1. Wa’ faso kisalu vanda salamaka na siècle ya ntete na dibuundu ya Yehova?

 NTANGU Yehova ke pesaka kisalu na bisadi ya yandi, yandi ke zolaka ve ya salama na muvusu. (1 Ko. 14:33) Na kifwani, Nzambi ke na nsatu ba samuna nsangu ya mbote na yinza nyonso. (Mat. 24:14) Samu na kutwadisa kisalu yango, Yehova me tula Yesu. Yandi salaka nyonso samu bamambu salama na mutindu ya mbote. Na siècle ya ntete, samu na kutwadisa bimvuka Yesu sadilaka bakuluntu. (Bis. 14:23) Na Yerusalemi, Kimvuka ya bantwadisi yina vandaka na bantumwa mpe bakuluntu na kati ya yawu, vanda bakaka mikanu mpe bimvuka nyonso vanda tumama na yawu. (Bis. 15:2; 16:4) Samu ba vanda tumamaka na misiku yina ba vanda pesaka bawu ‘kilumbu na kilumbu, lutangu ya bandimi vanda bwelama.’​—Bis. 16:5.

2. Kubanda 1919, wa’ faso Yehova ke na twadisaka mpe ke na dikisaka dikanda ya yandi na kimpeve?

² Bubu yayi mpe, Yehova ke na twadisaka kaka bisadi ya yandi. Kubanda 1919 tii bubu yayi, Yesu ke na sadilaka mwa kikunku ya bantu yina ba tulaka mafuta samu na kutwadisa kisalu ya beto ya kusamuna mpe na kupesa beto madya ya kimpeve. a (Luke 12:42) Ya ke na talanaka pwelele ti Yehova ke na sakumunaka kisalu ya bawu.​—Iza. 60:22; 65:13, 14.

3-4. a) Wapi bambote beto ke kuzwaka samu ba ke twadisaka beto? b) Yinki beto ke zonzila na disolo yayi?

³ Kana dikanda ya Yehova vandaka ve na bantu yina ke twadisaka yawu, beto zola lenda ve kusala kisalu yina Yesu pesaka beto. (Mat. 28:19, 20) Na kifwani, kana ba vanda pesa ve beto kisika ya kusamuna, muntu ni muntu zola samuna na kisika yina yandi  mosi me zola. Ya zola sala ti beto samuna mingi na bisika mosi, kasi beto zimbana bisika ya nkaka. Ntangu ya nkaka, nge lenda kanisa na bambote yina beto ke kuzwaka samu ba ke na twadisaka beto.

⁴ Kaka Mutindu Yesu vanda twadisa bilandi ya yandi na ntangu yandi vandaka awa na ntoto, yandi ke na bikaka ve na kutwadisa beto bubu yayi. Na disolo yayi, beto ke tala kifwani yina Yesu bikaka, mpe wa’ faso dibuundu ya Yehova ke na landaka kifwani ya yandi. Beto ke tala mpe wa’ faso beto lenda lakisa ti beto ke tulaka ntima na dibuundu ya Yehova.

DIBUUNDU YA BETO KE LANDAKA KIFWANI YA YESU

5. Wapi yina ke mosi ya bafaso yina beto ke landaka kifwani ya Yesu? (Yoane 8:28)

⁵ Bamambu yina Yesu vanda sala to vanda zonza katukaka na Tata ya yandi. Bubu yayi, kimvuka ya Yehova ke landaka kifwani ya Yesu. Ba ke sadilaka Biblia samu na kusadisa beto na kuzaba yinki ke mbote to yimbi, mpe samu na kupesa beto malongi. Yoane 8:28 (NWT) ke zonzaka: Na yina, Yesu zonzaka ti: “Ntangu beno ke zangula Mwana ya muntu, beno ke zaba ti mu kele yandi, mpe ti mu ke salaka ata kima mosi ve na mabanza ya munu mosi; kasi mu ke zonzaka mambu yayi mutindu Tata longaka munu.” (2 Tim. 3:16, 17) Ntangu nyonso, ba ke bambulaka beto na kutanga mpe na kusadila mambu ya Nzambi. Wapi bambote beto lenda kuzwa kana beto landa dilongi yayi?

