia meciria’ nĩguo manyarire Akristiano acio. (Atũm. 14:​2, 19) Ngathĩti ya Mũrangĩri ya Dicemba 1, 1998, ĩkĩarĩrĩria Atũmwo 14:2 yaugire atĩ andũ arĩa maanyitaga Shaitani mbaru nĩ maaregire ndũmĩrĩri ĩrĩa Akristiano maahunjagia, na ningĩ magĩtheremia ndeto njũru cimegiĩ nĩguo andũ mamathũũre na matikamathikĩrĩrie.

16. Nĩ ũndũ ũrĩkũ twagĩrĩirũo kũririkana rĩrĩa twaigua ngʼano cia maheeni?

¹⁶ To karine-inĩ ya mbere Shaitani aatheremirie maheeni. O na ũmũthĩ ũyũ, no ‘ahĩtithagia thĩ yothe ĩrĩa ĩikaragwo.’ (Kũg. 12:9) Kwoguo ũngĩigua ndeto njũru ciĩgiĩ ithondeka ritũ kana ariũ a Ithe witũ arĩa matongoragia maũndũ, ririkanaga ũrĩa thũ cia Ngai ciekire Jesu na arutwo ake karine-inĩ ya mbere. Mahinda-inĩ maya andũ a Jehova nĩ maranyarirũo na magathũkĩrio rĩĩtwa o ta ũrĩa Bibilia yarathĩte. (Mat. 5:​11, 12) Tũtingĩhĩngĩcwo nĩ ngʼano cia maheeni tũngĩmenya kĩhumo gĩacio na tuoe ikinya o na ihenya. Nĩ ikinya rĩrĩkũ twagĩrĩirũo kuoya?

17. Tũngĩka atĩa nĩguo tũtikahĩngĩcwo nĩ ngʼano cia maheeni? (2 Timotheo 1:13) (Ningĩ rora gathandũkũ, “ Ũrĩa Ũngĩka Ũngĩigua Ngʼano cia Maheeni.”)

 ¹⁷ Regana na ngʼano cia maheeni. Mũtũmwo Paulo nĩ oonanirie wega ũrĩa tũbatiĩ gwĩka tũngĩigua ngʼano cia maheeni. Eerire Timotheo ‘athe andũ amwe matigathikĩrĩrie ngʼano cia maheeni’ na areganage na “ngʼano cia maheeni cia kwagĩra Ngai gĩtĩo.” (1 Tim. 1:​3, 4; 4:7) Ta wĩcirie ũndũ ũyũ: Kaana no koe kĩndũ thĩ na gaikie kanua. No mũndũ mũgima ũrataũkĩrũo nĩ ũgwati wa gwĩka ũguo ndangĩka ũndũ ta ũcio. Kwoguo tũreganaga na ngʼano cia maheeni tondũ nĩ tũĩ kĩhumo gĩacio. Handũ ha ũguo, tũthikagĩrĩria “ciugo iria ciagĩrĩire” cia ma.—Thoma 2 Timotheo 1:13.

18. Tũngĩonania atĩa atĩ nĩ twĩhokete ithondeka rĩa Jehova?

¹⁸ Twathuthuria o njĩra ithatũ tu ironania ũrĩa ithondeka rĩa Jehova rĩĩgerekanagia na kĩonereria kĩa Jesu. Ũkĩĩruta Bibilia no ũthuthurie njĩra ingĩ ciĩgiĩ ũrĩa ithondeka ritũ rĩrũmagĩrĩra kĩonereria kĩa Jesu. Teithia andũ arĩa angĩ kĩũngano-inĩ kĩanyu mathiĩ na mbere kwĩhoka ithondeka rĩa Jehova. Onanagia atĩ nĩ wĩhokete ithondeka rĩrĩa Jehova arahũthĩra kũhingia wendi wake, na njĩra ya gũtwarana narĩo na gũtungatĩra Jehova ũrĩ mwĩhokeku. (Thab. 37:28) Rekei hingo ciothe tuonanagie atĩ nĩ tũkenagĩra gũkorũo gatagatĩ-inĩ ka andũ a Jehova ehokeku na marĩ wendo.