6. Ntangu beto ke longokaka Biblia, wapi yina ke mosi ya bambote beto ke kuzwaka?

⁶ Kulongoka Biblia na nzila ya mikanda ya beto ke natinaka beto bambote mingi. Na kifwani, ya ke sadisaka beto na kutala kana bamambu yina dibuundu ke zonzilaka beto ke kwelanaka na yina Biblia ke zonzaka. Kutala mutindu dibuundu ke sadilaka Biblia samu na kutwadisa beto, ke sadisa beto na kutula ntima na yawu.​—Rom. 12:2.

7. Wapi nsangu Yesu vanda samunaka, mpe wa’ faso dibuundu ya Yehova ke landaka kifwani ya yandi?

⁷ Yesu vanda samuna “nsangu ya mbote ya Kimfumu ya Nzambi.” (Luke 4:43, 44) Yesu lombaka mpe na bilandi ya yandi na kusamuna Kimfumu. (Luke 9:1, 2; 10:8, 9) Bubu yayi, bantu nyonso yina ke na kati ya dibuundu ya Yehova, ata kisika ni kisika ba kele, ata ba yina ke twadisaka beto, bawu nyonso ke samunaka nsangu ya mbote ya Kimfumu.

8. Wapi bweso beto ke na yawu?

⁸ Samu na beto, ya ke bweso ya nene na kukabula nsangu ya mbote ya Kimfumu na bantu ya nkaka! Kanisa ntete. Ntangu Yesu vandaka awa na zulu ya ntoto, yandi pesaka ve bambazi ya yimbi bweso ya kusamuna nsangu ya mbote na yina me tadila yandi. Ya ke na lakisaka ti bantu nyonso ve ke na bweso ya kusamuna nsangu ya mbote (Luke 4:41) Bubu yayi, tekila muntu samuna kintwadi na dibuundu ya Yehova, yandi me fwana kusadila mambu ya Biblia na luzingu ya yandi nyonso. Beto ke lakisaka ti beto ke sepelaka na bweso yayi, ntangu beto ke samunaka na bantu nyonso, mpe na bisika nyonso yina beto kele. Kaka mutindu Yesu, beto me bonga kusala bangolo ya beto nyonso samu na kulonga matsyeleka ya Kimfumu na bantu nyonso.​—Mat. 13:3, 23; 1 Ko. 3:6.

9. Yinki dibuundu ya Nzambi ke salaka samu bantu zaba nkumbu ya Nzambi?

⁹ Yesu salaka ti bantu zaba nkumbu ya Nzambi. Yandi zonzaka na Tata ya yandi: “Mu me zabisa bawu nkumbu ya nge.” (Yoa. 17:26) Kaka mutindu Yesu, dibuundu ya Yehova ke salaka nyonso samu bantu zaba nkumbu ya Nzambi. Mbangudulu ya Yinza ya Malu-Malu kwizaka sala kisalu ya nene na kuvutula nkumbu ya Nzambi na bisika nyonso yina ya vandaka ntangu ba sonikaka Biblia. Dibuundu ya Yehova me bangula Biblia na bandinga kuluta 270. Na kati ya ‘Yina ba me bwela’ (Appendices) A4 na A5 ba ke zonzilaka mbote-mbote samu na yinki mpe wa’ faso ba  vutulaka nkumbu ya Nzambi na Mbangudulu ya Yinza ya Malu-Malu. Yina ba me bwela C, ya Bible d’étude ke lakisaka samu na yinki nkumbu ya Nzambi me lunga kuvanda bambala 237 na kati ya masonoko ya bakristo na ndinga ya Greke.

10. Yinki kifwani ya kento ya Myanmar ke na longaka beto?

¹⁰ Mutindu Yesu beto ke salaka bangolo samu bantu zaba nkumbu ya Nzambi. Ntangu kento mosi yina ke vandaka na bwala ya Myanmar mpe yina ke na bamvula 67 kuwaka ti Nzambi ke na nkumbu yandi bandaka kudila mpe zonzaka: “Yayi ke mbala ya ntete na luzingu ya munu na kuwa ti nkumbu ya Nzambi ke Yehova. . . . Kuzaba yawu ke mambu ya kulutila mfunu yina beno me longa munu.” Faso kifwani yayi ke na lakisaka yawu, kuzaba nkumbu ya Nzambi lenda soba luzingu ya bantu ya mbote.

LAKISA TI NGE KE TULAKA NTIMA NA DIBUUNDU YA YEHOVA

11. Wapi mutindu bakuluntu lenda lakisa ti ba ke tulaka ntima na dibuundu ya Yehova? (Tala mpe kizizi.)

¹¹ Beto zonzila faso mosi yina bakuluntu lenda lakisa ti ba ke tulaka ntima na dibuundu ya Yehova. Ntangu ba ke kuzwaka malongi yina dibuundu ya Yehova ke pesaka, ya ke mfunu bakuluntu tanga yawu mbote-mbote mpe ba sala nyonso samu na kusadila yawu. Na kifwani, bakuluntu ke landaka malongi ya dibuundu samu na kusala ba discours mpe kusambila samu na kimvuka. Ba ke landaka mpe yina dibuundu ke zonzaka na faso ya kukipe mameme ya Kristo. Bakuluntu yina ke landaka malongi nyonso yina ke katukaka na dibuundu, ke sadisaka bampangi ya kimvuka na kutala ti Yehova ke zolaka bawu mpe ke bumbaka bawu.

12. a) Samu na yinki beto me bonga kusala kintwadi na ba yina ke twadisaka beto? (Baebre 13:7, 17) b) Samu na yinki beto me bonga kutula makanisi ya beto na bamambu ya mbote yina bakuluntu ke salaka?

¹² Ntangu beto ke kuzwaka malongi yina bakuluntu ke pesaka beto, beto me bonga kulanda yawu na ntima mosi. Biblia ke lombaka na beto na kutumama mpe na kuzitisa ba yina ke twadisaka beto. (Tanga Baebre 13:7, 17.) b Samu bakuluntu ke bantu ya masumu, bantangu ya nkaka ya lenda vanda mpasi na beto na kusala yawu. Kasi, kana beto tula kaka makanisi na bafoti ya bawu na kisika ya kutala bamambu nyonso ya mbote yina ba ke salaka, beto ke sala kisalu ya bambeni ya beto. Samu na yinki beto ke na zonzaka yawu? Bambeni ya beto zola ti beto vanda na ntembe ti Yehova ke na sadilaka dibuundu ya yandi samu na kutwadisa beto. Kana beto ke na ntembe na bakuluntu, ya ke nata beto na kuvanda na bantembe na dibuundu mpe beto ke tudila dyaka ve yawu ntima. Wa’ faso beto lenda zaba mitambu yango samu na kubwa ve na yawu?

KUNDIMA VE TI BANTU YA NKAKA NATA NGE NA KUTULA DYAKA VE NTIMA NA DIBUUNDU YA YEHOVA

13. Wa’ faso bambeni ya beto ke balulaka bamambu yina dibuundu ke salaka?

¹³ Bambeni ya Nzambi ke balulaka bamambu ya mbote yina dibuundu ke salaka. Na kifwani Biblia ke lakisaka ti Yehova ke na nsatu bisadi ya yandi vanda ya kuvedila na luzingu ya bawu nyonso. Yandi ke zonzaka mpe ti ba basisa na dibuundu muntu nyonso yina ke na ndyatulu ya yimbi mpe yina zola ve kusoba mpe kubalula ntima. (1 Ko. 5:11-13; 6:9, 10) Kasi samu beto ke tumamaka na mambu yayi yina Yehova me zonza, bambeni ya beto ke zonzaka ti beto ke zolaka ve bantu, beto ke bantu ya yimbi mpe ya ntima ngolo.

14. Nani ke na manima ya luvunu yina ba ke zonzilaka na nkumbu ya dibuundu ya Yehova?

 ¹⁴ Zaba nani ke bumbanaka na manima ya ba yina ke nwanisaka dibuundu ya beto. Satana ke muntu yina ke bumbanaka na manima ya yawu. Yandi ke “tata ya luvunu.” (Yoa. 8:44; Kub. 3:1-5) Na yawu, ya ke na pamusaka ve beto ti Satana ke na sadilaka bantu samu na kuvunina dibuundu ya Yehova bamambu. Ni yawu salamaka na Yesu, mpe bakristo ya ntete.

15. Yinki bamfumu ya mabuundu ya bazwife salaka na Yesu mpe na bilandi ya yandi?

¹⁵ Samu yandi vandaka mwana ya Nzambi, Yesu vandaka ya kulunga mpe salaka bimangu mingi. Ata mpila yina Satana sadilaka bantu samu na kuvunina bamambu mingi na nkumbu ya yandi. Na kifwani, bamfumu ya mabuundu ya bazwife vanda zonza ti Yesu vanda bingisaka bampeve ya yimbi “na ngolo ya mfumu ya mpeve ya yimbi.” (Mrk. 3:22) Na mantwala ya Pilate, ba zonzaka ti Yesu vwezaka Nzambi mpe nataka bantu na kuzonza ti ba kufwa yandi. (Mat. 27:20) Na manima, ntangu bilandi ya Yesu vanda samuna nsangu ya mbote, ba salaka ti bantu kuma bambeni ya bawu mpe nyokola bawu. (Bis. 14:2, 19) Na yina me tadila Bisalu 14:2, Yinzo ya Kengidi ya 1^er décembre 1998 zonzaka: “Bazwife yango mangaka kuwa nsangu ya mbote, kasi ba sukaka ve kaka kuna. Ba salaka nyonso samu na kunata ba yina vandaka ve bazwife na kuwa ve bakristo, mpe kuyina bawu.”

16. Yinki beto me bonga kuzimbana ve, ntangu beto ke kuwaka mambu ya luvunu na yina me tadila dibuundu ya Yehova?

¹⁶ Satana me kanga ve maboko. Tii bubu yayi, yandi ke na bikaka ve “kuvuna bantu nyonso.” (Luz. 12:9) Ya ke na pamusaka ve beto na kuwa mambu ya luvunu yina ba ke zonzaka na dibuundu to na bampangi yina ke twadisaka, samu ti ni yawu bambeni ya Nzambi salaka na Yesu mpe  na bilandi ya yandi na siècle ya ntete. Mutindu Yesu zonzaka yawu, bambeni ya dibuundu ya Yehovah ke talisaka beto mpasi, mpe ke vuninaka beto bamambu. (Mat. 5:11, 12) Kuzaba ti mambu ya luvunu yayi ke katukaka na Satana, ke sadisa beto na kukwikila ve na yawu. Yinki beto me bonga kusala samu ba vuna ve beto?

17. Yinki beto lenda sala samu na kubwa ve na bamambu ya luvunu? (2 Timote 1:13) (Tala mpe encadré “ Yinki beto me bonga kusala na mantwala ya mambu ya luvunu.”)

¹⁷ Manga kuwa bamambu ya luvunu. Ntumwa Polo zonzaka pwelele yinki beto me bonga kusala na mantwala ya mambu ya luvunu mpe yandi zonzaka na Timote “na kuzabisa na bantu ya nkaka na . . . kutula ve dikebi na masolo ya luvunu” mpe na “kumanga masolo ya luvunu.” (1 Tim. 1:3, 4; 4:7, nwt-MK) Mwana ya fioti lenda lokota kima ya mvindu na ntoto mpe kutula yawu na yinwa. Kasi kuluntu lenda sala ve yawu, samu yandi zaba ti ya lenda natina yandi maladi. Mutindu mosi mpe beto ke mangaka kuwa mambu ya luvunu samu ti beto zaba nani ke na manima ya yawu. Beto ke kangamaka kaka na “mambu ya tsyelika” yina ba zabisaka beto.​—2 Timote 1:13 ke zonzaka: ‘Baka mutindu kifwanusu mambu ya tsyeleka yina mu zabisaka nge, mpe sikama mbote na kiminu mpe luzolo yina ke katukaka na Yesu Kristo.’

18. Wapi mutindu nge lenda lakisa ti nge ke sepelaka na bweso yina nge ke na yawu na kuvanda na dibuundu ya Yehova?

¹⁸ Dibuundu ya Yehova ke landaka kifwani ya Yesu na bamambu mingi, kasi beto me tala kaka tatu ya yawu. Ntangu nge ke longokaka Biblia, sosa nge mosi bafaso ya nkaka yina dibuundu ke landaka kifwani ya Yesu. Sadisa bampangi ya nkaka ya kimvuka samu ba tula dyaka ntima na dibuundu ya Yehova. Yinki ke lakisa ti nge ke na tulaka ntima na Yehova? Vanda kaka ya kukangama na Yehova mpe na dibuundu yina yandi ke sadilaka samu na kulungisa kisalu ya yandi. (Nku. 37:28) Beto tatamana na kulakisa ti beto ke sepelaka na bweso yina beto ke na yawu na kuvanda na kati ya dibuundu ya Yehova, na bantu yina ke ya kukangama na yandi mpe ke zolaka yandi.